ပြည်တွင်းကုန်သွယ်မှုသတင်း

              ဖြူးမြို့နယ်၊ ညောင်ကားယားကျေးရွာ၊ ကံ့ကော်ဦးမုန့်နှင့်အကြော်စုံလုပ်ငန်းမှ ထုတ်လုပ် သော ပြောင်းဖူးစေ့ကြော်သည် လူကြိုက်များ၍ ရောင်းအားကောင်းပါသည်။ ပြောင်းဖူးစေ့ကြော် ရာတွင် ပြောင်းဖူးစေ့အခြောက်များကို နူးအိသွားသည်အထိ ဒယ်အိုးကြီးများဖြင့် နှစ်နာရီခန့်ကြာ အောင် ပေါင်းခံထားရပါသည်။

              ပေါင်းခံပြီး ပြောင်းဖူးစေ့များကို အပူခံခင်းထားသော ဝါးကပ်များပေါ်တွင် ဖြန့်ကျက်၍ ရေစစ်ထားပြီး ရေစင်မှ ပြောင်းဖူးစေ့များကို ဒယ်အိုးကြီးထဲတွင် ဆီပွက်ပွက်ဆူအောင် တည်ပြီးမှ ကြော်ရပါသည်။ ကြော်ပြီးသော ပြောင်းဖူးစေ့များကို ဆယ်ယူပြီး ဆား၊ အချိုမှုန့်တို့ကိုထည့်ပြီး သမအောင်မွှေပေးရပါသည်။ ထို့နောက် အချိန်ဖြင့်မှာယူသူများကို အချိန်ဖြင့်လည်းကောင်း၊ မုန့်မျိုးစုံ အရောင်းဆိုင်များသို့ပို့မည့် ပြောင်းဖူးစေ့များကို ပလပ်စတစ်အိတ်ဖြင့် ထုပ်ပိုး၍ လည်းကောင်း ဈေးကွက်အတွင်း ရောင်းချပါသည်။

              ပြောင်းဖူးစေ့ခြောက် ပိဿာ ၃၀ ပါအိတ် တစ်အိတ်လျှင် ၅၄၀၀၀ ကျပ်ဖြင့် ဝယ်ယူရပြီး ပြောင်းဖူးစေ့ကြော်ပြီးလျှင် အချိန်ဖြင့်ဝယ်ယူပါက တစ်ပိဿာလျှင် ၁၂၀၀၀ ကျပ်ဖြင့် ရောင်းချပါ သည်။ အချိန်ဖြင့်ဝယ်ယူသူများကလည်း ပလပ်စတစ်အိတ်ဖြင့် ပြန်လည်ထုပ်ပိုးပြီး ရောင်းချပါသည်။ ပလပ်စတစ်အိတ်အသေးဖြင့် ထုပ်ပိုးထားသည့် ပြောင်းဖူးစေ့ကြော် တစ်ထုပ်ကို ၅၀၀ ကျပ်ဖြင့် ရောင်းချကြောင်း လုပ်ငန်းရှင် ဦးမျိုးဇော်၏ ပြောပြချက်အရ သိရပါသည်။

DOCA(ပဲခူး)

