သတင်းနှင့် လှုပ်ရှားမှုများ

   မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်၌ (၃.၇.၂၀၂၃) ရက်နေ့၊ နံနက်(၀၉:၃၀) အချိန်တွင် အပတ်စဉ် တနင်္လာနေ့တိုင်း ပလတ်စတစ်အိတ်မသုံးစွဲရေးနေ့ သတ်မှတ်၍ ချောက်မြို့မစျေး အတွင်း/အပြင်တို့တွင် အသိပညာပေးလုပ်ငန်းများ ဆောင်ရွက်ရာတွင် ကုန်အညွှန်းအမှတ်အသားများ ပြည့်စုံမှန်ကန်စွာမပါရှိသော ပစ္စည်းများ ရောင်းချမှုမရှိစေရေးကိုလည်း ကွင်းဆင်းစစ်ဆေးခဲ့ပါသည်။

     ထိုသို့ ဆောင်ရွက်ရာတွင် မြို့နယ်စည်ပင်သာယာရေးအဖွဲ့ အမှုဆောင်အရာရှိဦးနေမန်း ဦးဆောင်သော ဝန်ထမ်းများ၊ စည်ပင်သာယာရေးကော်မတီဝင်များ၊ မြို့နယ်စားသုံးသူရေးရာဦးစီးဌာန ဒု-ဦးစီးမှူး ဒေါ်ချိုဝေလွင်တို့က ချောက်မြို့နယ်အတွင်း တနင်္လာနေ့တိုင်း မြို့မစျေးအတွင်းနှင့် အပြင်တွင် ပလတ်စတစ်အိတ် မသုံးစွဲရဟုသတ်မှတ်ထားရှိပြီး ပလတ်စတစ်အိတ်အစား အင်ဖက်၊ ငှက်ပျောဖက်၊ သတင်းစာစက္ကူတို့ဖြင့် အစားထိုးထုတ်ပိုး သုံးစွဲစေရေးအတွက် ပြည်သူများ ကျယ်ကျယ်ပြန့်ပြန့် သိရှိနိုင်ရန် လက်ကိုင်စပီကာနှင့် အသိပေးနှိုးဆော်ခြင်း၊ အသိပညာပေးခြင်းတို့ကို ဆောင်ရွက်ခဲ့ပါသည်။ စားသုံးသူရေးရာဦးစီးဌာနမှလည်း ဈေးသူ၊ ဈေးသားများနှင့် လုပ်ငန်းရှင်များအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၂၁၉)ပါ အကြောင်းအရာများ၊ ၎င်းညွှန်ကြားချက် ပါကုန်အညွှန်းအမှတ်အသားများ ပြည့်စုံစွာဖော်ပြထားသော ကုန်စည်များကိုသာ ဆိုင်တင်ရောင်းချကြရန်၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များကိုဖြန့်ဖြူးရောင်းချခြင်း မပြုလုပ်ကြရန်၊ စစ်ဆေးတွေ့ရှိပါက စားသုံးသူကာကွယ်ရေးဥပဒေအရ အရေးယူ ဆောင်ရွက်သွားမည်ဖြစ်ကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ တိုင်းဒေသကြီးဦးစီးမှူးရုံးသို့ တင်ပြစိစစ်လျှောက်ထားနိုင်ပါကြောင်း အသေးစိတ်ရှင်းလင်းဆွေးနွေးပြီး လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(မကွေး)

    စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ   ဦးဝင်းသိန်းဦး(ရုံးအုပ်)သည်   (၄.၇.၂၀၂၃) ရက်နေ့ ၊ (၁၀:၀၀)နာရီ အချိန်တွင် မိုးကောင်းမြို့နယ်၊ သိုက်ဝါးကုန်းကျေးရွာအတွင်းရှိ စားသုံးသူများကို စားသုံးသူကာကွယ်ရေး အသိပညာပေး ဟောပြောပွဲ ပြုလုပ်ဆောင်ရွက်ခဲ့ပါသည်။

