ပြည်တွင်းကုန်သွယ်မှုသတင်း

          ပြည်ခရိုင်၊ ပေါက်ခေါင်းမြို့ရှိ သဖန်းချိုအုပ်စု၊ လေးကြီးကျေးရွာတွင် ကြက်သွန်များ စိုက်ပျိုးထားရှိကြောင်း သိရပါသဖြင့် စိုက်ပျိုးထွက်ရှိမှုနှင့် ဈေးနှုန်းဈေးကွက် အခြေအနများ အားသိရှိနိုင်ပါရန် ပေါက်ခေါင်းမြို့နယ်တာဝန်ခံနှင့် ဝန်ထမ်းများအဖွဲ့သည် ၂၄.၂.၂၀၂၅ ရက်နေ့တွင် ကွင်းဆင်းခဲ့ပါသည်။

         သဖန်းချိုအုပ်စု၊ လေးကြီးကျေးရွာရှိ တောင်သူဦးခင်လေးမှ ကြက်သွန်နီ ၀.၂၅ဧကကို စိုက်ပျိုးထားရှိပြီး စိုက်ပျိုးပြီး (၂)ခန့် အကြာတွင် ကြက်သွန်များကို နှုတ်ယူရောင်းချကြပါသည်။ ၀.၂၅ဧကတွင် စိုက်ပျိုးထုတ်လုပ်ကုန်ကျစရိတ်အနေဖြင့် ၈ သိန်းကျပ်ခန့်ကုန်ကျပြီး ထွက်ရှိမှုမှာ ပိဿာ ၆၃၀ခန့်ထွက်ရှိကြောင်း သိရပါသည်။ ကြက်သွန်ဘောင်တစ်ဘောင်လျှင် ၁၄ပိဿာခန့် ထွက်ရှိ၍ စိုက်ပျိုးဘောင် ၄၅ဘောင်ရှိပါသည်။ ကြက်သွန်များထွက်ရှိလာသောအခါ တစ်ပိဿာလျှင် ၂၅၀၀ကျပ်ဖြင့် စိုက်ခင်းသို့လာရောက်ဝယ်ယူသလို ဈေးများနှင့် ပွဲရုံများသို့လည်း တင်ပို့ရောင်း ချကြပါသည်။  ၀.၂၅ဧကတွင် ရရှိသောဝင်ငွေမှာ ၁၅၇၅၀၀၀ကျပ်ဖြစ်၍ တောင်သူအကျိုးအမြတ်မှာ ၇၇၅၀၀၀ကျပ်ခန့်ရရှိကြောင်း သိရပါသည်။ တောင်သူအကျိုးအမြတ်မှာ အထွက်နှုန်းနှင့် ဈေးနှုန်းအပေါ်မူတည်၍ အပြောင်းအလဲရှိကြောင်း သိရပါသည်။ ထို့ကြောင့် ကြက်သွန်နီစိုက် တောင်သူများအနေဖြင့် အထွက်နှုန်းကောင်းမွန်အောင် မျိုးကောင်းများရွေးခြယ်၍ နည်းပညာများ စနစ်တကျဖြင့်စိုက်ပျိုးနိုင်မည်ဆိုလျှင် ဒီထက်မက အကျိုးအမြတ်များလည်းရရှိနိုင်မည်ဖြစ်ကြောင်း သိရှိရပါသည်။

DOCA(ပဲခူး)

