သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာနလက်အောက်ရှိ စားသုံးသူရေးရာဦးစီးဌာနသည်  စားသုံးသူကာကွယ်ရေးနှင့်စပ်လျဉ်းသည့် အသိပညာဗဟုသုတများကို ပြည်သူအများ သိရှိနားလည်စေရန် ကဏ္ဍပေါင်းစုံ၊ နည်းလမ်းပေါင်းစုံနှင့် ရှုထောင့်ပေါင်းစုံဖြင့် ဆောင်ရွက်လျက်ရှိပါသည်။
        ၂၀၂၃ ခုနှစ် ဇန်နဝါရီလ ၂၀ ရက်နေ့  (နေ့လယ် ၁၃:၀၀) နာရီအချိန်တွင် စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဒု-ခရိုင်ဦးစီးမှူးတာဝန်ထမ်းဆောင်နေသော ဦးစီးအရာရှိ ဒေါ်တိုးတိုးချွန်သည် မုံရွာခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ လူထုအ‌ခြေပြုဗဟိုဌာန (Community Centre ) ခန်းမတွင် စားသုံးသူများအသိပညာဗဟုသုတများ တိုးပွားစေရန်ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေးဆွေးနွေးပွဲကို ကျင်းပခဲ့ကြောင်းသိရပါသည်။
    မုံရွာခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန ခရိုင်ဦးစီးမှူး ဦးမြင့်နိုင်စိုးက သိရှိလိုသည်များကိုမေးမြန်းခဲ့ရာ စားသုံးသူရေးရာဦးစီးဌာနမှ ဦးစီးအရာရှိ ဒေါ်တိုးတိုးချွန်က စားသုံးသူရေးရာကိစ္စရပ်များနှင့်ပတ်သက်၍ အကျယ်တ၀င့်ရှင်းလင်းဖြေကြား ဆွေးနွေးခဲ့ကြောင်းသိရပါသည်။ ထိုသို့ ရှင်းလင်းဆွေးနွေး‌ရာတွင် စားသုံးသူအဓိပ္ပါယ်နှင့်စားသုံးသူကာကွယ်ရေးအဓိပ္ပါယ်၊ မြန်မာနိုင်ငံ စားသုံးသူကာကွယ်ရေးဥပဒေရေးဆွဲပြဋ္ဌာန်းပြီး အကောင်အထည်ဖော်ဆောင်ရွက်ရသည့် ရည်ရွယ်ချက်များအကြောင်း မိတ်ဆက်ပြောကြားခဲ့ပြီး စားသုံးသူအခွင့်အရေးများအကြောင်း၊ "ထုတ်ကုန်လုံခြုံစိတ်ချရမှုအစ ကုန်အညွှန်းအမှတ်အသားက" ဆောင်ပုဒ်အတိုင်း ကုန်အညွှန်းအမှတ်အသားအကြောင်း၊ ကုန်စည်နှင့်ဝန်ဆောင်များနှင့်ပတ်သက်၍ အာမခံမှုပေးထားသည့်အပေါ် စားသုံးသူများက တောင်းဆိုနိုင်သည့်အခွင့်အရေးများအကြောင်း၊ စီးပွားရေးလုပ်ငန်းရှင်များဘက်ကလည်း မိမိတို့ထုတ်ကုန်များကို လုံခြုံ စိတ်ချရမှုရှိစေရန် ဥပဒေပါအတိုင်း ကုန်အညွှန်းအမှတ်အသားနှင့်ပြည့်စုံအောင် ထုတ်လုပ်ကြရန်လိုအပ်ကြောင်း၊ စာသုံးသူများအနေဖြင့် ကုန်စည်နှင့်ဝန်ဆောင်မှုကို ဝယ်ယူအသုံးပြုခြင်းကြောင့် စားသုံးသူများနစ်နာဆုံးရှုံးမှုများ ဖြစ်‌ပေါ်လာပါက စားသုံးသူများအနေဖြင့် သက်ဆိုင်ရာ ခရိုင်/ မြို့နယ်များရှိ စားသုံးသူရေးရာဦးစီးဌာန၏ (Consumer Information and Complaint Center) CICC၊ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ၌ လူကိုယ်တိုင်သော်လည်းကောင်း၊ တယ်လီဖုန်းဖြင့်သော်လည်းကောင်း၊ စားသုံးသူရေးရာဦးစီးဌာန၏ Website ဖြစ်သည့် ( www.doca.gov.mm ) (Complaint System)၊ Mobile Application ဖြစ်သည့် Doca Myanmar Mobile app၊ Consumer Call Center (1535) သို့ ဆက်သွယ်၍ တိုင်ကြားနိုင်ကြောင်း၊ ပြည်တွင်းကုန်သွယ်မှုဖွံဖြိုးတိုးတက်ရေးနှင့်ပတ်သက်ပြီး  စားသုံးသူရေးရာဦးစီးဌာနက ဆောင်ရွက်နေသည့် အခြားလုပ်ငန်းဆောင်ရွက်ချက်များအကြောင်းကိုလည်း ပြည့်ပြည့်စုံစုံ ရှင်းလင်းဆွေးနွေးခဲ့ကြောင်းသိရပါသည်။

