သတင်းနှင့် လှုပ်ရှားမှုများ

   ဖြူးမြို့နယ်အတွင်းရှိ ကျောင်းသားလူငယ်များသိသင့်သိထိုက်သည့် အသိပညာဗဟုသုတများရရှိစေရန်ရည်ရွယ်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာနသည် မိတ်ဖက်ဌာနဆိုင်ရာများနှင့်ပူးပေါင်း၍ အသိပညာပေးဟောပြောပွဲများကို ဆောင်ရွက်လျက်ရှိရာ ၂၀၂၃ခုနှစ်၊ ဇွန်လ (၂၁) ရက်နေ့တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဖြူးမြို့နယ်ဦးစီးမှူးရုံး၌ကျင်းပသည့် အသိပညာပေးဟောပြောပွဲသို့ စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံရုံးမှ ဌာနခွဲစာရေး ဒေါ်ပပလင်းတက်ရောက်၍ စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။

   ဟောပြောပွဲတွင် ဖြူးမြို့နယ်၊ မိခင်နှင့်ကလေးစောင့်ရှောက်ရေးအသင်းဥက္ကဋ္ဌ ဒေါ်ဒေဝီမေက မှတ်သားစရာအသိပညာများအကြောင်းကိုလည်းကောင်း၊ တိုင်းရင်းဆေးပညာဦးစီးဌာနမှ မြို့နယ်တိုင်းရင်းဆေးမှူး ဒေါ်ဇင်မင်းထွန်းက မိုးရာသီတွင်ဖြစ်တတ်သော ဝမ်းရောဂါအကြောင်းကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အိမာဟိန်းက “မူးယစ်ဆေးဝါးတို့ရှောင်ရှား” ခေါင်းစဉ်ဖြင့်လည်းကောင်း ဟောပြောခဲ့ကြပါသည်။

    စားသုံးသူရေးရာဦးစီးဌာန၊ ဖြူးမြို့နယ်တာဝန်ခံရုံးမှ ဒေါ်ပပလင်းက စားသုံးသူ၏အခွင့်အရေးနှင့်တာဝန်များ၊ ကုန်စည်များတွင် ကုန်အညွှန်းအမှတ်အသားဖော်ပြရန်ကိစ္စရပ်များ၊ စားသုံးသူကာကွယ်ရေးဥပဒေ ၂၀၁၉တွင် ပြဋ္ဌာန်းထားသည့်အကြောင်းများ၊ အစားအသောက်နှင့် အသုံးအဆောင်ပစ္စည်းများဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့်အကြောင်းအရာများကို ဆွေးနွေးဟောပြောခဲ့ကြောင်းနှင့် ဟောပြောပွဲသို့ ဖြူးမြို့၊ မြို့မ (၁) အခြေခံပညာအလယ်တန်းကျောင်းမှ ကျောင်းသား/ကျောင်းသူ ၂၅ဦးတက်ရောက်ကြောင်း သိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဒု - ခရိုင်ဦးစီးမှူး ဒေါ်တိုးတိုးချွန်နှင့် ဝန်ထမ်း (၁) ဦးတို့သည် ၂၀၂၃ခုနှစ်၊ဇွန်လ (၂၃) ရက်နေ့၊ နံနက် (၁၀:၀၀) အချိန်တွင် မုံရွာမြို့၊ ချမ်းမြသာစည်ရပ်ကွက်ရှိ မခိုင် ဝက်အူချောင်း၊ ကြက်အူချောင်း လုပ်ငန်းရှင် မခိုင် နှင့် တွေ့ဆုံမေးမြန်းခဲ့ပါသည်။

      ထိုသို့တွေ့ဆုံမေးမြန်းရာတွင် “မခိုင်” ဝက်အူချောင်း၊ ကြက်အူချောင်း လုပ်ငန်းကို ၂၀၁၀ ခုနှစ်တွင် မိသားစုလုပ်အားဖြင့် စတင်ခဲ့ကြောင်း၊ ရင်းနှီးမြှုပ်နှံမှု တန်ဖိုးအနေဖြင့် ကျပ်သိန်း (၁၅၀ ) ခန့် ရှိကြောင်း သိရှိရပါသည်။

