ပြည်တွင်းကုန်သွယ်မှုသတင်း

     မွန်ပြည်နယ်သည် လယ်ယာသီးနှံ၊ ဥယျာဥ်ခြံသီးနှံများနှင့် ရော်ဘာ စိုက်ပျိုးထုတ်လုပ်မှု အကောင်းဆုံးပြည်နယ်ဖြစ်ရာ ကာလရှည်သီးနှံတစ်မျိုးဖြစ်သည့် ရာသီပေါ် မင်းကွတ်သီး များ စတင်ထွက်ရှိချိန် ယခင်နှစ်များထက် စျေးကောင်းရရှိ၍ စိုက်ပျိုးသူများ အဆင်ပြေလျက်ရှိသည်။

      မင်းကွတ်သီးပင်များသည် မြေပြန့်နှင့် မြေသြဇာထက်သန်သော သဲနုန်း​မြေပွ၊ ပူအိုက်စိုစွတ်ထိုင်းမှိုင်းသော ရာသီဥတုမျိုးကို ကြိုက်နှစ်သက်၍ အပင်များကို အစေ့မှ ပျိုးထောင်စိုက်ပျိုးခြင်းနှင့် ကိုင်းဆက်ကိုင်းကူးနည်းများဖြင့် အကျယ် ၃ ပေ၊ အနက် ၃ ပေ အတွင်းမှ တစ်ပင်နှင့်တစ်ပင် ပေ ၂၀ ခန့်အကွာ  စိုက်ပျိုးနိုင်ကြောင်း၊ ပျိုးပင် များ စိုက်ပျိုးပြီး (၁၀)နှစ် မှ (၁၂)နှစ် အရွယ်ရောက်ချိန်မှသာ အသီးစတင်ထွက်ရှိ၍ ခူးဆွတ်ရောင်းချနိုင်ပြီး အပင်တစ်ပင်လျှင် သက်တမ်း ၄၀ မှ ၅၀ နှစ် အထိ ရှင်သန် နိုင်ကာ ပိုးမွှားကင်းစင်သည့် အပင်တစ်မျိုး ဖြစ်ကြောင်း၊ မင်းကွတ်သီးများ ယခုစတင်ထွက်ရှိချိန် တစ်လုံးလျှင်ငွေကျပ် ၃၀၀မှ ၈၀၀ကျပ်အထိ  မြို့ပေါ်စျေးများနှင့် မော်လမြိုင်၊ ပဲခူး၊ ရန်ကုန်၊ မန္တလေးတိုင်းဒေသကြီးများအပြင် အခြားမြို့နယ် များကိုလည်း တင်ပို့ရောင်းချရကြောင်း မုဒုံမြို့​နေ ခြံစိုက်တောင်သူတစ်ဦးက ပြောသည်။

    မုဒုံမြို့နယ်တွင် ဒေသထွက် သစ်သီးဝလံ မျိုးကောင်းမျိုးသန့်များကို ပြည်တွင်းပြည်ပတင်ပို့နိုင်ရန် သုတေတနပြုစိုက်ခင်းများ ပျိုးထောင်ထားရှိခြင်း၊ သစ်သီးဝလံ သုတေတနစိုက်ပျိုးရေးနည်းပညာများကို တောင်သူများထံ ဖြန့်ဝေပေးခြင်း၊ သီးနှံကဏ္ဍဖွံ့ဖြိုးတိုးတက်ရေးအတွက် တောင်သူများနှင့်ပူးပေါင်းပြီး တာဝန်ရှိသူများက ကြိုးပမ်းဆောင်ရွက်လျက်ရှိကြောင်း သိရသည်။

DOCA(မွန်)

      မကွေးတိုင်းဒေသကြီးသည် မြန်မာနိုင်ငံ၏ဆီအိုးကြီးလို့ တင်စားရလောက်အောင် ဆီထွက် သီးနှံများ စိုက်ပျိုးဖြစ်ထွန်းသောတိုင်းဒေသကြီးတစ်ခုဖြစ်ပါသည်။ မကွေးတိုင်းဒေသကြီး၊ မင်းဘူး ခရိုင်၊ ပွင့်ဖြူမြို့နယ်သည် မင်းဘူး(စကု)-စလင်း(ဆင်ဖြူကျွန်း) ကားလမ်းမဘေးတွင် တည်ရှိပြီး မုန်းချောင်းမှရေများကို မြောင်းနှစ်သွယ်ဖြင့် သွယ်ယူကာ စပါး၊ ပဲ၊ နှမ်း၊ နေကြာ၊ မြေပဲနှင့် ဥယျာဉ်ခြံသီးနှံများကို အဓိကထား၍ စိုက်ပျိုးလုပ်ကိုင်ကြကြောင်း သိရှိရပါသည်။

