သတင်းနှင့် လှုပ်ရှားမှုများ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေကြီး၊ ပခုက္ကူခရိုင်ဦးစီးမှူးရုံးမှ ဝန်ထမ်းများသည် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးအတွက် စိုက်ပျိုးတောင်သူများအား တွေ့ဆုံဆွေးနွေးအသိပညာပေး လုပ်ငန်းများလည်း ဆောင်ရွက်လျက်ရှိပါသည်။ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွန်မှုဖြင့် (၂၁-၅-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးဇော်ထွန်းဦးနှင့် ဝန်ထမ်းများသည် ပခုက္ကူမြို့နယ်၊ ကျွန်းညိုကြီးကျေးရွာသို့သွားရောက်၍ စိုက်ပျိုးတောင်သူများနှင့်တွေ့ဆုံပြီး သီးနှံစိုက်ပျိုးထွက်ရှိမှုနှင့် ဈေးကွက်အခြေအနေကို မေးမြန်းဆွေးနွေး ခဲ့ပါသည်။

     ကျွန်းညိုကြီးကျေးရွာသည် စိုက်ပျိုးရေးကိုအဓိကထားပြီးလုပ်ကိုင်ကြောင်း၊ ယခင်က စိုက်ပျိုးတောင်သူများပြီး စိုက်ဧကများသော်လည်း ယခုအချိန်တွင် မြစ်ရေတက်ချိန်၌ ရေတိုက်စားခြင်းကြောင့် ကမ်းပါးများပြိုကြ၍ စိုက်ဧကများလျော့နည်းပြီး စိုက်ပျိုးတောင်သူ နည်းပါးသွားကြောင်း၊ တောင်သူများအနေဖြင့် ငရုတ်၊ ကုလားပဲ၊ ဆေးရွက်ကြီးစိုက်ပျိုးမှုများပြီး ငရုတ်သီးနှံကို ဒေသစီးပွားအဖြစ် စိုက်ဧကအများဆုံးစိုက်ပျိုးကြောင်း၊ ငရုတ်သီးနှံကို စိုက်ပျိုးတောင်သူ(၃၀)ဦး၊ စိုက်ဧက(၅၀)ခန့်စိုက်ပျိုးကြောင်း၊ မြေအောက်ရေအပြင် ရေသွင်းစနစ်ဖြင့် စိုက်ပျိုးရကြောင်း၊ စက်တင်ဘာလတွင် စတင်စိုက်ပျိုးပြီး ဖေဖော်ဝါရီလတွင် ငရုတ်သီးမှည့်များကို စတင်ဆွတ်ခူးကြောင်း၊ ယခုနှစ်တွင် ရေမြေရာသီဥတုနှင့်ကိုက်ညီ၍ အထွက်နှုန်းကောင်းကြောင်း၊ (၁)ဧကလျှင် ငရုတ်သီးအစို တင်း(၆၀၀)၊ ပိဿာ(၄၈၀၀)၊ ငရုတ်သီးအခြောက် တင်း(၂၄၀)နှင့် ပိဿာ(၆၀၀)ခန့်တို့ထွက်ရှိကြောင်း သီးနှံပေါ်ချိန်၌ ဒေသတွင်းဈေးကွက်မှာ ငရုတ်သီးခြောက်(၁)ပိဿာလျှင် ကျပ်(၁၀၀၀၀)ဈေးဖြင့်ရောင်းချရ၍ (၁)ဧကဝင်ငွေမှာ ကျပ်သိန်း(၆၀)ခန့်ရရှိပြီး ကုန်ကျစရိတ်မှာ ကျပ်သိန်း(၃၀)ခန့်ရှိကြောင်း၊ ကျွန်းညိုကြီး ကျေးရွာရှိ ငရုတ်စိုက်တောင်သူများမှာ ယခုနှစ်၌ ငရုတ်ဈေးကွက်ကောင်း၍ အကျိုးအမြတ်များစွာရရှိကြောင်း၊ ထွက်ရှိသောငရုတ်သီးများကို ပခုက္ကူမြို့ပေါ်ရှိ ပွဲစားများက ကျေးရွာအထိဆင်း၍ဝယ်ယူကြောင်း တောင်သူဦးစိန်သန်းထံမှ သိရှိရပါသည်။

