ပြည်တွင်းကုန်သွယ်မှုသတင်း

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် အရောင်းအဝယ်ဖြစ်လျက်ရှိသည့် ဂျင်း(ချင်း)တက်များကို ရှမ်းပြည်နယ် အောင်ပန်းမြို့မှလည်းကောင်း၊ မန္တလေးမြို့မှလည်းကောင်း ဝယ်ယူရကြောင်း၊ ဂျင်း(ချင်း)တက်ကို အစားအသောက်များတွင် အရသာပိုမိုကောင်းမွန်ရန်အတွက် အသုံးပြုကြသလို၊ ဂျင်းပေါက်ပြုလုပ်သည့် လုပ်ငန်းရှင်များကလည်း ဝယ်ယူကြောင်း သိရသည်။

           ၂၀၂၅ ခုနှစ်၊ စက်တင်ဘာလ တတိယပတ်အတွင်း ကန့်ဘလူမြို့မဈေးတွင် ရောင်းချနေသည့်  ဂျင်း(ချင်း)တက်ဈေးနှုန်းများမှာ လက်လီ(၁)ပိဿာလျှင်(၇၀၀၀)ကျပ်၊ လက္ကား(၁)ပိဿာလျှင် (၆၅၀၀)ကျပ်ဖြင့်ရောင်းချကြောင်း၊ ကန့်ဘလူမြို့နယ်အတွင်း တစ်နိုင်တစ်ပိုင် ဂျင်းပေါက်လုပ်ငန်းများလုပ်ကိုင်လျက်ရှိရာ ဂျင်းပေါက်လက်လီ(၁)ပိဿာလျှင် (၅၅၀၀)ကျပ်နှင့် လက္ကားတစ်ပိဿာ လျှင် (၅၀၀၀)ကျပ်ဖြင့်ရောင်းချကြောင်း၊ စက်တင်ဘာလ ဒုတိယပတ်ဈေးနှုန်းများနှင့် နှိုင်းယှဉ်ပါက ယခုတတိယပတ်အတွင်း ဂျင်းပေါက်(၁)ပိဿာလျှင် (၅၀၀)ကျပ်ဈေးနှုန်းကျဆင်းသွားကြောင်း လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းမျာ ဆောင်ရွက်လျက်ရှိသလို   စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန်များ၏ ဈေးနှုန်း၊ ဈေးကွက်အခြေအနေများကို လေ့လာ၍ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။

        ခရမ်းချဉ်သီးများကို မန္တလေးမြို့မှ ဝယ်ယူရောင်းချလျက်ရှိရာ ၂၀၂၅ ခုနှစ်၊ စက်တင်ဘာလ တတိယပတ်အတွင်း ခရမ်းချဉ်သီးဈေးနှုန်းများမှာ အင်းသီးအလုံးကြီး(၁)ပိဿာလျှင် (၃၅၀၀)ကျပ်၊ (၅၀)ကျပ်သားလျှင် (၁၈၀၀)ကျပ်နှင့် (၁၀)ကျပ်သားလျှင် (၄၀၀)ကျပ်ဈေးနှုန်းဖြင့်ရောင်းချကြောင်း၊ အောင်ပန်းသီး(၁)ပိဿာလျှင် (၃၀၀၀)ကျပ်နှင့် (၅၀)ကျပ်သားလျှင် (၁၅၀၀)ကျပ်ဈေးနှုန်းများဖြင့် ရောင်းချလျက်ရှိရာ ယခင်အပတ်ဈေးနှုန်းများဖြင့် နှိုင်းယှဉ်ပါက စက်တင်ဘာလ တတိယပတ်အတွင်း ခရမ်းချဉ်သီး(၁)ပိဿာလျှင် (၅၀၀)ကျပ် ဈေးနှုန်းကျဆင်းသွားကြောင်း သိရှိရပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ ကန့်ဘလူခရိုင်အတွင်းရှိ မြို့နယ်များနှင့် အခြားကျေးရွာများသည် လယ်ယာစိုက်ပျိုးရေးလုပ်ငန်းများအပြင် စားဖိုဆောင်သီးနှံများဖြစ်သည့် ကြက်သွန်နီ၊ ကြက်သွန်ဖြူတို့ကိုလည်း မိသားစုစားသုံးရန်နှင့် ပိုလျှံသည်များကို ရောင်းချရန်အတွက် တစ်နိုင်တစ်ပိုင် စိုက်ပျိုးလျက်ရှိကြောင်း သိရသည်။

        ၂၀၂၅ ခုနှစ်၊ စက်တင်ဘာ  တတိယပတ်အတွင်း ကန့်ဘလူမြို့နယ်၌ ကြက်သွန်ဖြူရှမ်းဥ အလုံးကြီး(၁)ပိဿာလျှင် (၁၃၀၀၀)ကျပ်၊ ဗမာဖြူ(၁)ပိဿာလျှင်(၇၅၀၀)ကျပ်နှင့် ဗမာဖြူ(၁၀) ကျပ်သားလျှင် (၈၀၀)ကျပ်ဖြင့် ရောင်းချလျက်ရှိကြောင်း၊ အစားအသောက်ချက်ပြုတ်ရာတွင် အနံ့အရသာအတွက် ကြက်သွန်ဖြူကိုအသုံးပြုကြသည့်အတွက် စားသောက်ဆိုင်များနှင့် အိမ်ရှင်မများအတွက် မရှိမဖြစ်လိုအပ်ကြောင်း၊ ကျန်းမာရေးဓာတ်စာအဖြစ် စားသုံးကြသည့်အတွက် ပုံမှန်အရောင်းအဝယ်ဖြစ်လျက်ရှိကြောင်း လုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

