သတင်းနှင့် လှုပ်ရှားမှုများ

  ရန်ကုန်တိုင်းဒေသကြီး အစိုးရအဖွဲ့၏ လမ်းညွှန်မှုဖြင့် သင်္ဃန်းကျွန်းခရိုင်အတွင်းရှိ မြို့နယ် များတွင် ချေးငွေရယူရန် လျောက်ထားသည့် MSME  လုပ်ငန်းများအား ချေးငွေထုတ်ချေးပေး နိုင်ရေး (၃.၉.၂၀၂၄) ရက်နေ့တွင် ခရိုင်စိစစ်ရေးကော်မတီအဖွဲ့များက သင်္ဃန်းကျွန်းမြို့နယ်၊ အမှတ် (၇၁၆) ၊ ငမိုးရိပ် (၂) လမ်းရှိ ရွှေနွားလှည်းဖိနပ်လုပ်ငန်းအား ပြည်တွင်းအခွန်၊ အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ စက်မှုကြီးကြပ်နှင့်စစ်ဆေးရေးဦးစီးဌာန၊  မြန်မာ့စီးပွားရေးဘဏ်၊ စားသုံးသူရေးရာဦးစီးဌာန စသည့်အဖွဲ့ဝင်များမှကွင်းဆင်းဆောင်ရွက်ခဲ့ကြကြောင်းသိရှိရပါသည်။

  ကွင်းဆင်းဆောင်ရွက်ရာတွင် ချေးငွေရယူရန် ‌လျှောက်ထားသည့်လုပ်ငန်းများအတွက် သက်ဆိုင်ရာဌာနများ၏ သတ်မှတ်ထားသည့် အချက်အလက်များနှင့်ကိုက်ညီမှုရှိ/ မရှိနှင့် လက်ရှိ ဆောင်ရွက်နေသည့် လုပ်ငန်းအခြေအနေတို့ကို စိစစ်မေးမြန်းခဲ့ပြီး စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူးဦးလှစိုးက စားသုံးသူကာကွယ်ရေးဥပဒေနှင့်စီးပွားရေး လုပ်ငန်းရှင်၏တာဝန်များ၊ ပြစ်မှုပြစ်ဒဏ်များကို အသိပညာပေးပြောကြားခဲ့ကြောင်း သိရှိရပါသည်။  

DOCA(ရန်ကုန်)

    ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်အတွင်းရှိ ဆန်စက်များနှင့်ဆန်ဆိုင်များအား ဆန်စပါးကြိတ်ခွဲထုတ်လုပ်နေမှုအခြေအနေနှင့် ဆန်ဖြန့်ဖြူးရောင်းချနေမှုအခြေအနေတို့အား စက်တင်ဘာလ (၁) ရက်နေ့၊ နေ့လယ် (၁၃:၀၀) အချိန်တွင် ဌာနဆိုင်ရာပူးပေါင်းအဖွဲ့မှ သွားရောက်ကွင်းဆင်းစစ်ဆေးခဲ့ကြောင်း သိရှိရပါသည်။

