သတင်းနှင့် လှုပ်ရှားမှုများ

     (၁၆-၃-၂၀၂၃) ရက်နေ့၊ နံနက် (၁၀:၀၀) နာရီမှ (၁၀:၃၅) နာရီအချိန်တွင် စားသုံးသူရေးရာဦးစီးဌာန၊ ညောင်တုန်းမြို့နယ်၊ ဦးစီးမှူးရုံးမှ ဒေါ်ချိုမီဇင်နှင့် ဝန်ထမ်းများသည် ညောင်တုန်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင် ရှေးဦးသူနာပြုသင်တန်းသူ (၁၈) ဦးအား စားသုံးသူအခွင့်အရေးများကို သိရှိနားလည်စေရန် အသိပညာပေးဟောပြောပွဲ ပြုလုပ်ဆောင်ရွက်ခဲ့ပါသည်။

    အဆိုပါဟောပြောပွဲတွင် ပြန်ကြားရေးနှင့်ပြည်သူဆက်ဆံရေးဦးစီးဌာနမှ မြို့နယ်ဦးစီးမှူးက အဖွင့်အမှာစကားပြောကြားပြီး သင်တန်းသူများအား ရှေ့ဦးသူနာပြုစုနည်းသင်တန်းနှင့်ပတ်သက်၍ ရှင်းလင်းပြီး လူငယ်နှင့်ကျန်းမာရေးအကြောင်း ဆွေးနွေးခဲ့ပါသည်။ ညောင်တုန်းမြို့နယ်၊ စားသုံးသူရေးရာဦးစီးဌာနမှ ဒေါ်ချိုမီဇင်က စားသုံးသူရေးရာဦးစီးဌာန၏ဆောင်ပုဒ်ဖြစ်သည့် “စားသုံးသူအခွင့်အရေး ဦးစားပေး” ဆိုသည့်အတိုင်း ပြည်သူများသည် မိမိတို့၏အခွင့်အရေးကို သိရှိနားလည်နိုင်ရန် လိုအပ်ပါကြောင်း၊ စားသုံးသူရေးရာဦးစီးဌာနသည် ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားဖွံ့ဖြိုးတိုးတက်စေရန် မျှော်မှန်းဆောင်ရွက်လျက်ရှိပြီး၊ စားသုံးသူကာကွယ်ရေးဥပဒေ ၂၀၁၉ အရ စားသုံးသူကာကွယ်ရေးလုပ်ငန်းစဉ်များအကြောင်း ရှင်းလင်းဆွေးနွေးခဲ့ပါသည်။ စားသုံးသူများသည် မိမိတို့၏အခွင့်အ‌ရေးကိုသိရှိနားလည်ပြီး ကုန်စည်/ဝန်ဆောင်မှုနှင့်ပတ်သက်၍ အမှန်တကယ်နစ်နာဆုံးရှုံးမှုများဖြစ်ပေါ်လာပါက နစ်နာမှုအတွက် စားသုံးသူရေးရာဦးစီးဌာနသို့ Online မှတစ်ဆင့် ဆက်သွယ်တိုင်ကြားလိုပါက DOCA Website၊ DOCA Myanmar Mobile application တွင်ပါရှိသော Consumer Complaint System တိုင်ကြားလွှာပုံစံတွင် အချက်အလက်များဖြည့်သွင်းပြီး တိုင်ကြားနိုင်ပါကြောင်း၊ Consumer Call Center 1535 သို့လည်းကောင်း၊ CICC စင်တာများ၊ လိပ်စာနှင့် ဖုန်းနံပတ်များကိုလည်းကောင်း ဆက်သွယ်တိုင်ကြားနိုင်ပါကြောင်း သိရှိနိုင်ရန် အသိပညာပေးဟောပြောခဲ့ပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးနှင့် ဝန်ထမ်းများသည် (၁၆.၃.၂၀၂၃) ရက်နေ့ နေ့လယ်ပိုင်းက ဖြူးမြို့ပေါ်ရှိ ဆေးဆိုင်များသို့ သွားရောက်၍ စားသုံးသူနစ်နာဆုံးရှုံးမှု ဖြစ်ပေါ်စေမည့် တရားမဝင်ဆေးဝါးများ ရောင်းချမှုရှိ/မရှိကို ဈေးကွက်စောင့်ကြည့် စစ်ဆေးခဲ့ပါသည်။

