သတင်းနှင့် လှုပ်ရှားမှုများ

          စားသုံးသူရေးရာဦးစီးဌာနသည် စားသုံးသူများလုံခြုံစိတ်ချရမှုရှိစေရေး၊စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေး၊ထုတ်ကုန်များလုံခြုံစိတ်ရမှုရှိစေရေး၊ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့်သုတေသနလုပ်ငန်းမျာ ဆောင်ရွက်ရန်နှင့် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ပြည်တွင်း၌လယ်ယာထွက်ကုန်နှင့်ဆိုင်သည့်ကုန်ပစ္စည်းများအား ပြည်ပပို့ကုန်မြှင့်တင်ရန်အတွက် စျေးကွက်အလားအလာရှိသော သီးနှံများအားဖော်ထုတ်ပြီး တန်ဖိုးမြှင့်ထုတ်ကုန်များထုတ်လုပ်၍ စျေးကွက်ရရှိရေးအတွက်ဆောင်ရွက်လျှက်ရှိပါသည်။ (၂၀-၁-၂၀၂၂)ရက် နေ့တွင် ကျောက်ဆည်ခရိုင်၊စားသုံးသူရေးရာဦးစီးဌာနမှဦးဆောင်ပြီး မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့များနှင့်ပူးပေါင်းပြီး ကျောက်ဆည်မြို့ရှိ Shopping Mall, Minimartနှင့် စားသုံးဆီအရောင်းဆိုင်လုပ်ငန်းရှင်များအား ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များအား ကွင်းဆင်းအသိပေး ဆောင်ရွက်ခဲ့ပါသည်။ကွင်းဆင်းရာတွင် ကျောက်ဆည်ခရိုင်၊စားသုံးသူရေးရာဦးစီးဌာန၊ခရိုင်ဦးစီးမှူးက မြန်မာနိုင်ငံစားသုံးသူကာကွယ်ရေးကော်မရှင်မှ ၂၀၁၉ခုနှစ်၊ ဒီဇင်ဘာလ ၃ ရက်စွဲပါညွှန်ကြားချက် အမှတ်၂/၂၀၁၉ဖြင့် “ကုန်စည်များတွင် မြန်မာ ဘာသာဖြင့်ဖြစ်စေ၊မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍တွဲလျှက်ဖြစ်စေဖော်ပြရာ၌ “စီးပွားရေးလုပ်ငန်းရှင်များ”လိုက်နာဆောင်ရွက်ရန်ညွှန်ကြားချက်”အား ကုန်စည်အုပ်စုအလိုက် ထုတ်ပြန်ပေးခဲ့ပြီးဖြစ်ကြောင်း ၊ ယင်း ကုန်စည်အုပ်စု(၈)ခုနက် အစားအသောက်ကုန်စည်အုပ်စုတွင်ပါဝင်သည့် စားသုံးဆီအမျိုးမျိုးနှင့် စပ်လျဉ်း၍ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှု အညွှန်းတို့ကိုမဖြစ်မနေဖော်ပြရန်လိုအပ်သည့်အတွက် ညွှန်ကြားချက်အားထုတ်ပြန်ပြီးဖြစ်ကြောင်း ၊ ယခုအခါတွင် စျေးကွက်အတွင်း၌ စားသုံးဆီများအနက် အချို့သောစားသုံးဆီများကို ဟင်းသီးဟင်းရွက်ဆီ(Vegetable Oil, Cooking Oil)ဟု ဖော်ပြချက်သည် ကုန်စည်တစ်ခု၏ အမျိုးအမည် မဟုတ်သည့်အပြင် စားသုံးသူများအားထင်ယောင်ထင်မှားဖြစ်စေသည့်အတွက် မိမိတို့ဝန်ကြီးဌာနမှ (၂၂-၁၂-၂၀၂၁)ရက်နေ့တွင် ညွှန်ကြားချက်အမှတ် (၁/၂၀၂၁) ဖြင့်စီးပွားရေးလုပ်ငန်းရှင်များအနေဖြင့် စျေးကွက်အတွင်း ဖြန့်ဖြူးရောင်းချသည့် ဟင်းသီးဟင်းရွက်ဆီ (Vegetable Oil, Cooking Oil) အမျိုးအစားနှင့်စပ်လျဉ်း၍ ကုန်အညွန်းအမှတ်အသားများ ဖော်ပြရာတွင် ပင်ရင်းပါဝင်ပစ္စည်းကို အခြေခံသောကုန်စည်အမျိုးအမည်ကိုတိကျစွာ မြန်မာဘာသာဖြင့် ဖော်ပြရမည်ဖြစ်ကြောင်း၊ ဥပမာအနေဖြင့် ဟင်းသီးဟင်းရွက်ဆီ (စားအုန်းဆီ/အဆင့်မြင့်စားအုန်းဆီ)ဟု ဖော်ပြရမည်ဖြစ်ကြောင်း ၊ ကုန်စည်၏ အသားတင်ပမာဏ နှင့်အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ပြီး ၄င်းညွှန်ကြားချက် စတင်ထုတ်ပြန်ပြီး (၆)လပြည့်မြောက်သည့်နေ့မှစ၍ အာဏာသက်ရောက်မည်ဖြစ်ကြောင်း စားသုံးဆီရောင်းချသည့်  အရောင်းဆိုင်(၂၂)ဆိုင်အား အသေးစိတ်ရှင်းလင်းပြောကြားခဲ့ပြီး ဟင်းသီးဟင်းရွက်ဆီနှင့်ပတ်သက်သည့်လက်ကမ်းစာစောင်များ ဖြန့်ဝေခဲ့ပါသည် ။ ကျောက်ဆည်မြို့ရှိ စျေးကွက်အတွင်းတွင် (Vegetable Oil, Cooking Oil)ဖော်ပြချက်များဖြင့် အမှတ်တံဆိပ်(၁၄)မျိုးအား ရောင်းချနေကြောင်း သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးသူကာကွယ်ရေဥပဒေ ပုဒ်မ ၈၃ ပုဒ်မခွဲ (က) အရ အပ်နှင်းထားသော လုပ်ပိုင်ခွင့်ကို ကျင့်သုံး၍ စားသုံးသူကာကွယ်ရေးနည်းဥပဒေအား ထုတ်ပြန်လိုက်ပါသည်။ အောက်ပါ .pdf file တွင် ဝင်ရောက်လေ့လာနိုင်ပါသည်-

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ၊ စားသုံးသူရေးရာဦးစီးဌာန၊ ရခိုင်ပြည်နယ် စစ်တွေခရိုင်ဦးစီးမှူးနှင့် စစ်တွေမြို့နယ်တာဝန်ခံရုံးမှ ဝန်ထမ်းများနှင့်အတူ မိတ်ဖက်ဌာနများ      ဖြစ်သော (အစားအသောက်နှင့် ဆေးဝါးကွပ်ကဲရေးဦးစီးဌာန(FDA) ၊ ကျန်းမာရေးဦးစီးဌာန ၊ အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့ ၊ မြန်မာနိုင်ငံရဲတပ်ဖွဲ့) မှ တာဝန်ရှိသူများနှင့်  (၁၉-၁-၂၀၂၂) ရက်နေ့ နေ့လည်(၁:၃၀)နာရီ မှ ညနေ(၅:၀၀)နာရီအချိန်ထိ စစ်တွေမြို့ပေါ်ရပ်ကွက်များရှိ စားသောက်ကုန်မျိုးစုံရောင်းချသော စတိုးဆိုင်(၁၁)ဆိုင်သို့ သွားရောက်၍ စားသုံးသူကာကွယ်ရေး၊ ထုတ်ကုန်လုံခြုံစိတ်ချရမှုရှိစေရေး၊ ဘေးဥပါဒ်အန္တရာယ်ကင်းရှင်းစေရေး စားသုံးရန်မသင့်သော အစားအသောက်များအား ဈေးကွက်အတွင်းမှ ပပျောက်စေရေး ကွင်းဆင်းစစ်ဆေးခဲ့ပါသည်။

