သတင်းနှင့် လှုပ်ရှားမှုများ

          စစ်ကိုင်းတိုင်းဒေသကြီး၊ စားသုံးသူရေးရာဉီးစီးဌာန၊ ကလေးဝမြို့နယ်တာဝန်ခံသည် အောက်တိုဘာလ ( ၃ ) ရက်နေ့ နံနက်(၁၀:၀၀)နာရီအချိန်၌ ကလေးဝမြို့ ( အမှတ်-၂  )  ကျောင်းတွင် အားကစားနှင့်လူငယ်ရေးရာဆိုင်ရာ ဦးစီးဌာနနှင့် ပူးပေါင်း၍ အသိပညာပေးဟောပြောပွဲ ကျင်းပပြုလုပ်ခဲ့ပါသည်။

           အဆိုပါဟောပြောပွဲသို့ ဆရာ/ဆရာမ ( ၉ ) ဉီး၊ ကျောင်းသား/ ကျောင်းသူ ( ၂၄၇ ) ဦး၊ စုစုပေါင်း( ၂၅၆ )ဦး တက်ရောက်ခဲ့ပါသည်။ ဦးစွာပထမ ကျောင်းအုပ်ဆရာကြီး ဦးစိန်မြင့်မှ  အဖွင့်အမှာစကားပြောကြားခဲ့ပြီး  အားကစားနှင့်လူငယ်ရေးရာဝန်ကြီးဌာနှ ဦးစီးအရာရှိ ဒေါ်ခင်ပြုံးရီမှ အားကစားပြုလုပ်ခြင်းဖြင့် ခန္ခာကိုယ်ဖွံ့ဖြိုးတိုးတက်ရေး၊ ကျန်းမာရေးကောင်းမွန်စေရေးအတွက် အားကစားပညာရပ်များ၊ ကိုယ်လက်လေ့ကျင့်ခန်းများကို ပုံမှန်နေ့စဉ်လေ့ကျင့်သင့်သည့်အကြောင်း အရာများ ဆွေးနွေးပြောကြားခဲ့ပြီး၊ ကလေးဝမြို့နယ် စားသူရေးရာဦးစီးဌာန မြို့နယ်တာဝန်ခံ ဦးကျော်ကျော်မိုးမှ စားသုံးသူအခွင့်အရေးသိကောင်းစရာများ၊ အစားအစာများ၊ ဆေးဝါးများကို ဝယ်ယူအသုံးပြုရာတွင် သတိပြုဝယ်ယူရမည့် အချက်အလက်များကို  အသိပညာပေးဟောပြောခဲ့ပြီး ဟောပြောပွဲအခမ်းအနားကို နံနက်(၁၁:၀၀)နာရီ အချိန်တွင် ပြီးမြောက်ခဲ့ပါကြောင်း သတင်းရရှိရပါ သည်။

DOCA(စစ်ကိုင်း)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းတို့ ပူးပေါင်းစီစဉ်မှုဖြင့်  တနင်္သာရီတိုင်းဒေသကြီး၊ ကော့သောင်းခရိုင် စားသုံးသူရေးရာဦးစီး ဌာနမှတာဝန်ရှိသူများ၊ စည်ပင်သာယာရေးမှ ဈေးတာဝန်ခံများကြီးကြပ်မှုဖြင့် ကော့သောင်းခရိုင်ဆီကုန် သည်နှင့်ဆီလုပ်ငန်းရှင်များအသင်းမှ ၂၀၂၂ခုနှစ်၊ နိုဝင်ဘာလ ၃ ရက်နေ့တွင် အေးမြကန်သာရပ်ကွက်ရှိ နွယ်သာဂီလမ်းနှင့်လမ်းသွယ်များ၊ မနော်ဟယ်ရီလမ်း တို့တွင် စားသုံးသူပြည်သူများအား သက်သာ သည့်ဈေးနှုန်းဖြင့် စားသုံးဆီများရောင်းချပေးလျက်ရှိကြောင်းသိရပါသည်။

