ပြည်တွင်းကုန်သွယ်မှုသတင်း

            စစ်ကိုင်းတိုင်းဒေသကြီး၊  မုံရွာမြို့နယ်အတွင်းရှိ ကျေးရွာများတွင် ကုလားပဲကို တောင်သူတော်တော်များက စီးပွားဖြစ်စိုက်ပျိုးလျက်ရှိပါတယ်၊ မြေတစ်ဧကကို မျိုးစေ့ ၂ တင်းမှ ၃ တင်းခန့်စိုက်ပျိုးကြရပြီး ကုလားပဲမျိုးစေ့များမှာ 929, V2 ,V3, V7 အများအပြားရှိသော်လည်း တောင်သူများက အထွက်ကောင်းသည့် 929, V2 မျိုးကိုသာစိုက်ပျိုးကြကြောင်း မျိုးစေ့ ၁တင်းလျှင် ကျပ်(၄၀၀၀၀) ပေးဝယ်ရကြောင်း၊ မျိုးစေ့ (၃)တင်း (၁၂၀၀၀၀) ကျပ်ပေးဝယ် ရပါကြောင်း ၊မြေတစ်ဧကကို  ယခုနှစ်တွင် နွားရှည်းများဖြင့် မထွန်ယက်တော့ပဲ ထွန်စက်ကြီးများနှင့် ထွန်ယက်ခ တစ်ဧကကို သုံးခါထွန်(၉၀၀၀၀)ကျပ်ဖြင့် ပေး၍ထွန်ယက်ကြပါကြောင်း၊ စိုက်ပျိုးပြီး ၁လကျော်လျှင် ပိုးသတ်ဆေးနှင့် မှိုသတ်ဆေး၊အားဆေးများဖျန်းပေးရပါကြောင်း၊ ကုလားပဲကို ‌အောက်တိုဘာနှင့် နိုဝင်ဘာလများတွင် စတင်စိုက်ပျိုးကြကြောင်း၊ မတ်လတွင် ရိတ်သိမ်းရကြောင်း၊ ရိတ်သိမ်းချိန် ရောက်လျှင် လူတစ်ဦးလျှင် တစ်နေကုန် ကျပ် (၅၀၀၀) နှုန်းဖြင့် တစ်ဧကကို ၁၀ ယောက် ငှား၍ရိတ်သိမ်းရပါကြောင်း၊ ရိတ်သိမ်းပြီး အပင်များကို စိုက်ခင်းမှ အိမ်အရောက် ထော်လာဂျီဖြင့် ငှား၍ တစ်စီးလျှင် သယ်ခ ကျပ် (၁၂၀၀၀)နှင့်၊ ရိတ်သိမ်းပြီး အပင်များကို စက်ဖြင့် ခြွေလှေ့လျှင် ၁နာရီလျှင် ကျပ်(၁) သောင်းနှုန်းပေးရကြောင်း၊ ယခင်နှစ် ရာသီကုန်ကုလားပဲ လက်ငုတ် ဈေးကောင်းမွန်ခဲ့သည့်အတွက် ယခုနှစ်တွင် ကုလားပဲစိုက်ဧက ပိုမိုများလာကြောင်း၊ ကုလားပဲများကို ဒေသခံ ပွဲရုံများသို့ ရောင်းချခြင်း၊မုံရွာမြို့ရှိ ပွဲရုံများသို့ရောင်းချခြင်း၊ သီးနှံပေါ်စတွင် ကုလားပဲ တစ်တင်း (၄၃၀၀၀)ကျပ်ဖြင့်ရောင်းချရသဖြင့် အကျိုးအမြတ် ရရှိခဲ့ကြောင်း၊ ရာသီကုန်အထိ သိုလှောင်ထားနိုင်သည့် တောင်သူများအနေနဲ့ အကျိုးအမြတ်ပိုမို ရရှိခဲ့ကြောင်း ၊ယခုပေါက်ဈေးမှာ ကုလားပဲ တစ်တင်းလျှင် ကျပ် ၄၀၀၀၀ မှ ၄၃၀၀၀ ထိရှိပါကြောင်း၊ တောင်သူများမှာ ကုလားပဲကို ၆ဧကမှ ၇ ဧကထိ စီးပွားဖြစ်စိုက်ပျိုးလျက်ရှိပြီး ကုလားပဲသည် ပြည်တွင်းပို့ကုန်အဖြစ် အသုံးပြုရောင်းချကြောင်း၊ ဈေးပေါ်မူတည်သော်လည်း ယခုနှစ်တွင် စိုက်ပျိုးသူများ ဈေးကောင်းရနေ၍ အမြတ်ပိုမိုရရှိနေကြောင်း၊ ကုလားပဲကို မုံရွာမြို့ရှိ ပွဲရုံများသို့ သွားရောက်ရောင်းချလျက်ရှိပါကြောင်း၊ လက်ရှိဒေသတွင်း ဈေးကွက်၌လည်း ကုလားပဲသီးနှံမှာ အခြားExport ပဲများနှင့်အတူ ဈေးမာလျှက်ရှိကြောင်း၊ လက်ရှိကုလားပဲတစ်တင်း (၄၃၀၀၀)ကျပ် ပေါက်ဈေးရှိပြီး ယခင်နှစ်ကာလတူနှင့်နှိုင်းယှဉ်ပါက တစ်တင်း ကျပ်(၁၀၀၀၀)ကျော် မြင့်တက်လျှက်ရှိကြောင်း၊ Export ဝယ်လက် နည်းပါး သော်လည်း ပြည်တွင်းသုံးစွဲမှုများပြီး ဈေးကွက်ဝယ်လိုအား ရှိနေသည့်အတွက် အရောင်းအဝယ်ဖြစ်လျှက်ရှိကြောင်း၊ ဒေသတွင်း ပဲခွဲစက်၊ ကြာဇံစက်၊ ပဲကြော်လုပ်ငန်းများနှင့်  မုံရွာ၊ မန္တလေး၊ ရန်ကုန်၊ ပခုက္ကူ မြို့ကြီးများမှ ဝယ်ယူလျှက်ရှိကြောင်း သိရှိရပါတယ်။      