          ၂၀၂၄ ခုနှစ်၊ ဒီဇင်ဘာလ ၁၈ ရက်နေ့၊ (၀၉း၀၀)နာရီ အချိန်တွင် ထားဝယ်မြို့၊ အိမ်ရှေ့ပြင်ရပ် ကွက်၊ ရေးလမ်းရှိ ရတနာဦးယာဥ်ရပ်နားစခန်းသို့ မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ စီစဥ်မှုဖြင့် Yadanarbon Global Network Distribution Co,Ltd မှ တင်ပို့ရောင်းချသည့် စားအုန်းဆီ ၁ ပေပါလျှင် ၁၁၀ ပိဿာပါ စားအုန်းဆီ (၄၃)ပေပါကို ယာဥ်မောင်းဦးအောင်ကျော်ကျော် ၊ယာဉ်အမှတ် 7M-2226/ Hino မော်တော်ယာဥ်ဖြင့်တင်ဆောင်၍ ရောက်ရှိလာရာ စားသုံးသူရေးရာ ဦးစီးဌာန၊ တိုင်းဒေသကြီးဦးစီးမှူး ဦးစိုးဦးနှင့်တာဝန်ရှိသူများက သွားရောက် စစ်ဆေးခဲ့ကြောင်း၊ အဆိုပါ စားအုန်းဆီစုစုပေါင်း (၄၃) ပေပါအား ကုမ္ပဏီ၏လက်ကားအ​ရောင်းကိုယ်စားလှယ်မှ တစ် ဆင့် ထားဝယ်မြို့၊ အိုးလုပ်ရပ်ကွက်၊ နိဗ္ဗာန်လမ်းရှိဦးဘိုသစ်၏ ယမုံလှိုင် ကုန်စုံဆိုင် အပါအဝင် လက်လီဆိုင် ၁၅ ဆိုင်မှတစ်ဆင့် သတ်မှတ်ရည်ညွှန်းစျေးအတိုင်း စားသုံးသူများအား ရောင်းချ ပေး သွားမည်ဖြစ်ကြောင်း သိရှိရပါသည်။

DOCA(တနင်္သာရီ)

