သတင်းနှင့် လှုပ်ရှားမှုများ

       ပဲခူးတိုင်းဒေသကြီး၊ စားသုံးသူရေးရာဦးစီးဌာန ၊ ညောင်လေးပင်ခရိုင် ၊ ဒိုက်ဦးမြို့နယ်တာဝန်ခံနှင့် ဝန်ထမ်းများသည် အောက်တိုဘာ (၂၀) ရက်နေ့ ၊ နေ့လည်ပိုင်းတွင် ပြည်တွင်းကုန်သွယ်မှု ဖွံ့ဖြိုးတိုးတက်ရေးအတွက် ကျေးရွာတစ်ရွာ ထုတ်ကုန်တစ်မျိုးထုတ်လုပ်နေသော အသေးစား  ၊ အလတ်စားလုပ်ငန်းများဖြစ်သော ကျောင်းစုရပ်ကွက်ရှိ ငါးဖယ်ချဉ်လုပ်ငန်းနှင့် သံတံတားရပ်ကွက်ရှိ ငါးရံ့ခြောက်လုပ်ငန်းများ လုပ်ကိုင်နေမှုအား ကွင်းဆင်းလေ့လာခဲ့ပါသည်။

      ထိုသို့ ကွင်းဆင်းလေ့လာရာတွင် ငါးဖယ်ချဉ်လုပ်ငန်းရှင်နှင့် ငါးရံ့ခြောက်လုပ်ငန်းရှင်တို့မှ ထုတ်လုပ်ပုံ အဆင့်ဆင့်နှင့် ဈေးနှုန်းဈေးကွက်အခြေအနေ ၊ ထုတ်လုပ်မှု ကုန်ကျစရိတ်နှင့် အကျိုး အမြတ် ရရှိမှုတို့အား ရှင်းလင်းဆွေးနွေးပြီး မြို့နယ်တာဝန်ခံ ဦးမျိုးမြင့်မှ လုပ်ငန်းများ တိုးချဲ့ပြီး ဈေးကွက်ရှာဖွေထုတ်လုပ် တင်ပို့နိုင်ပါက မှီခိုလုပ်သားမိသားစုဝင်များ အလုပ်အကိုင်ရရှိကာ ဝင်‌ငွေတိုးပွားစေမည်ဖြစ်ပါကြောင်း အသိပေးပြောကြားခဲ့ကြောင်း သိရှိရပါသည်။

DOCA(ပဲခူး)

        တောင်ငူမြို့နယ်၊ ဆိပ်ဖူးတောင်ကျေးရွာအုပ်စု၊ ဘုရားခြေရင်းကျေးရွာ၊ တောင်ငူ-သံတောင် လမ်းမဘေးရှိ မုန့်ဖတ်ခြောက်လုပ်ငန်းသည် အောင်မြင်သော ဒေသထွက် တန်ဘိုးမြှင့်ထုတ်ကုန် လုပ်ငန်းတစ်ခုဖြစ်ပါသည်။ လုပ်သားအင်းအား ၃၀ ဦးဖြင့် လျှပ်စစ်မီးရရှိမှုအပေါ် မူတည်ကာ တစ်နေ့လျင် ကုန်ကြမ်း ဆန်အိတ် ၅၀ အထိ ထုတ်လုပ်နိုင်သည့် လုပ်ငန်းဖြစ်ပါသည်။

