သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှာကြားချက်အရ ပြည်တွင်းဆေးဝါးပြတ်လပ်မှုမရှိစေရေး အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူး ဦးလှစိုး ဦးဆောင်၍  မြို့နယ်ပြည်သူ့ကျန်းမာရေးဦးစီးဌာနမှ၊ အစားအသောက်နှင့် ဆေးဝါးကွပ်ကဲရေးဦးစီးဌာန(ရန်ကုန်)၊ မြို့နယ်အထွေထွေအုပ်ချုပ်ရေးဦးစီးဌာန စသည့်ဌာနများပူးပေါင်း၍ ၁၀-၉-၂၀၂၄ ရက်နေ့၊ နေ့လယ် (၁၂:၀၀) နာရီအချိန်တွင်  အမှတ် (၆)၊ မြို့ပတ်လမ်း၊ အနော်မာ (၁) ရပ်ကွက်၊ သာကေတမြို့နယ်ရှိ Medi Link Pharmacy Co., Ltd မှ  တာဝန်ခံ‌နှင့် တွေ့ဆုံ၍ ကုမ္ပဏီအတွင်းရှိဆေးဝါးများအား စစ်ဆေးမေးမြန်းမှုများပြုလုပ်ခဲ့ကြောင်းသိရှိရပါသည်။

        ထိုသို့စစ်ဆေးမေးမြန်းရာတွင် ဆေးဆိုင်တွင် ဆေးအမျိုးပေါင်း (၂၀၀)ကျော်ရှိပြီး သွေးကျဆေး၊ ချောင်းဆိုးပျောက်(ငုံ)ဆေး၊ အကိုက်ခဲပျောက်ဆေး၊ လေဆေး၊ အစာအိမ်ဆေး၊ ဆီးချို ဆေး၊ သန္ဓေတားဆေး၊ ကိုယ်ဝန်ဆောင်အားဆေး၊ အရက်ပြန်တို့မှာ ရောင်းအားကောင်းသောဆေးများဖြစ်ပြီး  TTO, Sun, Myanmar Bright Brother, United Pharma, BPI, Mercury စသည့် ဆေးကုမ္ပဏီများမှ ဝယ်ယူရောင်းချပြီး၊ ဝယ်ယူသည့်ဈေးနှုန်း၊ ပစ္စည်းပြတ်လပ်မှုရှိ/ မရှိ၊ ဖြစ်သင့်ဖြစ်ထိုက်သည့်‌ဈေးနှုန်းထက် ဈေးနှုန်းမြှင့်တင်ရောင်းချမှုရှိ/ မရှိတို့ကိုစစ်ဆေးခဲ့ ကြောင်း သတင်းရရှိပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မအူပင်ခရိုင် ညောင်တုန်းမြို့နယ်ဦးစီးမှူးရုံးမှ တာဝန်ရှိသူများသည် မြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ကျန်းမာရေးဦးစီးဌာန၊ ကယ်ဆယ်ရေးနှင့်ပြန်လည်နေရာချထားရေး ဦးစီးဌာနနှင့်အတူ ညောင်တုန်းမြို့နယ် ဆားမလောက်(အ.ထ.က)ကျောင်းတွင် နေ့လယ် (၁၂:၃၀) အချိန်က ကျောင်းမုန့်ဈေးတန်းတွင်ရောင်းချနေသော မုန့်များအား ကုန်အညွှန်းအမှတ်အသားနှင့်ပတ်သက်၍ ကွင်းဆင်းစစ်ဆေးဆောင်ရွက်ခဲ့ကြသည်။