    စျေးကွက်အတွင်းသို့ ဝင်ရောက်လာသည့်ငှက်ပျောသီးများမှာ    မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့်ပဲခူတိုင်းဒေသကြီးတို့မှဝင်ရောက်မှုများကြောင်း သိရရှိရပါတယ်။ မန္တလေး တိုင်းဒေသကြီးအတွင်း အမရပူရ၊ပုသိမ်ကြီး၊မတ္တရာ၊ကျောက်ဆည်၊စဉ့်ကိုင်၊မြစ်သားမြို့နယ်တို့ တွင် ငှက်ပျောသီးသီးနှံအများအပြားစိုက်ပျိုးကြောင်း  သိရှိရပါတယ်။    စျေးကွက်အတွင်း ရောင်းချသည့် ငှက်ပျောသီးများအနက်  အများဆုံးတွေ့ရှိရသည့်အမျိုးအမည်များမှာ  ဖီးကြမ်း၊  သီးမွေး၊  ရခိုင်၊ ငှက်ပျောချဉ်နှင့်ရွှေနီငှက်ပျောတို့ဖြစ်ပါတယ်။ ငှက်ပျောသီး သီးနှံကို အဟာရဓါတ်စာ၊ဖျော်ရည်နှင့် စားသောက်ကုန်တို့တွင်  ထည့်သွင်းသုံးစွဲခြင်း၊ ဘုရားပွဲနှင့် မိရိုးဖလာကန်တော့ပွဲများတွင်   သုံးစွဲ ကြောင်း သိရှိရပါတယ်။ ဖီးကြမ်းငှက်ပျောသီးအနေဖြင့် မတ္တရာမှထွက်သည့်အသီးမှာ အခွံထူပြီး၊ အရသာမှာ အချိုဓါတ်အနည်းငယ်လျော့ကြောင်းနှင့် ကျောက်ဆည်မှထွက်သည့် ငှက်ပျောသီးမှာ   အခွံပါးပြီး၊အချိုဓါတ်များကြောင်း သိရှိရပါတယ်။ ဖီးကြမ်းနှင့် ရခိုင်ငှက်ပျောသီးများကို  ဘုရားပွဲနှင့်  မိရိုးဖလာပွဲများတွင် သုံးစွဲမှုများပြီး၊ကန်တော့ပွဲတစ်ပွဲတွင် အုန်းသီးတစ်လုံးနှင့်သုံးစွဲသည့် ငှက်ပျော ခိုင်အရေအတွက်အလိုက်၊အလုံးအရွယ်အစားအလိုက်စျေးနှုန်းအမျိုးမျိုးရှိရာ၁၂၀၀ဝိ/- နှင့် ၁၈၀၀ဝိ/-စျေးအသီးသီးရောင်းချကြောင်းတွေ့ရှိရပါတယ်။ စျေးကွက်အတွင်း ရောင်းချသည့်ငှက်ပျောဖီး စျေးနှုန်းများအနေဖြင့် တစ်ဖီးလျင်  ဖီးကြမ်း(အစိမ်း)    ၂၀၀ဝိ/- နှင့် ၃၅၀ဝိ/-စျေး၊   ဖီးကြမ်း  (အမှည့်) ၁၅၀ဝိ/- နှင့် ၃၀၀ဝိ/- စျေး၊ ရခိုင်ငှက်ပျောသီးနှင့်ငှက်ပျောချဉ်သီးမှာ    အစိမ်းနှင့်အမှည့်   စျေးကွာခြားမှုမရှိဘဲ တစ်ဖီးလျင် ၁၅၀ဝ/- နှင့် ၂၀၀ဝိ/- စျေးတို့   အသီးသီးရောင်းချလျက်ရှိပါတယ်။ သီးမွေးငှက်ပျောသီးအနေဖြင့်   ကျောက်ဆည်၊ စဉ့်ကိုင်၊ မြစ်သား၊ မတ္တရာတို့တွင် အများအပြား စိုက်ပျိုးပြီး၊စစ်ကိုင်းတိုင်း ဒေသကြီးနှင့် ပဲခူးတိုင်းဒေသကြီးတို့မှလည်း     ဝင်ရောက်မှုများရှိပါတယ်။   တောင်ငူမြို့နယ်မှထွက်ရှိသည့် သီးမွေးငှက်ပျောသီးမှာ အလုံးလှ၍ အနံ့နှင့်အရသာမှာ လူကြိုက် များပြီးစျေးကောင်းရကာ တစ်ဖီးလျင်(၁၇လုံးနှင့် ၂၅လုံးပါ) ၄၀၀ဝိ/- နှင့် ၅၅၀ဝိ/-စျေး၊ ကျန် ဒေသများမှထွက်သည့်သီးမွေးငှက်ပျောသီး အစိမ်း/အမှည့် တစ်ဖီးလျင်  ၁၅၀ဝိ/-  နှင့် ၂၅၀ဝိ/-စျေး အသီးသီးရောင်းချလျက်ရှိပါတယ်။  တောင်ငူမြို့နယ်မှ  ထွက်ရှိသည့် ရွှေနီငှက်ပျောသီး တစ်ဖီးလျင် အလုံးအရေတွက်နှင့် လတ်ဆတ်မှုအပေါ်မူတည်၍ ၅၀၀ဝိ/-နှင့် ၈၀၀ဝိ/- စျေးတို့ဖြင့် ရောင်းချလျက် ရှိပါတယ်။ မိုးရာသီနှင့်နွေရာသီထွက်ငှက်ပျောသီးများမှာ ပို၍ လှပပြီး၊ ဆောင်းရာသီတွင် ငှက်ပျော သီးသီးနှံမှာ လှပမှုနည်းကြောင်း သိရှိရပါတယ်။ စျေးကွက်အနေဖြင့်   ဒီဇင်ဘာလဒုတိယပတ် အတွင်း  ဒေသမျိုးစုံမှအသီးမျိုးစုံဝင်ရောက်မှုများပြီး  ငှက်ပျောသီးမှာ အရောင်းသွက်သည့် သီးနှံဖြစ်ကြောင်း မန္တလေးမြို့၊ ရေနီမြောင်းစျေးရှိ ငှက်ပျောသီးရောင်းချသည့်ဆိုင်ရှင်တစ်ဦး၏ပြောပြချက်အရ သိရှိရပါတယ်။

DOCA(မန္တလေး)

