သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြန်အောင်ခရိုင်၊ အင်္ဂပူမြို့၊ မြို့နယ်တာဝန်ခံသည် မြို့နယ်စည်ပင်သာယာဦးစီးဌာနနှင့်ပူးပေါင်း၍ (၁၆-၃-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် မြို့ပေါ်ရပ်ကွက်ရှိ စတိုးဆိုင်များနှင့် အိမ်ဆိုင်များတွင်ရောင်းချနေသော ကုန်စည်များအား ကုန်အညွှန်းအမှတ်အသားပြည့်စုံမှန်ကန်မှုရှိ/မရှိနှင့် ညွှန်ကြားချက်များအား လိုက်နာဆောင်ရွက်မှု ရှိ/မရှိကို ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ပါသည်။

     ထိုသို့ကွင်းဆင်းခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြခြင်းရှိ/မရှိတို့ကိုစစ်ဆေးခဲ့ပြီးနောက် တရားမဝင်ကုန်စည်များအား တင်သွင်းရောင်းချခြင်းမပြုရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  လုံခြုံစိတ်ချရမှုရှိသောကုန်စည်များကိုသာ ဈေးကွက်အတွင်းရောင်းချရန်၊ ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေး ဆောင်ရွက်ရန်နှင့် သတ်မှတ်အရည်အသွေးပြည့်မီသောကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေ ၂၀၁၉ ပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ကာ ကုန်မျိုးစုံအရောင်းဆိုင်(၃)ဆိုင်အား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့၊ မြို့နယ်တာဝန်ခံသည် ၂၀၂၃ခုနှစ်၊ မတ်လ (၁၆) ရက်နေ့၊ နံနက်(၀၉:၃၀) နာရီအချိန်တွင် ဌာနဆိုင်ရာများနှင့်ပူးပေါင်း၍ လေးမျက်နှာ-ငါးသိုင်းချောင်းကားလမ်းဘေး၊ အိုင်သပြုကားဂိတ်ရှိ “ထွန်းသစ်စ” စက်သုံးဆီအရောင်းဆိုင်သို့ သတ်မှတ်ရည်ညွှန်းဈေးနှုန်းဖြင့် ရောင်းချမှုရှိ/မရှိတို့ကို ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းခဲ့ရာတွင် စက်သုံးဆီတင်သွင်း၊ သိုလှောင်၊ ဖြန့်ဖြူးရောင်းချမှုအခြေအနေ၊ စက်သုံးဆီပြတ်လပ်မှုမရှိစေရေး၊ (PPRD) စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက  နေ့စဉ်သတ်မှတ်ထုတ်ပြန်ထားသော စက်သုံးဆီရည်ညွှန်းဈေးနှုန်းအတိုင်း ရောင်းချမှု ရှိ/မရှိနှင့် အချိန်အတွယ်နှင့်အလေးချိန်မှန်ကန်မှုရှိ/မရှိတို့ကိုစစ်ဆေးခဲ့ပြီးနောက် သတ်မှတ်စံချိန်စံညွှန်းနှင့်ပြည်မီရေး၊ လုပ်ငန်းရှင်များအနေဖြင့် တရားမဝင်စက်ဆီ/ချောဆီများ တင်သွင်းရောင်းချခြင်းမပြုရန်၊  ထုတ်ပြန်ထားသောညွှန်ကြား ချက်များအတိုင်း လိုက်နာဆောင်ရွက်ရန်နှင့် ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရန်နှင့် စားသုံးသူကာကွယ်ရေးဥပဒေ ၂၀၁၉ ပါ စီးပွားရေးလုပ်ငန်းရှင်၏တာဝန်များအကြောင်းကို သိရှိနားလည်စေရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်၊ ဟင်္သာတမြို့ မြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍  (၁၄-၃-၂၀၂၃) ရက်နေ့တွင် စားသုံးသူကာကွယ်ရေးအသိပညာပေး Talk Show အစီအစဉ်ကို ပြုလုပ်ဆောင်ရွက်ခဲ့ပါသည်။

   ဟင်္သာတမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန Community Center တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်အေးအေးမာနှင့် စားသုံးသူရေးရာဦးစီးဌာနမှ မြို့နယ်ဦးစီးမှူး ဦးမိုးကျော်တို့က စားသုံးသူကာကွယ်ရေးအသိပညာပေးမှုနှင့်ပတ်သက်၍ မေးမြန်းခြင်း၊ ဖြေကြားခြင်းတို့ကို ပြုလုပ်ခဲ့ပါသည်။