    ငရုတ်ဈေးကွက်အနေဖြင့် ငရုတ်သီးခြောက်(၁)ပိဿာလျှင် ၂၀၂၁ခုနှစ်တွင် ကျပ်(၃၀၀၀)၊ ၂၀၂၂ခုနှစ်တွင် ကျပ်(၄၅၀၀)ဖြင့်ရောင်းချရ၍ တောင်သူများအကျိုးအမြတ်နည်းခဲ့ကြောင်း၊ ယခု ၂၀၂၃ခုနှစ်တွင် ကျပ်(၁၀၀၀၀)ဈေးဖြင့်ရောင်းချရ၍ အကျိုးအမြတ်များစွာရရှိကြောင်း သိရှိရပါသည်။

   ကျွန်းညိုကြီးကျေးရွာရှိ စိုက်ပျိုးတောင်သူများအား ဒုတိယခရိုင်ဦးစီးမှူး ဦးဇော်ထွန်းဦးက ငရုတ်သီးနှံသည် မြန်မာတို့၏မီးဖိုချောင်တွင် မရှိမဖြစ်နေ့စဉ်သုံးစွဲလျက်ရှိသော အခြေခံစားကုန်တစ်မျိုးဖြစ်ပြီး စားသုံးမှုများပြား၍ တောင်သူများအနေဖြင့် သီးနှံရိတ်သိမ်းပြီး သိုလှောင်ချိန် တွင် အလွန်အရေးကြီးကြောင်း၊ ငရုတ်သီးကို အခြောက်လှမ်းပြီး သိမ်းဆည်းရာတွင် သီးနှံအစိုဓာတ်မကျန်ရှိအောင် အလေးထားဆောင်ရွက်သင့် ကြောင်း၊ သီးနှံသိမ်းဆည်းမှုနည်းမမှန်ပါက ငရုတ်သီးတွင် အာဖလာတော့ဆင်မှိုဆိပ်များစွာပါရှိ၍ စားသုံးသူများဘေးဥပဒ်ဖြစ်စေနိုင်သောကြောင့် စိုက်ပျိုးတောင်သူများက အလေးထားဆောင်ရွက်သင့်ပါကြောင်း ဆွေးနွေးခဲ့ပါသည်။

DOCA(မကွေး)

      စားသုံးသူရေးရာဦးစီးဌာန၊   မြစ်ကြီးနားခရိုင်ဦးစီးမှူးရုံးမှ   ဦးဘောမ်ဇုန်း(ရုံးအုပ်) သည်   ၂၃.၅.၂၀၂၃ ရက်နေ့ ၊ နေ့လယ် (၁၃:၃၀) နာရီမှ (၁၄:၀၀) အချိန်အထိ ဝိုင်းမော်မြို့၊ဝါးရှောင်ကျေးရွာအတွင်းရှိ မြစ်ရွှေလီ စက်သုံးဆီအရောင်းဆိုင်မှ ဝန်ထမ်း(၁၂)ဦးအား  စားသုံးသူကာကွယ်ရေး အသိပညာပေးဟောပြောပွဲ ပြုလုပ်ဆောင်ရွက်ခဲ့ပါသည်။

    အဆိုပါ‌ဟောပြောပွဲတွင် ဦးဘောမ်ဇုန်း(ရုံးအုပ်)မှ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ တားမြစ်ချက်နှင့် ပြစ်မှုပြစ်ဒဏ်များ၊ စားသုံးများအနေဖြင့် ကုန်စည်နှင့်ဝန်ဆောင်မှုများကို ဝယ်ယူသုံးစွဲရာတွင် နစ်နာဆုံးရှုံးမှုများရှိပါက စားသုံးသူ သတင်း ပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)  ဖွင့်လှစ်ထားရှိမှုနှင့် တိုင်ကြားပုံ နည်းလမ်း စသည်တို့ကို အကျယ်တဝင့် ရှင်းလင်းဟောပြောခဲ့ပြီး စားသုံးသူကာကွယ်‌ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

      စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးဘောမ်ဇုန်း (ရုံးအုပ်)နှင့်ဦးတင်မောင်ထွန်း(ရုံးအုပ်)တို့သည် ထုတ်ကုန်လုံခြုံစိတ်ချရမှုရှိစေရေးအတွက် ၂၂.၅.၂၀၂၃ရက်နေ့တွင် ဝိုင်းမော်မြို့နယ်၊ ဝူရမ်ကျေးရွာရှိ လက်လီလက်ကားရောင်းချနေသော  ကုန်စုံဆိုင်(၃)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

