ပြည်တွင်းကုန်သွယ်မှုသတင်း

နေပြည်တော် ဩဂုတ် 2၈

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

            ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့်ဈေးနှုန်းဖြစ်ပေါ်မှုများအရ ၂၀၂၂ ခုနှစ်၊ ဩဂုတ်လ 2၉ ရက်နေ့မှ စက်တင်ဘာလ ၄ ရက်နေ့ အထိ ရန်ကုန်အထိုင်ဈေး အခြေခံလက်ကားရည်ညွှန်း ဈေးနှုန်းမှာ စားအုန်းဆီ တစ်ပိဿာလျှင် ၄၉၁၀ ကျပ် ဖြစ်ကြောင်း ထုတ်ပြန်ကြေညာထားပါသည်။

            ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

    အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။                                                            

           Diamond Dragon Co;Ltd ၏ကိုယ်စားလှယ် ဆီလုပ်ငန်းရှင် ဒေါ်နီလာထွေးနှင့် နေပြည်တော်ဆီကုန်သည်နှင့် ဆီလုပ်ငန်းရှင်များအသင်းမှ လုပ်ငန်းရှင်များမှ ဈေးကားဖြင့်လှည့်လည်၍ ပြင်ပပေါက်ဈေးထက် သက်သာ‌သောဈေးနှုန်းဖြင့် စားသုံးဆီများကို ရောင်းချပေးခဲ့လျှက်ရှိပါသည်။

     (၂၄-၈-၂၀၂၂) ရက်နေ့တွင် ဒေါ်နီလာထွေးက ပြည်သူ့လွှတ်တော်ရုံး၌ တစ်ဦးလျှင် တစ်ပိဿာနှုန်းဖြင့် ပိဿာချိန် (၁၁၄၄)ပိဿာကိုလည်းကောင်း၊ ရဲဗိုလ်ရှုသဘင်ဝင်း၌ ပိဿာချိန် (၂၆၄)ပိဿာကိုလည်းကောင်း၊ ပြည်ထောင်စုရွေးကောက်ပွဲကော်မရှင်၌ ဆီပိဿာချိန် (၃၂၈) ပိဿာကိုလည်းကောင်း တစ်ပိဿာလျှင် (၅၂၀၀) ကျပ်နှုန်းဖြင့် ပိဿာချိန် (၁၇၃၆) ပိဿာရောင်းချ ပေးခဲ့ပါတယ်။

          ဆက်လက်၍ နေပြည်တော်ဆီကုန်သည်နှင့် ဆီလုပ်ငန်းရှင်များအသင်းမှ ဆီလုပ်ငန်းရှင်ဒေါ်ခင်နွယ်အေးက ပျဉ်းမနားမြို့နယ်၊ ရပ်ကွက် (၁၅)တွင် ဆီပိဿာချိန် (၆၆၀)ကိုလည်းကောင်း၊ ဆီလုပ်ငန်းရှင် ဦးအေးချမ်းသူမှ ပျဉ်းမနားမြို့နယ်၊ ရပ်ကွက် (၁၆)နှင့် (၁၇) တို့တွင် ဆီပိဿာချိန် (၆၆၀)ကိုလည်းကောင်း ရောင်းချပေးခဲ့ပါတယ်။

          စားသုံးဆီများအနေဖြင့် ယခင်ကာလများတွင် (၃၉၀၀)ကျပ်ဖြင့် ရောင်းချပေးနိုင်ခဲ့သော်လည်း ယခုအခါအဖက်ဖက်မှ ဈေးနှုန်းများပြောင်းလဲခြင်းကြောင့် အထူးဈေးနှုန်းတွင် (၅၂၀၀)ကျပ်သို့ ပြောင်းလဲရောင်းချရခြင်းဖြစ်ကြောင်း သတင်းရရှိပါတယ်။

DOCA(ပြည်ထောင်စုနယ်မြေ)

