သတင်းနှင့် လှုပ်ရှားမှုများ

  စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ၂၀၂၃ခုနှစ်၊ ဇူလိုင်လ ၇ရက်နေ့၊ နံနက်ပိုင်းအချိန်တွင် ရေတာရှည်မြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာနခန်းမ၌ပြုလုပ်သည့် စာဖတ်ဝိုင်းသို့တက်ရောက်လာကြသော စာပေဝါသနာရှင်များကို စားသုံးသူကာကွယ်ရေးဆိုင်ရာသိကောင်းစရာများကို အသိပညာပေးဆွေးနွေးခဲ့ပါသည်။

  မြို့နယ်တာဝန်ခံက Commerce Journal အတွဲ(၂၂)၊ အမှတ် (၇) တွင်ပါရှိသည့် “စားသုံးသူအခွင့်အရေးပြည့်ဝစွာရရှိဖို့ ပြည်သူအားလုံးပူးပေါင်းပါဝင်ဆောင်ရွက်ကြပါစို့” ခေါင်းစဉ်ပါ ဆောင်းပါးအချက်အလက်များကိုဆွေးနွေးခဲ့ပြီးနောက် တက်ရောက်လာကြသည့် စာပေဝါသနာရှင်များ၏သိလိုသည်များကို ပြန်လည်ရှင်းလင်း၍ဖြေကြားခဲ့ပါသည်။

 စာဖတ်ဝိုင်းသို့ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယမြို့နယ်ဦးစီးမှူး ဒေါ်ကြူကြူခိုင်နှင့် စာပေဝါသနာရှင် ၈ဦးတို့တက်ရောက်ခဲ့ကြကြောင်း သိရပါသည်။

DOCA(ပဲခူး)

  စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်း ဈေးကွက်များတွင်ရောင်းချနေသော ကုန်စည်များ၏ ကုန်အညွှန်းအမှတ်အသားများပြည့်စုံမှန်ကန်မှုရှိစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက်ရည်ရွယ်၍ ကုန်ပစ္စည်းထုတ်လုပ်ရောင်းချနေသော စီးပွားရေးလုပ်ငန်းရှင်များကို ၂၀၂၃ခုနှစ်၊ ဇူလိုင်လ (၅) ရက်နေ့၊ နေ့လယ်ပိုင်းအချိန်တွင် စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအစည်းအဝေးခန်းမ၌ စားသုံးသူအသိပညာပေးဟောပြောဆွေးနွေးခဲ့ပါသည်။

 ဆွေးနွေးပွဲတွင် စားသုံးသူရေးရာဦးစီးဌာန၊ ပြည်ခရိုင်ဦးစီးမှူး ဦးမင်းဆွေက စားသုံးသူကာကွယ်ရေးဥပဒေ ၂၀၁၉ပါ စားသုံးသူတို့၏အခွင့်အရေးများ၊ စီးပွားရေးလုပ်ငန်းရှင်တို့လိုက်နာရမည့်ပြဋ္ဌာန်းချက်များ၊ ကုန်ပစ္စည်းများပေါ်တွင် ရေးသားဖော်ပြရမည့် ကုန်အညွှန်းအမှတ်အသားရေးသားဖော်ပြခြင်းဆိုင်ရာအချက်များနှင့် စားသုံးသူကာကွယ်ရေးဥပဒေအရ အရေးယူဆောင်ရွက်နိုင်သည့် ပြစ်မှုပြစ်ဒဏ်အကြောင်းတို့ကို အကျယ်တဝင့်ရှင်းလင်းဆွေးနွေးခဲ့ကာ တက်ရောက်လာကြသော စီးပွားရေးလုပ်ငန်းရှင်များ၏ သိရှိလိုသည်များကို ပြန်လည်မေးမြန်းမှုများအပေါ်  ရှင်းလင်းဆွေးနွေးခြင်းတို့ဆောင်ရွက်ခဲ့ကြပါသည်။

