၉.၅.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် စပါးစိုက်ဧကနည်းပြီး ဆန်လိုဒေသဖြစ်သောကြောင့် အခြားတိုင်းဒေသများနှင့် မြို့နယ်များမှ ဆန်တင်သွင်းရသောမြို့ဖြစ်ပါသည်။ ဧရာဝတီတိုင်းဒေသကြီး ပုသိမ်၊ မြောင်းမြမြို့များမှ ရေလမ်းကြောင်းမှအများဆုံးဝင်ရောက်ပြီး ရွှေဘို ခရိုင်၊ ဆင်ဖြူကျွန်း၊ စလင်းဒေသများမှလည်း နေ့စဉ်ဝင်ရောက်လျက်ရှိပါသည်။
ယခုအချိန်တွင် ပခုက္ကူဒေသ၌ ဆန်အသစ်များ ဝင်ရောက်လျက်ရှိပြီး ဧပြီလ(စတုတ္ထပတ်) တွင် ဖြစ်ပေါ်ခဲ့သော ဈေးနှုန်းများသည် ယခု မေလ (ပထမပတ်)တွင် ဈေးအနည်းငယ်တက်လာသည်ကို တွေ့ရှိရပါသည်။ အများသုံးဆန်ဖြစ်သော မြောင်းမြ ဧရာပဒေသာ ဆန်ဈေးနှုန်းမှာ တစ်အိတ်လျှင် ကျပ်(၁၄၂၀၀၀)၊ စလင်းမြို့နယ်၊ ရှောက်တောမှလာသော ဧရာပဒေသာဆန်(အသစ်)တစ်အိတ်လျှင် ကျပ်(၁၆၂၀၀၀) ရှိပါသည်။ ဧည့်မထ ဆန်မျိုးဖြစ်သော ချန်ဧရာ တစ်အိတ်လျှင် ကျပ်(၁၁၀၀၀၀)၊ မနောဖြူ (အသစ်)တစ်အိတ်လျှင် ကျပ်(၁၁၀၀၀၀)၊ နေလဆန် တစ်အိတ်လျှင် ကျပ်(၉၅၀၀၀)၊ ဝန်ကြီးပဒေသာဆန် တစ်အိတ်လျှင် ကျပ်(၁၆၅၀၀၀)၊ ဧရာမင်းဆန်(ရှယ်)တစ်အိတ်လျှင် ကျပ် (၁၁၃၀၀၀)၊ မနောသုခ(အသစ်) တစ်အိတ်လျှင် ကျပ်(၁၁၀၀၀၀)၊ ချန်သုခ(အသစ်) တစ်အိတ်လျှင် ကျပ်(၈၉၀၀၀)၊ နေလ ဧရာပဒေသာဆန်(ရှယ်) တစ်အိတ်လျှင် ကျပ်(၁၆၂၀၀၀)၊ နေလ/၂၂ တစ် အိတ်လျှင် ကျပ်(၁၀၀၀၀၀)၊ မိုးဇလပ် (နွေဆန်အသစ်) တစ်အိတ်လျှင် ကျပ်(၇၅၀၀၀) ၊ နွေဇလပ် (အသစ်)တစ်အိတ်လျှင် ကျပ်(၇၂၀၀၀)၊ ဇီယာဆန်(အသစ်) တစ်အိတ်လျှင် ကျပ်(၉၅၀၀၀)၊ ပွင့်ဖြူသစ် (မနောဖြူအသစ်)တစ်အိတ်လျှင် ကျပ်(၁၀၅၀၀၀)၊ အောင်သုခ (အသစ်) ကျပ်(၉၅၀၀၀) ဈေး ဖြင့် အသီးသီးအရောင်းအဝယ်ဖြစ်လျက်ရှိပြီး ကောက်ညှင်းဆန်(အသစ်)မှာ မေလ(ပထမပတ်)တွင် တစ်အိတ်လျှင် ကျပ်(၉၀၀၀၀)ဖြင့် ဈေးကျသွားသည်ကို သိရှိရပါသည်။ ဧရာဝတီဘက်မှ ဝင်ရောက်လာသောဆန်များမှာ အရည်အသွေးအနည်းငယ်နိမ့်သော်လည်း ပြည်သူများစားသုံးနိုင်သော ဈေးနှုန်းရှိသောကြောင့် အရောင်းအဝယ်ပိုဖြစ်ကြောင်း သိရှိရပါသည်။
