သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံဦးဆောင်၍ မြို့နယ်စည်ပင်သာယာရေးအဖွဲ့မှ တာဝန်ရှိသူတို့ပါဝင်သောအဖွဲ့သည် (၅.၇.၂၀၂၃)ရက်နေ့ ၊ နံနက် (၁၀:၀၀) နာရီအချိန်တွင် ဇလွန်မြို့၊ မြို့မဈေးကြီးအတွင်းရှိ ကုန်စုံဆိုင်များတွင် ရောင်းချနေသော စားသုံးဆီများကို ဈေးကွက်စောင့်ကြည့်ခဲ့ပါသည်။

 စားသုံးဆီများသည် နေ့စဉ်ချက်ပြုတ်စားသုံးရာတွင် မပါမဖြစ်အသုံးပြုနေရခြင်း၊ သတ်မှတ်စံချိန်စံညွှန်းများနှင့်အညီ ထုတ်လုပ်မှုမရှိသည် စားသုံးဆီကိုရေရှည်စားသုံးမိပါက စားသုံးသူများအနေဖြင့် ကျန်းမာရေးဆိုင်ရာပြဿနာများကြုံတွေ့လာနိုင်ခြင်းတို့ကြောင့် စစ်ဆေးရခြင်းဖြစ်ကြောင်း၊ အဆိုပါစားသုံးဆီများတွင် ကုန်အညွှန်းဖော်ပြရာ၌ ပင်ရင်းပစ္စည်းကို အခြေခံသောကုန်စည်၏ အမျိုးအမည်ကို မြန်မာဘာသာဖြင့် တိကျစွာ ဖော်ပြခြင်းရှိ၊မရှိနှင့် ကုန်စည်၏ အသားတင်ပမာဏနှင့် အရွယ်အစားတို့အား မြန်မာ့အလေးချိန်ယူနစ်များဖြင့် ဖော်ပြခြင်းရှိ၊မရှိ တို့ကိုစစ်ဆေးခဲ့ပါကြောင်းနှင့် ဇလွန်မြို့မဈေးအတွင်းရှိ လက်လီ၊လက်ကားဖြန့်ဖြူးရောင်းချနေသော ကုန်မျိုးစုံဆိုင် (၂) ဆိုင်ကို စစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

    ၂၀၂၃ ခုနှစ်၊ ဇူလိုင်လ(၆)ရက်နေ့၊ နံနက်(၉:၃၀)နာရီအချိန်တွင် စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်တာဝန်ရုံးမှ ဝန်ထမ်းများသည် ရေနံထွက်ပစ္စည်း ကြီးကြပ်စစ်ဆေးရေးဦးစီးဌာန၊ မြို့နယ်စက်သုံးဆီလုပ်ငန်းရှင်များအသင်းတို့နှင့် ပူးပေါင်း၍ တာချီလိတ်မြို့အပြင် တာချီလိတ်-ကျိုင်းတုံလမ်းမဘေးရှိ စက်သုံးဆီအရောင်းဆိုင်(၈)ဆိုင်အား စက်သုံးဆီအချင်အတွယ်ပြည့်ဝမှန်ကန်မှု ရှိ/မရှိအခြေအနေ၊ သက်မှတ်ရည်ညွှန်းဈေးအတိုင်း ရောင်းချနေမှု ရှိ/ မရှိအခြေအနေနှင့် စက်သုံးဆီလက်ကျန်အခြေအနေတို့ကို ပူးပေါင်းကွင်းဆင်းစစ်ဆေးခြင်း ဆောင်ရွက်ခဲ့ပါ သည်။

 ထိုသို့စစ်ဆေးရာတွင် တာချီလိတ်မြို့နယ်အတွင်းရှိ စက်သုံးဆီအရောင်းဆိုင်များတွင် စက်သုံးဆီလက်ကျန်အနေနှင့် လုံလောက်စွာသိုလှောင်ထားရှိပြီး သက်မှတ်ရည်ညွှန်းဈေးအတွင်းသာ ရောင်းချကာ အချင်အတွယ်ပြည့်ဝမှန်ကန်မှုရှိသည်ကိုလည်း စစ်ဆေးတွေ့ရှိရပါသည်။ စစ်ဆေးရေးမှူးနှင့် ဌာနဆိုင်ရာတာဝန်ရှိသူများသည် စက်သုံးဆီအရောင်းဆိုင်တာဝန်ခံများကို အချင်အတွယ် မှန်ကန်မှုရှိစေရေးကို အလေးထားရန်၊ သတ်မှတ်ရည်ညွှန်ဈေးအတွင်းသာ ရောင်းချရန်တို့ကို မှာကြားခဲ့၍ စက်သုံးဆီလက်ကျန်အခြေအနေ စစ်ဆေးခြင်းများကို ပူးပေါင်းဆောင်ရွက်ခဲ့ပါသည်။