     စားသုံးသူကာကွယ်ရေး အသိပညာပေးဟောပြောရာတွင် စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏အခွင့်အရေးနှင့် အကျိုးစီးပွားကိုကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင်တို့အကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိ သောလုပ်ငန်းစဉ်ကိုဆိုလိုကြောင်း၊ စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှု ပြုရန် သို့မဟုတ် အသက်မွေးဝမ်ကြောင်းပြုရန်မဟုတ်ဘဲ ကိုယ်တိုင်သုံးစွဲမှု အတွက်သော်လည်းကောင်း၊ အခြားသူအတွက် သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်း ပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကိုဆိုလိုကြောင်း၊ စားသုံးသူ၏အခွင့်အရေးများဖြစ်သည့် စားသုံးသူများအတွက် ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံမှုနှင့် စပ်လျဉ်းသည့် ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်စေခြင်း ၊ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်း၊ စားသုံးသူ၏ တာဝန်များ ဖြစ်သည့် ကုန်စည် သို့မဟုတ် ဝန်ဆောင်မှုနှင့် စပ်လျဉ်းသည့် သတင်းအချက်အလက်နှင့် လမ်းညွှန်ချက်များအတိုင်း လိုက်နာဆောင်ရွက်ခြင်း၊ ကုန်စည် သို့မဟုတ် ဝန်ဆောင်မှုကို ရွေးချယ်ဝယ်ယူရာတွင် သဘောတူညီထားသည့် တန်ဖိုးနှင့်အညီ ပေးချေခြင်း၊ စီးပွားရေးလုပ်ငန်းရှင် အပေါ်ထိခိုက်နစ်နာစေရန် ရည်ရွယ်၍ မဟုတ်မမှန် စွပ်စွဲပြောဆိုမှု၊ ပြုလုပ်မှုတို့ကို ရှောင်ကြဉ်ခြင်း စသည်တို့ကို အသိပညာပေးဟောပြောခဲ့ပြီး တက်ရောက်သူများမှ သိရှိလိုသည်များ မေးမြန်းခဲ့၍ ပြန်လည်ရှင်းလင်းခဲ့ကာ စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

  မကွေးတိုင်းဒေသကြီး၊ စားသုံးသူရေးရာဦးစီးဌာန၊ မင်းဘူးခရိုင်၊ ပွင့်ဖြူမြို့နယ်တာဝန်ခံနှင့် မင်းဘူးခရိုင်ဦးစီးမှူးရုံးမှ ဝန်ထမ်းများသည် တိုင်းဒေသကြီးဦးစီးမှူး၏ လမ်းညွှန်မှုဖြင့် ခရိုင်ဦးစီးမှူး၏ အနီးကပ်ကြီးကြပ်မှုဖြင့် (၂၇-၆-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် ပွင့်ဖြူမြို့နယ်၊ မြို့နယ်တာဝန်ခံရုံး၌ စည်ပင်သာယာရေးအဖွဲ့၊ အထွေထွေအုပ်ချုပ်ရေးဦးစီးဌာနမှ ဝန်ထမ်းများနှင့်အတူ ဒေသတွင်းစားသောက်ကုန်များ ထုတ်လုပ်၊ ဖြန့်ဖြူး၊ ရောင်းချနေသော စီးပွားရေးလုပ်ငန်းရှင် (၁၃) ဦးကို ကုန်အညွှန်းအမှတ်အသားများပြည့်စုံမှန်ကန်စွာဖော်ပြလာစေရေး အသိပညာပေးဆွေးနွေးခဲ့ပါသည်။

