သတင်းနှင့် လှုပ်ရှားမှုများ

   ဧရာဝတီတိုင်းဒေသကြီး စားသုံးသူရေးရာဦးစီးဌာန တိုင်းဦးစီးမှူးရုံးတွင် ဒေသတွင်းရှိ ကုန်ထုတ်လုပ်ငန်းများ တိုးမြှင့်ထုတ်လုပ်ပြီးအခြေခံစားသောက်ကုန်များ ဖူလုံစေရန်ရည်ရွယ်၍ ကပ်စေးနှဲဘေးထွက်ပစ္စည်း ကြိတ်ဖတ်မှ ဘဲစာထုတ်လုပ်ရန်နှင့် ပီလောပီနံဘေးထွက်ပစ္စည်းမှ တိရိစ္ဆာန်အစာများထုတ်လုပ်ရန် စီမံချက်ရေးဆွဲခြင်းကို (၃.၇.၂၀၂၃) ရက်နေ့၊ မွန်းလွဲပိုင်းတွင် ပြုလုပ်ခဲ့ပါသည်၊၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးစိုးအောင်မှ ဦးဆောင်၍ သက်ဆိုင်ရာတိုင်းစက်မှုကြီးကြပ်ရေးနှင့်စစ်ဆေးရေးဦးစီးဌာန၊ တိုင်းစီမံကိန်းရေးဆွဲရေးဦးစီးဌာန၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာန ၊ ဗဟိုစာရင်းအင်းဦးစီးဌာနမှ တိုင်းဦးစီးများတက်ရောက်၍ တိရိစ္ဆာန်အစာများ တိုးမြှင့်ထုတ်လုပ်နိင်ရန်အတွက် ထုတ်လုပ်မှု သုတေသနပြုလုပ်ရန်၊ ဈေးကွက်သုတေသနပြုလုပ်ရန်၊ ထုတ်လုပ်မှုတိုးတက်ရန်၊ သုံးသပ်တင်ပြ ရန်နှင့် လိုအပ်သောထောက်ပံ့မှုများ ဝိုင်းဝန်းဆောင်ရွက်ရန် ဆွေးနွေးခဲ့ကြောင်း သိရသည်၊၊

DOCA(ဧရာဝတီ)

   မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းအဝေးကို ၂၀၂၃ခုနှစ်၊ ဇွန်လ၂၈ရက်နေ့၊ နေ့လယ် (၁၅:၀၀) နာရီအချိန်တွင် မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၏ အစည်းအဝေးခန်းမ၌ ကျင်းပကြောင်းသိရသည်။

 မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းသို့  မွန်ပြည်နယ်စားသုံးသူရေးရာကော်မတီဥက္ကဋ္ဌနှင့် အဖွဲ့ဝင်များ စုံညီစွာတက်ရောက်ကြပြီး မွန်ပြည်နယ်စားသုံးသူရေးရာကော်မတီဥက္ကဋ္ဌ၊ စီးပွားရေးရာဝန်ကြီး၊ နိုင်လယိတမက အဖွင့်အမှာစကားပြောကြားခဲ့ ကြောင်း၊ ထို့နောက် မွန်ပြည်နယ်စားသုံးသူရေးရာကော်မတီအတွင်းရေးမှူး၊ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးဝင်းထွန်းက ယခင် မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းအဝေး၏ ဆုံးဖြတ်ချက်များအပေါ် ဆောင်ရွက်ပြီးစီးမှုများကို ရှင်းလင်းပြောကြားခဲ့ကြောင်း၊ (၂၀၂၃-၂၀၂၄) ဘဏ္ဍာနှစ်၏ ပထမ(၃)လပတ်အတွင်း စားသုံးသူကာကွယ်ရေးနှင့် ထုတ်ကုန်လုံစိတ်ချရမှုဆိုင်ရာလုပ်ငန်းဆောင်ရွက်ချက်များကိုတင်ပြခဲ့ကြောင်း၊ စားသုံးသူများဘေးအန္တရာယ်ကင်းရှင်းစေရေး  ဈေးကွက်အတွင်း စစ်ဆေးဆောင်ရွက်မည့် ကုန်စည်အုပ်စုများရွေးချယ်သတ်မှတ်မည့်အစီအမံနှင့် ဆောင်ရွက်ထားရှိမှုတို့ကို   တင်ပြ‌ခဲ့ကြောင်း ယခုအစည်းအဝေး၌  အတည်ပြုချက်ပေးခြင်းဆုံးဖြတ်ချက်တို့ကို အသေးစိတ် Power Point  ဖြင့် ကော်မတီအဖွဲ့ဝင်များသို့ တင်ပြခဲ့ကြောင်းသိရှိရပါသည်။