ပေါ်ဆန်းမွှေးမှာ ဒုတိယအများဆုံး စားသုံးသော ဆန်ဖြစ်ပြီး မြောင်းမြဒေသမှ ဝင်ရောက်သလို ရွှေဘိုဒေသမှလည်း အများဆုံးဝင်ရောက်ပါသည်။ ရွှေဘိုပေါ်ဆန်းမွှေးမှာ ပိုမိုအရည်အသွေးကောင်း မွန်ပြီး မေလ(ပထမပတ်)တွင် (ရှယ်)တစ်အိတ်လျှင် ကျပ်(၁၆၅၀၀၀-၁၇၀၀၀၀)၊ ရွှေထိုက် (ပေါ်ဆန်းအသစ်)တစ်အိတ်လျှင် ကျပ်(၁၆၀၀၀၀)၊ တိုးတိုးနွယ် တစ်အိတ်လျှင် ကျပ်(၁၆၅၀၀၀-၁၇၀၀၀၀)၊ မြောင်းမြပေါ်ဆန်းမှာ တစ်အိတ်လျှင် ကျပ်(၁၅၅၀၀၀)နှင့် အရောင်းအဝယ်ဖြစ်နေကြောင်း ဆန်ရောင်းဝယ်ရေးလုပ်ငန်းရှင်ထံမှ သိရှိရပါသည် ။
DOCA(မကွေး)
၂၀၂၄ ခုနှစ်၊ မေလ ဒုတိယပတ်တွင် ကရင်ပြည်နယ် ဘားအံမြို့ ရေပေါ်စံပြဈေးသို့ မကျည်းမှည့်အသစ်များ ဝင်ရောက်လျက်ရှိပြီး မကျည်းမှည့် အသစ်တစ်ပိဿာလျှင် (၆၅၀၀)ကျပ် ၊မကျည်းမှည့်အဟောင်း ၁ ပိဿာလျှင်(၃၅၀၀) ကျပ်၊ နှင့် အရောင်းအဝယ်ဖြစ်လျက်ရှိပြီး အဟောင်းနှင့်အသစ် ၁ ပိဿာလျှင် ၃၅၀၀ ကျပ်ခန့်တို့ဖြင့် အရောင်းအဝယ်ဖြစ်လျက်ရှိနေကြောင်း သိရှိရပါသည်။
DOCA(ကရင်)
၂၀၂၄ ခုနှစ်၊ မေလ ဒုတိယပတ်တွင် နွေရာသီစာ ဟင်းရွက်ဖြစ်သည့် ကရင်ပြည်နယ် ဒေသထွက်မကျည်းရွက်နုများ ဈေးကောင်းရလျက်ရှိနေကြောင်း သတင်းရရှိသည်။
မကျည်းပင်သည် အသီး၊ အရွက်၊ အခေါက်စသည်ဖြင့် တစ်ပင်လုံးအသုံးဝင်ပြီး ယခုလို နွေရာသီတွင် မကျည်းရွက်နုများကို အသုပ်သုပ်၍ဖြစ်စေ၊ ဟင်းရည်ချက်၍ဖြစ်စေ၊ စားသုံးပေးပါက ခံတွင်းတွေ့ပြီး ထမင်းမြိန်စေကာ စားလို့ကောင်းရုံတာမက ကျန်းမာရေးကိုလည်းအထောက်အကူပြုပေးနိုင်ပါသည်။ မကျည်းရွက်နုကို တစ်ပိဿာ လက်ကား (၅၀၀၀)ကျပ်၊ လက်လီ (၁၀)သား (၆၀၀)ကျပ်တို့ဖြင့် အရောင်းအဝယ်ဖြစ်လျက်ရှိနေကြောင်း သိရှိရပါသည်။
DOCA(ကရင်)
