ပြည်တွင်းကုန်သွယ်မှုသတင်း

          ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ လေးကြီးကျေးရွာတွင် ခရမ်းကြွပ်သီးများကို စိုက်ပျိုးထွက်ရှိနေပြီဖြစ်ပါသည်။ တောင်သူများနေဖြင့် ခရမ်းကြွပ်သီးကို ဧကပြတ်စိုက်ပျိုးထားခြင်းမရှိဘဲ အခြားသီးနှံများဖြင့်ရောနှော၍ စိုက်ပျိုးထားရှိပါသည်။ ခရမ်းကြွပ်သီးကိုအများဆုံးစိုက်ပျိုး ဧကမှာ (၀.၂၅)ဧက တစ်ယောက်သာစိုက်ပျိုးထားကြောင်းသိရှိရပါသည်။ ခရမ်းကြွပ်သီး (၀.၂၅)ဧကတွင် အပင်ပေါင်း (၂၀၀၀)ခန့်စိုက်ပျိုးနိုင်ပြီး မျိုး၊ စိုက်ပျိုးစရိတ်၊ သွင်းအားစု လုပ်သားခအပါအဝင် ကုန်ကျစရိတ်မှာ (၅)သိန်းကျပ်ခန့် ကုန်ကျကြောင်းသိရပါသည်။ ခရမ်းကြွပ်သီးခူးဆွတ်ချိန်ရောက်ရှိလျှင် (၃)ရက်ခြားတစ်ခါ ခူးဆွတ်ရရှိပြီး တစ်ကြိမ်ခူးဆွတ်လျှင် (၀.၂၅)ဧကတွင် အလုံးရေ (၈၅၀၀)ခန့် ခူးဆွတ်ရရှိကြောင်းသိရှိရပါသည်။ ခရမ်းကြွပ်သီးတစ်ခါစိုက်ပျိုးထားလျှင် ခူးဆွတ်ချိန်မှာ (၁)လခွဲခန့်ကြာမြင့်ပြီး ခူးဆွတ်သည့်အကြိမ်ရေမှာ (၁၅)ကြိမ်ခန့် ခူးဆွတ်ရရှိကြောင်း သိရပါသည်။ ခရမ်းကြွပ်သီးများကို ကုန်စိမ်းပွဲစားများက စိုက်ခင်းအထိလာရောက်ဝယ်ယူကြ၍ ဖောက်သည်ဈေးအနေဖြင့် တစ်လုံးလျှင် (၁၀)ကျပ်ဖြင့် ရောင်းချကြပါသည်။ တောင်သူဝင်ငွေနေဖြင့် (၀.၂၅)ဧကတွင် (၁၂၇၅၀၀၀)ကျပ်ခန့် ရရှိပြီး အသားတင်အမြတ်အနေဖြင့် (၇၇၅၀၀၀) ကျပ် ရရှိကြောင်းသိရပါသည်။

          ခရမ်းကြွပ်သီးကိုကုန်စိမ်းဒိုင်များမှတစ်ဆင့် နယ်မြို့များရှိဈေးကွက်များသို့ ပြန်လည်ဖြန့်ဖြုးရောင်းချကြကြောင်းသိရပါသည်။ စိုက်ပျိုးသူများအနေဖြင့်လည်း စိုက်ပျိုးသင့်သလို တစ်ဆင့်ပြန်လည်ရောင်းချသူများအနေဖြင့်လည်း သင့်တင့်သောအမြတ်အစွန်းများ ရရှိနိုင်မည်ဖြစ်ကြောင်းသိရှိရပါသည်။

DOCA(ပဲခူး)

