ပြည်တွင်းကုန်သွယ်မှုသတင်း

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူး၏ လမ်းညွှန်ချက်ဖြင့် ရေစကြိုမြို့နယ် တာဝန်ခံ ဦးမြတ်မင်းနှင့် ပခုက္ကူခရိုင်ဦးစီးမှူးရုံးမှ ဒေါ်ကြည်ကြည်စိုးတို့သည် (၉.၈.၂၀၂၂) ရက်နေ့ နံနက်(၀၉:၀၀)နာရီအချိန်တွင် ပခုက္ကူခရိုင်၊ ရေစကြိုမြို့အမှတ်(၈)ရပ်ကွက်၊ “ကောင်းသန့်” ပဲကြော် လုပ်ငန်းသို့သွားရောက်၍ ကုန်ကြမ်းများဝယ်ယူရသည့် အခြေအနေ၊ ထုတ်လုပ်မှု အခြေအနေ၊ ဈေးနှုန်း၊ ဈေးကွက်အခြေအနေ၊ သုံးစွဲသည့် ဆီအမျိုးအစား၊ ဆီဝယ်ယူရရှိမှုနှင့် သုံးစွဲမှု အခြေအနေများကို ကွင်းဆင်းမေးမြန်းခဲ့ပါသည်။ မေးမြန်းရာတွင် ကောင်းသန့်ပဲကြော် မန်နေဂျာ ဦးမျိုးလွင်မှ ပဲကြော်ရာတွင် သုံးသည့်ပဲမှာ တရုတ်ပဲနှင့် စွန်တာနီပဲများဖြစ်ကြောင်း၊ ယခုအချိန်တွင် တရုတ်ပဲများကိုသာ အများဆုံးကြော်နေရကြောင်း၊ တရုတ်ပဲကို မန္တလေးမှ ဝယ်ယူပြီး ဈေးနှုန်းမှာ (၅၀)ပိဿာပါ (၁)အိတ်လျှင်(၂၁၀၀၀၀/-)ကျပ်ပေးရကြောင်း၊ စွန်တာနီဆိုလျှင် (၃၀)ပိဿာပါ (၁)အိတ်ကို (၁၂၀၀၀၀/-)ကျပ်ပေးရကြောင်းပြောပြခဲ့ပါသည်။

          ဆက်လက်၍ ထုတ်လုပ်မှုအဆင့်ဆင့်ကို ပြောပြရာတွင် ပထမဦးစွာ ပဲဆံများကို စက်ဖြင့် အခွံချွတ်ကြောင်း၊ (၃၀) ပိဿာပါ (၁) အိတ်ကို အခွံချွတ်ရာတွင် တရုတ်ပဲဆို (၂၃) ပိဿာကျန်ပြီး၊ စွန်တာနီဆိုလျှင် (၂၃)ပိဿာ (၅၀)ကျပ်သား ကျန်ရှိကြောင်း၊ ကြော်မည်ဆိုလျှင် (၁)ညရေစိမ် ထားရကြောင်း၊ မနက်မှစက်များဖြင့် ကြော်ကြောင်း၊ (၁)ဒယ်လျှင် (၁၅)ပိဿာ ထည့်ကြော်ကြောင်း၊ စကြော်ရာတွင် ကြော်စက်ထဲသို့ ဆီပေပါ (၇) လုံးခန့် ထည့်ရကြောင်း၊ (၁)ရက်လျှင် စက် (၁) လုံးကို ပဲအိတ်အလုံး(၅၀) ကြော်ရကြောင်း၊ စက်(၃)လုံးရှိသော်လည်း (၂)လုံးသာ ကြော်ကြောင်း၊ (၁)လုံးမှာ အရန်ထားကြောင်း၊  တစ်နေ့လျှင် ပိဿာ(၃၀)ပါ အိတ်(၁၀၀)ကြော်ရကြောင်း၊ (၁)ရက် (၃၀) ပိဿာပါ ပဲအိတ် (၁၀၀)ကြော်ရာတွင် တရုတ်ပဲဆိုလျှင် ဆီပေပါ (၁၈) လုံးခန့် ကုန်ပြီး စွန်တာနီ ဆိုလျှင် ဆီပေပါ (၁၀)လုံးခန့် ကုန်ကြောင်း၊ (၃၀)ပိဿာပါ ပဲ(၁)အိတ်ကြော်လျှင် တရုတ်ပဲ ဆို (၄၀) ပိဿာရပြီး၊ စွန်တာနီပဲဆိုလျှင် (၃၁)ပိဿာရကြောင်း၊ ပဲကြော်ရာတွင် လောင်စာအဖြစ် ဇီးခွဲကြမ်းများကိုသုံးကြောင်း၊ (၁)ပိဿာကို (၁၅၀/-)ကျပ်ပေးရကြောင်း၊ (၁)ရက်လျှင်(၂၀)အိတ် ကုန်ကြောင်း သိရပါသည်။