      ကွင်းဆင်းစစ်ဆေးရာတွင် ဒေါ်ချိုမီဇင် ဒု-ဦးစီးမှူးက ကျောင်းမုန့်ဈေးတန်းရှိ မုန့်ဆိုင် (၆)ဆိုင်မှ ဆိုင်ရှင်များအား တစ်ကိုယ်ရည် ကျန်းမာရေးကို အထူးဂရုပြုရန်၊ ဈေးဆိုင်ပတ်ဝန်ကျင် သန်းရှင်းရေးကို နေ့စဉ်ပြုလုပ်ရန်၊ ရောင်းချနေသော မုန့်များတွင် ကုန်အညွှန်းအမှတ်အသား ပြည်စုံစွာဖော်ပြပါဝင်သော မုန့်များကိုသာ ရောင်းချရန်၊ ထမင်းသုပ်နှင့် လက်သုပ်မုန့်များကို ရောင်းချပါက ယင်မနားစေရန် အုပ်ဆောင်း၊ လက်အိတ်၊ ခေါင်းစွပ်တို့ဖြင့်ရောင်းချရန်၊ ဆိုးဆေးများပါဝင်သော၊ ကလေးများစားသုံးရန်မသင့်သော တားမြစ်မုန့်များကို ရောင်းချခြင်းမပြုရန် အသိပညာပေးခဲ့ပြီး ဈေးဆိုင်များတွင် ရောင်းချသော မုန့်အများစုသည် သတ်မှတ်ချက်များအတိုင်း ပြည်စုံစွာပါဝင်သော စားသုံးရန်သင့်သော မုန့်များရောင်းချနေကြောင်း စစ်ဆေးတွေ့ရှိရသည်။

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ မော်ကျွန်းမြို့နယ်တာဝန်ခံ ဦးမင်းဇော်လတ်နှင့် ဝန်ထမ်းများသည်  မြို့နယ်စည်ပင်သာယာရေးအဖွဲ့နှင့်ပူးပေါင်း၍  (၈-၉-၂၀၂၄) ရက်နေ့၊ နေ့လယ်(၁၄:၀၀) နာရီအချိန်တွင် မော်ကျွန်းမြို့နယ်၊ ဗိုလ်ချုပ်ဈေးတွင် ရောင်းချပေးနေသောစားသုံးဆီများကို သတ်မှတ်ရည်ညွှန်းဈေးနှုန်းဖြင့်ရောင်းချခြင်းရှိ/ မရှိ ကွင်းဆင်းစစ်ဆေးခဲ့ပါသည်။

          ထိုသို့ကွင်းဆင်းစစ်ဆေးဆောင်ရွက်ရာတွင် မော်ကျွန်းမြို့နယ်တာဝန်ခံသည် ဗိုလ်ချုပ်ဈေးတွင် လက်လီ/ လက်ကားရောင်းချနေသော ဆီဆိုင်ပိုင်ရှင်များအနေဖြင့် သက်ဆိုင်ရာဌာနများကထုတ်ပြန်ထားသော အမိန့်ညွှန်ကြားချက်များနှင့်အညီ သတ်မှတ်ရည်ညွှန်းဈေးဖြင့်ရောင်းချကြရန်၊ အလေးချိန်ပြည့်ဝမှန်ကန်စွာရောင်းချကြရန်တို့ကိုရှင်းလင်းပြောကြားခဲ့ပြီး ရရှိသောစားအုန်းဆီခွဲတမ်းများကိုလည်း စနစ်တကျဖြန့်ဖြူရောင်းချကြရန်၊ ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားရှိခြင်းများတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း ဆိုင်ပိုင်ရှင်များအား ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ လပွတ္တာခရိုင်၊ မော်လမြိုင်ကျွန်းမြို့နယ်မှ ဆန်လိုတိုင်းဖြစ်သော တနင်္သာရီတိုင်းဒေသကြီး၊ မြိတ်ခရိုင်သို့ ဆန်များတင်ပို့နိုင်ရေးအတွက် ၂၀၂၄ခုနှစ်၊စက်တင်ဘာလ(၅)ရက်နေ့၊ နေ့လယ် (၁၅:၀၀) နာရီအချိန်တွင် လပွတ္တာခရိုင်အုပ်ချုပ်ရေးမှူးဦးဆောင်၍ မြို့နယ်ရဲတပ်ဖွဲ့၊ မြို့နယ်စားသုံးသူရေးရာဦးစီးဌာန၊ မြို့နယ်လူဝင်မှုကြီးကြပ်ရေးနှင့်အမျိုးသားမှတ်ပုံတင်ရေးဦးစီးဌာန၊ ပြည်တွင်းအခွန်များဦးစီးဌာန၊ မြို့နယ်မီးသတ်ဦးစီးဌာန၊ မြို့နယ်ပုဂ္ဂလိကရေယာဉ်များ စနစ်တကျပြေးဆွဲနိုင်ရေးကြီးကြပ်မှုကော်မတီ၊ မြို့နယ်ဆန်စက်လုပ်ငန်းရှင်များအသင်းတို့ပါဝင်သော ပူးပေါင်းအဖွဲ့ဖြင့် မော်လမြိုင်ကျွန်းမြို့မှ မြိတ်မြို့သို့ ဆန်တင်ပို့မည့် MV - ရတနာမယ် ရေယာဉ်တွင် ဧည့်မထဆန် (၈၄၀၀)အိတ်၊ ကောက်ညှင်း(၁၁၀၀)အိတ်၊ စုစုပေါင်း(၉၅၀၀)အိတ်၊ MV - တော်ဝင်လင်း ရေယာဉ်တွင် ဧမထဆန်(၉၈၀၀)အိတ်၊ ကောက်ညှင်းဆန် (၂၀၀)အိတ်၊ စုစုပေါင်း (၁၀၀၀၀)အိတ်၊ MV - ဓနရွှေလမင်း ရေယာဉ်တွင် ဧည့်မထဆန်(၇၀၀၀)အိတ်၊ ကောက်ညှင်းဆန်(၁၀၀၀)အိတ်၊ စုစုပေါင်း(၈၀၀၀) အိတ်တင်ဆောင်ထားမှုအခြေအနေနှင့် ဆန်များသယ်ဆောင်ရာတွင် ကန့်သတ်ကုန်ပစ္စည်းများသယ်ဆောင်ခြင်းမရှိစေရေး၊ တရားဥပဒေနှင့်ညီညွတ်မှုမရှိသည့် ကိစ္စရပ်များဖြစ်ပွားမှုမရှိစေရေးတို့အတွက် စစ်ဆေးဆောင်ရွက်ခဲ့ကြောင်းသိရှိရပါသည်။