            ရုံးပတီသီးအပင်သည် အပင်အနိမ့်အမြင့်ပေါ်မူတည်ပြီး အသီးပုံသဏ္ဍာန်အမျိုးမျိုးရှိပါသည်။ အပင်ငယ်မျိုးကို ၂ပေ ၃ပေကြား ခွာစိုက်ပျိုးရပါသည်။ စိုက်ပျိုးရာတွင် ရုံးပတီသီးစေ့အား ရေစိမ်ထားပြီးမှ မြေကြီးအတွင်း စိုက်ပျိုးရပါသည်။ ရုံးပတီသီးအပင်သည် တစ်နှစ်ပတ်လုံးစိုက်ပျိုး၍ရသည့် အပင်မျိုးဖြစ်ပါသည်။ ရုံးပတီတောင့်များသည် အပင်ခြေမှ ထိပ်ဖျားသို့ အစဉ်လိုက်ရင့်မှည့်ပါသည်။ ရုံးပတီသီးတောင့်များသည် မိုးရာသီစိုက်ပျိုးသည့်အပင်မှထွက်သော အသီးနှင့် နွေရာသီစိုက်ပျိုးသည့် အပင်မှထွက်ရှိသည့် အသီးများသည် အလုံးချောမတူညီပေ၊ မိုးရာသီတွင် ထွက်ပေါ်သော ရုံးပတီသီးတောင့်များသည် အစိမ်းရောင်ပိုတောက်ပြီး အရွယ်အစားမှာလည်းကြီးပြီး ဈေးမှာလည်းသက်သာပါသည်။ ရုံးပတီသီးအတောင့် ၁၀၀တွင် ပါဝင်သော ရုံးပတီသီးအစေ့များကို စိုက်ပျိုးလျှင် မြေ ၁ဧက စိုက်ပျိုး နိုင်ပါသည်။ ရုံးပတီသီးတောင့်များအား ပြည်ဈေးကွက်တွင်ရောင်းချလျှက်ရှိရာ ရောင်းချသောဈေးနှုန်းများမှာ အကြီးတောင့် (၁၀)တောင့် လျှင် (၂၀၀)ကျပ်၊ အလတ်အသေးတောင့် များအား (၁၀)တောင့်လျှင် (၁၅၀)ကျပ်ဖြင့် ရောင်းချနေ ကြောင်း သိရပါသည်။ ရုံးပတီသီးပင်များအား ပြည်မြို့နယ် ဒေသတစ်ဝိုက်တွင် အများအပြားစိုက်ပျိုးကြကြောင်း သိရှိရပါသည်။

DOCA(ပဲခူး)

           ပြည်ကုန်စည်ဒိုင်တွင် ပဲမျိုးစုံအ‌ရောင်းအဝယ်ဖြစ်လျက်ရှိပါသည်။ မတ်ပဲ၊ ပဲတီစိမ်း၊ ကုလားပဲ၊ ပဲကြီးနှင့် ဘိုကိတ်ပဲများ အရောင်းအဝယ်ဖြစ်လျက်ရှိပါသည်။ ဒီဇင်ဘာလ ဒုတိယပတ်တွင် မတ်ပဲတစ်တင်းလျှင် (၁၁၄၀၀၀)ကျပ်ဖြင့် ရန်ကုန်အရောင်းအဝယ် တစ်ရက်တွင် အိတ်(၂၀၀)ခန့် အဝယ်ရှိပါသည်။ ပဲတီစိမ်းတစ်တင်းလျှင် (၉၈၀၀၀)ကျပ်ဖြင့် အရောင်းအဝယ် တစ်ရက်တွင် အိတ်(၅၀၀-၆၀၀)ခန့် ရှိပါသည်။ ကုလားပဲ (HL)တစ်တင်းကို (၁၀၂၅၀၀-၁၀၃၀၀၀)ကျပ်ဖြင့် မြို့တွင်းခွဲစက်သမားများနှင့် ရန်ကုန်အဝယ်တစ်ရက်ကို အိတ် (၃၀၀)ခန့် ရှိပါသည်။ ဒီဇင်ဘာလ ဒုတိယပတ်တွင် ပဲကြီး(‌ရွှေကျွန်း)တစ်တင်းကို (၈၈၀၀၀)ကျပ်၊  ပဲကြီး(ကုန်းပဲ) တစ်တင်းလျှင် (၈၂၀၀၀)ကျပ်ဖြင့် မြို့တွင်းပဲကြော်သမားများနှင့် နယ်စုံအရောင်းအဝယ်ရှိပြီး တစ်ရက်ကို အိတ် (၂၅၀-၃၀၀)ခန့်ရှိပါသည်။ ဘိုကိတ်ပဲသစ်များအဝင်ရှိပြီး တစ်တင်းကို (၉၀၀၀၀-၉၂၀၀၀)ကျပ်ဖြင့် ဈေးဖွင့်အဝယ်ရှိပြီး တစ်ရက်ကို အိတ်(၂၀၀)ခန့် အဝယ်ရှိပါသည်။ ပြည်ကုန်စည်ဒိုင်တွင် ပဲစဉ်းငုံနှင့် စားတော်ပဲ လက်ကျန်နည်းနေပြီး အရောင်းအဝယ်မှာ နည်းလျက်ရှိကြောင်းသိရှိရပါသည်။