 အဆိုပါတင်ပြချက်များအား မွန်ပြည်နယ်စားသုံးသူရေးရာကော်မတီအဖွဲ့ဝင်များက အတည်ပြုရန်အချက်များ၊ အကြံပြုချက်များ၊ ဆုံးဖြတ်ရန်အချက်အလက်တို့ကို ကော်မတီအဖွဲ့ဝင်အသီးသီးတို့ဖြင့် ပြန်လည်ဆွေးနွေး၍ အတည်ပြုခြင်း၊ အကြံပြုခြင်းနှင့်ဆုံးဖြတ်ရန်အချက်တို့အား ဆုံးဖြတ်ခဲ့ကြောင်း၊ ရှေ့ဆက်လက်ဆောင်ရွက်မည့် စားသုံးသူကာကွယ်ရေးလုပ်ငန်းများတွင် ကော်မတီအဖွဲ့ဝင်အားလုံး ပူးပေါင်းပါဝင်ဆောင်ရွက်မည်ဖြစ်ကြောင်းနှင့် အစည်းအဝေးကို ညနေ (၁၆:၃၀) နာရီအချိန်တွင်ရုပ်သိမ်းခဲ့ကြောင်း သတင်းရရှိပါသည်။

DOCA(မွန်)

    မွန်ပြည်နယ်၌ ၁၉နှစ်အောက် အမျိုးသမီးဘောလုံးပြိုင်ပွဲ “ဗိုလ်လုပွဲနှင့် ဆုပေးပွဲ” အခမ်းအနားကို ၂၀၂၃ခုနှစ်၊ ဇူလိုင်လ ၁ရက်နေ့၊ ညနေပိုင်းတွင် မော်လမြိုင်မြို့၊ ရာမညအားကစားကွင်း၌ ကျင်းပပြုလုပ်ခဲ့ရာ မွန်ပြည်နယ်အစိုးရအဖွဲ့လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်စွာမြင့်၊ ပြည်နယ်အစိုးရအဖွဲ့ဝင်ဝန်ကြီးများ၊ စားသုံးသူရေးရာဦးစီးဌာန၊ ပြည်နယ်ဦးစီးမှူးအပါအဝင် ပြည်နယ်ဌာနဆိုင်ရာများ၊ တာဝန်ရှိသူများနှင့် အားကစားဝါသနာရှင်များတက်ရောက်ခဲ့ကြသည်။

    ရှေးဦးစွာ ဗိုလ်လုပွဲ ပွဲစဉ်အဖြစ် ဘီးလင်းမြို့နယ်၊ ဘောလုံးအသင်းနှင့် ကျိုက်မရောမြို့နယ်၊ ဘောလုံးအသင်းတို့ယှဉ်ပြိုင်ကစားနေမှုကို မွန်ပြည်နယ်အစိုးရအဖွဲ့လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်စွာမြင့်၊ ပြည်နယ်အစိုးရအဖွဲ့ဝင်၊ ပြည်နယ်ဌာနဆိုင်ရာများအားကြည့်ရှုခဲ့ပြီး ဆုပေးပွဲအခမ်းအနားကို ပထမ၊ ဒုတိယ၊ တတိယနှင့် ပွဲစဉ်တစ်လျှောက် အကောင်းဆုံးဆုရရှိသူများကို ဆုတံဆိပ်နှင့် ငွေသားဆုများပေးအပ်ချီးမြှင့်ခဲ့ကြသည်။ ထို့နောက် ပြည်နယ်တရားလွှတ်တော်တရားသူကြီးချုပ်က တံခွန်စိုက်ဒိုင်းဆုရရှိသည့် ဘီးလင်းမြို့နယ်၊ ဘောလုံးအသင်းကို ဆုတံဆိပ်၊ တံခွန်စိုက်ဒိုင်းဆုနှင့် ငွေသားဆုများချီးမြှင့်ခဲ့သည်။

