ပြည်တွင်းကုန်သွယ်မှုသတင်း

     ကျောက်ပန်းတောင်း၊ရမည်းသင်း၊မြင်းခြံမြို့များမှ ထွက်ရှိသောမန်ကျည်းသီးများသည် ယခုအချိန်တွင်မန်ကျည်းသီးအစိမ်းအဆင့်မှ ကြက်ဆူအဆင့်သို့ ရောက်ရှိချိန်ဖြစ်ပါသည်။ မတ်လပိုင်းလောက်တွင် မန်ကျည်းသီးမှည့် အသစ်များ ထွက်ပေါ်လာတော့မည်ဖြစ်ပါတယ်။

   ယခုနှစ်ဒီဇင်ဘာလတွင်မန်ကျည်းသီးမှည့်ဈေးလက်လီ တစ်ပိဿာလျှင် (၁၀၀၀၀-၁၁၀၀၀) ကျပ်ရှိပြီး ယခင်နှစ်ကတစ်ပိဿာဈေးနှုန်းမှာ(၅၀၀၀-၆၀၀၀)ကျပ်ခန့်သာရှိပြီး ယခုနှစ်နှင့်နှိုင်းယှဉ်ပါက (၅၀၀၀)ကျပ်ဝန်းကျင်ခန့် မြင့်တက်လာကြောင်း တွေ့ရပါတယ်။

   မန်ကျည်းသီးမှည့်ကို အိမ်ရှင်မများလိုရာအသုံးပြုခြင်းနှင့်မန်ကျည်းသီးမှည့်အဟောင်းများကို ပရဆေးဆိုင်များမှ  လေပုတ်ထုတ်ဆေးပြုလုပ်ခြင်း တွင် အဓိကထား အသုံးပြုပြီး အခြားပရဆေးများထုတ်လုပ်ရာတွင်လည်းအသုံးပြုခြင်း၊ မန်ကျည်းသီးမှည့်များကို အဖျော်ယမကာလုပ်ငန်းများ၊မန်ကျည်းတော်ဖီအစရှိသည့် စားသောက်ကုန်လုပ်ငန်းများ၊ အလှကုန်ပစ္စည်းများတွင် အသုံးပြုခြင်းများ များပြားလာခြင်းတို့ကြောင့် မန်ကျည်းသီးမှည့်များ ဈေးကောင်းရလာကြသည့်အတွက်ယခုနှစ်မတ်လပိုင်းတွင် ထွက်ပေါ်လာတော့မည့်မန်ကျည်းသီးမှည့်အသစ်များဈေးနှုန်း မြင့်တက်နိုင်ကြောင်း ရောင်းချသူများထံမှ သိရှိရပါသည်။

DOCA(မန္တလေး)

     မိတ္ထီလာမြို့ဈေးကွက်အတွင်း ဒီဇင်ဘာလဒုတိယပတ်တွင်ဖြစ်ပေါ်နေသော ဘိလပ်မြေ ဈေးနှုန်းများမှာ အပါချီဘိလပ်မြေတစ်အိတ်လျှင် (၁၁၅၀၀)ကျပ်၊ ကြံ့နှစ်ကောင် ဘိလပ်မြေ တစ်အိတ်လျှင် (၁၁၀၀၀)ကျပ်ဈေးဖြင့် အရောင်းအဝယ်ဖြစ်လျက်ရှိပြီး အယ်လ်ဖာ ဘိလပ်မြေမှာ ဈေးကွက်အတွင်းပစ္စည်းပြတ်လပ်နေကြောင်း သိရှိရပါသည်။

