ပြည်တွင်းကုန်သွယ်မှုသတင်း

သခွားမွှေး၏ မူရင်းဒေသသည် အိန္ဒိယနိုင်ငံမှဖြစ်ပြီး မြန်မာပြည်အနှံအပြားတွင် စိုက်ပျိုး နိုင်သော သီးနှံမျိုးဖြစ်၍ ရန်ကုန်တိုင်း၊ မန္တလေးတိုင်း၊ ပဲခူးတိုင်းနှင့် ရှမ်းပြည်နယ်တို့တွင် စိုက်ပျိုးကြသည်ကို တွေ့ရှိရသည်။ မြင်းခြံမြို့ရှိ ဈေးကွက်အတွင်း ပြင်ဦးလွင်၊ တံတားဦးမြို့နယ်တို့မှ ထွက်ရှိသည့် သခွားမွှေးများဈေးကွက်တွင် ရောင်းချလျက်ရှိကြောင်းနှင့် လိမ္မော်နီအရောင် သခွားမွှေး တစ်လုံးလျှင် (၁၂၀၀)ကျပ်မှ (၁၅၀၀)ကျပ်ဖြစ်ပြီး လုံးပတ်အကြီး၊ အသေးပေါ်မူတည်၍ ဈေးနှုန်းများ အနည်းငယ် ကွာခြားကြောင်း သိရှိရသည်။

သခွားမွှေးသီးသည် အာဟာရဓာတ်ကြွယ်ဝပြီး ကျန်းမာရေးအတွက် အကျိုးကျေးဇူးများစွာ ရှိသော သစ်သီးတစ်မျိုးဖြစ်ပြီး သခွားမွှေးတွင်ပါဝင်သော ဗီတာမင်အေသည် အမြင်အာရုံကို ကောင်းမွန်စေခြင်း၊ ကိုယ်ခံအားစနစ်ကို ကောင်းမွန်စေသဖြင့် ကူးစက်ရောဂါကိုကာကွယ် နိုင်စွမ်းရှိခြင်း၊ ဗီတာမင်စီ ကြွယ်ဝစွာပါဝင်သဖြင့် သွားဖုံးသွေးယိုခြင်းများကို ကာကွယ်နိုင်စွမ်းရှိခြင်း၊ ပိုတက်စီယမ်နှင့် အခြားသတ္ထုဓာတ်များပါဝင်သဖြင့် သွေးဖိအားကို ထိန်းချုပ်ပေးနိုင်စွမ်းနှင့် သွေးတိုးကိုလျှော့ချပေးကာ သွေး လှည့်ပတ်မှုကို ကောင်းမွန်စေကြောင်း သိရှိရပါသည်။

DOCA(မန္တလေး) 

          မြင်းခြံမြို့နယ်အတွင်း စံပြဈေးနှင့်အေးမြသီတာဈေးပွဲရုံများတွင် ယခုဆောင်းနှောင်းပိုင်း ကာလ၌ မန်ကျည်းသီးအမှည့်အသစ်များ စတင်ထွက်ပေါ်၍ ဈေးကွက်တွင် ရောင်းချလျက်ရှိပါသည်။ မန်ကျည်းသီးမှည့်များသည် ဆောင်းနှောင်းပိုင်းကာလနှင့် နွေအကူးကာလများဖြစ်သော ဇန်နဝါရီလ၊ ဖေဖော်ဝါရီလနှင့်မတ်လတို့တွင် ထွက်ပေါ်လေ့ရှိကြောင်းနှင့် မန်ကျည်းပင် (၅)ပင်ရှိသော ခြံတစ်ခြံ တွင် တစ်နှစ်လျှင် မန်ကျည်းသီးမှည့်(အတောင့်) တင်း(၅၀)ခန့် ထွက်ရှိကြောင်းသိရှိရသည်။

