သတင်းနှင့် လှုပ်ရှားမှုများ

       စစ်ကိုင်းတိုင်းဒေသကြီး၊ ရွှေဘိုခရိုင်၌ နှစ်စဉ်မိုးစပါးစိုက်ပျိုးရာသီတွင် ရွှေဘိုပေါ်ဆန်းစပါး စိုက်ပျိုးမှုများပြီး အရည်အသွေးလည်းကောင်းသဖြင့် ရွှေဘိုပေါ်ဆန်း(G.I)ရရှိရေးအတွက် ပြင်သစ်နိုင်ငံ AFD(France Development Agency)၏ ထောက်ပံ့ကူညီမှုဖြင့် Recognition and Promotion of Geographical indication in Cambodia, Lao PDR and Myanmar (မြန်မာ၊ လာအိုနှင့် ကမ္ဘောဒီးယားနိုင်ငံတို့တွင် ဒေသဆိုင်ရာအညွှန်းများကို အသိအမှတ်ပြုခြင်းနှင့် မြှင့်တင်ခြင်းစီမံကိန်း)ကို GRET Myanmarအဖွဲ့အစည်းမှ အကောင်အထည်ဖော် ဆောင်ရွက်လျက်ရှိပါသည်။  ယခုလက်ရှိအချိန်တွင် ရွှေဘိုပေါ်ဆန်း(G.I)ရရှိရေး ဆောင်ရွက်မှုအနေဖြင့် ရွှေဘိုမြို့ ဦးအောင်မြတ်လမ်းနှင့် ရွှေချက်သိုဘုရားလမ်းထောင့်၊ အနောက်ဈေးရပ်၊ အမှတ်(၄)နယ်မြေတွင် ဌားရမ်းထားသည့် ရွှေဘိုပေါ်ဆန်းစိုက်ပျိုး ထုတ်လုပ်တင်ပို့ရောင်းချသူများအသင်းရုံးတွင် ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများ အသင်းမှတာဝန်ရှိသူများနှင့်  (G.I)ပညာရှင်များ အပတ်စဉ်သောကြာနေ့တိုင်း Zoomဖြင့် လုပ်ငန်းညှိနှိုင်းအစည်းအဝေးဆောင်ရွက်ခြင်း၊ ရွှေဘိုပေါ်ဆန်း(G.I)ရရှိရေးတွင် အဓိကအရေးပါသည့် ရွှေဘိုပေါ်ဆန်းအရည်အသွေးမှတ်တမ်း (BOS) Book Of Specifications Version-0 မှ Version-1သို့ အဆင့်ဆင့်အတည်ပြုသတ်မှတ်ခဲ့ပြီး   Final Version သို့တိုးမြှင့်သတ်မှတ်နိုင်ရေး အလုပ်ရုံဆွေးနွေးပွဲကို လည်း ၂၀၂၂ခုနှစ်၊ ဒီဇင်ဘာလ(၃)ရက်နေ့တွင် အောင်မြင်စွာ ကျင်းပပြီးဖြစ်သည့်အပြင် ယခုလက်ရှိအချိန်တွင် ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်းအနေဖြင့် တောင်သူများ ဓါတ်မြေဩဇာဝယ်ယူရသည့် ကုန်ကျစရိတ်လျော့ချနိုင်ရန်နှင့် မြေဆီလွှာဂုဏ်သတ္တိကောင်းမွန်စေရန်အတွက်  သဘာဝမြေဩဇာ လက်တွေ့ပြုလုပ်ခြင်းသင်တန်းများကို ရွှေဘိုမြို့နယ်ရှိ ပေါက်တုံကျေးရွာနှင့် လိပ်ချင်းကျေး ရွာများတွင် ဆောင်ရွက်ခြင်းနှင့် ရွှေဘိုပေါ်ဆန်း (G.I)ရရှိရေး တောင်သူပညာပေး ဟောပြောခြင်း၊ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်း၏ ယခင်ကရေးဆွဲပြီးသော