သတင်းနှင့် လှုပ်ရှားမှုများ

    မန္တလေးတိုင်းဒသကြီး၊ ငါန်းဇွန်မြို့၊ အမှတ် (၄) ရပ်ကွက်ရှိ အမှတ် (၄)၊ အခြေခံပညာမူလတန်းလွန်ကျောင်း၌ (၂၄-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် မြို့နယ်စားသုံးသူရေးရာဦးစီးဌာနနှင့် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ ကျောင်းသား/ကျောင်းသူများအား အသိပညာပေးဟောပြောဆွေးနွေးပွဲဆောင်ရွက်ပေးခဲ့ပါသည်။

      အဆိုပါဟောပြောဆွေးနွေးပွဲတွင် ရှေးဦးစွာစားသုံးသူရေးရာဦးစီးဌာန၊ ငါန်းဇွန်မြို့နယ်တာဝန်ခံ ဒေါ်သင်းသင်းဆွေက  စားသုံးသူကာကွယ်ရေးနှင့်ပတ်သက်၍ ဟောပြောဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူ၏အဓိပ္ပါယ်၊ စားသုံးသူ၏အခွင့်အရေးနှင့်တာဝန်များ၊ ကုန်စည်နှင့်ဝန်ဆောင်မှုများ၏အဓိပ္ပါယ်များ၊ နစ်နာဆုံးရှုံးမှု၏အဓိပ္ပါယ်နှင့် ကုန်အညွှန်းအမှတ် အသားများကိုရှင်းလင်းခဲ့ပြီး ကျောင်းသားကျောင်းသူများမှာ ငယ်ရွယ်သည့်ကလေးသူငယ်များဖြစ်သည့်အတွက် ကျောင်းတွင်ဖြစ်စေ၊ မိမိတို့၏နေထိုင်ရာရပ်ကွက်များ၌ဖြစ်စေ အစားအစာများဝယ်ယူစားသောက်ရာတွင် အသင့်စားအစားအစာများကို တတ်နိုင်သလောက်လျှော့ပေါ့စားသောက်ကြရန်လိုကြောင်း၊ တချို့အစားအသောက်များမှာ ဓာတုဆိုးဆေးများ၊ ကြာရှည်ခံဆေးဝါးများပါရှိသည့်အတွက် ခန္ဓာကိုယ်ကြီးထွားမှု၊ ဉာဏ်ရည်ဖွံ့ဖြိုးမှုများကိုထိခိုက်နိုင်ပြီး ရောဂါမျိုးစုံဖြစ်ပွားတတ်ကြောင်း၊ အကယ်၍ ဝယ်ယူစားသောက်မည်ဆိုလျှင်လည်း ကုန်အညွှန်းအမှတ်အသားများကို မြန်မာဘာသာဖြင့်ထည့်သွင်းဖော်ပြထားသော အစားအသောက်များကိုသာရွေးချယ်ဝယ်ယူကြရန်လိုကြောင်း၊ အစားအသောက်များတွင်သာမက မည်သည့်ကုန်ပစ္စည်းမဆို မြန်မာဘာသာအညွှန်းများပါရှိမှသာ လုံခြုံစိတ်ချရမည်ဖြစ်ပါကြောင်း၊ သန့်ရှင်းလတ်ဆတ်ပြီး ယင်မနားအောင်ဖုံးအုပ်ထားသော ရိုးရာမုန့်ပဲသားရေစာများမှာ ဗိုက်ဝ၍အာဟာရလည်းဖြစ်စေပါကြောင်း၊ မိမိတို့ဝယ်ယူလိုက်သောကုန်ပစ္စည်းကို ဆိုင်ရှင်ကပေးလိုက်သည့်အတိုင်းမယူရန်နှင့် ကုန်အညွှန်းအမှတ်အသားများကို ငယ်ရွယ်စဉ်မှစ၍ ကြည့်ရှုဝယ်ယူသည့်အလေ့အကျင့်များရှိကြရန်လိုအပ်ပါကြောင်း၊ ကုန်စည်ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများကိုလည်း အရေးဆိုတိုင်ကြားနိုင်ပါကြောင်း စသည်ဖြင့်အသိပညာပေးဟောပြော ဆွေးနွေးခဲ့ပါသည်။ ဆက်လက်၍ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒေါ်နေခြည်ဦး (ဦးစီးအရာရှိ) က “ကလေးအလုပ်သမားပပျောက်ရေး” အသိပညာပေးခေါင်းစဉ်ဖြင့် ကလေးအလုပ်သမား၊ ကလေးသူငယ်တို့၏အဓိပ္ပါယ်ဖွင့်ဆိုချက်များ၊ ကမ္ဘာနှင့်မြန်မာနိုင်ငံတွင် ကလေးအလုပ်သမားခန့်မှန်းချက်၊ ကလေးလုပ်သားဖြစ်ရခြင်းအကြောင်းအရင်းများ၊ ကလေးလုပ်သားပပျောက်ရေးလုပ်ဆောင်နေမှုများကို ရှင်းလင်းဟောပြောအသိပညာပေးခဲ့ပါသည်။ အဆိုပါဟောပြောဆွေးနွေးပွဲသို့ ဆရာ/ဆရာမများ၊ ကျောင်းသား/ကျောင်းသူများ၊ စုစုပေါင်း (၇၀) ဦးတက်ရောက်ခဲ့ကြကြောင်းသိရှိရပါသည်။

