သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ သာယာဝတီခရိုင်၊ လက်ပံတန်းမြို့နယ်အတွင်းရှိ ဆေးနှင့် ဆေးပစ္စည်းအရောင်းဆိုင်များတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ အရ ကုန်စည်အမျိုးအစားပေါ်မူတည်၍ အဓိကပါဝင်ရမည့် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်း ရှိ/မရှိကို ခရိုင်၊ စားသုံး /ထုတ်လုံ တာဝန်ခံ ဒေါ်ခိုင်ခိုင်ရီ၊ မြို့နယ်တာဝန်ခံ ဦးချစ်ကိုကို နှင့် ဝန်ထမ်းများသည် ၁၇.၅.၂၀၂၃ ရက်နေ့တွင် ဈေးကွက်စောင့်ကြည့်စစ်ဆေးခဲ့ပါသည်။

စားသုံးသူပြည်သူများ ကုန်စည်ဝယ်ယူအသုံးပြုရာတွင် ဘေးအန္တရာယ်ကင်းရှင်းရေး၊ လုံခြုံစိတ်ချရမှုရှိစေရေးတို့အတွက် ရည်ရွယ်၍ စားသုံးသူကာကွယ်ရေးဥပဒေ အခန်း ၁၈၊ ပုဒ်မ ၄၁ အရ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြထားခြင်း ရှိ/မရှိ နှင့် ဥပဒေ အခန်း ၁၀ပါ စီးပွားရေး လုပ်ငန်းရှင်၏ တာဝန်များ ၊ အခန်း ၁၁ပါ ကုန်စည်နှင့်စပ်လျဉ်း၍ အာမခံချက်ပေးခြင်း ရှိ/မရှိတို့နှင့်စပ်လျဉ်း၍ ဈေးကွက်စောင့်ကြည့်စစ်ဆေးကာ လက်ကမ်းစာစောင်များ ဖြန့်ဝေခဲ့ကြောင်း သိရှိရသည်။

DOCA (ပဲခူး)

       စားသုံးသူရေးရာဦးစီးဌာန မကွေးတိုင်းဒေသကြီး ပခုက္ကူခရိုင်ဦးစီးမှူးရုံး CICC ခန်းမ၌   တိုင်းဒေသကြီးဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးနှင့် ဝန်ထမ်းများသည် “ဝန်ထမ်းစွမ်း ဆောင်ရည်မြှင့်တင်ရေး အထောက် အကူပြု “အခမ်းအနားမှူး” သင်တန်းကို ပြန်ကြားရေးနှင့် ပြည်သူ့ ဆက်ဆံရေးဦးစီးဌာန နှင့်ပူးပေါင်း၍ (၁၆.၅.၂၀၂၃)ရက်နေ့မှ (၁၇.၅.၂၀၂၃)ရက်နေ့အထိ ကျင်းပပြုလုပ်ခဲ့ရာ စားသုံးသူရေးရာဦးစီးဌာန ပခုက္ကူခရိုင်ဦးစီးမှူးရုံးမှ အရာထမ်း/အမှုထမ်း သင်တန်းသား/ သင်တန်းသူ (၂၀)ဦး တက်ရောက်ခဲ့ကြပါသည်။

