သတင်းနှင့် လှုပ်ရှားမှုများ

     ပန်းဂေါ်ဖီသည် ဟင်းသီးဟင်းရွက်တစ်မျိုးဖြစ်ပြီး သဲဆန်သောနှုန်းမြေအမျိုးအစားတွင် အောင်မြင်ဖြစ်ထွန်းပါသည်။ ပန်းဂေါ်ဖီကို ပြည်ခရိုင်၊ ရွှေတောင်မြို့နယ်ရှိ ဝါးတောအုပ်စု၊ ဝါးတောကျေးရွာတွင် စိုက်ပျိုးထားရှိပါသည်။ ပန်းဂေါ်ဖီကို စက်တင်ဘာလ နှင့်အောက်တိုဘာလတို့တွင် စတင်စိုက်ပျိုးကြပြီး စိုက်ပျိုးသည့်မျိုးမှာ ဘူးမန်း(၁၅၃)မျိုးကို စိုက်ပျိုးကြောင်းသိရှိရပါသည်။ ဝါးတောကျေးရွာအနေဖြင့် ပန်းဂေါ်ဖီကို (၄)ဧကခန့်စိုက်ပျိုးထားကြောင်း သိရှိရပါသည်။

     ရွှေတောင်မြို့နယ်၊ ဝါးတောအုပ်စု၊ ဝါးတောကျေးရွာရှိ ပန်းဂေါ်ဖီ စိုက်ပျိုးသော တောင်သူ ဦးမောင်မြင့်နှင့်တွေ့ဆုံရန် စားသုံးသူရေးရာဦးစီးဌာန၊ ပြည်ခရိုင်ရှိ ရွှေတောင်မြို့နယ်တာဝန်ခံ ဦးအောင်နိုင်ဦးနှင့်ဝန်ထမ်းများသည် (၇-၃-၂၀၂၃) ရက်နေ့၊ နေ့လယ်ပိုင်းတွင်ကွင်းဆင်း၍ ပန်းဂေါ်ဖီဈေးနှုန်း၊ ဈေးကွက်အခြေအနေ၊ တစ်ဧကကုန်ကျစရိတ်နှင့် အကျိုးအမြတ်များကို ‌မေးမြန်းခဲ့ပါသည်။ အဆိုပါတောင်သူက ပန်းဂေါ်ဖီ (၀.၂၅)ဧကစိုက်ပျိုးထားရှိပြီး၊ စိုက်ပျိုးထုတ်လုပ် ကုန်ကျစရိတ်အနေဖြင့် ကျပ်(၂)သိန်းခန့်ကုန်ကျသည်ဟု သိရှိရပါသည်။ ပန်းဂေါ်ဖီစိုက်ပျိုးဧက (၀.၂၅) ဧကတွင် ရောင်းတန်းဝင်ပန်းဂေါ်ဖီအပွင့် (၃၀၀၀)ပွင့်ခန့်ထွက်ရှိပါသည်။ ရောင်းချသည့်ဈေးနှုန်း များမှာ တစ်ပွင့်လျှင် ခြံဈေး(၃၀၀)ကျပ်ခန့်ရရှိသဖြင့် တောင်သူအကျိုးအမြတ်အနေဖြင့် (၇)သိန်း ကျပ်ခန့် ရရှိသည်ဟု သိရှိရပါသည်။ ထို့ကြောင့် ပန်းဂေါ်ဖီတစ်ဧကစိုက်ပျိုးလျှင် ပျမ်းမျှအသားတင်အမြတ်မှာ (၂၈)သိန်းခန့်ရရှိနိုင်သည်ဟု ခန့်မှန်းသိရှိရပါသည်။ ရွှေတောင်ဒေသမှ ထွက်ရှိသော ပန်းဂေါ်ဖီများကို ခြံထဲအထိဆင်း၍ ဝယ်ယူမှုရှိသည့်အပြင် ရွှေတောင်မြို့ရှိဈေးများနှင့် ပြည်ဈေးကွက်သို့လည်း တင်ပို့ရောင်းချမှုရှိပြီး ရန်ကုန်မြို့ရှိ ကုန်စိမ်းဈေးများသို့လည်း တင်ပို့ရောင်းချကြောင်း သိရှိရပါသည်။