   ထိုသို့ ကွင်းဆင်းစစ်ဆေးခဲ့ရာတွင် ခရမ်းမြို့နယ် အထွေထွေအုပ်ချုပ်ရေးဦးစီးဌာနမှ တာဝန်ရှိသူများ၊ မြို့နယ်ရဲတပ်ဖွဲ့မှူးနှင့်တပ်ဖွဲ့ဝင်များ၊ မြို့နယ်မီးသတ်ဦးစီးဌာနမှ မြို့နယ်ဦးစီးမှူး နှင့်တပ်ဖွဲ့ဝင်များ၊ မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံနှင့်ဝန်ထမ်းများ၊ စားသုံးသူရေးရာဦးစီးဌာနမှမြို့နယ်တာဝန်ခံနှင့်ဝန်ထမ်းများ ပူးပေါင်းအဖွဲ့သည် ခရမ်းမြို့နယ် (၂)ရပ်ကွက်၊ ကမ်းနားလမ်းရှိ ဒေါ်သောင်းသောင်းဆန်ဆိုင်၊ စည်ပင်သာယာမြို့မဈေးအတွင်း/ အပြင်ရှိ ငြိမ်းဆန်ဆိုင်၊ ပြည့်ဝဆန်ဆိုင်၊ အောင်နိုင်ဆန်ဆိုင်များနှင့် ခရမ်းမြို့နယ် ကမ်းနားလမ်းရှိ မြင့်ဆန်စက်၊ ငြိမ်းချမ်းရေးဆန်စက်တို့တွင် ဒေသထွက်စပါးများဖြစ်သော ဧည့်မထအုပ်စု ဆင်းသုခ၊ ရွှေမန်း၊ မနောသုခ စပါးများကြိတ်ခွဲထုတ်လုပ်ဖြန့်ဖြူးရောင်းချနေမှုအခြေအနေ ဆန်ဆိုင်များအနေဖြင့် ဘုရင့်နောင်ပွဲရုံ၊ ပုဇွန်တောင်ဈေးပွဲရုံများမှ ဝယ်ယူဖြန့်ဖြူးရောင်းချလျှက်ရှိသော ဈေးနှုန်းအခြေအနေတို့အား မေးမြန်းစုံစမ်းစာရင်းကောက်ယူခြင်းများ ကွင်းဆင်းစစ်ဆေးခဲ့ကြပြီး စားသုံးသူရေးရာဦးစီးဌာနမှမြို့နယ်တာဝန်ခံ ဒေါ်ကျော့ကေခိုင်က ဆန်စက်နှင့် ဆန်ဆိုင်ပိုင်ရှင် စီးပွားရေးလုပ်ငန်းရှင်များအား စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး၏ ညွှန်ကြားချက်များဖြစ်သော ဆန်အပါအဝင် အခြေခံစားသောက်ကုန်ပစ္စည်းများ၊ ဈေးကွက်အတွင်း ပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေးနှင့် ဈေးနှုန်းများတည်ငြိမ်မှုရှိစေရေးတို့အတွက် မိမိဌာနအနေဖြင့် ဈေးကွက်စောင့်ကြည့်စစ်ဆေးခြင်းလုပ်ငန်းများအား စဉ်ဆက်မပြတ်ဆောင်ရွက် လျှက်ရှိကြောင်း အသိပညာပေးပြောကြားခဲ့ပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင်ဦးစီးမှူး ဦးမျိုးဝင်းနိုင်နှင့် ဝန်ထမ်းများသည် ၅-၉-၂၀၂၄ ရက်၊ ကြာသပတေး နံနက် ၁၀:၃၀ နာရီအချိန်တွင် ကရင်ပြည်နယ်၊ ဘားအံမြို့ရှိ စိုက်ပျိုးရေးနှင့်မွေးမြူရေးသိပ္ပံကျောင်းရှိ ဆရာ၊ဆရာမများ (ကျောင်းသား၊ကျောင်းသူ)များအား စားသုံးသူကာကွယ်‌ရေးဆိုင်ရာ  သိကောင်းစရာအကြောင်းကို အသိပညာပေးဟောပြောခဲ့ကြောင်း သိရှိရသည်။

   အဆိုပါဟောပြောပွဲတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဘားအံခရိုင် ဦးစီးမှူး ဦးမျိုးဝင်းနိုင်က ကမ္ဘာစားသုံးသူအခွင့်အရေးများနေ့ဖြစ်ပေါ်လာပုံ သမိုင်းအကြောင်းနှင့် စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များအကြောင်း၊ စားသုံးသူကာကွယ်ရေးအကြောင်း သိကောင်းစရာများနှင့် ထုတ်ကုန်လုံခြုံစိတ်ချမှုရှိသော အစားအသောက်နှင့်ကုန်စည်များကို စနစ်တကျ‌ရွေးချယ်ဝယ်ယူ စားသောက်သုံးစွဲတတ်စေရန်အတွက် ကုန်အညွှန်းအမှတ်အသားအကြောင်းကို  Power Point ဖြင့် ကျောင်းသား၊ ကျောင်းသူများကို လွယ်ကူစွာ သိရှိနိုင်ရန်  ရှင်းလင်းပြောကြားခဲ့ကာ ဆရာ၊ ဆရာမ (၁၂) ဦး၊  ကျောင်းသား၊ ကျောင်းသူများ (၁၁၄)ဦး၊ စုစုပေါင်း ဦးရေ(၁၂၆) တက်ရောက်ပြီး  လက်ကမ်းစာစောင်များလည်း ဖြန့်ဝေခဲ့ကြောင်း သိရှိရပါသည်။

DOCA(ကရင်)

 ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆန်ဆိုင်များနှင့်ဆန်စက်များအား စက်တင်ဘာလ(၂)ရက်နေ့၊ နေ့လယ်(၁၁၃၀)အချိန်တွင် ဆန်စပါးကြိတ်ခွဲထုတ်လုပ်နေမှု အခြေအနေနှင့် ဝယ်ယူဖြန့်ဖြူးရောင်းချနေမှု အခြေအနေတို့အား သက်ဆိုင်ရာဌာနများ ပူးပေါင်းအဖွဲ့ နှင့် ကွင်းဆင်းစစ်ဆေးခဲ့ကြောင်း သိရှိရပါသည်။