          ပွင့်ဖြူမြို့နယ်တွင် ဆီထွက်သီးနှံအနေဖြင့် မြေပဲ၊ နှမ်းနှင့် နေကြာတို့ကို အဓိကထားစိုက်ပျိုး ကြပြီး ၂၀၂၄ခုနှစ်တွင် နွေနှမ်းကို လယ်မြေဧက(၂၇၁၉၃)ဧကကျော်စိုက်ပျိုးထားကြောင်း၊ နွေနှမ်းကို ဧပြီလ(တတိယပတ်)မှ စတင်စိုက်ပျိုးပြီး တစ်ဧကလျှင် မျိုးအနေဖြင့် (၂)ပြည်ခန့် ကုန်ကြကြောင်း၊ စိုက်ပျိုးရာတွင် အပူဒဏ်ကိုခံနိုင်သော နှမ်းမျိုးများဖြစ်သည့် ဆင်းရတနာ (၃)နှမ်းနက်၊ ဆင်းရတနာ (၄)နှမ်းဖြူ၊ ဆင်းရတနာ(၅)နှမ်းနီမျိုးများကို ထွန်ယက်၍ ရေတင်ရေဖြန်းစနစ်ဖြင့် စိုက်ပျိုးကြ ကြောင်း၊ နွေနှမ်းမျိုးကို ရက်တိုရက်ရှည်ပေါ်မူတည်၍ ဇွန်လကုန်နှင့် ဇူလိုင်လ(ပထမပတ်)တွင် ရိတ်သိမ်းမည်ဖြစ်ကြောင်း၊ (၁)ဧကလျှင် ကုန်ကျစရိတ်အနေဖြင့် ကျပ်(၂၀၀၀၀၀)ခန့်ကုန်ကျပါ ကြောင်း၊ နှမ်းစိုက်ပျိုးရန် စိုက်ပျိုးရေကို စောစီးစွာရရှိသောကြောင့် သီးနှံအထွက်နှုန်းအနေဖြင့် ကောင်းမွန်နိုင်မည် ဟုမျှော်မှန်းထားကြောင်း ပွင့်ဖြူမြို့နယ်နေ နွေနှမ်းစိုက်တောင်သူတစ်ဦးထံမှ သိရှိရပါသည်။

          ပွင့်ဖြူမြို့နယ်အနေဖြင့် နွေနှမ်းစိုက်ဧက (၂၇၁၉၃)ဧကတွင် ပထမတန်းစားမြေအနေဖြင့် (၁၂တင်းနှင့် ၁၅တင်း)ကြား၊ ဒုတိယတန်းစားမြေအနေဖြင့် (၁၀တင်းနှင့် ၁၂တင်း)ကြား၊ တတိယ တန်းစား မြေအနေဖြင့် (၈တင်းနှင့် ၁၀တင်း)ကြား ထွက်ရှိမည်ဖြစ်ကြောင်း စိုက်ပျိုးရေးဦးစီးဌာနမှ သိရှိရပါသည်။

DOCA(မကွေး)

       မကွေးတိုင်းဒေသကြီး၊ မကွေးခရိုင်၊ ‌တောင်တွင်းကြီးမြို့၊ မြို့မစျေး၌ ပွင့်လှကြီး၊ ပွင့်လှလေး၊ သီလရွာ၊ ဇီးတော၊ ဂွေးကုန်း၊ ကျောင်းကုန်း၊ ရွာသစ်၊ အောင်းပေါက်၊ ခင်တဲ၊ ပေါက်ကုန်း၊ ကုက္ကိုလှ၊ အုတ်ဖိုကျေးရွာများနှင့် မြို့ပေါ်(၁၀) ရပ်ကွက်ရှိ ပြည်သူများ လာရောက်ရောင်းဝယ်မှုပြုကြပါသည်။