           ဆောင်းရာသီကုန်ခါနီးအချိန်ဖြစ်၍ ရာသီဥတုမှာ နေ့ခင်းအချိန်များတွင် ပူပြင်းလာပြီး မနက်ခင်းအချိန်တွင် အေးလျက်ရှိနေပါသည်။ ထို့ကြောင့် ပြည်ခရိုင်၊ ပြည်မြို့ရှိ ပန်းဈေးကွက် အနေဖြင့် ယခုအချိန်တွင် ရောင်စုံပန်းများဖြစ်သော ဂန္ဓမာပန်း၊ သစ္စာပန်း၊ နှင်းဆီပန်း ၊ မေမြို့ပန်း အစရှိသဖြင့် ပန်းများဈေးကွက်တွင် ရောင်းချလျက်ရှိနေပါသည်။ ထိုပန်းများကို ပြည်မြို့အနီးတဝိုက် ရှိ မှော်ဇာ၊ ကင်းပွန်းခြုံနှင့် ရွှေတောင်မြို့နယ်ရှိ ကသစ်ကိုင်းကျေးရွာများမှ လာရောက်ရောင်းချ ကြပါသည်။ ထိုကျေးရွာများမှ ပန်းများကို စီးပွားဖြစ်စိုက်ပျိုးကြသလို တစ်နိုင်တစ်ပိုင်လည်း စိုက်ပျိုးပါသည်။ ထွက်ရှိလာသော ပန်းများကို ပန်းဒိုင်များ၊ ဈေးသည်များက အခင်းထဲအထိ လာရောက်ဝယ်ယူရောင်းချကြပါသည်။ ဈေးများတွင်ရောင်ချသော ပန်းများ၏ ဈေးနှုန်းများမှာ ဂန္ဓမာပန်း (အဖြူ၊ အဝါ) အကြီးအသေးရောရာ(၅)ခက်ပါတစ်စည်းလျှင် ၄၅၀၀ကျပ်၊ သစ္စာပန်း (၅)တံပါတစ်စည်းလျှင် ၂၀၀၀ကျပ်၊ နှင်းဆီပန်း အပွင့်အသေး (၁၀)ပွင့်ပါတစ်စည်းလျှင် ၃၅၀၀ကျပ်၊ နှင်းဆီပန်း (အကြီး) တစ်ပွင့်လျှင် ၅၀၀-၇၀၀ကျပ်၊ မေမြို့ပန်း (ကြွေဖြူ)တစ်စည်းလျှင် ၂၀၀၀ကျပ်၊ မေမြို့ပန်း (အက်စတာ)တစ်စည်းလျှင် ၅၀၀-၁၀၀၀ကျပ်ဖြင့် ရောင်းချလျှက်ရှိပါသည်။

            ပန်းဈေးများမှာ ယခင်နှစ်ထက်စာလျှင် ယခုနှစ်မှာဈေးများထက်ဝက်ခန့် မြင့်တက်လာရခြင်းမှာ မျိုးဈေးများကြီးမြင့်ခြင်း၊ အထွေထွေကုန်ကျစရိတ်များလည်း ကြီးမြင့်လာခြင်းတို့ကြောင့် ဖြစ်သည်ဟု သိရပါသည်။ ပြည်ဈေးမှတစ်ဆင့် ရန်ကုန်မြို့ရှိဈေးများနှင့် နေပြည်တော်မြို့သို့လည်း တင်ပို့ရောင်းချကြောင်း သိရှိရပါသည်။

DOCA(ပဲခူး)

၁၉.၂.၂၀၂၅ ရက်နေ့ နံနက် (၀၉:၀၀) နာရီအချိန်တွင် စားသုံးသူရေးရာဦးစီးဌာန၊ သထုံခရိုင်၊ ပေါင်မြို့နယ်တာဝန်ခံသည် ကဒါရပ်ကွက်၊ မင်္ဂလာဈေးတွင် စားသုံးသူပြည်သူများ သက်သာချောင်ချိရေးအတွက် အခြေခံစားသောက်ကုန်များဖြစ်သော ဆန်၊ ဆီ၊ ကြက်ဥ၊ ဘဲဥ၊ အသား၊ ငါးများကို သက်သာသောဈေးနှုန်းဖြင့် ရောင်းချပေးရာတွင် သက်ဆိုင်ရာဌာနများနှင့် ပူးပေါင်းဆောင်ရွက်ခဲ့ကြောင်း သိရှိရသည်။