  မွန်ပြည်နယ်အနေဖြင့် မျိုးဆက်သစ်အားကစားသမားကောင်းများပေါ်ထွန်းလာစေရေးနှင့် အားကစားကဏ္ဍဖွံ့ဖြိုးတိုးတက်စေရေးတို့အတွက် ပြိုင်ပွဲများကျင်းပပြုလုပ်ပေးခြင်းဖြစ်ကြောင်း သိရပါသည်။

DOCA(မွန်)

    ဧရာဝတီတိုင်းဒေသကြီး၊ ဒေးဒရဲမြို့နယ်၊ စားသုံးသူရေးရာဦးစီးဌာနမှ  မြို့နယ်တာဝန်ခံ     ဦးသိန်းမောင်သည် ၂၀၂၃ခုနစ်၊ ဇွန်လ (၂၁) ရက်၊ ညနေ (၁၆:၀၀) နာရီအချိန်တွင်  အောင်မင်္ဂလာကွက်သစ်၊  ရာအိမ်မှူး ဦး‌ကျော်ငြိမ်း၏နေအိမ်၌ လုပ်သားပြည်သူ (၁၀) ဦးတို့အား စားသုံးသူကာကွယ်ရေးအသိပညာပေးဟောပြောခြင်းဆောင်ရွက်ခဲ့ပါသည်။

  အဆိုပါဟောပြောပွဲတွင် မြို့နယ်တာဝန်ခံ ဦးသိန်းမောင်က စားသုံးသူကာကွယ်ရေးဥပဒေနှင့်ပတ်သက်၍ စားသုံးသူများလုံခြုံစိတ်ချမှုရှိစေရေးအတွက် စားသုံးသူအခွင့်အရေးနှင့်တာဝန်များ၊ ကုန်စည်နှင့်ဝန်ဆောင်မှုများကိုဝယ်ယူခြင်းမပြုမီ သတိပြုဆောင်ရွက်ရမည့်အချက်များ၊ မည်သည့်စီးပွားရေးလုပ်ငန်းရှင်မဆို ကုန်ညွှန်းအမှတ်အသားဖော်ပြခြင်းနှင့်စပ်လျဉ်း၍ တာဝန်ယူမှု၊ တာဝန်ခံမှုအကြောင်းအရာများ၊ စားသုံးသူများဘေးအန္တရာယ်ကင်းရှင်းပြီး လုံခြုံစိတ်ချမှုရှိသည့် အရည်အသွေးမီကုန်စည်များကိုသာသုံးစွဲနိုင်ရေးအတွက် အခန်း (၁၈) ပါ ကုန်အညွှန်းအမှတ်အသားဖော်ပြရန် သတ်မှတ်ချက်များပါရှိသော    ကုန်စည်နှင့်အစားအသောက်များနှင့်  တားမြစ်ကုန်စည်များအကြောင်း၊    မိမိတို့ဌာနအနေဖြင့် စားသုံးသူများအသုံးပြုသည့် ကုန်စည်နှင့်ဝန်ဆောင်မှုများကို အန္တရာယ်ကင်းရှင်းစေရေးအတွက် ဈေးကွက်စောင့်ကြည့်စစ်ဆေးမှုများပြုလုပ်လျက်ရှိကြောင်း အသိပညာပေးပြောကြားခဲ့မှုကို သိရှိရပါသည်။

