ပြည်တွင်းကုန်သွယ်မှုသတင်း

ရက်စွဲ၊ ၁၉.၂.၂၀၂၅

ကန့်ဘလူခရိုင်၊ ကန့်ဘလူမြို့တွင် စိုက်ပျိုးရေးကို အဓိကလုပ်ကိုင်လျက်ရှိရာ မိမိတို့ အိမ်ခြံ ဝင်းအတွင်းနှင့် တောင်ယာမြေများတွင် တစ်နိုင်တစ်ပိုင်အနေဖြင့် စားဖိုဆောင်သီးနှံများကို  စိုက်ပျိုး ထားကြသည့်အနက် ဆူးပုတ်ရွက်သည်လည်း တစ်မျိုးပါဝင်ပါသည်။ ဆူပုတ်ရွက်ကို ယခု ဖေဖော်ဝါရီ လ လဆန်းပိုင်းတွင် စတင်ပေါ်ထွက်လာပြီး ဈေးကွက်အတွင်းသို့ ရောက်ရှိလာခြင်း ဖြစ်ပါသည်။ ဆူးပုတ်ရွက်သည် ယခုရာသီ၌ ပူပြင်ခြောက်သွေ့သော ရာသီဖြစ်သည့်အတွက် ရေများများ လောင််း နိုင်မှသာလျှင် အရွက်နုများပေါက်နိုင်မည်ဖြစ်ကြောင်း၊ ဆူးပုတ်ရွက်ကို မိမိတို့ဒေသတွင်သာမက ဒေသတိုင်းတွင် လူကြိုက်များပြီး အစားများကြသော အရွက်တစ်မျိုးဖြစ်ပါသည်။

 ဆူးပုတ်ရွက်ကို မိမိတို့ကြိုက်နှစ်သက်သည့် ပုံစံအမျိုးမျိုးနှင့် အသုံးပြုကြပုံမှာ ဆူးပုတ်ရွက် ကို အစည်းလိုက်ချက်စားခြင်း၊ ကန်ဇွန်းရွက်၊ ပဲတီပင်ညှောက်၊ ပဲနီပင်ညှောက် ၊ဂွေးတောက်ရွက်၊ ကြက်ဥ တို့ဖြင့် ကြော်စား/ချက်စားခြင်း၊ ပဲဟင်းချို/ ဟင်းချိုဟင်း များထဲတွင်လည်း ခတ်စားကြပြီး ပိတ်စွယ် ၊ ပိန္နဲသီးအနုပြုတ်၊ ခရမ်းသီးခြောက် စသည်တို့နှင့်လည်း ရောနှော၍ချက်စားကြပါသည်။

ယခင် ဖေဖော်ဝါရီလ ဒုတိယအပတ်တွင် ဆူးပုတ်ရွက် ဈေးနှုန်းအနေဖြင့် ဆူးပုတ်အစည်း (၁)စည်းလျှင်(၄၀၀)ကျပ်၊ (၂)စည်းလျှင်(၇၀၀)ကျပ် ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခု ဖေဖော်ဝါရီလ တတိယအပတ်တွင် ဆူးပုတ်ရွက် ဈေးနှုန်းအနေဖြင့် ဆူးပုတ်အစည်း (၁)စည်းလျှင် (၆၀၀)ကျပ်ဈေးနှုန်းဖြင့် ရောင်းချသောကြောင့် ယခင် အပတ်ထက် တစ်စည်းလျှင် (၂၀၀)ကျပ် မြင့် တက်ပြီး အရောင်းအဝယ်ဖြစ်လျက်ရှိကြောင်း  ကုန်စိမ်းဈေးသည်တစ်ဦးထံမှ သိရပါသည်။

DOCA(စစ်ကိုင်း)

ရက်စွဲ၊ ၁၉.၂.၂၀၂၅

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ် ရပ်ကွက်များတွင် ရှားပါးသော ရာသီ၌ ရောင်းချရန်အတွက် ဒေသအတွင်းထွက်ရှိသည့် မျှစ်များ လှိုင်လှိုင် ပေါချိန်တွင် မျှစ်ချဉ်/မျှစ်ချို တို့ကို နှစ်လည်ခါကြူရောင်းချရန်အတွက် စဉ့်အိုးများ အင်တုံများ ပလပ် စတစ်အကြည်အိပ်များနှင့် သိပ် ထားပြီး ဒေသထွက် မျှစ်ချဉ်ကို ရောင်းချကြပါသည်။

          မျှစ်ချဉ်ကို မျှစ်ချဉ်ချဉ်ရည်ကျို၊ မျှစ်ချဉ်နှင့်ဝက်ရိုးချက်ခြင်း၊ မျှစ်ချဉ်နှင့်ငါးခေါင်းချက်ခြင်း၊ မျှစ်ချဉ်ကိုပြုတ်၍သုပ်ခြင်းစသည့်ပုံစံအမျိုးမျိုးနှင့်ချက်ပြုတ်စားသောက်ကြပါသည်။