         ပဲကြော်ဈေးနှုန်းများမှာ လက်ရှိပေါက်ဈေးအနေဖြင့် (၁)ပိဿာကို တရုတ်ပဲကြော် ဆိုပါက (၆၅၀၀/-) ကျပ်ရှိပြီး ရိုးရိုးပဲမှာ (၅၅၀၀/-)ကျပ် ဖောက်သည်ပေးရကြောင်း၊ ရန်ကုန်မြို့သို့ တင်ပို့ရောင်းချကြောင်း၊ (၃၀)ပိဿာအိတ်ကြီးများဖြင့် တင်ပို့ရကြောင်း၊ အလုပ်သမား (၃၀) ကျော်ရှိ ပြီး (၁)ရက်လျှင် အလုပ်သမားခမှာ(၁)ဦးကို (၁၀၀၀၀/-)ကျပ်ပေးရကြောင်း ယခုအခါတွင် ပဲကြော်ရန် ဆီ(၁)ပိဿာကို(၈၈၀၀/-)ကျပ်ပေးဝယ်ရ၍ အခက်အခဲရှိနေကြောင်း ဈေးကွက် အနေဖြင့် ထုတ်လုပ်နိုင်သလောက် တင်ပို့ရောင်းချရကြောင်း၊ ဒါပေမဲ့ ဆီအလုံအလောက် ဝယ်ယူ၍မရသောကြောင့် မကြော်နိုင်ကြောင်း၊ အလုပ်သမားများမှာလည်း တွက်ချေကိုက်မှုမရှိပဲ အခက်အခဲများရှိနေကြောင်း၊ ရေစကြိုမြို့အနေဖြင့် မိမိအပါအဝင် ပဲကြော်ဖို (၅) ဖို ရှိပါကြောင်း၊ ပဲဖို(၁) ဖိုတွင် (၁) ရက် သုံးစွဲဆီ (၂၀၀၀) ပိဿာနှင့် (၁) လလျှင် (၆၀၀၀၀) ပိဿာခန့် လိုအပ်ကြောင်း၊ ပဲကြော်ဖို (၅)ဖို ရှိသည့်အတွက် (၁)ရက်လျှင် သုံးစွဲဆီ (၁၀၀၀၀) ပိဿာနှင့် (၁) လလျှင် (၃၀၀၀၀၀) ပိဿာခန့် လိုအပ်မည်ဖြစ်ကြောင်း၊ စားအုန်းဆီကို ဈေးနှုန်းသက်သာစွာဖြင့်အလွယ်တကူ ဝယ်ယူရရှိပါကအဆင်ပြေပြီး အလုပ်သမားများလည်း အလုပ်အကိုင်အခွင့်အလမ်းရရှိနိုင်ကြောင်း၊ စားသုံးသူများကိုလည်း ဈေးနှုန်းချိုသာစွာဖြင့် ရောင်းချနိုင်မည်ဖြစ်ကြောင်း မန်နေဂျာ ဦးမျိုးလွင်ထံမှ သိရှိရပါသည်။

DOCA(မကွေး)

              ဩဂုတ်လ တတိယအပတ်တွင် ရေနံချောင်းမြို့၏ ဒေသထွက်ကုန်ဖြစ်သော ကြက်သွန်နီစျေးနှုန်းများမြင့်တက်လာကြောင်း သိရပါသည်။ ဇူလိုင်လတွင် ကြက်သွန်နီသည် အမျိုးအစားနှင့် အရည်အသွေးပေါ်မူတည်ပြီး (၁)ပိဿာလျှင်(၁၄၀၀-၁၆၀၀-၁၈၀၀)ကျပ်တို့ဖြင့် အရောင်းအဝယ် ဖြစ်ခဲ့ရာမှ ယခုဩဂုတ်လ တတိယအပတ်တွင် (၁)ပိဿာလျှင် (၁၉၀၀-၂၁၀၀-၂၄၀၀)ကျပ်တို့ဖြင့် အရောင်းအဝယ်ဖြစ်၍ ကြက်သွန်နီ စိုက်တောင်သူများ စျေးကောင်းရနေကြောင်း သိရပါသည်။

