ဧရာဝတီတိုင်းဒေသကြီး၊ မအူပင်ခရိုင်အနေဖြင့် ဆန်စပါးကဏ္ဍကို ဦးစားပေးဆောင်ရွက်လျက်ရှိရာ မွေးမြူရေးကဏ္ဍနှင့် ငါးလုပ်ငန်းကဏ္ဍကိုလည်း တိုးတက်အောင်မြင်အောင် ဆောင်ရွက်လျက်ရှိပါသည်။
စနစ်သစ်ငါးတန်မွေးမြူရေးစီမံကိန်းကို ဧက(၉၀၀)ပေါ်တွင် အကောင်အထည်ဖော် ဆောင်ရွက်လျက်ရှိပြီး ရေရရှိမှုအနေဖြင့် ရွှေလောင်းချောင်းမကြီးမှ တိုက်ရိုက်သွယ်ယူ၍ ရေကို သဘာဝအတိုင်း ဆင်းသက်စေပြီး ဘီတာအကောင်ရေ တစ်သိန်းမှစ၍ စုဆောင်းမွေးမြူခဲ့ရာ တစ်နှစ်ပတ်လုံး မျိုးဖောက်နိုင်ရေးအတွက် စနစ်သစ်ငါးတန်မွေးမြူရေး လုပ်ငန်းစဉ်များအတိုင်း မျိုးဖောက်ကန် အရွယ်အစားအလိုက် ငါးမွေးကန် ရေဆိုးထုတ်ခြင်း၊ အောက်စီဂျင်လွှတ်ပေးခြင်း၊ အလိုအလျောက် အစာကျွေးခြင်းစနစ်တို့ဖြင့် လုပ်ကိုင်ဆောင်ရွက်လျက်ရှိကြောင်း၊ ပြည်တွင်းဈေးကွက်လိုအပ်ချက်ကို ဖြည့်ဆည်းနိုင်သည့်အပြင် ပြည်ပက နှစ်သက်သော ဈေးကွက်ဝင် ဈေးကောင်းရ အရည်အသွေးကောင်းသော ငါးတန်များထုတ်လုပ်လျက်ရှိနေကြောင်း လေ့လာတွေ့ရှိခဲ့ပါသည်။
စနစ်သစ်ငါးတန်မွေးမြူရေးသည် စီမံကိန်းလုပ်ငန်းအစတွင် ကန်ကြပ်မွေးမြူရေးစနစ်ကို အသုံးပြုခဲ့ပြီး တစ်မီတာပတ်လည်တွင် (၃၅)ကောင်နှုန်းဖြင့် စတင်မွေးမြူသည်မှစ၍ (၁၀၀)ဂရမ်အောက်ငါးများအတွက် ပြည်တွင်းထုတ် ထူးသစ်ရေပေါ်စာ နှစ်ရာခိုင်နှုန်း၊ (၁၀၀)ဂရမ်အထက် အရွယ်တက်လာပါက လေးရာခိုင်နှုန်းမှ ခြောက်ရာခိုင်နှုန်းအထိ အစားတိုးကျွေးခြင်း၊ (၁၀၀)ဂရမ်နှင့် (၂၀၀)ဂရမ်ကြားတွင် ထူးသစ်ရေပေါ်စာကို တစ်ရာခိုင်နှုန်းမှ နှစ်ရာခိုင်နှုန်းအထိ လျော့ကျွေးခြင်းစသည်ဖြင့် ငါး၏ ကြီးထွားနှုန်းနှင့် အာဟာရပြည့်ဝသောငါးတန်များ ရရှိရန်အတွက် အထူးအလေးထား ဆောင်ရွက်လျက်ရှိသည်ကို လေ့လာတွေ့ရှိရပါသည်။
၂၀၂၂-၂၀၂၃ ခုနှစ်တွင် စနစ်သစ်ငါးတန်မွေးမြူရေးစီမံကိန်းမှာ မြေသားကန်များထက် ပိုမိုကောင်းမွန်သော သံကန်(၉၀)နှင့် စနစ်သစ်ရေဆိုးထုတ်စနစ်၊ သဘာဝရေဖြည့်သွင်းခြင်းစနစ်နှင့် ဥမှစ၍ ဈေးကွက်ဝင် ငါးတန်များ ရရှိလာသည်အထိ organic ငါးတန်များ ထုတ်လုပ်ရောင်းချနိုင်ရေးအတွက် ငါးတန်ဈေးကွက်ကို ရန်ကုန်သို့ နေ့စဉ်ပိဿာ(၁၅၀၀၀) တင်ပို့ဈေးကွက်ရရှိနေပြီး၊ ငါးတန်တစ်ပိဿာလျှင် (၄၀၀၀)ကျပ် ဈေးကွက်ရရှိနေကြောင်း