     ဝါးတောကျေးရွာတွင် ပန်းဂေါ်ဖီစိုက်ပျိုးသူတောင်သူ(၁၀)ဦးခန့်ရှိပြီး စိုက်ပျိုးသည့်မျိုးနှင့် အပင်ပြုစုစောင့်ရှောက်မှုကောင်းလျှင်ကောင်းသလို အထွက်နှုန်းကောင်းပြီး အကျိုးအမြတ်လည်းရရှိနိုင်သဖြင့် ရာသီချိန်သီးနှံအဖြစ် စိုက်ပျိုးလျှင်တွက်ခြေလည်းကိုက်သည့်သီးနှံဖြစ်ပါသည်။

DOCA(ပဲခူး)

     ကမ္ဘာ့စားသုံးသူအခွင့်အရေးများနေ့၊ အထိမ်းအမှတ် အခမ်းအနားကို ၂၀၂၃ခုနှစ်၊ မတ် လ(၁၅)ရက်နေ့၊ နံနက်(၀၉;၃၀)နာရီအချိန်တွင် စားသုံးသူရေးရာဦးစီးဌာန ၊ ပြည်နယ်ဦးစီးမှူးရုံး အစည်းအဝေးခန်းမ၌အစီအစဉ်(၆)ရပ်ဖြင့် ကျင်းပပြုလုပ်ခဲ့ပြီး အခမ်းအနားသို့ ဌာနဆိုင်ရာများ၊ KCCI အသင်းဥက္ကဌနှင့်အဖွဲ့ဝင်များ၊ ပြည်နယ်သောက်ရေသန့်အသင်းဥက္ကဌ၊ ပြည်နယ်ပြောင်း အသင်းဥက္ကဌ၊ ပြည်နယ်စက်သုံးဆီအသင်းဥက္ကဌနှင့်အဖွဲ့ဝင်များ၊ ဖိတ်ကြားထားသူများနှင့်ဉာဏ်စမ်းပဟေဠိမေးမြန်းခြင်းအစီအစဉ်တွင် ဆုရရှိသူများ စုစုပေါင်း(၅၀)ဦး တက်ရောက်ခဲ့ကြပါသည်။

  ရှေးဦးစွာ ကမ္ဘာ့စားသုံးသူအခွင့်အရေးများနေ့သို့ တက်ရောက်လာကြသော ဧည့်သည်တော်များအား ကိုဗစ်-၁၉ကာကွယ်ရေး စည်းကမ်းသတ်မှတ်ချက်များနှင့်အတူ Masks များ ဖြန့်ဝေခြင်း၊ အသိပညာပေး လက်ကမ်းစာစောင်များဖြန့်ဝေခြင်း၊ ကမ်ပိန်းစတစ်ကာများ ကပ်နှံခြင်း၊ မော်တော်ယာဉ်များအား ကားကမ်ပိန်းစတစ်ကာများ ကပ်နှံခြင်းတို့ဆောင်ရွက်ပြီး ပြည်နယ်စားသုံးသူရေးရာကော်မတီ ဥက္ကဌကိုယ်စား မီးသတ်ဦးစီးဌာနမှ ဒုတိယပြည်နယ်ဦးစီးမှူး ဦးခင်မောင်သန်းက အဖွင့်အမှာစကားပြောကြားခဲ့ကာ ပြည်နယ်စားသုံးသူရေးရာကော်မတီအတွင်းရေးမှူးကိုယ်စား ခရိုင်ဦးစီးမှူးဦးမိုးညွန့်ဦးက ကမ္ဘာ့စားသုံးသူအခွင့်အရေးများနေ့ ဖြစ်ပေါ်လာပုံကို ရှင်းလင်းဆွေးနွေးတင်ပြပြီးနောက် ကမ္ဘာ့စားသုံးသူအခွင့်အရေးများနေ့ အထိမ်းအမှတ် Viedo clip များ ဖွင့်လှစ်ပြသခဲ့ပါသည်။      