          ထုတ်လုပ်ပုံမှာ ဆလတ်ကြီးဆန်အား (၂)နာရီခန့်ကြိုတင်ရေစိမ်ထားပြီး ရေစိမ်ထားသော ဆန်ကိုနှစ်ကြိမ်မှသုံးကြိမ်အထိ ရေဆေးရပါသည်။ ရေဆေးပြီးဆန်များကို မုန့်ကြိတ်ရပါသည်။ ထွက်ရှိ လာသော မုန့်နှစ်များအား ရေစစ်ပြီး မုန့်ဖတ်ထွက်လာအောင် ညစ်ရပါသည်။ မုန့်ဖက်များ မကပ်စေရန် စားဆီသုတ်ပေးရပါသည်။ ထွက်ရှိလာသောမုန့်ဖက်များကို လျှော်ရပါသည်။ လျှော်ပြီးသား မုန့်ဖတ်များ ကိုတစ်ရက်နေလှန်း၍ ခြောက်သွေ့လာသောမုန့်ဖက်များကို တပိုင်တနိုင် မယူ၍ ထုတ်ပိုးသည့် နေရာသို့ ပေးပို့ရပါသည်။ ပလပ်စတစ်အိတ် တစ်အိတ်လျှင် ၂၂ ကျပ်သားစီ ထည့်၍ တံဆိပ်ကပ်ကာ ထုပ်ပိုးရပါသည်။

         ထုတ်လုပ်မှုကုန်ကျစရိတ်မှာ ဆလတ်ကြီးဆန်တစ်အိတ်လျှင် လုပ်သားခ၊ ထုပ်ပိုးခွံဖိုး အပါ အဝင် ၅၀၀၀၀ ကျပ်ခန့်ရှိပြီး အမြတ်မှာ ဆန်တစ်အိတ်လျှင် ၂၀၀၀ ကျပ်ခန့်ရှိကြောင်း သိရှိရပါသည်။ ဆလပ်ကြီးဆန်တစ်အိတ်လျှင် ၂၂ ကျပ်သား မုန့်ဖတ်ခြောက်ထုပ် ၁၀၀ မှ ၁၁၀ ခန့်အထိရကြောင်း၊ မုန့်ဖတ်ခြောက်ထုတ်လုပ်မည့် ဆန်အိတ်များကို ဒေသတွင်းတွင်ပင် ဝယ်ယူစုဆောင်းထားကြောင်း၊ ၂၂ ကျပ်သား မုန့်ဖတ်ခြောက်ထုပ် တစ်ထုပ်လျှင် ၄၀၀ ကျပ် ရောင်းချကြောင်း၊ တောင်ငူခရိုင်အတွင်းရှိ ကုန်စုံဆိုင်များနှင့် သထုံ၊ ဘားအံ၊ မော်လမြိုင်၊ မြဝတီမြို့များအထိ တင်ပို့ရကြောင်း၊ တစ်လလျှင် ၂၂ ကျပ်သား အထုပ် ၃၀ ပါ ပီနန်အိတ် ပါကင်ထုပ် ၁၂၀၀ မှ ၁၅၀၀ အထိ တင်ပို့ရကြောင်း၊ လျှပ်စစ်မီးရရှိမှု နည်းပါးသဖြင့် အခက်အခဲ အနည်းငယ်ဖြစ်ရကြောင်း လုပ်ငန်းရှင်၏ ပြောပြချက်အရ သိရှိရပါသည်။

DOCA(ပဲခူး)

      မြန်မာ့ရိုးရာအစားအစာများစွာ ရှိသည့်အနက် ခဲတံဝါး(ခေါ်) ကောက်ညှင်းကျည်တောက်သည်လည်း ယခုရာသီတွင်နာမည်ကြီးသော အစားအစာတစ်ခုဖြစ်ပါသည်။ ခဲတံဝါးကိုပြုလုပ်ရာတွင် လိုအပ်သောကုန်ကြမ်းမှာ တင်းဝါးနှင့် ကောက်ညှင်းဆန်ဖြစ်ပါသည်။ ခဲတံဝါးပြုလုပ်ပုံမှာ တင်းဝါး အနေတော်တစ်လုံးကို ကောက်ညှင်းဆန် ထည့်ရန်အတွက်  အဆစ်တစ်ခုစီတိုင်းမှ ဖြတ်တောက် ထားရပါသည်။ ထိုဖြတ်တောက်ထားသော အဆစ်ထဲသို့ ကောက်ညှင်းဆန်နှင့်ရေကို သင့်တင့် မျှတစွာထည့်၍ အဆစ်ထိပ်ဝကို ကောက်ရိုးဖြင့် ပိတ်ထားရပါသည်။ ထို့နောက် ကောက်ညှင်းဆန်နှင့် ရေထည့်ထားသော တင်းဝါးကို တစ်ခုခုဖြင့်အမှီပြု၍ ထောင်လျက်အနေအထားဖြင့်ထားကာ ပတ်ပတ်လည်ကို မီးအား အသင့်တင့်ဖြင့် (၁၅)မိနစ်ခန့် မီးရှို့ရပါသည်။ ထိုသို့အဆင့်ဆင့် ပြုလုပ် ပြီးနောက်တွင် ရောင်းတန်းဝင် ခဲတံဝါးကို ရရှိလာပြီဖြစ်ပါသည်။