         ဆိပ်ဖြူမြို့ ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင်သို့ ဩဂုတ်လ (တတိယ)ပတ်အတွင်း ကြက်သွန်နီပင်စိုက်အသစ်များ ဆိပ်ဖြူမြို့နယ်ဒေသတွင်း နေရာအနှံ့အပြားမှ နေ့စဉ်ဝင်ရောက်လျက်ရှိပါသည်။ တစ်ရက်လျှင်ပျမ်းမျှ ကြက်သွန်နီ ကုန်ချိန်ပိဿာ(၂)သောင်းခန့် (၁)ပတ်အတွင်း စုစုပေါင်းပိဿာ(၁)သိန်းခွဲခန့် ကုန်စည်ဒိုင်သို့ ဝင်ရောက်လျက်ရှိပြီး  မြို့ပေါ်ရှိ ကြက်သွန်ကုန်သည် သိုလှောင်ရုံများတွင် ကြက်သွန်နီပိဿာ ပျမ်းမျှ(၁)ပတ်အတွင်းကုန်ချိန် (၃)သိန်းခွဲခန့်ဝင်ရောက် အရောင်းအဝယ်ဖြစ်ကြောင်း၊ ဩဂုတ်လ(၁၅)ရက်မှ(၂၁)ရက်ထိ ကုန်စည်ဒိုင်နှင့်သိုလှောင်ရုံများ အရောင်းအဝယ်ဖြစ်မှု စုစုပေါင်းမှာ ကြက်သွန်နီ ပိဿာ (၅)သိန်းခန့်ရှိကြောင်း မြို့ပေါ်ရှိကုန်စည်ဒိုင် အသင်းဝင် ကုန်သည်ပွဲစား(၁)ဦးထံမှ သိရှိရသည်။

       ဈေးနှုန်းဈေးကွက်အနေဖြင့် ဩဂုတ်(တတိယ)ပတ်အတွင်း ကြက်သွန်နီ(၁)ပိဿာ ထိပ်စ အမြင့်ဆုံး ဈေးနှုန်းမှာ (၂၅၀၀)ကျပ် မှ (၂၂၅၀)ကျပ်ထိ ဈေးနှုန်းဖြစ်ခဲ့ပြီး အနိမ့်စအမြင့်ဆုံးဈေးနှုန်း မှာ (၂၀၀၀)ကျပ် မှ (၁၇၀၀)ကျပ်ထိ ဈေးနှုန်းများဖြင့် အရောင်းအဝယ်ဖြစ်ခဲ့ကြောင်း၊ သီးနှံ အရည် အသွေးများ မတူညီခြင်းကြောင့် ဈေးနှုန်းများကွာခြားကြောင်း၊ ယခင်(၁)ပတ် ကြက်သွန်နီအမြင့်ဆုံး ဈေးနှုန်းမှာ (၂၀၀၀)ကျပ် ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခု(၁)ပတ် အမြင့်ဆုံးဈေးမှာ (၂၅၀၀)ကျပ် ဈေးနှုန်းဖြင့် အရောင်းအဝယ်ဖြစ်၍ ယခင်(၁)ပတ်ထက် (၅၀၀)ကျပ်ခန့် ဈေးနှုန်းမြင့် သွားကြောင်း၊ အနိမ့်စ အမြင့်ဆုံးဈေးနှုန်းမှာ ယခင်(၁)ပတ်က (၁၅၀၀)ကျပ်၊ ယခု(၁)ပတ် (၂၀၀၀) ကျပ် ဈေးနှုန်းဖြစ်၍ ယခင်(၁)ပတ်ထက် (၅၀၀)ကျပ်ခန့် ဈေးနှုန်းမြင့်သွားကြောင်း၊ ယခု(၁)ပတ် အတွင်း ဈေးနှုန်းသိသိသာသာ မြင့်တက်သွားကြောင်း၊ ရန်ကုန်ဘုရင့်နောင်ပွဲရုံသို့ တင်ပို့မှုနည်းပြီး ပြည်ပဝယ်လက်မြဝတီမြို့သို့ ကုန်ချိန်အများဆုံးတင်ပို့လျက်ရှိကြောင်း၊ ကုန်စည်ဒိုင်အသင်းဝင် ကုန်သည်ပွဲစားတစ်ဦးထံမှ သိရှိရသည်။