 စစ်ကိုင်းတိုင်းဒေသကြီး၌ ၂၀၂၀ -၂၀၂၁ ဘဏ္ဍာနှစ်တွင် ကုလားပဲစိုက်ဧက(၄၂၆၈၈၄) ဧကစိုက်ပျိုးခဲ့ပြီး ၂၀၂၁ -၂၀၂၂ ဘဏ္ဍာနှစ်တွင် ကုလားပဲစိုက် ဧက(၄၁၇၂၃၁) ဧကစိုက်ပျိုးကြောင်း၊ယခင်နှစ်နှင့်နှိုင်းယှဉ်လျှင် စိုက်ဧက(၉၆၅၃)ဧကလျော့နည်းစိုက်ပျိုးပါကြောင်း၊ တစ်ဧက စိုက်ပျိုးထုတ်လုပ်မှုကုန်ကျစရိတ်မှာ (၂၅၆၅၀၀) ကျပ်ခန့် ကုန်ကျပါကြောင်း၊ ပေါက်ဈေးအနေဖြင့် တစ်တင်းလျှင်(၄၃၀၀၀)ကျပ်ခန့် ရရှိပါကြောင်း၊ တစ်ဧက ပျမ်းမျှ အထွက်နှုန်းအနေဖြင့် (၂၀)တင်း ခန့် ထွက်ရှိပါကြောင်း၊ တစ်ဧကဝင်ငွေအနေဖြင့် (၈၆၀၀၀၀)ကျပ်ခန့်ရရှိသဖြင့် တစ်ဧက အကျိုးအမြတ်အနေဖြင့် (၆၀၃၅၀၀)ကျပ်ခန့် ရရှိသဖြင့် တောင်သူများအတွက် တွက်ချေကိုက်သည့် သီးနှံဖြစ်ကြောင်း၊ ချောင်းဦးမြို့နယ်ရှိ ကြောင်ဝပ်ကြီး ကျေးရွာနှင့် ကြက်သွန်ဈေး ကျေးရွာများရှိ တောင်သူများထံမှ သိရှိရသည်။

     ပြည်တွင်းသုံးကုလားပဲများနှင့် အခြားပဲမျိုးစုံဈေးကွက် ယခင်ပတ်တွင် ဈေးနှုန်း အနည်းငယ်ကျဆင်းမှု ဖြစ်သော်ခဲ့သော်လည်း ယခုမတ်လတတိယပတ်တွင် ဈေးပြန်လည်မြင့်တက်လာတာကြောင့်  အမြင့်ဈေးဖြင့် ရောင်းအဝယ်သွက်နေကြောင်း ပဲသစ်ရာသီဖြစ်သည့်အတွက် ပဲအဝင် အကောင်းဆုံးအချိန်ဖြစ်ပေါ်နေသည့် ဈေးကွက်ဖြစ်ကြောင်း ကုလားပဲနှင့် အခြားပဲမျိုးစုံဈေးများလည်း ဆက်လက်မြင့်တက်နိုင်ကြောင်း ပဲကုန်သည်များထံမှ သိရှိရပါတယ်။