DOCA(ရှမ်း)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ စစ်ဆေးရေးမှူးများဖြစ်ကြသော ဦးစောသန်းထိုက်ကျော်(ဌာနခွဲတာဝန်ခံ)နှင့် ဒေါ်အေးအေးခိုင်(မြို့နယ်တာဝန်ခံ)တို့သည် အုတ်တွင်းမြို့နယ်စည်ပင်သာယာရေးအဖွဲ့၊ စည်းကမ်းထိန်းသိမ်းရေး(၄) ဦးထွန်းအောင်ကျော်နှင့် အတူပူးပေါင်း၍ ၂၀၂၃ခုနှစ်၊ ဇူလိုင်လ ၇ရက်နေ့၊ နံနက်ပိုင်းတွင် အုတ်တွင်းမြို့၌ ဈေးကွက်စောင့်ကြည့်စစ်ဆေးခဲ့ပါသည်။

  ထိုသို့ ဈေးကွက်စောင့်ကြည့်စစ်ဆေးရာတွင် အုတ်တွင်းမြို့၊ စည်ပင်သာယာဈေးရှေ့ရှိ ကုန်စုံဆိုင်ကြီးများဖြစ်ကြသော ဦးမြင့်ဦးကုန်စုံဆိုင်၊ ဝင်းသဇင်ကုန်စုံဆိုင်နှင့် မြဘုရင်ကုန်စုံဆိုင်ကြီးများ၌ရောင်းချနေသော စားသုံးဆီများနှင့်အသင့်စားခေါက်ဆွဲထုပ်များတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းရှိ/မရှိကို ဈေးကွက်စောင့်ကြည့်စစ်ဆေးခဲ့ပါသည်။

    ဈေးကွက်စောင့်ကြည့်စစ်ဆေးစဉ် စစ်ဆေးရေးမှူးများက အရောင်းဆိုင်ပိုင်ရှင်များကို တရားမဝင်ဝင်ရောက်လာသောကုန်ပစ္စည်းများနှင့် မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းမရှိသောကုန်ပစ္စည်းများရောင်းချခြင်းမပြုကြရန်  အသိပညာပေးဆွေးနွေးခဲ့ကြောင်းသိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများကို အရှိန်အဟုန်မပြတ်ဆောင်ရွက်လျက်ရှိရာ စားသုံးသူပြည်သူများကို အသိပညာပေးဟောပြောခြင်း၊ ဈေးကွက်အတွင်းရောင်းချနေသော ကုန်စည်များကို ဈေးကွက်စောင့် ကြည့်စစ်ဆေးခြင်းများ လစဉ်ဆောင်ရွက်လျက်ရှိကြောင်း သိရသည်။

   ၂၀၂၃ ခုနှစ်၊ ဇူလိုင်လ ၆ ရက်နေ့၊ နံနက် (၁၀:၀၀) နာရီအချိန်တွင် ကန့်ဘလူမြို့နယ်တာဝန်ခံရုံးမှ မြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် မိတ်ဖက်ဌာန မြို့နယ်စည်ပင် သာယာရေးကော်မတီမှ ဝန်ထမ်းတို့ဖြင့်ပူးပေါင်း၍ ဈေးကွက်အတွင်းရောင်းချနေသော စားသုံးဆီ အမျိုးအမျိုးနှင့်စပ်လျဉ်း၍ ဈေးကွက်စောင့်ကြည့်စစ်ဆေးခဲ့ရာ GOOD CHOICE Vegetable Cooking Oil ၊ Duck Vegetable Cooking Oil နှင့် Goody Vegetable Cooking Oil အမှတ်တံဆိပ်ဆီများကို အများဆုံးရောင်းချပြီး ကုန်အညွှန်းအမှတ်အသားများကို မြန်မာဘာသာဖြင့် ပြည့်စုံစွာဖော်ပြထားကြောင်း စိစစ်တွေ့ရှိရသည်။

   ထိုသို့ ဈေးကွက်စောင့်ကြည့်စစ်ဆေးရာတွင် မြို့နယ်တာဝန်ခံ ဦးမျိုးဝင်းသန်းမှ စားသုံးဆီအမျိုးမျိုးရောင်းချသည့် လုပ်ငန်းရှင်များအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါ ကုန်စည်အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ်စိစစ်ချက်များကို ရှင်းလင်းဆွေးနွေးခဲ့သည်။ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ပြည့်စုံစွာဖော်ထားခြင်းမရှိသောကုန်စည်များနှင့် မြန်မာဘာသာကုန်အညွှန်းအမှတ်အသားများ လုံးဝ(လုံးဝ)ဖော်ပြထားခြင်းမရှိဘဲ အခြားဘာသာများဖြင့် ဖော်ပြထားသောကုန်စည်များအား ရောင်းချခြင်းမပြုလုပ်ကြရန်နှင့် ဥပဒေအရအရေးယူခံရနိုင် ကြောင်း ရှင်းလင်းဆွေးနွေးပြောကြားခဲ့ပြီး ကုန်စည်အုပ်စုအလိုက် မြန်မာဘာသာဖြင့်ကုန်အညွှန်း အမှတ်အသားဖော်ပြရမည့် အသေးစိတ်အချက်အလက်ပါ လက်ကမ်းစာစောင်များ ဖြန့်ဝေပေးခဲ့ ကြောင်း သတင်းရရှိပါသည်။

