သတင်းနှင့် လှုပ်ရှားမှုများ

         ၂၀၂၃ခုနှစ်၊ ဇန်နဝါရီလ ၂၆ ရက်နေ့၊ နေ့လည် (၁၃း၀၀)နာရီအချိန်တွင် ဇေယျာသီရိမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရုံးခန်း၌ စားသုံးသူကာကွယ်ရေး အသိပညာပေး Talk Show ကို စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဒုတိယတိုင်းဦးစီးမှူး၊ ဦးခင်မောင်ဆွေ ဦးဆောင်၍ ဝန်ထမ်းများနှင့် သွားရောက် ပြုလုပ်ခဲ့ပါသည်။

          အဆိုပါ Talk Show တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ၊ ဒေါ်သင်းမြတ်မွန်က “စားသုံးသူကာကွယ်ရေး၏ အဓိပ္ပာယ်နှင့် စားသုံးသူအခွင့်အရေးများအကြောင်း သိကောင်းစရာများ” ကို ရှင်းလင်းပြောကြားပေးစေလိုကြောင်း မေးမြန်းခဲ့ရာ ဒုတိယတိုင်းဦးစီးမှူး၊ ဦးခင်မောင်ဆွေမှ “ စားသုံးသူကာကွယ်ရေးဆိုသည်မှာကုန်စည်(သို့မဟုတ်) ဝန်ဆောင်မှုနှင့်စပ်လျဉ်း၍ စားသုံးသူ၏အခွင့်အရေးနှင့် အကျိုးစီးပွားကို ကာကွယ်ပေးခြင်းနှင့် စားသုံးသူနှင့်စီးပွားရေး၏လုပ်ငန်းရှင်တို့အကြား ကော်မရှင်နှင့်ကော်မတီ အဆင့်ဆင့်တို့မှသတ်မှတ် ဆောင်ရွက်ပေးသည့် မျှတမှုရှိသောလုပ်ငန်းစဉ် ဖြစ်ကြောင်းနှင့်စားသုံးသူအခွင့်အရေး (၈)ချက်ကိုလည်း အကျဉ်းချုံး၍ ရှင်းလင်းပြောကြားခဲ့ပြီး Talk Show ကို နေ့လည် (၁၃း၁၅)တွင် ပြီးမြောက်ကြောင်း သတင်းရရှိပါသည်။

DOCA(ပြည်ထောင်စုနယ်မြေ)

               ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ရုံးမှ ဝန်ထမ်းများသည် ၂၇.၁.၂၀၂၃ ရက်နေ့၊ နေ့လည် (၁၄:ဝဝ) နာရီအချိန်တွင် တာမွေမြို့နယ်၊ ဒဂုဏ်ညွှန့်ဈေးရှိ ဈေးသူ/သားများအား စားသုံးသူကာကွယ်ရေးအသိပညာပေးဆွေးနွေးခြင်းများ ‌ဆောင်ရွက်ခဲ့ပါသည်။

