သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ မကွေးတိုင်းဒေသကြီးဦးစီးမှူး၏ လမ်းညွှန်မှုဖြင့် သရက်ခရိုင်ဦးစီးမှူးရုံးမှ ကံမမြို့နယ်တာဝန်ခံ ဒေါ်နွဲ့ယဉ်ဝင်းသည် ကံမမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ (၂၀-၆-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် စားသုံးသူပြည်သူများနှင့် စီးပွားရေးလုပ်ငန်းရှင်များသိရှိစေရန်အတွက် ကုန်အညွှန်းအမှတ်အသားဖော်ပြခြင်းဆိုင်ရာအသိပညာပေး Talk Show ကျင်းပခဲ့ပါသည်။

    အဆိုပါ Talk Show တွင် ကံမမြို့နယ်တာဝန်ခံ ဒေါ်နွဲ့ယဉ်ဝင်းက ကုန်စည် (သို့မဟုတ်) ဝန်ဆောင်မှုကို ရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များကို ပြည့်စုံမှန်ကန်စွာသိရှိခွင့်နှင့် ဈေးကွက်အတွင်းရှိ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက် ရွေးချယ်ဝယ်ယူနိုင်ခွင့်ရှိခြင်းများ၊ စားသုံးသူများအနေဖြင့် ကုန်စည်နှင့်စပ်လျဉ်း၍ လိုအပ်သောသတင်းအချက်အလက်များသိရှိနိုင်ရန် ၎င်းတို့နှင့်အသုံးပြုမည့် ကုန်စည်များအား သင့်တော်မှန်ကန်မှုရှိစေရန်နှင့် လုံခြုံစိတ်ချရမှုရှိစေရန်၊ အမျိုးအစားတူကုန်စည်များနှင့် ရွေးချယ်ဝယ်ယူနိုင်စေရန်များပြောကြားခြင်း၊ ကုန်စည် (သို့မဟုတ်) ကုန်စည်ထုပ်ပိုးမှုအပြင်အဆင်ပေါ်တွင် စာဖြင့်ရေးသား၍ဖြစ်စေ၊ ပုံနှိပ်၍ဖြစ်စေ၊ ရုပ်ပုံဖြင့်ဖြစ်စေ၊ တခြားနည်းတစ်ရပ်ရပ်ဖြင့်ဖြစ်စေ၊ ဖော်ပြထားသည့်ကုန်စည်နှင့်သက်ဆိုင်သည့် အချက်အလက် (သို့မဟုတ်) အမှတ်အသားကိုဆိုလိုရင်းဖြစ်သည့်အကြောင်း၊ စားသုံးသူကာကွယ်‌ရေးဥပဒေ၊ ပုဒ်မ(၄၂)အရ ကုန်စည်တွင် သက်ဆိုင်ရာအဖွဲ့အစည်းများ၏ သိပ္ပံနည်းကျသုတေသနပြုဆောင်ရွက်ချက်များနှင့် ကျန်းမာရေးအာဟာရဆိုင်ရာ အာမခံချက်များဖော်ပြနိုင်ခြင်းများ၊ ပုဒ်မ(၄၃)အရ မည်သည့်စီးပွားရေးလုပ်ငန်းရှင်မဆို ပုဒ်မ(၄၁)၊ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ဖော်ပြရာ၌ စီးပွားရေးလုပ်ငန်းရှင်များလိုက်နာဆောင်ရွက်ရန် ကုန်အညွှန်းအမှတ်အသားကို မြန်မာဘာသာဖြင့်ဖော်ပြခြင်းတွင် ကုန်စည်အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက် စသည့်အချက်(၇)ချက်ကို မဖြစ်မနေထည့်သွင်းဖော်ပြရန်နှင့် မြန်မာနိုင်ငံစားသုံးသူကာကွယ်ရေးကော်မရှင်က ၂၀၁၉ခုနှစ်၊ ဒီဇင်ဘာလ (၃)ရက်နေ့တွင် ညွှန်ကြားချက်အမှတ် (၂/၂၀၁၉)ဖြင့်ထုတ်ပြန်ခဲ့သည့် ကုန်စည်အုပ်စု(၈)မျိုးပါဝင်၍ ကုန်စည်တစ်ခုချင်းစီအလိုက် ကုန်အညွှန်းအမှတ်အသားကို မြန်မာဘာသာဖြင့်ဖော်ပြရာ၌ စီးပွားရေးလုပ်ငန်းရှင်များလိုက်နာဆောင်ရွက်ရာတွင် အခက်အခဲမရှိစေရန်အတွက် ထုတ်ပြန်ခြင်းဖြစ်ကြောင်း၊ ကုန်စည်အုပ်စုအလိုက် ဖော်ပြရာတွင်(အမှန်ခြစ်)သည် မဖြစ်မနေဖော်ပြရန်လိုအပ်သည့် အညွှန်း အမှတ်အသားဖြစ်ပြီး (အမှားခြစ်)သည် မဖြစ်မနေဖော်ပြရန်မလိုအပ်ဘဲ ဖော်ပြလိုပါက ဖော်ပြနိုင်သည့်အညွှန်းအမှတ်အသားဖြစ်ပါကြောင်း ဟောပြောခြင်းများနှင့် မြေပြင်ကွင်းဆင်းဆောင်ရွက်ခြင်းများအပြင် Talk Show များဆောင်ရွက်ရခြင်းမှာ Online မှတစ်ဆင့် စားသုံးသူပြည်သူများ၊ ထုတ်လုပ်သည့်လုပ်ငန်းရှင်များ၊ ကုန်မျိုးစုံရောင်းချသည့်အရောင်းဆိုင်ပိုင်ရှင်များ ပိုမိုသိရှိနားလည်စေရန်ရည်ရွယ်၍ အသိပညာပေးဆောင်ရွက်ရခြင်းဖြစ်ပါကြောင်း ဆွေးနွေးပြောကြားခဲ့ပါသည်။

