ဧရာဝတီတိုင်းဒေသကြီး မအူပင်မြို့နယ်သည် အဓိက ဆန်စပါးကို စိုက်ပျိုးလျှက်ရှိပြီး ပဲသီးနှံကိုလည်း စိုက်ပျိုးသည့် အပြင် မွေးမြူရေးလုပ်ငန်း၊ တစ်ပိုင်တနိုင် SME စက်မှု လက်မှုလုပ်ငန်းများ လုပ်ကိုင်နေပြီး ဒေသထွက် သီးနှံများကို ရန်ကုန်သို့ တင်ပို့နေကြောင်းသိရသည်။ မအူပင်မြို့နယ်တွင် စိုက်ပျိုးသော အုန်းချိုးမွှေး အုန်းသီးများကို ရန်ကုန်သို့ တင်ပို့နေကြောင်းသိရသည်၊ မအူပင်မြို့နယ်တွင် အုန်းသီးစိုက်ဧက ၁၈၈၃ စိုက်ပျိုးပြီး ဧက ၈၀၀ ထွက်ရှိနေပြီဖြစ်ကြောင်းသိရသည်။

         အုန်းချိုမွှေး စိုက်ပျိုးမှုအနေဖြင့်  ၁၇ဧကတွင် အပင်ပေါင်း ၁၅၃၀ ပင် စိုက်ပျိုးထားသည်။ မျိုးတစ်ပင်ကို ၅၀၀၀ကျပ်ဖြင့် ဝယ်ယူစိုက်ပျိုးရပြီး ၊ ယခုစိုက်ပျိုးသော အုန်းချိုမွှေး၏ သက်တမ်းမှာ ၃နှစ်သားရှိပြီး ဖြစ်၍ အသီးများ စတင်းသီး၍ ခူးနေရပြီဖြစ်ကြောင်း၊ တစ်လကို ၅၀လုံးခန့် ထွက်ရှိနေပြီး ခူးယူသည့်ကာလမှာ ၄လသာ ရှိ၍ အုန်းသီးအလုံးရေ ၂၀၀ ထွက်ရှိနေပြီဖြစ်သည်။ ၁၇ဧက ကုန်ကျစရိတ်အနေဖြင့် လက်ရှိအချိန်ထိ သိန်း နှစ်ထောက်ကျော်ရင်းနှီးမြုပ်နှံထားပြီး ကြားနှပ် သီးနှံမျိုးစုံလဲ စိုက်ပျိုးထားကြောင်းသိရသည်။

        အဆိုပါ စိုက်ပျိုးသော အုန်းချိုမွှေးသီးနှံကို လှိုင်လှိုင်ထွက်ပေါ်လာပါက ရန်ကုန်မြို့ရှိ City Mark များတွင်လည်းကောင်း၊ အခြားတိုင်းဒေသကီဲးများသို့လည်းကောင်း တင်ပို့ရောင်းချမည်ဖြစ်ပြီး၊ အုန်းချိုမွှေးးခြံတွင်လည်း အလှပန်းခြံပြုလုပ်ကာ လူမျိုးဘာသာမရွှေး လည်ပါတ်စားသုံး အပြန်ဖြေနိုင်ရန် ရည်ရွယ်ထားကြောင်း၊ လက်ရှိထွက်ရှိနေသော အုန်းသီးများကို ၁လုံးလျှင် ၅၀၀၀ကျပ်ဖြင့် ရန်ကုန်တွင် စမ်းသပ်ရောင်းချပေးနေကြောင်း အုန်းချိုမွှေးစိုက်ပျိုးသူ တာဝန်ခံမှ ရှင်းလင်းပြောပြ၍ သိရသည်။

DOCA (ဧရာဝတီ)