       အဆိုပါဆွေးနွေးပွဲတွင် စားသုံးသူကာကွယ်ရေးဥပဒေများအကြောင်း၊ စားသုံးသူအခွင့်အရေး နှင့်တာဝန်၊ စီးပွားရေးလု်ပငန်းရှင်၏ တာဝန်များ၊ စားသုံးသူကာကွယ်ရေးဥပဒေအခန်း (၁၈)၊ ပုဒ်မ-41 ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြခြင်းဆိုင်ရာ ကုန်စည်၏အမှတ်တံဆိပ်၊ အရွယ်အစား၊ အရေအတွက်၊ အသားတင်အလေးချိန်၊ ထားသိုသိမ်းဆည်းမှုအညွှန်း၊ သုံးစွဲပုံ နည်းလမ်း၊ ထုတ်လုပ်သည့်ရက်စွဲ၊ ကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ထုတ်လုပ်သူအမည်၊ လိပ်စာ၊ ပြည်ပမှတင်သွင်းလျှင်လည်း ထုတ်လုပ်သည့်နေရာ၊ ပြန်လည်ထုပ်ပိုးသည့်နေရာ၊ ကုန်စည်တွင်ပါဝင်သည့် ကုန်ကြမ်းပစ္စည်းအမျိုးအမည်နှင့် ပစ္စည်းများ၏ပမာဏ၊ ပါဝင်မှုအမျိုးအစား၊ ကျန်းမာရေး ဆိုင်ရာဘေးထွက်ဆိုးကျိုး၊ ဓါတ်မတည့်ကြောင်းဖော်ပြချက်၊ ကြိုတင်သတိပေးချက်၊ သက်ဆိုင်ရာ အစိုးရဌာနများကဖော်ပြရန် သတ်မှတ်ထားသောအချက်အလက်များကို မြန်မာဘာသာ ဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြ ထားသောကုန်ပစ္စည်းများကိုသာ ရောင်းချရန် ဟောပြောဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

             စားသုံးသူများလုံခြုံစိတ်ချရမှုရှိစေရေးဆောင်ရွက်မည့် အစီအမံများ အလုပ်ရုံဆွေးနွေးပွဲကို ၂၀၂၃ ခုနှစ်၊ ဇန်နဝါရီလ ၃၁ ရက်နေ့တွင် စားသုံးသူရေးရာဦးစီးဌာန၊ စစ်ကိုင်းဒေသကြီးဦးစီးမှူးရုံး၌ ကျင်းပခဲ့ကြောင်း သိရသည်။

            အဆိုပါအခမ်းအနား၌ စစ်ကိုင်းတိုင်းဒေသကြီး၊စားသုံးသူရေးရာကော်မတီ ဥက္ကဌ၊ စီးပွားရေးရာ ဝန်ကြီး ဒေါ်ရီရီသန့်က အဖွင့်အမှာစကားပြောကြားရာတွင် ယခုအလုပ်ရုံ ဆွေးနွေးပွဲ ကျင်းပရခြင်း ရည်ရွယ်ချက် နှစ်ပိုင်းရှိပါကြောင်း၊ ပထမတစ်ပိုင်းမှာ စစ်ကိုင်းတိုင်းဒေသကြီးရှိစား သုံးသူပြည်သူများ အနေဖြင့် ကုန်စည်နှင့်ဝန်ဆောင်မှုများဝယ်ယူသုံးစွဲကြရာတွင် လုံခြုံစိတ်ချရမှုရှိ စေရေးနှင့်အခြေခံ လိုအပ်ချက် များနှင့်ကိုက်ညီမှုရှိစေရေး ဆောင်ရွက်ကြမည့် အစီအမံများဆွေးနွေးဖေါ်ထုတ်ရန်နှင့် ဒုတိယတစ်ပိုင်းမှာ ကဏ္ဍအလိုက်ထုတ်ပြန်ထားသည့် ဥပဒေ၊ အမိန့်နှင့်ညွှန်ကြားချက်များကို သက်ဆိုင်ရာ လုပ်ငန်းရှင်များက သိရှိလိုက်နာကြစေရေး ဆောင်ရွက်ရမည့်အစီအမံများကို ဆွေးနွေးဖော် ထုတ်ရန်ဖြစ်ပါကြောင်း၊ ထိန်းကျောင်းဆောင်ရွက်ရသည့် ဌာနဆိုင်ရာများအနေဖြင့် မိမိတို့တာဝန်ယူဆောင်ရွက်ရသည့်ကဏ္ဍများနှင့်ပတ်သက်သည့် ဥပဒေ၊အမိန့်နှင့်ညွှန်ကြားချက်များကို ရှင်းလင်းဆွေးနွေးရန်နှင့် လုပ်ငန်းရှင်များကလည်း ရင်းရင်းနှီးနှီးပွင့်ပွင့်လင်းလင်း ဆွေးနွေး ပေးကြရန်ဖြစ်ပါကြောင်း၊ ဖော်ထုတ်ချက်များကို စားသုံးသူရေးရာ ကော်မတီ အစည်းအဝေးတွင် ချပြဆွေးနွေးပြီး အစီအမံများချမှတ်မည်ဖြစ်ကြောင်း ပြောကြားပါသည်။ 

