ပြည်တွင်းကုန်သွယ်မှုသတင်း

    မြင်းခြံမြို့နယ်ရှိ ကျေးရွာအချို့သည် စိုက်ပျိုးရေးလုပ်ငန်းကို လုပ်ကိုင်စားသောက်ကြရာ  စားဖိုဆောင်သီးနှံများ၊ ဟင်းသီးဟင်းရွက်များကိုလည်း စိုက်ပျိုးကြပါသည်။ ဒေသတွင်း ခရမ်းချဉ် သီးများ ပေါ်ချိန်မရှိပါက ပုပ္ပားမြို့မှ ဝယ်ယူရောင်းချကြောင်း သိရသည်။ ယခင် နိုဝင်ဘာလ ဆန်းပိုင်းတွင် ခရမ်းချဉ်သီးတစ်ပိဿာလျှင် (၃၅၀၀/၄၀၀၀)ကျပ် ရှိခဲ့ပြီး ယခု ဒီဇင်ဘာလဆန်းတွင် မြင်းခြံမြို့ အေးမြသီတာဈေးတွင် (၂၅) ကျပ်သားလျှင် (၁၃၀၀)ကျပ်၊ တစ်ပိဿာလျှင် (၅၀၀၀) ကျပ်ဖြင့် ဈေးအနည်းငယ် မြင့်တက်လာကြောင်း သိရသည်။ ယခုအခါ ဒေသတွင်း ခရမ်းချဉ်သီးများ မရှိတော့သဖြင့် ပခုက္ကူမြို့၊ ပုပ္ပားမြို့တို့မှ  ဝယ်ယူရောင်းချခြင်းဖြစ်ကြောင်း ကုန်စိမ်းရောင်းချသူထံမှ သိရသည်။

DOCA(မန္တလေး)

မြင်းခြံမြို့ အေးမြသီတာဈေးသည် သီးနှံ၊သားငါး၊ ငါးပိ ငါးခြောက်၊ ကုန်မျိုးစုံရောင်း ချသော ဈေးဖြစ်သည်နှင့် အညီ သီးနှံများကိုလည်း  ဒေသတွင်း၊ မန္တလေး၊ပြင်ဉီးလွင်၊ ပခုက္ကူ ၊ပုပ္ပား စသည့် နေရာဒေသစုံမှ ဝယ်ယူရောင်းချပါကြောင်း သိရသည်။ ခဝဲသီးကို မြင်းခြံမြို့နယ် နဘူးအိုင် ကျေးရွာ၊ သမုန်းကိုင်းကျေးရွာမှ ဈေးကွက်အတွင်းသို့ ဝယ်ယူရောင်းချကြောင်း သိရသည်။ ခဝဲသီးကို ကြက်ဥဖြင့် ကြော်ချက်၍ လည်းကောင်း၊ပုဇွန်ခြောက်ဖြင့် လည်းကောင်း၊ အသားငါးဖြင့် ရော၍ ချက်ပြုတ် ခြင်းဖြင့်လည်းကောင်း၊ ငရုတ်သီးစိမ်းဖြင့် အစပ်ချက်၍ လည်းကောင်း စသည်ဖြင့် ချက်ပြုတ်စား သောက်ကြသူများသောကြောင့် အရောင်းအဝယ်ကောင်းသော သီးနှံတစ်မျိုးဖြစ် ကြောင်း သိရသည်။ ၂၀၂၅ ခုနှစ် ဒီဇင်ဘာလတွင် ရောင်းချနေသော ခဝဲသီးဈေးနှုန်းမှာ (၅၀)ကျပ်သားလျှင် (၁၅၀၀)ကျပ် ၊(၁)ပိဿာလျှင် (၃၀၀၀)ကျပ် ဖြင့် အရောင်းအဝယ်ဖြစ်ကြောင်း ကုန်စိမ်းရောင်းချသူ တစ်ဦးထံမှ သိရသည်။

DOCA(မန္တလေး)

