သတင်းနှင့် လှုပ်ရှားမှုများ

   ရခိုင်ပြည်နယ်၊ စားသုံးသူရေးရာဦးစီးဌာန၊ ကျောက်ဖြူခရိုင်ဦးစီးမှူး ဦးအေးကျော် (လ/ထညွှန်ကြားရေးမှူး) နှင့် ဝန်ထမ်းများသည် (၂၆-၆-၂၀၂၃) ရက်နေ့၊ နေ့လယ် (၂:၃၀) နာရီအချိန်တွင် ကျောက်ဖြူမြို့၊ ငလပွေ့ရပ်ကွက်၊  အခြေခံပညာအလယ်တန်းကျောင်း၌ ကျောင်းသား/သူများကို စားသုံးသူကာကွယ်ရေးနှင့် အစားအသောက်များဘေးအန္တရာယ်ကင်းရှင်းရေးတို့နှင့်ပတ်သက်၍ အသိပညာပေးဟောပြောပွဲပြုလုပ်ခဲ့ပါသည်။

   အဆိုပါအသိပညာပေးဟောပြောပွဲတွင်  ဦးစွာပထမ ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာန၊ ခရိုင်ဦးစီးမှူး ဦးအေးကျော်က စားသုံးသူရေးရာဦးစီးဌာန၏ မျှော်မှန်းချက် (Vision)၊ စားသုံးသူများလုံခြုံစိတ်ချရမှုရှိစေရန်၊   ရည်မှန်းချက် (Mission) (၄) ရပ်ကို ချပြဆွေးနွေးခြင်း၊ ရည်မှန်းချက်ပါ (၁) စားသုံးသူအခွင့်အရေးနှင့် အကျိုးစီးပွားကာကွယ်ရေးဆောင်ရွက်ရန်ဖြစ်သည့် စားသုံးသူကာကွယ်ရေးဥပဒေ (၂၀၁၉)၊ အခန်း (၉) ပါ စားသုံးသူ၏အခွင့်အရေး (၈) ချက်နှင့် တာဝန် (၄) ချက်တို့ကို ဥပမာပေး၍ ချပြဆွေးနွေးခြင်း၊ (၂) ထုတ်ကုန်များလုံခြုံစိတ်ချရမှုရှိစေရေး ဆောင်ရွက်ထားရှိသည့် စားသုံးသူကာကွယ်ရေးဥပဒေအကြောင်း၊ အခန်း(၁၈)၊ ပုဒ်မ(၄၁၊ ၄၂၊ ၄၃) ပြဋ္ဌာန်းချက်ပါ အချက်များကို ဥပမာပေး၍ ချပြဆွေးနွေးခြင်း၊ (၃) ကုန်စည်နှင့် ဝန်ဆောင်မှုများ၏ အရည်အသွေးစီမံခန့်ခွဲမှုနှင့် သုတေသနဖွံ့ဖြိုးမှုလုပ်ငန်းများဆောင်ရွက်ရန်နှင့် (၄) ပြည်တွင်းကုန်သွယ်မှုဖွံ့ဖြိုးမှုနှင့်သုတေသနလုပ်ငန်းများဆောင်ရွက်ရန်ကိစ္စရပ်များကို အကျယ်တဝင့်ချပြဆွေးနွေးခြင်း၊ စားသုံးသူအခွင့်အရေးများအရ စားသုံးသူနစ်နာဆုံးရှုံးမှုနှင့်စပ်လျဉ်း၍ ကိစ္စရပ်များပေါ်ပေါက်ပါက တိုင်ကြားနိုင်သည့်အခွင့်အရေးရှိသည့်အတွက် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) များဖွင့်လှစ်ထားပါကြောင်းနှင့် ကုန်စည် (သို့မဟုတ်) ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့် လိုအပ်သောအချက်အလက်များကို သိရှိလေ့လာနိုင်ခွင့်ရှိစေရေးအတွက် Website ဖြစ်သည့် www. doca. gov. mm နှင့် Doca Myanmar Mobile Application တွင် ဝင်ရောက်လေ့လာနိုင်ရေးနှင့် တိုင်ကြားနိုင်သည့်နည်းလမ်းများကို ချပြဆွေးနွေးဟောပြောခဲ့ပါကြောင်း သတင်းရရှိပါသည်။

DOCA(ရခိုင်)

     စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် (၂၆-၆-၂၀၂၃) ရက်နေ့၊ နံနက် (၁၀:၃၀) နာရီအချိန်တွင် မြို့နယ်ပြည်သူ့ကျန်းမာရေးဦးစီးဌာနမှ တာဝန်ရှိဝန်ထမ်းများနှင့် မင်္ဂလာဈေးအတွင်းရှိ ဈေးတာဝန်ခံများနှင့်အတူ မင်္ဂလာတောင်ညွန့်မြို့နယ်၊ ရွှေပြည့်စုံဈေးနှင့် မင်္ဂလာဈေးအတွင်းရှိ ဆေးဝါးများလက်လီ/လက်ကားရောင်းချနေသော ဆေးဆိုင်များသို့သွားရောက်၍ ဈေးကွက်ကွင်းဆင်းစစ်ဆေးမှုများဆောင်ရွက်ခဲ့ပါသည်။

     လက်လီ/လက်ကားဖြန့်ဖြူးရောင်းချနေသော ဆေးဝါးများအနက် Baby Cough Syrup With Antihistamine၊ Baby Cough Syrup နှင့် Cadramine – V Lotion ဆေးဝါး (၃) မျိုးတို့သည် သက်ဆိုင်ရာဌာနများ၏ ထောက်ခံချက်များရယူထားခြင်းရှိ/မရှိနှင့် တရားမဝင်ဖြန့်ဖြူးရောင်းချနေခြင်းရှိ/မရှိတို့ကိုစစ်ဆေးခဲ့ရာ ဈေးကွက်အတွင်း ရောင်းချခြင်းမရှိကြောင်းသိရှိရပါသည်။

DOCA(ရန်ကုန်)

   ကုန်စည်များပေါ်တွင် ကုန်အညွှန်းအမှတ်အသားများကို စားသုံးသူကာကွယ်ရေးဥပဒေနှင့်အညီ ပြည့်စုံစွာဖော်ပြပါရှိစေရေးရည်ရွယ်၍ ချောက်မြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် (၂၇-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန(Community Center) ခန်းမ၌ ဒေသထွက်ကုန်ပစ္စည်းများ ထုတ်လုပ်ဖြန့်ဖြူးရောင်းချလျက်ရှိသော စီးပွားရေးလုပ်ငန်းရှင် (၂၀) ဦးအား စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များကို အသိပညာပေးရှင်းလင်းဆွေးနွေးခဲ့ပါသည်။

   အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ ချောက်မြို့နယ်တာဝန်ခံဒေါ်မြတ်မြတ်မိုးက  စားသုံးသူကာကွယ်ရေးဥပဒေ၂၀၁၉ပါ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ကုန်စည်နှင့်ဝန်ဆောင်မှုများအပေါ် အာမခံချက်ပေးရမည့်အချက်များ၊ စားသုံးသူကာကွယ်ရေးဥပဒေ ၂၀၁၉၊ အခန်း(၁၈)ပါ ကုန်စည်များပေါ်တွင် ကုန်အညွှန်းအမှတ်အသားများဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြပါရှိစေရေး စသည့်အကြောင်းအရာများကို အကျယ်တဝင့်ရှင်းလင်းဆွေးနွေးပြီးနောက် တက်ရောက်လာသူများက ၎င်းတို့သိရှိလိုသည်များကို ပြန်လည်မေးမြန်းဆွေးနွေးခဲ့ကြကြောင်း၊ စီးပွားရေးလုပ်ငန်းရှင်များအား စားသုံးသူကာကွယ်ရေးဆိုင်ရာအသိပညာပေးလက်ကမ်းစာစောင်များနှင့် ကုန်စည်များပေါ်တွင် ကုန်အညွှန်းအမှတ်အသားများဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များပါဝင်သည့် လက်ကမ်းစာစောင်များဖြန့်ဝေပေးခဲ့ပါကြောင်း သတင်းရရှိပါသည်။

DOCA(မကွေး)

    (၂၆-၆-၂၀၂၃)  ရက်နေ့တွင် MSME လုပ်ငန်းများဖွံ့ဖြိုးတိုးတက်ရေးအတွက် မော်လမြိုင်မြို့ နယ်မှ အအေးခန်းစက်ရုံလုပ်ငန်းရှင်များနှင့်တွေ့ဆုံဆွေးနွေးပွဲကို မွန်ပြည်နယ်အစိုးရအဖွဲ့ရုံး၊ စီးပွားရေးရာဝန်ကြီးရုံးခန်း၌ ကျင်းပပြုလုပ်ခဲ့ရာ အဆိုပါတွေ့ဆုံဆွေးနွေးပွဲသို့ စီးပွားရေးရာဝန်ကြီး နိုင်လယိတမ၊ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးနှင့်ဝန်ထမ်းများ၊ အအေးခန်းလုပ်ငန်းရှင်များအပါအဝင် စုစုပေါင်း (၆) ဦးတက်ရောက်ခဲ့သည်။

