ပြည်တွင်းကုန်သွယ်မှုသတင်း

             မြန်မာနိုင်ငံသည် သစ်တောထွက် သံယံဇာတများစွာထွက်ရှိသော နိုင်ငံဖြစ်သည်။ အဖိုးတန်သစ်အမျိုးမျိုး၊ ဝါးအမျိုးမျိုး၊ သစ်ခွများ ထွက်ရှိသကဲ့သို့ လူတို့၏ ပတ်ဝန်ကျင်သန့်ရှင်းရေး၊ အိမ်သန့်ရှင်းရေးအတွက် အသုံးပြုကြသော တံမြက်စည်းမှာလည်း မြန်မာ့သစ်တောများမှ ထွက်ရှိပါသည်။

          တံမြက်စည်းပင်များသည် တောင်ပေါ်ဒေသသစ်တောများတွင် နေရာကွက်ကြား အလေ့ကျ ပေါက်ရောက်ကာ ကျူပင်နှင့်တူပြီး အရွက်ရှည်၍ မြစ်ပွားပင်မျိုးဖြစ်သည်။ ၎င်းအပင်သည် မိုးရာသီတွင် အပင်ကြီးထွားပြီး ဆောင်းရာသီ၌ အပွင့်ခိုင်များ ပွင့်ကြသည်။ တံမြက်စည်းပင်များကို အပွင့်ခိုင်စုံချိန်ဖြစ်သော ဖေဖော်ဝါရီလမှ မတ်လအတွင်း ခုတ်ယူကြရသည်။

           အလေ့ကျပေါက်နေသော တံမြက်စည်းပင်များကို ကျေးလက်နေပြည်သူများမှ ရှာဖွေခုတ် ယူကြသကဲ့သို့ တောင်ယာပြန်ချိန်များတွင်လည်း တစ်ပိုင်တစ်နိုင် ခုတ်ယူသယ်ဆောင်လာကြသည်။ ခုတ်ယူရရှိလာသော တံမြက်စည်းပွင့်ခိုင်များကို တစ်ရက်၊ နှစ်ရက်ခန့် နေလှန်းပြီး ပွင့်ဖတ်၊ ပွင့်ခိုင်များကြွေကျအောင် ရိုက်ခါပြီး နှီးဖြင့် အစည်းက​လေးများစည်းကာ အဝယ်ဒိုင်သို့ သွားရောက်ရောင်းချကြသည်။ အချို့ သောသူများသည် တံမြက်စည်းမွှေးများကို တံမြက်စည်းအဖြစ် ကိုယ်တိုင်ယက်လုပ်ကာ ရောင်းချကြသည်။ တံမြက်စည်းတစ်ချောင်းလျှင်  (၂၅၀၀)ကျပ်မှ (၃၀၀၀)ကျပ်အထိဈေးရှိကြောင်း သိရှိရပါသည်။

DOCA(တနင်္သာရီ)

            ကြံတစ်ကြိမ်စိုက်လျှင် (၄)နှစ်အထိထား၍ ပထမနှစ်(ခင်းသစ်)၊ ဒုတိယနှစ်(လမိုင်း)၊ တတိယနှစ်(လမတ်)နှင့် စတုတ္ထနှစ် (ခင်းဟောင်း) ဟူ၍ ခုတ်သိမ်းရကြောင်း သိရှိရပါသည်။ ပထမနှစ် စစိုက်စိုက်ချင်း(ခင်းသစ်)ကို ဇန်နဝါရီလမှ ဖေဖော်ဝါရီလအထိ စိုက်ပျိုးကြ၍ ဒုတိယနှစ်(လမိုင်း)၊ တတိယနှစ်(လမတ်)၊ စတုတ္ထနှစ် (ခင်းဟောင်း)များကိုတော့ ဖေဖော်ဝါရီလမှ ဇူလိုင်လအထိ စိုက်ခင်းမြေပြုပြင်ခြင်းကိုသာ လုပ်ဆောင်ကြပြီး ဒီဇင်ဘာလတွင် ခုတ်သိမ်းရောင်းချကြကြောင်း သိရှိရပါသည်။