ယခုဖေဖော်ဝါရီလတွင် အစေ့ထုတ်ပြီးမန်ကျည်းမှည့်တစ်ပိဿာလျှင် လက်ကားဈေး (၁၀၀၀၀) ကျပ်၊ လက်လီဈေး (၁၂၀၀၀)ကျပ်ဖြင့် ရောင်းဝယ်လျက်ရှိပြီး  ယခင်လနှင့်နှိုင်းယှဉ်ပါက ဇန်နဝါရီလအတွင်း အစေ့မဲ့မန်ကျည်းမှည့် လက်လီတစ်ပိဿာလျှင် (၁၃၀၀၀)ကျပ်၊ လက်ကား တစ်ပိဿာလျှင် (၁၁၀၀၀)ကျပ်ဖြင့် အရောင်းအဝယ်များ ဖြစ်ခဲ့ကြောင်းနှင့် ယခုလတွင် မန်ကျည်း အသားတစ်ပိဿာလျှင် (၁၀၀၀)ကျပ်ခန့် ဈေးနှုန်းလျော့နည်းခဲ့ကြောင်း သိရှိရသည်။ ဈေးကွက် ဝင်ရောက်မှုအနေဖြင့် မြင်းခြံမြို့နယ်အတွင်းကျေးရွာများမှ အနည်းငယ်သာထွက်ရှိပြီး အဓိက ဝင်ရောက်မှုမှာ ကျောက်ပန်းတောင်း၊ ပခုက္ကူမြို့တို့မှ အများဆုံးဝင်ရောက်ကြောင်း သိရှိရသည်။ မန်ကျည်းသားအထူအပါး၊ အစိုအခြောက်ပေါ်မူတည်၍ ဈေးနှုန်းများ ကွာခြားကြောင်း မန်ကျည်း ကုန်သည်တစ်ဦးထံမှသိရှိရသည်။

ကျန်းမာရေးအကျိုးကျေးဇူးများအနေဖြင့် မန်ကျည်းသီးမှည့်သည် အမျှင်ဓာတ်ကြွယ်ဝ၍ အစာခြေစနစ်ကို ကောင်းမွန်စေပြီး သံဓာတ်ဖြည့်တင်းပေးခြင်း၊ သွေးလည်ပတ်မှု ကောင်းမွန်စေပြီး ဆီးချိုရောဂါသည်များအတွက် သင့်တော်ပြီး အာရုံကြောစနစ်ကို ထောက်ပံ့ပေးကြောင်း သိရှိရပြီး ကျန်းမာရေးနှင့် ဟင်းလျာပြုလုပ်ရာတွင် အသုံးဝင်သည့် မန်ကျည်းသီးမှည့်ကို ရာသီကာလအတွင်း စနစ်တကျစားသုံးသင့်ပါသည်။

DOCA(မန္တလေး)       

           ပြည်မြို့ရှိ ချင်းပွဲရုံများသို့ ချင်းဝင်ရောက်မှုမှာ ပုံမှန်ဝင်ရောက်လျက်ရှိပြီး ထမနဲထိုးသည့် ရာသီဖြစ်သည့်အတွက် နယ်ဝယ်လက်အဝယ်ရှိကြောင်း သိရပါသည်။ ဒေသတွင်း ချင်းရောင်း ဝယ်ရေးသမားတို့ကလည်း အရောင်းအဝယ်ဖြစ်နေသောကြောင့် ပြည်ချင်းပွဲရုံများတွင် အရောင်းအဝယ်ပြန်ဖြစ်လာတာသိရပါသည်။ ယခုအပတ်ဖြစ်သော ဖေဖော်ဝါရီ တတိယပတ်တွင်ချင်းတစ် ပိဿာလျှင် ပွဲရုံဈေး ၃၀၀၀-၄၅၀၀ကျပ်ဖြစ်ပြီး လက်လီဈေးမှာ တစ်ပိဿာလျှင် ၅၀၀၀-၇၀၀၀ကျပ် တို့ဖြင့်ရောင်းချလျက်ရှိပါသည်။ ယခင်နှစ် ဖြစ်သော ၂၀၂၄ ခုနှစ် ဖေဖော်ဝါရီလတွင် တစ်ပိဿာလျှင် ၆၀၀၀ကျပ်ဖြင့် ရောင်းချခဲ့၍ ယခုနှစ်တွင် ဈေးအနည်းငယ်မြင့်တက်လာခဲ့ကြောင်း သိရှီရပါသည်။

