သတင်းနှင့် လှုပ်ရှားမှုများ

     မရမ်းကုန်းမြို့နယ်၊ အမှတ်(၈၀၃)၊ မြို့ဟောင်း(၃) လမ်း၊ (၁) ရပ်ကွက်တွင် Online Sale ရောင်းချမှုနှင့် စပ်လျဉ်း၍ မှတ်ပုံတင်လျှောက်ထားသည့် ရှိုင်း ကလေးသင်ထောက်ကူအရုပ်နှင့် စာရေးကိရိယာအရောင်းဆိုင်သို့  စားသုံးသူရေးရာဦးစီးဌာန၊ ရန်ကုန်အနောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိနှင့် အဖွဲ့သည် (၂၂.၇.၂၀၂၅) ရက်နေ့ နေ့လည်(၁၂:၀၀) နာရီအချိန်တွင် Online Sale ရောင်းချမှုနှင့် စပ်လျဉ်း၍ မြေပြင်ကွင်းဆင်းစစ်ဆေးခဲ့ပါသည်။

          ထိုသို့ဆောင်ရွက်ရာတွင် စစ်ဆေးရေးအရာရှိမှ Online စနစ်နှင့် ရောင်းချခြင်းလုပ်ငန်းနှင့် ပတ်သက်၍ အချက်(၁၈) ချက်နှင့် ကိုက်ညီမှု ရှိ/မရှိ နှင့် မှတ်ပုံတင်လက်မှတ်ရရှိသူ၏ တာဝန်များနှင့် စပ်လျဉ်း၍ လိုက်နာဆောင်ရွက်ရမည့် အချက်များအကြောင်း၊ စီးပွားရေးလုပ်ငန်းရှင်လိုက်နာရမည့် တာဝန်များအကြောင်းတို့ကို စစ်ဆေးရေးအရာရှိမှ အသိပညာပေး ကွင်းဆင်းစစ်ဆေးခဲ့ကြောင်း သိရှိရပါသည်။

DOCA (ရန်ကုန်)

 ကျောက်ဆည်ခရိုင် ၊ စားသုံးသူရေးရာဦးစီးဌာနမှဦးဆောင်၍  မြို့နယ်ပြည်သူ့ကျန်းမာရေး ဦးစီးဌာန၊မြို့နယ်စည်ပင်သာယာရေးအဖွဲ့တို့ပူးပေါင်းပြီး ဇူလိုင်လ(၁၈)ရက်နေ့တွင်  စဉ့်ကိုင်မြို့နယ် ရှိ ရတနာတော်ဝင် နှင့် လမင်း ကဖေးလက်ဖက်ရည်ဆိုင် ၊ စားသောက်ဆိုင်များအား ကွင်းဆင်း စစ်‌ဆေးခဲ့ကြောင်း သိရှိရပါသည်။ ထို့သို့စစ်ဆေးရာတွင် အစားအသောက်ရောင်းချသည့် လုပ်ငန်းရှင် များအား အစားအသောက် ပြုပြင်ရောင်းချသည့် နေရာများ သန့်ရှင်းသပ်ရပ်စွာထားရှိရန် ၊ အစားအသောက်ကိုင်တွယ်သူများအနေဖြင့် တစ်ကိုယ်ရေသန့်ရှင်းမှုရှိရန်၊ ဝန်ထမ်းများ ကျန်းမာရေး‌ ဆေးစစ်မှုများခံယူရန် ၊ မိမိတို့ဆိုင်မှ ပေးအပ်ထားသည့် ဝန်ဆောင်မှုနှင့်စပ်လျဉ်းပြီး စားသုံးသူအား လုံလောက်သည့် သတင်းအချက်အလက်များ ပြည့်စုံမှန်ကန်စွာ အသိပေးပြောကြားရန်နှင့် ရောင်းချသည့် စားသောက်ဖွယ်ရာများ၏ အမျိုးအစား ၊ အရွယ်အစား(Size)ပမာဏအလိုက် စျေးနှုန်းအား ဖွင့်လင်းမြင်သာစွာ ကြိုတင်အသိပေးဖော်ပြထားရန်စသည်တို့အား စစ်ဆေးခဲ့ကြောင်း သိရှိရပါသည်။

DOCA(မန္တလေး)