        မြို့နေပြည်သူများ ချက်ပြုတ်စားသောက်မှုကိစ္စများ တစ်ဖက်တစ်လမ်းမှအဆင်ပြေကြစေရန် မီးဖိုချောင်သုံး စားသုံးဆီများကို သက်သာသည့်ဈေးနှုန်းဖြင့် ရောင်းချပေးခြင်းဖြစ်ရာ လူတစ်ဦးလျှင် တစ်ပိဿာ(၄၇၀၀)ကျပ်နှုန်းဖြင့် မည်သူမဆိုလွတ်လပ်စွာဝယ်ယူနိုင်ရေး ဈေးကားဖြင့် လိုက်လံရောင်း ချပေးလျက်ရှိပြီး ဝယ်ယူသည့်ပြည်သူများအား ကော့သောင်းဆီကုန်သည်နှင့်ဆီလုပ်ငန်းရှင်များအသင်း မှ MASK များအား အခမဲ့ပေးဝေခဲ့ကြောင်း သိရှိရပါသည်။ အလားတူရောင်းချခြင်းကို ကားဖြင့်လှည့် လည်၍ ရပ်ကွက်ပြည်သူများ လက်ဝယ်အရောက်ဆက်လက်ရောင်းချပေးရန် အစီအစဉ်များရှိပါ ကြောင်း မိဘပြည်သူများ ဈေးနှုန်းသက်သာစွာဖြင့် ဝယ်ယူစားသုံးနိုင်ရန်အတွက် ကျန်ရှိနေသော မြို့ပေါ်ရပ်ကွက်/ကျေးရွာများသို့လည်း လှည့်လည်ရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

     စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီသည် စားသုံးဆီများ သတ်မှတ်အရည်အသွေး စံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများကျန်းမာရေးနှင့် ညီညွှတ်သော စားသုံးဆီများကို သုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်ရေးတို့အတွက် ကြီးကြပ်ထိန်းကျောင်းဆောင်ရွက်လျက်ရှိပါသည်။

          ထိုသို့ဆောင်ရွက်ရာတွင် ဒေသအလိုက်ဈေးကားများဖြင့် လှည့်လည်ရောင်းချသည့် အစီအစဉ်ကို လည်းထည့်သွင်းဆောင်ရွက်လျက်ရှိရာ မုံရွာခရိုင်ဆီကုန်သည်နှင့် ဆီလုပ်ငန်းရှင်များအသင်းမှဦးစီး၍ အစိုးရရုံးဖွင့်ရက်များအတိုင်း နေ့စဉ်ရောင်းချပေး လျက်ရှိရာ (၂၉.၈.၂၀၂၂)ရက်နေ့မှစ၍ (၃၁.၁၀.၂၀၂၂) ရက်နေ့အထိ တစ်ရက်လျှင်ဈေးကား(၂)စီးဖြင့် တန်ချိန်(၁၀၀)ကျော်ကို မုံရွာမြို့ပေါ်ရှိရပ်ကွက်များဖြစ် သောအောင်မင်္ဂလာရပ်ကွက်၊ဆူးလေကုန်းရပ်ကွက်၊ရတနာပုံရပ်ကွက်၊ ထန်းတောရပ်ကွက်၊ အောင်ချမ်း သာရပ်ကွက်၊ မြဝတီရပ်ကွက်၊ ဘုန်းစိုးရပ်ကွက်စသည့်မြို့‌ပေါ်ရပ်ကွက်များအပြင် ချင်းတွင်းရတနာဈေး၊ မြသလ္လာဈေး၊ မန်ကျည်းပင်ဈေး၊ အလုံ ဈေးများနှင့် တိုင်း/ခရိုင်/မြို့နယ်ဝန်ထမ်းများနေထိုင်ရာ အိုးအိမ်ဝန်ထမ်း အိမ်ရာများသို့လည်း အပတ်စဉ်ထွက်ရှိသော ရည်ညွှန်းဈေးအပေါ် ၂ % အမြတ်ထက် မပိုသော ဈေးနှုန်းများဖြင့် ရပ်ကွက်နေရာအစုံလှည့်လည်ရောင်းချပေးလျက်ရှိပါသည်။

          (၂.၁၁.၂၀၂၂)ရက်နေ့တွင် ဈေးကား(၂)စီးဖြင့်  မုံရွာမြို့စက်မှုဇုန်ရပ်ကွက်နှင့် နတ်လူထိပ်ပန် ရပ်ကွက်များတွင်စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ အောက် တိုဘာလ (၃၁) ရက်မှ နိုဝင်ဘာလ (၇) ရက်နေ့အထိထုတ်ပြန်သော အခြေခံလက်ကား ရည်ညွှန်းဈေး အပေါ် မူတည်၍ စားအုန်းဆီ(၁)ပိဿာလျှင်(၄၆၅၀)ကျပ်နှုန်းဖြင့် အိမ်ထောင်စုတစ်စုလျှင် တစ်ပိဿာ နှုန်း ရောင်းချဖြန့်ဖြူးပေးခဲ့ပြီး လာရောက်ဝယ်ယူကြသော အိမ်ထောင်စုများအား ကိုဗစ်-၁၉ စည်းကမ်းချက်များနှင့်အညီ စနစ်တကျ တန်းစီစေခြင်းဖြင့်  ပူးပေါင်းပါဝင်ဆောင်ရွက်ပေးခဲ့ကြပြီး စားသုံးသူပြည်သူများအား ဈေးနှုန်းသက်သာစွာဖြင့် ဖြန့်ဖြူးပေး နိုင်ခဲ့သဖြင့် ဒေသခံပြည်သူများ ဝမ်းမြောက်လျက်ရှိကြောင်း သတင်းရရှိပါသည်။