              တနင်္သာရီတိုင်းဒေသကြီး ကြံစိုက်တောင်သူများအနေဖြင့် ကြံဝယ်ယူသူများနှစ်ဉီးနှစ်ဖက် မနစ်နာသောဈေးနှုန်းတစ်ခုဖြင့် ရောင်းဝယ်ကြပါက  အကျိုးအမြတ်ရရှိပြီး  ကြံတစ်ချောင်းလျှင် (၂၀၀၀) ကျပ် ပေါက်ဈေးရှိကြောင်း ကြံစိုက်တောင်သူများထံမှသိရှိရပါသည်။

(DOCA)တနင်္သာရီ

            မြန်မာနိုင်ငံတစ်ဝန်း တိုင်းဒေသကြီးနှင့် ပြည်နယ်များအလိုက် ရာသီဥတု၊ ရေမြေသဘာဝနှင့် ကိုက်ညီကောင်းမွန်ပြီး စျေးကွက်အတွင်းရောင်းချနိုင်သော သစ်သီးဝလံများကို ဒေသအလိုက် စိုက်ပျိုးကြခြင်းဖြင့် ဝင်ငွေရရှိနိုင်ပါသည်။ သစ်သီးဝလံများကို လူအများအပြားစားသုံးကြခြင်းမှာလည်း ဓလေ့တစ်ခုပင်ဖြစ်နေပါသည်။ အဓိကစားသုံးသည့် သစ်သီးဝလံများထဲတွင် စောင်းလျားသီးသည်လည်း တစ်ခုအပါအဝင်ဖြစ်သည်။ စောင်းလျားသီးပင်သည် နေရာဒေသမရွေး၊ မြေအမျိုးအစားမ‌ရွေး စိုက်ပျိုးဖြစ်ထွန်းပါသည်။ အထူးသဖြင့် မြေသြဇာကောင်းမွန်သော နုန်းမြေများတွင် အပင်ပိုမိုကြီးထွားပါသည်။ စောင်းလျားသီးသည် မမှည့်သေးခင်တွင် အစိမ်းရောင်ရှိပြီး ချဥ်ဖန်ဖန်အရသာရှိပါသည်။ အသီးများမှည့်လာလျှင် အဝါရောင်သန်းပြီး အရည်ရွှမ်းလာပါသည်။ အရသာမှာ ချဥ်သောအရသာနှင့် ချိုသောအရသာဟူ၍ (၂)မျိုးရှိပါသည်။ စောင်းလျားပင်များကို  ထားဝယ်မြို့နယ်တဝိုက်ရှိ ကျေးလက်ဒေသများတွင် အိမ်ခြံမြေများအတွင်း တစ်နိုင်တစ်ပိုင်စိုက်ပျိုးကြကြောင်း သိရှိရပါသည်။

              ထားဝယ်စျေးကွက်တွင် စောင်းလျားသီး ကြီးကြီးလှလှ (၆)လုံးပါ တစ်ထုပ်လျှင် (၁၀၀၀/-)ကျပ်ဖြင့် ရောင်းချနေကြောင်း သိရှိရပါသည်။

DOCA(တနင်္သာရီ)

          ထားဝယ်မြို့တွင် စက်သုံးဆီအရောင်းဆိုင်များမှာ (၁၂)ဆိုင်ဖွင့်လှစ်ရောင်းချလျက်ရှိပြီး စက်သုံးဆီလက်လီစျေးနှုန်းများမှာ ယခုဖေဖော်ဝါရီလ တတိယပတ်အတွင်း ဒီဇယ်ရိုးရီုး တစ်လီတာ (၂၈၆၅) ကျပ်၊ ဒီဇယ်ပရီမီယမ် တစ်လီတာ (၃၅၀၀)ကျပ်၊ ဓါတ်ဆီ 92 တစ်လီတာ (၃၂၉၅) ကျပ်နှင့် ဓါတ်ဆီ 95 တစ်လီတာ (၃၃၅၀) ကျပ်တို့ဖြင့် ရောင်းချလျက်ရှိပြီး ယခင်ဖေဖော်ဝါရီလ ဒုတိယ ပတ်တွင် ဒီဇယ်ရိုးရိုး တစ်လီတာကို(၂၈၇၀) ကျပ်၊ ဒီဇယ်(ပရီမီယမ်)တစ်လီတာကို (၃၅၀၅) ကျပ် ၊ ဓါတ်ဆီ 92 တစ်လီတာကို (၃၂၉၀) ကျပ်နှင့် 95 (၃၃၅၅) ကျပ်ရှိခဲ့ပြီး ယခင်အပတ်နှင့် ယခုအပတ်အတွင်းဖြစ်ပေါ်နေသော စျေးနှုန်းများကို နှိုင်းယှဉ်ပါက ဓါတ်ဆီ 92 ဈေးနှုန်းအနည်းငယ်ကျဆင်းလျက်ရှိပြီး ကျန်စက်သုံးဆီဈေးနှုန်းများမှာ အနည်းငယ်မြင့်တက်နေကြောင်းသိရှိရပါသည်။