    အလားတူ စားသုံးသူရေးရာဦးစီးဌာန၊ တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဌာနခွဲစာရေးဦးအောင်ဝင်းတို့သည် ယင်းနေ့ မွန်းလွဲပိုင်းက အုတ်တွင်းမြို့ပေါ်ရှိ ဆေးဆိုင်များသို့ သွားရောက်၍ စားသုံးသူနစ်နာဆုံးရှုံးမှု ဖြစ်ပေါ်စေမည့် တရားမဝင်ဆေးဝါးများ ရောင်းချမှု ရှိ/မရှိကို ဈေးကွက်စောင့်ကြည့်စစ်ဆေးခဲ့ပါသည်။

    မြို့နယ်တာဝန်ခံများသည် တရားမဝင်ဆေးဝါးများ ရောင်းချမှုရှိ/မရှိ ဈေးကွက် စောင့်ကြည့်စစ်ဆေးစဉ် ဆေးဆိုင်ပိုင်ရှင်များအား မြန်မာနိုင်ငံဆေးဝါးမှတ်ပုံတင်ထားခြင်းမရှိသည့် တရားမဝင်ဆေးဝါးများ ရောင်းချခြင်းသည် နိုင်ငံတော်က ရသင့်ရထိုက်သည့် အခွန်ငွေကို ဆုံးရှုံးမှုဖြစ်စေသကဲ့သို့ စားသုံးသူနစ်နာဆုံးရှုံးမှုကိုလည်း ဖြစ်ပေါ်စေသဖြင့် တရားမဝင်ဆေးဝါးများကို ရောင်းချခြင်းမပြုရန်၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့် ကုန်အညွှန်းအမှတ်အသားများ ဖော်ပြထားခြင်းမရှိသော ဆေးဝါးများကို ရောင်း ချခြင်းမပြုရန် အသိပညာပေးခဲ့ကြောင်း သိရပါသည်။

DOCA(ပဲခူး)

       စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဌာနခွဲတာဝန်ခံများဖြစ်ကြသော ဦးစီးမှူးဦးမင်းဇော်(စစ်ဆေးရေးအရာရှိ)နှင့် ဦးစီးမှူး ဦးစောသန်းထိုက်ကျော်တို့သည် ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန ဒု-ကြီးကြပ်ရေးမှူး ဒေါ်မြတ်သန္တာစိုး၊ ခရိုင်ပြည်သူ့ ကျန်းမာရေးဦးစီးဌာနမှ ကျန်းမာရေးကြီးကြပ်(၁) ဦးမိုးကျော်သူ၊ တောင်ငူမြို့နယ်စည်ပင်သာယာရေးအဖွဲ့မှ ဦးစီးအရာရှိဦးအောင်ကိုကိုတို့ ဦးဆောင်သော ပူးပေါင်းအဖွဲ့ဝင်များနှင့်အတူ (၁၄.၃.၂၀၂၃) ရက်နေ့၊ နံနက်ပိုင်းတွင် တောင်ငူမြို့၊ မြို့မဈေးကြီးအတွင်းရှိ ကုန်စုံဆိုင်များသို့ သွားရောက်၍ ဈေးကွက် စောင့်ကြည့်စစ်ဆေးခြင်းကို ဆောင်ရွက်ခဲ့ပါသည်။

       စားသုံးသူရေးရာဦးစီးဌာနအနေဖြင့် ကုန်စည်များတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့်ကုန်အညွှန်းအမှတ်အသားများ ဖော်ပြထားခြင်းရှိ/မရှိနှင့်     စားသုံးသူနစ်နာဆုံးရှုံးမှုဖြစ်စေမည့် ရက်လွန်အစားအသောက်နှင့်     လူသုံးကုန်ပစ္စည်းများ ‌ရောင်းချမှုရှိ/မရှိတို့ကို စစ်ဆေးကြည့်ရှုပြီး မြန်မာဘာသာဖြင့် ကုန်အညွှန်းအမှတ်အသားများ ဖော်ပြထားခြင်းမရှိသော ကုန်စည်များနှင့် ရက်လွန်ကုန်စည်များ ရောင်းချခြင်းမပြုရန် အသိပညာပေးခဲ့ပါ သည်။

         ဆက်လက်၍ ပူးပေါင်းအဖွဲ့သည် ဗိုလ်မှူးဖိုးကွန်းလမ်းပေါ်ရှိဆေးဆိုင်များသို့ သွားရောက်စစ်ဆေးခဲ့ရာ စားသုံးသူရေးရာဦးစီးဌာနအနေဖြင့် ဆေးဝါးများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့်ကုန်အညွှန်းအမှတ်အသားများ ဖော်ပြထားခြင်းရှိ/မရှိနှင့် စားသုံးသူနစ်နာဆုံးရှုံးမှုဖြစ်စေမည့် မှတ်ပုံတင်ထားခြင်းမရှိသောဆေးဝါးများ ရောင်းချခြင်းရှိ/မရှိတို့ကို ကြည့်ရှုစစ်ဆေးခဲ့ပြီး မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းမရှိသော ဆေးဝါးများနှင့် မှတ်ပုံတင်ထားခြင်းမရှိသော ဆေးဝါးများအား ရောင်းချခြင်းမပြုရန် အသိပညာပေးခဲ့ကြောင်း သိရှိရပါသည်။