DOCA(မန္တလေး)       

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ  ဦးဘောမ်ဇုန်း (ရုံးအုပ်) သည် (၂၄-၇-၂၀၂၃) ရက်နေ့တွင် ဝိုင်းမော်မြို့၊ အမှတ် (၂) ရပ်ကွက်နှင့် (၂၅-၇-၂၀၂၃) ရက်နေ့၌ မြစ်ကြီနားမြို့၊ ရမ်ပူရပ်ကွက်အတွင်းရှိ စားသောက်ကုန်ရောင်းချနေသော စီးပွားရေးလုပ်ငန်းရှင်နှင့်တွေ့ဆုံဆွေးနွေးခဲ့ပါသည်။

   ထိုသို့ဆွေးနွေးရာတွင် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏အဓိပ္ပါယ်ဖွင့်ဆိုချက်၊  စီးပွားရေးလုပ်ငန်းရှင်၏တာဝန်များ၊ လုပ်ငန်းရှင်များအနေဖြင့် မိမိတို့၏ကုန်စည်များကို စားသုံးသူများယုံကြည်စိတ်ချရစွာအသုံးပြုနိုင်ရေးအတွက် ဘေးအန္တရာယ်ကင်းရှင်းစေရန်အတွက် ဂရုတစိုက်ဆောင်ရွက်ရမည်ဖြစ်ကြောင်း၊ စားသုံးသူကာကွယ်ရေးဥပဒေ၏ရည်ရွယ်ချက်များအနက် စားသုံးသူများ ဘေးအန္တရာယ်ကင်းရှင်းရေး၊ ကျန်းမာရေး၊ စိတ်ကျေနပ်မှုရရှိစေရေးတို့အတွက် အာမခံချက်ပေးနိုင်သော အရည်အသွေးမြင့်မားသည့် ကုန်စည် (သို့မဟုတ်) ဝန်ဆောင်မှုများကို ဖော်ဆောင်ဖြည့်ဆည်းပေးရမည်ဖြစ်ကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့်အချက်များ၊ တားမြစ်ချက်များနှင့်ပြစ်မှု၊ ပြစ်ဒဏ်များတို့ကိုသိရှိရမည်ဖြစ်ကြောင်းတို့ကို အကျယ်တဝင့်ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ကချင်)

    ဧရာဝတီတိုင်းဒေသကြီး၊ ဖျာပုံခရိုင်၊ ‌ဒေးဒရဲမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် ၂၀၂၃ခုနှစ်၊ ဇူလိုင်လ (၂၅) ရက်နေ့၊ နေ့လယ် (၁၃:၀၀) နာရီအချိန်တွင် မြို့နယ်တာဝန်ခံရုံး၌ မြို့နယ်ဆန်စပါးကုန်သည်အသင်း၏ ဒု-ဥက္ကဋ္ဌ ဦးသိန်းလှနှင့်တွေ့ဆုံဆွေးနွေးခဲ့ပါသည်။