DOCA(ပဲခူး)

             ယခုလိုဆောင်းရာသီအချိန်တွင် အသီးအနှံနှင့် ဟင်းသီးဟင်းရွက်များ ပေါများစွာပေါ်ထွက်လာနေပြီဖြစ်ပါသည်။ ပြည်ခရိုင်အတွင်း ဆောင်းရာသီတွင် ထွက်ပေါ်လာသော သီနှံများမှာ ပန်းဂေါ်ဖီ၊ မုန်လာဥဖြူ၊ ခရမ်းချဉ်သီးနှင့် ပြောင်း စသည့် အသီးအနှံနှင့် ဟင်းသီးဟင်းရွက်များ အများအပြားထွက်ပေါ်လာပါသည်။ ဆောင်းရာသီဖြစ်၍ အသီးအနှံများ အများအပြားထွက်ပေါ် လာပြီး စားသုံးသူများအနေဖြင့် ပေါများစွာဝယ်ယူစားသုံး နိုင်ကြပါသည်။ ပြည်ခရိုင်အနေဖြင့် ပြည်မြို့နယ်တွင် ဟင်းသီးဟင်းရွက်နှင့် အသီးအနှံအများအပြား စိုက်ပျိုးဒေသများမှာ မှော်ဇာ၊ ခွေးရဲ၊ ကင်ပွန်းခြုံကျေးရွာများဖြစ်ပြီး၊ ရွှေတောင်မြို့နယ်အနေဖြင့် မီးလောင်အုပ်စု၊ မီးလောင်ကျေးရွာနှင့် ကိုးတွင်းစဉ်ကျေးရွာ၊ ပေါက်ခေါင်းမြို့နယ်တွင် လေးကြီးကျေးရွာ၊ သဖန်းချိုကျေးရွာတို့တွင် စိုက်ပျိုးကြပါသည်။ ထိုကျေးရွာများတွင် ဟင်းသီးဟင်းရွက်နှင့် အသီးအနှံများကို စီးပွားဖြစ်စိုက်ပျိုးကြပါသည်။ တချို့ကျေးရွာများတွင် စီးပွားဖြစ်မဟုတ်ပဲ အိမ်ခြံမြေများတွင် တစ်နိုင်တစ်ပိုင် စိုက်ပျိုးကြပါသည်။ စိုက်ပျိုးသောသီးနှံများအနေဖြင့် စင်တင်၍ဖြင့် စိုက်ပျိုးရသောသီးနှံများဖြစ်သော ဘူးသီး၊ ဖရုံသီး၊ သခွားသီး၊ ခဝဲသီး၊ နှင့် ကြက်ဟင်းခါးသီးများကို စိုက်ပျိုးသလို မုန်လာဥ(ဖြူ၊ နီ)၊ ငရုတ်သီး၊ ခရမ်းသီး၊ ချဉ်ပေါင်၊ ကန်စွန်း၊ ဆလပ်၊ ကြက်သွန်နီ၊ နံနံပင်၊ ခရမ်းချဉ်သီးများကို စိုက်ပျိုးကြပါသည်။ ထို့အပြင် ကင်ပွန်းချဉ်၊ ဆူးပုတ်ပင်၊ ခွေးတောက်ပင်တို့ကိုလည်း စိုက်ပျိုးကြပါသည်။ ထိုသို့စိုက်ပျိုးပြီးထွက်ရှိလာသော အသီးအနှံနှင့် ဟင်းသီးဟင်းရွက်များကို ကုန်စိမ်းဒိုင်များမှ တစ်ဆင့်နယ်မြို့များရှိ ဈေးများနှင့် ရန်ကုန်မြို့သို့ တင်ပို့ရောင်းချကြပါသည်။ ပြည်မြို့ရှိဈေးကွက်များသို့လည်း အနီးတဝိုက်ရှိကျေးရွာများမှ လာရောက်ရောင်းချကြပါသည်။ လာရောက်ရောင်းချသော အသီးအနှံများမှာ မုန်လာဥ(အဖြူ) တစ်တွဲလျှင် (၇၀၀-၈၀၀)ကျပ်၊ ပန်းဂေါ်ဖီ တစ်ထုပ်လျှင် (၁၀၀၀-၁၂၀၀-၁၅၀၀)ကျပ်၊ မုန်လာဥ (အနီ) တစ်ဆယ်ကျပ်သားလျှင် (၈၀၀-၁၀၀၀-၁၂၀၀)ကျပ်၊ ခရမ်းချဉ်သီး(ရှမ်းသီး) တစ်ပိဿာလျှင် (၅၅၀၀)ကျပ်၊ ခရမ်းချဉ်သီး(ဒေသသီး) တစ်ပိဿာလျှင် (၁၀၀၀၀)ကျပ်၊ ငရုတ်သီးစိမ်း တစ်ဆယ်သားလျှင် (၁၀၀၀)ကျပ်၊ ကြက်သွန်နီ တစ်ပိဿာလျှင် (၃၅၀၀)ကျပ်၊ ချဉ်ပေါင်ရွက် တစ်စည်းလျှင် (၂၀၀)ကျပ်၊ နံနံပင် တစ်စည်းလျှင် (၁၀၀)ကျပ်၊ ဆလပ်ရွက် တစ်စည်းလျှင် (၁၀၀)ကျပ်၊ ဆူးပုတ်ရွက် တစ်စည်း လျှင် (၂၀၀)ကျပ်၊ ဂွေးတောက်ရွက် တစ်စည်း လျှင်(၁၀၀)ကျပ်ဖြင့် ရောင်းချကြောင်း သိရှိရပါသည်။