DOCA(စစ်ကိုင်း)

          (၂၃.၁.၂၀၂၃) နေ့ (၁၀:၃၀) နာရီအချိန်တွင် ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ဓနုဖြူမြို့နယ် မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် ဓနုဖြူ လှေဆိပ် (၁၇)ရပ်ကွက်ရှိ အခြေခံပညာ မူလတန်းကျောင်းတွင် စားသုံးသူအခွင့်အရေး ဦးစားပေးသိရှိနိုင်ရေး မိတ်ဖက် ဌာန တို့နှင့်အတူ လူငယ်အသိပညာပေး ဟောပြော ပွဲပြုလုပ်ခဲ့ကြပါသည်။

        အဆိုပါဟောပြောပွဲတွင် စားသုံးသူရေးရာဦးစီးဌာန မှ မြို့နယ်ဦးစီးမှူးဦးဝင်းမင်းစိုးက စားသုံးသူ ကာကွယ်ရေးဥပဒေ (၂၀၁၉)ကိုရှင်းလင်းဟောပြောပြီး စားသုံးသူကာကွယ်ရေးဆိုသည်မှာ ကုန်စည် (သို့မဟုတ်) ဝန်ဆောင်မှုနှင့် စပ်လျဉ်း၍ စားသုံးသူ၏ အခွင့်အရေးနှင့်   အကျိုးစီးပွားကိုကာကွယ်ပေးခြင်း နှင့် စားသုံးသူနှင့် စီးပွားရေးလု်ပငန်းရှင်တို့အကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ် ဆောင်ရွက်ပေးသည့် မျှတမှု ရှိသော လုပ်ငန်းစဉ်တစ်ခုဖြစ်ကြောင်းကို ရှင်းလင်းပြီး စားသုံးသူ၏အဓိပ္ပာယ်၊ စားသုံးသူ၏အခွင့်အရေးနှင့်တာဝန်(၈)ချက်အကြောင်း၊စီးပွားရေးလုပ်ငန်းရှင်အဓိပ္ပာယ်၊လုပ်ငန်းရှင်တို့၏တာဝန်နှင့်လိုက်နာရမည့်တာဝန်များအကြောင်း၊ ကုန်စည် (သို့မ ဟုတ်) ဝန်ဆောင်မှု၏ အဓိပ္ပာယ်အကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ  ကုန်အညွှန်းအမှတ်အသားဖော်ပြခြင်း အကြောင်းများ ကို လည်းကောင်း၊ စားသုံးသူတို့သည် မိမိတို့အခွင့်အရေးကိုသိရှိ၍ ကုန်စည်ကို ဝယ်ယူအသုံးပြုရာတွင် နစ်နာဆုံးရှုံးမှု ရှိလာပါကလည်း စားသုံးသူရေးရာဦးစီးဌာနသို့ အရေးဆိုတိုင်ကြားနိုင်သည့်နည်းလမ်း များအကြောင်း နှင့် တိုင်ကြားခြင်းနှင့် စိစစ်ညှိနှိုင်း ဖြေရှင်းဆောင်ရွက်ခြင်းအကြောင်းတို့ကို အကျယ်တဝင့် ရှင်းလင်ဟောပြောပြီး ကျောင်းသူ၊ ကျောင်းသား ၊ ဆရာ/ဆရာမ (၁၃၆) ဦး တက်ရောက်ခဲ့ကြောင်း သတင်း ရရှိပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊  မအူပင်မြို့နယ်ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၂၄.၁.၂၀၂၃) ရက်နေ့ (၀၉:၃၀)နာရီအချိန်တွင် မအူပင်မြို့ပေ်ရှိ ဆေးမျိုးစုံရောင်းချသည့် ဆိုင်များအား မိတ်ဖက်ဌာနဖြစ်သော FDA၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူ ပူးပေါင်း၍ ဈေးကွက်စောင့်ကြည့် စစ်ဆေးခဲ့ကြပါသည်။

