သတင်းနှင့် လှုပ်ရှားမှုများ

 ရန်ကုန် (၁၉-၆-၂၀၂၃)

            စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စက်မှုဝန်ကြီးဌာန၊ မြန်မာနိုင်ငံ ဆန်စပါးအသင်းချုပ်နှင့် မြန်မာနိုင်ငံဆန်စက်လုပ်ငန်းရှင်များအသင်းတို့ ပူးပေါင်း၍ ဆန်စပါး ကြိတ်ခွဲထုတ်လုပ်ရေးနည်းပညာဆိုင်ရာ ကျွမ်းကျင်မှုသင်တန်းဖွင့်ပွဲအခမ်းအနားကို ၂၀၂၃ ခုနှစ်၊ ဇွန်လ ၁၉ ရက်နေ့တွင် ရန်ကုန်တိုင်းဒေသကြီး၊ လှည်းကူးမြို့နယ်၊ ကျွန်းကလေးကျေးရွာရှိ စားသုံးသူရေးရာဦးစီးဌာန၊ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှုဌာနစု (CTQM)၊ သင်တန်းခန်းမ၌ ကျင်းပခဲ့ရာ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယ ဝန်ကြီး၊ စားသုံးသူရေးရာဦးစီးဌာန၊ စက်မှုပူးပေါင်းဆောင်ရွက်ရေးဦးစီးဌာန၊ စိုက်ပျိုးရေးဦးစီးဌာန၊ မြန်မာနိုင်ငံဆန်စပါးအသင်းချုပ်နှင့် မြန်မာနိုင်ငံဆန်စက်လုပ်ငန်းရှင်များအသင်းတို့မှ တာဝန်ရှိသူများ၊ သင်တန်းနည်းပြများနှင့် သင်တန်းသားများ တက်ရောက်ခဲ့ပါသည်။

            သင်တန်းဖွင့်ပွဲအခမ်းအနားတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးညွန့်အောင်က ယင်းသင်တန်းကို ဆန်စပါးစိုက်ပျိုးထုတ်လုပ်၊ ကြိတ်ခွဲ၊ သိုလှောင်၊ တင်ပို့ရောင်းချခြင်း တန်ဖိုးကွင်းဆက်လုပ်ငန်းစဉ်တစ်လျှောက်တွင် ပါဝင်ဆောင်ရွက်မည့်သူများ အထူးသဖြင့် ဆန်စက်အင်ဂျင်နီယာများ၊ ဆန်စက်ကိုင်တွယ်မောင်းနှင်သူများ၏ လူ့စွမ်းအား အရင်းအမြစ်ဖွံ့ဖြိုးတိုးတက်စေရေး၊ ဆန်စက်အခြေခံနည်းပညာများနှင့် ခေတ်မီဆန်စက်နည်းပညာများအား လက်ဆင့်ကမ်းမျှဝေနိုင်‌စေရေး၊ ရိတ်သိမ်းချိန်လွန်ကဏ္ဍမှာ ဆန်အရည်အသွေးနှင့်ပတ်သက်ပြီး ကြုံတွေ့နေရသည့် ပြဿနာများကို ထိရောက်စွာ ကိုင်တွယ် ဖြေရှင်းနိုင်စေရေးတို့အတွက် ရည်ရွယ်ဖွင့်လှစ်ခြင်းဖြစ်ပါကြောင်း၊ သင်တန်းတွင် ဆန်စပါးမျိုး ကောင်းမျိုးသန့် စိုက်ပျိုးထုတ်လုပ်ခြင်းနည်းပညာများ၊ ဆန်စပါးရိတ်သိမ်းချိန်လွန်နည်းပညာများ၊ ဆန်အရောင်တင်ခြင်းနှင့်အရောင်ရွေးခြင်း နည်းပညာများ၊ ပေါင်းဆန်ထုတ်လုပ်ခြင်း နည်းပညာများ၊ ဖွဲနုဆီထုတ်လုပ်ခြင်းနည်းပညာများ၊ ခေတ်မီဆန်စက်များကိုင်တွယ်မောင်းနှင်ခြင်း၊ ထုတ်လုပ်မှုအလေ့အကျင့်ကောင်းများနှင့် မြန်မာ့ဆန်စပါးတို့၏ စံချိန်စံညွှန်းအရည်အသွေးသတ်မှတ်ချက်များစသည်တို့နှင့်သက်ဆိုင်သည့် ဘာသာရပ်များကို ကုန်ပစ္စည်းစမ်းသပ်စစ်ဆေးရေးနှင့်အရည်အသွေးစီမံခန့်ခွဲမှုဌာနစုတွင် စာတွေ့လက်တွေ့ သင်ကြားပို့ချပေးသွားမည်ဖြစ်ပါကြောင်း ပြောကြားခဲ့ပါသည်။