      ယခုနှစ် ကုလားပဲစိုက်တောင်သူများအတွက်ကတော့ သွင်းအားစုဈေးနှုန်းများ အဆမတန်မြင့်တက်ခဲ့သည့်အတွက် ယခင်နှစ်ကထက် စိုက်ပျိုးထုတ်လုပ်မှုကုန်ကျစရိတ်များ မြင့်မားခဲ့သော်လည်း အောင်မြင်ဖြစ်ထွန်းသဖြင့် ကုလားပဲစိုက်တောင်သူဦးကြီးများသည် အခြားသီးနှံများနှင့် နှိုင်းယှဉ်ပါက  အရင်းအနှီးနည်း၍ ဝင်ငွေကောင်းသော ဝယ်သူလည်းတန်း ရောင်းသူလည်း ကျန်သည့် မိမိ၏ ကုလားပဲစိုက်ခင်းများအား “ ပီတိ‌ဖြာ ကြည့်ရှု့ငေးမောရင်း မြေကြီးမှ ရွှေသီးနေသည့် အခင်းကို မျှော်ကြည့်ရင်း ” လာမည့်နှစ်တွင် ကုလား ပဲစိုက်တောင်သူများ ပိုမိုများပြားလာနိုင်ဖွယ်ရှိကြောင်း  ကုလားပဲစိုက်ပျိုးထုတ်လုပ်မှုတိုးတက်လာဖွယ်ရှိကြောင်း သုံးသပ်တင်ပြရ လိုက်ရပါတော့သည်။

DOCA(စစ်ကိုင်း)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးသူပြည်သူများ သက်သာသော ဈေးနှုန်းဖြင့် ဝယ်ယူရရှိနိုင်ရန်အတွက် စက်သုံးဆီနှင့် စားအုန်းဆီများကို ပုဂ္ဂလိကကဏ္ဍမှ သက်ဆိုင်ရာ Stakeholder များနှင့် ပူးပေါင်း၍ တင်သွင်းဖြန့်ဖြူးရောင်းချပေးလျက်ရှိပါသည်။ စားအုန်းဆီများကို မန္တလေးတိုင်းဒေသကြီးအတွင်းရှိ ပြည်သူများသို့ သက်သာသောနှုန်းထားဖြင့် အခါအားလျော်စွာ ဖြန့်ဖြူးရောင်းချလျက်ရှိပါသည်။

            မန္တလေးတိုင်းဒေသကြီး၊ မန္တလေးမြို့ပေါ်ရှိ ဈေးများဖြစ်သော နန်းရှေ့ဈေး၊ ညောင်ပင်ဈေး၊ ပြည်ကျော်ဈေး၊ ဘုရားကြီးဈေးနှင့် တံခွန်တိုင်ဈေးများတွင် (၁-၄-၂၀၂၂) ရက်နေ့ နံနက် (၀၈:၃၀) နာရီအချိန်မှစတင်ပြီး စားသုံးသူပြည်သူများသို့ စားအုန်းဆီများအား ပြင်ပပေါက်ဈေးထက် သက်သာသောဈေးနှုန်းများဖြင့် ဖြန့်ဖြူးရောင်းချလျက်ရှိရာ စားသုံးသူရေးရာဦးစီးဌာန၊ မန္တလေးတိုင်းဒသကြီး ဦးစီးမှူးရုံးမှ စားအုန်းဆီ လက်လီ/လက်ကားရောင်းချသူများအား အပတ်စဉ်ထုတ်ပြန်ပေးသည့် လက်ကားရည်ညွှန်းဈေးအပေါ် ဒေသအလိုက် သယ်ယူပို့ဆောင်ခကုန်ကျစရိတ်များ ထပ်ပေါင်း၍ ၂% အမြတ်ထက်မပိုသော ဈေးနှုန်းဖြင့် ရောင်းချသွားရန် ကွင်းဆင်းစိစစ်ကြပ်မတ်ခြင်းများ ဆောင်ရွက် ခဲ့ပါသည်။

