သတင်းနှင့် လှုပ်ရှားမှုများ

           စားသုံးသူရေးရာဦးစီးဌာန၊ သာယာဝတီခရိုင် ၊ မိုးညိုမြို့နယ်တွင် ခရိုင်ဦးစီးမှူး၏ ဦးဆောင်မှုဖြင့် (၈.၈.၂၀၂၂)ရက်နေ့ နံနက်(၁၀:၀၀)နာရီ အချိန်တွင် ဈေးကွက်စောင့်ကြည့် စစ်ဆေးခြင်းများ ဆောင်ရွက် ခဲ့ပါသည်။

          ခရိုင်ဦးစီးမှူးဦးအောင်သိန်း၊ မြို့နယ်တာဝန်ခံ ဦးစိန်ဝင်းနှင့် ဝန်ထမ်းများသည် မြို့နယ်စည်ပင် သာယာဈေးအတွင်း ကုန်စုံဆိုင်များရှိ အလှကုန်ပစ္စည်းများတွင် FDA ခွင့်ပြုချက်ရှိ/မရှိ ၊ Hologram Stickerများ ပါ/မပါ ၊ မြန်မာဘာသာဖြင့် ကုန်အညွှန်းအမှတ်အသားများပြည့်စုံစွာဖော်ပြခြင်းရှိ/မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပြီး ထိုသို့ ဈေးကွက်စောင့်ကြည့် စစ်ဆေးခြင်းများ ဆောင်ရွက်ရာတွင် စီးပွားရေး လုပ်ငန်းရှင်များအနေဖြင့် ကုန်အညွှန်းအမှတ်အသား မပြည့်စုံသည့် အလှကုန်ပစ္စည်းများကို ရောင်းချခြင်းမပြုကြရန်နှင့် စားသုံးသူ ကာကွယ်ရေးဥပဒေ နှင့်အညီ လိုက်နာဆောင်ရွက်ကြရန် ၊ စားသုံးသူများ နစ်နာမှုဖြစ်စေမည့် သက်တမ်းလွန် အလှကုန်ပစ္စည်းများကို သွယ်ဝိုက်ရောင်းချခြင်းများ ရှောင်ကြဉ်ကြရန် ၊ FDA ခွင့်ပြုချက်မရှိသည့် အလှကုန်ပစ္စည်းများကို ရောင်းချခြင်းမပြုကြရန် အသိပညာပေး ဟောပြောခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ သာယာဝတီခရိုင် အုတ်ဖိုမြို့နယ်၌ (၅.၈.၂၀၂၂)ရက်နေ့ နံနက်(၁၀:၀၀)နာရီ အချိန်တွင် မြို့နယ်တာဝန်ခံ ဦးအေးဇော်ထိုက်၊ဒုကြီးကြပ်ရေးမှူး ဦးအောင်သိန်းဦးတို့သည် ပဲမျိုးစုံ ရောင်းဝယ်တင်ပို့ရောင်းချသူပိုင်ရှင် ဦးခင်မောင်ထွန်းနှင့် တွေ့ဆုံ၍ အရည်အသွေးမှီကုန်ပစ္စည်းများ ရောင်းချရေးအတွက် တွေ့ဆုံဆွေးနွေးခဲ့ပါသည်။

         ထိုသို့ တွေ့ဆုံဆွေးနွေးရာတွင် စားသုံးသူကာကွယ်ရေး ဥပဒေအခန်း(၁၀)ပါ စီးပွားရေး လုပ်ငန်းရှင်များ၏ တာဝန်များ ၊ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးများအရ ဖြည့်ဆည်းပေးရမည့်အချက်များနှင့် ကုန်စည်အမျိုး အစားအလိုက် အရည်အသွေး၊ အချိန်အတွယ်ပမာဏနှင့် ဈေးနှုန်းများ မှန်ကန်စွာ ရောင်းချမှုရှိစေရေး ရှင်းလင်းဆွေးနွေးပြောကြားခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)

         ပဲခူးတိုင်းဒေသကြီး ၊ သာယာဝတီခရိုင် ၊ ကြို့ပင်ကောက်မြို့မဈေးအတွင်းအပြင် အလှကုန်ပစ္စည်း ရောင်းချသော ဆိုင်များသို့ ၅.၈.၂၀၂၂ ရက်နေ့ ၊ နံနက် (၁၀ : ၀၀) နာရီအချိန်တွင် စားသုံးသူရေးရာဦးစီးဌာန ၊ မြို့နယ်တာဝန်ခံနှင့် ဝန်ထမ်းများသည် စျေးကွက်အတွင်း FDA ခွင့်ပြုချက်ရှိ/မရှိ ၊ Hologram Sticker နှင့် မြန်မာစာ Labelling များမပါရှိဘဲ ကုန်ပစ္စည်း ဆင်တူယိုးမှား ထုတ်လုပ်ဖြန့်ဖြူးရောင်းချမှု ရှိ/မရှိ ကွင်းဆင်းစစ်ဆေးခဲ့ပါသည်။