DOCA(မကွေး)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ခရိုင်ဦးစီးမှူး ဒေါ်စုစုထွန်းနှင့် အဖွဲ့သည် (၂၁-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် မင်းဘူးမြို့ပေါ်ရှိ အသေးစား၊ အငယ်စားနှင့် အလတ်စား စီးပွားရေးလုပ်ငန်း (MSMEs) ဖြစ်သော  “အောင်မြင်သူ” အမှတ်တံဆိပ်  မုန့်လုပ်ငန်းရှင် ဒေါ်အေးအေးဝင်းနှင့်တွေ့ဆုံ၍ ကုန်အညွှန်းအမှတ်အသားဖော်ပြမှုနှင့်စပ်လျဉ်း၍ လိုအပ်သည့်ပံ့ပိုးကူညီမှုများဆောင်ရွက်ပေးနိုင်ရန် ဆွေးနွေးခဲ့ပါသည်။

 ထိုသို့လုပ်ငန်းရှင်နှင့်တွေ့ဆုံဆွေးနွေးရာတွင် ခရိုင်ဦးစီးမှူးက လုပ်ငန်းရှင်များအနေဖြင့် စားသုံးသူကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်၏တာဝန်များ၊ ကုန်စည်များနှင့်စပ်လျဉ်း၍ အာမခံချက်ပေးခြင်း၊ ကုန်စည် (သို့မဟုတ်) ဝန်ဆောင်မှုအပေါ် တာဝန်ရှိမှုများ ကုန်အညွှန်းအမှတ်အသားဖော်ပြခြင်းနှင့်ပတ်သက်သည့် ဥပဒေပြဋ္ဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုပြစ်ဒဏ်များအကြောင်း သိရှိစေရန်ဆွေးနွေးခဲ့ပြီး လုပ်ငန်းရှင်ကလည်း မိမိတို့ထုတ်လုပ်သော ကုန်စည်အမျိုးအစားအလိုက် စားသုံးသူကာကွယ်ရေးဥပဒေ (၂၀၁၉၊) အခန်း (၁၈)ပါ ကုန်းအညွှန်အမှတ်အသားဖော်ပြချက်များနှင့်ကိုက်ညီမှုရှိ/မရှိကိုစိစစ်ပေးနိုင်ရန် နမူနာပုံစံများနှင့်တကွ တင်ပြလျှောက်ထားနိုင်ပြီး စားသုံးသူရေးရာဦးစီးဌာနက စိစစ်ပြန်ကြားပေးလျက်ရှိကြောင်း အကျယ်တဝင့်ဆွေးနွေးခဲ့ပါသည်။