DOCA(တနင်္သာရီ)

          တနင်္သာရီတိုင်းဒေသကြီး လောင်းလုံးမြို့နယ်ရှိ ပင်လယ်ကမ်းရိုးတန်းတလျှောက် ကမ်းခြေရွာ များဖြစ်သည့် မောင်းမကန်၊ သဘော့ဆိပ်၊ ပန်းတင်အင်း၊ တီဇစ်၊ စမ်းလှမ်း စသော ကျေးရွားများမှ ကမ်းနီး၊ ကမ်းဝေးငါးဖမ်းလုပ်ငန်းများ၊ တစ်နိုင်တစ်ပိုင် ငါးဖမ်းလှေငယ်များမှ ဖမ်းယူရရှိသော ငါး၊ ပုစွန်၊ ဂဏန်းများကို ထားဝယ်မြို့၊ ဘုမ္မော်တောင်ရပ်ကွက် (ကြက်စားပြင်ရပ် အနီး) ရှိ SOUTHERN DRAGONS MYANMAR CO.,LTD မှ ဖွင့်လှစ်ထားရှိသော အောင်တံခွန် ကိုယ်ပိုင်ငါးဈေးသို့ လာရောက်ရောင်းချကြပါသည်။

          အဆိုပါ အောင်တံခွန် ကိုယ်ပိုင်ငါးဈေးတွင် ငါးဒိုင် (၁၈)ဒိုင်ခန့်ရှိပြီး တစ်ရက်လျှင် ငါးဒိုင် (၁)ဒိုင်၌ ငါးမျိုးစုံ အနည်းဆုံး ပိဿာချိန် (၃၀၀)မှ (၁၀၀၀)ကြား ဝင်ရောက်ကာ ထားဝယ်မြို့  ကမ်းနားပျံကျဈေးအပါအဝင် ရပ်ကွက်ဈေးများ၊ သရက်ချောင်းနှင့် ရေဖြူမြို့နယ်များရှိ ကျေးရွာ များသို့ ကားငယ်များ၊ ဆိုင်ကယ်များဖြင့်လက်လီ သွားရောက်ရောင်းချမည့်သူများ၊ တစ်ခါတစ်ရံ အခြားဒေသ များသို့ တင်ပို့မည့်သူများမှ လာရောက်ဝယ်ယူကြပါသည်။

          ငါးနှင့်သက်ရှိသယံဇာတများ ထိန်းသိမ်းနိုင်ရေးအတွက် ငါး၊ပုစွန်သားပေါက်ပွားသည့် ငါးဖမ်း ရာသီပိတ်ချိန်များဖြစ်သော ဧပြီ၊မေနှင့်ဇွန်လများ၊ ရာသီဥတုဆိုးရွား၍ မုန်တိုင်းသတင်း ကြေငြာထား ချိန်များတွင် ငါးဝင်ရောက်မှုများနည်းပါးတတ်သည်မှလွဲ၍  နေ့စဉ် နံနက်(၀၃း၀၀) နာရီမှ နံနက်(၀၆း၃၀) နာရီအချိန်အတွင်း  အစည်ကားဆုံးလာရောက်ဝယ်ယူကြ‌ကြောင်း စုံစမ်းသိရှိရပါသည်။

DOCA(တနင်္သာရီ)