သင်းဖွဲ့စည်းမျဉ်းကို စနစ်တကျရှိ၍ ပြည့်စုံခိုင်မာတောင့်တင်းစေရန် ပြင်သစ်နိုင်ငံ AFD၏အကူအညီဖြင့် အသင်းသားများဖြင့် ပွင့်လင်းမြင်သာစွာညှိနှိုင်းဆွေးနွေးခြင်းနှင့် ရွှေဘိုပေါ်ဆန်း စိုက်ပျိုးထုတ်လုပ်တင်ပို့ ရောင်းချသူများအသင်း၏ Working Groupသည် ရွှေဘိုပေါ်ဆန်းဈေးကွက်နှင့်အရောင်းမြှင့်တင်ရေး (Marketing and Promotion) နှင့် ဘိုပေါ်ဆန်း(Product Logo)ရေးဆွဲနိုင်ရေးတို့အတွက် (G.I) Projectမှ ချိတ်ဆက်ပေးသော BRIDGEအဖွဲ့သားများနှင့် လုပ်ငန်းညှိနှိုင်းအစည်းအဝေးများ ဆောင်ရွက်လျက်ရှိကြောင်း သတင်းရရှိပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ချင်းပြည်နယ်ဦးစီးမှူးရုံးမှ ဒေါ်သူဇာမြင့်(ဦးစီးမှူး)၊ ဦးကီးအောင်လိန်း(ဒု-ဦးစီးမှူး)၊ ဦးသိန်းအောင်(ကြီး/ရေး)၊ ဒေါ်ထားမဲင်းဇိန် (ရုံးအကူ)နှင့် မြို့နယ်စည်ပင်သာယာအဖွဲ့မှ ဦးဟုန်းကီးထွန်း(အငယ်တန်းအင်ဂျင်နီယာ)တို့သည် ၂၀၂၃ခုနှစ်၊ မတ်လ ၂၃ရက်နေ့၊ နံနက် (၁၀:၃၀) နာရီအချိန်တွင် ဟားခါးမြို့၊ ဈေးသစ်ရပ်ကွက်ရှိ ကုန်စုံဆိုင်များအား ကွင်းဆင်းစစ်ဆေးခဲ့ပါ သည်။

    ကွင်းဆင်းစစ်ဆေးရေးအဖွဲ့သည် အာဆီယံဒေသအတွင်းတွေ့ရှိသော တားမြစ်ဓာတုပစ္စည်းများပါဝင်သည့် အလှကုန်ပစ္စည်း(၃၅)မျိုးသည် ကျန်းမားရေးဝန်ကြီးဌာနက သုံးစွဲရန်မသင့်သောအလှကုန်ပစ္စည်းများအဖြစ် ကြေညာထားသည့်အတွက်   ဈေးကွက်အတွင်း ရှိ/မရှိ၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ အသိအမှတ်ပြု DRC No. မပါရှိသည့် ဂျာမနီနိုင်ငံထုတ် (Parbisure) အမည်ဖြင့် ဆေးဝါးရောင်းချနေမှုများ ဈေးကွက်အတွင်း ရှိ/မရှိတို့ကို စစ်ဆေးခြင်းနှင့် သက်တမ်းလွန်စားသုံးကုန်ပစ္စည်းများကို သိမ်းဆည်းခြင်း စသည်တို့ကို ဆောင်ရွက်ခဲ့ပါသည်။ ထို့နောက် ကုန်စုံဆိုင်ရောင်းချသူများအနေဖြင့် သက်ဆိုင်ရာဝန်ကြီးဌာနက အများပြည်သူအပေါ် ဘေးအန္တရာယ်ရှိသည်ဟု သတ်မှတ်ထားသည့်ကုန်ပစ္စည်းများကို မှာယူတင်သွင်းရောင်းချခြင်းမပြုရန် ရှင်းလင်းမှာကြားခဲ့ပါသည်။