          မြို့မဈေးအတွင်းအပြင် အလှကုန်ပစ္စည်းရောင်းချသော ဆိုင်(၄)ဆိုင်ကို စစ်ဆေးရာတွင် အလှကုန်ပစ္စည်းများတွင် မြန်မာလို ကုန်အညွှန်းအမှတ်အသားများ ပါရှိပြီး Hologram ရောင်ပြန်ကပ် နှိပ်ထားသည့် ပစ္စည်းများသာ ‌ထိုဆိုင်များတွင် ရောင်းချနေသည်ကို စိစစ်တွေ့ရှိရပါသည်။ အလှကုန် ဆိုင်ပိုင်ရှင်များကိုလည်း မည်သည့်အလှကုန်မဆို FDA ထောက်ခံချက် ၊ ကုန်အညွှန်းအမှတ်အသား ပြည့်စုံစွာပါရှိမှသာ ဝယ်ယူရောင်းချရန် အသိပညာပေး ပြောကြား၍  ဈေးကွက်စောင့်ကြည့် စစ်ဆေးခဲ့ကြောင်း သိရှိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ မကွေးခရိုင်/ချောက်ခရိုင်ဦးစီးမှူးတို့၏ လမ်းညွှန်မှုဖြင့်ချောက်မြို့နယ် တာဝန်ခံ ဒေါ်မြတ်မြတ်မိုး(ချောက်ခရိုင်၊ ဒု-ခရိုင်ဦးစီးမှူး)နှင့် ဒေါ်ချိုဝေလွင်(ဒု-ဦးစီးမှူး) တို့သည် (၅.၈.၂၀၂၂) ရက်နေ့ နံနက်(၁၀:၀၀)မှ (၁၁:၃၀)နာရီထိ ချောက်မြို့ပေါ်ရှိ ဆေးနှင့် ဆေးပစ္စည်းအ ရောင်းဆိုင်များအား စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်လုံခြုံ စိတ်ချရမှုရှိစေရေးအတွက် ရှောင်တခင်စစ်ဆေးခြင်းကို အထွေထွေအုပ်ချုပ်ရေးဦးစီးဌာန၊စည်ပင်သာယာရေးအဖွဲ့၊မြန်မာနိုင်ငံရဲတပ်ဖွဲ့၊ ပြည်သူ့ကျန်းမာ‌ရေး၊ စျေးတာဝန်ခံတို့နှင့်  ပူးပေါင်းပြီး ရှောင်တခင် ကွင်းဆင်းစစ်ဆေးခဲ့ပါသည်။

          ဆေးဆိုင်များတွင်ဆေးဝါးရောင်းချခွင့်လိုင်စင် ရှိ/မရှိ၊ တရားမဝင်ဆေးဝါးများ၊ သက်တမ်းလွန်ဆေးဝါးများ ရောင်းချမှု ရှိ/မရှိ၊ Lebelling ကုန်အညွှန်းအမှတ်အသားပြည့်စုံစွာ ဖော်ပြထား ခြင်းရှိ/မရှိ  ပူးပေါင်းစစ်ဆေးခဲ့ပါသည်။ လုပ်ငန်းရှင်များအား ဆေးနှင့် ဆေးပစ္စည်းများတွင် စားသုံးသူရေးရာဦးစီး ဌာနမှထုတ်ပြန်ထားသော စားသုံးသူကာကွယ်ရေးဥပဒေ-၂၀၁၉၊ အခန်း(၁၈)ပါ ကုန် အညွှန်းအမှတ်အသားများတွင် မြန်မာဘာသာဖြင့်ပြည့်စုံစွာဖော်ပြထားပြီး FDA ထောက်ခံချက်ရှိ သော ကုန်ပစ္စည်းများသာ ဆိုင်တင်ရောင်းချရန်နှင့် ဆိုင်ဝန်ထမ်းများအား ဆေးဝါးကျွမ်းကျင် သင်တန်းများ တက်ရောက်ထားကြရန် အသိပညာပေး ဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မတီ၏ ညွှန်ကြားချက်(၂/၂၀၁၉)ပါလက်ကမ်းစာစောင်များ ဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

       မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့နယ်ရှိ အ.ထ.က (ခွဲ) ရေတွင်းကုန်ကျောင်း တွင် စားသုံးသူရေးရာဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန နှင့် မီးသတ်ဦးစီး ဌာနတို့ ပူပေါင်း၍ ကျောင်းသာ၊ ကျောင်းသူများ အသိပညာဗဟုသုတများ ရရှိစေရန် ရည်ရွယ်၍ အသိပညာဟောပြောပွဲကို ၂၀၂၂ ခုနှစ်၊ ဩဂုတ်လ ၈ ရက်နေ့၊ နံနက် (၁၀:၀၀) နာရီအချိန်တွင် ကျင်းပပြုလုပ်ခဲ့ပါသည်။

          ဟောပြောပွဲတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူး ဒေါ်ချိုမြတ်မြတ်ထွေးက မူးယစ်ဆေးဝါးတားဆီကာကွယ်ရေး၊ လူကုန်ကူးမှုတားဆီကာကွယ်ရေးနှင့် မျောက်ကျောက်ရောဂေါကာကွယ်ရေးဆိုင်ရာ အကြောင်းအရာများကို ဟောပြောခဲ့ပြီး မီးသတ်ဦးစီးဌာနမှ မြို့နယ်ဦးစီးမှူး ဦးတင်သောင်းမှ မီးဘေးအန္တရာယ် ကြိုတင်ကာကွယ်ရေး လက်တွေ့ပြသခြင်းခေါင်စဉ်ဖြင့် မီးလောင်မှုတွင် အောက်စီဂျင်သည် အဓိကအရာ ဖြစ်သောကြောင့် မီးသည် အောက်စီဂျင်မရှိလျှင် မလောင်နိုင်ကြောင်း၊ မီးလောင်လျှင်  မီးလောင်နေသည့် လိပ်စာ အပြည့်အစုံဖြင့် ၁၉၁ သို့ အချိန်နှင့်တပြေးညီ ခေါ်ဆို၍  ပူးပေါင်းဆောင်ရွက်ပေးလိုအပ်ကြောင်း ကျောင်းသား/ကျောင်းသူများကို လက်တွေ့ပြသ၍ ဟောပြောခဲ့ပါသည်။

          ဆက်လက်၍ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဒေါ်သဇင်ဖြိုးမြတ် (အငယ်တန်းစာရေး) က စားသုံးသူကာကွယ်ရေးအကြောင်း ဟောပြောရာတွင် စားသုံးသူ ကာကွယ်ရေးဥပဒေ၊ အခန်း (၉)ပါ စားသုံးသူအခွင့်အရေး ၈ ချက်နှင့် တာဝန်ဝတ္တရားများ အကြောင်း၊ အခန်း (၁၈)ပါ ကုန်ညွှန်းအမှတ်အသား ဖော်ပြခြင်းနှင့် ပတ်သက်၍ ကုန်စည် တစ်ခု ဝယ်ယူရာတွင် ကုန်စည်၏ အမျိုးအမည် ၊ သုံးစွဲပုံနည်းလမ်း၊ ထုတ်လုပ်သည့် ရက်စွဲနှင့် သက်တမ်း ကုန်ဆုံမည့် ရက်စွဲ ၊ မြန်မာဘာသာပါမပါနှင့် သက်ဆိုင်ရာဌာန၏ ထောက်ခံချက် ပါမပါတို့ကို ကြည့်ရှုရန်လိုအပ်ကြောင်း၊ Online Shop မှ ဝယ်ယူရာတွင်လည်း ဝယ်ယူသည့် Website သည်  မြန်မာနိုင်တွင် မှတ်ပုံတင်ထားခြင်းရှိမရှိကို လေ့လာပြီးမှဝယ်ယူရန်နှင့် ပြေစာ တောင်းခံ သင့်ကြောင်းတို့ကို ရှင်းလင်းဟောပြောဆွေးနွေးခဲ့ပါသည်။

         ထို့နောက် ဟောပြောပွဲကို တက်ရောက်သည့် အ.ထ.က (ခွဲ)  ရေတွင်းကုန်ကျောင်းမှ ကျောင်းအုပ်ဆရာမကြီး၊ ဆရာ၊ ဆရာမများအား စားသုံးသူကာကွယ်ရေးဆိုင်ရာ လက်ကမ်း စာစောင်များပေးအပ်ခဲ့ပါသည်။ ဟောပြောပွဲကို  ဆရာ/ဆရာမနှင့် ကျောင်းသား/ကျောင်းသူ (၁၆၀)ဦး တက်ရောက် ခဲ့ကြောင်း သိရှိရပါသည်။

DOCA(မွန်)