ပြည်တွင်းကုန်သွယ်မှုသတင်း

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို အများအပြားလုပ်ကိုင်ကြကြောင်း သိရပါသည်။ စိုက်ပျိုးသီးနှံများဖြစ်သည့် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ကင်ပွန်းချဉ်ရွက်၊ ရုံးပတီသီး၊ ဘူးသီး၊ ငရုတ်သီး စသည့်သီးနှံများကို စိုက်ပျိုးကြသည့်အပြင် သင်္ဘောသီးစိမ်းနှင့် ရွှေဖရုံသီးများကိုလည်း တစ်နိုင်တစ်ပိုင် စိုက်ပျိုး‌ကြပြီး ကန့်ဘလူမြို့မဈေးသို့ လာရောက်ရောင်းချကြကြောင်း သိရှိရသည်။

      ၂၀၂၅ခုနှစ်၊ နိုဝင်ဘာလ စတုတ္ထပတ်အတွင်း ရောင်းချလျက်ရှိသော သင်္ဘောသီးစိမ်းဈေးနှုန်းမှာ သင်္ဘောသီးစိမ်း(၁)ပိဿာလျှင် (၁၀၀၀)ကျပ်၊ (၅၀)ကျပ်သားလျှင် (၅၀၀)ကျပ်နှင့် ရွှေဖရုံသီး(၁) ပိဿာလျှင်(၂၈၀၀)ကျပ်၊ ရွှေဖရုံသီး(၁)စိတ်လျှင်(၁၀၀၀)ကျပ်ဖြင့် အရောင်းအဝယ်ဖြစ်လျက်ရှိ ကြောင်းကုန်စိမ်းရောင်းချသူထံမှ သိရှိရပါသည်။

DOCA(စစ်ကိုင်း)

        ကန့်ဘလူမြို့၊ မြို့မဈေးအတွင်းတွင် ဘုရားပန်းမျိုးစုံဖြစ်သည့် သပြေပန်း၊ နှင်းပန်း၊ ဂန္ဓမာပန်း၊ ဇွန်ပန်း၊ စံပယ်ပန်း၊ စကားဝါပန်း၊ စကားဖြူပန်း၊ ရွှေပန်း၊ ငွေပန်း၊ ပန်းတိမ်ငိုပန်း၊ နှင်းဆီပန်း၊ ဇော်စိမ်းပန်း(ခေါ်)ကျောက်စိမ်းပန်း၊ သစ္စာပန်းများ ရောင်းချလျက်ရှိရာ လူကြိုက်များသောနှင်းဆီပန်းများနှင့် ဇော်စိမ်းပန်း(ခေါ်)ကျောက်စိမ်းပန်းများကို ကန့်ဘလူမြို့ပေါ်နှင့် ဒေသအနီးတစ်ဝိုက်ရှိကျေးရွာများမှ တစ်နိုင်တစ်ပိုင်စိုက်ပျိုး ရောင်းချလျက်ရှိသလို နှင်းဆီပန်းများကို မန္တလေးမြို့နှင့် ပြင်ဦးလွင်မြို့မှလည်းမှာယူ၍ သစ္စာပန်းများကို ခင်ဦးမြို့မှမှာယူရောင်းချလျက်ရှိကြောင်းသိရှိရပါသည်။ လူကြိုက်များသော နှင်းဆီပန်းများမှာ ဘုရားပန်းအတွက် သာမကလက် ဆောင်ပေးရာ၌လည်း အဓိကထားအသုံးပြုကြကြောင်း၊ ၂၀၂၅ ခုနှစ်၊ နိုဝင်ဘာလ စတုတ္ထပတ်အတွင်း နှင်းဆီပန်းအကြီး(၁)ပွင့်လျှင် (၅၀၀)ကျပ်၊ အသေး(၁)ပွင့်လျှင်(၃၀၀)ကျပ်နှင့် ဇော်စိမ်းပန်း (ခေါ်)ကျောက်စိမ်းပန်း(၃)ခက်လျှင်(၁၀၀၀)ကျပ်၊ သစ္စာပန်း(၁)စည်းလျှင်(၂၅၀၀)ကျပ်၊ (၃)စည်း လျှင်(၇၀၀၀)ကျပ်ဖြင့် ရောင်းချလျက်ရှိကြောင်း ဘုရားပန်းမျိုးစုံရောင်းဝယ်ရေးလုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