DOCA(ချင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက ပြုစုရေးဆွဲထားသည့် ဆန်စပါးဥပဒေ(မူကြမ်း)နှင့်စပ်လျဉ်း၍ အလုပ်ရုံဆွေးနွေးပွဲကို ၂၀၂၃ခုနှစ်၊ မတ်လ (၂၁) ရက်နေ့၊ နံနက် (၉:၀၀) နာရီအချိန်တွင် ဇမ္ဗူသီရိမြို့နယ်၊ သပြေကုန်းရပ်ကွက်၊ ရွှေနန်းတော်ခန်းမ၌ ကျင်းပပြုလုပ်ခဲ့ရာ နေပြည်တော်ကောင်စီအဖွဲ့ဝင် ဦးဇေယျာလင်း၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချို၊ ပြည်ထောင်စုနယ်မြေ၊ နေပြည်တော်အတွင်းရှိ ဌာနဆိုင်ရာအသီးသီးမှ တာဝန်ရှိသူများ၊ မြန်မာနိုင်ငံဆန်စပါးအသင်းချုပ်မှ တာဝန်ရှိသူများ၊ ဆန်စက်လုပ်ငန်းရှင်များအသင်းနှင့် ဆန်ကုန်သည်များအသင်းတို့မှ တာဝန်ရှိသူများနှင့် စိုက်ပျိုးထုတ်လုပ်သောတောင်သူလယ်သမားများ တက်ရောက်ခဲ့ကြပါသည်။

    အဆိုပါအလုပ်ရုံဆွေးနွေးပွဲတွင် နေပြည်တော်ကောင်စီအဖွဲ့ဝင် ဦးဇေယျာလင်းက အဖွင့်အမှာစကားပြောကြားရာတွင် ဆန်စပါးနယ်ပယ်တွင် စိုက်ပျိုးထုတ်လုပ်သောတောင်သူများသာမက စပါးဝယ်ယူသူပွဲစားများ၊ စက်ပိုင်များ၊ ကုန်သည်များနှင့် ပြည်ပတင်ပို့သည့်လုပ်ငန်းရှင်များအထိ အလွှာမျိုးစုံပါဝင်နေသဖြင့် ထုတ်လုပ်မှုကွင်းဆက်တစ်လျှောက်လုံးဖွံ့ဖြိုးတိုးတက်မှသာ ဆန်စပါးကဏ္ဍတိုးတက်ပြီး နိုင်ငံ့စီးပွားမြှင့်တင်မှုကို အထောက်အကူပြုနိုင်မည်ဖြစ်ကြောင်း၊ ဆန်စပါးဥပဒေ(မူကြမ်း)ရှင်းလင်းဆွေးနွေးပွဲကို တက်ရောက်လာကြသည့်အသင်းအဖွဲ့များနှင့် ဌာနဆိုင်ရာတာဝန်ရှိသူများအနေဖြင့် လက်တွေ့တွင် အမှန်တကယ်အသုံးပြုနိုင်သည့် ဥပဒေ ကောင်းတစ်ရပ်ဖြစ်ရန်အတွက် အားလုံးက ကျယ်ကျယ်ပြန့်ပြန့်ဝိုင်းဝန်းဆွေးနွေးအကြံပြုစေလိုါကြောင်း ပြောကြားခဲ့ပါသည်။

     ဆက်လက်၍ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချိုက ဆန်စပါးဥပဒေ(မူကြမ်း)ရှင်းလင်းဆွေးနွေးပွဲပြုရခြင်းနှင့်စပ်လျဉ်း၍ တက်ရောက်လာကြသူများနှင့် အပြန်အလှန်ဆွေးနွေးခဲ့ပြီး အလုပ်ရုံဆွေးနွေးပွဲသည် နေ့လယ်(၁၂:၃၀)နာရီအချိန်တွင် ပြီးမြောက်ကြောင်း သတင်းရရှိပါသည်။

DOCA(နေပြည်တော်)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးလက်အောက်ရှိ ကျွန်းလှမြို့နယ်တာဝန်ခံ ဒေါ်ဝေဝေအောင်သည် ၂၀၂၃ ခုနှစ် ၊ မတ်လ(၂၀)ရက်နေ့၊ နံနက်(၁၁:၀၀)အချိန်တွင် စစ်ကိုင်းတိုင်းဒေသကြီး၊  ကန့်ဘလူခရိုင် ၊ ကျွန်းလှမြို့နယ်၊ ရှမ်းစုကျေးရွာရှိ မုန့်တီဖတ်လုပ်ငန်းရှင်နှင့် သွားရောက်၍ တွေ့ဆုံဆွေးနွေး အသိပညာပေးခြင်း ဆောင်ရွက်ခဲ့ပါသည်။

