သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန ၊ မိတ္ထီလာခရိုင်၊ ခရိုင်ဦးစီးမှူးရုံးအနေဖြင့် ခရိုင်ဦးစီးမှူး၏ လမ်းညွှန်မှုဖြင့် ၂၀၂၃ခုနှစ် ၊ ဇူလိုင်လ ၁၈   ရက်နေ့ နံနက် (၁၀:၀၀)အချိန်တွင် အစားအသောက်နှင့်ဆေးဝါးကွပ်ကဲရေးဦးစီးဌာန နှင့်ပူးပေါင်း၍ တရားမဝင် အစားအသောက်များအား စျေးကွက်စစ်ဆေးခြင်းများ ဆောင်ရွက်ခဲ့ပါသည်။ ထိုသို့စစ်ဆေးရာ၌ Online Media ဖြင့် Nestle Cerelac အမှတ်တံဆိပ် Instant Cerel with Milk(ပဲပိစပ်နှင့်သစ်သီး) Instant Cerel with Milk(ဂျုံ၊ငါးနှင့်ဟင်းနုနွယ် )Grain & Grow Oatmel အမျိုးအစားတို့အား ကြောငြာ၍ ဖြန့်ဖြူးရောင်းချခြင်းအပေါ် အစားအသောက်နှင့်ဆေးဝါးကွပ်ကဲရေးဦးစီးဌာနမှ တရားမဝင် Online ကြော်ငြာချက် စောင့်ကြည့်ရေးအဖွဲ့မှ တင်ပြလာခြင်းအား အစားအသောက်နှင့်ဆေးဝါးကွပ်ကဲရေးဦးစီးဌာနမှ တရားမဝင်ကုန်သွယ်မှုတိုက်ဖျက်ရေးအဖွဲ့ဝင်များ ဖြင့် ပူး‌ပေါင်းစစ်ဆေး စစ်ဆေးခဲ့ကြောင်းသိရသည်။  စစ်ဆေးရာ၌ အဆိုပါ ကုန်စည်(၃) မျိုး၏ သွင်းကုန်ထောက်ခံချက် (IR) ရရှိထားခြင်းရှိ/မရှိကို စစ်ဆေးရန်ညွှန်ကြားထားကြောင်း သွားရောက်စစ်ဆေးရာတွင် ရောင်းချခြင်းမရှိကြောင်းသိရှိရပါသည်။

DOCA(မန္တလေး)

    စားသုံးသူရေးရာဦးစီးဌာန၊ ရခိုင်ပြည်နယ်၊ မြောက်ဦးခရိုင်၊ မင်းပြားမြို့နယ်အနေဖြင့်   ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံစီးပွားရေးဖွံ့ဖြိုးတိုးတက်စေရန်ဆိုသည့် မျှော်မှန်းချက်နှင့်အညီ စားသုံးသူကာကွယ်ရေးလုပ်ငန်းများအပြင် ဒေသတွင်းကုန်သွယ်မှုဖွံ့ဖြိုးတိုးတက်ရေးအတွက် MSMEs စီးပွားရေးလုပ်ငန်းရှင်များနှင့် တွေ့ဆုံဆွေးနွေးဆောင်ရွက်ခဲ့ပါ သည်။