   ထိုသို့ ကွင်းဆင်းစစ်ဆေးခဲ့ရာတွင် ကော့မှူးမြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်စခန်းမှူးနှင့်တပ်ဖွဲ့ဝင်များ၊ မြို့နယ်စည်ပင် သာယာရေးအဖွဲ့မှ မြို့မဈေးတာဝန်ခံနှင့်ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ပူးပေါင်းအဖွဲ့သည် တောင်ပိုင်းရပ်ကွက်ရှိ ရွှေနဂါးဆန်စက်နှင့် စည်ပင်သာယာမြို့မဈေး အတွင်း/ အပြင်တွင် ဖြန့်ဖြူးရောင်းချလျှက်ရှိသော ဒေါ်မူဆန်ဆိုင်၊ ချမ်းသာကြီးဆန်ဆိုင်၊ မြင့်ထူးဆန်ဆိုင်များမှ ဆန်စက်ပိုင်ရှင်၊ ဆန်ဆိုင်ပိုင်ရှင် စီးပွားရေးလုပ်ငန်းရှင်များအနေဖြင့် ဆန်ဈေးနှုန်းများ မတည်မငြိမ်ဖြစ်စေရန် ရည်ရွယ်ချက်ရှိရှိဖြင့် သိုလှောင်ထားခြင်းများမပြုလုပ်ကြရန်နှင့် ပူးပေါင်းအဖွဲ့အနေဖြင့် ယခုလိုကွင်းဆင်းစစ်ဆေးရခြင်းမှာ ကုန်ဈေးနှုန်းများတည်ငြိမ် စေရေးအတွက် ကြပ်မတ်ဆောင်ရွက်ရခြင်းဖြစ်ကြောင်း ဈေးကွက်အတွင်း ဆန်စပါးအပါအဝင် အခြေခံစားကုန်ပစ္စည်းများ ပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေး၊ ဈေးနှုန်းမြှင့် တင်ရောင်းချရန်ရည်ရွယ်ပြီး သိုလှောင်ထားခြင်းများမရှိစေရေးအတွက် ကွင်းဆင်းစစ်ဆေးရခြင်းဖြစ်ကြောင်း တွေ့ဆုံဆွေးနွေးပြောကြား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

  စားအုန်းဆီတင်သွင်းဖြန့်ဖြူးခြင်းဆိုင်ရာ လုပ်ငန်းညှိနှိုင်းအစည်းအဝေးကို စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ အတွင်းရေးမှူး၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ်ဦးဆောင်၍ ၄-၉-၂၀၂၄ ရက်နေ့ (ဗုဒ္ဓဟူးနေ့)၊ နံနက် ၀၉:၃၀ နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအစည်းအဝေးခန်းမ၊ ရုံးအမှတ်(၅၂)တွင် (Virtual Meeting) စနစ်ဖြင့်ကျင်းပခဲ့ရာ မွန်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ပြည်နယ်ဦးစီးမှူးနှင့် ဝန်ထမ်း (၂)ဦးတက်ရောက်ခဲ့ကြောင်းသိရပါသည်။

       အဆိုပါအစည်းအဝေးတွင် စားသုံးသူရေးရာဦးစီးဌာန၊ ညွှန်ကြားရေးမှူးချုပ်က အဖွင့်အမှာစကားပြောကြားခဲ့ပြီး၊ ဒုတိယညွှန်ကြားရေးမှူးချုပ်က တိုင်း/ပြည်နယ်များမှ စားအုန်းဆီနှင့်ပတ်သက်၍ စာရင်းဇယားများအချိန်မှီပေးပို့နိုင်ရေး၊ ရရှိသောဆီခွဲတမ်းများအား အပြည့်အဝရရှိအောင်ထုတ်ယူနိုင်ရေး စသည့်အချက်များကိုရှင်းလင်းပြောကြားခဲ့ပါသည်။ ဆက်လက်ပြီး ဆီလုပ်ငန်းရှင်များက မိမိတို့၏အခက်အခဲများအား တင်ပြဆွေးနွေးခဲ့ပြီးနောက် တိုင်း/ ပြည်နယ်စားသုံးသူရေးရာဦးစီးဌာနမှ ပြည်နယ်ဦးစီးမှူးများက အပြန်အလှန်ဆွေးနွေးခဲ့ကြကာ အစည်းအဝေးကို နေ့လယ် (၁၂:၃၀) နာရီအချိန်တွင် ရုပ်သိမ်းခဲ့ကြောင်းသိရပါသည်။

DOCA(မွန်)