   မကွေးတိုင်းဒေသကြီး၊ အထက်မင်းလှမြို့၊ ဘွဲ့ကျေးရွာအုပ်စုရှိ ဇီးတောကျေးရွာ၌ ပဲနက် (ခေါ်)မောင်မခေါ်ပဲကို တောင်သူ(၂၀)ဦးမှ စိုက်ဧက(၄၀)ဧကခန့်အား ၂၀၂၄ခုနှစ်၊ အောက်တိုဘာလတွင် စိုက်ပျိုးခဲ့ကြောင်း သိရသည်။

    စိုက်ပျိုးရာတွင် မျိုးကို အထက်မင်းလှမြို့ပေါ်ရှိ ပွဲရုံများမှ (၁)တင်းလျှင် ကျပ်(၈၀၀၀၀)ဖြင့် ဝယ်ယူ၍ ထွန်ကြောင်းဆွဲအစေ့ချစနစ်ဖြင့် စိုက်ပျိုးကြကြောင်း၊ (၁)ဧကလျှင် မျိုး(၁)တင်းခန့်ကုန်ကျပြီး အပင်သက်တမ်း(၅)လအကြာတွင် ခူးဆွတ်ရကြောင်း၊ ကုန်ကျစရိတ်အနေဖြင့် ယခင်နှစ်နည်း တူ ယခုနှစ်တွင်လည်း မျိုးဖိုး၊ လုပ်အားခ၊ မြေပြုပြင်ခနှင့် အခြားသွင်းအားစုစရိတ်အပါအဝင် ကျပ် (၃)သိန်းခန့်ကုန်ကျကြောင်း၊ ယခင်နှစ်က (၁)ဧကလျှင် (၁၅)တင်းထိထွက်ရှိပြီး (၁)တင်းလျှင် ကျပ် (၈၀၀၀၀)ထိဈေးရရှိကာ အကျိုးအမြတ်အနေဖြင့် ကျပ်(၉)သိန်းရရှိခဲ့ကြောင်း၊ ယခုနှစ်တွင်လည်း ရာသီဥတုသမမျှတ၍ ပဲပင်များအောင်မြင်ဖြစ်ထွန်းလျက်ရှိရာ ယခင်နှစ်နည်းတူ အထွက်နှုန်းများ ကောင်းမွန်နိုင်မည်ဖြစ်ကြောင်း၊ ဈေးကွက်အနေဖြင့် အထက်မင်းလှမြို့ရှိ ပွဲရုံများသို့ တင်ပို့ရောင်းချကြောင်း၊ ယခုဒီဇင်ဘာလ(ဒုတိယပတ်)တွင် ပဲနက်(ခေါ်)မောင်မခေါ်ပဲ(၁)တင်းလျှင် ကျပ် (၈၈၀၀၀) ဖြင့်အရောင်းအဝယ်ဖြစ်လျက်ရှိကြောင်း ဇီးတောကျေးရွာနေ ပဲနက်စိုက်တောင်သူတစ်ဦး ထံမှ သိရှိရပါသည်။

DOCA(မကွေး)

အစေ့ထုတ်ပြောင်းများကို ရှမ်းပြည်နယ်တောင်ပိုင်းတွင် အများအပြား စိုက်ပျိုးလျက် ရှိပါ သည်။ ရှမ်းပြည်နယ်တောင်ပိုင်းတွင် ၂၀၂၄-၂၀၂၅  စိုက်ဧကမှာ(၁၀၀၉၉၇၀) စိုက်ဧက ရှိပါသည်။ ရေရရှိသော နေရာများတွင်စိုက်ပျိုးသော အစေ့ထုတ်ပြောင်းများသည် စက်တင်ဘာလ တွင် စတင်ထွက်ရှိပြီး မိုးရေကိုအားထား၍ စိုက်ပျိုးသော အစေ့ထုတ်ပြောင်းများကို နိုဝင်ဘာလတွင် စတင်ထွက်ပေါ်လေ့ ရှိပါသည်။ ယခုနှစ်တွင် အစေ့ထုတ်ပြောင်း စတင်ထွက်ပေါ်ချိန်တွင် တစ်ပိသာလျှင်(၁၂၀၀)ကျပ်ခန့် ဒေသပေါက်ဈေး ရှိခဲ့ပါသည်။ လက်ရှိအချိန်တွင် အစေ့ထုတ် ပြောင်း တစ်ပိသာအနေဖြင့်(၁၄၅၀) မှ (၁၅၀၀) ကျပ်ခန့် ပေါက်ဈေးရှိပါသည်။ အစေ့ထုတ်ပြောင်း ကို မွေးမြူရေး အစားအစာ အဖြစ် ဝယ်ယူကြပြီး အခြားတိုင်းဒေသကြီး ပြည်နယ်များသို့လည်း တင်ပို့ရောင်းချလျှက် ရှိပါသည်။ လက်ရှိအချိန်တွင် အစေ့ထုတ်ပြောင်းများအား (၁၀) ဘီး၊(၁၂)ဘီး  (၂၂)ဘီး ကားများဖြင့် တစ်ရက်လျှင် ပျှမ်းမျှ (၂၀) စီး မှ (၃၀ ) စီး အထိ စီးထွက်လျှက်ရှိကြောင်း သတင်းရရှိပါသည်။