       ကွင်းဆင်းစစ်ဆေးရာတွင် မအူပင်မြို့ပေါ်ရှိ ဆေးအမျိုးမျိုးရောင်းချနေသော ဆေးဆိုင်(၅)ဆိုင်မှ ရောင်းချနေသောဆေးဝါးများသည် တရားမဝင်ဆေးဝါများ ဈေးကွက်အတွင်း ရောင်းချခြင်းရှိ/မရှိနှင့် မှတ်ပုံတင်ထားခြင်းမရှိသော ဆင်တူရိုးမားဆေးဝါးအတုအပများ ရောင်းချခြင်းရှိ/မရှိကို စစ်ဆေးခဲ့ကြရာ အစားအသောက်နှင့် ဆေးဝါးကွပ်ကဲရေးဦးစီးဌာနမှ တာမြစ်ထားသော ဆေးဝါးများ ရောင်းချခြင်းမရှိကြောင်း စစ်ဆေးတွေ့ရှိရပါသည်။ ဆေးဆိုင်ရှင်များကိုလည်း ကုန်အညွှန်းအမှတ်အသား သတ်မှတ်ချက်ပြည်စုံစွာ ဖော်ပြပါရှိသော ဆေးဝါးများကိုသာ ရောင်းချရန်၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တားမြစ်ကုန်စည်များကိုလည်း မရောင်းချရန်နှင့် သတ်မှတ်ချက် စည်းကမ်းများနှင့် မကိုက်ညီသော ကုန်စည်များကို ရောင်းချခြင်းမျိုးစစ်ဆေးတွေ့ရှိပါက အရေးယူဆောင်ရွက်ခြင်း၊ ဌာနတို့၏ ပြစ်မှု၊ပြစ်ဒဏ်များ ခံရမည်ဖြစ်ကြောင်း ရှင်းလင်းဆွေးနွေး အသိပညာပေးခဲ့ကြောင်း သိရှိရပါသည်။

DOCA(ဧရာဝတီ)

        စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးနှင့် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ ၂၅.၁.၂၀၂၃ရက်နေ့ နံနက်၁၁:၀၀နာရီအချိန်တွင် မြစ်ကြီးနားခရိုင်ပြန်ကြား ရေးနှင့်ပြည်သူ့ဆက်ဆံရေးဦးစီးဌာနရှိ လူထုအခြေပြုဗဟိုဌာန(CommunityCentre)ခန်းမ၌  စားသုံးသူကာကွယ်ရေးအသိပညာပေး Talk Show ကျင်းပပြုလုပ်ခဲ့ပါသည်။

          Talk  Show   ပြုလုပ်ရာတွင် ဦးဘောမ်ဇုန်း(ရုံးအုပ်)မှ စားသုံးသူကာကွယ်ရေးဥပဒေ  ပေါ်ပေါက်လာပုံ၊စားသုံးသူကာကွယ်ရေးဥပဒေပါ အဓိပ္ပါယ်ဖော်ပြချက်နှင့်ရည်ရွယ်ချက်များ၊  စားသုံးသူရေးရာဦးစီးဌာန၏လုပ်ငန်ဆောင်ရွက်ချက်များ၊စားသုံးသူကာကွယ်ရေးအသိပညာပေးလုပ်ငန်းဆောင်မှု၊စီးပွားရေးလုပ်ငန်းရှင်၏တာဝန်များ၊ စားသုံးသူ၏အခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုများအတွက်တိုင်ကြားရမည့်နည်းလမ်းများနှင့်ဖြေရှင်ဆောင်ရွက်ပေးနေမှုအခြေအနေတို့ကိုအသိပညာပေးရှင်းလင်းပြောကြားခဲ့ပါသည်။

DOCA(ကချင်)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိရာ ဇန်နဝါရီလ(၁၈)ရက်နေ့အချိန်တွင်  ရွှေဘိုမြို့ပေါ်ရှိ ကုန်မျိုးစုံလက်လီ/ လက်ကားရောင်းချသည့် ဆိုင်(၂)ဆိုင်အား ရွှေဘိုခရိုင် စားသုံးသူရေးရာဦးစီးဌာနနှင့် ခရိုင် ပြည်သူ့ကျန်းမာရေးဦးစီးဌာနတို့ပူးပေါင်း၍ အဖွဲ့ဝင်(၅)ဦးဖြင့် COFFEE SHOP (very good) တံဆိပ်ပါ ကော်ဖီမစ်ကဲ့သို့ အန္တရာယ်ဖြစ်စေနိုင်သည့် စားသောက်ကုန်များ တရားမဝင်ရောင်းဝယ်မှုရှိ/မရှိ ဈေးကွက်စောင့်ကြည့် စစ်ဆေးခဲ့ကြပါသည်။

      ထိုသို့စစ်ဆေးရာ၌ ကုန်မျိုးစုံရောင်းဝယ်ရေးဆိုင်များတွင် ရောင်းချသည့်ကော်ဖီမစ်များအား စစ်ဆေးရာ COFFEE SHOP (very good) တံဆိပ်ပါ ကော်ဖီမစ်ကဲ့သို့ အန္တရာယ်ဖြစ်စေနိုင် သည့် စားသောက်ကုန်များကို ရောင်းချမှုမရှိကြောင်း တွေ့ရှိရသဖြင့် စီးပွားရေးလုပ်ငန်းရှင်များအား ဌာနမှ ဆောင်ရွက်နေသောလုပ်ငန်းများနှင့်  စားသုံးသူကာကွယ်ရေးဥပဒေပါအကြောင်းများကို  အသိပညာပေးဆွေးနွေးခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များဖြန့်ဝေခဲ့ပါသည်။

DOCA(စစ်ကိုင်း)