            ရခိုင်ပြည်နယ် အစားအသောက်နှင့် ဆေးဝါးကွပ်ကဲရေးဦးစီးဌာနမှ ၂၀၂၁ ခုနှစ် စက်တင်ဘာလအတွင်း စစ်တွေမြို့ ဈေးကွက် အတွင်းမှ ဈေးကွက်နမူနာကောက်ယူခဲ့သော အချို့စားသောက်ကုန်များသည် Sodium Cyclamate နှင့် Benzoic acid သတ်မှတ်ပမာဏထက် ကျော်လွန်၍ ပါဝင်နေခြင်းကြောင့် ဈေးကွက်အတွင်း ရောင်းချမှုများမပြုလုပ်စေရေး၊ စားသုံးရန်မသင့်သောကြောင့် ဈေးရောင်းသူများ‌ နောက်နောင်ဝယ်ယူရောင်းချမှုများမပြုလုပ်စေရေး အသိပေးခြင်း၊ စားသုံးသူရေးရာဦးစီးဌာန၊ စားသုံးသူကာကွယ်ရေးဥပဒေ (၂၀၁၉) အခန်း (၁၈) ၊ ပုဒ်မ (၄၁) ပြဌာန်းချက် ကုန်အညွှန်းအမှတ်အသားဖော်ပြရာတွင် ပါဝင်ရမည့်အချက်များ ပြည့်စုံစွာပါဝင်သော စားသောက်ကုန်များအား ရောင်းချစေရေးနှင့်  ကုန်စည်များတွင် ကုန်အညွှန်းအမှတ်အသားအား မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျှက်ဖြစ်စေ ဖော်ပြထားသော စားသောက်ကုန်များအား ဈေးကွက်အတွင်း တင်သွင်းရောင်းချစေရေး အသိပေးဆောင်ရွက်ခြင်း၊ FDA ဌာနမှ လက်ကမ်းစာစောင်များပေးဝေခဲ့ပြီး စားသုံးသူရေးရာဦးစီးဌာနမှလည်း စားသုံးသူကာကွယ်ရေးကော်မရှင်၏ (၃-၁၂-၂၀၁၉)ရက်နေ့ ညွှန်ကြားချက် (၂/၂၀၁၉) လက်ကမ်း စာစောင်များ ပေးဝေခဲ့ပါသည်။ ထို့နောက် စားသုံးရန်မသင့်သော သက်တမ်းလွန်စားသောက်ကုန် (၁၂) မျိုး / ခု‌ ရေ (၇၇) ခု အား အဖွဲ့ဖြင့် သိမ်းဆည်းမှုပြုလုပ်ပြီး FDA ဌာနမှ ဈေးကွက်အတွင်းရောင်းချနေသည့် စားသောက် ကုန်သီးစုံ(၃)မျိုး နှင် အချိုရည် (၃) မျိုး အား ဓါတ်ခွဲစမ်းသပ်စစ်ဆေးရန် နမူနာ ကောက်ဝယ်ယူခြင်း ၊ စားသုံးသူများလုံခြုံစိတ်ချရမှုရှိစေရန်နှင့် စားသုံးသူများအနေဖြင့် ဘေးဥပါဒ် အန္တရာယ်ကင်းရှင်းသော အစားအသောက်များအားစားသုံးနိုင်ရန် ရည်ရွယ်၍ ဈေးကွက်အတွင်းသို့ ကွင်းဆင်းစစ်ဆေး အသိပညာပေးလုပ်ငန်းများ ဆောင်ရွက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ရခိုင်ပြည်နယ်)    

စားသုံးသူရေးရာဦးစီးဌာန၊ သာယာဝတီခရိုင် ၊ ဇီးကုန်းမြို့နယ် မြို့နယ်တာဝန်ခံနှင့် ဝန်ထမ်းများသည် မြို့နယ်တာဝန်ခံရုံး၌ ( ၁၄.၁.၂၀၂၂ )ရက်နေ့၊ နံနက်(၁၀: ၀၀)နာရီအချိန်တွင် ဒေသတွင်းထုတ်လုပ်သော လုပ်ငန်းရှင်( ၈ ) ဦးနှင့်တွေ့ဆုံဆွေးနွေးခဲ့ပါသည်။