DOCA(ရှမ်း)

ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ  ဝန်ထမ်းများသည် ၂၀၂၄ ခုနှစ်၊ ဒီဇင်ဘာလ ၁၃ ရက်နေ့၊ နံနက်(၇:၃၀)နာရီချိန်တွင် ရှမ်းပြည်နယ်အတွင်းရှိ စားသုံးသူ ပြည်သူများအနေဖြင့် ကုန်ဈေးနှုန်းကြီးမြင့်မှုကြောင့် စားဝတ်နေရေးဆိုင်ရာ ဝန်ထုပ်ဝန်ပိုးမြင့်မားမှု မရှိစေရေးအတွက် ပြည်နယ်အတွင်းမှ ထုတ်လုပ်သောကြက်ဉများအား သင့်တင့်မျှတသော ဈေးနှုန်းဖြင့် စားသုံးသူပြည်သူများထံသို့ရောင်းချပေးရန် ရှမ်းပြည်နယ်ကုန်ဈေးနှုန်းတည်ငြိမ်ရေး လုပ်ငန်းအဖွဲ့ ဉက္ကဌမှ လမ်းညွှန်မှာကြားချက်အရ ကြက်မွေးမြူရေးလုပ်ငန်းများမှ တောင်ကြီးမြို့ပေါ်ရှိ စည်ပင်သာ ယာဈေးများဖြစ်သော မြို့မဈေး၊ အမှတ်(၅)ဈေး၊ စဝ်စံထွန်းဈေး၊ အဝေရာဈေး၊ အေးသာယာမြို့မှ အေးသီရိဈေး၊ ရွှေညောင်ဈေးတို့တွင် နေ့စဉ် (တနင်္လာ၊ ဗုဒ္ဓဟူး၊ သောကြာ)နေ့များတွင် တာဝန်ကျ ကြက်ဥဒိုင်များမှ အလှည့်ကျရောင်းချပေးသော နေရာများသို့ အမှန်တကယ်‌ရောင်းချမှု ရှိ/မရှိကို သွားရောက်၍  မြေပြင်ကွင်းဆင်း စစ်ဆေးဆောင်ရွက်ခဲ့ပါသည်။