      အလုပ်ရုံဆွေးနွေးပွဲတွင် စားသုံးသူရေးရာဦးစီးဌာန၊တိုင်းဒေသကြီးဦးစီးမှူး ဦးကျော်ကျော်လွင်က စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များလိုက်နာရမည့်တာဝန်များ၊ အာမခံရ ပေးရမည့်အချက်များနှင့် ပြစ်မှု၊ပြစ်ဒဏ်များအကြောင်းကိုလည်းကောင်း၊ အစားအသောက်နှင့် ဆေးဝါးကွက်ကဲရေးဦးစီးဌာန တိုင်းဒေကြီးဦးစီးဌာနမှူး ဒေါ်ကြွယ်ကြွယ်ယုက အစားအသောက်၊ အလှကုန်နှင့်ဆေးဝါး တင်သွင်း၊တင်ပို့ခြင်း၊ ထုတ်လုပ်ခြင်း၊ဖြန့်ဖြူးခြင်း၊ရောင်းချခြင်းတို့အပေါ် ထိန်း​ကျောင်းဆောင်ရွက်နေမှုများကိုလည်းကောင်း၊ တိုင်းဒေသကြီးစိုက်ပျိုး ရေးဦးစီးဌာနမှ ဒုတိယတိုင်း ဦးစီးမှူး ဦးအောင်ကြည်ဝင်းက  စိုက်ပျိုးရေးသုံးဆေးနှင့် ဓာတ်မြေသြဇာ တင်သွင်း၊ ထုတ်လုပ်၊ ဖြန့်ဖြူး၊ ရောင်းချခြင်းများအပေါ် ထိန်းကျောင်းဆောင်ရွက်နေမှုများကိုလည်းကောင်း၊ ဟိုတယ်နှင့် ခရီးသွား ညွှန်ကြားမှုဦးစီးဌာနမှ ဒေါ်သန်းသန်းနွယ်က ဟိုတယ်နှင့်တည်းခိုခန်းများအပေါ် ထိန်းကျောင်း ဆောင်ရွက်နေမှုအခြေအနေများကိုလည်းကောင်း အသီးသီးရှင်းလင်းဆွေးနွေးခဲ့ကြပြီး တက်ရောက် လာသည့် လုပ်ငန်းရှင်များ၏ မေးခွန်းများ၊ အကြံပြုချက်များအပေါ် ပြန်လည် ရှင်းလင်း ဆွေးနွေး ကြပါသည်။

    အလုပ်ရုံဆွေးနွေးပွဲသို့ စစ်ကိုင်းတိုင်းဒေသကြီး စားသုံးသူရေးရာကော်မတီဥက္ကဌနှင့် အဖွဲ့ဝင်များ၊ ဌာနဆိုင်ရာများမှ တာဝန်ရှိသူများ၊ ကုန်စည်နှင့်ဝန်ဆောင်မှုများကို ထုတ်လုပ်ဖြန့်ဖြူးရောင်းချကြသည့် စီးပွားရေးလုပ်ငန်းရှင်များ စုစုပေါင်း ၆၀ ဦးတက်ရောက်ခဲ့ကြပြီး အခမ်းအနားကို ညနေ ၄:၀၀ နာရီတွင် ရုပ်သိမ်းခဲ့ကြောင်း သတင်းရရှိပါသည်။

စားသုံးသူ-စစ်ကိုင်း

      ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်၊ လေးမျက်နှာအုပ်စု၊ လေးမျက်နှာကျေးရွာရှိ တန် (၂၀) ကျ ဆန်စက်၏ ကြိတ်ခွဲ၊ ထုတ်လုပ်တင်ပို့နေမှုအခြေအနေကို (၂၆-၁-၂၀၁၃) နေ့တွင် စက်ပိုင်ရှင်နှင့်တွေ့ဆုံပြီး ဒေသအလိုက်စက်လည်ပတ်နေမှုအား မေးမြန်းဆွေးနွေးခဲ့ပါသည်။

      ဇီးကုန်းမြို့နယ်အတွင်း သက်ဆိုင်ရာဌာနပေါင်းစုံမှ ၁လ လျှင် ကျေးရွာ (၁၀) ရွာသို့ တောင်သူများ၊ လုပ်ငန်းရှင်များနှင့် ဒေသခံပြည်သူများအား စိုက်ပျိုးရေး၊ မွေးမြူရေး၊ ကုန်ထုတ်လုပ်မှုဖွံ့ဖြိုးတိုးတက်ရေး အသိပညာပေးဆွေးနွေးပွဲများသို့ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် ကုန်သွယ်မှုဖွံ့ဖြိုးရေး ဈေးကွက်ဝင်သီးနှံများစိုက်ပျိုးရေး၊ ပြည်တွင်း စားသုံးဆီဖူလုံရေး၊ ဒေသအလိုက် ကိုက်ညီသည့်ဆီထွက်သီးနှံများစိုက်ပျိုးသင့်မှုနှင့် စားသုံးသူကာကွယ်ရေးကိစ္စရပ်များအပြင် ကျေးရွာများရှိ ဆန်စက်များ၏ထုတ်လုပ်မှုအခြေအနေ လုပ်ငန်းလည်ပတ်မှုအခြေအနေတို့အား စိစစ်ဆွေးနွေးခဲ့ပါသည်။

     ဆန်စက်ပိုင်ရှင်က လုပ်ငန်းလည်ပတ်မှုအနေဖြင့် (၁၅) တန်ကျ စပါးအခြောက်ခံစက်တပ်ဆင်ထားရှိပြီး စပါးတင်း (၅၀၀)တင်းအခြောက်ခံပါက (၆) နာရီခန့်ကြာမြင့်ကြောင်း၊ စပါးကြိတ်ခွဲမှုအနေဖြင့် တစ်လလျှင် စပါးတင်း (၁၅၀၀၀)တင်းခန့်ကြိတ်ခွဲပြီး ဆန်အိတ် (၄၅၀)အိတ်နှင့် (၆၀၀)အိတ်အကြားထွက်ရှိကြောင်း၊ တစ်နှစ်လျှင် လုပ်ငန်းလည်ပတ်နိုင်မှုမှာ (၈) လခန့်ရှိပြီး လုပ်သား(၅) ဦးဖြင့် လည်ပတ်ကြောင်း ထွက်ရှိလာသောဆန်ကွဲ၊ ဖွဲနုများကို အခြားစက်ပိုင်ရှင်များ၊ ကုန်သည်များနှင့် စုပေါင်းတင်ပို့ရောင်းချကြကြောင်း  အခြားဒေသထွက်စပါးများကို ဝယ်ယူကြိတ်ခွဲခြင်းမပြုဘဲ မိမိဒေသထွက်စပါးကိုသာ ဝယ်ယူအခြောက်ခံကြိတ်ခွဲရောင်းချကြကြောင်းသိရှိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဦးစီးမှူး ဦးဇော်ထွန်းဦးနှင့် ဌာနခွဲစာရေး ဒေါ်ဝါဝါကြည်တို့သည် (၂၄-၁-၂၀၂၃)ရက်နေ့ နံနက်(၀၉:၃၀)အချိန်တွင် စားသုံးသူကာကွယ်ရေးနှင့်ပတ်သက်သည့် အသိပညာဗဟုသုတများ ပိုမိုတိုးပွားစေရန်နှင့် အရည်အသွေးပြည့်ဝသည့် ကုန်စည်နှင့်ဝန်ဆောင်မှုများအား ရယူသုံးစွဲနိုင်စေရန်၊ စားသုံးသူ၏အခွင့်အရေးနှင့်တာဝန်များကို သိရှိစေရန်ရည်ရွယ်၍ ပခုက္ကူမြို့နယ်၊ ကျွန်းဦးကျေးရွာ၊ (အ-မ-က)ကျောင်းသို့သွားရောက်၍ အသိပညာပေးဟောပြောပွဲကျင်းပပြုလုပ်ခဲ့ရာ စာသင်ကျောင်းမှ ဆရာ/ဆရာမ (၄) ဦးနှင့် ကျောင်းသား/ကျောင်းသူ(၄၃)ဦးနှင့် မိဘပြည်သူ (၉)ဦး စုစုပေါင်း (၅၆) ဦးတက်ရောက်ခဲ့ပါသည်။

