သတင်းနှင့် လှုပ်ရှားမှုများ

     စားသုံးဆီများသတ်မှတ်အရည်အသွေး၊ စံချိန်စံညွှန်းများနှင့်ပြည့်မီစေရေး ၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများကိုသုံးစွဲနိုင်ရေး၊ဈေးနှုန်းတည်ငြိမ်စွာဖြင့် ဝယ်ယူသုံးစွဲနိုင်စေရေးတို့အတွက်  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန   ၊  စားသုံးဆီတင်သွင်းသို လှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ ကြီးကြပ်မှုဖြင့် ပြည်ပမှတင်သွင်းလာသည့် စားအုန်းဆီများအား  စားသုံးဆီတင်သွင်းသည့်ကုမ္ပဏီများက  သတ်မှတ်ရည်ညွှန်းဈေးနှုန်းဖြင့် လက်ကားကုန်သည်များကို  ဖြန့်ဖြူးရောင်းချပေးစေခဲ့ရာ အဆိုပါစားအုန်းဆီများကို မန္တလေးတိုင်းဒေသကြီး၊ ညောင်ဦးခရိုင်၊  ကျောက်ပန်းတောင်းမြို့နယ်၊  ဆီကုန်သည်နှင့်ဆီလုပ်ငန်းရှင်ကြီးများအသင်းမှ  သတ်မှတ်ရည်ညွှန်းဈေးနှုန်းများဖြင့်   ဝယ်ယူ၍ မြို့နယ်အတွင်းနေ   စားသုံးသူပြည်သူများအတွက် ဈေးနှုန်း သက်သာစွာဝယ်ယူနိုင်ရေးအလို့ငှာ  မြို့နယ်စားသုံးသူရေးရာဦးစီးဌာန၏ ကြီးကြပ်မှုဖြင့် ရပ်ကွက်၊ ကျေးရွာများသို့ Mobile စနစ်ဖြင့် လှည့်လည်၍ ရောင်းချပေးလျက်ရှိပါသည်။ ၂၀၂၃ ခုနှစ်၊ မတ်လ (၉)ရက်နေ့၌ အောင်မင်္ဂလာရပ်ကွက်၊ စံပြရပ်ကွက်၊ လွတ်လပ်ရေးရပ်ကွက်၊ တံခါးကြီးကျေးရွာနှင့် ရွာတန်းရှည်ကျေးရွာတို့တွင် နေရာ(၅)နေရာခွဲ၍ Mobile စနစ်ဖြင့်လှည်လည်ရောင်းချခဲ့ကြောင်းနှင့် ထိုသို့ရောင်းချရာတွင် စားအုန်းဆီတစ်ပိဿာလျှင် (၅၀၀၀)ကျပ်ဖြင့် အောင်မင်္ဂလာရပ်ကွက်တွင် ဆီပိဿာ(၃၃၀)ပိဿာ၊ စံပြရပ်ကွက်တွင်(၂၂၀)ပိဿာ၊ လွတ်လပ်ရေးရပ်ကွက်တွင်(၃၃၀)ပိဿာ၊ တံခါးကြီးကျေးရွာတွင် (၃၃၀)ပိဿာနှင့်ရွာတန်းရှည်ကျေးရွာတွင်(၃၃၀)ပိဿာရောင်းချခဲ့ကြောင်း၊ စုစုပေါင်းဆီပိဿာချိန်(၁၅၄၀)ပိဿာရောင်းချပေးခဲ့ပါကြောင်း၊ အဆိုပါရောင်းချမှု အား  စားသုံးသူရေးရာဦးစီးဌာန၊ ကျောက်ပန်းတောင်းမြို့နယ်တာဝန်ခံနှင့် တာဝန်ရှိသူများက ကွင်း ဆင်းကြီးကြပ်၍ လိုအပ်သည်များကို သက်ဆိုင်ရာရပ်ကွက်ကျေးရွာအုပ်စု အုပ်ချုပ်ရေးမှူးများ၊ ရပ်မိရပ်ဖများနှင့် ညှိနှိုင်းဆောင်ရွက်ပေးလျက်ရှိကြောင်းနှင့် ယခုကဲ့သို့ပင် ကျန်ရှိနေသေးသောရပ်ကွက်၊ ကျေးရွာများသို့ Mobile စနစ်ဖြင့်   ဆက်လက်ရောင်းချပေးသွားမည်ဖြစ်ပါကြောင်း မြို့နယ်ဆီကုန်သည်နှင့် ဆီလုပ်ငန်းရှင်ကြီးများအသင်း ဥက္ကဌထံမှ သိရှိရပါသည်။