            ရေနံချောင်းမြို့နယ်အတွင်း  ကြက်သွန်နီစိုက်ဧကစုစုပေါင်း (၃၄၉၉)ဧကရှိပြီး တောင်သူအများစုမှာ ပဲခူးရိုးမမှ ချောင်းဖျားခံပြီး ဧရာဝတီမြစ်သို့စီးဝင်သော ပင်းချောင်းတစ်လျှောက်တွင် အပင်စိုက် စနစ်ဖြင့် စိုက်ပျိုးကြကြောင်းနှင့် မန်ပြေရွာ ၊ ဘုရားကုန်းရွာနှင့် ပင်းဝရွာများမှ  တောင်သူအနည်းစုသည်လည်း ရွာအနီးနားရှိ ကျွန်းများပေါ်တွင် ဥစိုက်စနစ်ဖြင့် စိုက်ပျိုးကြကြောင်း သိရသည်။

            ဒေသထွက်ကုန် ကြက်သွန်နီများကို ပွဲရုံများမှတဆင့် မြို့တွင်းနှင့်အနီးအနားရှိ မြို့များသို့ လက်လီ/ လက်ကားဖြန့်ဖြူးရောင်းချလျက်ရှိပြီး ရန်ကုန်၊ ပြည်နှင့် ရခိုင်ပြည်နယ်များသို့ နေ့စဉ် ပိဿာ(၁၅၀၀၀)ခန့် တင်ပို့ရောင်းချနေရကြောင်း နေ့စဉ်ပိဿာ စုစုပေါင်း(၂၀၀၀၀)ခန့်ရောင်းချရကြောင်း ကြက်သွန်ကုန်သည် တစ်ဦး၏ပြောကြားချက်အရ သိရှိရပါသည်။

DOCA(မကွေး)

             စက်သုံးဆီ တင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ စက်သုံးဆီ ရည်ညွှန်းလက်ကားစျေးနှုန်းများအားနေ့စဉ်ထုတ်ပြန်ပေးလျှက်ရှိပါသည်။

            မကွေးမြို့ပေါ်တွင် စက်သုံးဆီဆိုင်(၂၁)ဆိုင်ရှိပြီး  ပုံမှန်ဖွင့်လှစ်ရောင်းချလျှက်ရှိရာ၂၀၂၂-ခုနှစ် ဩဂုတ်လအတွင်း ပထမအပတ်နှင့် ဒုတိယအပတ်အတွင်း စက်သုံးဆီစျေးနှုန်းများမှာ  ဒီဇယ်ရိုးရိုး (၁) လီတာလျှင် ယခင်အပတ်(၂၅၉၅)ကျပ်၊ ယခုအပတ်(၂၇၄၅)ကျပ်ဖြစ်၍ (၁၅၀)ကျပ် စျေးတက်၊ ဒီဇယ် ပရီမီယမ်(၁)လီတာလျှင် ယခင်အပတ်(၂၆၇၀)ကျပ်၊ ယခုအပတ်(၂၈၂၀)ကျပ်ဖြစ်၍ (၁၅၀) ကျပ် စျေးတက်၊ ဓါတ်ဆီ (92) (၁)လီတာလျှင် ယခင်အပတ်(၂၂၉၀)ကျပ်၊ ယခုအပတ်(၂၄၁၀) ကျပ်ဖြစ်၍ (၁၂၀)ကျပ် စျေးတက်၊ ဓါတ်ဆီ(95) (၁)လီတာလျှင် ယခင်အပတ်(၂၃၅၅)ကျပ်၊ ယခုအပတ်(၂၄၉၀) ကျပ်ဖြစ်၍ (၁၃၅)ကျပ် အသီးသီးစျေးတက်လျှက်ရှိကြောင်း စက်သုံးဆီအရောင်း ဆိုင်များမှ သိရှိရပါ သည်။

DOCA(မကွေး)

              အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဩဂုတ်လ(၁၂)ရက်နေ့မှ ဩဂုတ်လ(၁၈)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက် ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၁၀၀၀ မှ ၁၂၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၅၀၀ မှ ၁၃၀၀ အတွင်း၊ ပန်းဂေါ်ဖီ(ထုပ်)ကျပ် ၅၀၀ မှ ၁၃၀၀ အတွင်း၊ အာလူး(ပိဿာ)ကျပ် ၁၇၀၀ မှ ၂၀၀၀ အတွင်း၊ မုန့်လာဉနီ(ပိဿာ) ကျပ် ၁၃၀၀ မှ ၁၇၀၀ အတွင်း ရွှေဖရုံသီး(လုံး)ကျပ် ၂၀၀၀ မှ ၃၀၀၀ အတွင်း၊ ဗူးသီး(လုံး) ကျပ် ၈၀၀ မှ ၁၂၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၂၀၀ မှ ၁၇၀၀ အတွင်း၊ ကြက်သွန်နီ(ဆိပ်ဖြူ)ကျပ် ၁၄၀၀ မှ ၂၆၀၀ အတွင်း၊ ကြက်သွန်ဖြူ(ရှမ်း)(ပိဿာ) ၃၀၀၀ မှ ၃၂၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၈၀၀ မှ ၄၂၀၀ အတွင်း၊ ချင်း(ပိဿာ)ကျပ် ၈၀၀ မှ ၁၂၀၀ အတွင်း၊ ဆလပ်ရွက် (စီး) ကျပ် ၁၀၀ မှ ၂၀၀ အတွင်း၊ ချဉ်ပေါင်ရွက်(စီး) ကျပ် ၅၀ မှ ၁၀၀ အတွင်း၊ ခရမ်းသီး(ရှည်)(ပိဿာ)ကျပ် ၁၃၀၀ မှ ၁၇၀၀ အတွင်း၊ သံပရာသီး(လုံး)ကျပ် ၂၀ မှ ၁၀၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ) ၁၈၀၀ မှ ၂၀၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၁၅၀၀ မှ ၂၀၀၀ အတွင်း ဖြစ်ကြောင်း သိရှိရပါတယ်။ တညင်းကုန်း လက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၈၁၉၀၀)ကျော်၊ ခရမ်းသီး(ရှည်)(ပိဿာ)(၉၈၀၅)ကျော်၊ ဗူးသီးအလုံးပေါင်း (၁၅၉၀)ကျော်၊ ရွှေဖရုံသီးအလုံးပေါင်း (၁၈၀၀)ကျော်၊ ဂေါ်ဖီထုပ်ပေါင်း (၃၁၅၀၀)ကျော်၊ ပန်းဂေါ်ဖီ ထုပ်ပေါင်း (၁၃၅၀၀)ကျော်၊ မုန်ညှင်းထုပ်(ပိဿာ)ပေါင်း (၆၆၅၀)ကျော်၊ ဖရဲသီးလုံးပေါင်း (၁၄၄၀၀) ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

          စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ပြည်တွင်းသို့ တင်သွင်းလာသည့် စားအုန်းဆီများ သတ်မှတ်အရည်အသွေးများပြည့်မီရေး၊ ကျန်းမာရေးနှင့် ညီညွှတ်ပြီး ဘေးအန္တရာယ် ကင်းရှင်းသည့် စားသုံးဆီများကို သုံးစွဲနိုင်‌ရေး၊ ဈေးကွက်အတွင်းဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေးတို့အတွက် လုပ်ငန်းစဉ်များချမှတ်၍ ကြီးကြပ်လျက်ရှိရာ စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးအနေဖြင့် စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီနှင့် “မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း”တို့နှင့် ပူးပေါင်း၍ ၁၅.၈.၂၀၂၂ ရက်နေ့၌ အရှေ့ပိုင်းခရိုင်ဦးစီးမှူးရုံးရှေ့တွင် ရပ်ကွက်နေပြည်သူများနှင့် မြန်မာ့မီးရထားရုံးရှိ ဝန်ထမ်းများနှင့် အလုပ်သမားများအား တစ်ဦးလျှင် စားအုန်းဆီ ၅၀ ကျပ်သားတစ်ဘူး လျှင် ၂၄၅ဝိ/-နှုန်းဖြင့်  Diamond Dragon Co.,Ltd မှ ရောင်းချပေးခဲ့ကြောင်း သိရှိရပါသည်။

DOCA(ရန်ကုန်)