      ယခင်နိုဝင်ဘာလဒုတိယပတ်တွင် အပါချီဘိလပ်မြေတစ်အိတ်လျှင် (၁၀၃၀၀)ကျပ်၊ အယ်လ်ဖာဘိလပ်မြေတစ်အိတ်လျှင် (၉၅၀၀)ကျပ်၊ ကြံ့နှစ်ကောင်ဘီလပ်မြေတစ်အိတ်လျှင် (၉၈၀၀)ကျပ်ဈေးဖြင့် အရောင်းအဝယ်ဖြစ်ခဲ့ပြီး ယခင်လနှင့် ယခုလနှိုင်းယှဉ်ကြည့်လျှင် အပါချီ ဘိလပ်မြေတစ်အိတ်လျှင် (၁၂၀၀)ကျပ်၊ ကြံ့နှစ်ကောင်ဘိလပ်မြေတစ်အိတ်လျှင် (၁၂၀၀)ကျပ် ခန့်ဈေးနှုန်းမြင့်တက်လာကြောင်း၊ ဈေးနှုန်းမြင့်တက်လာရခြင်းမှာ ဈေးကွက်အတွင်းပစ္စည်း လက်ကျန်နည်းခြင်းနှင့် သယ်ယူစရိတ်မြင့်မားလာခြင်းကြောင့်ဖြစ်သည်ဟု သိရှိရပါသည်။ အယ်လ်ဖာဘိလပ်မြေမှာ လိုအပ်သလောက်မှာယူ၍မရဘဲ အလှည့်ကျဖြင့်သာရောင်းချပေးသဖြင့် ဒီဇင်ဘာလပထမပတ်မှစ၍ ပစ္စည်းပြတ်လပ်မှုများဖြစ်ခဲ့ကြောင်း၊ အပါချီဘိလပ်မြေစက်ရုံမှာ စက်ရုံ ပြင်ဆင်မှုများရှိခဲ့၍ အနည်းငယ်သာပြတ်လပ်မှုရှိခဲ့ကြောင်း သိရှိရပါသည်။

DOCA(မန္တလေး)

ဟုမ္မလင်းမြို့မောင်းခမ်းကျေးရွာတွင် လက်ဖက်ကို စီးပွားဖြစ် စိုက်ပျိုးလျက်ရှိပြီး လက်ဖက်စိုက်ခင်းဧက တစ်ထောင်ကျော်ရှိကြောင်း သိရသည်။ဒေသထွက်လက်ဖက်စိုကို  အခါးထုတ်ပြီး အသင့်စားလက်ဖက်၊  မက်လင်သီး၊ စောင်းလျားသီးများဖြင့် ရောနှောကာ လက်ဖက်ချဉ်နှပ် ပြုလုပ်ရောင်းချခြင်းများ၊ လက်ဖက်အညွှန့်များကို ရေသန့်ဘူးထဲသွပ်၍ ဘူးလိုက် ရောင်းချခြင်းများ ၊  လက်ဖက်အညွှန့်၊ အရွက်ကြမ်းများကို မီးနှင့်ပေါင်းခံ၍ ရလာသော အရွက်များကို နေလှန်းပေးရပြီး  လက်ဖက်ခြောက်ပြုလုပ်ပါကြောင်း၊ လက်ဖက်ခြောက် အမျိုးအစားပေါ်မူတည်၍ တစ်ပိဿာလျှင် ကျပ် ၁၅၀၀၀ မှ ၂၀၀၀၀ နှင့် လက်ဖက်အစိုမှာ တစ်ပိဿာလျှင် ကျပ် ၅၀၀၀ မှ ၁၀၀၀၀ ခန့်ရောင်းချကြောင်းသိရသည်။ ဒေသထွက် လက်ဖက်များကို ခန္တီး၊ ဖောင်းပြင်၊ နာဂကိုယ်ပိုင်အုပ်ချုပ်ခွင့်ရဒေသ၊ ချင်းတွင်းမြစ် တစ်လျှောက် မြို့များ၊ မုံရွာမြို့နှင့် မန္တလေးမြို့ များသို့လည်း တင်ပို့ရောင်းချကြောင်းသိရှိရပြီး လက်ဆောင် ပေးရန် ဝယ်ယူမှုများလည်း ရှိကြောင်းသိရသည်။

DOCA(စစ်ကိုင်း)

စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်တာဝန်ခံရုံးအနေဖြင့် ၂၀၂၄ ခုနှစ် ၊ ဒီဇင်ဘာလ ၁၆ ရက်နေ့ နံနက်(၀၉:၃၀)နာရီအချိန်တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ ဘိလပ်မြေနှင့် အိမ်ဆောက်ပစ္စည်းရောင်းချသည့်ဆိုင်များ သို့အပတ်စဉ်ကွင်းဆင်းစစ်ဆေးခြင်း ဆောင်ရွက်လျက်ရှိကြောင်း သိရသည်။

ထိုသို့ကွင်းဆင်းစစ်ဆေးရာတွင် ကန့်ဘလူမြို့ပေါ်ရှိ ဘိလပ်မြေရောင်းချသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့ အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှ ဝယ်ယူရကြောင်း၊ ဈေးနှုန်းအနေဖြင့် “CROWN”အမှတ်တံဆိပ်ဘိလပ်မြေ‌ (50kg)တစ်အိတ်လျှင် ငွေကျပ်(၂၁၂၀၀)နှင့် “ကြံ့နှစ်ကောင်”အမှတ်တံဆိပ် ဘိလပ်မြေဈေးနှုန်းမှာ (50kg)တစ်အိတ်လျှင် ငွေကျပ်(၂၀၃၀၀)ဖြင့်ရောင်းချကြောင်း၊ ယခင်အပတ်ဈေးနှုန်းများနှင့်နှိုင်းယှဉ်ပါက ဒီဇင်ဘာလ တတိယပတ်အတွင်း ဘိလပ်မြေဈေးနှုန်းများ အနည်းငယ်မြင့်တက်လာကြောင်း လုပ်ငန်းရှင်များ ထံမှ သိရသည်။

DOCA(စစ်ကိုင်း)