           လာရောက်ဝယ်ယူသည့် စားသုံးသူများအား မေးမြန်းခဲ့မှုအရ လက်ရှိကာလတွင် စားအုန်းဆီ ပြင်ပပေါက်ဈေး (၁)ပိဿာလျှင် (၆၃၀၀)ကျပ်နှင့် (၆၅၀၀)ကျပ်ကြားတွင်ရှိပြီး ယခု လာရောက်ရောင်းချသည့်စားအုန်းဆီဈေးမှာ (၁)ပိဿာလျှင် (၅၉၀၀) ကျပ်နှင့် (၆၀၀၀) ကျပ်ခန့်သာရှိသည့်အတွက် ၎င်းတို့အနေဖြင့် (၁)ပိဿာလျှင် (၄၀၀/၅၀၀)ကျပ်ခန့် သက်သာကြောင်း သိရှိရပါသည်။ ယခုကဲ့သို့ သက်သာသောဈေးနှုန်းဖြင့် ရောင်းချပေးမှုအပေါ် စားသုံးသူပြည်သူများမှ အဆင်ပြေလျက်ရှိပြီး မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှလည်း အခါအားလျော်စွာ ဆက်လက်ရောင်းချပေးသွားမည်ဖြစ်ကြောင်း သိရှိရပါသည်။

DOCA(မန္တလေး)

            ပိုက်ဆံလျှော်ပင်သည် လျှော်အဖြစ်ထုတ်လုပ်နိုင်သည့်အပြင် သစ်စိမ်းမြေသြဇာအဖြစ်လည်း အသုံးဝင်လှသော စိုက်ပျိုးရေးကဏ္ဍမှာ အရေးပါသည့် အပင်ဖြစ်သည်။ စိုက်ပျိုးရေးပညာရှင်များသည် ပိုက်ဆံလျှော်၏ အသုံးဝင်မှုများအပြင် အခြားသီးနှံများ မဖြစ်ထွန်းနိုင်သောအခြေအနေတွင် အောင်မြင်စွာ စိုက်ပျိုးနိုင်သောကြောင့် စိုက်ပျိုးရေးအတွက် အ‌ရေးပါသော သီးနှံဖြစ်ကြောင်းဆိုပါသည်။

            ပိုက်ဆံလျှော်၏ မူရင်းဒေသမှာ အိန္ဒိယနိုင်ငံဖြစ်သည်၊၊ ပိုက်ဆံလျော်အစေ့သည် ကျွဲ၊နွားတိရိစ္ဆာန်အစာ အဖြစ်လည်းကောင်း၊ မြစ်ပုတ်ရောဂါကိုဖြစ်စေသောနီမတုတ်ကို ခံနိုင်ရည်ရှိကြောင်း၊ ယခုအခါ ပိုက်ဆံလျှော်ကို အပူပိုင်း၊ သမပိုင်းနှင့် အချို့အအေးပိုင်းဒေသများတွင် ကျယ်ကျယ်ပြန့်ပြန့် စိုက်ပျိုးမှုရှိလာသည်ကို တွေ့ရပါသည်။ပိုက်ဆံလျော်မှ ရရှိသော လျှော်ဖြင့် ထုတ်ကုန်များကို ထုတ်လုပ်နိုင်သည့်အပြင် တိရိစ္ဆာန်စာနှင့် မြေဩဇာအဖြစ် အသုံးပြုမည်ဆိုပါက အခြားသီးနှံများ နှစ်သက်သော အဟာရတန်ဖိုးများစာ ရရှိမည်ဖြစ်ပါသည်။ အဟာရပါဝင်မှုမှာ အပင်၏ အစိတ်ပိုင်းအလိုက်ကွဲပြားမှုရှိသည်ကို တွေ့ရှိရပါသည်။ အရွက်တွင်အဟာရတန်ဖိုး အများဆုံးဖြစ်ပြီး နိုက်ထရိုဂျင် ၄.၅၂ %အထက်ပါဝင်ကြောင်းသိရပါသည်။