   ဥ‌ရောပသမဂ္ဂနိုင်ငံများသို့ ပဲပင်ပေါက်ဖောက်ရန်အတွက် မြန်မာ့ပဲတီစိမ်းများတင်ပို့ရာ တွင် တစ်နှစ်ထက်တစ်နှစ်ပိုမိုတင်ပို့နိုင်ရန်ရည်ရွယ်၍ ၂၀၂၄-၂၀၂၅ ရာသီ ပဲတီစိမ်းစိုက်တောင်သူ များအတွက် (GAP-GHP) နည်းစဉ်များအတိုင်း စိုက်ပျိုးနိုင်စေရန် စိုက်ပျိုးရေးဦးစီးဌာနမှ ကျွမ်းကျင်ပညာရှင်များကပို့ချသော‌ တောင်သူပညာပေး သင်တန်းအခမ်းအနားအား ဒီဇင်ဘာလ ၁၈ ရက်နေ့၊ နံနက်(၀၉:၃၀)တွင် ရန်ကုန်တိုင်းဒေသကြီး၊ သန်လျင်မြို့နယ်၊ သူဌေးကွင်းကျေးရွာ တွင် ကျင်းပပြုလုပ်ခဲ့ပါသည်။ အခမ်းအနားကို စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူး ဦးကျော်ကျော်လွင်နှင့်တကွ အရာထမ်းအမှုထမ်းများ၊ စိုက်ပျိုးရေးဦးစီးဌာနမှ တာဝန်ရှိသူများ၊ ပံ့ပိုးကူညီပေးသောကုမ္ပဏီများမှတာဝန်ရှိသူများနှင့် တောင်သူများ စုစုပေါင်း ၁၂၆ ဦးတက်ရောက် ခဲ့ကြပါသည်။ အခမ်းအနားစတင်ချိန်တွင် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်က အဖွင့်စကားပြောကြားခဲ့ပါသည်။ ဦးကျော်ကျော်လွင်က  တောင်သူများအား ကောင်းမွန်သောစိုက်ပျိုးရေးစနစ်များဖြင့် စိုက်ပျိုး နိုင်ရန်အတွက် ကြိုတင်အသိပညာပေးရန်၊ စုဆောင်းသူဝယ်ယူသူများကိုလည်း သိုလှောင်မှု၊ ပို့ဆောင်မှု တို့အား မှတ်တမ်းထားရှိစေရန်နှင့် လုပ်ငန်းဆောင်ရွက်သည့်စက်ရုံများကိုလည်း ကျန်းမာရေး နှင့် ညီညွတ်သည့် အလေ့အကျင့်ရှိစေရန် စိုက်ပျိုးရေးဦးစီးဌာနနှင့်ပူးပေါင်းပြီး သက်ဆိုင်ရာကုမ္ပဏီ များ၏ကူညီပံပိုးမှုဖြင့် အသိပညာပေးဆောင်ရွက်လျှက်ရှိပါကြောင်း၊ နှစ်စဉ် ဥရောပသမဂ္ဂနိုင်ငံများသို့ ပဲတီစိမ်းတင်ပို့ခဲ့မှုအခြေအနေများအကြောင်းနှင့် သင်တန်းတွင် အသိပညာပေးသည့်အတိုင်း စနစ်တကျစိုက်ပျိုးထုတ်လုပ်ပါက တောင်သူ၊ အဝယ်တော်၊ နိုင်ငံတော်အတွက် အကျိုးဖြစ်ထွန်းမည်ဖြစ်သည့်အကြောင်း ပြောကြားခဲ့ပါသည်။ ထို့နောက် စိုက်ပျိုးရေးဦးစီးဌာနမှ တာဝန်ရှိသူများက တက်ရောက်လာသောတောင်သူများအား ပညာပေး သင်တန်းပို့ချခဲ့ကြပြီး တက်ရောက်လာသူများက သိလိုသည်များအားမေးမြန်းခဲ့ကြကာ အခမ်းအနားပြီးမြောက်ခဲ့ပါသည်။

DOCA(ရန်ကုန်)