DOCA(ဧရာဝတီ)

   ပန်းတနော်မြို့နယ်တွင် မြို့ပေါ်ရပ်ကွက်(၄)ခုရှိပြီး ကျေးရွာအုပ်စုပေါင်း (၅၂)အုပ်စုရှိသည့်အပြင် စိုက်ပျိုးရေးလုပ်ငန်းများဖြစ်သော စပါး၊ ပဲ၊ ပြောင်းကို အဓိကထားစိုက်ပျိုးပြီး ဟင်းသီးဟင်းရွက်နှင့် အခြားသောစိုက်ပျိုးရေးထုတ်ကုန်များ၊ အစားအသောက်ထုတ်ကုန်များနှင့် လူသုံးကုန်ပစ္စည်းများထုတ်လုပ်လျက်ရှိသောမြို့ဖြစ်ပါသည်။

  ပန်းတနော်မြို့နယ်ရှိ  မြစ်ငါးတန်မွေးမြူရေးလုပ်ငန်းသည် ရန်ကုန်ဈေးကွက်အပြင် နိုင်ငံခြားဈေးကွက်သို့ပါတင်ပို့ရောင်းချလျက်ရှိပြီး နိုင်ငံခြားဈေးကွက်ရရှိရေးအတွက် အလားအလာကောင်းများကိုရရှိပြီးဖြစ်ပါသည်။ စပါး၊ ဆန်နှင့် မွေးမြူရေးထုတ်ကုန်များရှိရုံသာမက သင်ဖြူးဖျာ လုပ်ငန်းကို တန်ဖိုးမြင့်ထုတ်ကုန်တစ်ခုအနေဖြင့် ထုတ်လုပ်ရောင်းချနေသော ပန်းတနော်မြို့နယ်၊ ဦးကြည်လွင်၏ သင်ဖြူးဖျာလုပ်ငန်းဆောင်ရွက်မှုအခြေအနေကောင်းများအား စားသုံးသူရေးရာဦးစီးဌာန၊ ပန်းတနော်မြို့နယ်တာဝန်ခံ ဦးပိုးဖြူပိုင်မင်းက ၂၀၂၃ခုနှစ်၊ ဇွန်လ၊ ဒုတိယအပတ်တွင် ကွင်းဆင်းလေ့လာဆောင်ရွက်ခဲ့ပါသည်။

  သင်ဖြူးဖျာလုပ်ငန်းပိုင်ရှင် ဦးကြည်လွင်က မိမိအနေဖြင့် ပန်းတနော်မြို့နယ်၊ ယွန်ကျောင်းလမ်း၊ အနောက်ပိုင်းရပ်ကွက်တွင်နေထိုင်ပြီး ပန်းတနော်မြို့နယ်အတွင်းရှိ သင်ခြံစိုက်တောင်သူများ၏သင်ခြံမှ သင်ပင်များကိုဝယ်ယူအသုံးပြုခဲ့ပါသည်။ သင်ဖျာရက်လုပ်သူများသည် ကုန်ကြမ်း အဖြစ်အသုံးပြုနိုင်ရန်အတွက် သင်ခြံခုတ်၍ထွက်ရှိသောသင်ကိုထက်ခြမ်းခွဲ၍ နေလှမ်းထားသည့်သင်ခွဲခြမ်း (၅၀၀) ပါ တစ်စီးလျှင် သင်မတစ်မသတ်မှတ်ထားရှိပြီး သင်မများကိုရေစိမ်၍ သင်ငင်ပြီး ထွက်ရှိလာသည့်သင်လွှာများကို အချောတစ်ခြမ်း၊ အကြမ်းတစ်ခြမ်းရက်လုပ်၍ အကြမ်းတစ်ခြမ်းကို အောက်လွှာ၊ အချောတစ်ခြမ်းကို အပေါ်လွှာထပ်၍ ချည်ကြိုးဖြင့်ချုပ်ပြီး အနားကွပ်ခြင်းဆောင်ရွက်ပြီးပါက ဖျာခင်း၍အသုံးပြုရန် ရောင်းတန်းဝင်သင်ဖျာတစ်ချပ်ရရှိကြောင်း ပဏာမရှင်းပြခဲ့ပါသည်။

