ပြည်တွင်းကုန်သွယ်မှုသတင်း

   မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း စိုက်ပျိုးကြကြောင်း သိရသည်။

   မိုးနေကြာသီးနှံကို ဇွန်လတွင်စတင်စိုက်ပျိုးပြီး စက်တင်ဘာလတွင် ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးများကို အများဆုံးစိုက်ပျိုးကြပြီး၊ မြေအနေအထား နှင့်အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်းအနေဖြင့် ဒီဇင်ဘာ လဒုတိယပတ်အတွင်း နေကြာတစ်တင်းလျှင် ငွေကျပ် ၅၃၀၀၀ ဖြင့်ရောင်းဝယ်လျက်ရှိကြောင်း သိရ သည်။

    ဈေးကွက်အနေဖြင့် နေကြာသီးနှံများကို ကန့်ဘလူမြို့နှင့်ဇီးကုန်းမြို့တို့ရှိပွဲရုံများသို့ ရောင်းချ ကြပြီး ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း၊ ယခင်ပတ်ဈေးနှုန်းနှင့်နှိုင်းယှဉ်ပါက နေကြာသီးနှံဈေးနှုန်းများ ဆက်လက်ကျဆင်းလျက်ရှိကြောင်း သီးနှံရောင်းဝယ်ရေး လုပ်ငန်းရှင်ထံမှ သိရသည်။

DOCA(စစ်ကိုင်း)  

       စစ်ကိုင်းတိုင်းဒေသကြီး ၊ ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိက ထားလုပ်ကိုင်သော ဒေသတစ်ခုဖြစ်ရာ ကန့်ဘလူမြို့နယ်အတွင်းရှိ ထန်းကုန်းကျေးရွာ၊ မိုးကောင်း ကျေးရွာနှင့် အခြားသောကျေးရွာများတွင် ပဲတီစိမ်းသီးနှံကို စိုက်ပျိုးကြကြောင်း၊ ယခုအခါ ပဲတီစိမ်း သီးနှံများ ဈေးကွက်အတွင်း ဝင်ရောက်လျက်ရှိပြီး ဒီဇင်ဘာလဒုတိယပတ်အတွင်း ပဲတီစိမ်းရိုးရိုး တစ်တင်းလျှင်(၇၅၀၀၀)ကျပ်၊ ပဲတီစိမ်းထွက်တိုး အလုံးလှတစ်တင်းလျှင် (၈၀၀၀၀)ကျပ်ဖြင့်အ ရောင်းအဝယ်ဖြစ်လျက်ရှိကြောင်း၊ ပဲတီစိမ်းမှာ အလုံးလှပြီး အကွဲအနာကင်းလျှင် ဈေးနှုန်းပိုမိုရရှိ ကြောင်းနှင့် ဈေးကွက်အနေဖြင့် ကန့်ဘလူခရိုင်မှ ထွက်ရှိသော ပဲတီစိမ်းများကို မန္တလေးမြို့ရှိပွဲရုံများ ၊ ကုန်စည်ဒိုင်များသို့ တင်ပို့ရောင်းချလျက်ရှိသည်။

      ဒီဇင်ဘာလပထမပတ်ဈေးနှုန်းများနှင့် နှိုင်းယှဉ်ပါက ယခုလဒုတိယပတ်အတွင်း ပဲတီစိမ်း ရိုးရိုးတစ်တင်းလျှင်(၅၀၀၀)ကျပ်နှင့် ပဲတီစိမ်းထွက်တိုးတစ်တင်းလျှင်(၅၀၀၀)ကျပ် ပြန်လည်မြင့် တက်လာကြောင်း သီးနှံရောင်းဝယ်ရေး လုပ်ငန်းရှင်များထံမှ သိရသည်။

DOCA(စစ်ကိုင်း)  