      ခဲတံဝါးပြုလုပ်ရန်အတွက် လိုအပ်သောကုန်ကြမ်းဖြစ်သည့် ကောက်ညှင်းဆန်အား တစ်ပြည်လျှင် ၃၅၀၀ ကျပ်ဖြင့် ဝယ်ယူရကြောင်း၊ ဝါးကို တောင်ပေါ်ဒေသများမှ လာရောက် ရောင်းချသည့် တင်းဝါးကို အသုံးပြုရပြီး တင်းဝါးတစ်လုံးလျှင် ၁၀၀၀ ကျပ် ဝယ်ယူရကြောင်း သိရပါသည်။ ယခုလိုဆောင်းဝင်ခါစအချိန်တွင် ခဲတံဝါးသည် အအေးဒဏ်ကိုအံတုကာ မီးလှုံ ရင်းပြုလုပ်နိုင်သော အစားအစာတစ်မျိုးဖြစ်ပြီး ကောက်ညှင်းကြိုက်သူအဖို့တော့ စားကောင်းလှသော အစားအစာတစ်ခုပင်ဖြစ်ပါသည်။

    ခဲတံဝါးဈေးနှုန်းဈေးကွက်အနေဖြင့် ခဲတံဝါး အရွယ်အစားအလိုက် တစ်ထောင်ဖိုးလျှင် အကြီး(၂)လုံး၊ အလတ်(၃)လုံး၊ အသေး(၄)လုံး ရောင်းချကြောင်းသိရှိရပါသည်။ ယခုလို ခဲတံဝါးပေါ်ခါစ ကာလတွင် တစ်နေ့လျှင် ခဲတံဝါးပြုလုပ်ရန် ကောက်ညှင်းဆန် ၄ ပြည်ခန့် အသုံးပြုရကြောင်း၊ တစ်နေ့ ရောင်းရငွေမှာ ကျပ်သုံးသောင်းခန့်ရှိကြောင်း ကင်းဆိပ်ကျေးရွာမှ ခဲတံဝါးလာရောက် ရောင်းချသူ တစ်ဦး၏ ပြောကြားချက်အရသိရှိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဖြူးမြို့နယ်ဦးစီးဌာနမှူး ဒေါ်အိမာဟိန်းနှင့်အတူ အောက်တိုဘာလ ၁၉ ရက်နေ့ နံနက်ပိုင်းက ဖြူးမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန လူထုအခြေပြုဗဟိုဌာနခန်းမ၌ စားသုံးသူကာကွယ်ရေးဆိုင်များကို Talk Show အစီအစဉ်ဖြင့် ဆောင်ရွက်ခဲ့ပါသည်။