DOCA(ပဲခူး)

          ပြည်ခရိုင်၊ ပြည်မြို့နယ် ဟင်းသီးဟင်းရွက်ဈေးကွက်တွင် သခွားသီးများ လှိုင်လှိုင် ပေါ်နေပြီ ဖြစ်ပါသည်။ ပြည်မြို့နယ်အတွင်းရှိဈေးကွက်အတွင်းသို့ မှော်ဇာကျေးရွာ၊ တောင်လုံးညို ကျေးရွာများမှ သခွားသီးများလာရောက်ရောင်းချကြပါသည်။ ပြည်ခရိုင်အတွင်းရှိ ပုတီးကုန်းမြို့၊ ဝက်ပုတ်မြို့၊ အင်းမမြို့၊ ရွှေတောင်မြို့နယ်များမှလည်း ဟင်းသီးဟင်းရွက်ကုန်စိမ်းဒိုင်များသို့ တင်ပို့ရောင်းချကြပြီး ထိုမှတဆင့် ရန်ကုန် သီရိမင်္ဂလာကုန်စိမ်းဈေး၊ ဒညင်းကုန်းဈေးများသို့ တင်ပို့ရောင်းချကြပါသည်။ ဈေးကွက်အတွင်းရောင်းချလျက် ရှိသော သခွားသီးဈေးနှုန်းများမှာ သုပ်၍စားရသော သခွားသီးအကြီးတစ်လုံးလျှင် ၁၀၀၀-၈၀၀ကျပ် တို့စားသောသခွားသီး အသေးတစ်လုံးလျှင် ၂၀၀-၁၅၀ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

              ပဲခူးတိုင်းဒေသကြီး၊ ပြည်ခရိုင်၊ ပုတီးကုန်းမြို့နယ်ရှိ ကျေးရွာများတွင် စားဖိုဆောင်သီးနှံ ဖြစ်သော ခရမ်းချဉ်သီးကို မိသားစုအပိုဝင်ငွေရရှိအောင် တစ်ပိုင်တစ်နိုင်စိုက်ပျိုးလျက် ရှိပါသည်။

        ခရမ်းချဉ်သီးသည် ဒေသမရွေး စိုက်ပျိုးနိုင်သော သီးနှံတစ်မျိုးဖြစ်ပါသည်။ ခရမ်းချဉ်သီးသည် ခန္တာကိုယ်အတွက် များစွာအကျိုးရှိသော သီးနှံတစ်မျိုးဖြစ်သောကြောင့် အရောင်းသွက်လှပါသည်။ ခရမ်းချဉ်သီးကို ဟင်းချက်ရာတွင် အနှစ်များရအောင် ထည့်၍ချက်ကြသလို အခြားသီးနှံနှင့်အတူ ရော၍ ချက်ပြုတ်စားသုံးကြသလို အကြော်စုံများနှင့်လည်းရော၍ သုတ်စားကြပါသည်။ ခရမ်းချဉ်သီး ကို စားသုံးပါက အသားအရေ လှပစေသည့်အပြင် ဗီတာမင် အေ၊ ဘီ၊ စီ၊ ဒီ၊  ကေတို့များစွာ ပါဝင်ပါ သည်။ ခရမ်းချဉ်သီးစားသုံးခြင်းဖြင့် နှလုံးကျန်းမာရေးကိုလည်း ကောင်းမွန်စေပါသည်။

           ပြည်ဈေးကွက်မှာတော့ ရှမ်းခရမ်းချဉ်သီးများဈေးကောင်းရနေကြောင်း သိရသည်။ ရှမ်းသီး နှင့် ကိုင်းသီးဟူ၍ (၂)မျိုးရှိရာ ဈေးကွက်တွင် ရှမ်းသီးများသာ အရောင်းအဝယ်ဖြစ်နေကြကြောင်းသိရှိရပါသည်။

DOCA(ပဲခူး)