မြန်မာနိုင်ငံ စက်သုံးဆီတင်သွင်း/သိုလှောင်/ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေဖြင့် တိုင်းဒေသကြီး/ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကား ဈေးနှုန်းတို့ကို နေ့စဉ် ထုတ်ပြန်ပေးလျက်ရှိပါသည်။
ကရင်ပြည်နယ် ဘားအံမြို့ပေါ်တွင် စက်သုံးဆီဆိုင် (၇)ဆိုင် ဖွင့်လှစ်ရောင်းချလျက်ရှိပြီး ဧပြီလစတုတ္ထပတ်တွင် ဖြစ်ပေါ်နေသော စက်သုံးဆီဈေးနှုန်းများမှာ ဓာတ်ဆီ(95) တစ်လီတာလျှင် (၃၀၀၀)ကျပ်၊ (92) တစ်လီတာလျှင်(၂၈၉၀)ကျပ်၊ ဒီဇယ်(ရိုးရိုး)တစ်လီတာလျှင် (၂၄၅၅)ကျပ်၊ ဒီဇယ်(ပရီမီယမ်)တစ်လီတာလျှင် (၂၅၁၅) ကျပ်တို့ဖြစ် သက်မှတ်ရည်ညွှန်းဈေးနှုန်းအတိုင်း ရောင်းချခဲ့ကြောင်း သိရသည်။ သုံးစွဲသူမိဘပြည်သူများအနေဖြင့် စက်သုံးဆီများဝယ်ယူသုံးစွဲရာတွင် ကျေနပ်မှုမရှိပါက စက်သုံးဆီတင်သွင်သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီ (၀၆၇-၄၁၁၃၇၃၊ ၀၆၇-၄၁၁၂၈၂၊ ၀၉-၂၅၄၆၂၅၄၇၇၊ ၀၉ - ၇၇၅၂၉၃၆၃၂ ) ဖုန်းနံပါတ်များသို့ လုံခြုံစိတ်ချစွာဖြင့်သတင်းပေးတိုင်ကြားနိုင်ပါကြောင်း သတင်းရရှိသည်။
DOCA(ကရင်)
ကရင်ပြည်နယ်၊ ဘားအံမြို့ ရေပေါ်စံပြဈေးတွင် ကြက်ဥ၊ ဘဲဥ၊ ဆေးဘဲဥ၊ ဆားဘဲဥနှင့်ငုံးဥများ အရောင်းအဝယ်သွက်လျက်ရှိကြောင်း သိရသည်။ ကြက်ဥ၊ ဘဲဥ၊ ဆေးဘဲဥ၊ ဆားဘဲဥနှင့် ငုံးဥများ ရောင်းဝယ်ရာတွင် အရွယ်အစားလိုက်၍ ဈေးနှုန်းအမျိုးမျိုးရှိပြီး ကြက်ဥ အလုံးကြီးတစ်လုံးလျှင် (၃၃၀)ကျပ်၊ ကြက်ဥ အလုံးလတ်တစ်လုံးလျှင် (၃၀၀) ကျပ်၊ ကြက်ဥအလုံး သေးတစ်လုံးလျှင် (၂၈၀) ကျပ်၊ ဘဲဥအလုံးကြီးတစ်လုံးလျှင် (၄၀၀) ကျပ်၊ ဘဲဥအလုံးသေး တစ်လုံးလျှင် (၃၈၀) ကျပ်၊ ဆေးဘဲဥ တစ်လုံးလျှင် (၅၀၀၊၇၀၀) ကျပ်၊ ဆားဘဲဥတစ်လုံးလျှင် (၅၀၀) ကျပ်၊ ငုံးဥ (၁၂) လုံးလျှင် (၁၀၀၀) ကျပ်တို့ဖြစ် အရောင်းအဝယ်ဖြစ်လျက်ရှိသည်။