  ဇူလိုင်လ(၁၈)ရက်နေ့တွင် စားသုံးသူ‌ရေးရာဦးစီးဌာန ၊ ကျောက်ဆည်ခရိုင်ဦးစီးမှူးရုံး၌ ကျောက်ဆည်ခရိုင်အတွင်းရှိ စားအုန်းဆီ ရည်ညွှန်းစျေးဖြင့် ရောင်းချသည့် ဆီဆိုင်လုပ်ငန်းရှင် များနှင့်တွေ့ဆုံခဲ့ကြောင်း ၊ ဆွေးနွေးပွဲ၌ ကျောက်ဆည်ခရိုင်ဦးစီးမှူးက ပြောကြားရာတွင် ကျောက်ဆည်ခရိုင်အတွင်း လက်ကားကိုယ်စားလှယ်များ ၊ လက်လီအရောင်းဆိုင်များ အနေဖြင့် စားအုန်းဆီ ဖြန့်ဖြူးရောင်းချရာတွင် စားသုံးသူပြည်သူများသို့ တိုက်ရိုက်ရောင်းချစေရေး ၊ ဆီအရောင်းဆိုင်များထဲမှ သက်ဆိုင်ရာ ရပ်ကွက်/ကျေးရွာ အဖွဲ့ဝင်များက အိမ်ထောင်စုများအတွက် စာအုပ်များဖြင့် ဆီထုတ်ယူရာတွင် ရပ်ကွက် ၊ ကျေးရွာ ကိုယ်စားပြု တစ်ဦးတစ်ယောက်ထဲ ဝယ်ယူ ခြင်းများကို ခွင့်မပြုစေရေး ၊ သက်မှတ်ရည်ညွှန်းဈေးနှုန်းထက် ကျော်လွန်၍ ဈေးနှုန်းမြှင့်တင် ရောင်းချခြင်းမရှိဘဲ ဈေးကွက်အတွင်း ညွှန်ကြားချက်နှင့်အညီ ဖြစ်သင့်ဖြစ်ထိုက်သည့် လက်လီ ဈေးနှုန်းဖြင့် ရောင်းချစေရေးစသည့် ညွှန်ကြားချက်များအား ကျောက်ဆည်ခရိုင်အတွင်း စားအုန်းဆီဖြန့်ဖြူးရောင်းချလျက်ရှိသော လက်လီ/လက်ကား ကိုယ်စားလှယ်များအား ခေါ်ယူ၍ ညွှန်ကြားချက်များအား ချပြဆွေးနွေးပြီး တက်ရောက်လာသည့် လုပ်ငန်းရှင်(၄၁)ဦးအား သိရှိကြောင်းလက်မှတ်များ ရေးထိုးစေခဲ့ကြောင်း သတင်းရရှိပါသည်။

DOCA(မန္တလေး)

     ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် လူသုံးများသော ဆေးဝါးများ ဆေးဆိုင်များတွင် ဆေးဝါး များ ပြတ်လပ်မှုရှိ/မရှိ ဈေးကွက်စောင့်ကြည့်စစ်ဆေးခြင်းများကို ရန်ကုန်တောင်ပိုင်း ခရိုင်ဦးစီး မှူးရုံး၏ ညွှန်ကြားချက်နှင့်အညီ  ဇူလိုင်လ (၂၂)ရက်နေ့၊ နံနက် (၀၉:၀၀)နာရီအချိန်တွင် ပူးပေါင်းအဖွဲ့မျာဖြင့် ကွင်းဆင်းစိစစ်ခဲ့ကြောင်း သိရှိရသည်။

    ထိုသို့ ကွင်းဆင်းစိစစ်ခြင်းများ ဆောင်ရွက်ခဲ့ရာတွင် ကွမ်းခြံကုန်းမြို့နယ် ပြည်သူ့ ကျန်းမာရေးဦးစီးဌာနမှ အမျိုးသမီးကျန်းမာရေးဆရာမ ဒေါ်သန်းသန်းစိုး၊ မြို့နယ်စည်ပင် သာယာရေးအဖွဲ့မှ ဈေးတာဝန်ခံ ကျန်းမာရေးမှူး(၃) ဦးထွန်းထွန်း၊ မြို့နယ်စားသုံးသူရေးရာ ဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပါဝင်သော ပူးပေါင်း အဖွဲ့သည် ကွမ်းခြံကုန်းမြို့နယ် ဈေးပိုင်းရပ်ကွက်အတွင်း ရောင်းချသော ဆေးဆိုင်များ ဖြစ်သည့် ကောင်းမြတ်ချမ်းသာ ဆေးဆိုင်၊ ရာပြည့်ဆေးဆိုင်၊ ကံကြီးမကျီးရပ်ကွက်တွင် ရောင်းချသော ဦးစံရွှေ+ ဒေါ်တင်အိဆေးဆိုင်၊ သစ်ဆန်းဆေးဆိုင်တို့တွင် လူသုံးများသော ဆေးဝါးများဖြစ်သည့် ဆီးချိုဆေး၊ သွေးတိုးကျဆေး၊ သွေးကျဲဆေး၊ နှလုံးဆေး၊ အသဲဆေး၊ အာရုံကြောဆေးများ၊ လိမ်း ဆေးများနှင့် ဆရာဝန်ညွှန်ကြားချက်မလိုသော အိမ်သုံးဆေးများ ပြတ်လပ်မှုရှိ/မရှိ ကွင်းဆင်းစိ စစ်ခဲ့ကြသည်။