      ထိုသို့ဈေးကွက်စောင့်ကြည့်စစ်ဆေးရာတွင် Sunkitလိမ္မော်အချိုရည်၊ ဆင်းဒဝစ်နာနတ်ပေါင်မုန့်၊Nato ဝေဖာတို့အား  ကုန်အညွှန်းအမှတ်အသားများပြည့်စုံမှန်ကန်စွာဖော်ပြထားခြင်း ရှိ/မရှိစစ်ဆေးခဲ့ရာ ကုန်စည်အမျိုးအစားအလိုက် သတ်မှတ်ချက်နှင့်အညီ မြန်မာဘာသာဖြင့် သိသာထင်ရှားစွာ ဖော်ပြရမည့် အချက်များပြည့်စုံစွာပါရှိကြောင်း တွေ့ရှိရပြီး ကုန်စုံဆိုင်ပိုင်ရှင်များအား ကုန်အညွှန်းအမှတ်အသားပြည့်စုံမှန်ကန်မှုရှိသော ကုန်စည်များကိုသာ ဈေးကွက်အတွင်း ရောင်းချကြရန် ရှင်းလင်းဆွေးနွေးခဲ့၍ ကုန်အညွှန်းအမှတ်အသားဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

    ၂၀၂၃ခုနှစ်၊ မေလ(၁၈)ရက်နေ့၊ နံနက်( ၀၉:၃၀ )နာရီအချိန်တွင် စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံး အစည်းအဝေးခန်းမ၌ ကျင်းပပြုလုပ်သည့် ဝန်ထမ်းများ စားသုံးသူကာကွယ်ရေးဥပဒေနှင့်စပ်လျဉ်း၍ အသိပညာဗဟုသုတများတိုးပွားစေရန်ရည်ရွယ်၍ “စားသုံးသူ ကာကွယ်ရေးအသိပညာပေးဆွေးနွေးပွဲ” ခေါင်းစဉ်ဖြင့် Thursday Talk အသိ ပညာပေးဆွေးနွေးပွဲ ကျင်းပဆောင်ရွက်ခဲ့ရာ စုစုပေါင်း ဝန်ထမ်း(၁၄)ဦးတက်ရောက်ခဲ့ပါသည်။

    အဆိုပါ Thursday Talk အသိပညာပေးဆွေးနွေးပွဲတွင် စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဒု-ဦးစီးမှူး ဒေါ်နော်ကြူကြူက စားသုံးသူကာကွယ်ရေးအသိပညာပေးဆွေးနွေးရာတွင် စားသုံးသူများအခွင့်အရေး(၈)ချက်၊ စားသုံးသူများ လိုက်နာရမည့် တာဝန်(၄) ချက်၊ စီးပွား ရေးလုပ်ငန်းရှင်များ၏တာဝန်(၁၁)ချက်တို့အား တချက်ချင်းစီအသေးစိတ်ရှင်းလင်းခဲ့ပြီး ဆက်လက်၍ ကုန်စည်နှင့်ဝန်ဆောင်မှုနှင့်ပတ်သက်၍ စီးပွားရေးလုပ်ငန်းရှင်များမှအာမခံချက်ပေးရမည့်အချက်များ၊ ကုန်စည်သို့မဟုတ်ဝန်ဆောင်မှုနှင့် စပ်လျဉ်း၍ စားသုံးသူမှ တောင်းဆိုနိင်သည့်အခွင့်အရေး များ၊နစ်နာဆုံးရှံးမှုများရှိပါက တိုင်ကြားနိုင်သည့်နည်းလမ်းများ၊ ကုန်အညွှန်းအမှတ်အသားဖော်ပြ ခြင်းနှင့်စပ်လျဉ်း၍‌ဖော်ပြပါရှိရမည့်အချက်များ၊ တားမြစ်ချက်များနှင့် ပြစ်မှုပြစ်ဒဏ်များ၊  Online မှ တိုင်ကြားရာတွင် တိုင်ကြားမှုပုံစံအဆင့်ဆင့်တို့အား လက်တွေ့သရုပ်ပြခြင်း အစရှိသည်တို့ကိုရှင်း လင်းဆွေးနွေးခဲ့ရာ တက်ရောက်သည့် ဝန်ထမ်းများကလည်း သိလိုသည်များကို အပြန်အလှန် မေးမြန်းဆွေးနွေးခဲ့ကြပြီး (၁၀:၀၀)နာရီအချိန်တွင် Thursday Talk ဆွေးနွေးခြင်းအား အောင်မြင်စွာပြီးမြောက်ခဲ့ကြောင်းနှင့် Thursday Talk အသိပညာပေးဆွေးနွေးခြင်းဖြင့် ဝန်ထမ်းများ အသိ ပညာဗဟုသုတများတိုးပွားပြီး ဌာနလုပ်ငန်းများဆောင်ရွက်ရာတွင် အထောက်အကူဖြစ်ကြောင်း သိရှိရပါသည်။