       ထိုသို့ တွေ့ဆုံဆွေးနွေးရာတွင် စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံ ဒေါ်ဝေဝေအောင်မှ ကုန်ပစ္စည်းများ ထုတ်လုပ်ရောင်းချခြင်းနှင့် ပတ်သက်၍ စားသုံးသူအကာအကွယ်ပေးရေး ဥပဒေ(၂၀၁၉)၊ အခန်း(၁၅) ပုဒ်မ(၂၈)အရ ကုန်စည် (သို့မဟုတ်) ဝန်ဆောင်မှုများ လုံခြုံစိတ်ချရမှုရှိစေရေးနှင့် စားသုံးသူပြည်သူများ ဘေးအန္တရာယ်ကင်းရှင်းစေရေးအတွက် မုန့်တီဖတ်လုပ်ငန်း ထုတ်လုပ်ရာတွင် သန့်ရှင်းသပ်ရပ်မှုရှိစေရေး ဆောင်ရွက်သည်ကိုလည်းကောင်း၊ မုန့်တီဖတ်များဟာ အသင့်စားသုံးရသော အစားအသောက်ဖြစ်သည့်အတွက်  သန့်ရှင်းမှုရှိစေရေး မုန့်တီဖတ်များ ထုတ်လုပ်မှု အဆင့်ဆင့်တွင်လည်း သန့်ရှင်းသပ်ရပ်စွာ ထုတ်လုပ်စေရေးနှင့် မုန့်တီဖတ်ထုတ်လုပ်ရာတွင် တာရှည်ခံဆေး (Formalin) လုံဝသုံးစွဲမှုမပြုရန် သတိပေးတားမြစ်ပြီး မုန့်ဖတ်အခြောက်များ ပြုလုပ်ရောင်းချမည်ဆိုလျှင် ကုန်အညွှန်းအမှတ်အသားများ ပြည့်စုံမှန်ကန်စွာ ထည့်သွင်းဖေါ်ပြရန်အတွက် မိမိတို့ စာသုံးသူရေးရာဦးစီးဌာနမှ ဆောင်ရွက်ပေးလျက်ရှိပါကြောင်း၊ စားသုံးသူကာကွယ်ပေးရေးဥပဒေပါ စီးပွားရေးလုပ်ငန်းရှင်များ လိုက်နာဆောင်ရွက်ရမည့် တာဝန်များအကြောင်း ရှင်းလင်းဆွေးနွေးပြောကြားပြီး အသိပညာပေးလက်ကမ်းစာစောင် ဖြန့်ဝေပေးခဲ့ကြောင်း သိရှိရပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာန၊ ရခိုင်ပြည်နယ်၊ စစ်တွေခရိုင်ဦးစီးမှူးရုံး၊ ခရိုင်ဦးစီးမှူး ဦးမောင်လှဝင်းနှင့်ဝန်ထမ်းများသည် (၂၁-၃-၂၀၂၃)ရက်နေ့ နေ့လယ် (၁:၀၀)နာရီ မှ (၂:၃၀)နာရီထိ စစ်တွေမြို့၊ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန၊ ရက်ကန်းနှင့် အသက်မွေးပညာသင်တန်းကျောင်း၌ ဆရာ၊ ဆရာမများနှင့် သင်တန်းသူ(၃၅)ဦးအား  စားသုံးသူကာကွယ်ရေးအသိပညာပေး ဟောပြောဆွေးနွေးပွဲ ကျင်းပပြုလုပ်ခဲ့ပါသည်။ရှေးဦးစွာ ရက်ကန်းနှင့်အသက်မွေးပညာသင်တန်းကျောင်း၊ ကျောင်းအုပ်ဆရာကြီး ဦးအောင်သန်းက  အဖွင့်အမှာစကားပြောကြားပြီး စားသုံးသူရေးရာဦးစီးဌာန စစ်တွေခရိုင်ဦးစီးမှူး ဦးမောင်လှဝင်း(ဦးစီးအရာရှိ)က စားသုံးသူကာကွယ်ရေး နှင့်ပတ်သက်၍ စားသုံးသူရေးရာဦးစီးဌာန၏ ဆောင်ပုဒ်(Motto)” စားသုံးသူအခွင့်အရေး ဦးစားပေး”နှင့် မျှော်မှန်းချက်၊ ရည်မှန်းချက်များအား ချပြဆွေးနွေးပြီး စားသုံးသူများအနေဖြင့် မိမိတို့၏ စားသုံးသူအခွင့်အရေးများဆုံးရှုံးမှုမရှိစေရေးနှင့် ဘေးအန္တရာယ်ကင်းရှင်းစေရေးအတွက် ကုန်စည်(သို့မဟုတ်)ဝန်ဆောင်မှုကို ဝယ်ယူအသုံးပြုရာတွင် ဆုံးရှုံးနစ်နာမှုများဖြစ်ပေါ်လာပါက တိုင်ကြားနိုင်သည့် နည်းလမ်းများအား ချပြ ဆွေးနွေးခြင်း၊ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)၊ ပုဒ်မ(၄၁)ပြဌာန်းချက် ကုန်အညွှန်းအမှတ်အသားများ ပြည့်စုံစွာဖော်ပြပါရှိသော  ကုန်စည်များကို ဝယ်ယူသုံးစွဲစေခြင်းနှင့် ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုရာတွင် သိရှိလိုသည့်သတင်းအချက်အလက်များအား စီးပွားရေးလုပ်ငန်းရှင်များသို့ မေးမြန်းပြီး ဝယ်ယူသုံးစွဲတတ်စေရေး စီးပွားရေးလုပ်ငန်းရှင်များမှလည်း ကုန်စည်(သို့မဟုတ်) ဝန်ဆောင်မှုနှင့်ပတ်သက်၍ တာဝန်ယူမှု၊ တာဝန်ခံမှု ကိစ္စရပ်များအား ကြိုတင်မေးမြန်းပြီးမှ နှစ်ဦးနှစ်ဖက် ကတိကဝတ်ပြု သဘောတူပြီးမှ ဝယ်ယူအသုံးပြု စေရေးနှင့် ဆုံးရှုံးနစ်နာမှုများဖြစ်ပေါ်လာပါကမည်ကဲ့သို့ တာဝန်ယူဆောင်ရွက်ပေးနိုင်မှုများအား လေ့လာမေးမြန်းပြီး စနစ်တကျ ဝယ်ယူတတ်စေ‌ရေးအား  ချပြဆွေးနွေးခဲ့ပြီး  စားသုံးသူရေးရာဦးစီးဌာန၊ ဒုတိယဦးစီးမှူး ဦးဇော်မင်းဦးက စားသုံးသူကာကွယ်ရေးဥပဒေ အခန်း(၉) စားသုံးသူ၏ အခွင့် အရေးနှင့် တာဝန်များအား ချပြဆွေးနွေးခြင်း၊ စားသုံးသူအခွင့်အရေးဆုံးရှုံးမှုများ ဖြစ်ပေါ်လာပါက စားသုံးသူရေးရာဦးစီးဌာန၊ စစ်တွေခရိုင်ဦးစီး မှူးရုံး၌ ဖွင့်လှစ်ထားရှိသည့် (CICC- Consumer Information and Complaint Center) စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာတွင် တိုင်ကြားမှုများပြုလုပ်နိုင်ပါကြောင်း ချပြဆွေးနွေးပြီး မြို့နယ်တာဝန်ခံ ဦးသိန်းအောင်(ဦးစီးမှူး)က လိုအပ်သည်များကို ဖြည့်စွက်ဆွေးနွေးပြီး တက်ရောက်လာသူများက သိလိုရှိသည်များကို မေးမြန်းရာ ခရိုင်ဦးစီးမှူး ဦးမောင်လှဝင်းမှ မေးမြန်းချက်များအပေါ် ပြန်လည်ဖြေကြားခဲ့ပြီး ဟောပြောပွဲအား ရုတ်သိမ်းခဲ့ကြောင်း သိရှိရပါသည်။

DOCA(ရခိုင်)