သတင်းနှင့် လှုပ်ရှားမှုများ

          မွန်ပြည်နယ်၊ စားသုံးသူရေးရာဦးစီးဌာန မှ ဦးစီးအရာရှိ ဒေါ်ငြိမ်းမြတ်ကျော် နှင့် ဝန်ထမ်းများသည် ၂၂.၇.၂၀၂၂ ရက်နေ့တွင် ချောင်းဆုံမြို့နယ်၊ ကညှော်အခြေခံပညာအထက်တန်းကျောင်း၌ ကျောင်းသား/ကျောင်းသူများ စားသုံးသူရေးရာ အသိပညာဗဟုသုတများ ရရှိစေရန်ရည်ရွယ်၍ စားသုံးသူကာကွယ်ရေးဆိုင်ရာ သိကောင်းစရာများကို ဟောပြောခဲ့ပါသည်။

          အဆိုပါ ဟောပြောပွဲတွင် ပထမဦးစွာ ကျောင်းအုပ်ဆရာမကြီး က အဖွင့်အမှာစကား ပြောကြားခဲ့ပြီး စားသုံးသူရေးရာဦးစီးဌာနမှ ဒုဦးစီးမှူး ဒေါ်ခင်ကြည်က စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များဖြင့် ဆောင်ရွက်နေမှုများ၊ စားသုံးသူကာကွယ်ရေးဥပဒေ ပေါ်ပေါက်လာပုံနှင့် ဥပဒေတွင် ပါဝင်သော စားသုံးသူ အဓိပ္ပါယ်နှင့် စားသုံးသူ အခွင့်အရေး (၈) ချက်၊ စားသုံးသူ၏ တာဝန် (၄) ချက်၊ စားသုံးသူနစ်နာဆုံးရှုံးမှုရှိလာလျှင် စားသုံးသူရေးရာဦးစီးဌာနသို့ တိုင်ကြားနိုင်သည့် ဖုန်းနံပါတ်၊ Call Center ဖုန်းနံပါတ်၊ Mobile Application၊ Facebook Page၊ www.doca.gov.mm website တို့သို့ တိုင်ကြားနိုင်ကြောင်း၊ စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးဌာန (CICC) မှလည်း စားသုံးသူများ၏ နစ်နာဆုံးရှုံးမှုများကို လက်ခံဖြေရှင်းပေးလျက်ရှိကြောင်း၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်ကြောင်း စသည့်အကြောင်းအရာများအား ဟောပြောဆွေးနွေးခဲ့ပါသည်။

          ထို့နောက် ဟောပြောပွဲသို့ တက်ရောက်လာကြသော ဆရာ၊ ဆရာမနှင့် ကျောင်းသား၊ ကျောင်းသူများအနေဖြင့် သိလိုသည်များကို အပြန်အလှန်ဆွေးနွေးမေးမြန်းခဲ့မှုအား ပြန်လည် ဖြေကြားခဲ့ပြီး အဆိုပါဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၁၇၀) ဦးခန့် တက်ရောက်ခဲ့ကြောင်း သတင်းရရှိပါသည်။

DOCA(မွန်)

             စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မုံရွာခရိုင် ဦးစီးမှူးရုံးမှ ဝန်ထမ်းများသည် (၁၈.၇.၂၀၂၂) ရက်နေ့တွင် ၊ ခရိုင်ပြန်ကြားရေးနှင့် ပြည်သူ့ ဆက်ဆံရေးဦးစီးဌာနက ကျင်းပပြုလုပ်သည့်  လူသုံးကုန်ထုတ်လုပ်မှု နည်းပညာသင်တန်းတွင်   စားသုံးသူကာကွယ်ရေးအသိပညာပေးဟောပြောပွဲ ကျင်းပပြုလုပ်ခဲ့ရာ  ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ အရာထမ်း၊ အမှုထမ်းများနှင့် သင်တန်းသား/ သူများ  တက်ရောက်ခဲ့ကြပါသည်။