       အဆိုပါ Talk Show အစီအစဉ်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်အေးအေးမာက Talk Show ပြုလုပ်ရခြင်း၏ရည်ရွယ်ချက်များကို ရှင်းလင်းပြောကြားခဲ့ပြီး၊ စားသုံးသူရေးရာဦးစီးဌာနမှ မြို့နယ်တာဝန်ခံဦးမိုးကျော်က စားသုံးသူကာကွယ်ရေးဥပဒေများနှင့် နည်းဥပဒေများအကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ဖော်ပြရမည့်ညွှန်ကြား ချက်များအကြောင်း၊ စီးပွားရေးလုပ်ငန်းရှင်၏တာဝန်များအကြောင်း၊ စားသုံးသူအခွင့်အရေးနှင့်တာဝန်များအကြောင်း၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းများအကြောင်း၊ တားမြစ်ချက်များနှင့်ပြစ်မှုပြစ်ဒဏ်များအကြောင်း၊ ကုန်စည်(သို့မဟုတ်)ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့်နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်းများအကြောင်း၊ ဦးစီးဌာန၏ လက်ရှိဆောင်ရွက်နေသည့် လှုပ်ရှားမှုများအကြောင်းတို့ကို မေးမြန်းဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးဦးအောင်နိုင်ဦးသည် ၂၀၂၃ခုနှစ်၊ မတ်လ ( ၁၉ ) ရက်နေ့တွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးသို့ သွားရောက်စစ်ဆေးခဲ့ကြောင်း သိရှိရပါသည်။

   ပြည်ထောင်စုဝန်ကြီးသည် စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ တိုင်းဒေသကြီးဦးစီးမှူးရုံးအား စစ်ဆေးရာတွင် ရုံးစာကြည့်တိုက်တွင် စာအုပ်များထားရှိမှုအခြေအနေ၊ မှတ်တမ်းများထားရှိမှုအခြေအနေများ၊ ဌာနခွဲများတွင် လုပ်ငန်းဆောင်ရွက်မှုအခြေအနေများ၊ ရုံးနှင့် ရုံးပတ်ဝန်းကျင်သန့်ရှင်းသာယာလှပရေး ဆောင်ရွက်ထားရှိမှုအခြေအနေများကို ကြည့်ရှုစစ်ဆေးပါသည်။

  ထို့နောက် ပြည်ထောင်စုဝန်ကြီးနှင့် ဝန်ထမ်းများတွေ့ဆုံပွဲအခမ်းအနားကို ဆက်လက်ကျင်းပရာ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ တိုင်းဒေသကြီးဦးစီးမှူး ဦးကျော်ကျော်လွင်က မိမိတို့တိုင်းဒေသကြီးအနေဖြင့် လုပ်ငန်းဆောင်ရွက်မှုများ၊ ဝန်ထမ်းသက်သာချောင်ချိရေး ဆောင်ရွက်မှုများ၊ လုပ်ငန်းခွင်ပျော်ရွင်စေရေး ဆောင်ရွက်မှုများ၊ ကြုံတွေ့ရသည့်အခက်အခဲများအား power point  များဖြင့် အသေးစိတ်ရှင်းလင်းတင်ပြခဲ့ရာ ပြည်ထောင်စုဝန်ကြီးက လိုအပ်သည်များကိုလမ်းညွှန်မှာကြားခဲ့ကြောင်း သိရပါသည်။ ထို့နောက် ပြည်ထောင်စုဝန်ကြီးက စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနနှင့် မြန်မာကုန်သွယ်မှုမြှင့်တင်ရေးအဖွဲ့မှ ဝန်ထမ်းများအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ မျှော်မှန်းချက်၊ ရည်မှန်းချက်များအပေါ် မည်သို့ အကောင်အထည် ဖော်ဆောင်ရွက်ရမည်ကို လမ်းညွှန်မှာကြားခဲ့ပြီး လုပ်ငန်းများကို ကြိုးစားဆောင်ရွက်ကြရန်၊ စဉ်ဆက်မပြတ်လေ့လာသင်ယူကြရန်နှင့် စာဖတ်သည့်အလေ့အထကောင်းကို ပြုစုပျိုးထောင်ကြရန် လမ်းညွှန်မှာကြားခဲ့ကြောင်း သတင်းရရှိပါသည်။

DOCA(စစ်ကိုင်း)

        စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ၊ မူပိုင်ခွင့်ဦးစီးဌာန၏ ကုန်အမှတ်တံဆိပ် မူပိုင်ခွင့် ဥပဒေ အာဏာသက်ဝင်ခြင်းနှင့် စပ်လျဉ်းသည့် ဆွေးနွေးပွဲကို ၁၆.၃.၂၀၂၃ရက်နေ့က ပဲခူးတိုင်း ဒေသကြီး ၊ စားသုံးသူရေးရာဦးစီးဌာန ၊ အစည်းအဝေးခန်းမ၌ ကျင်းပရာ ပဲခူးတိုင်းဒေသကြီး အစိုးရ အဖွဲ့ ၊ စီးပွား‌ရေးရာ ဝန်ကြီး ၊ ဦးတင်ဦးက ယနေ့ဆွေးနွေးပွဲသည်  " ၂၀၁၉ ခုနှစ်က အတည်ပြု ပြဌာန်းခဲ့တဲ့ မူပိုင်ခွင့် ဥပဒေများ ထဲမှ တစ်ခုဖြစ်တဲ့  ကုန်အမှတ်တံဆိပ်မူပိုင်ခွင့်ဥပဒေကို  အာဏာ သက်ဝင်ခြင်းနှင့် စပ်လျဉ်းသည့် အသိပညာပေး ဆွေးနွေးပွဲဖြစ်ကြောင်း ၊ နိုင်ငံတော်ရဲ့ စီးပွားရေး ဦးတည်ချက်များကို အကောင်အထည်ဖော် ဆောင်ရွက်ရာမှာလည်း မူပိုင်ခွင့် အကာအကွယ်ပေးခြင်း စနစ်တစ်ရပ်ကို ကျင့်သုံးဆောင်ရွက်နိုင်ခြင်းအားဖြင့် နိုင်ငံရဲ့ စီးပွားရေးဖွံ့ဖြိုးတိုးတက်စေရန်အတွက် အထောက်အကူပြုနိုင်မှာဖြစ်ကြောင်း ၊ အဆိုပါ ဥပဒေ အာဏာသက်ဝင်ပြီးနောက် ကုန်အမှတ် တံဆိပ်မူပိုင်ခွင့် လျှောက်ထားခြင်းများကို လျှောက်လွှာလက်ခံမည့် ဌာနများမှ တစ်ဆင့်လည်းကောင်း ၊ အီလက်ထရောနစ်စနစ်မှတစ်ဆင့်လည်းကောင်း ပြုလုပ်နိုင်ကြောင်းနှင့် နေပြည်တော်နှင့် ရန်ကုန်မြို့တို့တွင် လျှော်လွှာ လက်ခံမည့် ဌာနများ ဖွင့်လှစ်ပေးသွားမည် ဖြစ်ကြောင်း " အဖွင့်အမှာ စကားပြောကြားခဲ့ပါသည် ။

         ဆက်လက်၍ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ၊ မူပိုင်ခွင့်ဦးစီးဌာန ၊ ညွှန်ကြားရေးမှူးချုပ် ဒေါက်တာ မိုးမိုးသွယ်က ကုန်အမှတ်တံဆိပ် မူပိုင်ခွင့် ဥပဒေ အာဏာ သက်ဝင်ခြင်းနှင့် စပ်လျဉ်း၍ လည်းကောင်း ၊ ညွှန်ကြားရေးမှူး ဒေါက်တာ စိမ့်သန္တာထွန်း က အမှတ်တံဆိပ် မှတ်ပုံတင်ခြင်းဆိုင်ရာများနှင့် စပ်လျဉ်း၍ လည်းကောင်း ၊ ညွှန်ကြားရေးမှူး ‌ဒေါက်တာ အေးသီရိဝေက အမှတ်တံဆိပ်မှတ်ပုံတင်ခြင်းဆိုင်ရာ လျှောက်လွှာပုံစံများနှင့် စပ်လျဉ်း၍ လည်းကောင်း ၊ AYA ဘဏ်မှ ဒေါ်အေးအေးမြင့် နှင့် CB ဘဏ်မှ ဦးနေလင်းထွန်းတို့က အမှတ်တံဆိပ်မှတ်ပုံတင်ခြင်းနှင့် စပ်လျဉ်း၍ အခကြေးငွေ ပေးသွင်းခြင်းဆိုင်ရာ ဘဏ်လုပ်ငန်းဝန်ဆောင်မှုများနှင့် လုပ်ထုံးလုပ်နည်းများ အကြောင်းကို လည်းကောင်းအသီးသီး ဆွေးနွေးကြပြီး တက်‌ရောက်လာသူများက သိလိုသည်များကို မေးမြန်းကြရာ တာဝန်ရှိသူအသီးအသီးက ပြန်လည်ဖြေကြားခဲ့ကြသည် ။  ထို့နောက် ညွှန်ကြားရေးမှူး ချုပ် ဒေါက်တာ မိုးမိုးသွယ်က နိဂုံးချုပ် စကားပြောကြားခဲ့ကြောင်းနှင့် ဆွေးနွေးပွဲသို့ ဌာနဆိုင်ရာများနှင့် လုပ်ငန်းရှင်များ တက်‌ရောက်ခဲ့ကြကြောင်း သိရှိရပါသည်။

DOCA(ပဲခူး)