ယခုကာလနွေရာသီတွင် ရာသီဥတုပူပြင်း၍ ကြက်မွေးမြူရေးခြံများတွင် ကြက်အသေ အပျောက်များခဲ့ကာ ဥနှုန်းကျဆင်းခဲ့ပြီး ဈေးကွက်လိုအပ်ချက်အရ ဈေးကွက်ဝင်ရောက်မှု လျော့နည်း ခဲ့ကာ ယခင်လနှင့် ယခုလနှိုင်းယှဉ်ပါက ကြက်ဥဈေးနှုန်း တစ်လုံးလျှင် ပျမ်းမျှ ၂၅ ကျပ်ခန့် ဈေးနှုန်းအနည်းငယ်မြင့်တက်ခဲ့ကြောင်း သိရသည်။
DOCA(ကရင်)
မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်သို့ ဒေသတွင်းကြက်သွန်နီ စိုက်ပျိုးထွက်ရှိရာ ဒေသများဖြစ်သော ကပိုင်၊ ကန်တွင်း၊ ရေပုပ်၊ လိပ်ခြံ၊ ချတောက်ရွာသစ်၊ ကူရှည်ရွာမ၊ အလယ်စုကျေးရွာများနှင့် ပွင့်ဖြူ၊ စလင်းနှင့် ပခုက္ကူနယ်ဒေသများမှ ကုန်စည်အများဆုံးဝင်ရောက်လျက်ရှိပြီး မတ်လ(ပထမပတ်)တွင် တစ်ရက်လျှင် ကြက်သွန်နီပိဿာ (၁)သိန်းခွဲမှ ပိဿာ(၂)သိန်းထိ တစ်ပတ်အတွင်း ကုန်ချိန်(၈၀၀၀၀၀)ခန့်ဝင်ရောက်ကြောင်း၊ ပင်စိုက်နွေကြက်သွန်နီများမှာ ပြည်ပအဝယ်လိုက်၍ ဈေးကွက်သို့ ဝင်ရောက်မှုများကြောင်း ဈေးကွက်မှသိရှိရပါသည်။
ဈေးနှုန်းအနေဖြင့် ၂၀၂၄ခုနှစ်၊ မေလ(ပထမပတ်)တွင် ကြက်သွန်နီ ထိပ်စတစ်ပိဿာလျှင် ကျပ် (၂၁၀၀-၂၀၀၀)ဈေးနှုန်းဖြင့် အရောင်းအဝယ်ဖြစ်ခဲ့ပြီး အလတ်စတစ်ပိဿာလျှင် ကျပ်(၁၈၀၀-၁၇၀၀)၊ အသေးစတစ်ပိဿာလျှင် ကျပ်(၁၆၅၀-၁၆၀၀)ဖြစ်ကြောင်း၊ ယခင်ဧပြီလ (စတုတ္ထပတ်) နှင့်နှိုင်းယှဉ်လျှင် ဈေးနှုန်းအတက်အကျမရှိဘဲ ဈေးငြိမ်ပြီး အရောင်းအဝယ်ဖြစ်လျက်ရှိကြောင်းသိရှိရပါသည်။
ကုန်စည်စီးဆင်းမှုအနေဖြင့် ကြက်သွန်နီကုန်စည်စီးဆင်းမှုအနေဖြင့် ရန်ကုန်တိုင်းဒေသကြီး၊ ဘုရင့်နောင်ပွဲရုံသို့ ကုန်ချိန်ပိဿာ (၄၀၀၀၀၀)၊ မြဝတီမြို့သို့ ကုန်ချိန်ပိဿာ (၃၀၀၀၀၀)၊ ပြည်မြို့သို့ ကုန်ချိန်ပိဿာ (၅၀၀၀၀)၊ ပုသိမ်မြို့သို့ ကုန်ချိန်ပိဿာ (၅၀၀၀၀)၊ စုစုပေါင်းကုန်ချိန်ပိဿာ (၈၀၀၀၀၀)၊ တန်ချိန်အားဖြင့် (၁၃၀၆)ခန့်စီးဆင်းကြောင်း၊ ပြည်ပပို့ကုန်အဖြစ် ဆိပ်ဖြူကြက်သွန်နီများကို မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယမ်နမ်နိုင်ငံများသို့ နေ့စဉ်တင်ပို့လျက်ရှိကြောင်း ကုန်စည်ဒိုင်ဈေးကွက်မှသိရှိရပါသည်။