   ဆက်လက်၍ စားသုံးသူကာကွယ်ရေးဆိုင်ရာ ဉာဏ်စမ်းပဟေဠိပြိုင်ပွဲတွင် ပထမ၊ ဒုတိယ၊ တတိယဆုရရှိသူများအား ဆုများပေးအပ်ချီးမြှင့်ခဲ့ပြီး အခမ်းအနားကို (၁၀;၃၀)အချိန်တွင် ရုပ်သိမ်းခဲ့ကြောင်း သတင်းရရှိပါသည်။

DOCA(ကယား)

      စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်ကျော်ဦးသည် ၁၇.၃.၂၀၂၃ ရက်နေ့တွင် ဗန်းမော်မြို့နယ်၊ စည်ပင်သာယာရေးအဖွဲ့ မြို့‌တော်ခန်းမ၌ စားသုံးသူ ကာကွယ်ရေးအား အသိပညာပေးဟောပြောခဲ့ပါသည်။

      အဆိုပါအသိပညာပေးဟောပြောပွဲတွင် ခရိုင်ဦးစီးမှူးက စားသုံးသူကာကွယ်ရေးဥပ‌ဒေဖြစ်ပေါ်လာပုံ၊ စားသုံးသူရေးရာဦးစီးဌာန၏ရည်မှန်းချက်၊ မျှော်မှန်းချက်များကို ရှင်းလင်းဆွေးနွေးကာ ၂၀၁၉ခုနှစ် မတ်လ(၁၅) ရက်နေ့တွင် ပြည်ထောင်စုလွှတ်တော်ဥပဒေအမှတ် ၉။ ဖြင့်ပြဋ္ဌာန်းခဲ့သည့် စာသုံးသူကာကွယ်ရေး ဥပ‌ဒေပါပြဋ္ဌာန်းချက်များအရ စားသုံးသူအခွင့်အရေးများဖြစ်သည့် စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊ ကုန်စည် သို့မဟုတ် ဝန်ဆောင်မှုကိုရွေးချယ်ဝယ်ယူ အသုံးပြုရာတွင် လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက်အထားရယူခွင့်ရှိခြင်း၊ စားသုံးသူနစ်နာ ဆုံးရှုံးမှုနှင့်စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့်တိုင်ကြားခွင့်ရရှိနိုင်စေခြင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့်ဖြစ်ပေါ်လာသည့် နစ်နာဆုံးရှုံးများနှင့်စပ်လျဉ်း၍ ကုစားခွင့်ရရှိခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့်လိုအပ်သောသတင်းအချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန်တွင် သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင်နေထိုင်နိုင်ခွင့်ရရှိစေခြင်း စသည့်အချက်များအား အသိပညာပေးဟောပြောဆွေးနွေးခဲ့ပြီး ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့် နစ်နာဆုံးရှုံးမှုများရှိပါက ခရိုင်စားသုံးသူသတင်းပြန်ကြားရေးနှင့် တိုင်ကြားမှုလက်ခံ‌ဆောင်ရွက်ရေးစင်တာ (CICC) သို့လည်းကောင်း၊ Call Center ၁၅၃၅ သို့လည်းကောင်း၊ Website မှတစ်ဆင့်လည်း တိုင်ကြားနိုင်ပါကြောင်း အသိပညာပေးဟောပြောခဲ့ပါသည်။