        ဆိပ်ဖြူမြို့တွင် ကြက်သွန်နီအသစ် (၁)ပိဿာလျှင် လက်လီဈေးနှုန်းအနေဖြင့် ထိပ်စ(ရှယ်) ကျပ်(၂၈၀၀/၂၇၀၀)၊ လတ်(ကြီး) ကျပ်(၂၄၀၀/၂၃၀၀)၊ လတ်(သေး) ကျပ်(၂၁၀၀/၂၀၀၀)၊ အသေးစ (၁၈၀၀)ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ ကုန်စည်စီးဆင်းမှုအနေဖြင့် ဩဂုတ်လ (တတိယ)ပတ်အတွင်း ဆိပ်ဖြူမြို့မှရန်ကုန်ဘုရင့်နောင်ပွဲရုံသို့(၆)စီး၊ ပြည်မြို့(၆)စီး၊ ဧရာဝတီတိုင်းဒေသကြီး ပုသိမ်မြို့(၇)စီး၊ မော်လမြိုင်မြို့(၁၀)စီး၊ မြဝတီမြို့(၁၁)စီးတွဲကားများ စုစုပေါင်း(၄၀)စီးခန့် (၆/၁၂/၂၄)ဘီး မော်တော်ယာဉ်များဖြင့် ကြက်သွန်နီ ပျမ်းမျှပိဿာ(၅)သိန်း၊ တန်ချိန်(၃)သောင်းခန့် ကုန်စည်စီးဆင်းခဲ့ကြောင်း သိရှိရပါသည်။

DOCA(မကွေး)

           စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံး၊ ပွင့်ဖြူမြို့နယ် တာဝန်ခံ ဒု-ဦးစီးမှူး ဒေါ်ဌေးဌေးဝင်းသည် ပြည်တွင်းကုန်သွယ်မှုဖွံ့ဖြိုးတိုးတက်စေရေးနှင့်ပတ် သက်၍ ပွင့်ဖြူမြို့နယ် ရှောက်တောကျေးရွာ၌ မိုးစပါးစိုက်ပျိုးနေမှုအခြေအနေကို တောင်သူ ဒေါ်ခင်စန်းလွင်အား တွေ့ဆုံမေးမြန်းခဲ့ပါသည်။