DOCA(ပဲခူး)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် လယ်ယာစိုက်ပျိုးရေးလုပ်ငန်းများအပြင် စားဖိုဆောင်သီးနှံများဖြစ်သည့် ကြက်သွန်နီ၊ မုန်လာဥဖြူ၊ မုန်လာထုပ်တို့လည်း တစ်နိုင် တစ်ပိုင်စိုက်ပျိုးကြကြောင်း သိရသည်။

    ကန့်ဘလူမြို့နယ်အတွင်းရှိ ကာဘိုးကျေးရွာနှင့်အနီးကျေးရွာများတွင် မိသားစုစားသုံးရန်နှင့် ပိုလျှံသည်များကို ရောင်းချရန်အတွက် ကြက်သွန်နီကိုစိုက်ပျိုးကြကြောင်း သိရသည်။ ၂၀၂၄ ခုနှစ်၊ ဒီဇင်ဘာလပထမပတ်အတွင်း ကန့်ဘလူမြို့မဈေး၌ ကြက်သွန်နီတစ်ပိဿာလျှင် ငွေကျပ် ၄၅၀၀-၅၀၀၀ရှိခဲ့ရာ ဒီဇင်ဘာလဒုတိယပတ်တွင် ကြက်သွန်နီတစ်ပိဿာလျှင် ငွေကျပ် ၄၀၀၀-၄၅၀၀ဖြင့် ရောင်းချကြောင်း၊ ယခုပတ်အတွင်း ကြက်သွန်နီတစ်ပိဿာလျှင် ငွေကျပ် ၅၀၀ ခန့်ကျဆင်း၍ အရောင်းအဝယ်ဖြစ်လျက်ရှိကြောင်း ကန့်ဘလူမြို့မဈေးရှိ ကြက်သွန်နီနှင့်ကုန်မျိုးစုံရောင်းဝယ်ရေး လုပ်ငန်းရှင်များထံမှ သိရသည်။

DOCA(စစ်ကိုင်း)