DOCA(ကချင်)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ပခုက္ကူခရိုင်ဦးစီးမှူး၊ ဂန့်ဂေါခရိုင်ဦးစီးမှူးနှင့် ဝန်ထမ်းများသည် ကမ္ဘာ့စားသုံးသူအခွင့်အရေးများနေ့အား ဂုဏ်ပြုသောအားဖြင့် (၁၅.၃.၂၀၂၃)ရက်နေ့၊ နေ့လယ်(၁၃:၃၀)နာရီအချိန်တွင် စိုက်ပျိုးရေးဦးစီးဌာနသို့ သွားရောက်၍ စားသုံးသူကာကွယ်ရေး အသိပညာပေးဟောပြောပွဲကို ကျင်းပခဲ့ပါသည်။

ခရိုင်ဦးစီးမှူး ဦးဝေဠုအောင်က ဆွေးနွေးရာတွင် ဌာန၏သမိုင်းကြောင်းနှင့် လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေး(၂၀၁၉)ဥပဒေပါ အကြောင်းအရာများအား အသေးစိတ်ရှင်းလင်းဆွေးခဲ့ရာ ကုန်စည်နှင့်ဝန်ဆောင်မှုကို ဝယ်ယူသုံးစွဲရာတွင် နစ်နာဆုံးရှုံးမှုများ ဖြစ်ပေါ်လာပါက ပြောရေးဆိုခွင့်၊ တိုင်ကြားနိုင်ခွင့်၊ ပြန်လည်ကုစားနိုင်ခွင့်များ စသည့်အခွင့်အရေးများရှိပါကြောင်း၊ CICC ရုံးများ ဖွင့်လှစ်ထားရှိပြီးဖြစ်၍ နစ်နာသည့်စားသုံးသူများက တိုင်ကြားနိုင်ပါကြောင်း၊ Facebook စာမျက်နှာ၊ DOCA Myanmar Mobile Applicatiom နှင့် Consumer Call Center 1535 တို့တွင် တိုင်ကြားနိုင်ကြောင်းတို့ကို အကျယ်တဝင့်ရှင်းလင်းဆွေးနွေးခဲ့ပါသည်။

ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် ကမ္ဘာ့စားသုံးသူအခွင့်အရေးများနေ့ အထိမ်းအမှတ်အဖြစ် (၁၉၈၃)ခုနှစ်၊ မတ်လ(၁၅)ရက်နေ့မှစ၍ ကမ္ဘာတဝှမ်းကျင်းပခဲ့ကြောင်း၊ အပြည်ပြည်ဆိုင်ရာစားသုံးသူများအဖွဲ့မှ သတ်မှတ်ပေးသည့် ဆောင်ပုဒ်ဖြင့် နိုင်ငံအသီးသီးက ကမ္ဘာ့စားသုံးသူအခွင့်အရေးများနေ့အား ကျင်းပခဲ့ကြကြောင်း၊ မြန်မာနိုင်ငံသည်လည်း ၂၀၁၆ ခုနှစ်မှ   ၂၀၂၃ခုနှစ်အထိ နှစ်အလိုက်သတ်မှတ်ထားသော ကမ္ဘာ့စားသုံးသူအခွင့်အရေးများနေ့ဆောင်ပုဒ်များဖြင့် ကျင်းပခဲ့ကြောင်း၊ စားသုံးသူများအနေဖြင့် အလေ့အကျင့်ကောင်းများကို ဆက်လက်ထိန်းသိမ်းသွားဖို့ လိုအပ်ကြောင်း၊ ၂၀၂၃ခုနှစ်အတွက် ကမ္ဘာ့စားသုံးသူအခွင့်အရေးများနေ့ ဆောင်ပုဒ်မှာ"စားသုံးသူကဏ္ဍ မြှင့်တင်ဖို့ သန့်ရှင်းစွမ်းအင်ကူးပြောင်းစို့" Empowering Consumers Through Clean Energy Transitions ဖြစ်ကြောင်း၊ ဆောင်ပုဒ်အတိုင်း အလေ့အထများကို လိုက်ပါဆောင်ရွက်ရန်လိုအပ်ကြောင်း၊ သန့်ရှင်းစွမ်းအင်ဆိုသည်မှာ ပြန်လည်ပြည့်ဖြိုးမြဲစွမ်းအင်များဖြစ်ပြီး လေစွမ်းအင်၊ နေရောင်ခြည်စွမ်းအင်၊ ဇီဝစွမ်းအင်နှင့် ရေအားလျှပ်စစ်ဟူ၍ အမျိုးအစား(၄)မျိုး ရှိပါကြောင်း၊ ၎င်းတို့ကို အသုံးပြုခြင်းဖြင့် သဘာဝပတ်ဝန်းကျင်နှင့် လေထုညစ်ညမ်းခြင်းကိုလျော့ချနိုင်ခြင်း၊ စွမ်းအင်ကို ချွေတာနိုင်စေခြင်း၊ စွမ်းအင်လုံလောက်မှုကိုဖြစ်စေခြင်း စသည့်အကျိုးကျေးဇူးများ ရရှိစေနိုင်ကြောင်း၊ လူသားများ အသက်ရှင်ဖို့ စွမ်းအင်လိုအပ်ကြောင်း၊ စွမ်းအင်ကို အသုံးပြုရာတွင် ဆန်းစစ်ရမှာဖြစ်ပြီး ဉာဏ်ပညာရှိစွာ အသုံးပြုရမည်ဖြစ်ကြောင်း၊ ဆိုလာ၊ လေအားလျှပ်စစ်တို့ကို ပြောင်းလဲသုံးစွဲရန် လိုအပ်ကြောင်း၊ လျှပ်စစ်သုံးစွဲမှုကိုလည်း ချွေတာဖို့လိုအပ်ကြောင်း၊ လျှပ်စစ်မီးသီး/ ဖန်ချောင်းများအစား LED မီးများ ပြောင်းလဲသုံးစွဲရန်နှင့် သန့်ရှင်းသော စွမ်းအင်ကူးပြောင်းသုံးစွဲရေးတွင် စားသုံးသူများ ပါဝင်ဆောင်ရွက်ခြင်းဖြင့် စားသုံးသူကဏ္ဍမြှင့်တက်လာမည်ဖြစ်ကြောင်း ရှင်းလင်းဆွေးနွေးခဲ့ပါသည်။

ဒုတိယဦးစီးမှူး ဒေါ်မြင့်မြင့်သန်းက စားသုံးသူများရရှိမည့် အခွင့်အရေးနှင့်တာဝန်များအား အသေးစိတ်ဆွေးနွေးခဲ့ရာ အခန်း(၁၈)ပါ ကုန်အညွှန်းအမှတ်အသားဖော်ပြချက်(၈)ချက်အား သတိပြုဝယ်ယူစေလိုကြောင်း၊ ကုန်အညွှန်းအမှတ်အသားပြည့်စုံမှုမရှိသော ထုတ်ကုန်များအား စစ်ဆေးရေးအရာရှိများ ခန့်အပ်ကာ ဈေးကွက်စောင့်ကြည့်စစ်ဆေးလျက်ရှိပြီး ဘေးအန္တရာယ်ကင်းရှင်းစွာ အသုံးပြုနိုင်မည်ဖြစ်ကြောင်း၊ သတင်းအချက်အလက် ပြည့်စုံမှန်ကန်စွာ သိရှိခွင့်၊ ပြေစာ အထောက်အထားများလည်း ရယူထားစေလိုကြောင်း စသည်တို့ကို အသေးစိတ်ရှင်းလင်း ဆွေးနွေးခဲ့ပါသည်။ ခရိုင်ဦးစီးမှူးက တက်ရောက်လာသည့်ဝန်ထမ်းများ၏ မေးမြန်းလာမှုကို ပြန်လည်ဖြေကြားခဲ့၍ စားသုံးသူကာကွယ်ဥပဒေ(၂၀၁၉)ပါအချက်များအား ပြန်လည်မေးမြန်းရာ ဖြေဆိုနိုင်သည့်ဝန်ထမ်းများအား အမှတ်တရလက်ဆောင်နှင့် စားသုံးသူကာကွယ်ရေး(၂၀၁၉)ဥပဒေစာအုပ်များ၊ ကမ္ဘာ့စားသုံးသူအခွင့်အရေးများနေ့ လက်ကမ်းစာစောင်များအား ဖြန့်ဝေပေးခဲ့ပါကြောင်း သတင်းရရှိပါသည်။