    လုပ်ငန်းရှင်က မုန့်ထုတ်လုပ်ဖြန့်ဖြူးရောင်းချသည့် လုပ်ငန်းလုပ်ကိုင်ခဲ့ရာတွင် (၁၅)နှစ်ခန့်ရှိပြီဖြစ်ပါကြောင်း၊ ပဲကိတ်တွင် ကုလားပဲ၊ ဂျုံ၊ စားအုန်းဆီ၊ သကြားတို့ပါဝင်ပြီး ပဲကိတ်တစ်ခုလျှင် (၂၅၀)ကျပ်ဈေးနှုန်းဖြင့်ရောင်းချ၍ မလိုင်(၅)လုံးပါတစ်ထုပ်လျှင် ကျပ်(၄၀၀)နှုန်းဖြင့်ရောင်းချရပါကြောင်း အလုပ်သမားဦးရေ(၁၀)ဦးခန့်ရှိ၍ လုပ်အားခမှာ တစ်ဦးလျှင် (၆၀၀၀)ကျပ်ပေးပါကြောင်း၊ လိုအပ်သောပစ္စည်းများဖြစ်သည့် ဂျုံ၊ သကြားအိတ်တို့အား မုံရွာမှ မှာယူရ၍ တစ်ခါဝယ်ယူလျှင် အိတ်(၃၀)ခန့်ဝယ်ယူထားရကြောင်း၊ ဂျုံတစ်အိတ်လျှင် (၇၆၀၀၀)ကျပ်နှင့် သကြားတစ်အိတ်လျှင် (၁၀၀၀၀၀)ကျပ်ခန့်ရှိကြောင်း၊ ကုလားပဲအိတ်အား မင်းဘူးမြို့ရှိ ပွဲရုံများမှ ဝယ်ယူပြီး တစ်နေ့လျှင် ကုလားပဲ (၂)အိတ်ခန့်အသုံးပြုရကြောင်း၊ ကုလားပဲ(၁)တင်းခွဲတစ်အိတ်လျှင် (၁၀၈၀၀၀)ကျပ်ခန့်ပေးရကြောင်း၊ စားအုန်းဆီမှာ တစ်နေ့လျှင် (၁၀)ပိဿာဝင်(၅)ပုံး၊ ပိဿာအားဖြင့် (၅၀)ပိဿာကုန်ကျကြောင်း၊ မီးစက်နှိုးကာ ဆောင်ရွက်ရပါက ဆီဖိုး(၃၀၀၀၀)ခန့်ကုန်ကျ၍ အရင်းအနှီးအားဖြင့် တစ်နေ့လျှင် (၁၀)သိန်းခန့်ရှိပြီး အကျိုးအမြတ်အားဖြင့် (၁)သိန်းခန့်သာရှိကြောင်း၊ ဈေးကွက်အနေဖြင့် မင်းဘူးမြို့ပေါ်နှင့် ရပ်ကွက်ကျေးရွာများတွင် ဖြန့်ချိရောင်းချလျက်ရှိကြောင်း လုပ်ငန်းရှင်ထံမှသိရှိရပါသည်။

DOCA(မကွေး)

      နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ ဖြူးမြို့ရှိ  အမျိုးသမီး အိမ်တွင်းမှုသက်မွေးပညာသင်တန်းကျောင်းတွင် ဖွင့်လှစ်လျက်ရှိသည့် သင်တန်းများသို့ တက် ရောက်သည့် ဒေသခံအမျိုးသမီးငယ်များအတွက် သိသင့်သိထိုက်သည့် အသိပညာဗဟုသုတများ ရရှိစေရန် ရည်ရွယ်၍ ဌာနဆိုင်ရာများက မိမိတို့ဌာနဆိုင်ရာအလိုက် သိသင့်သိထိုက်သည်များကို ဟောပြောကြပါသည်။

   ၂၀၂၃ခုနှစ်၊ဇွန်လ ၁၉ ရက်နေ့ နံနက်ပိုင်းတွင် ဖြူးမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီး ဌာန၊ တိုင်းရင်းဆေးပညာဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း၍ အဆင့်မြင့်အိမ်တွင်း မှု စက်ချုပ်သင်တန်းအမှတ်စဉ်(၆)သို့ တက်ရောက်သည့် သင်တန်းသူများအား ဌာနဆိုင်ရာများ အလိုက် အသိပညာပေးဟောပြောခဲ့ပါသည်။

 စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံရုံးမှ ဌာနခွဲစာရေး ဒေါ်ပပလင်းက စားသုံးသူ၏အခွင့်အရေးနှင့်တာဝန်များ၊ ကုန်စည်များတွင် ကုန်အညွှန်းအမှတ် အသားများဖော်ပြရန် စားသုံးသူကာကွယ်ရေးဥပဒေတွင် ပြဌာန်းထားပြီးဖြစ်ရာ ကုန်စည်များဝယ်ယူ ရာတွင် ကုန်အညွှန်းအမှတ်အသားများ ဦးစားပေးဖတ်ရှုသင့်ပုံများနှင့် စားသုံးသူနစ်နာဆုံးရှုံးမှုများ ဖြစ်ပေါ်ပါက စားသုံးသူရေးရာဦးစီးဌာနက ဖွင့်လှစ်သည့် စားသုံးသူသတင်းပြန်ကြားရေးနှင့် တိုင် ကြားမှုလက်ခံဆောင်ရွက်ရေးစင်တာ (CICC) များတွင် တိုင်ကြားနိုင်ခြင်းများကို ဟောပြောခဲ့ပါ သည်။

  ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အိမာဟိန်းက ရှောင်လေဝေးဝေးမူးယစ်ဆေး ခေါင်းစဉ်ဖြင့်လည်းကောင်း၊ တိုင်းရင်းဆေးပညာဦးစီးဌာန၊ မြို့နယ် တိုင်းရင်းဆေးခန်းမှူး ဒေါ်ဝင်းဝင်းအေးက တိုင်းရင်းဆေးဆိုင်ရာအကြောင်းနှင့် အမျိုးသမီးများ ကျန်းမာရေးအကြောင်းကိုလည်းကောင်း ဟောပြောခဲ့ကြောင်းနှင့် ဟောပြောပွဲသို့ ကျောင်းအုပ်ကြီး နှင့်နည်းပြဆရာမ ၁၃ ဦး၊ သင်တန်းသူ ၃၅ ဦး စုစုပေါင်း ၄၈ ဦးတက်ရောက်ခဲ့ကြောင်း သိရပါသည်။

DOCA(ပဲခူး)

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ စားသုံးသူများလုံခြုံစိတ်ချရမှုရှိစေရေးအတွက် မျှော်မှန်းချက်နှင့်အညီ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏ လမ်းညွှန်မှုဖြင့် ဒု-ခရိုင်ဦးစီးမှူးနှင့် ဝန်ထမ်းများသည် စားသုံးသူကာကွယ်ရေးဆိုင်ရာအသိပညာပေးလုပ်ငန်းများ၊ စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေးအသိပညာပေးခြင်း၊ ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူတောင်သူများ၊ စီးပွားရေးလုပ်ငန်းရှင်များနှင့်တွေ့ဆုံဆွေးနွေးခြင်း၊ သတင်းဖြန့်ဝေပေးခြင်းလုပ်ငန်းများဆောင်ရွက်လျက်ရှိပါသည်။

   စားသုံးသူရေးရာဦးစီးဌာန၊ မင်းဘူးခရိုင်ဦးစီးမှူးရုံးမှ ခရိုင်ဦးစီးမှူး၊ မင်းဘူးမြို့နယ်တာဝန်ခံနှင့် ဝန်ထမ်းများသည် စားသုံးသူများဘေးအန္တရာယ်ကင်းရှင်းပြီး ထုတ်ကုန်များလုံခြုံစိတ်ချရမှုရှိစေရေးအတွက် (၂၁-၆-၂၀၂၃) ရက်နေ့၊  နံနက် (၁၁:၀၀) နာရီအချိန်တွင် မင်းဘူးမြို့၊ အမှတ်(၄)ရပ်ကွက်ရှိ “ဟင်္သာ” ကိတ်လုံး၊ ပဲကိတ်ထုတ်လုပ်သည့်လုပ်ငန်းရှင် ဦးသန်းဇော်နှင့်တွေ့ဆုံဆွေးနွေးခဲ့ပါသည်။