             ထိုသို့ဆွေးနွေးရာတွင် ခရိုင်ဦးစီးမှူးက စားသုံးသူကာကွယ်ရေးဦးစီးဌာနအကြောင်း၊ စားသုံးသူကာကွယ်ရေးလုပ်ငန်းများ ပေါ်ပေါက်လာရခြင်းအကြောင်း၊ စားသုံးသူကာကွယ်ရေးဥပဒေပါ စားသုံးသူများ၏ အခွင့်အရေးနှင့်တာဝန်များအကြောင်း၊ စီးပွားရေးလုပ်ငန်းရှင်များ လိုက်နာရမည့် တာဝန်များအကြောင်း၊ စားသုံးသူရေးရာဦးစီးဌာနနှင့် အစားအသောက်နှင့် ဆေးဝါးကွပ်ကဲရေး ဦးစီးဌာနတို့၏ ရည်မှန်းချက်၊ မျှော်မှန်းချက်နှင့် လုပ်ဆောင်ချက်များ ကွဲပြားပုံအကြောင်း၊ ပြည်သူများအနေဖြင့် မိမိတို့ရွေးချယ်အသုံးပြုလိုက်သော ကုန်စည်ကြောင့်ဖြစ်စေ၊ ဝန်ဆောင်မှု ကြောင့်ဖြစ်စေ ထိခိုက်နစ်နာမှုများရှိပါက မိမိတို့၏ စားသုံးသူအခွင့်အရေးကို အဆုံးရှုံးမခံဘဲ တိုင်ကြားကြစေလိုကြောင်း၊ ပြည်သူအားလုံးကိုတိုင်ကြားသည့်အလေ့အကျင့်များရှိစေလိုကြောင်း၊ တိုင်ကြားရုံသာမက မိမိတို့ဘက်မှလည်း လိုက်နာရမည့် တာဝန်များကို လိုက်နာကြရန် လိုအပ်ကြောင်း၊ ကုန်စည်(သို့)ဝန်ဆောင်မှုနှင့် ပတ်သက်၍ နစ်နာဆုံးရှုံးမှုများကြောင့် တိုင်ကြား  လာသော ကိစ္စရပ်များအား ဌာနမှညှိနှိုင်းပေးသဖြင့် အဆင်ပြေသွားသည့် အမှုကိစ္စများ များစွာရှိပါကြောင်း၊ တိုင်ကြားနိုင်သည့်နည်းလမ်းများ၊ တိုင်းဒေသကြီး/ ပြည်နယ်များအလိုက် ဆက်သွယ်နိုင်သည့် ဖုန်းနံပါတ်များ၊ ပြည်သူတိုင်းသည် စားသုံးသူများဖြစ်၍ စားသုံးသူတိုင်းမှာ စားသုံးသူအခွင့်အရေးရှိပါကြောင်း အကျယ်တဝင့် ရှင်းလင်းဟောပြောခြင်းနှင့် ဒု-ဦးစီးမှူး ဒေါ်ဇင်မာနွယ်က စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသား ဖော်ပြခြင်းများနှင့် စပ်လျဉ်း၍ ကုန်စည်းအမျိုးအစားအလိုက် သတ်မှတ်ချက်များနှင့်အညီ ဆောင်ရွက်ရသည်များကို  ရှင်းလင်းဆွေးနွေးခဲ့ရာ  ဝန်ထမ်းများနှင့် သင်တန်းသား/ သူများမှ စိတ်ပါ ဝင်စားစွာဖြင့်သိရှိလိုသည်များကိုမေးမြန်းခြင်း၊ ပြန်လည်ဖြေကြားခြင်းနှင့် လက်ကမ်းစာစောင်များ  ဖြန့်ဝေခြင်းများ ပြုလုပ်ခဲ့ကြောင်း သတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံနှင့် ဝန်ထမ်းများသည် ၂၂.၇.၂၀၂၂ ရက်နေ့တွင် ဘီးလင်းမြို့၊ ဘိုးရာဇာရပ်ကွက်နှင့် ရွှေလှေကျေးရွာတို့ရှိ ဆီစက်ပိုင်ရှင် (၃) ဦးနှင့် တွေ့ဆုံ၍ ဒေသတွင်း၌ စိုက်ပျိုးထွက်ရှိလာမည့် ဆီထွက်သီးနှံကြိတ်ခွဲနိုင်မှုအခြေအနေနှင့် ပတ်သက်၍ ဆွေးနွေးခဲ့ပါသည်။