     ကုန်ကြမ်းဖြစ်သော ဝက်သား၊ ကြက်သားများကို မုံရွာမြို့၊ မြသလ္လာဈေးမှ ဝက်သား တစ်ပိဿာ (၁၈၀၀၀)ကျပ်၊ ကြက်သားတစ်ပိဿာ (၁၅၀၀၀)ကျပ်ဖြင့် ဝယ်ယူကြောင်း၊ ဆိတ်အူကို အသုံးပြုပြီး ဆိတ်အူတစ်ပိဿာလျှင် (၂၅၀၀၀)ကျပ် ပေးရကြောင်း၊ ဆိတ်အူတစ်ပိဿာကို သန့်စင် လိုက်ပါက (၁၀)ကျပ်သားခန့်သာ ရရှိကြောင်း၊ ဝက်အူချောင်း၊ ကြက်အူချောင်းလုပ်ငန်းကို မိသားစု လုပ်အားအပြင် လုပ်သား (၂)ဦးဖြင့် လုပ်ကိုင်ပါကြောင်း၊ လုပ်သားတစ်ဦးလျှင် တစ်ရက် စားရိတ်ငြိမ်း (၇၀၀၀)ကျပ်နှုန်း ပေးရပါကြောင်း၊ တစ်လလျှင် (၂၀)ရက် လုပ်ငန်းလည်ပတ်ပြီး  တစ်ရက်လျှင် ဝက်အူချောင်း (၅- ၆) ပိဿာနှင့် ကြက်အူချောင်း (၂-၃) ပိဿာ ထုတ်လုပ်ပါကြောင်း၊ ကြက်သား ကုန်ကြမ်းတစ်ပိဿာ ထုတ်လုပ်လျှင် အတောင့်ရေ (၆၀-၇၀)၊ ဝက်သားကုန်ကြမ်း တစ်ပိဿာလျှင် အတောင့်ရေ(၄၀-၅၀)ကြား ထွက်ရှိပါကြောင်း၊ ဝက်အူတောင့် တစ်တောင့်လျှင် (၆၅၀)ကျပ်နှင့် ကြက်အူတောင့် တစ်တောင့်လျှင်(၃၅၀)ကျပ် ရောင်းချရပြီး တစ်ရက်လျှင် ကြက်အူချောင်း (၁၈၀) တောင့်၊ ဝက်အူချောင်း (၂၅၀)တောင့်ခန့်ရောင်းချရပါကြောင်း၊ မုံရွာမြို့တွင်းနှင့်  မိမိဒေသထွက် လက်ဆောင်အနေဖြင့် ပေးရန်အတွက် ရောင်းချရပါကြောင်း သိရှိရပါသည်။

     ကြုံတွေ့ရသော အခက်အခဲအနေဖြင့် ကုန်ကြမ်းဈေးနှုန်း ကြီးမြင့်မှုကြောင့် ယခင်က ကဲ့သို့ အရောင်းအဝယ် မဖြစ်တော့ဘဲ လုပ်သားများ အလုပ်လက်မဲ့ မဖြစ်စေရန်နှင့် မိမိတို့လုပ်ငန်း ဈေးကွက်အတွင်းမှ ပျောက်မသွားစေရန်အတွက်သာ လုပ်ကိုင်နေရခြင်းဖြစ်ကြောင်း သိရှိရပြီး ဌာနမှ ဝန်ထမ်းများကလည်း စားသုံးသူကာကွယ်ရေးဥပဒေ ၂၀၁၉ တွင် ပြဌာန်းထားသော စီးပွားရေး လုပ်ငန်းရှင်၏တာဝန်များအကြောင်း၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေး ဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်းနှင့် ပြစ်မှုပြစ်ဒဏ်များကို အသိပညာပေးဆွေးနွေးခဲ့ပါသည်။

DOCA(စစ်ကိုင်း)

   ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ သဖန်းချိုကျေးရွာတွင် သံပရာသီးပင်များစိုက်ပျိုးထားရှိသဖြင့် စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံနှင့် ဝန်ထမ်းများသည် (၂၂-၆-၂၀၂၃)နေ့၊ နံနက်ပိုင်းတွင် ကွင်းဆင်းဆောင်ရွက်ခဲ့ပါသည်။

    ပေါက်ခေါင်းမြို့နယ်၊ သဖန်းချိုအုပ်စု၊ သဖန်းချိုကျေးရွာရှိ သံပရာသီးစိုက်ပျိုးသည့် တောင်သူ ဒေါ်စန္ဒာနှင့်တွေ့ဆုံပြီး မေးမြန်းရာ မိမိတွင် သံပရာပင်စိုက်ဧက (၀.၂၅) ဧကရှိပြီး သံပရာပင်ပေါင်း (၅၀) ပင်ခန့်ဝင်ဆံ့ကြောင်းသိရပါသည်။ သံပရာပင် (၀.၂၅) ဧကစိုက်ပျိုးရာတွင် ကုန်ကျစရိတ်မှာ (၅၉၀၀၀) ကျပ်ခန့်ကုန်ကျ၍ သံပရာသီးပေါ်ချိန်တွင် တစ်လလျှင် (၂) ကြိမ်ခူးဆွတ်ရကြောင်းသိရပါသည်။ သံပရာသီးတစ်ကြိမ်ခူးဆွတ်လျှင် အလုံးရေ (၃၀၀၀) ခန့်ရရှိပြီး (၂) ကြိမ်ခူးဆွတ်လျှင် သံပရာသီးအလုံးပေါင်း (၆၀၀၀) ခန့်ရရှိသည်ဟု သိရပါသည်။

     ထွက်ရှိလာသော သံပရာသီးများကို တစ်လုံးလျှင် (၃၀) ကျပ်နှုန်းဖြင့် ဈေးများသို့ သွားရောက်ရောင်းချသဖြင့် တစ်လဝင်ငွေရရှိမှုမှာ (၁၈၀၀၀၀) ကျပ်ခန့်ရရှိကြောင်းသိရပါသည်။ သံပရာပင် (၀.၂၅) ဧကအတွက် အကျိုးအမြတ်မှာ (၁၂၁၀၀၀) ကျပ်ခန့်ရရှိကြောင်းသိရပါသည်။ သံပရာပင်စိုက်ပျိုးထားလျှင် (၃) နှစ်ခန့် ခူးယူစားသုံးရသဖြင့် နောက်ပိုင်းအကျိုးအမြတ်သာရရှိလာနိုင်မည်ဖြစ်ပါသည်။ သံပရာပင်စိုက်ပျိုးခြင်းကြောင့် မိမိတို့၏မိသားစုအတွက် အပိုဝင်ငွေရရှိသည့်အပြင် ဧကပိုမိုတိုးချဲ့စိုက်ပျိုးလာနိုင်ပါက အမြတ်အစွန်းများပိုမိုရရှိလာနိုင်မည်ဖြစ်ပါကြောင်း သိရှိရပါသည်။

DOCA(ပဲခူး)

     ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်၊  ဈေးကော်မတီရုံးခန်းမတွင် စားသုံးသူရေး ရာဦးစီးဌာနမှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် မိတ်ဖက်ဌာနဖြစ်သော စည်ပင်သာယာရေးကော်မတီအဖွဲ့နှင့်အတူ ကုန်မျိုးစုံရောင်ချသူ လုပ်ငန်းရှင်များအား၂၀၂၃ ခုနှစ်၊ဇွန်လ (၂၁.၆.၂၀၂၃)ရက်နေ့၊နံနက် (၀၉:၄၅) အချိန်တွင် စားသုံးသူကာကွယ်ရေးအသိပညာပေး ဟောပြောခဲ့ကြပါသည်။