     ထို့အပြင် စက်မှုဝန်ကြီးဌာန၊ အမှတ် (၁)၊ စက်မှုသင်တန်းကျောင်း (ဆင်တဲ) တွင်လည်း လျှပ်စစ်အန္တရာယ်ကင်းရှင်းရေး၊ လျှပ်စစ်မော်တာမောင်းနှင်ခြင်း၊ ပြစ်ချက်ရှာဖွေခြင်း၊ လျှပ်စစ်တိုင်းတာရေးကိရိယာများ၊ မီတာများကိုင်တွယ်အသုံးပြုခြင်း၊ စက်ရုံအလုပ်ရုံသုံး ဘွိုင်လာနည်းပညာများနှင့် အခြေခံဂဟေဆက်နည်းပညာအစရှိသည့် ဘာသာရပ်များကိုလည်း သင်ကြားပို့ချသွားမည်ဖြစ်ပြီး ရွှေဝါရောင်ဆန်စက်၊ ညောင်တုန်းမြို့နယ်တွင်လည်း သွားရောက်လေ့လာမည်ဖြစ်ကြောင်းနှင့် အဆိုပါသင်တန်းသို့ စုစုပေါင်းသင်တန်းသားသင်တန်းသူ (၄၂) ဦး တက်ရောက်ကြောင်း သတင်းရရှိပါသည်။

ITQM

       စားသုံးသူရေးရာဦးစီးဌာန ၊ ပဲခူးတိုင်းဒေသကြီး၊ သာယာဝတီခရိုင် ၊ သာယာဝတီမြို့နယ်၌ ဓာတ်မြေဩဇာနှင့် ပိုးသတ်ဆေးရောင်းဝယ်ရေးဆိုင်များတွင် ကုန်အညွှန်းအမှတ်အသား ပြည့်စုံစွာဖော်ပြခြင်း ရှိ/မရှိကို ၂၀၂၃ ခုနှစ် ၊ ဇွန်လ ၈ ရက်နေ့ ၊ နံနက် (၁၀ : ၀၀) နာရီအချိန်တွင် ခရိုင်ဦးစီးမှူး ဦးသန်းစိုး ၊ စားသုံး/ထုတ်လုံတာဝန်ခံ ဒေါ်ခိုင်ခိုင်ရီ ၊ မြို့နယ်တာဝန်ခံ ဒေါ်အေးသန္တာထွန်းတို့သည် မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ဈေးကွက်စောင့်ကြည့် စစ်ဆေးခဲ့ပါသည် ။

  စားသုံးသူပြည်သူများအနေဖြင့် ကုန်စည်များဝယ်ယူအသုံးပြုရာတွင် ဘေးအန္တရာယ်ကင်းရှင်းရေး ၊လုံခြုံစိတ်ချရမှု ရှိစေရေးတို့အတွက် ရည်ရွယ်၍ စားသုံးသူကာကွယ်ရေးဥပဒေ အခန်း (၁၈) ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ပြည့်စုံစွာ ဖော်ပြရန် ၊ ဥပဒေ အခန်း(၁၀)ပါ စီးပွားရေးလုပ်ငန်းရှင်၏ တာဝန်များနှင့် အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးရန်တို့ကို ဆွေးနွေးပြောကြားခဲ့ကြောင်း သိရှိရပါသည် ။

DOCA(ပဲခူး)