         ပွင့်ဖြူမြို့နယ်သည် မကွေးတိုင်းဒေသကြီးအတွင်းရှိမြို့နယ်များတွင် နှစ်စဉ် ဆန်စပါးအများ ဆုံးစိုက်ပျိုးထွက်ရှိသော မြို့နယ်တစ်ခုဖြစ်ပြီး မိုးစပါးကို ဇွန်လနောက်ဆုံးအပတ်မှ စတင်၍ စိုက်ပျိုးကြောင်းသိရှိရပါသည်။ ပွင့်ဖြူမြို့နယ်သည် မဲဇလီရေလွှဲဆည်၏ တောင်မုန်းမြောင်းမကြီးနှင့် မြောက်မုန်းမြောင်းမကြီး ဆည်ရေသောက်ဧရိယာအတွင်းရှိ၍ မိုးစပါးစိုက်ပျိုးဖြစ်ထွန်းအောင်မြင်ပြီး ပွင့်ဖြူမြို့နယ်ကုန်းဇောင်းဒေသထွက် ဧရာပဒေသာဆန်မှာ လူကြိုက်များ၊ ဈေးကောင်းရ လျက်ရှိသော စပါးမျိုးလည်းဖြစ်ကြောင်း လေ့လာသိရှိရပါသည်။ မိုးစပါးစတင် စိုက်ပျိုးရန်အတွက် ယခုနှစ်တွင် စက်ကြီးမောင်းနှင်ခမှာ (၁)ဧကလျှင် (၄၀၀၀ဝိ/-)၊ ထွန်တရှဉ်းလျှင် (၁၄၀၀ဝိ/-) ဖြင့် (၃)ရှဉ်း(၂)စပ်အတွက် (၈၄၀၀ဝိ/-)နှင့် အောက်ခံကန်သင်းပတ်ရန်အတွက် (၁၅၀၀ဝိ/-) ကုန်ကျပါကြောင်း၊ မျိုးစေ့ဘိုး(၁)တင်းလျှင် (၁၅၀၀ဝိ/-)ဖြင့် မျိုးစေ့(၁)တင်းခွဲအား တိုက်ရိုက် စိုက်ပျိုးခြင်းအတွက် (၁)ဧကလျှင် (၂၅၀၀ဝိ/-) ကုန်ကျပါကြောင်း၊ အပင်ပေါက်(၁)လသား အရွယ်တွင် ပေါင်းအုပ်ဆေးနှင့် အပင်အားဆေးဘိုး(၁၅၀၀ဝိ/-) ကုန်ကျကြောင်း၊ (၁)လခွဲသား အရွယ်တွင် ပိုးသတ်ဆေးနှင့် အပင်အားဆေး(၂)မျိုးပေါင်း (၃၀၀၀ဝိ/-) ကုန်ကျကြောင်း၊ ထို့အပြင်မျိုးစေ့အား တိုက်ရိုက်ချရာတွင် ကျဲနေသောနေရာများအား အပင်များဖာရသဖြင့် ပျိုးပင် (၁၀၀)လျှင် (၁၅၀၀ဝိ/-)ဖြင့် ပျိုးပင်ပေါက်(၂၀၀)ဝယ်ယူ၍ ပြန်လည်ဖာထေးစိုက်ပျိုးရပါကြောင်း၊ ယခုလက်ရှိ (၂)လသားအရွယ်ထိ စုစုပေါင်းကုန်ကျစရိတ်မှာ(၂၆၁၅၀ဝိ/-) ရှိပြီဖြစ်ကြောင်း တောင်သူဒေါ်ခင်စန်းလွင်ထံမှ သိရှိရပါသည်။ ပွင့်ဖြူမြို့နယ်တွင် ၂၀၂၂-၂၀၂၃ ခုနှစ် မိုးစပါး လျာထားဧက(၆၉၀၉၄)ဧကတွင် ယခုလက်ရှိအချိန်ထိ စိုက်ပျိုးပြီးစီးမှု စုစုပေါင်းမှာ(၆၃၆၅၆)ဧက စိုက်ပျိုးပြီးဖြစ်ပါကြောင်း လေ့လာသိရှိရပါသည်။

DOCA(မကွေး)

         မကွေးတိုင်းဒေသကြီး၊  ပွင့်ဖြူမြို့နယ်ပတ်ဝန်းကျင်ရှိ ကျေးရွာများသည် လယ်ယာဥယျာဉ်ခြံမြေ များတွင် သီးနှံစားပင်မျိုးစုံကို စီးပွားဖြစ်စိုက်ပျိုးကြပြီး မြန်မာနိုင်ငံအနှံ့စားသုံးမှုများ၍ ဈေးကွက် အခိုင်အမာရှိသော ကွမ်းရွက်ကိုလည်း တစ်ပိုင်တစ်နိုင်စိုက်ပျိုးကြကြောင်းသိရသည်။ ပွင့်ဖြူဒေသတွင် ကွမ်းစိမ်းနှင့် ကွမ်းနုဝါ(ရွှေဒါး) ကို အဓိကစိုက်ပျိုးကြကြောင်း၊ ကွမ်းရွက်ကို ကွမ်းယာစားသုံးရာတွင် အသုံးပြုရန်နှင့် တိုင်းရင်းဆေးဖော်စပ်ရာတွင် အသုံးပြုရန် အဓိကဝယ်ယူကြကြောင်း သိရသည်။