 အဆိုပါ ဆွေးနွေးပွဲသို့ လုပ်ငန်းရှင် (၂၀) ဦးတက်ရောက်ခဲ့ကြပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များလည်းဖြန့်ဝေပေးခဲ့ကြောင်း သိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး၊       စားသုံးသူရေးရာဦးစီးဌာန၊ မြောင်းမြခရိုင် မြောင်းမြမြို့နယ် ဦးစီးမှူး ဦးလှထွဋ်ဦးသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ (၆.၇.၂၀၂၃)ရက်နေ့၊ နံနက် (၁၀:၃၀)နာရီတွင်  မြို့ပေါ်ရှိစတိုးဆိုင်နှင့် မုန့်မျိုးစုံဆိုင်များတွင် ရောင်းချနေသောမုန့်များနှင့် အချိုရည်ဘူးများတွင် ကုန်အညွှန်းအမှတ်အသားဖော်ပြချက်  ပြည့်စုံခြင်းရှိ/မရှိ ကွင်းဆင်းစစ်ဆေးခဲ့ပါသည်။

    ထိုသို့ ကွင်းဆင်းစစ်ဆေးဆောင်ရွက်ရာတွင် မြောင်းမြမြို့နယ်ဦးစီးမှူးမှ ဈေးအတွင်းရောင်းချနေသော   Coca-Cola Pinya Beverages Myanmar (CCPBM)ထုတ်လုပ်သော Sprite တံဆိပ်ဖြင့် ပုံစံတူ ကုန်အညွှန်းအမှတ်အသားဖော်ပြချက်နှင့် ကိုက်ညီမှုမရှိသော Sprite အချိုရည်ဘူးများ ရောင်းချမှုရှိ/မရှိ ဈေးကွက်စောင့်ကြည့်စစ်ဆေးခဲ့ပြီး စတိုးဆိုင်နှင့် မုန့်မျိုးစုံဆိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ ၂၀၁၉ ပါ ပြဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊တားမြစ်ချက်များ၊ ဥပဒေအခန်း(၂၄)ပါ ပြစ်မှုပြစ်ဒါဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြစ်စေ၊ မြန်မာဘာသာနှင့် အခြားဘာသာတစ်ခု (သို့)တစ်ခုထက်ပို၍ တွဲလျက်ဖြစ်စေ၊ ရေးသားဖော်ပြရမည်ဖြစ်ကြောင်း၊ မိမိတို့ရောင်းချနေသော ကုန်စည်အမျိုးအစားအလိုက် သတ်မှတ်ထားသည့် ဥပဒေများနှင့်အညီ လိုက်နာဆောင်ရွက်ကြရန် ဌာနအနေဖြင့် ဈေးကွက်စောင့်ကြည့်စစ်ဆေးမှုများ စဉ်ဆက်မပြတ်ဆောင်ရွက်သွားမည်ဖြစ်ကြောင်း သိရှိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ မအူပင်ခရိုင် ပန်းတနော်မြို့နယ်သည် ရပ်ကွက်(၄)ခုရှိပြီး ကျေးရွာအုပ်စု (၅၂)အုပ်စုရှိပါသည်။ စိုက်ပျိုးရေးကဏ္ဍကို အဓိကထားဆောင်ရွက်လျက်ရှိသဖြင့် ပန်းတနော်မြို့နယ်၏ ကျေးရွာအုပ်စု (၅၂)အုပ်စုမှ တောင်သူများ စိုက်ပျိုးထုတ်လုပ်သည့် စပါးများကို ပုသိမ်-ရန်ကုန်ကားလမ်းဘေးရှိ ဆန်စက်ကြီး (၁၈)လုံးဖြင့် ကြိတ်ခွဲထုတ်လုပ်ပြီး ပြည်တွင်းဆန်ဈေးကွက်နှင့် ပြည်ပနိုင်ငံများသို့ တင်ပို့ဆောင်ရွက်နိုင်ရေးကို ဆောင်ရွက်လျက်ရှိသလို ခေတ်စနစ်နှင့် လျော်ညီသော Global Earth Argo & Aqua Public Co Ltd ၏ စနစ်သစ်မြစ်ငါးတန် မွေးမြူရေး၏ ဈေးကွက်ရရှိမှုကိုလည်း ပန်းတနော်မြို့နယ်တွင် တွေရှိရပါသည်။