     ၂၀၂၄ခုနှစ်၊ ဧပြီလ(စတုတ္ထပတ်)တွင် ဖြစ်ပေါ်နေသော ကုန်စျေးနှုန်းများမှာ ခရမ်းချဉ်သီး(၁)ပိဿာလျှင် ကျပ် (၁၇၀၀-၁၈၀၀)၊ ကြက်သွန်ဖြူ(ဗမာ)(၁)ပိဿာလျှင် ကျပ်(၈၀၀၀-၁၂၀၀၀)၊ အာလူး(၁)ပိဿာလျှင် ကျပ်(၃၂၀၀-၃၄၀၀)၊ ကြက်သွန်နီ(၁)ပိဿာလျှင် ကျပ်(၁၉၀၀-၂၀၀၀)၊ ကြက်သား(CP) (၁)ပိဿာလျှင် ကျပ်(၁၆၀၀၀-၁၈၀၀၀)၊ ကြက်သား (ဗမာ) (၁) ပိဿာ လျှင် ကျပ် (၁၈၀၀၀-၂၀၀၀၀)၊ ငါးကြင်း (၁)ပိဿာလျှင် ကျပ်(၁၂၀၀၀-၁၄၀၀၀)၊ ဝက်သား (၁)ပိဿာလျှင် ကျပ် (၁၈၀၀၀-၂၀၀၀၀)၊ အမဲသား (၁)ပိဿာလျှင် ကျပ်(၁၆၀၀၀)၊ ဆိတ်သား (၁)ပိဿာလျှင် ကျပ်(၁၆၀၀၀-၁၈၀၀၀)၊ကြက်ဥ (၁၀) လုံးလျှင် ကျပ် (၂၅၀၀-၃၀၀၀)နှင့် ဘဲဥ (၁၀) လုံးလျှင် ကျပ် (၃၈၀၀-၄၀၀၀) တို့ဖြင့် အသီးသီးအရောင်းအဝယ်ဖြစ်ခဲ့ပြီး မေလ(ပထမပတ်)တွင် ဖြစ်ပေါ်နေသော ကုန်စျေးနှုန်းများမှာ ခရမ်းချဉ်သီး(၁)ပိဿာလျှင် ကျပ် (၁၀၀၀-၁၂၀၀)၊ ကြက်သွန်ဖြူ (ဗမာ) (၁)ပိဿာလျှင် ကျပ် (၈၀၀၀-၁၂၀၀၀)၊ အာလူး (၁)ပိဿာလျှင် ကျပ် (၃၀၀၀- ၃၂၀၀)၊ ကြက်သွန်နီ (၁)ပိဿာလျှင် ကျပ် (၁၇၀၀-၁၈၀၀)၊ ကြက်သား ( CP) (၁)ပိဿာလျှင် ကျပ် (၁၆၀၀၀-၁၈၀၀၀)၊ ကြက်သား (ဗမာ) (၁)ပိဿာလျှင် ကျပ် (၁၈၀၀၀-၂၀၀၀၀)၊ ငါးကြင်း (၁)ပိဿာလျှင် ကျပ် (၁၂၀၀၀-၁၄၀၀၀)၊ ဝက်သား (၁)ပိဿာလျှင် ကျပ် (၁၈၀၀၀-၂၀၀၀၀)၊ အမဲသား (၁)ပိဿာလျှင် ကျပ် (၁၆၀၀၀)၊ ဆိတ်သား (၁)ပိဿာလျှင် ကျပ် (၁၆၀၀၀-၁၈၀၀၀)၊ ကြက်ဥ(၁၀)လုံးလျှင် ကျပ်(၂၅၀၀-၂၆၀၀)နှင့် ဘဲဥ (၁၀)လုံးလျှင် ကျပ်(၃၇၀၀-၄၀၀၀)တို့ဖြစ်၍ ယခင်အပတ်နှင့်နှိုင်းယှဉ်ပါက ယခုအပတ်တွင် ကြက်သွန်ဖြူ(ဗမာ)၊ ကြက်သား (CP)၊ ဝက်သား၊ ငါးကြင်း၊ မဲသား၊ ဆိတ်သားစျေးနှုန်းများမှာ တည်ငြိမ်နေပြီး ခရမ်းချဉ်သီး (၁)ပိဿာလျှင် ကျပ် (၆၀၀)၊ အာလူး (၁)ပိဿာလျှင် ကျပ် (၂၀၀)၊ ကြက်သွန်နီ(၁)ပိဿာလျှင် ကျပ် (၂၀၀)၊ ကြက်ဥ (၁၀)လုံးလျှင် ကျပ်(၄၀၀)နှင့် ဘဲဥ(၁၀)လုံးလျှင် ကျပ်(၁၀၀)တို့ဖြင့် အသီးသီးစျေးနှုန်းအနည်းငယ်ကျဆင်းလာကြောင်း သိရှိရပါသည်။

DOCA(မကွေး)         