     ထိုသို့ တွေ့ဆုံဆွေးနွေးရာတွင် မြောက်ဦးခရိုင်၊ မင်းပြားမြို့နယ်တာဝန်ခံ ဦးမောင်သန်းဝင်း (ဒု-ဦးစီးမှူး)သည် ၂၀၂၃ ခု ဇူလိုင်လ ၂၄ ရက်နေ့၊ နံနက်(၉:၃၀)နာရီအချိန်တွင် မင်းပြားမြို့နယ် တာဝန်ခံရုံး  အစည်းအဝေးခန်းမ၌ မြို့ပေါ်ရှိ MSMEs မုန့်လုပ်ငန်းရှင် (၅) ဦးကို စားသုံးသူကာကွယ်ရေးဥပဒေပါ စားသုံးသူတို့၏အခွင့်အရေးများ၊ စီးပွားရေးလုပ်ငန်းရှင်တို့လိုက်နာရမည့် ပြဌာန်းချက်များ၊ ကုန်ပစ္စည်းများပေါ်တွင် ရေးသားဖော်ပြရမည့် ကုန်အညွှန်းအမှတ်အသားရေးသား ဖော်ပြခြင်းဆိုင်ရာအချက်များနှင့် စားသုံးသူကာကွယ်ရေးဥပဒေအရ အရေးယူဆောင်ရွက်နိုင်သည့် ပြစ်မှုပြစ်ဒဏ်တို့အကြောင်းအား အကျယ်တဝင့် ရှင်းလင်းဆွေးနွေးဆောင်ရွက်ခြင်းနှင့် တက်ရောက်လာသည့် စီးပွားရေးလုပ်ငန်းရှင်များမှလည်း သိရှိလိုသည်များအား ပြန်လည်မေးမြန်းခဲ့ခြင်းအပေါ် ရှင်းလင်းဆွေးနွေးဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

     စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် ၂၀၂၃ခုနှစ် ဇူလိုင်လ တတိယပတ်တွင် Master Feed Mill ငါးအစာတောင့်စက်ရုံသို့ ကွင်းဆင်း လေ့လာဆောင်ရွက်ခဲ့ပါသည်။

   မအူပင်ခရိုင်အတွင်းရှိ မအူပင်၊ ပန်းတနော်၊ ညောင်တုန်းမြို့နယ်များသည် ငါးမွေးမြူရေး ကန်များရှိသော မြို့နယ်များဖြစ်ပါသည်။ ယခင်က ငါးအစာအဖြစ် ဖွဲနု၊ ပဲဖတ်များကို အသုံးပြု ခဲ့သော်လည်း ယခုအခါ ငါးမွေးမြူရေးကန်များ တိုးတက်များပြားလာသဖြင့်၊ ဖွဲနု၊ ပဲဖတ်တို့ဖြင့် လုံလောက်မှုမရှိသည့် အနေအထားတွင် မွေးမြူရေးငါးလိုအပ်ချက်ကို ဖြေရှင်းနိုင်ရန် ငါးမွေးမြူရေး ကန်ပိုင်ရှင်များအတွက် အဓိက စိန်ခေါ်မှု တစ်ရပ်ဖြစ်လာခဲ့ပါသည်။

     ရန်ကုန်တိုင်း၊ တွံတေးမြို့နယ်တွင် ငါးအစာတောင့်စက်ရုံများတည်ရှိပြီး ငါးအစာတောင့် များကို ဝယ်ယူသုံးစွဲခဲ့ကြပါသည်။ ညောင်တုန်းမြို့နယ်အာရှသားငါးကန်၊ ဒေါ်ဥမ္မာငါးကန်၊ ဦးသောင်းမြင့် ငါးကန်၊ ဦးအောင်သူမိုး ငါးကန်နှင့် မအူပင်မြို့နယ်ရှိ ငါးကန်ပိုင်ရှင်များသည် ငါးအစာတောင့် ကြိတ်ခွဲထုတ်လုပ်ပြီး ကျွေးမွေးပါက ဝယ်ယူသုံးစွဲရခြင်းထက် ပိုမိုအကျိုးအမြတ်ရရှိ၍ သန့်ရှင်းလတ်ဆက်သော ငါးအစာတောင့်များရရှိပြီး ကျွေးမွေးနိုင်မည့် အခြေအနေကောင်းများကို သိရှိပြီး Master Feed Mill ငါးအစာတောင့်စက်ရုံပိုင်ရှင် ဦးသန်းဝင်းနှင့် တွေ့ဆုံဆွေးနွေးပြီးနောက် ငါးမွေးမြူရေးအစာတောင့်ထုတ်လုပ်ပေးနိုင်ရေးကို တွေ့ဆုံညှိနှိုင်းခဲ့မှု၏ ရလဒ်တစ်ခုအဖြစ် အောင်မြင်ခဲ့ပါသည်။