      ပြီးခဲ့သည့် အောက်တိုဘာလမှစ၍ ၂၀၂၅-၂၀၂၆ဘဏ္ဍာနှစ်ကုန်အထိ ပြည်ပသို့ ဆန်တန်ချိန် (၃) သိန်းတင်ပို့ရန်ရှိပြီး ဆန်၊ စပါး တိုးမြှင့်ဝယ်ယူရန် မြန်မာနိုင်ငံဆန်စပါးအသင်းချုပ်က တိုက်တွန်း ထားကြောင်းသိရသည်။ ဆန်၊ စပါး ဝယ်ယူမှုများကို အင်တိုက်အားတိုက် ဆောင်ရွက်ပေးရန်နှင့် ဆောင်ရွက်မှု အခြေအနေများအား မှတ်တမ်းများ ပြုစုထားရှိပြီး အသင်းချုပ်ထံ ပေးပို့တင်ပြရန် ညှိနှိုင်းအသိပေးခြင်းထုတ်ပြန်ချက်တွင် မြန်မာနိုင်ငံဆန်၊စပါးအသင်းချုပ်က ထည့်သွင်း ပြောဆိုထား ကြောင်း သိရသည်။

    လက်ရှိတွင် ၂၀၂၅ ခုနှစ်၊ မိုးစပါးရာသီ၊ ကောက်စောစပါး အနည်းငယ် စတင်ပေါ်ထွက်နေပြီး ဒေသအချို့တွင် စပါး/ဆန် ဝယ်လိုအား ကျဆင်းနေ၍ ဈေးနှုန်းများ ကျဆင်းကာ စပါးစိုက် တောင်သူလယ်သမားများ စိုးရိမ်ပူပန် နေရကာ တောင်သူလယ်သမားများ၏ ဝင်ငွေထိခိုက်နိုင် ကြောင်း သုံးသပ်တင်ပြချက်များ ပေါ်ထွက်နေကြောင်း အသင်းချုပ်က ဆိုသည်။ မြန်မာနိုင်ငံ ဆန်စပါးအသင်းချုပ်သည် ၂၀၂၅-၂၀၂၆ ဘဏ္ဍာနှစ်၊ ဧပြီလမှ ဩဂုတ်လကုန်အထိ တစ်လလျှင် ဆန်တန်ချိန် (၂) သိန်း ပုံမှန်တင်ပို့နေပြီး၊ စက်တင်ဘာလတွင် တန်ချိန် (၂) သိန်း၊ အောက်တိုဘာလမှစ၍ ၂၀၂၆ ခုနှစ်၊ မတ်လအထိ နောက်ပိုင်းလများတွင် တစ်လလျှင် တန်ချိန် (၃) သိန်းစီပြည်ပတင်ပို့နိုင်ရေးဆောင်ရွက်လျက်ရှိကြောင်း သိရသည်။

    ထို့အပြင် ဘင်္ဂလားဒေ့ရှ်နိုင်ငံ၊ တရုတ်နိုင်ငံတို့သို့ တင်ပို့ရောင်းချနိုင်ရေးကိုလည်း ဦးစားပေး ဆောင်ရွက် လျက်ရှိကြောင်း သိရသည်။ နိုင်ငံတကာ ဆန်ဈေးနှုန်းများသည် ကျဆင်းခဲ့သော်လည်း ယခုအချိန် ဖြစ်ပေါ်နေသည့် ဈေးနှုန်းထက် ထပ်မံကျဆင်းရန် မဖြစ်နိုင်တော့ကြောင်း နိုင်ငံတကာ ဈေးကွက် ကျွမ်းကျင်သူများမှ သုံးသပ်ထားကြောင်း သိရသည်။ ထို့ကြောင့် မြန်မာနိုင်ငံဆန်စပါး အသင်းချုပ် အသင်းဝင် ပို့ကုန်ဆောင်ရွက်နေသည့် Exporter ကုမ္ပဏီကြီးများ အနေဖြင့် မိမိတို့၏ ပုံမှန်ဝယ်ယူနေ သောဒေသရှိ နယ်စက်ပိုင်/ နယ်ကုန်သည်များနှင့် ချိတ်ဆက်၍ တောင်သူများထံမှ စပါး/ ဆန် ဝယ်ယူမှုများကို အင်တိုက်အားတိုက် ဆောင်ရွက်ပြီး ဈေးကွက် ဝယ်လိုအားကို မြှင့်တင်ပေးရန်နှင့် ထိုသို့ ဝယ်ယူမှု၊ ဝယ်ယူပြီးစီးမှုအပေါ် သယ်ယူ ပို့ဆောင်မှု၊ ဆန်ကြိတ်ခွဲမှု၊ ပြည်ပတင်ပို့မှု စသည့် ကိစ္စရပ်များအပေါ် ငွေကြေး/ လုပ်ငန်းအခက်အခဲများ ဖြစ်ပေါ်ပါက အသင်းချုပ်သို့ အချိန်နှင့်အညီ ချိတ်ဆက်တင်ပြပေးပါရန် မြန်မာနိုင်ငံ ဆန်၊စပါးအသင်းချုပ်က တိုက်တွန်းထားသည်။