           ပိုက်ဆံလျှော်ပင်ကို သစ်စိမ်းမြေဩဇာအဖြစ် အသုံးပြုမည်ဆိုပါက စိုက်ကွင်းအတွင်း စိုက်ပျိုးပြီးထယ်မှောက်ရန်‌ မြေဆီလွှာနှင့် ရောနှောရမည်။ သို့မဟုတ် စိုက်ပျိုးပြီးသော ပိုက်ဆံလျှော်ပင်များအား အခြောက်လှန်း၊ ထုထောင်းပြီး မြေဩဇာအစားထိုးအသုံးပြုနိုင်ပါသည်။ သဘာဝသစ်စိမ်းမြေဩဇာဖြစ်သည့်အတွက် မြေဆီလွှာအတွက် အထူးအသုံးဝင်သော အပင်ဖြစ်ပါသည်။

            သစ်စိမ်းမြေဩဇာရရှိရန် မျိုးစေ့ တစ်ဧကလျှင်  လေးပြည်မှ ငါးပြည်လိုအပ်ပါသည်။ မျိုးစေ့ကြဲပြီး ၂ရက် ၊ ၃ရက်အတွင်း အပင်ပေါက်လာမည်ကို တွေ့ရမည်။ အပင်ပေါက်မြန်သော အမျိုးအစားဖြစ်၍ ပေါင်းမြက်များကို နှိမ်နှင်းနိုင်သည်။

        သစ်စိမ်းမြေဩဇာအဖြစ် အသုံးပြုမည်ဆိုပါက စိုက်ပျိုးပြီးနောက် ရက် ၆၀ အတွင်း ထယ်မှောက်ကာ အသုံးပြုရမည်။ ပိုက်ဆံလျှော်ပင်၏ အဟာရများဖြစ်သော နိုက်ထရိုဂျင်၊ ဖော့စဖရပ်၊ ပိုတက်ဆီယမ်နှင် ကယ်လဆီယမ်တို့ပါဝင်သည်။ ကာဗွန်ဟိုက်ဒြိတ်နှင့် ဆူးဒရိုက်ပါဝင်မှုလည်း အမြင့်ဆုံးဖြစ်သည်။ ယူရီးယား မြေဩဇာတစ်အိတ်နှင့် ညီမျှပါသည်။ထို့အပြင် မြေဆီလွှာအတွင်း ကာဗွန်သိုလှောင်မှုကို မြင့်မားစေသည်။ မြေဆီလွှာအား ပြန်လည်ကောင်းမွန်ပြည့်ဖြိုးစေပြီး သဘာဝပတ်ဝန်းကျင်ပျက်စီးမှုကို တားဆီးရာရောက်၍ ယူရီးယား တစ်အိတ်နှင့် ညီမျှသောကြောင့် ပိုက်ဆံလျှော်ပင်အား စိုက်ပျိုးကြရန်  ရေးသားဖော်ပြလိုက်ရပါသည်။

DOCA(မန္တလေး)

         ကမ္ဘာ့ရွှေဈေးကွက်အနေနဲ့ ပြီးခဲ့တဲ့ တစ်ပတ်မှာဆိုရင် တနင်္လာနေ့မှာ ၁ အောင်စကို ၁၉၂၀ ဒေါ်လာနဲ့  ဈေးဖွင့်ခဲ့ပြီး သောကြာနေ့မှာ ၁၉၅၇ ဒေါ်လာနဲ့ ဈေးပိတ်ခဲ့ပါတယ်။ တစ်ပတ်တာအတွင်း  မှာ ကမ္ဘာ့ရွှေဟာ  အမြင့်ဈေး ၁၉၆၅ ‌ဒေါ်လာအထိ မြင့်တက်ခဲ့ပြီး အနိမ့်ဆုံး ၁၉၁၀ ဒေါ်လာအထိ ကျဆင်းခဲ့ပါတယ်။ ကမ္ဘာရွှေဟာ တစ်ပတ်တာအတွင်းမှာ ၅၅ ဒေါ်လာခန့် ဈေးအလှုပ်အခတ် ဖြစ်ခဲ့ပြီး ၃၇ ဒေါ်လာခန့် အတက်ဖက်သို့ အားသာခဲ့ပါတယ်။ ကမ္ဘာ့ရွှေဟာ ဘာကြောင့် အတက်ဖက် သို့ အားသာခဲ့ရတာလည်းဆိုရင် ရုရှားနိုင်ငံနဲ့ ယူကရိန်းနိုင်ငံရဲ့ စစ်ပွဲ ပဋိပက္ခကိစ္စတွေနဲ့အတူ မြောက် ကိုရီးယားက ပစ်လိုက်တဲ့ ဒုံးကျည်ဟာ ဂျပန်နိုင်ငံ ရေပိုင်နက်အနီး ကျရောက်ခဲ့တဲ့ Breaking News တွေကြောင့်သာ ကမ္ဘာ့ရွှေဟာ အတက်ဖက်သို့ အားသာခဲ့တယ်လို့ ပညာရှင်တွေက သုံးသပ်ကြပါတယ်။