    Master Feed Mill ငါးအစာတောင့်စက်ရုံသည် ငါးကန်ပိုင်ရှင်များမှ ပေးပို့သော ဖွဲနု၊ ငါးခြောက်၊ ပဲဖတ်၊ ပဲခွဲခြမ်း၊ ပြောင်းရုံးခြောက်များကို စနစ်တကျကြိတ်ခွဲထုတ်လုပ်ပြီး ငါးအစာ တောင့် (၁)တန်လျှင် ကြိတ်ခွဲထုတ်လုပ်ခ ၆၁၀၀၀/-ကျပ်ဖြင့် ငါးကန်ပိုင်ရှင်များသို့ ထုတ်လုပ်ပေးလျက်ရှိကြောင်း သိရှိရပါသည်။

     Master Feed Mill ငါးအစာတောင့် စက်ရုံအနေဖြင့် တစ်နေ့(၆)နာရီခန့် ကြိတ်ခွဲထုတ်လုပ်ပြီး တစ်ရက်လျှင် ပျမ်းမျှစက်ကြိတ်အား တန်(၃၀)၊ တစ်လစက်လည်ရက် (၂၀)ရက်နှင့် တစ်နှစ်လုံးတွင် ပျမ်းမျှစက်လည်ရက် (၂၀၀) အထိ လည်ပတ်ကြိတ်ခွဲထုတ်လုပ်လျက်ရှိကြောင်း၊ Master Feed Mill ငါးအစာတောင့်စက်ရုံပိုင်ရှင် ဦးသန်းဝင်းမှ ရှင်းပြခဲ့ပါသည်။

    စားသုံးသူရေးရာဦးစီးဌာနမှ မြို့နယ်ဦးစီးမှူး ဦးအောင်လွင်မှ ရန်ကုန်-ပုသိမ် ကားလမ်းဘေး မိုင်တိုင် ၂၇/၄ ဆားမလောက်ကျေးရွာတွင် တည်ရှိသော ဦးသန်းဝင်းပိုင် Master Feed Mill ငါးအစာတောင့် စက်ရုံသည် ငါးမွေးမြူရေးလုပ်ကိုင်နေသော ငါးကန်ပိုင်ရှင်များအတွက် အကျိုးရှိ သလို ငါးအစာတောင့်စက်ရုံ ပိုမိုတိုးတက် ဖွံ့ဖြိုးစေရန်အတွက် ထပ်မံလိုအပ်မည့် နည်းလမ်းကောင်းများရရှိနိုင်ရေး အဟာရပြည့် ငါးသယံဇာတ ပိုမိုထွက်ရှိစေရန်အတွက် ပိုမိုထုတ်လုပ်နိုင်ရေးနှင့် ဈေးကွက်ကျယ်ပြန့်စွာရရှိနိုင်ရေးအတွက် ဆောင်ရွက်နိုင်သည့် နည်းလမ်းများကို အပြန်အလှန် အကျယ်တဝင့် ဆွေးနွေးခဲ့ပါသည်။

  ဈေးကွက်ရရှိမှုအနေဖြင့် မအူပင်နှင့် ညောင်တုန်းမြို့နယ်ရှိ ငါးမွေးမြူရေးလုပ်ငန်းများအပြင် ရန်ကုန်မြို့ရှိ Myan Vet ကုမ္ပဏီမှလည်း ချိတ်ဆက်ထုတ်လုပ်ရောင်းချလျက်ရှိကြောင်း ဦးသန်းဝင်းမှ ဈေးကွက်ရရှိမှုကိုလည်း ဖြည့်စွက်ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