          ယခင် ၂၀၂၅ ခုနှစ်၊ ဖေဖော်ဝါရီလ ‌တတိယပတ်အတွင်း ကန့်ဘလူမြို့မဈေး၌ ဖြစ်ပေါ်နေသော မျှစ်ချဉ် ဈေးနှုန်းမှာ မျှစ်ချဉ် တစ်ပိဿာလျှင်(၆၀၀၀)ကျပ်၊ (၅၀)ကျပ်သားလျှင်(၃၀၀၀)ကျပ်နှင့် (၂၅)ကျပ် သားလျှင်(၁၅၀၀)ကျပ် တို့ဖြင့် အရောင်းအဝယ်ဖြစ်နေကြောင်း ကန့်ဘလူမြို့၊ မြို့မဈေးတွင် မျှစ်ချဉ် ရောင်းချနေသော ဈေးသည် တစ်ဦးထံမှ သိရသည်။

DOCA(စစ်ကိုင်း)

ရက်စွဲ၊ ၁၉.၂.၂၀၂၅

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများတွင် စိုက်ပျိုး ရေးကို အဓိကထားလုပ်ကိုင်ကြရာမှ စားဖိုဆောင်သီးနှံဖြစ်သည့် ခါကြက်ဥ (ဗမာ)မျိုးကို တစ်ပိုင်တစ်နိုင် မိသားစု အိမ်ခြံမြေများနှင့် မိမိပိုင်ယာမြေများတွင်သာ စိုက်ပျိုးကြပြီး မိမိတို့ဒေသတွင်း ကျေးရွာများနှင့် ကန့်ဘလူမြို့၊ ကျွန်းလှမြို့ ဈေကွက်အတွင်းသို့ ပို့ဆောင်ရောင်းချကြပါသည်။

ကန့်ဘလူမြို့ မြို့မဈေးတွင် မိသားစု စားဝတ်နေရေးအတွက် ကုန်စိမ်းရောင်းချနေသူများသည် ခါကြက်ဥများကို ရောင်းချလျက်ရှိရာ ခါကြက်ဥ(တရုတ်)နှင့် ခါကြက်ဥ(ဗမာ)ဟူ၍ ခါကြက်ဥ(၂)မျိုးရှိပြီး ယခု လက်ရှိမှာတော့ ခါကြက်ဥ(ဗမာ)ဥကိုတော့ ဒေသတွင်း ထွက်ရှိသည်များကိုသာ ဝယ်ယူရောင်း ချကြပြီး ခါကြက်ဥ(တရုတ်)ကိုတော့ ရှမ်းပြည်နယ်နှင့်မန္တလေးမြို့တို့မှ မှာယူရောင်းချရတာဖြစ်၍ ယခု အချိန်တွင်ဒေသထွက် ခါကြက်ဥပေါချိန်ဖြစ်သည့်အတွက် ခါကြက်ဥ(တရုတ်)ကိုတော့ မှာယူရောင်းချ ခြင်းမရှိကြောင်းနှင့် ခါကြက်ဥကို အသုပ်ဆိုင်များ၊ စားသောက်ဆိုင်များ၊ ကော်ပြန်ဆိုင်များနှင့် အကင်ဆိုင် များမှ အသုံးပြုမှုများပြီး မရှိမဖြစ်အ‌ရောင်းအဝယ်ဖြစ်နေသော သီးနှံတစ်မျိုးဖြစ်ပါသည်။

ယခု ၂၀၂၅ ခုနှစ်၊ ဖေဖော်ဝါရီလ တတိယပတ်တွင် ကန့်ဘလူမြို့မဈေးအတွင်း ဖြစ်ပေါ်နေသော  ခါကြက်ဥ ဈေးနှုန်းမှာ ခါကြက်ဥ(ဗမာ)ဥကြီး တစ်ပိဿာလျှင်(၃၅၀၀)ကျပ် ၂၅ကျပ်သားလျှင်(၁၀၀၀) ကျပ်၊ ခါကြက်ဥ (ဗမာ) ဥသေး တစ်ပိဿာလျှင်(၃၀၀၀)ကျပ် ၂၅ကျပ်သားလျှင်(၈၀၀)ကျပ် ဈေးနှုန်းများ ဖြင့် ဝယ်ယူသူများပြီး အရောင်းအဝယ်ဖြစ်နေကြောင်း ကုန်စိမ်းသီးနှံအစုံ ရောင်းချသူများ ထံမှ သိရပါသည်။

DOCA(စစ်ကိုင်း)