DOCA(စစ်ကိုင်း)

    ပဲခူးတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးဌာနနှင့် တောင်ငူခရိုင်အတွင်းရှိ အသေးစား၊ အငယ်စားနှင့် အလတ်စား စီးပွားရေး (MSMEs) လုပ်ငန်းရှင်များတွေ့ဆုံဆွေးနွေးပွဲကို ဇူလိုင်လ ၆ရက်နေ့၊ နေ့လယ် (၁၄း၀၀) နာရီအချိန်တွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံး၌ ကျင်းပပြုလုပ်ခဲ့ပါသည်။

  အခမ်းအနားတွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်က အဖွင့်မိတ်ဆက်စကားပြောကြားပြီးနောက် အစားအသောက်နှင့်ဆေးဝါးကွပ်ကဲရေးဦးစီးဌာန၊ တိုင်းဒေသကြီးဦးစီးမှူး ဒေါ်မေသန်းနိုင်က အသေးစား၊ အငယ်စားနှင့် အလတ်စား စီးပွားရေးလုပ်ငန်းများဖွံဖြိုးတိုးတက်လာစေရန်အတွက် MSMEs လုပ်ငန်းရှင်များအနေဖြင့် အသင့်ထုပ်ပိုးထားသောအစားအသောက်များ၏ အစားအသောက်သန့်ရှင်းရေးဆိုင်ရာအကြောင်းအရာများကိုလည်းကောင်း၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ တိုင်းဒေသကြီးဦးစီးမှူးရုံးမှ ဦးစီးအရာရှိ (အစားအသောက်) ဒေါ်ဖြိုးဖြိုးပြည့်စုံက FDA ထောက်ခံချက်လက်မှတ်လျှောက်ထားနိုင်ရေးဆိုင်ရာကိစ္စရပ်များကိုလည်းကောင်း ရှင်းလင်းဆွေးနွေးခဲ့ပါသည်။

 ဆက်လက်၍ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်းက စက်မှုမှတ်ပုံတင်ခြင်းဆိုင်ရာကိစ္စရပ်များကိုလည်းကောင်း၊ အသေးစားစက်မှုလက်မှုလုပ်ငန်းဦးစီးဌာန၊ ခရိုင်ဦးစီးမှူး ဒေါ်နှင်းနန္ဒာလှိုင်က အသေးစားစက်မှုလက်မှုလုပ်ငန်းဦးစီးဌာန၏ထောက်ခံချက်လျှောက်ထားခြင်းဆိုင်ရာကိစ္စရပ်များကိုလည်းကောင်း ရှင်းလင်းပြောကြားခဲ့ပါသည်။

      ဆက်လက်၍ ရေတာရှည်မြို့နယ်မှ Light  House ကော်ဖီမှုန့်လုပ်ငန်းရှင် ဦးဇေယျာမင်း၊ အားသစ်ဂျုံခေါက်ဆွဲလုပ်ငန်းရှင် ဦးဇော်ဝင်းခိုင်နှင့် တောင်ငူမြို့နယ်မှ ရှယ်တောင်ကြီးမုန့်ဖတ်ခြောက်လုပ်ငန်းရှင် ဦးကျော်စွာတို့က သိရှိလိုသည်များကိုမေးမြန်းခဲ့ကြရာ အစားအသောက်နှင့်ဆေးဝါးကွပ်ကဲရေးဦးစီးဌာန၊ တိုင်းဒေသကြီးဦးစီးမှူး ဒေါ်မေသန်းနိုင်နှင့် သက်ဆိုင်ရာဌာနများမှ ခရိုင်ဦးစီးမှူးများက ပြန်လည်ရှင်းလင်းဖြေကြားခဲ့ပါသည်။

 ထို့နောက် စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်က စားသုံးသူလုံခြုံစိတ်ချရမှုရှိစေရေး အလေးထားဆောင်ရွက်ရေးကိုရှင်းလင်းဆွေးနွေးပြီးနောက် နိဂုံးချုပ်စကားပြောကြားကာ အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်များနှင့်တွေ့ဆုံဆွေးနွေးပွဲကို ရုပ်သိမ်းလိုက်ပါသည်။

  တွေ့ဆုံဆွေးနွေးပွဲသို့ တောင်ငူခရိုင်၊ အထွေထွေအုပ်ချုပ်ရေးဦးစီးဌာနမှ လက်ထောက်ညွှန်ကြားရေးမှူး ဦးမင်းကိုကို၊ တောင်ငူမြို့နယ်စည်ပင်သာယာရေးအဖွဲ့မှ ဒုတိယဦးစီးမှူး ဒေါ်သိန်းသိန်းဌေးနှင့် တောင်ငူခရိုင်မှ အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင် ၂၁ဦးတို့တက်ရောက်ခဲ့ကြကြောင်းသိရပါသည်။

DOCA(ပဲခူး)