DOCA(မန္တလေး)

     သားငါးဈေးနှုန်းများကြီးမြင့်လာသည်နှင့်အမျှ ကြက်ဥဈေးမှာလည်း ရေမြင့်လေလေ ကြာမြင့်လေလေ ဆိုသကဲ့သို့ ဈေးမြင့်တက်လာခဲ့ပါသည်။ အခြေခံလူတန်းစားများအတွက် ကြက်ဥသည် မပါမဖြစ် ဟင်းလျာတစ်ခုလို့ပင်ဖြစ်ပါကြောင်း၊ ကြက်ဥမှာလည်း သူအတန်းအစားနှင့် သူရှိကြောင်း၊ မေးမြန်းကြည့်ရာတွင် တစ်နေ့လုပ်တစ်နေ့စားအဖို့ ကြက်ဥရေလုံပြုတ်ဖြစ်ပြီ၊ လူလတ်တန်းစားအဖို့ ကြက်ဥကို ပုံစံအမျိုးမျိုးဖြင့် ကြက်ဥမွှေကြော် ၊ ကြက်ဥဟက်ပဒိုက် ၊ ကြက်ဥကြော်ချက် ၊ ကြက်ဥမွှေချက် ၊ ကြက်ဥပေါင်းချက် တချို့က ခွန်အားပြည့်ရန်  စပါကလင်ကို ကြက်ဥနှင့် ရောမွှေကာသောက်ကြကြောင်း သိရှိရပါသည်။ မေးမြန်းသူ၏အဖြေကြောင့် ကျွန်တော်တောင် နေပြည်တော်တွင် တာဝန်ထမ်းဆောင်စဉ်က အတူနေဖော် သူငယ်ချင်း ချက်ကြွေးတဲ့ ကြက်ဥမွှေချက်၊ ချဉ်ပေါင်ရွက်အချဉ်ရေနဲ့ငရုပ်သီးမြေပဲဆံထောင်း စားခဲ့ရတာကို မြင်ယောင်မိခဲ့ပါသည်။ဆက်လက်၍ ကြက်ဥတစ်လုံး၏ဈေးနှုန်းကိုမေးရာ ယခင်က တစ်လုံး ၁၀၀/- ၊ ၁၅၀/- ကျပ်၊ယခု တစ်လုံးလျှင် ၂၅၀/- ကျပ်ဆိုရင် သင့်တင့်ရုံသာရကြောင်း၊  ကျွန်တော်တို့အတွက်တော့ အဓိကဟင်းလျာပင်ဖြစ်ကြောင်း၊ အလုပ်က ပန်းရံနောက်လိုက်ဆိုတော့ ၈၀၀၀/-ကျပ်ရကြောင်း၊ အမျိုးသမီးက ကိုယ်ဝန်သည်ဖြစ်ကြောင်း၊ အလုပ်မှာလည်း ပုံမှန်မရှိကြောင်း သိရှိရပါသည်။ထို့နောက် ကျွန်တော် အသိမိတ်ဆွေတစ်ဦး၏ ကြက်ဥလက်လီ/လက်ကား အရောင်းဆိုင်ကို ရောက်ရာ ကြက်ဥဈေးမှာ တစ်ပိဿာကို ၅၈၀၀/- ကျပ် ရှိနေကြောင်း၊ ဈေးအတက်အကျမှာ လက်ရှိဈေးနဲ့ဈေးငြိမ်နေသည်မှာ တစ်လကြာပြီဖြစ်ကြောင်း၊ ကြက်ဥက တစ်ပိဿာတွင် ပုံမှန်အသင့်အတင့်ဥဖြစ်ပါက ၂၅ လုံး၊ ဥသေးလျှင် ၃၀ / ၃၁  လုံးရကြောင်း၊ ရောင်းသူ၏ တန်ဖိုးအပေါ်မူတည်ပြီး အလုံးအရွယ်အစားက ကွာဟ၍ တစ်လုံးလျှင် ၂၀၀/-၊ ၂၅၀/- ကျပ် ရောင်းကြကြောင်း၊ ရောင်းအားအနေဖြင့် ဈေးနှုန်းကြီးမြင့်လာ၍ ကြက်ဥရောင်းအားမှာ မဆိုးပါကြောင်း၊ တစ်ပတ်ကို ကဒ် ၂၀၀၊ အလုံး ၆၀၀၀၀ ခန့် ရောင်းရကြောင်း၊ ကြက်ဥစားသုံးမှုများလာကြောင်း၊ အစစအရာရာ ဈေးတန်တာကတစ်ကြောင်း ၊ဟင်းဖြစ်မြန်ပြီး မိသားစုနည်းနည်းများများ တွက်ခြေကိုက်ကြောင်း သိရှိရပါသည်။ထို့နောက် ကျွန်တော်လဲ ပန်းရံသမားလေးပြောသည့်စကားကို