DOCA(ကယား)

 စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံး လက်အောက်ရှိ ကျွန်းလှမြို့နယ်တာဝန်ခံရုံးအနေဖြင့် စားသုံးသူအခွင့်အရေးနှင့် အကျိုးစီးပွားကာကွယ်ရန်အတွက် စားသုံးသူကာကွယ်ရေးလုပ်ငန်းများ ကို ဆောင်ရွက်လျက်ရှိရာ (၁၆.၅.၂၀၂၃)ရက်နေ့၊ နံနက် (၀၉:၀၀)နာရီအချိန်တွင် မိတ်ဖက်ဌာနများဖြစ်ကြသည့် ကျွန်းလှမြို့နယ် စီမံအုပ်ချုပ်ရေးအဖွဲ့ မှ ဒု-ဦးစီးမှူး ဒေါ်ယွန်းမီမီထွန်း၊ ကျွန်းလှမြို့နယ် မီးသတ်ဦးစီးဌာနမှ ဒု-ဦးစီးမှူး ဦးသီဟမင်းခိုင်နှင့် စားသုံးသူရေးရာဦးစီးဌာန ကျွန်းလှမြို့နယ်တာဝန်ခံ အကြီးတန်းစာရေး ဒေါ်ဝေဝေအောင်တို့သည် ကျွန်လှမြို့ သစ်ရာမြိုင်ရပ်ကွက်ရှိ “KKH” စက်သုံးဆီ အရောင်းဆိုင်လုပ်ငန်းရှင်နှင့် သွားရောက်တွေ့ဆုံ ဆွေးနွေးခဲ့ပါသည်။

     ထိုသို့ကွင်းဆင်းစစ်ဆေးရာတွင် မြို့နယ်အတွက် စက်သုံးဆီ ပြတ်လပ်မှုမရှိစေရေးနှင့် ရာသီဥတု ပူပြင်းသည့်အတွက် မီးလောင်ကျွမ်းမှု မဖြစ်ပေါ်စေရေးတို့အတွက် အလေးထား ဆောင်ရွက်ရန်နှင့် စပ်လျဥ်း၍ စက်သုံးဆီ တင်သွင်းဖြန့်ဖြူးရောင်းချနေမှု အခြေအနေ၊ စက်သုံးဆီ ပြတ်လပ်မှု ရှိ/မရှိ၊ (PPRD) စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက  နေ့စဉ်သတ်မှတ်ထုတ်ပြန်ထားသော စက်သုံးဆီရည်ညွှန်းဈေးနှုန်းအတိုင်း ရောင်းချမှု ရှိ/ မရှိ၊ အချိန်အတွယ်နှင့် အလေးချိန်မှန်ကန်မှု ရှိ/မရှိတို့ကို  စစ်ဆေးရာ သတ်မှတ်ရည်ညွှန်းဈေးနှုန်းအတိုင်း ရောင်းချလျက်ရှိကြောင်း၊ အချိန်အတွယ်မှန်ကန်ကြောင်း စစ်ဆေးတွေ့ရှိရပါသည်။  စက်သုံးဆီ လုပ်ငန်းရှင်အနေဖြင့် တရားမဝင် စက်သုံးဆီ၊ ချောဆီများ တင်သွင်း ဖြန့်ဖြုးရောင်းချနေခြင်း စိစစ်တွေ့ရှိရပါက အရေးယူ ဆောင်ရွက်သွားမည် ဖြစ်ကြောင်းနှင့် ပြည်သူများ အဆင်ပြေချောမွေ့စွာ ဝယ်ယူနိုင်ရေးအတွက် စက်သုံးဆီအရောင်းဆိုင်များအား စက်သုံးဆီ ပြတ်လတ်မှု မရှိစေရေးအတွက် ပုံမှန် ဖွင့်လှစ်ရောင်းချနိုင်ရေး သတ်မှတ်ဈေးနှုန်းထက် ပိုမိုရောင်းချခြင်းမပြုဘဲ  ဌာနက ထုတ်ပြန်ထားသော စီးပွားရေးလုပ်ငန်းရှင်များ လိုက်နာရမည့် ညွှန်ကြားချက်များအတိုင်း လိုက်နာဆောင်ရွက်ကြရန်နှင့် စီးပွားရေးလုပ်ငန်းရှင်များ လိုက်နာဆောင်ရွက်ရမည့် တာဝန်များအား သိရှိလိုက်နာကြရန် ဆွေးနွေးပြောကြားခဲ့ကြောင်း သိရှိရပါသည်။

DOCA(စစ်ကိုင်း)