           ကွမ်းရွက်စိုက်ပျိုးရာတွင် မြေထုပ်စီးမျိုးညွန့်စိုက်ပျိုးနည်းနှင့် အပင်မှအညွန့်ဖြတ်၍ တိုက်ရိုက် စိုက်ပျိုးနည်းဟူ၍   (၂) မျိုးရှိရာ အပင်အောင်မြင်ဖြစ်ထွန်းလွယ်သော မြေထုပ်စီးမျိုးညွန့်စိုက်ပျိူးနည်းကို အများဆုံးအသုံးပြု၍ စိုက်ပျိုးကြသည်။ ကွမ်းရွက်ကို ဝါဆိုလနှင့် သီတင်းကျွတ်လများတွင် စိုက်ပျိုး ကြကြောင်း၊ စိုက်ပျိုးမည့်မြေပေါ်တွင် နွားချေး၊ ဓာတ်မြေဩဇာများအသုံးပြု၍ မြေဆွေးနှပ်ထားရကြောင်း၊ သို့မှသာအပင်ဖြစ်ထွန်းအောင်မြင်လွယ်ကြောင်း သိရသည်။ ကွမ်းရွက်သည် ရေဝပ်ခြင်းကိုမကြိုက်ဘဲ ဝါးများဖြင့်တိုင်ထောင်၍ စိုက်ပျိုးကြကြောင်း၊ မိုးများလျှင် အမြစ်ပုပ်ခြင်း၊ အဆစ်ပိုးဝင်ကာအပင်ပျက်ကျခြင်း၊ အပင်သေခြင်းများဖြစ်ကြောင်း၊ အပင်စိုက်ပျိုးချိန်မှ (၃)လခန့်အကြာတွင် ခူးဆွတ်နိုင်ကြောင်း၊ (၁)လလျှင် (၂) ကြိမ်ခန့်ခူးဆွတ်နိုင်ကြောင်း၊ တစ်ခါစိုက်ပျိုးလျှင် (၃)နှစ်ခန့် သက်တမ်းရှိကြောင်းသိရသည်။ ပွင့်ဖြူမြို့နယ် ပိန္နဲတော၊ ယောစု၊ သံဘို၊ ညောင်ကုန်း၊ ဒေးဒရဲကျေးရွာများမှ ကွမ်းစိုက်တောင်သူများသည် ကွမ်းမျိုးများကို ဆိပ်ဖြူမြို့နယ်မှ ဝယ်ယူကြကြောင်း၊ ကွမ်းခြံတစ်ခြံလျှင် ကွမ်းပင်(၂၅၀) ခန့် တစ်ပိုင် တစ်နိုင်စိုက်ပျိုးကြကြောင်း၊ ကွမ်းတစ်ခါခူးဆွတ်လျှင် (၁၀) ပိဿာမှ (၁၅)ပိဿာခန့် ထွက်ရှိ ကြောင်းသိရသည်။ မိုးရာသီတွင် ကွမ်းအထွက်နှုန်းကောင်းသောကြောင့် တစ်ပိဿာလျှင် (၄၀၀၀)ကျပ်မှ (၆၀၀၀)ကျပ်ခန့် ဈေးရရှိကာ ဆောင်းရာသီ အထွက်နှုန်းနည်းချိန်တွင် တစ်ပိဿာလျှင် (၁၂၀၀၀)ကျပ်မှ (၁၅၀၀၀)ကျပ်ခန့်အထိ ဈေးကောင်းရရှိကြောင်း သိရပါသည်။

        ထို့အပြင် ကွမ်းရွက်သည် ဆံပင်ကျွတ်ခြင်းအားသက်သာစေခြင်း၊ ဝက်ခြံသက်သာစေခြင်း၊ အသားအရေ ချောမွေ့စေခြင်း၊ အင်ပျဉ်သက်သာစေခြင်း၊ ဆီးချိုအားထိန်းညှိပေးခြင်း၊ ရောဂါပိုးများအားခုခံကာကွယ်နိုင်စွမ်းရှိခြင်း၊ အနာကျက်မြန်စေခြင်း၊ ချောင်းဆိုးရင်ကျပ်သက်သာစေခြင်း၊ ကင်ဆာရောဂါအား ကာကွယ်နိုင်ခြင်း၊ ကိုယ်အလေးချိန်လျော့ကျနိုင်စေခြင်း၊ ခေါင်းကိုက်သက်သာစေခြင်းစသော အကျိုးကျေးဇူးများ ရရှိစေနိုင်ကြောင်းလည်း သိရှိရပါသည်။

DOCA(မကွေး)