နားထဲကြားယောင်လာမိ၍ ဟုတ်တာပေါ့ဆိုပြီး အတွေးဝင်ကာ မြို့ပေါ်မှာ လက်ကားအရောင်းဆိုင်မျိုး ဘယ်နှစ်ဆိုင် လောက်ရှိလဲဟုမေးရာ  ၇ ဆိုင် လောက်တော့ရှိကြောင်း၊ ဈေးကွက်အနေဖြင့် ပြင်ဦးလွင်ဈေးကွက်က ဝယ်ရကြောင်း၊ ကြက်ဥဈေးမြှင့်တက်နိုင်ချေနှင့် စပ်လျဉ်း၍ ရှေ့နွေရောက်လို့  ဥ,ဥနှုန်းတွေကျလာရင် ဈေးမြင့်လာနိုင်ကြောင်း ကြားသိခဲ့ရပါသည်။ ကြက်ဥကို နည်းလမ်းမှန်ကန်စွာ စားသုံးပါက ကျန်းမာရေးအတွက် အထောက်အကူဖြစ်စေပါကြောင်း၊ ကြက်ဥသည် ပရိုတင်းအစားအစာဖြစ်ပြီး ဦးနှောက်၊နှလုံးနဲ့ ခုခံအားစနစ်အတွက် အလွန်အကျိုးရှိသည့်  အာဟာရဓာတ်ဖြစ်ပါကြောင်း ၊ ကြက်ဥအကာမှာ စွမ်းအင်ထုတ်လုပ်ဖို့နှင့် ခန္ဓာကိုယ်မှအဆိပ်တွေကို ဖယ်ရှားဖို့အရေးပါသော ဆီလီနီယမ်နဲ့ ရိုက်ဗို ဖလေဗင်(ဘီ)တွေများစွာပါဝင်ပါကြောင်း၊ကြက်ဥအနှစ်မှာ ဗီတာမင် A ၊ ဗီတာမင် E ၊ ဗီတာမင် D ၊ ဗီတာမင် K ၊ ဗီတာမင် B 12၊Folic acid၊Pantothenic acid များစွာပါဝင်သည့်အပြင် သတ္ထုဓာတ်များဖြစ်သော ကယ်လ်ဆီယမ်၊သံဓာတ်၊ဖော့စဖရပ်စ်၊ဆီလီယမ်နဲ့သွပ်ဓာတ် များစွာပါဝင်ပါကြောင်း၊ ဗီတာမင်နဲ့ သတ္ထုဓာတ်တွေက ခန္ဓာကိုယ်ရဲ့ ဇီဝရုပ်ဖြစ်စဉ်ကို ကူညီပေးပြီး သွေးနီဥတွေကို ထုတ်လုပ်ပေးပါကြောင်း၊ ကြက်ဥအနှစ်မှာ ပါဝင်တဲ့ဓာတ်တိုးဆန့်ကျင်ပစ္စည်းဖြစ်သည့်  လူတင်နဲ့ဇီယာဇမ်သင်းဟာ ဗီတာမင် E နှင့် ပေါင်းစပ်ပြီး မျက်လုံးနှင့် အရေပြားအတွက် များစွာ အကျိုးကျေးဇူးရှိပါကြောင်း၊ ကြက်ဥကို သွေးတိုးရှိသူများ၊သက်ကြီးရွယ်အိုများနှင့်ကိုလက်စ်ထရောလ် မြင့်မားသူများအနေဖြင့် ကြက်ဥစားရာတွင် သတိထားသင့်ပြီး တစ်ပတ်လျှင် ၃ / ၄ လုံးခန့်သာ စားရန် သင့်တော်ပြီး ဖြစ်နိုင်ပါက ကြက်ဥအကာကိုသာလျှင်စားသုံးသင့်ပါကြောင်းနှင့် ကြက်ဥကို ဆီဖြင့်ကြော်စားခြင်းသည် ကိုလက်စ်ထရောလ်ကို ပိုများစေနိုင်သည့်အတွက် အထူးပင်ရှောင်ကြဉ်သင့်ပါကြောင်းစသည်ဖြင့် စာဖတ်သူတို့ကော ကြက်ဥကို ဘယ်လိုတွေ လုပ်စား/ချက်စားကြပြီးပြီလဲ ဈေးကလဲတန် ဟင်းဖြစ်လဲမြန်ဆိုသော်ငြားလည်း ကောင်းကျိုး/ဆိုးကျိုးများ ရှိသည်ဆိုတာကို သတိနဲ့အသိ ယှဉ်တွဲစားသုံးနိုင်ကြပါရန် ကြက်ဥစားသုံးခြင်းများ မြင့်တက်လာလေသလားဆိုသော ခေါင်းစဉ်အောက်မှ စုစည်းရေးသား‌ဖော်ပြလိုက်ရပါသည်။