ထိုသို့ ရောင်းချပေးရာတွင် မြို့နယ်စီမံအုပ်ချုပ်ရေးအဖွဲ့၏ ဦးဆောင်မှုဖြင့် အခြေခံစားသောက်ကုန်စည်များဖြစ်သည့် အမဲသားတစ်ပိဿာ ၁၅၀၀၀ ကျပ်၊ ဝက်သား တစ်ပိဿာ ၁၅၀၀၀ ကျပ်၊ ဆန်(၁)ပြည် ၃၂၀၀ ကျပ်၊ ဆီတစ်ပိဿာ ၈၂၀၀ ကျပ်၊ ကြက်ဥ(၄)လုံး ၁၀၀၀ ကျပ် စသည်တို့ကိုဈေးနှုန်းချိုသာစွာဖြင့် ရောင်းချပေးခဲ့ရာ အများပြည်သူများမှ ဝယ်ယူအားပေးခဲ့ကြောင်း သိရသည်။

DOCA(မွန်)

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန်စာရင်း တို့ကို အပတ်စဉ်၊ လစဉ်တင်ပြလျက်ရာ ဖေဖော်ဝါရီလ၊ တတိယအပတ်တွင်  အရောင်းအဝယ်ဖြစ်သည့် သီးနှံနှင့် ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ အလုပ်အမှုဆောင်အဖွဲ့ဝင်များနှင့် ဆက်သွယ်မေးမြန်းခဲ့ပါသည်။ ဇန်နဝါရီလ၊ စတုတ္ထအပတ်မှစတင်၍ ရွှေဘိုဈေးကွက်သို့ ပဲစဉ်းငုံ(ဖြူ)များ စတင်ဝင်ရောက်ခဲ့ပြီး ဖေဖော်ဝါရီလ၊ တတိယအပတ်တွင်အရောင်းအဝယ်ဖြစ်သည့် ဈေးနှုန်းမှာ ပဲစဉ်းငုံ(ဖြူ)တစ်တင်းလျှင် (၉၀၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်းအရောင်းအဝယ်ဖြစ်မှုမှာ (၉၀၀၀)တင်း/(၂၉၄)တန်ဖြစ်ကြောင်း၊ ယခုအပတ်နှင့် ယခင်အပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ ပဲစဉ်းငုံ(ဖြူ)တစ်တင်းလျှင် (၈၁၀၀ဝိ/-)ကျပ် ပေါက်ဈေး ရှိခဲ့သဖြင့် ယခုအပတ်တွင် ယခင်အပတ်ထက် ပဲစဉ်းငုံ(ဖြူ)တစ်တင်းလျှင် (၉၀၀ဝိ/-)ကျပ် ဈေးပိုမို ရရှိခဲ့ကြောင်း၊ ဈေးအနည်းငယ်တက်လာသော်လည်း ဝင်ရောက်သမျှ အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ မုံရွာမြို့ရှိ နန္ဒဝန်ဈေးတွင် အသီးမျိုးစုံ ရောင်းချနေသည့် ဆိုင်များတွင် စတော်ဘယ်ရီသီးများကို လှိုင်လှိုင်ရောင်းချနေကြောင်း သိရှိရပါသည်။ ရာသီပေါ် စတော်ဘယ်ရီများကို   မန္တလေး၊ ပြင်ဦးလွင်မြို့မှ အဓိက ဝယ်ယူရောင်းချလျက်ရှိ‌ ကြောင်း သိရသည်။ ယခု ရာသီချိန်တွင် စတော်ဘယ်ရီသီးများ လှိုင်လှိုင်ထွက်ပေါ်လာပြီဖြစ်၍ စျေးကွက်အတွင်း ရောင်းအား ကောင်းနေကြောင်း သိရှိရပါသည်။

          မုံရွာမြို့ရှိ နန္ဒဝန်ဈေးအတွင်း ရောင်းချလျက်ရှိသော စတော်ဘယ်ရီသီးဈေးနှုန်းများမှာ တစ်ပိဿာလျှင် (၂၀၀၀၀)မှ(၁၈၀၀၀)ကျပ်အထိဈေးနှုန်းအစားစားရှိကြောင်း  ဝယ်ယူသူများ ပြားပြီး အရောင်းသွက်သဖြင့် အရောင်းအဝယ် အဆင်ပြေလျက်ရှိကြောင်း မုံရွာမြို့၊ နန္ဒဝန် ဈေးတွင် ရောင်းချလျက်ရှိသော သစ်သီး ရောင်းချသူများထံမှ သတင်းရရှိပါသည်။ 

DOCA(စစ်ကိုင်း)