ပြည်တွင်းကုန်သွယ်မှုသတင်း

       ပြည်မြို့နယ်ဒေသတွင်းနှင့် ရွှေတောင်မြို့နယ်ဒေသတဝိုက်တွင် အသားတိုးကြက်များ၊ ဥစားကြက်များအား တစ်နိုင်တစ်ပိုင်မွေးမြူခြင်း၊ စီးပွားဖြစ်မွေးမြူခြင်းလုပ်ငန်းများလုပ်ကိုင်ကြောင်းသိရှိပါသည်။ အသားတိုးကြက်များ၊ ဥစားကြက်များမွေးမြူရာတွင် အကောင်ရေ(၅၀၀)မှ (၁၀၀၀)အထိ တစ်နိုင်တစ်ပိုင်မွေးမြူခြင်း၊ အကောင်ရေ (၃၀၀၀)မှ (၅၀၀၀)အထိ စီးပွားဖြစ်မွေးမြူကြကြောင်းသိရှိရပါသည်။ အသားတိုးကြက်များသည် သားပေါက်အရွယ်မှ (၄၅)ရက်အကြာတွင် ဈေးကွက်အတွင်းရောင်းချနိုင်ကြောင်းသိရှိရပါသည်။ ဥစားကြက်များအားမွေးမြူ၍ (၅)လအကြာတွင် ဥစမ်းများရရှိကြောင်းသိရှီရပါသည်။ အသားတိုးကြက်များ၊ ဥစားကြက်များသည် အချိန်ပိုင်းအတွင်း အကျိုးအမြတ်ရရှိကြောင်းသိရှီရပါသည်။ ဈေးကွက်အတွင်း အသားစားကြက်များသည် ဧပြီလက တစ်ပိဿာလျှင် ၁၂၀၀၀ကျပ်ဖြစ်ပြီး၊ ယခုမေလတတိယအပတ်အစတွင် ပေါက်ဈေးနှုန်း ၁၆၀၀၀ကျပ်ဖြစ်ပါသည်။ ကြက်ဥဈေးနှုန်းမှာ ဧပြီလကတစ်လုံးလျှင် ၂၆၀ကျပ်ဖြစ်ခဲ့ပြီး မေလတတိယအပတ်အစတွင် ဈေးနှုန်းမှာ တစ်လုံးလျှင် ၃၅၀ကျပ်ဖြင့် ရောင်းဝယ်လျက်ရှိပါသည်။ အသားတိုးကြက်သားနှင့် ကြက်ဥဈေးနှုန်းများမှာ ယခင်ကထက်မြင့်တက်လာရခြင်းမှာ ကြက်စာများအားဝယ်ယူရာတွင် ဈေးနှုန်းများမြင့်တက်လာခြင်း၊ ရာသီဥတုပူပြင်းလာသည့်အတွက် ကြက်ဥပေါက်နှုန်းများကျဆင်းခြင်းကြောင့်ဖြစ်ပါကြောင်း သိရှိရပါသည်။

DOCA(ပဲခူး)

       ပူပြင်းလွန်းတဲ့နွေရာသီ အပူချိန်များသည့်ကာလဖြစ်သည့်ယခုကာလတွင် Electronic ဈေးကွက်၌ ပန်ကာမျိုးစုံ၊ လေအေးပေးစက်မျိုးစုံ ရောင်းဝယ်မှုများနေသည့်အချိန်နှင့်အညီ လူတန်းစားအလွှာအလိုက် မိမိတတ်နိုင်သလောက် ဝယ်ယူသုံးစွဲနေကြသည့်အထဲတွင် Air con များထက် လူတန်းစားအလွှာမရွေးသုံးစွဲနိုင်သည့် အားသွင်းပန်ကာငယ်လေးများ အရောင်းသွက်လျက်ရှိနေ‌ကြောင်းသိရှိရပါသည်။ ဈေးများအနေဖြင့် ကျပ်သောင်းဂဏန်းကျော်မှ သိန်းဂဏန်းကျော်ထိ အရည်အသွေးလိုက်၍ ဈေးကွာခြားမှုရှိပါသည်။၂၀၂၄ခုနှစ်၊ မေလပထမအပတ်မှတတိယအစအတွင်း USB/ Power Bank နှင့်တွဲသုံးလို့ရသည့် အားသွင်းပန်ကာလေးများကတော့ တစ်လုံးလျှင် ၂၅၅၀၀ကျပ်မှ ၂၈၅၀၀ကျပ်၊ kd 182 click fan ကတော့ လက်လီ/ လက်ကား တစ်လုံးကျပ် ၂၀၀၀၀မှ ၂၅၀၀၀ကျပ် အထိလည်းကောင်း ၆လက်မအရွယ်ရေငွေ့ထွက် Mini Air cooler အမျိုးအစားတစ်လုံး ၁၉၀၀၀ကျပ် Solar နှင့်အားသွင်းလို့လည်းရသည့်ပန်ကာများကလည်း ပစ္စည်းအရည်အသွေး၊ ထုတ်လုပ်သည့်နိုင်ငံပေါ်မူတည်၍ ကျပ်၇သောင်းကျော် ၈သောင်းမှစ၍ သိန်းဂဏန်းကျော်အထိဈေးနှုန်းများရှိပြီး ယခုကာလ Electronic ဈေးကွက်မှာ ပန်ကာမျိုးစုံ၊ အရွယ်အစားမျိုးစုံ Brand အပေါ်မူတည်၍ ဈေးနှုန်းများအသီးသီးကွာခြားမှုရှိကြကာ ရောင်းဝယ်သူများအလွန်များသည့်ပစ္စည်းများဖြစ်ကြောင်း လေ့လာသိရှိရပါသည်။