DOCA(မကွေး)
မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်၊ ဧရာဝတီမြစ်ရိုးတလျှောက်ရှိ ကျေးရွာများ၌ ကိုင်းကျွန်းမြေနုများတွင် စိုက်ပျိုးသည့် မိုးကြက်သွန်နီ စိုက်ခင်းကျွတ်များတွင် ဆောင်းသီးနှံကုလားပဲ သီးထပ်စိုက်ပျိုးခြင်းဖြင့် အကျိုးအမြတ်ရရှိနေကြောင်းသိရှိရသည်။
ဆိပ်ဖြူမြို့နယ်အတွင်းရှိ ကျေးလက်နေ ဒေသခံတောင်သူများသည် ကြက်သွန်နီအပြင် ကုလားပဲသီးနှံကို ဒုတိယအများဆုံး ဒေသစီးပွားဖြစ်စိုက်ပျိုးကြကြောင်း၊ ယခုနှစ်များစွာက ကုလားပဲကို ဆောင်းတစ်ရာသီလျှင် တစ်ကြိမ်သာစိုက်ပျိုးကြောင်း၊ ပြီးခဲ့သည့်နှစ်မှစ၍ ကြက်သွန်နီခင်းကျွတ်များတွင် စတင်စိုက်ပျိုးလာပြီး ယခုနှစ်တွင် စိုက်ပျိုးမှု ပိုမိုများလာကြောင်းသိရှိရပါသည်။
ဆောင်းသီနှံ ကုလားပဲသီးထပ်စိုက်ပျိုးမှုကို ဒီဇင်ဘာလ၊ ဇန်နဝါရီလများတွင် မိုးကြက်သွန်နီစိုက်ခင်းများမတူးဖော်ခင် ရက်(၂၀)ခန့်အလိုတွင် ကြက်သွန်ခင်းမြောင်းကြား၌ တန်းကြား(၁)ပေ၊ ပင်ကြား(၅)လက်မအကွာဖြင့် မျိုးစေ့များကိုစူးထိုးပြီး အစေ့ချစိုက်ပျိုးကြောင်း၊ မတ်လကုန် ဧပြီလ လဆန်းပိုင်းတွင် သီးနှံများလှိုင်လှိုင်ရိတ်သိမ်းကြောင်း၊ တစ်ဧကလျှင် မျိုးစေ့(၂)တင်းခန့်ကုန်ကျကြောင်း၊ ယခုနှစ်တွင် ကုလားပဲသီးထပ်စိုက်ပျိုးမှုဧက (၇၀၀)ခန့်ရှိကြောင်း၊ ယခင်နှစ်တွင် စိုက်ဧက (၅၀၀)ခန့်သာစိုက်ပျိုးကြောင်း၊ ကုလားပဲသီးနှံသည် စိုက်ပျိုးရလွယ်ကူ၍ ကုန်ကျစရိတ်နည်းပြီး အကျိုးအမြတ်များစွာရရှိခြင်းကြောင့် ယခုနှစ်တွင် သီးထပ်စိုက်ပျိုးမှုကိုတိုးချဲ့စိုက်ပျိုးလာကြောင်း ဒေသခံတောင်သူများထံမှသိရှိရပါသည်။