DOCA(မန္တလေး)

   ၂၀၂၃ခုနှစ်၊ မတ်လ(၁၅)ရက်နေ့ နံနက် (၉:၃၀)နာရီအချိန်တွင် တနင်္သာရီတိုင်းဒေသကြီး၊ ကော့သောင်းခရိုင်၊ စားသုံးသူရေးရာဦးစီးဌာနသည် မြို့နယ်စိုက်ပျိုးရေးဦးစီးဌာနတို့နှင့်အတူပူးပေါင်း၍ ကော့သောင်းမြို့ပေါ်ရှိ စိုက်ပျိုးရေးအရောင်းဆိုင်(၃)ဆိုင်အား စျေးကွက်အတွင်းရောင်းချလျက်ရှိသည့် “မြင်းပျံ” တံဆိပ်  ဓာတ်မြေသြဇာအိတ်များထဲတွင် အခြားဓာတ်မြေသြဇာများရောနှောထည့်သွင်း၍ စျေးကွက်အတွင်း ရောင်းချနေခြင်း ရှိ/မရှိကို သွားရောက်စစ်ဆေးခြင်း၊ အရောင်းဆိုင်များအား စိုက်ပျိုးရေးသုံးပစ္စည်းများကို စားသုံးသူကာကွယ်ရေးဥပဒေပါ ကုန်စည်များပေါ်တွင် ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ သတ်မှတ်ချက်များနှင့်အညီ ရောင်းချနိုင်ရေး အသိပညာပေးခြင်းများဆောင်ရွက်ခဲ့သည်ဟု သိရှိရပါသည်။

DOCA(တနင်္သာရီ)