       လက်ရှိ ဖြစ်ပေါ်နေသော ကမ္ဘာ့ရွှေဈေး မြင့်မားမှုနှင့် နိုင်ငံခြားငွေလဲလှယ်မှု ဈေးနှုန်း သက်ရောက်မှုများကြောင့် ပြီးခဲ့တဲ့တစ်ပတ် တနင်္လာမှာဆိုရင် မြန်မာ့ရွှေဟာ ၂၀၂၅၀၀၀ နဲ့ ဈေးဖွင့် ခဲ့ပြီး သောကြာနေ့မှာ ဆိုရင် ၂၀၅၈၀၀၀ နဲ့ ဈေးပိတ်ခဲ့ပါတယ်။ မြန်မာ့ရွှေရဲ့ အမြင့်ဆုံးဈေး ၂၀၆၇၀၀၀ ထိ ဈေးတက်ခဲ့ပြီး အနိမ့်ဆုံး ၂၀၂၀၀၀၀ ထိ ကျဆင်းခဲ့ပါတယ်။ မြန်မာ့ရွှေဟာ ၁ ကျပ်သား ကို ၄၇၀၀ဝိ/- ခန့်သာ ဈေးအလှုပ်အခတ်ရှိခဲ့ပြီး ဈေးအသွားအလာကို  ကြည့်ချင်းအားဖြင့် မြန်မာ့ရွှေ ဟာ အတက်ဖက်ကို ဦးတည်နေခဲ့တာကို တွေ့ရပါတယ်။ ကမ္ဘာ့ရွှေနှင့် နှိုင်းယှဉ်လျှင် ကမ္ဘာ့ရွှေဟာ အနည်းငယ်သာ ဈေးတက်ခဲ့သော်လည်း မြန်မာ့ရွှေဟာ သိသိသာသာ ဈေးတက်လာတာ တွေ့ရပါတယ်။ အကြောင်းကတော့ ခုတလော နိုင်ငံအတွင်း ထွက်ပေါ်နေတဲ့  ‌‌ငွေစက္ကူနဲ့ ပတ်သက်သော ကောလဟာလတွေဟာ ငွေကိုင်ထားသူ အနည်း/အများ စိုးရိမ်ပူပန်မှုတွေ ရှိတာ ကြောင့် မိမိရဲ့ပိုင်ဆိုင်မှုကို လုံခြုံစိတ်ချရမှုရှိစေဖို့ ‌ရွှေကို ဝယ်ယူစုဆောင်းနေကြတာ ဖြစ်ပါတယ်။  ဒါကြောင့်  ဒီအပတ်မှာ မြန်မာ့ရွှေဟာ ဝယ်လိုအားဟာ သိသိသာသာ တိုးတက်လာခြင်းဖြစ်ကြောင်း သုံးသပ်ရပါတယ်။

           ကမ္ဘာ့ရွှေဈေးကွက်ဟာ ယခုအပတ်မှာ အကျဖက်သို့ အားသာနိုင်ကြောင်း နည်းပညာအရ သုံးသပ်သော်လည်း ရုရှားနိုင်ငံနှင့် ယူကရိန်းနိုင်ငံကိစ္စများ ယခင်ကလို တင်းမာလာခဲ့မယ်ဆိုရင် ကမ္ဘာ့ရွှေဟာ အတက်ဖက်သို့ အားသာလာနိုင်ကြောင်း ပညာရှင်များက သုံးသပ်ထားပါတယ်။