    ကျောက်ဆည်ခရိုင်၊စဉ့်ကိုင်မြို့နယ်သည်စိုက်ပျိုးရေးနှင့်မွေးမြူရေးကိုအဓိကထားလုပ်ကိုင်ကြသော်လည်း ကျေးလက်နေတောင်သူများသည် နှစ်ရှည်သီးနှံတစ်မျိုးဖြစ်သော ဇီးပင်စိုက်ပျိုး ခြင်းလုပ်ငန်းကို ရှေးယခင်ကလယ်ကန်သင်းရိုးများတွင် ဇီးအချဉ်ပင်များကိုသာစိုက်ပျိုးကြရာ ယခုခေတ်သစ်စနစ်နှင့်အညီ ဇီးအချဉ်ပင်မှ အချိုပင်ဖြစ်အောင် ကိုင်းကူး၍ရရှိလာသောပျိုးပင်များ ကိုယာမြေနှင့်ဥယျာဉ်ခြံမြေများတွင် အများအပြားစိုက်ပျိုးလာကြသည်။ ဇီးပင်စိုက်ပျိုးရာတွင် နှစ်စဉ် မိုးဥကျချိန်ဇွန်လတွင်စတင်စိုက်ပျိုးကြပြီး (၂)ပေပတ်လည်ကျင်းတူး၍ တစ်ပင်နှင့်တစ်ပင် အကွာအဝေးကို မျိုးကိုလိုက်၍ (၁၅)ပေခြားစိုက်ပျိုးကြသည်။ဇီးစတင်စိုက်ပျိုးသည့်အချိန်မှစ၍ (၂-၃)နှစ်ခန့်အကြာတွင် ဇီးသီးများစတင်ခူးဆွတ်နိုင်ပါကြောင်း ၊ကိုင်းကူးပျိုးပင်များစိုက်ပျိုးခြင်း ဖြင့်အပင်အသေအပျောက်နည်းပါး၍  ရာသီဥတုဒဏ်ခံနိုင်ပြီး အထွက်နှုန်းနှင့်အလုံးကြီးပြီးအရည် အသွေးကောင်းမွန်၍ အရသာရှိသော ထိုင်ဝမ်ဇီးသီးမျိုးများကိုသာစိုက်ပျိုးလာကြပါသည်။(၁)ဧက ကုန်ကျစရိတ်အနေဖြင့် စတင်စိုက်ပျိုးသည့်အချိန်တွင် (၂၅၀၀၀၀၀-၃၀၀၀၀၀၀)ကျပ်ဝန်ကျင်ခန် ကုန်ကျပြီး နှစ်ရှည်သီးနှံဖြစ်သည့်အတွက် ဇီးသီးထွက်ပေါ်ပြီးနောက်ပိုင်းတွင် ကုန်ကျစရိတ်နည်း ပါးလာကြောင်း ၊ထိုင်ဝမ်းဇီးသီးများကိုနှစ်စဉ် နိုဝင်ဘာလတွင်စတင်ထွက်ပေါ်ပြီး ဒီဇင်ဘာလနှင့် ဇန်နဝါရီလများတွင်လှိုင်လှိုင်ထွက်ပေါ်လျှက်ရှိပြီး ဇီးသီးကို (၇)ရက်တစ်ကြိမ်ခူးဆွတ်ရကြောင်း၊ စတင်ထွက်ပေါ်ချိန်မှရာသီကုန်သည်အထိ(၃)လကြာသည်အထိခူးဆွတ်ရပါသည်။ စတင်ခူးဆွတ် ချိန်တွင် ဇီးသီး(၁၀)ပြည်ပါ ဖာ(၂၀)ခန့်ထွက်ရှိပြီး လှိုင်လှိုင်ထွက်ပေါ်ချိန်တွင် ဖာ‌(၃၀-၃၅)အထိ ထွက်ရှိကြောင်း၊ယခင်ဈေးနှုန်းအနေဖြင့်  ဇီးသီး(၁၀)ပြည်ပါတစ်ဖာလျှင် (၁၈၀၀၀၊၂၀၀၀၀)ကျပ် စျေးရှိပြီး ယခုစျေးနှုန်းအနေဖြင့် အလုံးအသေးအကြီးပေါ်မူတည်၍  ဇီးသီး(၁၀)ပြည်ပါ တစ်ဖာလျှင် (၂၀၀၀၀၊၂၂၀၀၀)ကျပ် စျေးရှိပြီး လက်လီစျေးနှုန်းအနေဖြင့် အလုံးကြီးတစ်ပြည်လျှင် (၃၀၀၀/-) ကျပ်၊ အလုံးသေးတစ်ပြည်လျှင် (၂၅၀၀/-) ကျပ် စျေးဖြင့်ရောင်းချလျှက်ရှိကြောင်း စျေးကွက် အနေဖြင့် မန္တလေး၊အောင်ပန်း၊တောင်ကြီးနှင့်ရန်ကုန်မြို့များသို့ တင်ပို့ရောင်းချလျှက် ရှိကြောင်း ယိုစုံလုပ်ငန်းရှင်များမှလည်း ဇီးခြံအထိလာ‌ရောက်ဝယ်ယူ၍ အချို့ဇီးစိုက်တောင်သူ များသည် ရန်ကုန်၊မန္တလေးလမ်းဘေးများတွင် ရောင်းချကြောင်းသိရှိရပါသည်။ ယခုနှစ်တွင် ရာသီပေါ် ထိုင်ဝမ်ဇီးသီးများပြင်ပသို့တင်ပို့နိုင်ခြင်းမရှိသော်လည်း ပြည်တွင်းစျေးကွက်တွင် စျေးကောင်းများရရှိနေကြောင်း သိရသည်။အကျိုးးအမြတ်အနေဖြင့် အထွက်နှုန်းနှင့် စျေးနှုန်းပေါ် မူတည်ပြီး အကျိုးအမြတ်များရရှိကြောင်းကို စဥ့်ကိုင်မြို့နယ်၊ မုံပင်၊ကံကြီးကျေးရွာမှ ဇီးသီးစိုက် တောင်သူများ၏ပြောကြားချက်အရ သိရှိရပါသည်။

DOCA(မန္တလေး)