          ဧရာဝတီတိုင်းဒေသကြီး၊       စားသုံးသူရေးရာဦးစီးဌာန၊ အိမ်မဲမြို့နယ်တာဝန်ခံ ဦးလေးလွင် သည် (၁၄.၃.၂၀၂၃)ရက်နေ့နံနက်(၁၁:၀၀)နာရီ အိမ်မဲမြို့ လယ်ပေါ်ရပ်ကွက်ရှိ ကုန်မျိုးစုံဆိုင်များ တွင် ရောင်းချနေသော မုန်မျိုးစုံများ၌ ကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/မရှိ ကွင်းဆင်း၍ ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ကွင်းဆင်းစစ်ဆေးဆောင်ရွက်ရာတွင် အိမ်မဲမြို့နယ်တာဝန်ခံမှ လယ်ပေါ်ရပ်ကွက်တွင် ရောင်းချနေသော ကုန်မျိုးစုံဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေဥပဒေ ၂၀၁၉ ပါ ပြဌာန်းချက်များမှ စားသုံးသူ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ပြစ်မှု ပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသား ဖော်ပြခြင်း နှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ (ခ)နှင့် (ဆ)တို့ပါ ကုန်အညွှန်း အမှတ်အသားဖော်ပြရာတွင် မြန်မာဘာသာဖြစ်စေ၊ အခြားဘာသာတစ်ခု (သို့) တစ်ခု ထက်ပို၍ တွဲလျက်ဖြစ်စေ၊ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုး အစားအလိုက် ထုတ်ပြန်ထားသည့် ဥပဒေညွှန်ကြားချက်များအား လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင်ကုန်အညွှန်း အမှတ်အသား ပြည့်စုံမှုရှိ/မရှိ ဌာနမှ ဈေးကွက်စောင့်ကြည့်စစ်ဆေးမှုများ စဉ်ဆက်မပြတ် ဆောင်ရွက်သွားမည်ဖြစ်ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ကသာ(ကောလင်း)ခရိုင်ဦးစီးမှူးရုံးမှ စစ်ဆေးရေးမှူး ဦးကြည်နိုင်ဦး (ဦးစီးမှူး)နှင့် ဝန်ထမ်းများသည်  အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်ဖြင့် Towards Ultimate Company မှ တရားဝင်တင်သွင်းလျက်ရှိသော Pabrinex injection ဆေး အမည်အား အတုအပပြုလုပ်၍ ဆင်တူယိုးမှားအမည်ဖြင့်  တရားမဝင်၊ ထောက်ခံချက် မပါရှိသော Parbisure အမည်ဖြင့် ဆေးဝါးများကို ဈေးကွက်အတွင်း ရောင်းချမှုများရှိနေသည့်အတွက် ၂၀၂၃ ခုနှစ်၊ မတ်လ(၁၀) ရက်နေ့တွင် ကသာမြို့ရှိ ဆေးဆိုင်များ၌ အဆိုပါ Parbisure အမှတ်တံဆိပ်ဆေးဝါးများကို ရောင်းချမှု ရှိ/မရှိ ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့သည်။

          ထိုသို့စစ်ဆေးရာတွင် ကသာမြို့ပေါ်ရှိ ဆေးအရောင်းဆိုင်များတွင် မှတ်ပုံတင်ထားခြင်းမရှိ၊ တရားဝင်ခြင်းမရှိသော Parbisure အမည်နှင့်ဆေးဝါးများ ရောင်းချမှု မရှိသည်ကို တွေ့ရှိရ၍ ဆေးအရောင်းဆိုင်များအနေဖြင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ အသိအမှတ်ပြု ထောက်ခံချက် မပါရှိသည့် ဆေးဝါးများ၊ သက်တမ်းလွန်ဆေးများနှင့် စံမညီဆေးများအား ရောင်းချခြင်း မပြုကြရန် အသိပညာပေးဆွေးနွေးခဲ့ကြောင်း သိရှိရသည်။

ကသာ (DOCA)