DOCA(ပဲခူး)

      ၂၀၂၃ ခုနှစ်တွင် ကျရောက်သော ကမ္ဘာ့စားသုံးသူအခွင့်အရေးများနေ့ အထိမ်းအမှတ်အခမ်းအနားအား ပဲခူးမြို့တော်ခန်းမ၌ မတ်လ ၁၅ ရက်နေ့တွင် ကျင်းပပြုလုပ်ခဲ့ပါသည်။ အဆိုပါ အထိမ်းအမှတ်အခမ်းအနားသို့ ပဲခူးတိုင်းဒသကြီး အစိုးရအဖွဲ့၊ ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ ၊ စားသုံးသူရေးရာကော်မတီအဖွဲ့ဝင်များနှင့် ဌာနဆိုင်ရာမှ(၃၅) ဦး၊ ပဲခူးတိုင်းဒေသကြီးအတွင်းရှိ စီးပွားရေးလုပ်ငန်းရှင်(၁၀) ဦး၊ အခြေခံပညာအထက်တန်းကျောင်းများမှ ကျောင်းသား(၁၀၉)ဦး၊ ကျောင်းသူ (၅၀)ဦး၊ စုစုပေါင်း (၂၀၄)ဦး တက်ရောက်ခဲ့ကြောင်း သိရှိရပါသည်။

      ပဲခူးတိုင်းဒေသကြီး အစိုးရအဖွဲ့ ၊ ဝန်ကြီးချုပ်က အဖွင့်အမှာစကားပြောကြားရာတွင် စီးပွားရေးလုပ်ငန်းရှင်တချို့၏ ဝိသမလောဘများကြောင့် စားသုံးသူပြည်သူများ ဘေးအန္တရာယ်ဖြစ်ပွားမှု ၊ တရားမဝင်ကုန်ပစ္စည်းများ များပြားလာမှု ၊ တာဝန်ခံမှု ၊ တာဝန်ယူမှု အားနည်းသော ဝန်ဆောင်မှု များကြောင့် စားသုံးသူပြည်သူများနှင့် နိုင်ငံဖွံ့ဖြိုးတိုးတက်မှုတို့ကို ထိခိုက်မှုများ ရှိနေပါကြောင်း ၊ စားသုံးသူများ၏ ကဏ္ဍဖွံ့ဖြိုးဖို့ ဖော်ဆောင်ရာတွင် စွမ်းအင်ကဏ္ဍကလည်း အ‌ရေးကြီးသော  အခန်း ကဏ္ဍ တစ်ခုအနေဖြင့်  ပါဝင်နေပါကြောင်း ၊ စွမ်းအင်ဆိုင်ရာ ဝန်ဆောင်မှုများကို အသုံးပြုမှု များပြား လာခြင်းနှင့်အတူ သန့်ရှင်းသော စွမ်းအင်ကို အသွင် ကူးပြောင်းသုံးစွဲကြခြင်းဖြင့် စားသုံးသူကဏ္ဍကိုလည်း မြှင့်တင်ပေးရာ ရောက်သည့်အတွက် သန့်ရှင်းသော စွမ်းအင်ပြောင်းလဲသုံးစွဲခြင်းနှင့်အတူ သုံးစွဲကြသည့်စွမ်းအင်များ အလဟဿ မဖြစ်စေရေး အလေးထားသုံးစွဲကြဖို့ တိုက်တွန်း ပြောကြား ခဲ့ပါသည် ။

   ထို့နောက် စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးက ကမ္ဘာ့စားသုံးသူအခွင့်အရေးများနေ့ အခမ်းအနား ကျင်းပရခြင်း၏ရည်ရွယ်ချက်ကို ရှင်းလင်းဆွေးနွေးပြီး သက်ဆိုင်ရာကဏ္ဍအလိုက် ဝာာဝန်ခံများက power point များဖြင့် ရှင်းလင်းဆွေးနွေးခဲ့ပြီးနောက် တက်‌ရောက်လာသည့် ကျောင်သား/ကျောင်းသူများက ဉာဏ်စမ်းပဟေဋိများ ဖြေဆိုခဲ့ပြီး ဆုလက်ဆောင်များအား ပေးအပ်ခဲ့ကြောင်း သိရှိရပါသည် ။