   စနစ်သစ်မြစ်ငါးတန်မွေးမြူရေးလုပ်ငန်း၏ အောင်မြင်မှုရရှိသည့် အခြေအနေကောင်းများကဲ့သို့ ပန်းတနော်မြို့နယ် ဥတိုကျေးရွာတွင်  ဦးနေမင်းလုပ်ကိုင်ဆောင်ရွက်နေသော ထူးထက်ဟန် ကုမ္ပဏီ၏ စနစ်သစ် အသားတိုးဝက် မွေးမြူရေးလုပ်ငန်းခွင်အကြောင်းနှင့် ဈေးကွက်ရရှိမှု အလားအလားကောင်းများကို တွေ့ရှိခဲ့ရှိသည်။

    ထူးတက်ဟန်ကုမ္ပဏီပိုင်ရှင် ဦးနေမင်း၏ ပြောပြချက်အရ အသားတိုးဝက်မွေးမြူရေး စီမံကိန်းကို ပန်းတနော်မြို့နယ် ဘဝိုင်းကျေးရွာအုပ်စု ဥတိုကျေးရွာရှိ ဧက (၁၅၀)ပေါ်တွင် စီမံကိန်းချ အကောင်အထည် ဖော်ဆောင်ရွက်လျက်ရှိပြီး၊ အလျား ၂၆၂ ပေ၊ အနံ ၄၃ ပေရှိ၊ အဆောက်အဦးအတွင်း ဝက်တစ်ကောင်လျှင် (၁၈၀၀၀၀/-)ကျပ် ဖြင့် ဝယ်ယူ၍ တစ်ခြံတွင် အကောင်ရေ (၆၅၀)ခန့် မွေးမြူခဲ့ပါသည်။

     ၁.၁၂.၂၀၂၀ ခုနှစ်တွင် မိမိတို့၏ လုပ်ငန်းရှင်(၃)ဦးဖြင့် အစုအဖွဲ့ ဖွဲ့စည်းပြီး စတင်မွေးမြူခဲ့ပါသည်။ တစ်ခြံလျှင် အသားတိုးဝက် (၆၅၀)ကောင်ဖြင့် (၈)ခြံစတင်မွေးမြူခဲ့ပါသည်။ အသားတိုး ဝက်များကို  စနစ်သစ်အလုံပိတ် အအေးပေးစနစ်ဖြင့် မွေးမြူခဲ့ကြောင်းကိုလည်း ရှင်းပြခဲ့ပါသည်။ အသားတိုးဝက်များကို အလုံပိတ် အအေးပေးစနစ်နှင့် မွေးမြူထားပြီး မွေးခါစတွင် CP ကုမ္ပဏီမှ ထုတ်လုပ်သောဝက်သား ၉၅၀ KPအစားအစာကျွေးပြီး အသားတိုးဝက်ကြီး ထွားလာမှုအပေါ်မူတည်၍ ၉၅၁ Kp နှင့် ၉၅၂ KP တို့ကို အသားတိုး ဝက်များ၏ စားနိုင်သ၍ နေ့စဉ် စနစ်တကျ ကျွေးမွေးရပါသည်။

    အသားတိုးဝက်များကို စတင်မွေးမြူသည်မှ (၁၄၅)ရက်သား အချိန်တွင် ဝက်တစ်ကောင်လျှင် ပိဿာချိန် ၆၀ မှ ၈၀ ပိဿာထိ ရှိသော အသားတိုးဝက်များကို ရရှိပါသည်။ မိမိတို့မွေးမြူထားသော အသားတိုးဝကိများကို City Marth များနှင့် မိုက်ခရိုဈေးကွက်တွင် ဈေးကွက်ရရှိပြီး တစ်ပိဿာလျှင် (၁၀၈၀၀)ကျပ်ဖြင့် အရောင်းအဝယ်ရရှိသောကြောင့် ဈေးကွက်ခိုင်မာမှုရှိပြီး ဈေးကောင်းရရှိသည်ဟု ရှင်းလင်းပြောပြခဲ့ပါသည်။

    ၂၀၂၂/၂၀၂၃ ဘဏ္ဍာနှစ်တွင် မိမိတို့ ထူးထက်ဟန်ကုမ္ပဏီ၏ အသားတင်အမြတ်မှာ သိန်း(၁၉၀၀) ကျော် အကျိုး အမြတ်ရရှိခဲ့ကြောင်း ဦးနေမင်းထံမှ သိရှိရပါသည်။