စိုက်ပျိုးထွက်ရှိမှုအနေဖြင့် ကုလားပဲသီးနှံသည် ကောင်းကင်ကျမိုးရေကို နှစ်သက်ခြင်းမရှိဘဲ မြေအောက်ရေကိုသာ ကြိုက်နှစ်သက်ခြင်းကြောင့် ယခုနှစ် သီးနှံစိုက်ပျိုးပြီး အပွင့်လိုက်ချိန်တွင် ရာသီဥတုကင်းစင်ပြီး မိုးရွာသွန်းခြင်းမရှိ၍ ကုလားပဲတစ်ဧကလျှင် (၂၂)တင်းခန့်ထွက်ရှိ၍ အထွက်နှုန်းကောင်းကြောင်း၊ ဈေးကွက်အနေဖြင့် သီးနှံပေါ်ချိန် ဧပြီလဆန်းပိုင်းတွင် ကုလားပဲများ ဈေးကွက်သို့ လှိုင်လှိုင်ဝင်ရောက်လျက်ရှိကြောင်း၊ ပြည်ပဝယ်လိုအားနည်း၍ ပဲဈေးကွက်အနည်းငယ်ကျဆင်းပြီး တစ်တင်းလျှင် ကျပ်(၈၀၀၀၀) ပေါက်ဈေးရှိ၍ တစ်ဧကလျှင် ကျပ်(၁၇၆၀၀၀၀)ဝင်ငွေရရှိပြီး ကုန်ကျစရိတ်အနေဖြင့် သွန်းအားစုအမျိုးမျိုးထည့်သွင်းစိုက်ပျိုးထားရှိသော မိုးကြက်သွန်နီစိုက်ခင်းသစ်များတွင် သီးထပ်အဖြစ် ထပ်မံစိုက်ပျိုးခြင်းအပြင် မြေပြုပြင်စရိတ်နည်းခြင်းကြောင့် ကုန်ကျစရိတ်လျော့နည်း၍ တစ်ဧကလျှင် ကျပ်(၄၀၀၀၀၀)ခန့်ကုန်ကျပြီး အကျိုးအမြတ်အနေဖြင့် ကျပ်(၁၃၆၀၀၀၀)ခန့်ရရှိကြောင်း၊ တောင်သူတစ်ဦးလျှင် (၀.၅)ဧကမှ (၃)ဧကထိစိုက်ပျိုးကြောင်း၊ စိုက်ပျိုးမှုဧကများလျှင် များသည့်အတိုင်း အကျိုးအမြတ်ပိုမိုရရှိကြောင်း၊ ဆိပ်ဖြူမြို့မှထွက်ရှိသည့် ကုလားပဲများကို မြို့ပေါ်ရှိ ပဲပွဲရုံများနှင့် ချောက်မြို့ပေါ်ရှိ အေဝမ်းပွဲရုံသို့ ရောင်းချလျက်ရှိကြောင်း၊ ယခုအချိန်တွင် ကုလားပဲသီးနှံမှာ ပြည်တွင်းစားသုံးမှုပိုမိုမြင့်မားလျက်ရှိပြီး ပြည်ပဝယ်လိုအားလည်းကောင်း၍ ဈေးကွက်ခိုင်မာမှုရှိခြင်းတို့ကြောင့် တောင်သူများအနေဖြင့် ယင်းသီးနှံကို နှစ်စဉ်မပြတ်တိုးချဲ့စိုက်ပျိုးလျက်ရှိကြောင်းသိရှိရပါသည်။
DOCA(မကွေး)