     သင်ဖျာဈေးများမှာ ဘုရားရှိခိုးဖျာတစ်ချပ်လျှင် (၅၀၀၀) ကျပ်မှ (၇၀၀၀) ကျပ်၊ တစ်ယောက်အိပ်သုံးထောင့်ထွာတစ်ချပ်လျှင် (၇၅၀၀) ကျပ်မှ (၈၀၀၀) ကျပ်၊ နှစ်ယောက်အိပ် နှစ်ဖက်ချောအနားကွပ်တစ်ချပ်လျှင် (၅၀၀၀၀) ကျပ်တို့ဖြင့် ဈေးကွက်ရရှိကာ အရောင်းအဝယ်ဖြစ်နေကြောင်းနှင့် သင်ဖျာလုပ်ငန်းကိုပိုမိုတိုးတက်အောင်ဆောင်ရွက်ရန် နည်းပညာလိုအပ်မှု၊ မတည်ရင်းနှီးငွေလိုအပ်မှုနှင့် လုပ်သားနည်းပါးမှုတို့၏အခက်အခဲများကို ဆွေးနွေးတင်ပြခဲ့ပါသည်။

    ရန်ကုန်၊ ပုသိမ်ကားလမ်းဘေးရှိ အမှတ်တရသင်ဖြူးဖျာဆိုင်ပေါင်း(၁၀)ဆိုင်ရှိသည့်အနက် အရောင်းဆိုင်များတွင် သင်ဖြူးဖျာများကိုဝယ်ယူကာ မိမိတို့စိတ်တိုင်းကျ ဇိမ်ခံအသုံးပြုနိုင်ပြီး မွေ့ရာများထက်တွင် အိပ်စက်အနားယူခြင်းထက် ကျန်းမာရေးနှင့်ညီညွတ်သောသင်ဖြူးဖျာလေးပေါ်တွင် အိပ်စက်အနားယူခြင်းမှာ စိတ်ချမ်းမြေ့မှုများကိုပေးစွမ်းနိုင်သည့် ကောင်းကျိုးများကိုတွေ့ရှိရသဖြင့် ယခုအခါ များစွာအသုံးပြုလာကြောင်း အရောင်းအဝယ်တွင်ကျယ်မှုမှတစ်ဆင့်တွေ့ရှိရကြောင်း ဦးကြည်လွင်က ထပ်မံတင်ပြခဲ့ပါသည်။

 စားသုံးသူရေးရာဦးစီးဌာနမှ မြို့နယ်တာဝန်ခံ ဦးပိုးဖြူပိုင်မင်းက သင်ဖြူးဖျာထုတ်လုပ်သော လုပ်ငန်းရှင်အသင်းအဖွဲ့များမှတစ်ဆင့် သင်ဖြူးဖျာလုပ်ငန်းများဖွံ့ဖြိုးတိုးတက်ရေးအတွက် နည်းပညာအကူအညီများရရှိနိုင်သည့်နည်းလမ်းများနှင့် မတည်ရင်းနှီးငွေအတွက် သက်ဆိုင်ရာဘဏ်များနှင့် ချိတ်ဆက်ဆောင်ရွက်နိုင်ရေးတို့ကို အပြန်အလှန်ဆွေးနွေးခဲ့ပြီး များမကြာမီကာလအတွင်း ကျန်းမာရေးနှင့်ညီညွတ်သောသင်ဖြူးဖျာများကို ထုတ်လုပ်မှုအဆင့်အတန်းမီသော ဈေးကွက်ရတန်ဖိုးမြင့်ထုတ်ကုန်တစ်ခုအနေဖြင့် တွေ့မြင်ရဖွယ်ရှိကြောင်း ရေးသားတင်ပြလိုက်ရပါသည်။

DOCA(ဧရာဝတီ)