DOCA(ဧရာဝတီ)

        ကျောင်းသားလူငယ်များအသိပညာဗဟုသုတတိုးပွားစေရန် ကျောင်းစာအပြင် ပြင်ပဗဟုသုတများ တိုးပွားစေရန်နှင့် ဥပဒေဆိုင်ရာအချက်အလက်များကို ကျောင်းသားလူငယ်များ ကျယ်ကျယ်ပြန့်ပြန့် နားလည်သိရှိစေရန်ရည်ရွယ်၍ (၇.၉.၂၀၂၄)ရက်နေ့၊ နံနက်(၀၉:၀၀)နာရီအချိန်တွင် မကွေးတိုင်းဒေသကြီး၊ ချောက်ခရိုင်၊ ချောက်မြို့ အမှတ်(၃)အခြေခံပညာအထက်တန်းကျောင်းရှိ စိုးမေတ္တာခန်းမ၌ ဌာနဆိုင်ရာများပူးပေါင်း၍ အသိပညာပေးဟောပြောပွဲ ကျင်းပပြုလုပ်ခဲ့သည်။

     မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိက “လူငယ်နှင့်ပညာရေး၊ လူငယ်နှင့်စာဖတ်ခြင်းအလေ့အထ” ခေါင်းစဉ်ဖြင့်လည်းကောင်း၊ မြို့နယ်စားသုံးသူရေးရာဦးစီးဌာန မြို့နယ်တာဝန်ခံက “စားအုန်းဆီ၏ ဘေးထွက်ဆိုးကျိုးများ၊ ကုန်အညွှန်းအမှတ်အသား၏ သတ်မှတ်ထားသော အချက်များ”ကိုလည်းကောင်း၊ မြို့နယ်ဥပဒေအရာရှိက “ကလေးအလုပ်သမားပပျောက်‌ရေးဆိုင်ရာ သိကောင်းစရာများ” ဒုတိယမြို့နယ် ဥပဒေအရာရှိက “ လူကုန်ကူးမှုတားဆီးနှိမ်နင်းရေးဥပဒေ၊ လောင်းကစားဥပဒေ၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအကြောင်းအရာများ” ကိုလည်းကောင်း၊ မြို့နယ်ရွေးကောက်ပွဲကော်မရှင်အဖွဲ့ခွဲရုံးမှ ဒုတိယဦးစီးမှူးက ၂၀၀၈ဖွဲ့စည်းပုံအခြေခံဥပဒေနှင့် ပြည်ထောင်စုရွေးကောက်ပွဲကော်မရှင် ဥပဒေအကြောင်း အသီးသီး ရှင်းလင်းဟောပြောခဲ့ကြောင်း သိရှိရပါသည်။

DOCA(မကွေး)