     အဆိုပါ သင်တန်းတွင် ပခုက္ကူခရိုင်ဦးစီးမှူး ဦးဝေဠုအောင်က “အခမ်းအနားမှူး”သင်တန်း ဖွင့်လှစ်ရခြင်းမှာ မိမိတို့ဌာနသည် လူထုနှင့် ထိတွေ့၍ စားသုံးသူများအား အသိပညာပေး ဟောပြောပွဲများ၊ လုပ်ငန်းရှင်နှင့်တွေ့ဆုံသည့် ဆွေးနွေ းပွဲများ၊ ဝန်ထမ်းစွမ်းဆောင်ရည်မြှင့်တင်ရေး သင်တန်းများနှင့် သတင်း ဆောင်းပါးရေးသားခြင်းများ ဆောင်ရွက်နေရခြင်းဖြစ်၍ “အခမ်းအနားမှူး” (MC)(Master of CereMony) တစ်ဦးတွင်ရှိရမည့် အဓိကအရည်အချင်းများ၊ ဆောင်ရန်/ရှောင်ရန်များ ၊စကားလုံး အသုံးအနှုန်းများ၊ အခမ်းအနား အပြင်အဆင်များ အထောက်အကူဖြစ်စေရန်နှင့် “အခမ်းအနားမှူး” ကောင်းတစ်ယောက် ဖြစ်စေရန် ရည်ရွယ်၍ ဖွင့်လှစ်ရခြင်းဖြစ်ကြောင်း ပြောကြားခဲ့ပါသည်။ ဆက်လက်၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဦးဇော်ဌေးအောင်နှင့်ဦးစီးအရာရှိ ဒေါ်ချိုချိုမာ တို့က “အခမ်းအနားမှူး”(MC) တစ်ဦးတွင် ရှိရမည့် အဓိက အရည်အချင်းဖြစ်သည့်  MC ၏ ရုပ်ပိုင်းဆိုင်ရာ ဝတ်စားဆင်ယင်မှုများ၊ အသံပိုင်းဆိုင်ရာ အသံနေအသံထား လေယူလေသိမ်း စကားအသုံးအနှုန်းနှင့် မိုက်အသုံးပြုပုံများ၊ အခမ်းအနားမှူး တစ်ဦး၏ ကြိုတင်ပြင်ဆင်မှုနှင့် ဆောင်ရန်/ ရှောင်ရန်များ၊ အခမ်းအနားအစီအစဉ်များနှင့် အခမ်းအနား စတင်ရာတွင် ကြိုတင်ပြောကြားရမည့်စကားလုံးများ၊ ခန်းမအတွင်း/အပြင်အခမ်းအနားဖွင့်ပွဲများတွင် ပြောဆိုရမည့်လုပ်ဆောင်ချက်များစသည်များကို သင်ကြားပို့ချခြင်းနှင့်သင်တန်းသား/သင်တန်းသူ များအား လက်တွေ့လေ့ကျင့်ခြင်းများ ဆောင်ရွက်ခဲ့ကြပါသည်။

DOCA(မကွေး)

      စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ စစ်ဆေးရေးမှူး ဦးမျိုးဝင်းနိုင်နှင့်ဝန်ထမ်းများသည် (၂၃-၅-၂၀၂၃) ရက်နေ့၊ နံနက် (၁၃:၀၀) နာရီအချိန်တွင် အေးချမ်းသာ (၁)လမ်း၊ အမှတ်(၅) ရပ်ကွက်၊ ဘားအံမြို့ရှိ ရတနာရွှေပြည် သောက်ရေသန့်လုပ်ငန်းသို့ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များနှင့်အညီ ကိုက်ညီမှုရှိ/မရှိတို့အား မိတ်ဖက်ဌာနများနှင့် ပူးပေါင်း၍  ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

      ထိုသို့ဈေးကွက်စောင့်ကြည့်စစ်ဆေးရာတွင် ကရင်ပြည်နယ်စားသုံးသူရေးရာကော်မတီက ၂၀၂၃-၂၀၂၄ ဘဏ္ဍာနှစ်အတွင်း သတ်မှတ်ထားသည့် ဦးစားပေး ကုန်စည် (၁၀)မျိုး စာရင်းထဲမှ သောက်ရေသန့်လုပ်ငန်းဖြစ်သည့် ရတနာရွှေပြည် သောက်ရေသန့်သို့ ကွင်းဆင်းစစ်ဆေးရာတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင် ညွှန်ကြားချက်အမှတ်၊ ၂/၂၀၁၉ နှင့်အညီ ကိုက်ညီမှုရှိကြောင်းနှင့် မိတ်ဖက်ဌာနများ၏ လုပ်ထုံး၊ လုပ်နည်းဥပဒေနှင့်အညီ ကိုက်ညီမှုရှိကြောင်း စိစစ်တွေ့ရှိရပါသည်။