ထိုသို့ ကွင်းဆင်းဆောင်ရွက်မှုအနေဖြင့် (၁၃.၁၂.၂၀၂၄)ရက်နေ့တွင် တောင်ကြီးမြို့ပေါ်ရှိ မြို့မဈေး၌ တာဝန်ကျသော ကောင်းထက်ကြက်ဥဒိုင်မှ အလုံးရေ(၂၂၈၀)လုံး၊ အမှတ်(၅)ဈေး၌ ဧရာနဒီ ကြက်ဥဒိုင်မှ အလုံးရေ(၂၁၅၀)လုံး၊ စဝ်စံထွန်းဈေး၌ ခိုင်ခိုင်ကျော် ကြက်ဥဒိုင်မှ အလုံးရေ(၂၂၄၅)လုံး၊ အဝေရာဈေး၌ တက်ချောင် ကုမ္ပဏီမှ အလုံးရေ(၄၉၀၀)လုံး၊ အေးသာယာမြို့ အေးသီရိဈေး၌ ပွင့်ကြက်ဥဒိုင်မှ အလုံးရေ (၇၃၀)လုံး၊ ရွှေညောင်ဈေး၌ မကွေးကြက်ဥဒိုင်မှ အလုံးရေ(၁၈၆၀)လုံးများကို တစ်လုံးလျှင်(၃၈၀)ကျပ် ဖြင့်ရောင်းချနေကြောင်း သတင်းရရှိပါသည်။

DOCA(ရှမ်း)

             ပြည်ခရိုင်၊ ရွှေတောင်မြို့နယ်၊ ဝါးတောအုပ်စု၊ ဖားအိုင့်ရွာရှိ တောင်သူဒေါ်နွယ်နွယ်ဝင်း၏ ပင်ဆိုင်စိုက်ခင်းသို့ (၆.၁၂.၂၀၂၄)ရက်နေ့ နံနက်(၁၀:၃၀)နာရီ အချိန်တွင် သွားရောက်လေ့လာခဲ့ရာ ပင်ဆိုင်ပင်များကို သီတင်းကျွတ်လတွင် စိုက်ပျိုးပြီး တစ်လကြာလျင် ပင်ဆိုင်ပင်များကိုနုတ်ယူ ရောင်းချ၍ရပါသည်။ ပင်ဆိုင်ပင်ကို တစ်ပင်နှင့်တစ်ပင် ၁ပေ အကွာတွင် စိုက်ပျိုးပြီး မြောင်း(၁၀) မြောင်းတူး၍ မြောင်း(၁၀)မြောင်းကို မျိုးစေ့ ၁ထုပ် ဖြင့်စိုက်ပျိုးရပါသည်။ ပင်ဆိုင်ပင်များသည် တစ်လလုံးအတွက် အစာကို ၂ပြည် အနည်းဆုံးကျွေးရပြီး ပင်ဆိုင်အပင်မှာ အားကောင်းလျင် အပင် ရေ(၅၀၀၀)ထွက်ရှိပါသည်။ ပင်ဆိုင်ပင်များကို နှုတ်ယူရောင်းချချိန်တွင် တစ်နေ့လျင် အပင်ရေ၁၀၀ပင်မှ အပင်ရေ ၁၅၀ အထိနုတ်လို့ရရှိကြောင်း သိရပါသည်။ ပင်ဆိုင်ပင်များကို ဒိုင်များမှ အပင်အကြီးအသေးကို တစ်ပင်လျှင် ၁၅၀ ကျပ်နှုန်းဖြင့် လာရောက်ဝယ်ယူကြောင်း သိရှိရပါသည်။ ကုန်စိမ်းဒိုင်များမှတစ်ဆင့် လက်လီပြန်လည်ရောင်းဈေးမှာ ပင်ဆိုင်တစ်ပင်ကို (၂၀၀-၃၀၀) ကျပ်ဖြင့် ရောင်းချကြပါသည်။ ပင်ဆိုင်မျိုးစေ့ တစ်ထုပ်စိုက်ပျိုးခြင်း၏ ကုန်ကျစရိတ်မှာ ၅၀၀၀၀ ကျပ်ခန့်ကုန်ကျပြီး တစ်နေ့ကို အနည်းဆုံးအပင်ရေ (၁၀၀)ထွက်ပါက တစ်နေ့ဝင်ငွေမှာ ၂၀၀၀၀ ကျပ်ရရှိသောကြောင့် တစ်လကြာစိုက်ပျိုးရသောအပင်ဖြစ်ပြီး အကျိုးအမြတ်များများရရှိကြောင်း သိရှိရပါသည်။

DOCA(ပဲခူး)