   ထို့နောက် စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးက ယခုကာလ သည် မိုးရာသီဖြစ်သည့်အတွက် လူအများ ရာသီဥတု အပြောင်းအလဲကြောင့် ဖျားနာခြင်း၊ ဝမ်း သွားခြင်း၊ ကလေးများ သွေးလွန်တုပ်ကွေးရောဂါများ ဖြစ်ပွားတတ်သဖြင့် ဆေးဝါးများ ပြတ်လပ် မှုမရှိစေရန်၊ ဆေးဝါးများအား ဈေးနှုန်းမြှင့်တင် ရောင်းချခြင်းများ မပြုလုပ်ရန်၊ ဈေးကစားရန် ရည်ရွယ်၍ သိုလှောင်ထားခြင်းများ မပြုလုပ်ကြရန် ဆိုင်ပိုင်ရှင် တာဝန်ခံ လုပ်ငန်းရှင်များနှင့် တွေ့ဆုံဆွေးနွေး ကွင်းဆင်းစိစစ်ခဲ့ကြောင်း သိရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး၊ သန်လျင်ခရိုင်၊ သန်လျင်မြို့နယ် စည်ပင်သာယာမြို့မဈေး အတွင်းရှိ စာအုန်းဆီကိုယ်စားလှယ်ဆိုင်တွင် စားအုန်းဆီ လက်လီ/လက်ကား ဖြန့်ဖြူးရောင်းချ နေမှု အခြေအနေအား ဇူလိုင်လ (၂၁)ရက်နေ့၊ နံနက် (၁၀:၃၀) နာရီအချိန်တွင် ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရ သည်။

    ထိုသို့ ကွင်းဆင်းစစ်ဆေးခဲ့ရာတွင် ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး ဦးအောင်စိုးမိုးနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ ဝန်ထမ်းများ ပူးပေါင်းအဖွဲ့ဖြင့် သန်လျင်မြို့နယ်၊ စည်ပင်သာယာမြို့မဈေးအတွင်းရှိ စားအုန်းဆီကိုယ်စားလှယ် ဦးအောင်ရင်၏ ကုန်စုံဆိုင်တွင် စားအုန်းဆီခွဲတမ်းရရှိသည့်အပေါ် ပြန်လည်ဖြန့်ဖြူးရောင်းချနေသည့် လက်လီ/ လက်ကား ပေပါ၊ ပိဿာစာရင်းနှင့် လက်လီ/လက်ကားဈေးနှုန်းတို့အား စာရင်းကောက်ယူခဲ့ပြီး စားအုန်းဆီ ကိုယ်စားလှယ်များ အနေဖြင့် စားအုန်းဆီ ဝယ်ယူရာတွင် စားအုန်းဆီ (၁)ပိဿာ ဒေသတွင်း သယ်ယူစရိတ် ၂%အမြတ်နှင့် လက်လီပြန်လည်ဖြန့်ဖြူးသည့် ဈေးနှုန်းများအား စစ်ဆေးခဲ့ပြီး ဆီများအား ဈေးကစားရန်ရည်ရွယ်ချက်ဖြင့် သိုလှောင်ထားခြင်းများ မပြုလုပ် ကြရန်နှင့် သတ်မှတ်ရည်ညွှန်းဈေးအပေါ် နှစ်ရာခိုင်နှုန်း အမြတ်ထက်မပိုသော ဈေးနှုန်းဖြင့်သာ စားသုံးသူပြည်သူများထံသို့ ပြန်လည်ဖြန့်ဖြူး ရောင်းချပေးကြရန် စားသုံးသူကာကွယ်ရေး အသိပညာပေး ဆွေးနွေးပြောကြား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)