  မကွေးတိုင်းဒေသကြီး၊ မကွေးခရိုင်၊ မကွေးမြို့၊ ကုန်သည်များနှင့် စက်မှုလက်မှုလုပ်ငန်းရှင်များ အသင်း (မကွေးကုန်စည်ဒိုင်)တွင် သစ်ရာကောက်၊ နတ်မောက်၊ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်တို့မှ ထွက်ရှိသော ပဲနှင့်နှမ်းမျိုးစုံတို့ အများဆုံးဝင်ရောက်လျက်ရှိကြောင်းသိရှိရပါသည်။

          ၂၀၂၅ခုနှစ်၊ ဒီဇင်ဘာလ(ဒုတိယပတ်)တွင် မကွေးကုန်စည်ဒိုင် သီးနှံစျေးနှုန်းများမှာ နှမ်းနက် (စမုံ) (၁၅)ပိဿာ (၁)တင်းလျှင် ကျပ်(၂၄၇၀၀၀-၂၅၀၀၀၀)၊ နှမ်းဖြူ (၁၅)ပိဿာ (၁)တင်းလျှင် ကျပ် (၁၀၀၀၀၀)၊ နှမ်းနီ (၁၅)ပိဿာ (၁)တင်းလျှင် ကျပ်(၉၀၀၀၀-၉၂၀၀၀)၊ နှမ်းညို (၁၅)ပိဿာ(၁)တင်းလျှင် ကျပ်(၉၁၀၀၀)၊ ပဲတီစိမ်း (၂၀)ပိဿာ (၁)တင်းလျှင် ကျပ်(၁၁၉၀၀၀-၁၂၀၀၀၀)၊ ပဲနောက် (၂၀)ပိဿာ (၁)တင်းလျှင် ကျပ်(၁၂၃၀၀၀)၊ ပဲလွန်းဝါ (၁၉)ပိဿာ (၁)တင်းလျှင် ကျပ်(၆၀၀၀၀-၆၃၀၀၀)၊ ကုလားပဲ (929) (၁၉) ပိဿာ (၁)တင်းလျှင် ကျပ်(၇၇၀၀၀)၊ ကုလားပဲ (HL)(၁၉)ပိဿာ (၁)တင်းလျှင် ကျပ် (၈၄၅၀၀)၊ ပဲကြီးဖြူ (လတ်) (၁၉)ပိဿာ (၁)တင်းလျှင် ကျပ်(၁၈၅၀၀၀)၊ ပဲစဉ်းငုံနီ (၂၀)ပိဿာ (၁)တင်းလျှင် ကျပ်(၈၁၀၀၀-၈၁၅၀၀)၊ မတ်ပဲ (၂၀)ပိဿာ (၁)တင်းလျှင် ကျပ်(၇၅၀၀၀-၈၁၀၀၀)၊ စားတော်ပဲ (၂၀) ပိဿာ (၁)တင်းလျှင် ကျပ်(၂၈၀၀၀၀)၊ လုံးဆံနီ (၁)ပိဿာလျှင် (၇၇၀၀-၇၈၀၀)၊ လုံးဆံဖြူ (၁)ပိဿာ လျှင် ကျပ်(၇၉၀၀-၈၀၀၀)၊ မြေပဲဆံ (အောက်ကျ) (၁)ပိဿာလျှင် ကျပ် (၆၈၀၀-၇၀၀၀)တို့ စျေးနှုန်းများ ဖြစ်ပေါ်လျက်ရှိကြောင်းနှင့် ယခုတစ်ပတ်တွင် လုံးဆံနီ၊ လုံးဆံဖြူ၊ မြေပဲဆံ(အောက်ကျ)တို့ စုစုပေါင်း တန်ချိန် (၃၀၀)ခန့် အရောင်းအဝယ်ဖြစ်နေကြောင်း သိရှိရပါသည်။

DOCA( မကွေး)