တင်တင်မော်(ပခုက္ကူ)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူးနှင့်ဝန်ထမ်းများသည် ကမ္ဘာ့စားသုံးသူအခွင့်အရေးများနေ့အား ဂုဏ်ပြုသောအားဖြင့် (၁၅.၃.၂၀၂၃)ရက်နေ့၊ နံနက်(၁၀:၃၀)အချိန်တွင် ကျေးလက်ဒေသဖွံ့ဖြိုးတိုးတက်ရေးဦးစီးဌာနသို့ သွားရောက်၍ စားသုံးသူကာကွယ်ရေး အသိပညာပေးဟောပြောပွဲကို ကျင်းပပြုလုပ်ခဲ့ပါသည်။

ခရိုင်ဦးစီးမှူး ဦးဝေဠုအောင်က ဆွေးနွေးရာတွင် ဌာန၏သမိုင်းကြောင်းနှင့်  လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ၊  စားသုံးသူကာကွယ်ရေးဥပဒေ(၂၀၁၉)ပါ အကြောင်းအရာများ၊ ကမ္ဘာ့စားသုံးသူအခွင့်အရေးများနေ့ ဖြစ်ပေါ်လာပုံ၊ ၂၀၁၆ ခုနှစ်မှစ၍ နှစ်စဉ်ကျင်းပခဲ့သည့် မြို့ကြီးများနှင့် ဆောင်ပုဒ်များအကြောင်းနှင့် ယနေ့ကျရောက်သော ၂၀၂၃ခုနှစ်၏ ဆောင်ပုဒ် "စားသုံးသူကဏ္ဍမြှင့်တင်ဖို့ သန့်ရှင်းစွမ်းအင်ကူးပြောင်းစို့"အကြောင်းတို့ကို ကျယ်ကျယ်ပြန့်ပြန့်သိရှိစေရန် အသိပညာပေးဆွေးနွေးဟောပြောခြင်း၊ စားသုံးသူများအနေဖြင့် ကုန်စည်များဝယ်ယူသုံးစွဲရာတွင် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသားဖော်ပြချက်များအကြောင်းအား အသေးစိတ်ရှင်းလင်းဆွေးနွေးခြင်း၊ စားသုံးသူပြည်သူများအတွက် ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံ စိတ်ချမှုရှိစေရေးတို့ကို ဆောင်ရွက်နေရုံသာမက စားသုံးသူနစ်နာဆုံးရှုံးမှုများအတွက် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ(CICC) ဖွင့်လှစ်ထားရှိမှုအား Power Point ဖြင့် စားသုံးသူထိခိုက်နစ်နာမှုနှင့်စပ်လျဉ်း၍ တိုင်ကြားမှုနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စများ စုံစမ်းမေးမြန်းရန်အတွက် Consumer Call Center (၁၅၃၅) အား ဖွင့်လှစ်ထားကြောင်းတို့ကို အသေးစိတ်ရှင်းလင်းကာ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်းကိုလည်း အကျယ်တဝင့်ဆွေးနွေးခဲ့ပါသည်။

စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးက ဆွေးနွေးရာ ဦးစီးဌာန၏ ဆောင်ပုဒ်ဖြစ်သော စားသုံးသူအခွင့်အရေးဦးစားပေးရန်မှာ အလွန်အရေးကြီးသောကြောင့် ယခုလို လာရောက် အသိပညာပေးရခြင်းဖြစ်ကြောင်း၊ ကုန်စည်နှင့်ဝန်ဆောင်မှုများ ရယူသုံးစွဲရာတွင် စိတ်ကျေနပ်မှုရရှိရန် လိုအပ်ကြောင်း၊ ကုန်အညွှန်းအမှတ်အသားဖော်ပြချက်ပါ (၈)ချက်အား သတိပြုဝယ်ယူစေလိုကြောင်း၊ ကုသခြင်းထက် ကာကွယ်ခြင်းက ပို၍ကောင်းမွန်သောကြောင့် ဌာနမှဝန်ထမ်းများကလည်း လုပ်ငန်းရှင်များဆီသို့ သွားရောက်အသိပညာပေးလျက်ရှိကြောင်းနှင့် စစ်ဆေးရေးအရာရှိများမှလည်း ဈေးကွက်စောင့်ကြည့်စစ်ဆေးပေးလျက်ရှိပြီး ကုန်အညွှန်းအမှတ်အသားပြည့်စုံမှုမရှိသော ထုတ်ကုန်များအား စားသုံးသူကာကွယ်ရေးဥပဒေ(၂၀၁၉)အရ ဈေးကွက်အတွင်းမှ လျော့နည်းပပျောက်သွားပြီး ဘေးအန္တရာယ်ကင်းရှင်းစွာ အသုံးပြုလာနိုင်မည်ဖြစ်ကြောင်း၊ သတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာအထောက်အထားများလည်း ရယူထားစေလိုကြောင်း၊ စိတ်ကြိုက်ရွေးချယ်ခွင့်နှင့်နစ်နာမှုများ ရှိပါက မှန်ကန်သောအထောက်အထားများနှင့်အတူ ဌာနသို့ လာရောက်တိုင်ကြားခွင့်ရှိပြီး ကုစားခွင့်ရရှိစေလိုကြောင်း၊ "အသိတစ်လုံး အမြတ်ဆုံး"ဖြစ်၍ ယခုသိရှိပြီးသော အကြောင်းအရာများအား မိမိကိုယ်တိုင်လိုက်နာ၍ အသိပညာများအား ထပ်ဆင့်မျှဝေစေလိုကြောင်း၊ စားသုံးသူအခွင့်အရေးများအား သိရှိပြီး ရယူနိုင်မှသာလျှင်  အနာဂတ်တွင် ကောင်းမွန်သာယာသောဘဝ၌ နေထိုင်နိုင်ရန်အတွက် စားသုံးသူများ၊ စီးပွားရေးလုပ်ငန်းရှင်များ၊ ဌာနဆိုင်ရာများ၊ NGO၊ INGO  အသင်းအဖွဲ့များအားလုံး ဝိုင်းဝန်းပူးပေါင်းဆောင်ရွက်သွားရန် လိုအပ်ကြောင်း၊ စားသုံးသူများတွင် တာဝန်များပါရှိ၍ တိကျစွာလိုက်နာရန် လိုအပ်ကြောင်း ကျယ်ကျယ်ပြန့်ပြန့် ဆွေးနွေးခဲ့ပါသည်။ တက်ရောက်လာသည့်ဝန်ထမ်းများမှ မေးမြန်းလာမှုများအား ခရိုင်ဦးစီးမှူးက ပြန်လည်ဖြေကြားပေးခဲ့ပြီး ဆွေးနွေးမှုများအပေါ် နားလည်နိုင်သည့်စွမ်းရည်မည်မျှရှိကြောင်း မေးမြန်းခြင်းနှင့် ဖြေဆိုနိုင်သူများအား အမှတ်တရလက်ဆောင်များပေးခဲ့ကြောင်းနှင့် စားသုံးသူကာကွယ်ရေးဥပဒေ(၂၀၁၉)စာအုပ်နှင့် ကမ္ဘာ့စားသုံးသူအခွင့်အရေးများနေ့ လက်ကမ်းစာစောင်များအား ဖြန့်ဝေပေးခဲ့ပါကြောင်း သတင်းရရှိပါသည်။

နွယ်နွယ်အေး(ပခုက္ကူ)