    စားသုံးသူရေးရာဦးစီးဌာန ၊ ပဲခူးတိုင်းဒေသကြီး ၊ သာယာဝတီခရိုင် ၊ လက်ပံတန်းမြို့နယ် ၊ ကျွန်းကလေးကျေးရွာ၌ (၈.၆.၂၀၂၃ )ရက်နေ့ ၊ နံနက် (၁၀ : ၃၀ )နာရီအချိန်တွင် ခရိုင်ဦးစီးမှူး ဦးသန်းစိုး ၊ စားသုံး/ထုတ်လုံတာဝန်ခံ ဒေါ်ခိုင်ခိုင်ရီနှင့် သတင်းနည်းတာဝန်ခံ ဒေါ်ကြည်ကြည်ချို ၊ ခရိုင်အုပ်ချုပ်ရေးဦးစီးဌာန ၊ ခရိုင်မြန်မာနိုင်ငံရဲတပ်ဖွဲ့ ၊ မြို့နယ်စည်ပင်သာယာရေးအဖွဲ့ ၊ မြို့နယ်အခွန်ဦးစီးဌာနတို့ ပူးပေါင်း၍ သောက်ရေသန့် ထုတ်လုပ်ဖြန့်ဖြူးရောင်းချနေသော လုပ်ငန်းရှင် များနှင့် တွေ့ဆုံ၍ စားသုံးသူကာကွယ်ရေး ဥပဒေ အခန်း (၁၈) ပါ ကုန်စည်များပေါ်တွင် ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ထုတ်လုပ်ဖြန့်ဖြူးရောင်းချရန် ၊ သောက်ရေသန့်များတွင် ထားသိုသိမ်းဆည်းရန် အညွှန်း ၊ ထုတ်လုပ် ရက် ၊ ကုန်ဆုံးရက်များ ပြည့်စုံစွာဖော်ပြရန် ၊ စားသုံးသူကာကွယ်ရေး ဥပဒေ အခန်း (၁၀) ပါ စီးပွားရေး လုပ်ငန်းရှင်၏ တာဝန်များနှင့် အခန်း(၁၁) ပါ ကုန်စည်နှင့် စပ်လျဉ်း၍ အာမခံချက် ပေးရမည့် အကြောင်းအရာများအား ဆွေးနွေးပြောကြားခဲ့ကြောင်း သိရှိရပါသည် ။

DOCA(ပဲခူး)

     ၂၀၂၃ ခုနှစ်၊ ဇွန်လ၊ ၁၅ ရက်နေ့ ၊ နံနက် (၀၈:၀၀) နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှ စစ်ဆေးရေးအရာရှိနှင့် ဝန်ထမ်းများသည် မြန်မာနိုင်ငံရဲတပ်ဖွဲ့ ၊ အထွေထွေအုပ်ချုပ်ရေးဦးစီးဌာန ၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူပူးပေါင်း၍ ထားဝယ်မြို့၊ ဝဲကျွန်းရပ်၊ တဂူသိမ်စျေးအတွင်းရှိ စားသောက်ကုန်ပစ္စည်းအမျိုမျိုး အရောင်းဆိုင်များအား စျေးကွက်စောင့်ကြည့် စစ်ဆေးခြင်း ဆောင်ရွက်ခဲ့သည်။

     အဆိုပါစျေးကွက်စောင့်ကြည့်စစ်ဆေးရာတွင် စားသုံးသူပြည်သူများ‌ ဘေးအန္တရာယ်ကင်းရှင်းစွာ ဝယ်ယူသုံးစွဲနိုင်စေရေးအတွက် စျေးကွက်အတွင်း မြန်မာဘာသာနှင့် အခြားဘာသာတစ်ခုခုနှင့်ဖြစ်စေ တွဲလျက်ဖော်ပြထားသော ကုန်အညွှန်းအမှတ်အသားများ ပြည့်စုံမှန်ကန်စွာ ပါရှိသည့် စားသောက်ကုန်ပစ္စည်းများကိုသာ ရောင်းချရန်နှင့် သက်တမ်းလွန် စားသောက်ကုန်ပစ္စည်းများ ရောင်းချနေမှု ရှိ/မရှိ စစ်ဆေးခြင်းနှင့် အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(တနင်္သာရီ)