မြို့နယ်တာဝန်ခံဒေါ်မြင့်မြင့်ခင်က စားသုံးသူကာကွယ်ရေးဥပဒေအခန်း(၁၈)၊ ပုဒ်မ(၄၁)အရကုန်စည်အမျိုးအစားအလိုက် သိသာထင်ရှားစွာဖော်ပြရမည့်အချက်( ၇ )ချက်နှင့် မြန်မာနိုင်ငံစားသုံးသူကော်မရှင်ညွှန်ကြားချက် အမှတ်(၂/၂၀၁၉)အရ မတူညီသော ကုန်စည်အမျိုးအစားပေါ်မူတည်ပြီး အဓိကပါဝင်ရမည့် အချက်များကို မဖြစ်မနေဖော်ပြရန်၊ စီးပွားရေး လုပ်ငန်းရှင်များအနေဖြင့် စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များနှင့် ပြစ်မှုပြစ်ဒဏ်များကို သိရှိလိုက်နာရန်နှင့် အခြေခံ ကုန်အညွှန်း အမှတ်အသားများပြည့်စုံစွာ ဖော်ပြပါရှိမှသာ စားသုံးသူများဝယ်ယူသုံးစွဲရာ၌ သတင်းအချက်အလက်များပြည့်စုံစွာ ပေးနိုင်မည်ဖြစ်ကြောင်း၊ ဈေးကွက် စောင့်ကြည့် စစ်ဆေးမှုများ ဆောင်ရွက်မည့်စစ်ဆေးရေးမှူးများအား ခန့်အပ်ထားပြီးဖြစ်ကြောင်း ဆွေးနွေးပြောကြားခဲ့ပါသည်။
ဆက်လက်၍ စားသုံးသူများနစ်နာဆုံးရှုံးမှုများရှိပါကတိုင်ကြားနိုင်သည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ ( Consumer Information and Complaint Center- CICC) ကို ဇီးကုန်းမြို့နယ် တာဝန်ခံရုံးတွင် (၂၅.၁၁.၂၀၁၉) ရက်နေ့တွင် ဖွင့်လှစ်ထားရှိပါကြောင်းနှင့် စားသုံးသူရေးရာဦးစီးဌာနမှ ဖြေရှင်းညှိနှိုင်းဆောင်ရွက်ပေးခဲ့သည့် စားသုံးသူအငြင်းပွားမှုကိစ္စရပ်များကို ဆွေးနွေးပြီး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။
DOCA(ပဲခူး)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စားသုံးသူများလုံခြုံစိတ်ချရမှုရှိစေရေးအတွက် မျှော်မှန်းချက်နှင့်အညီ တိုင်း/ခရိုင်ဦးစီးမှူးတို့၏ လမ်းညွှန်မှုဖြင့် ဒု-ခရိုင်ဦးစီးမှူးနှင့် ဝန်ထမ်း များသည် စားသုံးသူကာကွယ်ရေးဆိုင်ရာ အသိပညာပေးလုပ်ငန်းများ၊ စားသုံးသူကာကွယ်ရေးဥပဒေပါပြဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေးအသိပညာပေးခြင်း၊ ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူသူတောင်သူများ၊ စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း၊ သတင်းအချက်ဖြန့်ဝေပေးခြင်းလုပ်ငန်းများ ဆောင်ရွက်လျက်ရှိပါသည်။

          စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူးရုံး၊ ဆိပ်ဖြူမြို့နယ်တာဝန်ခံ ရုံးအုပ် ဦးဇော်နေလင်းသည် မိတ်ဖက်ဌာနဖြစ်သော မြို့နယ်စည်ပင်သာယာရေးအဖွဲ့နှင့်ပူးပေါင်း ဆောင်ရွက်၍ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်များ လုံခြုံစိတ်ချရမှုရှိစေ ရေး ရည်ရွယ်၍ ၂၀၂၂ ခုနှစ်၊ ဇန်နဝါရီလ(၁၄)ရက်နေ့ နေ့လယ်(၁၅:၃၀)နာရီအချိန် တွင်ဆိပ်ဖြူမြို့ အနောက်ပိုင်းရပ်ကွက်ရှိ ကိတ်မျိုးစုံ၊ ပေါင်မုန့်ထုတ်လုပ်သည့်လုပ်ငန်းရှင် တွေ့ဆုံ အသိပညာပေးခြင်းဆောင်ရွက်ခဲ့ပါသည်။

       လုပ်ငန်းရှင်မှ မုန့်ထုတ်လုပ်ရောင်းချဖြန့်ဖြူးသည့် လုပ်ငန်းကိုလုပ်ကိုင်ခဲ့ရာတွင် (၇)လခန့်သာသက်တမ်းရှိသေးကြောင်း၊ စည်ပင်သာယာမှ ထုတ်လုပ်ရောင်းချခွင့်လုပ်ငန်း လိုင်စင်ပြုလုပ်ထားကြောင်း၊ အသေးစားစက်မှုလုပ်ငန်းမှတ်ပုံတင်မဆောင်ရွက်ရသေးကြောင်း၊ မြို့နယ်တာဝန်ခံမှအသိပညာပေးပြောကြားရာတွင် စီးပွားရေးလုပ်ငန်းရှင်အနေဖြင့် ကုန်စည်များ ထုတ်လုပ်ဖြန့်ဖြူး ရောင်းချရာတွင် စီးပွားရေးလုပ်ငန်းရှင်များ သိရှိလိုက်နာဆောင်ရွက်စေရန်အတွက် စားသုံးသူကာကွယ်ရေးဥပဒေ(၂၀၁၉)ပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များနှင့် အခန်း(၁၈) ကုန်အညွှန်းအမှတ်အသားဆိုင်ရာ ပြဌာန်းချက်များနှင့်ပုဒ်မ(၄၁)၊ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာဖြင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပြီး လုပ်ငန်းရှင်များအနေဖြင့် မိမိတို့ထုတ်လုပ်သော ကုန်စည်များတွင် ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြနိုင်ရန် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြေငြာချက်အမှတ် (၂/၂၀၁၉)နှင့်အညီ ဖော်ပြပေးရမည်ဖြစ်ကြောင်း၊ ကုန်အညွှန်းအမှတ်အသားဖော်ပြချက်နှင့်ကိုက်ညီမှုရှိပါက ကုန်အမှတ် တံဆိပ်စိစစ်ခွင့်ပြုချက်ရရှိစေရေးအတွက် ခရိုင်/တိုင်းရုံးများသို့ ဆက်လက်တင်ပြဆောင်ရွက် ပေးသွားမည်ဖြစ်ကြောင်း၊ အခြားဌာနများ၏ ခွင့်ပြုချက်လိုင်စင်များ လုပ်ဆောင်ရန်လိုအပ်ပါကလည်း သက်ဆိုင်ရာဌာနများနှင့် ချိတ်ဆက်၍ ကူညီဆောင်ရွက်ပေးမည်ဖြစ်ကြောင်း ရှင်းလင်းဆွေးနွေးခဲ့ပြီး စားသုံးသူကာကွယ်ရေးအသိပညာပေးလက်ကမ်းနှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြေငြာချက်အမှတ် (၂/၂၀၁၉)ပါအသိပညာပေးလက်ကမ်းစာစောင်များကို ဖြန့်ဝေပေးခဲ့ပါကြောင်း သတင်းရရှိပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး