သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင်နှင့်ဝန်ထမ်းများသည် ၂၇-၁-၂၀၂၃ ရက်နေ့၊ နံနက် ၁၀:၀၀ နာရီအချိန်တွင် ကရင်ပြည်နယ်၊ ဘားအံမြို့ရှိ ခရိုင်မီးသတ်ဦးစီးဌာနတွင် စားသုံးသူကာကွယ်ရေးဆိုင်ရာ အသိပညာပေး ဟောပြောပွဲ ကျင်းပခဲ့ကြောင်းသိရှိရပါသည်။

      ဟောပြောပွဲတွင် စားသုံးသူရေးရာဦးစီးဌာနမှ ဦးစီးအရာရှိ ဦးမျိုးဝင်းနိုင်က  စားသုံးသူရေးရာ ဦးစီးဌာန၏ ဖြစ်ပေါ်လာပုံသမိုင်းအကြောင်းကိုလည်းကောင်း၊  စားသုံးသူကာကွယ်ရေးဆိုင်ရာ သိကောင်းစရာများနှင့်ကုန်စည်၊ ဝန်ဆောင်မှုများနှင့်ပတ်သက်၍ စားသုံးသူများ နစ်နာဆုံးရှုံးမှုရှိပါက တိုင်ကြားနိုင်မည့်နည်းလမ်းများနှင့်ဖြေရှင်းဆောင်ရွက်နေမှုကိုလည်းကောင်း၊  ဈေးကွက်စောင့် ကြည့်စစ်ဆေးခြင်းနှင့်ပတ်သက်၍ ဈေးကွက်မရောက်မီ ကုန်စည်များနှင့် ဈေးကွက်ရောက်ပြီးကုန်စည်များ ထုတ်ကုန်များ လုံခြုံစိတ်ချရမှုရှိစေရေးအတွက် ဌာနမှဆောင်ရွက်ပေးနေမှု အခြေအနေအကြောင်းများကိုလည်းကောင်း၊ အသေးစိတ်ရှင်းလင်းဆွေးနွေးဟော ပြောခဲ့ပါသည်။ ဆက်လက်၍ အကြီးတန်းစာရေး ဒေါ်စုနွေးသီရိမောင်က စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များနှင့် စားသုံးသူပြည်သူများ လိုက်နာရမည့်တာဝန်များနှင့်အခွင့်အရေးများ အကြောင်းကိုလည်းကောင်း၊ ဈေးကွက်အတွင်း ကုန်စည်များကို ဝယ်ယူရာတွင် ကုန်အညွှန်းအမှတ်အသားများ ပါရှိသော ကုန်စည်မျိုးကိုသာ ဦးစားပေး ဝယ်ယူတတ်စေရန် အသိပညာပေး ရှင်းလင်းပြောကြားခဲ့ကာ  နိဂုံးချုပ်အနေဖြင့် ဘားအံခရိုင်မီးသတ်ဦးစီးမှူး ဦးသန့်ဇင်ဝင်းက သိလိုသည်များကို မေးမြန်းဆွေးနွေး၍ ကျေးဇူးတင်စကား ပြောကြားခဲ့ပါသည်။ ထို့နောက်တက်ရောက်လာသော ဘားအံခရိုင်မီးသတ်တပ်ဖွဲ့ဝင် (၄၀) ဦးအား စားသုံးသူကာကွယ်ရေးဥပဒေစာအုပ်နှင့်လက်ကမ်းစာစောင်များလည်း ဖြန့်ဝေ၍ အခမ်းအနားကို ၁၁:၄၅ နာရီအချိန်တွင် ပြီးဆုံးခဲ့ကြောင်း သတင်းရရှိသည်။

       စားသုံးသူရေးရာဦးစီးဌာနသည် ဦးတည်နေရာ (၁၂) နေရာတွင် စားသုံးသူကာကွယ်ရေးဆိုင်ရာ အသိပညာပေးဟောပြောခြင်းကို ကျယ်ကျယ်ပြန့်ပြန့်ဆောင်ရွက်လျက်ရှိကြောင်းနှင့်တပ်ရင်းတပ်ဖွဲ့များတွင် အသိပညာပေး ဟောပြောခြင်းသည်လည်း လုပ်ငန်းစဉ်တစ်ခုအဖြစ် ပါဝင် လျက်ရှိကြောင်း သိရသည်။

DOCA(ကရင်)