              ထိုသို့ ဆွေးနွေးရာတွင် ဘီးလင်းမြို့နယ်တာဝန်ခံက လုပ်ငန်းရှင်များအနေဖြင့် စိုက်ပျိုးထွက်ရှိသော ဆီထွက်သီးနှံများအား လုံလောက်စွာ  ကြိတ်ခွဲနိုင်မှု ရှိ/မရှိ၊ တစ်ရက်လျှင် ကြိတ်ခွဲနိုင်မှု ပိဿာချိန်၊ ကုန်ကြမ်းဈေးနှုန်းနှင့် ကုန်ချောဈေးနှုန်း တွက်ချေကိုက်မှု ရှိ/မရှိတို့အား မေးမြန်းဆွေးနွေးခဲ့ပြီး မြေပဲဆံများတွင် ဖြစ်ပွားတတ်သော မှိုရောဂါများအား ဖြစ်ပွားမှု မရှိစေရန်  ဂရုစိုက်ဖို့လိုအပ်ကြောင်း၊ ဆီအရည်အသွေးထိန်းသိမ်းရန် လိုအပ်ကြောင်းတို့အား ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

           စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံး၊ ခရိုင်ဦးစီးမှူးနှင့် တိုင်းဒေသကြီးဦးစီးမှူးရုံးမှ ဦးစီးအရာရှိ (၁)ဦး၊ တိုင်းဒေသကြီး ရေနံထွက် ပစ္စည်းကြီးကြပ်စစ်ဆေးရေးဦးစီးဌာနမှ လက်ထောက်ညွှန်ကြားရေးမှူး (၁) ဦးတို့သည် ၂၀၂၂ ခုနှစ်၊ ဇူလိုင်လ(၁၄) ရက်နေ့ တွင် မုံရွာမြို့၊ ထန်းတောရပ်ကွက်ရှိ ပြည်မြန်မာစိုး စက်သုံးဆီအရာင်းဆိုင်သို့ ကွင်းဆင်းစစ်ဆေးခဲ့ပါသည်။