     ပြောင်းဖူးကို မြန်မာနိုင်ငံအလယ်ပိုင်း ရှမ်းပြည်နယ်တောင်ပိုင်းနှင့်မြောက်ပိုင်း တို့တွင် အများဆုံးစိုက်ပျိုးကြသည်ကို တွေ့ရသည်။ ပြောင်းဖူးသည်ပြည်ပသို့အဓိကတင်ပို့သည့် သီးနှံ ဖြစ်သည်။  ပြည်ပပို့ကုန်အဖြစ် သာမကပြည်တွင်း၌ပါ စားသုံးသူစျေးကွက်အခိုင်အမာရှိသာ ပြောင်းဖူးကို တိုးမြင့်စိုက်ပျိုးသင့်ကြောင်း သိရှိရပါသည်။ ပြောင်းဖူးကို သကြားပြောင်း၊ ထောပတ်ပြောင်း၊ အနီရောင်ရှမ်းပြောင်းဟူ၍ အမျိုးမျိုးရှိသည်။ ယေဘုယျအားဖြင့် သကြား ပြောင်းမှာ လူကြိုက်များသော ပြောင်းဖြစ်သည်။ အစေ့ထုတ်ပြောင်းကို မိုးရာသီနှင့် ဆောင်းရာသီတွင် စိုက်ပျိုးကြပြီး ပြည်ပသို့ အဓိကတင်ပို့သည့်သီးနှံဖြစ်သည်။ ပြောင်းဖူးကို သားရေစာ အဖြစ်လည်း မျိုးစုံလုပ်စားကြသည်။ ထို့ပြင် ပြောင်းဖူးသည် အာဟာရဓာတ်ကြွယ်ဝ ပြီးကျန်းမာရေးနှင့်လည်း အထူးညီညွတ်ပါသည်။

    တနင်္သာရီတိုင်းဒေသကြီး၊ ထားဝယ်မြို့ စည်ပင်သာယာဈေးနှင့် ရက်ကွက်ဈေးငယ်များ တွင် ပြောင်းဖူးတစ်ဖူးလျှင်(၁၅၀၀ မှ ၂၀၀၀)ကျပ် ရှိကြောင်းဈေးသည်များထံမှ သိရှိရပါသည်။ DOCA(ဧရာဝတီ)

      ပဲပင်ပေါက်သည်စျေးသက်သာပြီးအလွယ်တကူ ဝယ်ယူရရှိနိုင်၍ ကျန်းမာရေးအတွက် အထောက်အကူများစွာပြုနိုင်သောအစားအစာတစ်ခုဖြစ်သည်။ ပဲပင်ပေါက်သည် အာဟာရဓါတ် ကြွယ်ဝပြီး ဗီတာမင်A,Cနှင့်သတ္တုဓါတ်များ ကြွယ်ဝစွာ ပါဝင်နေသောကြောင့်ခန္ဓာကိုယ်ကို ကိုယ်ခံ အားကောင်းစေပြီး ရောဂါပိုးကူးစက်မှုကို ထိရောက်စွာကာကွယ်ပေးနိုင်ပါသည်။  ဓာတ်တိုးဆန့်ကျင် အာနိသင်ပါဝင်နေသောကြောင့် ခန္ဓာကိုယ်ကိုကျန်းမာစေပြီ ဇိဝကမ္မလုပ်ငန်းစဉ်များကို အကောင်းဆုံးလည်ပတ်စေနိုင်ပါသည်။ ဗီတာမင်A ပါဝင်နေသောကြောင့် ခန္ဓာကိုယ်ကိုလည်း အကောင်းဆုံး ထောက်ပံ့ပေးပါသည်။

      ပဲပင်ပေါက် ကိုစီးပွားအဖြစ် ဖောက်၍ရောင်းချကြပြီး ပဲပင်ပေါက် ဖောက်ရာတွင် ပဲတီစိမ်း၊ မတ်ပဲတို့ကို အများဆုံးအသုံး ပြုကြသည်။ များသောအားဖြင့်ဇကာထဲတွင် ထည့်ဖောက်လေ့ရှိပြီး အပင်ပေါက်ချိန်သည် ၄ ရက်မှ ၅ ရက်ခန့်ကြာပါသည်။ ပဲစေ့များမှတဆင့်  အပင်ဖောက်၍ ရရှိလာသောအပင်များကို အထုပ်ငယ်များဖြင့် တစ်ထုပ်လျှင် (၁၀၀၀)ကျပ်နှုန်းဖြင့် စည်ပင်သာယာဈေးကြီးနှင့် ရပ်ကွက်ဈေးငယ်များတွင် ရောင်းချကြောင်း သိရှိရပါသည်။

DOCA(ဧရာဝတီ)