  အဆိုပါဆွေးနွေးပွဲ၌ ပွင့်ဖြူမြို့နယ်တာဝန်ခံ ဒု-ဦးစီးမှူး ဒေါ်ဌေးဌေးဝင်းက မိမိတို့စားသုံးသူရေးရာဦးစီးဌာန၏သမိုင်းကြောင်း၊ ဌာနဖြစ်ပေါ်လာပုံအဆင့်ဆင့်နှင့် စားသုံးသူကာကွယ်ရေးဥပဒေဆိုသည်မှာ စားသုံးသူ၏အခွင့်အရေးနှင့် အကျိုးစီးပွားကိုကာကွယ်ပေးပြီး စားသုံးသူနှင့် စီးပွားရေးလုပ်ငန်းရှင်တို့အကြား သတ်မှတ်ဆောင်ရွက်ပေးသည့် မျှတမှုရှိသောလုပ်ငန်းစဉ်ကိုဆိုလိုခြင်းဖြစ်ကြောင်း၊ စားသုံးသူကာကွယ်ရေးဥပဒေ၏ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားများကို ပြည့်စုံစွာဖော်ပြပေးစေလိုပါကြောင်း၊ ကုန်အညွှန်းအမှတ်အသားများပြည့်စုံစွာဖော်ပြပေးစေလိုခြင်းသည် လုပ်ငန်းရှင်များ၏အကျိုးစီးပွားကို တစ်ဖက်တစ်လမ်းမှ ကူညီပေးခြင်းဖြစ်ပါကြောင်း၊ ယနေ့ခေတ်စားသုံးသူများသည် အသိပညာများ၊ ဗဟုသုတများကြွယ်ဝလာပြီဖြစ်ပါကြောင်း၊ စားသုံးသူများသည် ကုန်ပစ္စည်းတစ်ခုကိုဝယ်ယူမည်ဆိုလျှင် အနည်းဆုံး Expire Date ပါသောကုန်စည်များကိုသာ ရွေးချယ်ဝယ်ယူတတ်သော အသိပညာများရရှိနေပြီဖြစ်ပါကြောင်း၊ သို့ဖြစ်ပါ၍ လုပ်ငန်းရှင်များအနေဖြင့် မိမိတို့ထုတ်လုပ်သောကုန်စည်များကို ဈေးကွက်တွင် နေရာရရှိရေးအပြင် စားသုံးသူများအတွက် လုံခြုံစိတ်ချရသောကုန်စည်များဖြစ်စေရေးအလို့ငှာ ကုန်အညွှန်းအမှတ်အသားဖော်ပြချက်များနှင့်ကိုက်ညီမှုရှိ/မရှိကို သိရှိစေရန်အလို့ငှာ နမူနာပုံစံများနှင့်တကွ မိမိတို့ဦးစီးဌာနသို့ လာရောက်တင်ပြလျှောက်ထားနိုင်ပြီး ဌာနမှစိစစ်ပြန်ကြားပေးလျက်ရှိကြောင်းနှင့် စားသုံးသူများနစ်နာဆုံးရှုံးမှုများဖြစ်ပေါ်လာပါက မိမိတို့ဦးစီးဌာနက ဖြေရှင်းပေးလျက်ရှိပါကြောင်းတို့ကို အသေးစိတ်ရှင်းလင်းဆွေးနွေးခဲ့ပါသည်။

DOCA(မကွေး)

   စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဝန်ထမ်းများသည် (၂၀၂၃-၂၀၂၄) ဘဏ္ဍာနှစ်၊ ကျောင်းဖွင့်ရာသီအတွင်း ဘားအံမြို့ပေါ်ရှိ အခြေခံပညာမူလတန်းလွန်ကျောင်းများသို့သွားရောက်ကာ မြို့နယ်ကျောင်းကျန်းမာရေးကော်မတီအဖွဲ့ဝင်များနှင့်ပူးပေါင်း၍ စားသုံးသူကာကွယ်ရေးဆိုင်ရာအသိပညာပေးဟောပြောခြင်း၊ ထုတ်ကုန်များလုံခြုံစိတ်ချရမှုရှိစေရေးစစ်ဆေးခြင်းနှင့် ကျောင်းကျန်းမာရေးဆိုင်ရာလုပ်ငန်းများတွင် ပူးပေါင်းပါဝင်ဆောင်ရွက်ခဲ့ကြောင်းသိရှိရပါသည်။