           အခု ဆန်ဈေးကွက်မှာ ခေတ်စားလာတဲ့ ဘာစမာတီ(Basmati) ရဲ့အားနည်းချက်၊ အားသာချက်တွေကို ပြောပြချင်ပါတယ်၊ အားသာချက်ကတော့ သက်လတ်စပါးမျိုး ရက်(၁၀၀)ဖြစ်ပြီး၊ ရေငတ်ဒဏ်ကိုအသင့်တင့်ခံနိုင်ပါတယ်၊ ဆီးချိုဆန်လို့လူသိများတဲ့ ဘာစမာတီဆန်က၊ အခြားဆန်တွေထက်  အဆီဓါတ်၊ ကစီဓါတ်နှင့် ကိုလက်စထရော ဓါတ်နည်းတာကြောင့် ဆီးချိုသမားများ၊ ဆီးချို၊ သွေးချိုကာကွယ်လိုသူများ ကျန်းမာရေးအတွက် ကိုယ်အလေးချိန်ထိန်းသိမ်းလိုသူတွေ၊ Gym ဆော့နေတဲ့ အားကစားသမားတွေ၊ စားသုံးသင့်တဲ့ဆန်မျိုးဖြစ်ပါတယ်၊ အဆီဓါတ်နည်းတယ်ဆိုပေမဲ့ မစေးဘူးဆိုပေမဲ့ မကြမ်း၊ မမာ၊ မဖွာပါဘူး၊  ဆန်သားပျော့ပျောင်း နူးညံ့ ကော့လျားရှည်သွယ်ပါတယ်၊ အနံ့မွေးပြီး (ကောက်ညှင်းနဲ့ဆင်ဆင်) ထမင်းစေ့ကရှည်လျားပြီး ကော့စင်းပါတယ်။

          ဘာစမာတီစပါးကို ရှမ်းပြည်နယ်(တောင်ပိုင်း) ဟဲဟိုးမြို့မှာ စိုက်ပျိုးပြီး၊ ဓနုကိုယ်ပိုင်အုပ်ချုပ် ခွင့်ရဒေသ ရွာငံမြို့နယ်၊အလက်ချောင်ကျေးရွာမှာတော့ ဒေသစပါးများအပြင် ဘာစမာတီစပါးများကို ယာမြေများတွင် စမ်းသပ်စိုက်ပျိုးလျက်ရှိကြောင်းသိရပါတယ်၊ လယ်စပါးဖြစ်သည့် ကျန်းမာရေးနှင့် ကိုက်ညီပြီး ဈေးကွက်ရှိတဲ့ ဘာစမာတီစပါးများကို  ယာမြေတွင်ဖြစ်ထွန်းအောင် စမ်းသပ်စိုက်ပျိုးလာ သည်မှာ (၃) နှစ်ခန့်ရှိပြီး၊ ဒေသစပါးများနှင့် အထွက်နှုန်း ယှဉ်ကြည့်ပါက ဒေသစပါးများထက်အနည်း ငယ်သာလျော့ကြောင်းတွေ့ရှိရပါသည်။ ထို့ကြောင့် ဈေးကောင်းရရှိပြီး ဆီးချို၊သွေးချို၊ သမားများအ တွက် စားသုံးရန်သင့်သည့် ဘာစမာတီစပါးမျိုးများကို ယာမြေတွင်လည်း စိုက်ပျိုးနိုင်ပါသည်၊ ယာမြေ များတွင် ဘာစမာတီစပါးများကို စိုက်ပျိုးပါက ဝါဆိုလတွင် စတင်စိုက်ပျိုးပြီး တန်ဆောင်မုန်းလတွင် ရိတ်သိမ်းရပါတယ်။

          ပျှမ်းမျှအားဖြင့် ဘာစမာတီ သက်တမ်းမှာ (၁၄၅) ရက်သာရှိပြီး၊ ယခုနှစ်မှာ ဟဲဟိုးစိုက်ခင်းတွေ မှာတော့၊တစ်ဧကလျှင်အထွက်နှုန်း(၅၀)တင်းမှ(၆၅)တင်းကြားထွက်ရှိကြောင်းသိရပါတယ်၊ ဘာစမာ တီမျိုးစပါးတစ်တင်းကို ကျပ်( ၆၅၀၀ဝိ/-) ဈေးရှိပြီး၊ ကြိတ်ပြီးသား အသင့်စားဆန်တစ်အိတ်လျှင် ကျပ်(၂၄၀၀၀ဝိ/-)မှ ကျပ်နှစ်သိန်းလေးသောင်းကျပ်ဈေးပေါက်နေပါတယ်၊ ရောင်းတန်းဝင်အတွက် (၁၁) တင်းကြိတ်ပါက (၃)အိတ်ထွက်ရှိပြီး၊ အိမ်စားသုံးရန်အတွက်(၁၀)တင်းကြိတ် (၁)အိတ်ထွက်ရှိ              ကြောင်းဟဲဟိုးမှဘာစမာတီစိုက်တောင်သူများထံမှသိရှိရပါတယ်၊သို့ဖြစ်ပါ၍ဈေးကွက်ဝင်ပြီးစားသုံးမှု များလာတဲ့ဘာစမာတီ စပါးမျိုးများကိုစိုက်ပျိုးသင့်ပါကြောင်း တင်ပြလိုက်ရပါတယ်။