     အဆိုပါဟောပြောဆွေးနွေးပွဲတွင် မြို့နယ်ဦးစီးမှူးဦးဝင်းမင်းစိုးက စားသုံးသူကာကွယ်ရေးဥပဒေပါ အခန်း(၅) ဦးစီးဌာန၏ လုပ်ပိုင်ခွင့်နှင့်တာဝန်များ၊ အခန်း(၆)စစ်ဆေးရေးအရာရှိ၏ လုပ်ငန်းတာဝန်များ၊ အခန်း(၁၀)ပါ စီးပွားရေးလုပ်ငန်းရှင်များ လိုက်နာရမည့်တာဝန်များအကြောင်း၊ တို့ကိုရှင်းလင်း ဟောပြောခဲ့ပြီးနောက် ကုန်စည်နှင့်စပ်လျဉ်း၍အာမခံပေးမှု၊ ကုန်စည်အပေါ်တာဝန်ရှိမှု၊ ကုန်စည်များတွင် ကုန်အညွှန်း အမှတ်အသားဖော်ပြခြင်းဆိုင်ရာအချက်များကို အသိပညာပေးဟောပြောဆွေးနွေးခဲ့ကာ လုပ်ငန်းရှင်များမှသိရှိလိုသည့်အချက်များကို မေးမြန်းမှုကို ပြန်လည်ဖြေကြားပေးခဲ့၍ ကုန်မျိုးစုံလုပ်ငန်းရှင်(၁၆)ဦး တက်ရောက်ခဲ့ကြောင်းသိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံး၊ ပန်းတနော်မြို့ နယ်ဦးစီးမှူးရုံးသည် ၂၀၂၃ ခုနှစ်၊ဇွန်လ (၂၂.၆.၂၀၂၃)ရက်နေ့ ၊နေ့လယ် (၁၂:၀၀)အချိန် ထောက်ရှာကုန်းကျေးရွာတွင် ပြည်သူများအား စားသုံးသူကာကွယ်ရေးဥပဒေများအကြောင်း အသိပညာပေးဟော ဆွေးနွေးခဲ့ပါသည်။

    အဆိုပါဆွေးနွေပွဲတွင် ပန်းတနော်မြို့နယ်ဦးစီးမှူး ဦးပိုးဖြူပိုင်မင်းက ထောက်ရှာကုန်းကျေးရွာမှ ပြည်သူများအား စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်စည်နှင့် ဝန်ဆောင်မှုများကို စားသုံးသူများမှ ရွှေးချယ်ဝယ်ယူရာတွင် အာမခံချက်နှင့်စပ်လျဉ်း၍ စားသုံးသူက တောင်းဆိုနိုင်သည့်အခွင့်အရေးများအကြောင်းကိုလည်းကောင်း၊ စားသုံးသူများက အခွင့်အ‌ရေးကို သိရှိပြီးလျှင် လိုက်နာရမည့် တာဝန်များကိုလည်း လိုက်နာရှောင်ကြဉ်ရန်လိုအပ်ပါကြောင်း၊ ကုန်စည်ကို ဝယ်ယူအသုံးပြုရာတွင် ကုန်အညွှန်းအမှတ်အသားပြည့်စုံစွာ ဖော်ပြပါဝင်သည့် ကုန်စည်ကိုရွေးချယ်တတ်စေရန် ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များကို သိရှိရမည်ဖြစ်ကြောင်း၊ စားသုံးသူရေးရာဦးစီးဌာနသို့ စားသုံးသူအခွင့်အရေး နစ်နာဆုံးရှုံးမှုနှင့် စပ်လျဉ်း၍ တိုင်ကြားလာသော ဖြစ်စဉ်များရှိသဖြင့် ဖြေရှင်းဆောင်ရွက်ပေးခဲ့သည့်ဖြစ်စဉ်များအား ရှင်းလင်းကာ စားသုံးသူအခွင့်အရေး နစ်နာမှုများအတွက် တိုင်ကြားနိုင်သည့် နည်းလမ်းများ၊ တိုင်ကြားနိုင်သည့် ပုံစံများအကြောင်းကို ပြောကြားခဲ့ပြီး ပြည်သူ(၇)ဦးမှ သိရှိလိုသည်များကို စိတ်ဝင်တစား မေးမြန်းဆွေးနွေးခဲ့ကြကြောင်းနှင့် အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သိရပါသည်။

DOCA(ဧရာဝတီ)