DOCA (ကရင်)

    (၁၅.၅.၂၀၂၃)ရက်နေ့ ၊နံနက်(၀၉:၀၀) နာရီအချိန်တွင် ဟင်္သာတခရိုင်၊ ဇလွန်မြို့ စားသုံးသူရေးရာဦးစီးဌာနမှ မြို့နယ်တာဝန်ခံသည် မြို့မဈေးအတွင်းရှိ ကုန်စုံဆိုင်များအား ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

   ထိုသို့ကွင်းဆင်းခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြခြင်းရှိ/မရှိတို့ကိုစစ်ဆေးခဲ့ပြီး၊ သတ်မှတ်အရည်အသွေး ပြည့်မီသော ကုန်စည်များကိုသာရောင်းချရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် စားသုံးသူဥပဒေပါ စီးပွားရေးလုပ်ငန်းရှင်၏ တာဝန်များ အကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ပြီး၊ ကုန်မျိုးစုံအရောင်းဆိုင်(၅)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

         မကွေးမြို့ ကုန်စည်ဒိုင်နှင့်ပွဲရုံများသို့ ဧရာဝတီမြစ် အနောက်ဘက်ကမ်း မင်းဘူး(စကု)၊ ပွင့်ဖြူမြို့နယ်နှင့် မြို့သစ်မြို့နယ်တို့မှ ရေသွင်းနှမ်းနှင့် မကွေးနယ်မှ တောင်သူများ၏ လက်ဝယ်သိုလှောင်ထားသည့် နှမ်းများ ဝင်ရောက်ကာ အရောင်းအဝယ်ဖြစ်လျက်ရှိပါသည်။ မကွေးကုန်စည်ဒိုင်၌ (၁၅.၅.၂၀၂၃)မှ (၁၉.၅.၂၀၂၃) ရက်နေ့ အတွင်းနှမ်းနက်စမုံ (၁၅) ပိဿာ (၁)တင်းလျှင် ကျပ်(၂၈၀၀၀၀မှ ၂၈၃၀၀၀)၊ နှမ်းနက်(ရိုးရိုး) (၁၅) ပိဿာ (၁)တင်းလျှင် ကျပ် (၂၆၅၀၀၀မှ ၂၇၀၀၀၀)၊ နှမ်းဖြူ (၁၅) ပိဿာ (၁)တင်းလျှင် ကျပ်(၃၁၅၀၀၀မှ ၃၁၈၀၀၀)၊ နှမ်းနီ (၁၅)ပိဿာ (၁)တင်းလျှင် ကျပ်(၂၇၅၀၀၀) နှမ်းညိုကြား (၁၅) ပိဿာ (၁)တင်းလျှင် ကျပ်(၂၅၅၀၀၀)၊ နှမ်းနီ (နယ်စ) (၁၅)ပိဿာ (၁)တင်းလျှင် ကျပ် (၂၆၅၀၀၀)တို့ဖြင့် အသီးသီး အရောင်းအဝယ်ဖြစ်လျက်ရှိပါသည်။ နှမ်းနက်စမုံ၊ နှမ်းနက်(ရိုးရိုး)၊ နှမ်းနီ၊ နှမ်းညိုကြား၊ နှမ်းနီ(နယ်စ)တို့မှာ စျေးနှုန်းတည်ငြိမ်လျက်ရှိပြီး နှမ်းဖြူမှာ ကျပ်(၄၅၀၀) စျေးနှုန်းမြှင့်တက်လာကြောင်း မကွေးကုန်စည်ဒိုင်မှသိရှိရပါသည်။

         မေလတတိယအပတ်တွင် နှမ်းနက်စမုံ တန်(၁၀၀)၊ နှမ်းဖြူ တန်(၅၀)၊ နှမ်းနီ တန်(၁၀) တို့ဖြင့် အရောင်းအဝယ်ဖြစ်လျက်ရှိကြောင်း လေ့လာသိရှိရပါသည်။

DOCA(မကွေး)