     မကွေးတိုင်ဒေသကြီး၊ သရက်ခရိုင်၊ အထက်မင်းလှမြို့ပတ်ဝန်းကျင်ရှိ ပန်းတော်ပြင်၊ ဥယျာဉ်၊ မယ်ဇလီတော၊ ရွာတော်၊ ညောင်ပင်သာ စသည့်ကျေးရွာများတွင် ကုလားပဲ၊ နှမ်း၊ ပဲစဉ်းငုံ၊ ပဲတီစိမ်း သီးနှံတို့ကိုသာစိုက်ပျိုးမှုများပြီး ပဲထောပတ်(ကတ္ထီပါ၊ အနီ၊ အဖြူ)သီးနှံကို ဆင်ပေါင်ဝဲမြို့နှင့် မင်းဘူး၊ မကွေး၊ တောင်တွင်းကြီးမြို့တို့ရှိ ပွဲရုံများမှ အဓိကမှာယူရောင်းချကြောင်း သိရသည်။

    ၂၀၂၅ခုနှစ်၊ စက်တင်ဘာလ(ဒုတိယပတ်)တွင် ပဲထောပတ်(ကတ္ထီပါ)(၁)ပြည်လျှင် ကျပ် (၁၀၀၀၀)၊ ပဲထောပတ်(အနီ) (၁)ပြည်လျှင် ကျပ်(၈၀၀၀)၊ ပဲထောပတ်(အဖြူ) (၁)ပြည်လျှင် ကျပ် (၇၅၀၀)ဖြင့် ရောင်းချလျက်ရှိပြီး ယခင်(ပထမပတ်)တွင် ပဲထောပတ်(ကတ္ထီပါ) (၁)ပြည်လျှင် ကျပ် (၉၀၀၀)၊ ပဲထောပတ်(အဖြူ) (၁)ပြည်လျှင် ကျပ်(၇၀၀၀)ဖြင့် ရောင်းချခဲ့ရာ ဈေးနှုန်းနှိုင်းယှဉ်ပါက ယခုတစ်ပတ်တွင် ပဲထောပတ်(ကတ္ထီပါ) ကျပ်(၁၀၀၀)   ပဲထောပတ် (အဖြူ) ကျပ်(၅၀၀)ဈေးနှုန်းမြင့် တက်ခဲ့ကြောင်း သိရသည်။ ယခုအချိန်တွင် ပဲထောပတ်စိုက်ပျိုးရာဒေသများ၌ စိုက်ပျိုးဆဲကာလဖြစ်၍ ပဲအသစ် ထွက်ရှိမှုမရှိသောကြောင့် ဈေးနှုန်းမှာအနည်းငယ်မြင့်တက်ရခြင်းဖြစ်ကြောင်း သိရသည်။

DOCA(မကွေး)

     မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေး၌ ပန်းဂေါ်ဖီကို မင်းဘူး၊ မကွေး၊ သရက်၊ တောင်တွင်းကြီးမြို့နှင့် ရှမ်းပြည်နယ် အောင်ပန်းမြို့တို့မှ မှာယူရောင်းချကြောင်း သိရသည်။

          ၂၀၂၅ခုနှစ်၊ စက်တင်ဘာလ(ဒုတိယပတ်)တွင် ပန်းဂေါ်ဖီ(၁)ပွင့်လျှင် (အပွင့်အကြီးအသေးပေါ် မူတည်၍) ကျပ်(၅၅၀၀-၆၀၀၀)ဖြင့်ရောင်းချလျက်ရှိပြီး ယခင်ဩဂုတ်လ(ဒုတိယပတ်)တွင် ကျပ် (၄၅၀၀- ၅၀၀၀)ဖြင့်ရောင်းချခဲ့ရာ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၁၀၀၀)ဈေး နှုန်းမြင့် တက်ခဲ့ကြောင်း သိရသည်။ အထက်မင်းလှမြို့နယ်အတွင်း ပန်းဂေါ်ဖီစိုက်ပျိုးမှုမရှိဘဲ အခြားဒေသများမှ မှာယူရောင်းချရပြီး ယခုအချိန်တွင် ဒေသတွင်းစိုက်ပျိုးထွက်ရှိခြင်းမရှိသည့်အပြင် ရှမ်းပြည်မှ မှာယူ ရောင်းချရသည့်အတွက် သယ်ယူစရိတ်မှာလည်း အနည်းငယ်မြင့်မားလာ၍ ပန်းဂေါ်ဖီဈေးနှုန်းမှာ မြင့်တက်ရခြင်းဖြစ်ကြောင်း သိရှိရသည်။

DOCA(မကွေး)