     ရှေးဦးစွာ ဦးစီးမှူး ဦးဇော်ထွန်းဦးက ဆွေးနွေးရာတွင် စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူများ၏အခွင့်အရေးနှင့် အကျိုးစီးပွားကာကွယ်နိုင်ရန်အတွက် စားသုံးသူကာကွယ်ရေးဥပဒေကို ပြဋ္ဌာန်းထားကြောင်း၊  အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သိရှိလိုက်နာပါက ထုတ်လုပ်သူရော စားသုံးသူပါ လုံခြုံစိတ်ချရမှုရှိပြီး အကျိုးစီးပွားများဖြစ်ထွန်းမည်ဖြစ်ကြောင်း၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာကိုလည်း ဖွင့်လှစ်ထားရှိပြီးဖြစ်ကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စများ စုံစမ်းမေးမြန်းရန်အတွက် Consumer Call Center (၁၅၃၅)အား ဖွင့်လှစ်ထားကြောင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်းကိုလည်း အကျယ်တဝင့်ဆွေးနွေးခဲ့ပါသည်။

      ဌာနခွဲစာရေး ဒေါ်ဝါဝါကြည်က ဆွေးနွေးရာတွင် စားသုံးသူ၊ ကုန်စည်နှင့်ဝန်ဆောင်မှုအကြောင်း၊ စားသုံးသူအခွင့်အရေးနှင့် တာဝန်များအကြောင်း၊ စားသုံးသူများအနေဖြင့် မိမိတို့ဝယ်ယူ သည့်ကုန်စည်များတွင် အာမခံချက်ပေးထားမှုများပါရှိပါက အာမခံမှုအပေါ် တောင်းဆိုနိုင်သည့်အခွင့်ရေးများကို သိရှိစေရန်နှင့် အခွင့်အရေးချိုးဖောက်ခံရပါက မှန်ကန်ပြည့်စုံသည့်အထောက်အထားများနှင့်အတူ စားသုံးသူနစ်နာဆုံးရှုံးမှုများအတွက် လာရောက်တိုင်ကြားခြင်းဖြင့်ကုစားမှုများ ပေးနိုင်မည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပါသည်။

      ဟောပြောဆွေးနွေးမှုများအား ဦးစီးမှူး ဦးဇော်ထွန်းဦးက ပြန်လည်ဆွေးနွေးခြင်းနှင့် မိဘပြည်သူများက သိရှိလိုသည်များ မေးမြန်းမှုများကို ပြန်လည်ဖြေကြားခြင်း၊ ဟောပြောမှုအား နားလည် မှုစွမ်းရည်မေးမြန်းခြင်းနှင့် စားသုံးသူကာကွယ်ရေးလက်ကမ်းစာစောင်များအား ဖြန့်ဝေပေးခဲ့ကြောင်းသိရှိရပါသည်။

DOCA( မကွေး)