   စစ်ကိုင်းတိုင်းဒေသကြီး၊ ကန့်ဘလူခရိုင်၌ ၂၀၂၄ခုနှစ်၊ မေလ ပထမပတ်အတွင်း ဖြစ်ပေါ်ခဲ့သော စပါး၊ ဆန်ဈေးနှုန်းများမှာ ရွှေဘိုပေါ်ဆန်းစပါးတင်း(၁၀၀)လျှင် ငွေကျပ်၃၉၀၀၀၀၀၊ ဧရာမင်းစပါးတင်း(၁၀၀)လျှင် ငွေကျပ်၂၆၀၀၀၀၀နှင့် ရွှေဘိုပေါ်ဆန်းဆန် ၂၄ပြည်ပါတစ်အိတ်လျှင် ငွေကျပ်၁၃၀၀၀၀၊ ဧရာမင်းဆန် ၂၄ပြည်ပါ တစ်အိတ်လျှင် ငွေကျပ်၁၂၀၀၀၀ဖြင့်အရောင်းအဝယ်ဖြစ်ခဲ့ရာ  ယခင်အပတ်နှင့်နှိုင်းယှဉ်ကြည့်လျှင် စပါးဈေးမှာ အနည်းငယ်မြင့်တက်နေပြီး ဆန်ဈေးနှုန်းမှာ တည်ငြိမ်လျက်ရှိကြာင်း၊ အခြားတိုင်းဒေသကြီးများသို့ ဆန်စီးထွက်မှုအနေဖြင့် မန္တလေးတိုင်းဒေသကြီးသို့ ဆန်အိတ်ရေ ၁၅၀၀အိတ်နှင့် ရန်ကုန်တိုင်းဒေသကြီးသို့အိတ်ရေ ၁၀၀၀၊ စုစုပေါင်း ၂၅၀၀အိတ်၊ တန်အားဖြင့် ၁၂၅တန်စီးထွက်ခဲ့ကြောင်း ဒေသခံဆန်စက်လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)                 

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးအနေဖြင့် တိုင်းဒေသကြီးဦးစီးမှူး၏လမ်းညွှန်ချက်၊ ခရိုင်စီမံအုပ်ချုပ်ရေးအဖွဲ့၏လမ်းညွှန်ချက်၊ ခရိုင်ဦးစီးမှူး၏ညွှန်ကြားကြီးကြပ်မှုတို့ဖြင့် လက်ရှိတာဝန်ထမ်းဆောင်လျက်ရှိသော ဝန်ထမ်းမိသားစုများ စားဝတ်နေရေးအတွက် အထောက်အကူဖြစ်စေရန်အလို့ငှာ ဒေါ်ဝေဝေအောင်က ဆောင်းရာသီ စားဖိုဆောင်သီးနှံများကို တစ်နိုင်တစ်ပိုင်အနေဖြင့် စိုက်ပျိုးထားကြောင်းသိရှိရပါသည်။

    ထိုသို့စားဖိုဆောင်သီးနှံများကို စိုက်ပျိုးထားရှိရာတွင် ရေ၊ မြေ၊ ရာသီဥတုနှင့်ကိုက်ညီပြီး ရာသီအလိုက် သီးနှံများဖြစ်သည့် ခရမ်းပင်၊ ချဉ်ပေါင်ပင်၊ ကန်စွန်းပင်၊ ပဲတောင့်ရှည်ပင်၊ ဖရုံပင်၊ ဘူးပင်၊ ငရုတ်ပင်နှင့် ရုံးပတီသီးပင်များကို မြေအောက်ရေတင်စနစ်ဖြင့် ကိုယ်တိုင်စိုက်ပျိုးထားရှိကာ ဓာတ်မြေဩဇာ၊ ပိုးသတ်ဆေးသုံးစွဲခြင်းမရှိသည့်အတွက် ဘေးအန္တရာယ်ကင်းရှင်းကာ လတ်လတ်ဆတ်ဆတ်ခူးဆွတ်စားသုံးရပြီး  ဝန်ထမ်းမိသားစုဝင်များ၏ စားဝတ်နေရေးအတွက် အထောက်အကူဖြစ်စေပြီး ကန့်ဘလူခရိုင်စုပေါင်းရုံးအတွင်းရှိ အခြားဌာနဝန်ထမ်းမိသားစုများကိုလည်း ပေးကမ်းဝေငှခြင်းများဆောင်ရွက်လျက်ရှိကြောင်းသိရှိရပါသည်။

   ဆက်လက်၍ ကန့်ဘလူခရိုင်ဦးစီးမှူးရုံးဝန်ထမ်းမိသားစုများအနေဖြင့် ရာသီအလိုက် စိုက်ပျိုးရသော စားဖိုဆောင်သီးနှံမျာကိုလည်း တစ်နိုင်တစ်ပိုင်နှင့် တတ်အားသ၍ စိုက်ပျိုးသွားမည်ဖြစ်ကြောင်း သတင်းရရှိပါသည်။

DOCA(စစ်ကိုင်း)