   ထို့ပြင် လုပ်ငန်းဆောင်ရွက်မှု အခြေအနေများကို မှတ်တမ်း ပြုစုထားရှိပေးနိုင်ပါရန် လည်းကောင်း၊ အဆိုပါ စပါး/ ဆန် ဝယ်ယူစု ဆောင်းမှုမှတ်တမ်းကို အသင်းချုပ်၏ export@mef.com.mm သို့ အပတ်စဉ် သောကြာနေ့တိုင်း ပေးပို့ပေးရန်အတွက်လည်းကောင်း အလေးအနက်ထား၍ ပူးပေါင်းဆောင်ရွက်ကြပါရန် မြန်မာနိုင်ငံ ဆန်စပါးအသင်းချုပ်က တိုက်တွန်းထားကြောင်း သိရသည်။

  (DOCA) ဧရာဝတီ

        ကျွန်းလှမြို့ရှိ  ကုန်မျိုးစုံရောင်းဝယ်ရေးဆိုင်များနှင့် ဆီသန့်စက်များတွင် မြေပဲလုံးဆံများကို ဒေသတွင်းထွက်ရှိသည်များနှင့် မန္တလေးမြို့မှ တဆင့် မှာယူရောင်းချလျက်ရှိကြောင်း သိရှိရပါသည်။

      ၂၀၂၅ ခုနှစ်၊ နိုဝင်ဘာလ စတုတ္ထပတ်အတွင်း ကုန်မျိုးစုံဆိုင်များတွင် ရောင်းချနေသော‌ မြေပဲဆံဈေးနှုန်းများမှာ တစ်ပြည့်လျှင်(၁၂၀၀၀)ကျပ်၊ နို့ဆီဘူး (၄)ဘူးလျှင်(၆၀၀၀)ကျပ်နှင့် နို့ဆီ(၁)ဘူးလျှင်(၁၆၀၀)ကျပ် ဈေးနှုန်းတို့ဖြင့်လည်းကောင်း၊ မြေပဲဆီ ဈေးနှုန်းမှာ တစ်ပိဿာလျှင် (၁၉၀၀၀)ကျပ်၊ မြေပဲဆီ(၁၀)ပိဿာ တစ်ပုံးလျှင်(၁၉၀၀၀၀) ကျပ်တို့ဖြင့်လည်းကောင်း၊ မြေပဲပတ်ဈေးနှုန်းမှာ တစ်ပိဿာလျှင်(၄၅၀၀)ကျပ် ဈေးနှုန်းရှိပြီး မြေပဲပေါ်ချိန်ဖြစ်သည့်အတွက် မြေပဲလုံဆံ၊ မြေပဲဆီနှင့် မြေပဲပတ်ဈေးနှုန်း ယခင်အပတ်ထက် အနည်းငယ်ဆက်လက်ကျဆင်းလျက်ရှိကြောင်း မြေပဲပတ်ကို ဒေသတွင်း ဝက်စာ၊ ကြက်စာအပြင် ပိုလျှံသည့်ပဲပတ်များကို  မန္တလေးမြို့သို့ ပို့ဆောင်ရောင်းချလျက်ရှိကြောင်း ဆီစက် လုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)

         ကျွန်းလှမြို့တွင်  ကုန်မျိုးစုံရောင်းဝယ်ရေးဆိုင်များနှင့် မြို့တွင်းရပ်ကွက်ဈေးများတွင် ပဲစိမ်းကြော်ထုတ်များကို ရောင်းချလျက်ရှိကြောင်း သိရှိရပါသည်။

         ၂၀၂၅ ခုနှစ်၊ နိုဝင်ဘာလ စတုတ္ထပတ် ကျွန်းလှမြို့ပေါ်ရပ်ကွက်ဈေးများအတွင်း ကုန်မျိုးစုံရောင်းချသည့်ဆိုင်များတွင် ဖြစ်ပေါ်နေ‌သော ပဲစိမ်းကြော်ထုတ် ဈေးနှုန်းအနေဖြင့် ပဲစိမ်းကြော် တစ်ထုတ်လျှင် (၇၀၀)ကျပ်၊ (၃)ထုတ်လျှင်(၂၀၀၀)ကျပ်၊ (၁၀)ထုတ်လျှင်(၆၈၀၀)ကျပ် နှင့် မြေပဲပွကြော် နိုဆီတစ်ဘူး လျှင်(၇၀၀)ကျပ်၊ တစ်ပြည်လျှင်(၅၃၀၀)ကျပ် ဈေးနှုန်းဖြင့် အရောင်းအဝယ် ဖြစ်လျက်ရှိကြောင်း ပဲစိမ်းကြော်များကို ရေဦးမြို့ နှင့် ပြင်ဦးလွင်မြို့(၂၁)မိုင်တို့နှင့် မြေပဲပွကြော်ကိုတော့ မုံရွာမြို့တို့မှ မှာယူရောင်းချကာ အရောင်းအဝယ်ဖြစ်လျက်ရှိကြောင်း ကျွန်းလှမြို့ ကုန်မျိုးစုံရောင်းချနေသည့် လုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)