   မြို့နယ်ဆန်စပါးကုန်သည်အသင်း၏ ဒု-ဥက္ကဋ္ဌ ဦးသိန်းလှနှင့်တွေ့ဆုံဆွေးနွေးရာတွင် ယခုလက်ရှိဆန်စပါးဈေးနှုန်းဈေးကွက်အခြေအနေများ၊   အသင်း၏  လက်ရှိဆောင်ရွက်နိုင်မှု အခြေအနေများ၊    ရှေ့ဆက်လက်၍ ဆောင်ရွက်မည့်အစီအစဉ်များ၊ လုပ်ငန်းရှင်များ တွေ့ကြုံရင်ဆိုင်နေရသည့် အခက်အခဲစိန်ခေါ်မှုများနှင့်ပတ်သက်၍ တွေ့ဆုံဆွေးနွေးခဲ့ကြောင်းသတင်းရရှိပါသည်၊၊

DOCA(ဧရာဝတီ)

    ၂၀၂၃ခုနှစ်၊ ဇူလိုင်လ ၂၇ရက်နေ့၊ နံနက် (၁၀း၀၀) နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှ စစ်ဆေးရေးအရာရှိနှင့်ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ ထားဝယ်မြို့ပေါ်ရှိ စားသောက်ကုန်အမျိုးမျိုးအရောင်းဆိုင်များအား စျေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။

   ထိုသို့စစ်ဆေးရာတွင် အစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်ပုံတင်ထားရှိပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြဋ္ဌာန်းချက်များနှင့်အညီ ထုတ်လုပ်ဖြန့်ဖြူးရောင်းချလျက်ရှိသည့် Coca-Cola Pinya Beverages Myanmar (CCPBM) ကုမ္ပဏီ၏ ပြည်တွင်း၌   Sprite အမှတ်တံဆိပ်အချိုရည်နှင့်ပုံစံတူသော/ FDA မှတ်ပုံတင်ထားခြင်းမရှိသော/ ထိုင်းဘာသာဖြင့် ကုန်အညွှန်းအမှတ်အသားဖော်ပြထားသော Sprite အချိုရည်အတုများ စျေးကွက်အတွင်းရောင်းချခြင်းရှိ/မရှိစစ်ဆေးကာ စားသုံးသူကာကွယ်ရေးဥပဒေပါပြဋ္ဌာန်းချက်များနှင့်အညီ ကုန်အညွှန်းအမှတ်အသားအပြည့်အစုံဖော်ပြထားရှိသော ကုန်ပစ္စည်းများရောင်းချနိုင်ရေး အသိပညာပေးခဲ့ကြောင်းနှင့် အသိပညာပေးလက်ကမ်းစာစောင်များဖြန့်ဝေခဲ့ကြောင်းသိရှိရပါသည်။

DOCA(တနင်္သာရီ) 

  အွန်လိုင်းစနစ်ဖြင့် ရောင်းချခြင်းလုပ်ငန်းအတွက် မှတ်ပုံတင်ခြင်းဆိုင်ရာအမိန့်ကြော်ငြာစာနှင့်ပတ်သက်၍ လုပ်ငန်းမှတ်ပုံတင်လျှောက်ထားရမည့်အချက်များကို Online Sales Bussiness  လုပ်ငန်းဆောင်ရွက်လျက်ရှိသည့်လုပ်ငန်းရှင်က စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးသို့လာရောက်ဆွေးနွေးခဲ့ကြောင်းသိရပါသည်။