မွန်ပြည်နယ်၊ ကျိုက်မရောမြို့နယ်မှ ထွက်ရှိသည့် ရာသီပေါ်ကြက်မောက်သီးများ ဈေးကောင်းရရှိနေကြောင်း ကြက်မောက်သီး စိုက်ပျိုးရောင်းချသူများထံမှ သိရသည်။ လက်ရှိတွင် မွန်ပြည်နယ်၊ ကျိုက်မရောမြို့နယ်မှ ထွက်ရှိသည့် အစေ့ကျွတ် ကြက်မောက်သီး အလုံးရေ ၁၀၀ လျှင် ငွေကျပ် ၁၅၀၀၀ မှ ၃၀၀၀၀ ဝန်းကျင်အထိရရှိနေကြောင်း သိရသည်။ အဆိုပါ ကြက်မောက်သီးများကို ပဲခူးတိုင်း၊ ရန်ကုန်တိုင်းနှင့် အခြားဒေသများတို့ တင်ပို့ရောင်းချလျက်ရှိကြောင်း သိရသည်။
ကြက်မောက်သီးသည် ကျန်းမာရေးနှင့်ညီညွတ်သော အသီးဖြစ်ပြီး သရေစာအဖြစ် စားသုံးသင့်သော အသီးတစ်မျိုးဖြစ်ပါသည်။ ကြက်မောက်ပင်သည် စိုက်ပျိုးပြီး ခြောက်နှစ်ခန့်တွင် အသီးစသီးပြီး နှစ်ပေါင်း ၅၀ အထိ သက်တမ်းရှည်ကာ တစ်နှစ်ထက်တစ်နှစ်အသီး ပိုသီးလေ့ရှိကြောင်း၊ အများအားဖြင့် အသီးထွက်ရှိချိန်မှာ မေနှင့်ဇွန်လတို့ဖြစ်ကြောင်း သိရသည်။
DOCA(မွန်)
မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ပေါ်တွင် စားသုံးဆီလက်လီလက်ကား အရောင်းဆိုင်(၁၅)ဆိုင်ရှိပြီး နေ့စဉ်အရောင်းအဝယ်ဖြစ်လျက်ရှိသည်။၂၀၂၄ခုနှစ်၊ မေလ(ပထမပတ်) တွင် စားသုံးဆီဈေးနှုန်း အနည်းငယ်မြင့်တက်၍ အရောင်းအဝယ်ဖြစ်လျက်ရှိသည်။ ဆုံပဲဆီသန့် တစ် ပိဿာလျှင် ကျပ်(၁၇၀၀၀)၊ စက်ပဲဆီတစ်ပိဿာလျှင် ကျပ်(၁၆၀၀၀)၊ ပဲစက်ကျဆီတစ်ပိဿာလျှင် ကျပ်(၁၂၀၀၀)၊ ပဲရောဆီတစ်ပိဿာလျှင် ကျပ်(၁၁၀၀၀မှ ၉၅၀၀)၊ နှမ်းဆီတစ်ပိဿာလျှင် ကျပ် (၁၆၀၀၀)၊ နှမ်းရောဆီတစ်ပိဿာလျှင် ကျပ်(၈၀၀၀-၉၅၀၀-၁၂၀၀၀) ဈေးနှုန်းဖြင့် အရောင်းအဝယ် ဖြစ်နေကြောင်းသိရှိရပါသည်။
ယခင် ဧပြီလ(ပထမပတ်)ဈေးနှုန်းနှင့်နှိုင်းယှဉ်ပါက မြေပဲ/နှမ်းဆီဈေးနှုန်းများမှာ တစ်ပိဿာ လျှင် ကျပ်(၁၀၀၀)ခန့်၊ ပဲရော၊ နှမ်းရောဆီဈေးနှုန်းမှာ တစ်ပိဿာလျှင် ကျပ်(၅၀၀)ခန့် ဈေးနှုန်းမြင့် တက် အရောင်းအဝယ်ဖြစ်လျက်ရှိကြောင်း၊ စားအုန်းဆီများကို သတ်မှတ်ရည်ညွှန်း ဈေးနှုန်းဖြင့် ရောင်းချလျက်ရှိကြောင်း မြို့ပေါ်ရှိ စားသုံးဆီအရောင်းဆိုင်များမှ သိရှိရပါသည်။
DOCA(မကွေး)