         အသိပညာပေးဆွေးနွေးပွဲအစီအစဉ်တွင် စားသုံးသူရေးရာဦးစီးဌာန မြို့နယ်တာဝန်ခံ ဒေါ်သန္တာစိုးက စားသုံးသူကာကွယ်ရေးဥပဒေပါ ကုန်စည်များတွင် ကုန်အညွှန်းအမှတ်အသား ဖော်ပြခြင်းဆိုင်ရာပြဌာန်းချက်များ၊ ကုန်အညွှန်းအမှတ်အသားများ ဖော်ပြရာတွင် လုပ်ငန်းရှင်များ အဆင်ပြေစွာဆောင်ရွက်နိုင်ရန်အတွက် မြန်မာနိုင်ငံစားသုံးသူကာကွယ်ရေးကော်မရှင်က ညွှန်ကြားချက်အမှတ် ၂/၂၀၁၉ ထုတ်ပြန် ပေးခဲ့မှုများ၊ လုပ်ငန်းရှင်များသည် ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ အခက်အခဲရှိပါက စားသုံးသူရေးရာဦးစီးဌာန၏ သက်ဆိုင်ရာ တိုင်းဒေသကြီး/ပြည်နယ်နှင့် ခရိုင်ဦးစီးမှူးရုံးများသို့ ဆက်သွယ်အကူအညီတောင်းခံနိုင်ခြင်းများကို ရှင်းလင်း ဆွေးနွေးခဲ့ကြောင်း သိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ စားသုံးသူရေးရာဦးစီးဌာန တောင်ငူခရိုင်၊ တောင်ငူမြို့နယ်တာဝန်ခံ ဦးမြင့်သူသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ တောင်ငူမြို့နယ်ဦးစီးမှူး ဒေါ်ခင်သူဇာဝင်း၊ အားကစား နှင့်ကာယပညာဦးစီးဌာန မြို့နယ်အားကစားမှူး ဒေါ်သူဇာထွေးတို့နှင့်အတူ အောက်တိုဘာလ ၁၈ ရက်နေ့ မွန်းလွဲပိုင်းက တောင်ငူမြို့ အမှတ် ၂၃ ရပ်ကွက်ရှိ၊ ကသည်းစု အခြေခံပညာအလယ်တန်း ကျောင်းတွင် ကျောင်းသား ကျောင်းသူများ ၁၆၀ ဦးအား စားသုံးသူကာကွယ်ရေးဆိုင်များကို အသိပညာပေး ဟောပြောခဲ့ပါသည်။             

    ထို့အတူ တောင်ငူမြို့နယ်တာဝန်ခံ ဦးမြင့်သူသည် မိတ်ဖက်ဌာနဆိုင်ရာတာဝန်ရှိသူများ နှင့်အတူ အောက်တိုဘာလ ၁၉ ရက်နေ့ နံနက်ပိုင်းက တောင်ငူမြို့ အမှတ် ၁ ရပ်ကွက်ရှိ ထီးလှိုင် အခြေခံပညာ မူလတန်းလွန်ကျောင်းတွင် ကျောင်းသားကျောင်းသူ ၁၀၀ ဦးတို့အား စားသုံးသူကာ ကွယ်ရေးဆိုင်ရာများကို အသိပညာပေးဟောပြောခဲ့ပါသည်။

      ဟောပြောပွဲများတွင် မြို့နယ်တာဝန်ခံက စားသုံးသူ၏ အခွင့်အရေးများ၊ စားသုံးသူရေးရာ ဦးစီးဌာန၏ ဆောင်ရွက်ချက်များ၊ ကုန်စည်များ ဝယ်ယူသုံးစွဲရာတွင် ကုန်စည်တွင်ဖော်ပြထားသည့် ကုန်အညွှန်းအမှတ်အသားများကို ဖတ်ရှုရန် အရေးကြီးပုံများ၊ စားသုံးသူနစ်နာဆုံးရှုံးမှုများ ဖြစ်ပေါ် ပါက တိုင်ကြားနိုင်ခြင်းများကို အကျယ်တဝင့်ဟောပြောခဲ့ကြောင်း သိရှိရပါသည်။

DOCA(ပဲခူး)