          ထိုသို့ ကွင်းဆင်းစစ်ဆေးရာတွင် စားသုံးသူရေးရာဦးစီးဌာန၊ မုံရွာခရိုင်ဦးစီးမှူးက စက်သုံးဆီ တင်သွင်းရောင်းချဖြန့်ဖြုးသည့် လုပ်ငန်းရှင်အား စားသုံးသူကာကွယ်ရေးဥပဒေပါ စားသုံးသူအခွင့်အရေး နှင့် တာဝန်များ၊ စီးပွားရေးလုပ်ငန်းရှင်၏ တာဝန်များပြောကြားခဲ့ပြီး တရားမဝင်သွင်း ကုန် စက်သုံးဆီ၊ ချောဆီများအား တရားမဝင်ကုန်သွယ်မှု တိုက်ဖျက်ရေးအထူးဖွဲ့ စစ်ဆေးဖော်ထုတ်အရေးယူနေကြောင်း၊ စက်သုံးဆီသယ် ဆောင်မှုများအား စောင့်ကြည့်စစ်ဆေးခြင်း၊ မြို့နယ်အလိုက် စက်သုံးဆီအရောင်းဆိုင် အရေအတွက်နှင့်  လက္ကားဝယ်ယူသည့် ကုမ္ပဏီစာရင်းများ ကောက်ယူနေကြောင်း၊ လုပ်ငန်းရှင်များ အနေဖြင့် တရားမဝင်စက်သုံးဆီ၊ ချောဆီများအား တင်သွင်း ဖြန့်ဖြူးရောင်းချပါက အရေးယူဆောင်ရွက်သွားမည်ဖြစ်ကြောင်း ၊ စက်သုံးဆီများကို ရေနံထွက် ပစ္စည်းကြီးကြပ်စစ်ဆေး ရေးဦးစီးဌာနက နေ့စဉ်ထုတ်ပြန်ထားသော သတ်မှတ်ရည်ညွှန်းဈေးထက် ပိုမိုရောင်းချခြင်းမပြုရန်နှင့် ညွှန်ကြားချက်များအတိုင်း ရောင်းချကြရန် ပြောကြားဆွေးနွေးခဲ့ပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုးနှင့် ဒေါ်ချိုဝေလွင် (ဒု-ဦးစီးမှူး) တို့သည် ကျေးလက်ဒေသဖွံ့ဖြိုးရေးဦးစီးဌာနမှ ဦးစိုးလွင်(ဒု-ဦးစီးမှူး)၊ ကျေးရွာအုပ်ချုပ်ရေးမှူး ဦးစောလတ်တို့နှင့်ပူးပေါင်းပြီး း(၂၂.၇.၂၀၂၂) ရက်နေ့တွင် ချောက်မြို့နယ် ဂွေးပင်ကြီးကျေးရွာအုပ်ချုပ်ရေးမှူးအိမ်၌ ကျေးလက်နေပြည်သူများသိသင့်သည့် စားသုံးသူကာကွယ်ပေးရေးအကြောင်း သိကောင်းစရာများဆွေးနွေးခြင်းနှင့် ကျေးရွာရှိအိမ်ဆိုင်များတွင် စားသုံးရန်မသင့်သောကြောင့် တားမြစ်ထားသော အစားအစာများ၊ မှိုတက်နေသော  သက်တမ်းလွန်နေသော အစားအစာများနှင့် ကုန်အညွှန်းအမှတ်အသားမပြည့်စုံသော အစားအစာများ ရောင်းချမှု ရှိ/မရှိ စျေးကွက်စောင့်ကြည့် စစ်ဆေးခဲ့ပါသည်။

           ချောက်မြို့နယ်တာဝန်ခံ ဒေါ်မြတ်မြတ်မိုး း(ဌာနခွဲစာရေး) မှ စားသုံးသူကာကွယ်ရေးဥပဒေ - ၂၀၁၉ ပါ စားသုံးသူအခွင့်အရေး (၈ )ချက်နှင့် တာဝန် (၄) ချက်၊ စီးပွားရေးလုပ်ငန်းရှင်များ၏ တာဝန်တားမြစ်ချက်များ၊ ပြစ်မှု/ ပြစ်ဒဏ်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူများက တောင်းဆိုနိုင်သည့် အခွင့်အရေးများအား ရှင်းလင်းဆွေးနွေးခဲ့ပါသည်။

            ဒေါ်ချိုဝေလွင် (ဒု-ဦးစီးမှူး) မှ စားသုံးသူများနစ်နာဆုံးရှုံးမှုများဖြစ်‌ပေါ်ပါက မကွေးတိုင်းဒေသကြီး ဦးစီးမှူးရုံး၌ ဖွင့်လှစ်ထားသော Consumer Information and Complaint Center (CICC) သို့လည်းကောင်း၊ Facebook စာမျက်နှာများတွင် စားသုံးသူရေးရာဦးစီးဌာန Page တွင်လည်းကောင်း၊ Mobile Application များတွင် DOCA Myanmar နှင့် Consumer Call No,1535 သို့ Mytel, Oreedoo, Telenor, MPT Sim Card  များဖြင့် ခေါ်ဆိုတိုင်ကြားနိုင်သလို၊ မြို့နယ်တာဝန်ခံများထံလည်း ဆက်သွယ်တိုင်ကြားနိုင်ကြောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို ကျယ်ကျယ်ပြန့်ပြန့်သိရှိလိုပါက www.doca. gov.mm သို့ ဝင်ရောက်လေ့လာနိုင်ကြောင်း အသိပညာပေးဆွေးနွေးခဲ့ပါသည်။

DOCA(မကွေး)