DOCA(ပဲခူး)

      တောင်ငူခရိုင်၊ ဖြူးမြို့တွင် မြေပဲဆီမှာ ဖေဖော်ဝါရီလလယ်ပိုင်းက တစ်ပိဿာလျှင် ၁၆၀၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၁၅၀၀၀ကျပ်ဖြင့် ဈေးနှုန်းအနည်းငယ်ကျဆင်းသွားကြောင်းသိရှိရပါသည်။

      ကြက်သွန်နီမှာ ဧပြီလက တစ်ပိဿာလျှင် ၂၂၀၀ကျပ်မှ ၂၅၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၂၆၀၀ကျပ်ဖြင့် ဈေးနှုန်းအနည်းငယ်တက်ပြီး ငရုပ်သီးခြောက်မှာ ဧပြီလက တစ်ပိဿာလျှင် ၁၂၀၀၀ကျပ်မှ ၁၅၀၀၀ကျပ်ရှိရာမှ ယခုမေလ တတိယအပတ်အစတွင် တစ်ပိဿာလျှင် ၁၀၀၀၀ကျပ်မှ ၁၁၀၀၀ကျပ်၊ အာလူးမှာ ဧပြီလက တစ်ပိဿာလျှင် ၂၄၀၀ကျပ်မှ မေလတတိယအပတ်အစတွင် တစ်ပိဿာလျှင် ၂၂၀၀ကျပ်ဖြင့် ဈေးနှုန်းအနည်းငယ်ကျဆင်းပါသည်။ ကြက်သွန်ဖြူမှာ တစ်ပိဿာလျှင် ၁၀၀၀၀ကျပ်မှ ၁၁၀၀၀ကျပ်အထိဖြင့် ဈေးနှုန်းတည်ငြိမ်နေပါသည်။

        ကုလားပဲခြမ်းမှာ ဧပြီလက တစ်ပိဿာလျှင် ၆၅၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၆၀၀၀ကျပ်၊  ကုလားပဲလုံးမှာ ဧပြီလက တစ်ပိဿာလျှင် ၅၀၀၀ကျပ်မှ ယခုမေလတတိယအပတ်အစတွင် တစ်ပိဿာလျှင် ၄၅၀၀ကျပ်၊  မြေပဲဆံ(အဖြူ)မှာဧပြီလက တစ်ပိဿာလျှင် ၈၀၀၀ ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၇၅၀၀ကျပ်နှင့် မြေပဲဆံ(အနီ)မှာ ဧပြီလက တစ်ပိဿာလျှင် ၈၀၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၇၇၀၀ကျပ်ဖြင့် ဈေးနှုန်းကျဆင်းကြောင်း စည်ပင်သာယာဈေးအတွင်းရှိ ကိုမောင်မောင်ကုန်စုံဆိုင်မှ သိရှိရပါသည်။

DOCA(ပဲခူး)

            စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံသည် ၂၁.၅.၂၀၂၄ ရက်နေ့တွင် ဘီးလင်းမြို့နယ်တာဝန်ခံရုံး၌ ဘီးလင်းမြို့နယ်အတွက် ခွဲတမ်းရရှိသော စားအုန်းဆီများကို တာဝန်ယူဖြန့်ဖြူးရောင်းချနေသည့် လက်လီ/လက်ကား ကုန်သည်များနှင့် တွေ့ဆုံ၍ စားအုန်းဆီဖြန့်ဖြူးရောင်းချမှုနှင့်စပ်လျဉ်း၍ ဆွေးနွေးပွဲကျင်းပပြုလုပ်ခဲ့သည်။