ဒီဇင်ဘာလ တတိယပတ်တွင် သုံးခွမြို့နယ်၌ အခြေခံစားသောက်ကုန်များဖြစ်သော ဆန်ကြမ်း၊ ဆန်ချောအမျိုးအစားအလိုက် ဧည့်မထတစ်ပြည်လျှင်(၃၃၀၀-၃၆၀၀)ကျပ်ထိ၊ ဧရာဝတီပေါ်ဆန်း တစ်ပြည်လျှင်(၅၀၀၀-၆၀၀၀)ကျပ်၊ ကျားပျံတစ်ပြည်လျှင်(၅၀၀၀-၆၀၀၀)ကျပ်၊ စားအုန်းဆီ တစ်ပိဿာလျှင်ယခင်ပတ်တွင်(၇၇၅၀)ကျပ်၊ ယခုပတ်တွင်(၇၇၅၀)ကျပ်ဖြင့် ဈေးနှုန်းတည်ငြိမ် လျှက်ရှိပြီး၊ ပဲဆီတစ်ပိဿာလျှင်(၂၀၀၀၀)ကျပ်ဖြင့်လည်းကောင်း၊ ကြက်သွန်နီအသစ်ဆိုဒ်စုံ တစ်ပိဿာလျှင်(၂၅၀၀-၄၅၀၀)ကျပ်၊ ကြက်သွန်ဖြူ(ရှမ်းစ) တစ်ပိဿာလျှင်(၁၈၀၀၀-၂၀၀၀၀)ကျပ်၊ အိုင်အိုဒင်းဆားတစ်ထုပ်လျှင်(၃၀၀)ကျပ်၊ ငြုပ်တောင့်(အရှည်)တစ်ပိဿာလျှင် (၉၀၀၀-၁၄၀၀၀)ကျပ်၊ ကုလားပဲဇံခြမ်းတစ်ပိဿာလျှင်(၇၂၀၀)ကျပ်၊ အာလူးတစ်ပိဿာလျှင် (၇၀၀၀-၈၀၀၀)ကျပ်၊ သကြား တစ်ပိဿာလျှင်(၅၆၀၀)ကျပ်၊ ကြက်ဥတစ်လုံးလျှင်(၃၈၀-၄၀၀)ကျပ်နှင့် ဘဲဥတစ်လုံးလျှင် (၅၅၀)ကျပ်တို့ဖြင့် အရောင်းအဝယ်ဖြစ်လျှက်ရှိပါသည်။

အလားတူ ဗမာကြက်တစ်ပိဿာလျှင်(၂၅၀၀၀-၃၀၀၀၀)ကျပ်၊ CPကြက်တစ်ပိဿာလျှင် (၂၀၀၀၀-၂၅၀၀၀)ကျပ်၊ ဝက်သားတစ်ပိဿာလျှင်(၂၀၀၀၀-၂၅၀၀၀)ကျပ်၊ အမဲသားတစ်ပိဿာလျှင် (၂၂၀၀၀-၂၅၀၀၀)ကျပ်၊ ဆိတ်သားတစ်ပိဿာလျှင်(၂၅၀၀၀-၂၇၀၀၀)ကျပ်၊ ငါးမြစ်ချင်းတစ်ပိဿာလျှင် (၁၀၀၀၀)ကျပ် စသည့်ဖြင့်လည်းကောင်း ဈေးနှုန်းအသီးသီးတို့ဖြင့် ရန်ကုန်တိုင်းဒေသကြီး သုံးခွမြို့နယ်၊ စည်ပင်သာယာမြို့မဈေးအတွင်း အရောင်းအဝယ်ဖြစ်လျှက်ရှိကြောင်း သိရပါသည်။

ယခင်ပတ်နှင့်ယခုပတ်နှိုင်းယှဉ်ရာတွင် ဆန်ကြမ်း၊ ဆန်ချောဈေးနှုန်းများ၊ အသား၊ငါး ဈေးနှုန်းများနှင့် စားသောက်ကုန်ပစ္စည်း(ကုန်ခြောက်)ဈေးနှုန်းများမှာ အနည်းငယ် ပြောင်းလဲ လျက်ရှိပြီး စားအုန်းဆီဈေးနှုန်းမှာတည်ငြိမ်လျှက်ရှိကြောင်း သိရှိရသည်။

DOCA(ရန်ကုန်)