        ဧရာဝတီတိုင်းဒေသကြီး၊ဖျာပုံခရိုင်၊ ဖျာပုံမြို့နယ်စားသုံးသူရေးရာဦးစီးဌာနမှ မြို့နယ်စစ်ဆေးရေးမှူး  ဦးမင်းဇော်ဦးဆောင်သော ဝန်ထမ်းများသည် ဇန်နဝါရီလ (  ၂၂  )ရက်န့၊ နံနက်(၁၀:၀၀) နာရီအချိန်တွင် ဖျာပုံမြို့ရှိစတိုးဆိုင်များအား COFFEE Shop (very good) တံဆိပ်ပါကော်ဖီမစ်ကဲ့သို့  အန္တရာယ်ဖြစ်စေသည့် စားသောက်ကုန်များ တရားမဝင်ရောင်းဝယ်ဖောက်ကားမှုများရှိ/ မရှိဈေးကွက်စောင့်ကြည့်ကွင်းဆင်း စစ်ဆေးခဲ့ပါသည်။

         ယင်းသို့စစ်ဆေးရာတွင်စတိုးဆိုင်များတွင် COFFEE Shop (very good)တံဆိပ်ပါကော်ဖီမစ် ကဲ့သို့ အန္တရာယ်ဖြစ်စေသည့် စားသောက်ကုန်များ တရားမဝင်ရောင်းဝယ်ဖောက်ကားမှုမရှိကြောင်း  သတင်းရရှိ ပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ ဖျာပုံခရိုင်၊ဒေးဒရဲမြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းတို့သည် ဇန်နဝါရီလ(၂၃)ရက်နေ့၊ နံနက်(၁၁:၀၀)နာရီအချိန်တွင် ညောင်တပင် (အ-မ-က)ကျောင်း၌ စားသုံးသူကာကွယ်အသိပညာပေးဟောပြောပွဲအားကျင်းပပြုလုပ်ခဲ့ပါသည်။

      အဆိုပါဟောပြောပွဲတွင် မြို့နယ်တာဝန်ခံဦးသိန်းမောင်က စားသုံးသူကာကွယ်ရေးဥပဒေနှင့်ပတ်သက်၍ စားသုံးသူကာကွယ်ရေးဆိုင်ရာ အကြောင်းအရာများ၊ စားသုံးသူများလုံခြုံစိတ်ချရမှုရှိ စေရေးအတွက်စားသုံးသူအခွင့်အရေးနှင့်တာဝန်များ၊ စားသုံးသူကာကွယ်ရေးဆောင်ရွက်ချက်များ၊ စားသုံးသူများအနေဖြင့် ကုန်စည်နှင့်ဝန်ဆောင်မှုများဝယ်ယူခြင်းမပြုမီ သတိပြုဆောင်ရွက်ရမည့်အချက်များ၊ ကုန်စည်နှင့်စပ်လျဉ်း၍အာမခံပေးထားမှုအပေါ် စားသုံးသူကတောင်းဆိုနိုင်သည့်အခွင့်ရေးများ၊ မည်သည့်စီးပွားရေးလုပ်ငန်းရှင်မဆို ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက်သက်မှတ်ချက်များနှင့်အညီ ဖော်ပြရမည့်အချက်များကိုဟောပြောပါသည်။ ထိုအခမ်းအနားသို့ ဆရာ/ဆရာမများ၊ ကျောင်းသား/ကျောင်းသူများစုစုပေါင်း(၅၆)ဦးတက် ရောက်ကြောင်းသိရပြီး၊ မိမိဌာနအနေဖြင့်လည်း စားသုံးသူများအသုံးပြုသည့်ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းစေရေးအတွက် ဈေးကွက်စောင့်ကြည့်စစ်ဆေးမှုများပြုလုပ်လျက်ရှိ သည်ကို ဟောပြောခဲ့ကြောင်းသိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ တာဝန်ရှိသူများသည် ၂၀၂၃ ခုနှစ်၊ ဇန်နဝါရီလ (၂၆)ရက်နေ့၊ နေ့လယ်(၁၃:၀၀)နာရီအချိန်တွင် လွိုင်ကော်မြို့၊ ထေးငှားလျားရပ်ကွက်ရှိ လွိုင်ကော် တက္ကသိုလ် Theatre ခန်းမ၌ စားသုံးသူကာကွယ်ရေးအသိပညာပေး ဟောပြောဆွေးနွေးဆောင်ရွက် ခဲ့ရာ အဆိုပါဟောပြောဆွေးနွေးပွဲတွင်လွိုင်ကော်တက္ကသိုလ်မှပါမောက္ခချုပ်၊ သရုပ်ပြဆရာ/ဆရာမများ၊ ကျောင်းသား /ကျောင်းသူများ စုစုပေါင်း(၁၀၀)ဦး တက်ရောက်ခဲ့ပါသည်။