DOCA(ပဲခူး)

    ရခိုင်ပြည်နယ်၊ စားသုံးသူရေးရာဦးစီးဌာနမှ အမ်းမြို့နယ်တာဝန်ခံ ဦးအောင်မင်းခိုင်(ဒု-ဦးစီးမှူး)နှင့် ဝန်ထမ်းများသည် (၁၇-၃-၂၀၂၃) ရက်နေ့၊ နံနက် (၁၁:၀၀) နာရီအချိန်တွင် အမ်းမြို့နယ်၊ ဒိုင်ကြီးကျေးရွာရှိ “ဧဒင်” အမှတ်တံဆိပ်ဖြင့် ဆပ်ပြာထုတ်လုပ်သည့်လုပ်ငန်းနေရာသို့သွားရောက်၍ လုပ်ငန်းရှင်နှင့်တွေ့ဆုံဆွေးနွေးခြင်း ဆောင်ရွက်ခဲ့ပါသည်။

      မြို့နယ်တာဝန်ခံ ဦးအောင်မင်းခိုင်က လုပ်ငန်းရှင်အားတွေ့ဆုံရာ ဆပ်ပြာလုပ်ငန်းအခြေအနေကိုမေးမြန်းရာ လုပ်ငန်းရှင်က “ဧဒင်” အမှတ်တံဆိပ်ဖြင့် ဆပ်ပြာရည်၊ ဆပ်ပြာ Cream လုပ်ငန်းအား တစ်နိုင်တစ်ပိုင်လုပ်ကိုင်ခြင်းဖြစ်ကြောင်း၊ ဆပ်ပြာရည် (၁) မျိုးနှင့် ဆပ်ပြာ Cream (၁) မျိုးထုတ်လုပ်ပါကြောင်း၊ တစ်ရက်ထုတ်လုပ်နိုင်မှုမှာ ဆပ်ပြာရည် (၁) လီတာနှင့် (၀.၅) လီတာ၊ ပေါင်း (၁၀၀) လီတာမှ (၁၅၀) လီတာထိ ထုတ်လုပ်ပါကြောင်း၊ ဆပ်ပြာရည် (၁) လီတာတစ်ဘူးလျှင် လက်လီ (၁၀၀၀) ကျပ်နှင့် လက်ကား (၉၀၀) ကျပ်ဖြင့် ရောင်းချပါကြောင်း၊ ဆပ်ပြာရည် (၀.၅) လီတာအတွက် ဘူးခွံထုပ်ပိုးမှုသည် Tube Press ပုံစံဖြစ်၍ ကုန်ကြမ်းဘူးခွံတန်ဖိုးကြီးမြင့်သဖြင့် လက်လီ(၁)ဘူးလျှင် (၁၂၀၀) ကျပ်နှင့် လက်ကား(၁)ဘူးလျှင် (၁၀၀၀) ကျပ်ဖြင့် ရောင်းချပါကြောင်း၊ ဆပ်ပြာ Cream တစ်ရက်ထုတ်လုပ်မှုမှာ (၂၀) ဘူးမှ (၂၅) ဘူးထိထုတ်လုပ်ပြီး လက်လီတစ်ဘူးလျှင် (၁၅၀၀) ကျပ်၊ လက်ကားတစ်ဘူးလျှင် (၁၃၀၀) ကျပ်ဖြင့် ရောင်းချပါကြောင်းနှင့် လက်ရှိအချိန်တွင် အမ်းမြို့ပေါ်ရှိ ရပ်ကွက်၊ ကျေးရွာများတွင်သာ ရောင်းချဖြန့်ဖြူးနိုင်ပါကြောင်း သိရှိရပါသည်။

      မြို့နယ်တာဝန်ခံ ဦးအောင်မင်းခိုင်က  စားသုံးသူကာကွယ်ရေးဥပဒေ ၂၀၁၉ အရ မည်သည့်စီးပွားရေးလုပ်ငန်းရှင်မဆို ထုတ်လုပ်သည့်ကုန်ပစ္စည်းများပေါ်တွင် ကုန်စည်အမျိုးအစားအလိုက် ဖော်ပြရမည့်ကုန်အညွှန်းအမှတ်အသားများနှင့်စပ်လျဉ်း၍ လိုက်နာဆောင်ရွက်ရမည့်အချက်များအား အသိပညာပေးမှုများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)