DOCA(ရှမ်း)

   မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူမြို့နယ်အတွင်းရှိ ကျေးရွာများတွင် ဒေသတွင်းစားသုံးဆီဖူလုံစေရေးအတွက် ဆီထွက်သီးနှံဖြစ်သည့် နှမ်းသီးနှံများလည်း စိုက်ပျိုးကြကြောင်း သိရသည်။

   ယခုအခါ နှမ်းများဈေးကွက်အတွင်း ဝင်ရောက်လျက်ရှိပြီး ကန့်ဘလူခရိုင်၌ ဖြစ်ပေါ်နေသော နှမ်းဈေးနှုန်းမှာ ဒီဇင်ဘာလဒုတိယပတ်အတွင်း နှမ်းနက်(စမုံ)တစ်တင်းလျှင်(၂၁၅၀၀၀)ကျပ်၊ နှမ်းဖြူ (ဂျပန်)တစ်တင်းလျှင် (၁၂၅၀၀၀)ကျပ်ဖြင့် ရောင်းဝယ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှ ထွက်ရှိသောနှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်း ၊ယခုပတ်တွင် အရောင်းအဝယ်ဖြစ်လျက်ရှိသော နှမ်းဈေးနှုန်းများသည် ယခင်ပတ်ဈေးနှုန်းများနှင့် နှိုင်းယှဉ်ပါက နှမ်းနက်(စမုံ)တစ်တင်းလျှင်(၅၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၅၀၀၀)ကျပ် မြင့်တက်လာကြောင်း သီးနှံရောင်းဝယ်ရေးလုပ်ငန်းရှင်ထံမှ သတင်းရရှိသည်။

DOCA(စစ်ကိုင်း)  

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့် ကုန်စည်ဒိုင်များ ဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များ ပိုမိုခိုင်မာအားကောင်းလာစေရေး ပူးပေါင်းဆောင်ရွက်လျက်ရှိသည့်အပြင် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန် စာရင်းတို့ကို အပတ်စဉ်၊ လစဉ်တင်ပြလျက်ရှိပါသည်။

     ရွှေဘိုဈေးကွက်သို့ စက်တင်ဘာလ၊ တတိယအပတ်မှစတင်၍ နှမ်းဖြူများ ဝင်ရောက်ခဲ့ပြီး ဒီဇင်ဘာလ၊ ဒုတိယအပတ်တွင် အရောင်းအဝယ်ဖြစ်သည့်ဈေးနှုန်းမှာ နှမ်းဖြူတစ်တင်းလျှင် (၁၂၅၀၀ဝိ/-) ကျပ် ပေါက်ဈေးရှိပြီး အရောင်းအဝယ်ဖြစ်မှုမှာ (၄၅၀၀)တင်း/ (၁၁၀)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်အပတ်၌ နှမ်းဖြူတစ်တင်း လျှင်(၁၂၈၅၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက် နှမ်းဖြူတစ်တင်းလျှင် (၃၅၀ဝိ/-)ကျပ်ဈေးပိုမိုရရှိခဲ့ကြောင်း၊  ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်နှစ်ကာလတူ၌ နှမ်းဖြူတစ်တင်းလျှင် (၁၀၀၀၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် နှမ်းဖြူတစ်တင်းလျှင် (၂၅၀၀ဝိ/-)ကျပ် ဈေးပိုမိုရရှိခဲ့ကြောင်း ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)