           အဆိုပါ တွေ့ဆုံဆွေးနွေးပွဲသို့ မြို့နယ်အထူးစုံစမ်းစစ်ဆေးရေးအဖွဲ့၊ မြို့နယ်စည်ပင် သာယာရေးအဖွဲ့၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြန်မာနိုင်ငံရဲတပ်ဖွဲ့နှင့် ဆီလက်လီ/လက်ကားကုန်သည်များ စုစုပေါင်း (၂၇) ဦးတက်ရောက်ခဲ့သည်။

          ဆွေးနွေးပွဲတွင် စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံက ခွဲတမ်းရရှိသော စားအုန်းဆီများအား တာဝန်ယူဖြန့်ဖြူးရောင်းချနေသော ကုန်သည်များအား သတ်မှတ်အရေအတွက်ပြည့်မီစွာရောင်းချပေးရေး၊ ဈေးနှုန်းမြှင့်တင်ရောင်းချခြင်းမပြုရေး၊ ဈေးကစား ရန်အလို့ငှာ စားအုန်းဆီများအား လက်ဝယ်သိုလှောင်ထားမှုမရှိစေရေးနှင့် ဈေးနှုန်းမြှင့်တင် ရောင်းချခြင်းပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း၊ ပုဒ်မ (၅) အရ ထိုက်သင့် သော ပြစ်ဒဏ်များ ခံရမည်ဖြစ်ကြောင်း ဆွေးနွေးခဲ့သည်။ ထို့နောက် အထူးစုံစမ်းစစ်ဆေးရေးအဖွဲ့မှ ဦးစီးအရာရှိ ဦးကျော်စိုးလင်း က စားအုန်းဆီနှင့်ပတ်သက်သည့် သက်ဆိုင်ရာညွှန်ကြားချက်များကို လိုက်နာကြရန်ဆွေးနွေးခဲ့ပြီး တက်ရောက်လာသူများကို သိလိုသည်များကို ဆွေးနွေးခဲ့ကြပြီး ဆွေးနွေးပွဲအား ရုပ်သိမ်းခဲ့ကြကြောင်း သိရှိရပါသည်။

DOCA(မွန်)

          ကျိုက်မရောမြို့နယ်၌ ဒေသထွက်သီးနှံ တစ်မျိုးဖြစ်သည့် ကြက်မောက်သီးများလှိုင်လှိုင် ထွက်ရှိနေပြီး ဖြစ်သော်လည်း အခြားမြို့များသို့ တင်ပို့ရန် လမ်းခရီးအခက်အခဲရှိ၍ စျေးအနည်းငယ် ကျဆင်းနေကြောင်း သိရသည်။

         ကျိုက်မရောဒေသထွက် ယိုးဒယားသီးများ လှိုင်လှိုင်ထွက်ရှိနေချိန်တွင် ကုန်သည်များ အဝယ်လိုက်နေသော်လည်း ရန်ကုန်မြို့ နှင့်အခြားသောမြို့ကြီးများသို့ တင်ပို့ရောင်းချရန် လမ်းပန်းဆက်သွယ်ရေး  အခက်အခဲကြောင့် ကြက်မောက်သီး ကုန်သည်များ အရှုံးပေါ် နေကြောင်းလည်းသိရသည်။ လက်ရှိ ဖြစ်ပေါ်နေသော မော်လမြိုင်၊ ရန်ကုန်သွားကားလမ်း အခြေအနေအရ ရန်ကုန်မြို့သို့ တင်ပို့ရမည့်အသီးများ နေပူရှိန်ပြင်းသဖြင့် အသီးများနွမ်းခြောက်ကာ ပို့ရန်ခက်ခဲလျက်ရှိနေသဖြင့် မော်လမြိုင်နှင့် သထုံ မြို့နယ် အထိသာရောင်းချနေရကြောင်း၊ ကြက်မောက်သီးအလုံး ၅၀ ပါတစ်တွဲလျှင် ယခင်က တစ်သောင်းထိ ရခဲ့သော်လည်း ယခုအခါ ၆၀၀၀ မှ ၅၀၀၀ ကျပ်ထိသာ ရရှိကြောင်း   ကျိုက်မရောမှ ကြက်မောက်သီးကုန်သည်  ဦးစိုးမြင့်ထံမှ သိရှိရပါသည်။

DOCA(မွန်)