    ပထမဦးစွာ စီးပွားရေးရာဝန်ကြီးက မွန်ပြည်နယ်သည် သစ်သီးဝလံများ၊ ရေထွက်ပစ္စည်းများအများအပြားထွက်ရှိသည့် ပြည်နယ်တစ်ခုဖြစ်သည့်အတွက် သစ်သီးဝလံများ၊ ရေထွက်ပစ္စည်းများကို အရည်အသွေးမပျက်သိုလှောင်ထိန်းသိမ်းကာ ဈေးကွက်ထဲသို့ပို့ဆောင်ပါက ဈေးနှုန်းပိုမိုရရှိနိုင်ကြောင်း၊ ယခုကဲ့သို့ အအေးခန်းစက်ရုံများပိုမိုဖွံ့ဖြိုးလာပါက ပြည်နယ်အတွင်းရှိ သစ်သီးလုပ်ငန်းရှင်၊ ငရုတ်၊ ကြက်သွန်လုပ်ငန်းရှင်နှင့် ရေထွက်ပစ္စည်းလုပ်ငန်းရှင်များအတွက် များစွာအထောက်အကူပြုကြောင်း ပြောကြားခဲ့ပါသည်။

    ထို့နောက် တက်ရောက်လာသောလုပ်ငန်းရှင်များက အအေးခန်းစက်ရုံများလည်ပတ်မှုအခြေအနေ၊ အခက်အခဲများကိုတင်ပြခဲ့ကြရာ ၎င်းတို့၏အခက်အခဲများကိုဖြေရှင်းရန် သက်ဆိုင်ရာဌာနများနှင့်ချိတ်ဆက်ဆောင်ရွက်ပေးခဲ့ကြောင်း သိရှိရပါသည်။

DOCA(မွန်)

  (၂၁-၆-၂၀၂၃) ရက်နေ့၊ နံနက် (၀၈:၀၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ပြည်နယ်အစိုးရအဖွဲ့ဝန်ကြီးချုပ်ဦးဆောင်၍ အစိုးရအဖွဲ့ဝင်ဝန်ကြီးများ၊ ပြည်နယ်အဆင့် သက်ဆိုင်ရာဌာနဆိုင်ရာများနှင့်အတူ MSME လုပ်ငန်းများဖွံ့ဖြိုးတိုးတက်ရေးအတွက် MSME လုပ်ငန်းများ၏ လုပ်ငန်းလည်ပတ်မှုအခြေအနေများကို ကွင်းဆင်းစစ်ဆေးခဲ့ကြပါသည်။

  ပထမဦးစွာ ခရွန်းကျေးရွာရှိ Cool Storage သို့ရောက်ရှိပြီး မွန်ပြည်နယ်၏အဓိကစိုက်ပျိုးရေး၊ မွေးမြူရေးထုတ်ကုန်များ၏ အရည်အသွေးနှင့်တန်ဖိုးမကျစေရန်နှင့် တန်ဖိုးမြှင့်ထုတ်ကုန်များထုတ်လုပ်ကာ စနစ်တကျထိန်းသိမ်းသိုလှောင်ထားရှိပြီး တင်ပို့နိုင်ရန်တို့အတွက် အအေးခန်းစက်ရုံတည်ထောင်ထားမှုအခြေအနေ၊ ထုန်ကုန်များသိုလှောင်ထားရှိမှုအခြေအနေနှင့် တိုးချဲ့ဆောင်ရွက်မှုအခြေအနေများကို ကြည့်ရှုလေ့လာခဲ့ကြသည်။

   ထို့နောက် ဖားအောက်ကျေးရွာအတွင်းရှိ မိသားစုတစ်ပိုင်တစ်နိုင်လုပ်ငန်းများလုပ်ကိုင်နေသော ရိုးရာအိမ်တွင်းရက်ကန်းချည်ထည်ရက်လုပ်မှုအခြေအနေများကိုကြည့်ရှုခဲ့ကာ ဆက်လက်၍ မော်လမြိုင်နည်းပညာတက္ကသိုလ်ရှိ ရွှေဇီဝသဘာဝဇီဝမြေဩဇာစက်ရုံသို့သွားရောက်ပြီး သဘာဝမြေဩဇာထုတ်လုပ်နေမှုအခြေအနေ၊ လုပ်ငန်းတိုးချဲ့နေမှုအခြေအနေများအား စစ်ဆေးဆောင်ရွက်ခဲ့ကြောင်းသတင်းရရှိပါသည်။

DOCA(မွန်)