      အဆိုပါအခမ်းအနားတွင် လွိုင်ကော်တက္ကသိုလ်ပါမောက္ခချုပ် ဒေါက်တာအောင်ခင်မြင့်မှ စားသုံးသူကာကွယ်ပေးရေးသည် အလွန်အရေးကြီးဖြစ်ကြောင်း၊ နိုင်ငံတကာတွင်လည်း Consumer Right သည်အရေးပါကြောင်း၊ စားသုံးသူကာကွယ်ရေးနှင့်ပတ်သက်၍ အသိပညာများ လာရောက်ဟောပြော ဆွေးနွေးခြင်းအတွက်လည်း ကျေးဇူးတင်ရှိကြောင်း အဖွင့်အမှာစကား ပြောကြားခဲ့ပါသည်။

         ဆက်လက်၍ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးမြင့်အောင်က စားသုံးသူ ကာကွယ်ရေးသမိုင်းကြောင်း စတင်ဖြစ်ပေါ်လာပုံနှင့် ဌာနမှစားသုံးသူကာကွယ်ရေးနှင့် စပ်လျဉ်း၍ ဆောင်ရွက်နေသည့် လုပ်ငန်းများအား ရှင်းလင်းပြောကြားခဲ့ပါသည်။

         ထို့နောက်ခရိုင်ဦးစီးမှူး၊ ဦးမိုးညွန့်ဦးက စားသုံးသူကာကွယ်ရေးဥပဒေကို ၂၀၁၉ ခုနှစ်၊မတ်လ (၁၅)ရက်နေ့တွင် ပြည်ထောင်စုလွှတ်တော်ဥပဒေအမှတ်(၉)ဖြင့် ပြဌာန်းခဲ့ကြောင်း၊ ဥပဒေတွင်ပါ ရှိသည့် စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊

       စီမံခန့်ခွဲရေးနည်းလမ်းအရ အရေးယူခြင်းများ၊ စီးပွားရေးလုပ်ငန်းရှင်၏ တားမြစ်ချက်များနှင့် ပြစ်မှုပြစ်ဒဏ်များ၊ ကုန်စည်နှင့်သက်ဆိုင်သည့် ကုန်အညွှန်းအမှတ်အသားတွင်ဖော်ပြရမည့် သတ်မှတ်ချက်များအားလည်းကောင်း  ရှင်းလင်းဆွေးနွေးပြီး  စားသုံးသူများအနေဖြင့် ကုန်စည်နှင့်ဝန်ဆောင်မှုများနှင့် ပတ်သက်၍ နစ်နာဆုံးရှုံးမှုများရှိပါက စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ CICC Page သို့ လူကိုယ်တိုင်ဖြစ်စေ၊ Website မှဖြစ်စေ၊ Doca Myanmar application များမှဖြစ်စေ ဆက်သွယ်တိုင်ကြားနိုင်ပါကြောင်း ၊ Consumer call center ၁၅၃၅ နံပါတ်များသို့ ခေါ်ဆို၍ စားသုံးသူရေးရာနှင့်စပ်လျဉ်း၍ သိရှိလိုသည်များကို    မေးမြန်းနိုင်ပါကြောင်းရှင်းလင်းပြောကြားခဲ့ပြီး အသိပညာပေးလက်ကမ်းစာစောင်များကို ကျောင်းသား /ကျောင်းသူများထံသို့ ဖြန့်ဝေပေးခဲ့ပြီး၊ ဗွီနိုင်းများကို လွိုင်ကော်တက္ကသိုလ်ပါမောက္ခချုပ်ထံသို့ ပေးအပ်ဆောင်ရွက်ခဲ့ကြောင်း သတင်းရရှိပါသည်။ 

 DOCA(ကယား)      