       မန္တလေးတိုင်း‌ဒေသကြီး၊ မိတ္ထီလာခရိုင်၊ ဦးစန်းအောင်(ဒု-ဦးစီးမှူး)သည် ခရိုင်ဦးစီးမှူး၏ လမ်းညွှန်မှုဖြင့် ၂၀၂၃ခုနှစ် ၊ ဇူလိုင်လ ၂၀ ရက်နေ့ နံနက်(၁၀း၀၀)နာရီချိန်တွင် ပျော်ဘွယ်မြို့နယ်၊ မိုးနံကုန်း (အ.လ.က)ကျောင်းတွင်  စားသုံးသူများ ဘေးအန္တရာယ်ကင်းရှင်းစေရေးအတွက် စားသုံးသူကာကွယ်ရေးအသိပညာပေးဟောပြောဆွေးနွေးခဲ့ပါသည်။

      အဆိုပါဟောပြောပွဲတွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးမှ ပျော်ဘွယ်မြို့ နယ်တာဝန်ခံမှ စားသုံးသူရေးရာဦးစီးဌာနတွင် လက်ရှိဆောင်ရွက်နေသော စားသုံးသူကာကွယ်ရေး အသိပညာပေးဟောပြောပွဲလုပ်ငန်းများဆောင်ရွက်ခြင်း၊ စားသုံးသူများဘေးအန္တရာယ်ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းလုပ်ငန်းများနှင့် နစ်နာ ဆုံးရှုံးမှုများ ညှိနှိုင်းဖြေရှင်းမှုများလုပ်ဆောင်ရွက်လျက်ရှိကြောင်း၊ ၂၀၁၉ စားသုံးသူကာကွယ်ရေး ဥပဒေအရ စီးပွားရေးလုပ်ငန်းရှင်များအနေဖြင့် စားသုံးသူပြည်သူများ နေ့စဉ်ဝယ်ယူသုံးစွဲနေသော ကုန်စည်များနှင့်ပတ်သက်သော သတင်းအချက်အလက်များကို ရိုးရှင်းမှန်ကန်စွာ ဖော်ပြရန်တာဝန်ရှိ ကြောင်း၊ လုပ်ငန်းရှင်များအနေဖြင့် ထုတ်လုပ်သောကုန်စည်များပေါ်တွင် ဥပဒေပါ ကုန်အညွှန်းအမှတ်အသားများနှင့် စပ်လျဉ်း၍ လိုက်နာရမည့်အချက်များ လိုက်နာခြင်းမရှိပါက အရေးယူဆောင်ရွက်နိုင်မည့် ပြစ်မှုပြစ်ဒဏ်များကိုလည်းကောင်း၊ မိမိထုတ်ကုန်များကို ကုန်အညွှန်းအမှတ်အသားဖော်ပြရာတွင် အခက်အခဲရှိပါက ဌာနသို့ လာရောက်မေးမြန်းနိုင်ကြောင်း၊ လုပ်ငန်းရှင်များအနေဖြင့်လည်း အခြားကုန်စည်ကို ဝယ်ယူသုံးစွဲရာတွင်  မိမိတို့ကိုယ်တိုင် စားသုံးသူများဖြစ်သည့်အတွက် စာသုံးသူအခွင့်အရေး နစ်နာဆုံးရှုံးမှုများ ရှိခဲ့လာပါက တိုင်းဒေသကြီး/ပြည်နယ်နှင့် ခရိုင်ရုံးများတွင် ဖွင့်လှစ်ထားသော စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ရုံးများတွင် တိုင်ကြားနိုင်ပါကြောင်း၊  DOCA Myanmar Application နှင့်စားသုံးသူရေးရာဦးစီးဌာန၏ Website www.doca.gov.mm တွင် ဝင်ရောက်လေ့လာတိုင်ကြားနိုင်ကြောင်း ၊ Consumer Cell Center နံပါတ် (၁၅၃၅) သို့လည်း ရုံးချိန်အတွင်း ဆက်သွယ်မေးမြန်းဆောင်ရွက်နိုင်ပါကြောင်းကို ဆွေးနွေးပြောကြားခဲ့ပါသည်။

               ဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (  ၂၆၄  ) ဦး တက်ရောက်ခဲ့ပြီး အသိပညာပေးလက်ကမ်းစာစောင်များလည်းဖြန့်ဝေခဲ့ကြောင်း ဟောပြောပွဲကို နံနက်(၁၁း၁၀)အချိန်တွင် ရုတ်သိမ်းခဲ့ကြောင်း သိရှိရပါသည်။

DOCA(မန္တလေး)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ညောင်တုန်းမြို့ အခြေခံပညာ အထက်တန်းကျောင်း ကျောင်းရှာကုန်း(အ.ထ.က) ၌ စားသုံးသူအသိပညာပေးဟောပြောပွဲကို (၂၀.၇.၂၀၂၃) ရက်နေ့ နံနက် (၁၀:၀၀)တွင် ကျင်းပပြုလုပ်ခဲ့သည်။

           ဟောပြောပွဲတွင် စားသုံးသူရေးရာဦးစီးဌာနမှ မြို့နယ်ဦးစီးမှူး ဦးအောင်လွင်က စားသုံးသူများအနေဖြင့် စားသုံးသူကာကွယ်ရေးလုပ်ငန်းစဉ်များအကြောင်း၊ စားသုံးသူအခွင့်အရေးများ၊ စားသုံးသူသတိပြုလိုက်နာရမည့်တာဝန်များ၊  ကုန်စည်နှင့် ဝန်ဆောင်မှုတို့၏ အဓိပ္ပါယ်အကြောင်း၊ စားသုံးသူရေးရာဦးစီးဌာန၏ လုပ်ပိုင်ခွင့်နှင့် တာဝန်များအကြောင်းကို ကျောင်းသား/သူများ သိရှိနားလည်ရန် ရှင်းလင်းပြောကြားခဲ့ပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းဆိုင်ရာ အချက်အလက်များအကြောင်းကို အကျယ်တဝင့် ရှင်းလင်းခဲ့ပါသည်။

          ဆက်လက်၍ ကျောင်းမုန့်ဈေးတန်းတွင် ရောင်းချနေသော မုန့်များကိုလည်း စစ်ဆေးခဲ့ပြီး ဘေးအန္တရာယ်ရှိသော ကုန်စည် (သို့မဟုတ်) ဝန်ဆောင် ဆိုသည်မှာ သက်ဆိုင်ရာ အစိုးရဌာန၊ အစိုးရအဖွဲ့အစည်းများက စားသုံးရန် သို့မဟုတ် အသုံးပြုရန် မသင့်ဟု သတ်မှတ်ထုတ်ပြန်ထားသော ကုန်စည် သို့မဟုတ် ဝန်ဆောင်မှုကို ဆိုလိုကြောင်း၊ ကုန်အညွှန်းအမှတ်အသားပြည်စုံစွာဖော်ပြပါဝင်သော ကုန်စည်များကို ရွေးချယ်ဝယ်ယူ သုံးစွဲကြရန်နှင့် စားသုံးသူပြည်သူများအနေဖြင့် ကုန်စည် နှင့် ဝန်ဆောင်မှုများ ဝယ်ယူသုံးစွဲရာတွင် နစ်နာဆုံးရှံးမှုများရှိပါက ဆက်သွယ်ဆောင်ရွက်နိုင်သည့် လိပ်စာနှင့် ဖုန်းနံပါတ်များကို ဆက်သွယ်တိုင်ကြားနိုင်ကြောင်း အသိပညာပေးခဲ့ပြီး မုန့်ဈေးတန်းမှ မုန့်ဆိုင် (၆)ဆိုင်အား စစ်ဆေးခဲ့သည်။

 ဟောပြောပွဲကို ကျောင်းသား/ကျောင်းသူ၊ ဆရာ/ဆရာမ (၁၅၀)ဦး တက်ရောက်ခဲ့ ကြောင်းသိရသည်။

DOCA(ဧရာဝတီ)