    လုပ်ငန်းရှင်က ကိတ်လုံး (small cake)၊ ပဲကိတ်များကို ကြက်ဥ၊ ဂျုံ၊ သကြား၊ စားအုန်းဆီ၊ ကုလားပဲတို့ဖြင့်ပြုလုပ်ပြီး ပဲကိတ်(၁)ခုလျှင် ကျပ်(၂၅၀)ဈေးနှုန်းဖြင့်ရောင်းချပြီး တစ်နေ့လျှင် အနည်းဆုံး အထုပ်(၅၀၀)မှ အများဆုံး အထုပ်(၁၅၀၀)ခန့်ရောင်းချရပါကြောင်း၊ စားအုန်းဆီမှာ နည်းလျှင် (၅)ပိဿာမှ များလျှင် (၂၀)ပိဿာခန့်သုံးရပါကြောင်း၊ ပါဝင်ပစ္စည်းများဖြစ်သည့် ဂျုံ၊ သကြား၊ ကြက်ဥတို့အား မင်းဘူးမြို့မှဝယ်ယူပြီး သကြားတစ်အိတ်လျှင် ကျပ်(၁၀၅၀၀၀)၊ ကြက်ဥအလုံး(၃၀၀)ပါ တစ်ဆွဲလျှင် ကျပ်(၇၈၅၀၀)၊ စားအုန်းဆီတစ်ပိဿာလျှင် ကျပ်(၆၇၀၀) တို့ဖြင့်ဝယ်ယူရကြောင်း၊ အလုပ်သမား(၂)ဦးသာရှိပြီး တစ်ရက်လျှင် လုပ်အားခစရိတ်ငြိမ်း ကျပ် (၄၅၀၀)ပေးရကြောင်း အရင်းအနှီးမှာ တစ်ရက်လျှင် အထုပ်ရေနည်းပါက ကျပ်(၂)သိန်းရှိပြီး အထုပ်ရေများပါက ကျပ်(၈)သိန်းခန့်ကုန်ကျကြောင်း အကျိုးအမြတ်မှ လုပ်အားခနုတ်ပြီး ကျပ် (၃၀၀၀၀)ခန့်သာရရှိကြောင်း၊ တစ်ပတ်လျှင် (၅)ရက်သာလုပ်ရ၍ တစ်နေ့တာ ကုန်မည့်ပမာဏသာ ထုတ်လုပ်ကြောင်း “ဟင်္သာ” ပဲကိတ်ထုတ်လုပ်သော လုပ်ငန်းရှင်ထံမှသိရှိရပါသည်။ လုပ်ငန်းရှင်အနေဖြင့် မိမိတို့ထုတ်လုပ်သောကုန်စည်များတွင် ကုန်အမှတ်တံဆိပ်စိစစ်ခွင့်ပြုချက်ရရှိရေးအတွက် ခရိုင်ဦစီးမှူးရုံး/တိုင်းဒေသကြီးဦးစီးမှူးရုံးသို့ ဆက်လက်တင်ပြပေးသွားမည်ဖြစ်ကြောင်း၊ အကယ်၍ ဈေးကွက်အတွင်းရောင်းချရာတွင် ကုန်အညွှန်းအမှတ်အသားများမပါရှိပါက စားသုံးသူကာကွယ်ရေးဥပဒေ ၂၀၁၉အရ အရေးယူသွားမည်ဖြစ်ကြောင်းသိရှိစေရေး ဆွေးနွေးခဲ့ပါသည်။

DOCA(မကွေး)

   စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်မှ ဒု-ခရိုင်ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၂၀-၆-၂၀၂၃) ရက်နေ့၊ နံနက် (၁၁း၀၀) နာရီအချိန်တွင် မိတ်ဖက်ဌာနများနှင့်အတူပူးပေါင်းကာ  မအူပင်မြို့ပေါ်ရှိ အလှကုန်အရောင်းဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခြင်းပြုလုပ်ခဲ့ကြပါသည်။

  အဆိုပါကွင်းဆင်းစစ်ဆေးမှုတွင် စစ်ဆေးရေးမှူးနှင့် တာဝန်ရှိသူများသည် အလှကုန်ရောင်းချသူများအား သက်ဆိုင်ရာဌာနများ၏ ထောက်ခံချက်နှင့် မြန်မာဘာသာကုန်အညွှန်အမှတ်အသားဖော်ပြပါရှိပြီး တရားဝင်တင်သွင်းထားသည့် အလှကုန်ပစ္စည်းများကိုသာ ရောင်းချကြရန်နှင့် တရားဝင်တင်သွင်းထားခြင်းမရှိသော မြန်မာဘာသာဖြင့် ဖော်ပြထားခြင်းမရှိသည့် ကုန်ပစ္စည်းများကို ရောင်းချခြင်းမပြုရန်နှင့် စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များသိရှိနိုင်ရန်အချက်များကို ရှင်းလင်းဆွေးနွေးခဲ့ပြီးနောက် လုပ်ငန်းရှင်တို့လိုက်နာရမည့် တာဝန်များကိုပါ အလေးပေးလိုက်နာဆောင်ရွက်ရန် ပညာပေးဆွေးနွေးခဲ့ကာ ဈေးကွက်အတွင်း အလှကုန်များအား စစ်ဆေးခဲ့ကြောင်းသိရှိရပါသည်။

DOCA(ဧရာဝတီ)