ငါးမွေးမြူရေးတာဝန်ခံပြောပြချက်အရ သိရှိခဲ့ရပါသည်။ (၈၀)ကျပ်သား၊ (၉၀)ကျပ်သားရှိ ငါးတန်များကို ရန်ကုန်တွင် ငါးတန်ခြောက် ပြုလုပ်ရောင်းချလျက်ရှိနေကြောင်းနှင့် မွေးစမှ (၈)လအတွင်း ကန်ဖော်ရောင်းချနိုင်သည့် ဈေးကွက်ဝင်ငါးတန်များ ရရှိကြောင်းနှင့် ပြည်ပဈးကွက်ရရှိနိုင်ရေးအတွက်အအေးခန်းစက်ရုံနှင့် အသားလွှာစက်ရုံစီမံကိန်းများ လုပ်ကိုင်လျက်ရှိသည့်အပြင်၊ ငါးတန်မွေးမြူရေး ငါးသားပေါက်မှစ၍ ကုန်ချောထုတ်လုပ်နိုင်ရန်အတွက် လျှပ်စစ်ဓာတ်အားလိုအပ်ချက်အပေါ် ငါးမွေးကန်စက်ရုံ၊ အလုပ်ရုံနှင့် လူနေအိမ်၊ ရုံးခန်းများအတွက်ကိုယ်ပိုင် Gasifier မီးပေးနိုင်ရေး အစီအစဉ်များ ဆောင်ရွက်လျက်ရှိကြောင်း ရှင်းပြဆွေးနွေးခဲ့ပါသည်။
လျှပ်စစ်ဓာတ်အားထုတ်ပေးနိုင်ရေးအတွက် ရေဆိုးသန့်စင်နည်းစနစ်ကို အိန္ဒိယမှပညာရှင်များနှင့် ပူးပေါင်း ဆောင်ရွက်လျက်ရှိပြီး Gasifier မီးပေးနိုင်ရေး စီမံကိန်းပြီးဆုံးပါက နေ့စဉ် Global Earth Argo & Aqua public Co.,Ltd စနစ်သစ် မြစ်ငါးတန်မွေးမြူရေး လုပ်ငန်းခွင်တစ်စု လုံးကို အချိန်ပြည့်လျှပ်စစ်ပေးနိုင်ရုံသာမက ပိုလျှံသော လျှပ်စစ်ဓာတ်အားများကို နိုင်ငံတော်၏ မဟာဓာတ်အားလိုင်းသို့ ချိတ်ဆက်ပေးပို့ ဆောင်ရွက်သွားနိုင်မည့်အခြေအနေကောင်းများကို လေ့လာတွေ့ရှိခဲ့ရပါသည်။ သို့ဖြစ်ပါ၍ Global Earth Argo & Aqua public Co.,Ltd မှ ငါးတန် မွေးမြူရေးအောင်မြင်မှု အခွင့်အလမ်းကောင်းများ၊ တန်ဖိုးမြှင့်ထုတ်လုပ်မှုအပေါ် ဈေးကွက်ခိုင်မာမှုရှိခြင်း၊ သဘာဝပတ်ဝန်းကျင်ထိခိုက်မှုမရှိသလောက်နည်းပါးခြင်း၊ သဘာဝပတ်ဝန်းကျင်ကို မထိခိုက်စေသော Gasifier မီးပေးနိုင်ရေးစသည့် စီးပွားရေးအခြေခံ ကောင်းများ၊ လူမှုပတ်ဝန်းကျင်ကောင်းများအား တွေ့ရှိရပါသည်။
လက်ရှိမြန်မာနိုင်ငံအနေဖြင့် ပြည်ပသို့ ငါး၊ ပုဇွန်အပါအဝင် ရေထွက်ကုန်ပစ္စည်းများ တင်ပို့ နေမှုပမာဏသည် အိမ်နီးချင်းနိုင်ငံတို့၏ တင်ပို့မှုပမာဏထက် နည်းပါးနေသောကြောင့် ပြည်ပဝယ်ယူမှုပမာဏမြှင့်တင်ရာ တွင် သဘာဝမြစ်ချောင်းများမှ ငါးများကို ဖမ်းစီးရောင်းချခြင်းထက် စနစ်သစ်မွေးမြူရေးနည်းလမ်းများကို အောင်မြင်စွာဆောင်ရွက်ကာ တင်ပို့သင့်ကြောင်း တင်ပြလိုက်ရပါသည်။
DOCA (ဧရာဝတီ)