            ဧရာဝတီ-ကျောက်ဖရား-မဲခေါင်စီးပွားရေးပူးပေါင်းဆောင်ရွက်မှု မဟာဗျူဟာ (ACMECS) အစီအစဉ်အရ ၂၀၂၃ ခုနှစ် ၊ မေလမှ ၂၀၂၄ ခုနှစ်၊ ဧပြီလအထိ “ဧရာဝတီတိုင်းဒေသကြီးတွင် အလားအလာရှိ‌သောထုတ်ကုန် (အုန်းသီး) တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်း စီမံကိန်း”ကိုစီးပွား‌ရေးနှင့်ကူးသန်း‌ရောင်းဝယ်ရေးဝန်ကြီးဌာန၊မြန်မာ့ကုန်သွယ်မှုမြှင့်တင်ရေးအဖွဲ့မှ အကောင်အထည်ဖော်ဆောင်ရွက်လျက်ရှိရာ စီမံကိန်း အစီအစဉ်အရ ဧရာဝတီတိုင်းဒေသကြီးအတွင်းရှိ အုန်းစိုက်ပျိုးထုတ်လုပ်သူများအတွက် “စီးပွားဖြစ်အုန်းပင်စိုက်ပျိုးထုတ်လုပ်ခြင်းနှင့် ကွင်းဆင်းသရုပ်ပြခြင်းသင်တန်း” ဖွင့်ပွဲ ကို ၂၀၂၃ ခုနှစ်၊ ဇွန်လ ၈ ရက်နေ့၊ နံနက် ၀၉:၀၀ အချိန်တွင် မော်လမြိုင်ကျွန်းမြို့နယ် စီမံအုပ်ချုပ်ရေးအဖွဲ့၊အစည်း အဝေးခန်းမ၌ ကျင်းပခဲ့ပါသည်၊၊

          သင်တန်းဖွင့်ပွဲတွင် ဧရာဝတီတိုင်းဒေသကြီး၊မော်လမြိုင်ကျွန်းမြို့နယ်၊မြို့နယ်စီမံ အုပ်ချုပ်ရေးအဖွဲ့ ဥက္ကဋ္ဌနှင့်အဖွဲ့ဝင်များ မြို့နယ်အဆင့် ဌာနဆိုင်ရာအကြီးအကဲများ၊ စီးပွားရေးနှင့်ကူးသန်း‌ရောင်းဝယ်ရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့်စားသုံးသူရေးရာ ဦးစီးဌာနမှ တာဝန်ရှိသူများ၊ မြန်မာနိုင်ငံအုန်း သီးစိုက်ပျိုး ထုတ်လုပ်ရောင်းချသူများအသင်း၊ ဥက္ကဋ္ဌနှင့်တာဝန်ရှိသူများ သင်တန်းသားများ တက်‌ရောက်ခဲ့ပါသည်၊၊

          ဖွင့်ပွဲအခမ်းအနားတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးသီဟဇော်က အဖွင့်မှာစကား ပြောကြားခဲ့ပြီး စီမံကိန်းကြီးကြပ်မှုကော်မတီအဖွဲ့ဝင် စားသုံးသူရေးရာဦးစီးဌာန၊ ဒုတိယ ညွှန်ကြားရေးမှူး ဦးထွန်းထွန်းက သင်တန်းကျင်းပပြုလုပ်ရခြင်း၏ ရည်ရွယ်ချက်နှင့် ရှေ့ဆက် လက်ဆောင်ရွက်မည့် စီမံကိန်းအစီအစဉ်များအကြောင်းကို ရှင်းလင်းပြောကြား ခဲ့ပါသည်၊၊

          ထို့နောက် သင်တန်းနည်းပြနှင့်သင်တန်းသားများက တစ်ဦးချင်းမိတ်ဆက်ခဲ့ကြပြီး  နံနက် ၁၀:၀၀ နာရီတွင် သင်တန်းပို့ချခြင်းအစီအစဉ်ကို ဆက်လက်ဆောင်ရွက် ခဲ့ပါသည်။ သင်တန်းကို ၂၀၂၃ ခုနှစ်၊ ဇွန်လ ၈ရက်နေ့ မှ ၁၀ရက်နေ့အထိ(၃)ရက်ကြာပို့ချသွားမည်ဖြစ်ပြီး သင်တန်းသား(၃၀)ဦး တက်ရောက်ကြမည် ဖြစ်ရာ လက်တွေ့ကွင်းဆင်း သရုပ်ပြလေ့ကျင့် ခြင်းများလည်းပါဝင်မည် ဖြစ်ကြောင်း သိရသည်။

DOCA( ဧရာဝတီ)