        ယခုအပတ်မှာ မြန်မာ့ရွှေဈေးနှုန်း အကျဘက်သို့ အားသာလာနိုင်ပါတယ်။ ရွှေအသင်းက ရွှေဈေးနှုန်းတည်ငြိမ်ရေး အစည်းအဝေးများ ပြုလုပ်ခဲ့ခြင်းကြောင့် မြန်မာ့ရွှေဈေးဟာ အကျဘက်သို့ အားသာလာနိုင်သည်ဟု ဈေးကွက် ကျွမ်းကျင်သူများက ခန့်မှန်းထားကာ ပြည်တွင်း ရွှေဈေးနှုန်းမှာ လက်ရှိ ၂၈ နေ့တွင် ၁၆ ပဲရည် အခေါက်ရွှေ အဖွင့်ရောင်းဈေး ၂၀၅၂၀၀၀ ခန့်၊ ၁၅ ပဲရည် ကျပ် ၁၉၃၃၀၀၀ ရှိကြောင်း သိရသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ မုံရွာမြို့နယ်တွင် ပဲ၊ နှမ်း၊ ငရုတ် စသည့် သီးနှံများကို ရာသီအလိုက် စိုက်ပျိုးကြသည့်အပြင် ပန်းမန်မျိုးနွယ်ဝင်ဖြစ်သည့် အောင်သပြေ၊ အာဆီယံသပြေနှင့် ညိုချော သပြေ များကိုလည်း စိုက်ပျိုးလုပ်ကိုင်လျက်ရှိကာ ပုံမှန်ဝင်ငွေရနေကြောင်း သိရသည်။

        အောင်သပြေ၊ အာဆီယံသပြေနှင့် ညိုချောသပြေများကို ပြင်ဦးလွင်နှင့် မန္တလေးမြို့နယ် များကနေ မှာယူ စိုက်ပျိုးကြကြောင်း၊ ပျိုးပင်အသေး၊ အကြီးပေါ် မူတည်၍ ပျိုးပင် (၁) ပင်လျှင် ကျပ် (၈၀၀) မှ (၁၁၀၀) ဝန်းကျင်ခန့် ဝယ်ယူရကြောင်း၊ မြေ (၁) ဧကတွင် သပြေအမျိုးအစား၊ အပင် အစိပ် အကျဲပေါ် မူတည်၍ အပင်ရေ  ၁၀၀၀ ခန့် ဝင်ဆံ့ စိုက်ပျိုးနိုင်ကြောင်း၊ သပြေညွန့် အမျိုးအစား အလိုက် စိုက်ပျိုးပြီး  ( ၆ ) လ၊ ( ၁ ) နှစ်အရွယ်မှစ၍ သပြေညွန့်များကို ခူးဆွတ်‌ရောင်းချရကြောင်း ပန်းစိုက်တောင်သူ တစ်ဦးထံက သိရသည်။

      သပြေတစ်ကြိမ်စိုက်ပျိုးပီးစ အပင်ငယ်ချိန်တွင် ရေအစိုဓာတ်မပြတ် ပေးသွင်းရပြီး၊ ခူးဆွတ် ရောင်းချနိုင်ချိန်တွင်  မြေသား အစို၊ အခြောက်အနေအထားကြည့်၍ (၁၀)ရက် တစ်ကြိမ်၊ (၁၅) ရက် တစ်ကြိမ်ခန့်သာရေးပေးသွင်းရကြောင်း၊ ပိုးကျပါက ပိုးသတ်ဆေးဖျန်းပေးရကြောင်း၊ စိုက်ပျိုးပြီး (၁၀) နှစ်သားခန့်ထိ ခူးဆွတ်ရကြောင်း ၊ ၁ ဧက စိုက်ပျိုးကုန်ကျစရိတ်အနေဖြင့် ကျပ် ၁၀ သိန်းဝန်းကျင်ခန့်သာ ကုန်ကျကြောင်း သိရသည်။ အနိမ့်ဆုံးဝင်ငွေ တစ်လလျှင် ကျပ် ၈၀၀၀၀ ကနေ ၁၀၀၀၀၀ ဝန်းကျင်ခန့် ရရှိကြောင်း  မုံရွာမြို့နယ် ပန်းစိုက်တောင်သူတစ်ဦးထံက သိရသည်။

လက်ရှိသပြေတစ်စည်းလျှင် ကျပ် ၁၅၀ မှ ၂၀၀ နှုန်းဖြင့် စိုက်ခင်းအတွင်း လက္ကားရောင်းချ ရ၍ ပုံမှန်ဝင်ငွေရရှိကြောင်း၊ ပန်းရောင်းချသူများအနေဖြင့်လည်း မုံရွာမြို့ပေါ်ဈေးကွက်များတွင် လိုက်လံရောင်းချသောကြောင့် စိုက်ပျိုးသူများအပြင် လက်လီ‌‌ရောင်းချသူများပါ ဝင်ငွေရနေကြပါသည်။

DOCA(စစ်ကိုင်း)