DOCA(စစ်ကိုင်း)

       စစ်ကိုင်းခရိုင်အနေဖြင့် ၂၀၂၁-၂၀၂၂ခုနှစ်တွင်ဂျုံစိုက်ဧက(၄၇၅၇၆)စိုက်ပျိုးခဲ့ပြီး၊ တစ်ဧကလျှင် ပျမ်းမျှအထွက်နှုန်း(၁၉)တင်းခန့် ထွက်ရှိကြောင်း၊ ၂၀၂၂-၂၀၂၃ခုနှစ်တွင် စိုက်ပျိုးရန် လျာထားဧက (၄၇၆၀၁)ဖြစ်ပြီး တိုးချဲ့စိုက်ပျိုးရန် ဧက(၁၇၅၀)လျာထား ထားကြောင်း ခရိုင်စိုက်ပျိုး‌ရေးဦးစီးဌာန၏ စာရင်းများအရ သိရှိရပါသည်။

       ဂျုံသီးနှံကို နိုဝင်ဘာ၊ အောက်တိုဘာ၊ ဒီဇင်ဘာလများတွင် စိုက်ပျိုးပြီး၊ ဖေဖော်ဝါရီ၊ မတ်နှင့် ဧပြီလများတွင် ထွက်‌ပေါ်သည်။ စစ်ကိုင်းမြို့နယ်တွင် ဂျုံဖြူသန့်မျိုးကို အများဆုံးစိုက်ပျိုးကြပြီး၊ ယခုနှစ်တွင် တစ်ဧက ကုန်ကျစရိတ် ကျပ်(၄)သိန်းခန့် ကုန်ကျနိုင်ကြောင်း၊ ဂျုံသီးနှံစိုက်ပျိုးရာတွင် ထယ်ထိုးရခြင်း၊ ရေသွင်းရခြင်း၊ မြေဆီသုံးရခြင်း၊ အခြားသီးနှံများထက် ပိုမိုဂရုစိုက်ရပါကြောင်း၊ မျိုးတစ်တင်း (၇၀၀၀ဝိ/-)ဖြင့် တစ်ဧကလျှင် မျိုးတစ်တင်းခွဲ အသုံးပြုကြောင်း၊  တစ်ဧကလျှင် ခန့်မှန်း (၁၉)တင်းထွက်လျှင် လက်ရှိ ဂျုံစေ့တစ်တင်းပေါက်ဈေး (၆၀၀၀ဝိ/-)ဖြင့် တွက်ပါက တစ်ဧက အမြတ် ကျပ်(၇)သိန်းကျော် ရရှိနိုင်ကြောင်း စစ်ကိုင်းမြို့နယ်၊ မကျီးကုန်းကျေးရွာတွင် ယခုနှစ် ဂျုံ(၃)ဧက စိုက်ပျိုးသည့် တောင်သူ ဦးညွန့်ဝင်းထံမှ သိရှိရပါသည်။

DOCA(စစ်ကိုင်း)

          မကွေးတိုင်းဒေသကြီး၊ အစိုးရအဖွဲ့က ကြီးမှူးကျင်းပသော အသေးစား၊ အငယ်စားနှင့် အလတ်စား စီးပွားရေးလုပ်ငန်များ ထုတ်ကုန်ပြပွဲနှင့် ဈေးရောင်းပွဲတော်ဖွင့်ပွဲ အခမ်းအနားကို (၃၁.၁၀.၂၀၂၂)ရက်နေ့ နံနက်(၀၇:၀၀)နာရီအချိန်တွင် မကွေးခရိုင်အားကစားကွင်း၌ ကျင်းပပြုလုပ်ရာ ဝန်ကြီးချုပ် ဦးတင့်လွင့်နှင့် တိုင်းဒေသကြီး အစိုးရအဖွဲ့ဝင် ဝန်ကြီးများ၊ ဖိတ်ကြားထားသော ဧည့်သည်တော်များ၊  ဌာနဆိုင်ရာ တာဝန်ရှိသူများ၊ အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်များနှင့် ပြပွဲသို့ လာရောက်ကြည့်ရှုကြသည့် ဧည့်ပရိတ်သတ်များ တက်ရောက်ခဲ့ကြပါသည်။

          ရှေးဦးစွာ တိုင်းဒေသကြီး ဝန်ကြီးချုပ်နှင့် တာဝန်ရှိသူများက MSME လုပ်ငန်းများထုတ်ကုန်ပြပွဲနှင့် ဈေးရောင်းပွဲတော်ကို  ဖဲကြိုးဖြတ်ဖွင့်လှစ်ပေးပြီး ပြပွဲနှင့် ဈေးရောင်းပွဲတော် ခင်းကျင်းပြသထားမှုအား လှည့်လည်ကြည့်ရှုအားပေးပြီးနောက် နံနက်(၁၀:၀၀)နာရီအချိန်တွင် မကွေးမြို့၊ မြို့တော်ခန်းမ၌ ကျင်းပသည့် အသေးစား၊ အငယ်စားနှင့် အလတ်စားစီးပွားရေးလုပ်ငန်းရှင် တွေ့ဆုံဆွေးနွေးပွဲနှင့် စက်မှုဇုန်ဖွံ့ဖြိုး တိုးတက်ရေး ဆိုင်ရာဆွေနွေးပွဲ အခမ်းအနားသို့ တက်ရောက်ခဲ့ပါသည်။ ဆက်လက်၍ MSME လုပ်ငန်းရှင်များ စကားဝိုင်း ဆွေးနွေးပွဲကိုကျင်းပပြုလုပ်ရာ မကွေးတိုင်းဒေသကြီးအတွင်း လုပ်ငန်းများအောင်မြင်မှုရရှိနေသည့် MSME လုပ်ငန်းရှင်(၆)ဦးတို့က ၎င်းတို့၏လုပ်ငန်းများ အောင်မြင်မှု ရရှိရေးအတွက် ရင်ဆိုင်ကြုံတွေ့ ဖြတ်သန်းခဲ့ရသော အခက်အခဲများ၊ စိန်ခေါ်မှုများနှင့် အတွေ့အကြုံ များကို မျှဝေဆွေးနွေးခဲ့ကြပြီး ဖော်ထုတ်ချက်များ ရယူဆောင်ရွက်နိုင်ခဲ့ပါသည်။ နေ့လည်(၁၃:၀၀) အချိန်တွင် စက်မှုဇုန်ဖွံ့ဖြိုးတိုးတက်ရေးဆိုင်ရာ ဆွေးနွေးပွဲကို ဆက်လက်ကျင်းပရာ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ မြန်မာ့ကုန်သွယ်မှုမြှင့်တင်ရေးအဖွဲ့ ဒုတိယညွှန်ကြားရေးမှူးချုပ် ဒေါက်တာထိန်လင်းက အထူးစီးပွားရေးဇုန်နှင့် စက်မှုဇုန်များတည်ထောင်ရာတွင် ကြိုတင်ပြင်ဆင်ရန် လိုအပ်ချက်များနှင့် ပတ်သတ်၍ ရှင်းလင်းဆွေးနွေးခဲ့ပြီး တက်ရောက်လာသည့် စီးပွားရေးလုပ်ငန်းရှင် များက သိရှိလိုသည့်မေးခွန်းများ မေးမြန်းခြင်း၊ တင်ပြချက်များနှင့်ပတ်သတ်၍ သက်ဆိုင်ရာတာဝန် ရှိသူများက ရှင်းလင်းဖြေကြားခဲ့ပြီး မကွေးတိုင်းဒေသကြီး အစိုးရအဖွဲ့ ဝန်ကြီးချုပ်မှ နိဂုံးချုပ်အမှာစကား ပြောကြားကာ အခမ်းအနားရုတ်သိမ်းခဲ့ကြောင်းသိရှိရပါသည်။

         မကွေးတိုင်းဒေသကြီးအတွင်းရှိ MSME လုပ်ငန်းများ ဒေသထုတ်ကုန်ပြပွဲနှင့် ဈေးရောင်းပွဲတော်ကို (၃၁.၁၀.၂၀၂၂)ရက်နေ့မှ (၂.၁၁.၂၀၂၂)ရက်နေ့အထိ (၃)ရက်တိုင် နေ့စဉ်နံနက်(၀၇:၀၀)နာရီမှ ည(၀၈:၀၀) နာရီအထိ ဖွင့်လှစ်ပြသရောင်းချသွားမည်ဖြစ်ပြီး မကွေးခရိုင်အားကစားကွင်းအတွင်း စည်ကားသိုက်မြိုက်စွာ ကျင်းပသွားမည်ဖြစ်ကြောင်း သိရှိရပါသည်။

DOCA(မကွေး)