     ထို့သို့လာရောက်တွေ့ဆုံဆွေးနွေးရာတွင် လုပ်ငန်းရှင်က Online Sales Bussiness  အမိန့်ကြော်ငြာစာနှင့်ပတ်သက်၍ လုပ်ငန်းရှင်များက မှတ်ပုံတင်ဆောင်ရွက်ရမည့်အချက်များကိုမေးမြန်းဆွေးနွေးခဲ့ပြီးနောက် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ စားသုံးသူရေးရာဌာနခွဲတာဝန်ခံ ဦးမျိုးဝင်းနိုင် (ဦးစီးအရာရှိ) က အွန်လိုင်းစနစ်ဖြင့်ရောင်းချခြင်းလုပ်ငန်းကို အရေးကြီးကုန်စည်နှင့် ဝန်ဆောင်မှုလုပ်ငန်းအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် (၂၁-၇-၂၀၂၃) ရက်နေ့တွင် အမိန့်ကြော်ငြာစာ အမှတ် (၅၀/၂၀၂၃) ဖြင့်ထုတ်ပြန်ကြေညာခဲ့ပါကြောင်း၊ မည်သူမဆို အွန်လိုင်းရောင်းချခြင်းလုပ်ငန်းကိုမှတ်ပုံတင်လျှောက်ထားရရှိပြီးမှသာ လုပ်ကိုင်ဆောင်ရွက်ရမည်ဖြစ်ပါကြောင်း၊ အမိန့်ကြော်ငြာစာထုတ်ပြန်ပြီး ခြောက်လပြည့်မြောက်သည့်နေ့ရက်မှစတင်၍ မှတ်ပုံတင်မရှိဘဲ အွန်လိုင်းစနစ်ဖြင့်ရောင်းချခြင်း လုပ်ငန်းကိုလုပ်ကိုင်ဆောင်ရွက်ကြောင်းတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေပုဒ်မ ၅အရ အရေးယူခံရမည်ဖြစ်ပါကြောင်း၊ လုပ်ငန်းရှင်များအနေဖြင့် ပြင်ဆင်ချိန် ၆လရရှိပါကြောင်း၊ ကုန်စည်ကိုဖြစ်စေ၊ ဝန်ဆောင်မှုများကိုဖြစ်စေ အွန်လိုင်းစနစ်မှတစ်ဆင့်ဝန်ဆောင်မှုပေး၍ ရောင်းချသောလုပ်ငန်းများအားလုံးအကျုံးဝင်ပါကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းကို အရေးကြီးကုန်စည်နှင့်ဝန်ဆောင်မှုလုပ်ငန်းအဖြစ်သတ်မှတ်ပြီး အွန်လိုင်းစနစ်မှတစ်ဆင့် ဝန်ဆောင်မှုပေးသောလုပ်ငန်းရှင်များသည် အွန်လိုင်းစနစ်တွင် မှတ်ပုံတင်လတ်မှတ်ပါအမည်ဖြင့် ရောင်းချခွင့်ရှိမည်ဖြစ်ပါကြောင်း၊ မှတ်ပုံတင်ခြင်းလုပ်ငန်းကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနက အွန်လိုင်းစနစ်ဖြင့် ဆောင်ရွက်သွားမည်ဖြစ်ပြီး အွန်လိုင်းမှတ်ပုံတင်ခြင်းနှင့်ပတ်သက်၍ ပြင်ပတွင် သတင်းပျံ့နှံ့နေသောအွန်လိုင်းဝန်ဆောင်ခ ၁၂သိန်းကျပ်ဆိုသည်မှာ မဟုတ်ပါကြောင်း၊ မှတ်ပုံတင်ကြေးနှင့် အွန်လိုင်းဝန်ဆောင်ခတို့ကို ဦးစီးဌာနက တရားဝင်ထုတ်ပြန်ပေးသွားမည်ဖြစ်ပါကြောင်း ပြန်လည်ရှင်းလင်းဆွေးနွေးခဲ့ပါသည်။

   အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုအဖြစ် ပြည်ထောင်စုအစိုးရအဖွဲ့က (၄-၇-၂၀၂၃) ရက်နေ့တွင် အမိန့်ကြော်ငြာစာအမှတ် (၅/၂၀၂၃) ဖြင့်ထုတ်ပြန်ကြေငြာခဲ့ပြီး ယင်းဝန်ဆောင်မှုနှင့်သက်ဆိုင်သည့်ကိစ္စရပ်များနှင့်စပ်လျဉ်း၍ တားမြစ်မိန့်၊ စည်းမျဉ်းသတ်မှတ်မိန့်၊ ကြီးကြပ်မိန့်၊ ကာကွယ်မိန့်နှင့် လိုအပ်သလိုဆောင်ရွက်စေသည့်အမိန့်ထုတ်ပြန်ခွင့်ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသို့ အခွင့်အာဏာအပ်နှင်းခဲ့ပါသည်၊၊

DOCA(ကရင်)