ရန်ကုန်မြို့၊ ဇန်နဝါရီ (၃၀) ရက်

          အွန်လိုင်းမှ ရောင်းဝယ်မှုများတွင် စားသုံးသူအခွင့်အရေးများ အပြည့်အဝရရှိစေရန်နှင့် အွန်လိုင်းမှ ရောင်းဝယ်မှုများတွင် စားသုံးသူနစ်နာဆုံးရှုံးမှုများအား ကာကွယ်ဖြေရှင်းဆောင်ရွက် ပေးနိုင်မည့် နည်းလမ်းများဖော်ထုတ်နိုင်ရန်ဟူသော ရည်ရွယ်ချက်ဖြင့် အလုပ်ရုံဆွေးနွေးပွဲတစ်ရပ်ကို ရန်ကုန်မြို့၊ မင်းရဲကျော်စွာလမ်းမပေါ်ရှိ ပြည်‌ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် မင်္ဂလာခန်းမ၌ ယနေ့ နံနက် (၀၉း၀၀)နာရီမှစ၍ ကျင်းပ ခဲ့ပါသည်။

          အဆိုပါ အခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာနိုင်ငံတော် ဗဟိုဘဏ်၊ ပို့ဆောင်ဆက်သွယ်ရေးဝန်ကြီးဌာန၊ မြန်မာနိုင်ငံကွန်ပျူတာအသင်းချုပ်၊ Myanmar Digital Economy Association ၊ E-Commerce Association of Myanmar နှင့် ပြည်ထောင်စု သမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်တို့မှ ပါဝင်ဆွေးနွေး ခဲ့ကြပါသည်။

          တက်ရောက်လာကြသော ဝန်ကြီးဌာနများနှင့် ပုဂ္ဂလိကလုပ်ငန်းရှင်များမှ တတ်ကျွမ်း နားလည်သည့် ဘာသာရပ်ဆိုင်ရာ ပညာရှင်(၁၂)ဦးက ဘာသာရပ်အလိုက် ဦးဆောင်ဆွေးနွေးခဲ့ ကြပါသည်။ တက်ရောက်လာကြသော ပရိတ်သတ်များထဲမှ မိမိတို့သိလိုသည့် အကြောင်းအရာ များကို မေးမြန်းဖြေကြားခြင်းများ ပြုလုပ်ကြပါသည်။

          ဆွေးနွေးကြသော ဘာသာရပ်အလိုက် ပညာရှင်များမှာ ကုန်သွယ်ရေးဦးစီးဌာန၊ စာရင်းဌာန မြန်မာနိုင်ငံတော်ဗဟိုဘဏ်၊ သတင်းအချက်အလက်နည်းပညာနှင့်ဆိုက်ဘာလုံခြုံရေး ဦးစီးဌာန၊ မြန်မာ့စာတိုက်လုပ်ငန်း၊ စားသုံးသူရေးရာဦးစီးဌာန၊ မြန်မာနိုင်ငံကွန်ပျူတာအသင်းချုပ်၊   Myanmar Digital Economy Association နှင့် E-Commerce Association of Myanmar တို့ ဖြစ်ကြကြောင်း သိရှိရပါသည်။

          ဘာသာရပ်ဆိုင်ရာ ဆွေးနွေးမှုအပြီးမှာ စားပွဲဝိုင်းဆွေးနွေးခြင်း အဖွဲ့(၃)ဖွဲ့ ဖွဲ့၍ ဆွေးနွေးခဲ့ ကြရာ အွန်လိုင်းမှရောင်းဝယ်မှုများအား မှတ်ပုံတင်စနစ်တစ်ရပ်ထူထောင်ရေး၊ မည်ကဲ့သို့ ထိန်းကျောင်း သင့်ကြောင်းနှင့် စားသုံးသူတိုင်ကြားမှုများအား ထိရောက်စွာ ဆောင်ရွက်နိုင်ရေး အတွက် ဆွေးနွေးပွဲ ရလဒ်များ ဖော်ထုတ်ပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှတစ်ဆင့် နိုင်ငံတော် အဆင့်သို့ ဆက်လက်တင်ပြသွားမည်ဖြစ်ကြောင်း သိရှိရပါသည်။

          အဆိုပါဆွေးနွေးပွဲသို့ ဌာနဆိုင်ရာများနှင့် လုပ်ငန်းရှင် စုစုပေါင်း (၁၀၄)ဦးတို့ တက်ရောက်ကြောင်း သိရပါသည်။

DOCA(Product Safety)