    ထိုသို့ဆောင်ရွက်ရာတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဝန်ထမ်းများအနေဖြင့် (၂၁-၆-၂၀၂၃) ရက်နေ့တွင် ဘားအံမြို့၊ အမှတ်၂ရပ်ကွက်၊ ရဲကျောင်းဝန်းအတွင်း အ-မ-က မူလွန် (၁) ရှိ ကျောင်းသား/ကျောင်းသူ ၁၄၉ဦးနှင့် ဆရာ/ဆရာမ (၁၀) ဦးကိုလည်းကောင်း၊ (၂၃-၆-၂၀၂၃) ရက်နေ့တွင် အမှတ်၁ရပ်ကွက်၊ ရွှေနှင်းဆီလမ်း၊ အ-မ-က မူလွန်(၂)ရှိ ကျောင်းသား/ကျောင်းသူ၁၃၅ဦးနှင့် ဆရာ/ဆရာမ (၁၅) ဦးကိုလည်းကောင်း၊ (၂၆-၆-၂၀၂၃)  ရက်နေ့တွင် အမှတ်၉ရပ်ကွက်၊ စက်ပစ်ကွင်းရှိ အ-မ-က မူလွန်၃ရှိ ကျောင်းသား/ကျောင်းသူ၁၁၀ဦးနှင့် ဆရာ/ဆရာမ၈ဦးကိုလည်းကောင်း၊ (၂၈-၆-၂၀၂၃)  ရက်နေ့တွင် အမှတ်၄ရပ်ကွက်၊ မြို့တော်ဦးဘုန်းကြီးကျောင်းလမ်း၊ အ-မ-က မူလွန်၄ရှိ ကျောင်းသား/ကျောင်းသူ၃၉ဦးနှင့် ဆရာ/ဆရာမ၅ဦးကိုလည်းကောင်း စားသုံးသူကာကွယ်ရေးအကြောင်းသိကောင်းစရာများ အသိ ပညာပေးဟောပြောခဲ့ကြောင်းနှင့် အဆိုပါကျောင်းများရှိ  ကျောင်းမုန့်ဈေးတန်းများတွင် ရောင်းချနေသောအစားအသောက်များ ကုန်အညွှန်းအမှတ်အသားပြည့်စုံမှန်ကန်မှုရှိ/မရှိနှင့် ထုတ်ကုန်လုံခြုံစိတ်ချရမှုရှိ/မရှိတို့ကိုစစ်ဆေးခဲ့ပြီး ကျောင်းကျန်းမာရေးကော်မတီဝင်များက ဆောင်ရွက်လျက်ရှိသော ကျောင်းကျန်းမာရေးဆိုင်ရာလုပ်ငန်းများတွင် ပူးပေါင်းပါဝင်ဆောင်ရွက်ခဲ့ကြောင်းသိရပါသည်။

  စားသုံးသူရေးရာဦစီးဌာန၊ ကရင်ပြည်နယ်ဦးစီးမှူးရုံးအနေဖြင့် (၂၀၂၃-၂၀၂၄) ဘဏ္ဍာနှစ်၊ ကျောင်းဖွင့်ရာသီအတွင်း ဘားအံမြို့ပေါ်ရှိ အခြေခံပညာမူလတန်းလွန်ကျောင်းများတွင်သာမက အလယ်တန်း၊ အထက်တန်းကျောင်းများတွင်ပါ စားသုံးသူကာကွယ်ရေးဆိုင်ရာအသိပညာပေး ဟောပြောပွဲဆောင်ရွက်ခဲ့ကာ ကျောင်းမုန့်ဈေးတန်းရှိမုန့်များ ထုတ်ကုန်လုံခြုံစိတ်ချရမှုရှိ/မရှိတို့ကိုစစ်ဆေးနိုင်ရေး လျာထားချက်များချမှတ်၍ ဆောင်ရွက်လျက်ရှိကြောင်းသိရပါသည်။

DOCA(ကရင်)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန တိုင်းဦးစီးမှူးရုံးတွင် တိုင်းဒေသကြီးဦးစီးမှူး ဦးစိုးအောင်နှင့် ဧရာဝတီတိုင်းဒေသကြီးတောင်သူလယ်သမားများအသင်း အတွင်းရေးမှူး ဦးအေးသောင်း တို့သည် ရုံးအမှတ် (၃) စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန နေပြည်တော်တွင် (၃.၇.၂၀၂၃)ရက်နေ့၊ နံနက် (၁၀:၀၀)နာရီတွင် ကျင်းပပြုလုပ်သော ၂၀၂၃-၂၀၂၄ ခုနှစ် စိုက်ပျိုးရေးရာသီအတွင်း စိုက်ပျိုးထွက်ရှိမည့် မိုးစပါးနှင့် နွေစပါးများအတွက် အခြေခံရည်ညွှန်းစပါးဈေးနှုန်းသတ်မှတ် ထုတ်ပြန်ကြေညာနိုင်ရေး ဦးဆောင်အဖွဲ့သို့ အဆိုပြု ဈေးနှုန်းတင်ပြနိုင်ရန်အတွက် ဆန်စပါးဈေးကွက်နှင့် ဈေးနှုန်းဆိုင်ရာ သုံးသပ်အကြံပြုတင်ပြရေး လုပ်ငန်းကော်မတီ၏ ညှိနှိုင်းအစည်းအဝေးကို Virtual Zoom Meeting ဖြင့် တက်ရောက်ခဲ့ပါသည်၊၊

DOCA(ဧရာဝတီ)