  စားသုံးသူရေးရာဦးစီးဌာန၊ ပန်းတနော်မြို့နယ်တာဝန်ခံ ဦးပိုးဖြူပိုင်မင်းနှင့် ဝန်ထမ်းများသည် ၂၀၂၃ခုနှစ် ဇူလိုင်လ ပထမပတ်တွင် ထူးထက်ဟန် ကုမ္ပဏီ၏ ဝက်သားတိုး မွေးမြူရေးလုပ်ငန်းခွင်သိူ့ သွားရောက်လေ့လာခဲ့ပြီး ပြည်တွင်းကုန်သွယ်မှု ဈေးကွက်ရရှိနိုင်မှုနှင့် စားသုံးသူများ၏ လိုအပ်ချက် ဖြည့်ဆည်းနိုင်မှုများကို အပြန်အလှန် ရှင်းလင်းဆွေးနွေးခဲ့ပြီး ထူးထက်ဟန် ကုမ္ပဏီ၏ အသားတိုး ဝက်မွေးမြူရေးလုပ်ငန်းသည် သန့်ရှင်းလတ်ဆက်မှုရှိပြီး စားသုံးသူအတွက် ဘေးကင်းစွာစားသုံးနိုင်မှုနှင့် ဈေးကွက်ရရှိမှုအလားအလာကောင်းများကို တွေ့ရှိရကြောင်း တင်ပြလိုက်ရပါသည်။

DOCA(ဧရာဝတီ)

       စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးနှင့်အဖွဲ့သည် မြန်အောင်မြို့နယ်၊ မျှင်ဝါးတောင်ကျေးရွာ၊ အခြေခံပညာ အထက်တန်းကျေင်းခွဲရှိ ဆရာ၊ ဆရာမ ၂၀ ဦးနှင့် ကျောင်းသား၊ ကျောင်းသူ ၃၅၀ ဦးတို့ကို (၆.၇.၂၀၂၃)ရက်နေ့၊ နံနက် (၁၀:၀၀)နာရီ တွင်လည်းကောင်း၊ မြန်အောင်မြို့နယ်၊ အုတ်ရှစ်ကုန်းရွာအခြေခံပညာအထက်တန်ကျောင်းရှိ ဆရာ၊ ဆရာမ ၁၉ ဦးနှင့် ကျောင်းသား/သူ ၄၁၅ ဦးတို့ကို (၆.၇.၂၀၂၃) ရက်နေ့၊ နေ့လယ် (၁၃:၀၀) တွင်လည်းကောင်း၊ စားသုံးသူကာကွယ်ရေး အသိပညာပေးဟောပြောခဲ့ပါသည်။

      ဟောပြောပွဲတွင် မြို့နယ်ဦးစီးမှူး ဦးမြင့်အောင်က စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့် တာဝန်များအကြောင်း၊ အစားအသောက်နှင့် ကုန်စည်များတွင် ဖော်ပြရမည့် ကုန်အညွှန်းအမှတ်အသားများ အကြောင်း၊ ဝယ်ယူအသုံးပြုခဲ့သော ကုန်စည်နှင့် ဝန်ဆောင်မှုများကြောင့် နစ်နာဆုံးရှုံးမှုများ ဖြစ်ပေါ်လာပါက ပြောဆိုတင်ပြတိုင်ကြားခွင့်နှင့် ပြန်လည်ကုစားနိုင်ခွင့်များအကြောင်းကို အကျယ်တဝင့် ရှင်းလင်းဆွေးနွေး ဟောပြောခဲ့ပါသည်။

       ဟောပြောပွဲအပြီးတွင် မြို့နယ်ဦးစီးမှူးနှင့်အဖွဲ့သည် ကျောင်းမုန့်ဈေးတန်းကော်မတီဝင်များနှင့်အတူ ကျောင်းမုန့်ဈေးတန်းများရှိ ရောင်းချနေသော မုန့်များတွင် ကုန်အညွှန်းအမှတ်အသား ပြည်စုံ မှုရှိ/မရှိ ကွင်းဆင်းစိစစ် ခဲ့ပြီး၊ ကုန်အညွှန်းအမှတ်အသားပြည့်စုံသော မုန့်များကိုသာ ရောင်းချရန် မုန့်ဈေးတန်းရောင်းချသူများကို မှာကြားခဲ့ကြောင်း သိရှိရပါသည်။

DOCA(ဧရာဝတီ)