ရွှေဖရုံသီးသည် တစ်နှစ်ပတ်လုံးထားခံနိုင်သော သီးနှံတစ်မျိုးဖြစ်သည်။ ယခင်က ရွှေဖရုံသီးကို ဗမာမျိုးလုံးကြီးမျိုးကိုသာ စိုက်ပျိုးကြပြီး ယခုအခါ အသင့်စားအနေတော်လုံးသေးမျိုး၊ ထိုင်ဝမ်မျိုးများကိုသာ စီးပွားဖြစ်စိုက်ပျိုးလာကြပါသည်။ ၎င်းရွှေဖရုံသီးအသေးမျိုးများသည် ပြည်တွင်းဈေးကွက်တွင်သာမက ပြည်ပဈေးကွက်တရုတ်နိုင်ငံသို့လည်း တင်ပို့ရောင်းချလျှက်ရှိ ကြောင်း သိရသည်။ ဖရုံသီးကို ဟင်းလျာအဖြစ်စားသုံးကြပြီး ဟင်းရည်သောက်အဖြစ်လည်း စားသုံးကြသည်။ ဖရုံသီးဆနွင်းမကင်းလည်း ပြုလုပ်ရောင်းချကြောင်း တွေ့ရှိရသည်။ မတ္တရာ မြို့နယ်တွင် ရွှေဖရုံသီးအသေးမျိုးဧက များစွာစိုက်ပျိုးထားပြီး ရွှေဖရုံသီးများ စတင်ထွက်ပေါ် နေပြီဖြစ်ပါသည်။ ရွှေဖရုံသီးများကို မုံရွာမြို့နယ်မှ ထွက်ရှိပြီး ဗမာမျိုးများမှာ တစ်လုံးလျှင် အရွယ် အစားအလိုက်(၂၅၀၀/၃၀၀၀/၃၅၀၀)ကျပ်အထိ ရှိကြပြီး မတ္တရာနှင့် ပြင်ဦးလွင်မြို့များမှထွက်ရှိသည့် ထိုင်ဝမ်မျိုးများမှာ တစ်လုံးလျှင်(၁၀၀၀)ကျပ်၊ တောင်ကြီးဘက်မှ ထွက်ရှိသည့် ဖရုံသီးများမှာ (၃၀၀၀/၄၀၀၀/၅၀၀၀)ကျပ်အထိရှိကြပြီး မန္တလေးမြို့အနယ်နယ်အရပ်ရပ်ရှိ ဈေးကလေးများသို့ လည်း တင်ပို့ရောင်းချကြောင်း သိရှိရပါသည်။

DOCA(မန္တလေး)

 မြင်းခြံမြို့ရှိ ဈေးများတွင် ရာသီပေါ်သစ်သီးဝလံများအား ရာသီအလိုက်ရောင်းချလျက်ရှိရာ ယခုဖေဖာ်ဝါရီလအတွင်း ဈေးကွက်များရှိ ထောပတ်သီးမှာ ယခင်လများကဲ့သို့ပေါပေါများများ မရှိတော့ဘဲ လက်ကျန်ကာလဖြစ်သည့်အလျောက် ဈေးကွက်ဝင်ရောက်မှု၊ ရောင်းချမှုများနည်းပါး လာပြီဖြစ်ပါသည်။ ထောပတ်သီးကို အလုံးလိုက်ဝယ်ယူကြပြီး မိမိတို့အိမ်၌ သကြား၊ နို့ဆီများဖြင့် ရောစပ်၍ စားသုံးကြသလို သစ်သီးဖျော်ရည်ဆိုင်များတွင်လည်း ထောပတ်သီးဖျော်ရည်ကို ဝယ်ယူ စားသောက်ကြမှုများလည်းရှိကြောင်း၊ ရာသီပေါ်ရောင်းတန်းဝင် သစ်သီးဖျော်ရည်ဖြစ်ပြီး လူအများ ကြိုက်နှစ်သက်၍ ကလေးလူကြီးဝယ်ယူ သောက်သုံးကြပါသည်။ ထောပတ်သီးဖျော်ရည်တစ်ခွက် လျှင် ဈေးနှုန်း(၄၀၀၀)ကျပ်မှ(၆၀၀၀)ကျပ်အထိ ရောင်းချလျက်ရှိပြီး ဝယ်ယူသောက်သုံးမှုများပြား လျက်ရှိပါသည်။

          ထောပတ်သီးစားသုံးခြင်းမှ ရရှိသည့်အကျိုးကျေးဇူးများမှာ သွေးတွင်းမှ ကိုလက်စထရော များကို လျှော့ချနိုင်ခြင်း၊ သွေးတွင်းသကြားဓာတ်ကိုထိန်းညှိပေးနိုင်ခြင်း၊ နှလုံးသွေးကြောဆိုင်ရာ ရောဂါများကို လျှော့ချပေးနိုင်ခြင်းအစရှိသည့် အကျိုးကျေးဇူးများစွာ ရရှိစေကြောင်းနှင့် ထောပတ် သီးအဆီအနှစ်သည် အသားအရေခြောက်သွေ့အက်ကွဲမှု့များကို ပျောက်ကင်းစေသည့်အတွက် အလှကုန်ပစ္စည်းများတွင် ထည့်သွင်းအသုံးပြုလျက်ရှိကြောင်း၊  ဆံသားများတောက်ပြောင်စေ သောကြောင့် ခေါင်းလျှော်ရည်များတွင်လည်း ထည့်သွင်းအသုံးပြုလျက်ရှိကြောင်းသိရသည်။

DOCA(မန္တလေး)