ပြည်တွင်းကုန်သွယ်မှုသတင်း

    ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်းရှိ မြို့နယ်များနှင့် အခြား တိုင်းဒေသကြီး/ ပြည်နယ်များရှိ ကိုယ်စားလှယ်များအား စားအုန်းဆီနေ့စဉ်ထုတ်ပေးလျက်ရှိပါသည်။ ပြည်တွင်းဈေးကွက်၌ စားအုန်းဆီရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည် ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက်လည်း ဝန်ထမ်းများက ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၁၈-၃-၂၀၂၄)ရက်နေ့မှ (၂၃-၃-၂၀၂၄)ရက်နေ့အထိ ဆီကုမ္ပဏီ (၂၁)ခုနှင့် စားအုန်းဆီတန်ချိန် (၄၈၆၀.၅၈၄)တန်ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)

     စစ်ကိုင်းတိုင်းဒေသကြီး ကန့်ဘလူခရိုင်၌ ၂၀၂၄ ခုနှစ်၊ မတ်လ တတိယပတ်အတွင်း ရွှေဘိုပေါ်ဆန်းစပါးတင်း(၁၀၀)လျှင် ငွေကျပ် ၃၇၀၀၀၀၀ ၊ ဧရာမင်းစပါးတင်း(၁၀၀)လျှင် ငွေကျပ် ၂၅၀၀၀၀၀ နှင့် ရွှေဘိုပေါ်ဆန်းဆန်၂၄ ပြည်ပါတစ်အိတ်လျှင် ငွေကျပ် ၁၃၀၀၀၀ ၊ ဧရာမင်းဆန်၂၄ ပြည်ပါတစ်အိတ်လျှင် ငွေကျပ် ၁၂၀၀၀၀ဖြင့် အရောင်းအဝယ်ဖြစ်ခဲ့ရာ  ယခင်အပတ်နှင့်နှိုင်းယှဉ် ကြည့်လျှင် စပါးဆန်ဈေးနှုန်းများမှာ အနည်းငယ်ကျဆင်းနေကြာင်းနှင့် အခြားတိုင်းဒေသကြီးများသို့ ဆန်စီးထွက်မှုအနေဖြင့် မန္တလေးတိုင်းဒေသကြီးသို့ ဆန်အိတ်ရေ ၁၀၀၀အိတ်နှင့် ရန်ကုန်တိုင်းဒေသ ကြီးသို့အိတ်ရေ ၃၀၀၀ စုစုပေါင်း ၄၀၀၀ အိတ် တန်အားဖြင့် ၂၀၀ တန် စီးထွက်ခဲ့ကြောင်း ဒေသခံ ဆန်စက် လုပ်ငန်းရှင်များထံမှ သိရသည်။

DOCA(စစ်ကိုင်း)

     ရန်ကုန်မြို့တွင် အိမ်ဆောက်ပစ္စည်းများဖြစ်သည့် ဘိလပ်မြေမှာ ယခုတစ်ပတ် (၁၈-၃-၂၀၂၄) ရက်နေ့မှ (၂၂-၃-၂၀၂၄) ရက်နေ့အထိ ဈေးနှုန်းအနည်းငယ်မြှင့်တက်လာခဲ့ကြောင်းသိရှိရပြီး ပြည်တွင်းတည်ဆောက်ရေးလုပ်ငန်းများအနေဖြင့် ဘတ်ဂျက်ပိတ်ကာလဖြစ်၍ လုပ်ငန်းများအပြီးပြတ်ဆောင်ရွက်နေရပြီး သယ်ယူပို့ဆောင်ခနှုန်းထားများကြောင့်လည်းကောင်း၊ ပြည်တွင်းကုန်ကြမ်းရရှိမှုအခက်အခဲများကြောင့်လည်းကောင်း၊ ပြည်တွင်းစက်ရုံများမှ ကုန်ထုတ်လုပ်မှုလျော့နည်းခြင်းတို့ကြောင့် ပြည်တွင်းဈေးကွက်၌ ကုန်ပစ္စည်းလက်ကျန်နည်း၍ ဈေးနှုန်းအနည်းငယ်မြင့်တက်လာခြင်းဖြစ်ကြောင်း ဘိလပ်မြေအရောင်းဆိုင်များတွင် မေးမြန်းစုံစမ်းမှုအရသိရှိရပါသည်။

      ဈေးကွက်ရှိ ဆောက်လုပ်ရေးလုပ်ငန်းများအတွက် Alpha အမျိုးအစား ဘိလပ်မြေမှာ အရည်အသွေးကောင်းမွန်သောကြောင့် သုံးစွဲသူများပြီး ဖေဖော်ဝါရီလ နောက်ဆုံးပတ်မှ မတ်လ နောက်ဆုံးပတ်အတွင်း တစ်အိတ်လျှင်  ၁၂၅၀၀ကျပ်မှ ၁၆၅၀၀ကျပ်ဈေးနှုန်းအထိမြင့်တက်လာခဲ့ပါသည်။ ယခုအခါ Alpha အမျိုးအစားဘိလပ်မြေအပြင် အခြား AAA၊ ကြံ့နှစ်ကောင်၊ အပါချီ၊ Yojin၊ ဆင်မင်း အစရှိသည့် ဘိလပ်မြေအမျိုးအစားများကိုလည်း အသုံးပြုမှုများလာကြကြောင်း၊ ဈေးကွက်အတွင်း စုံစမ်းမေးမြန်းချက်များအရသိရှိရပါသည်။ ယင်းအမျိုးအစားများမှာ အမျိုးအစားပေါ်မူတည်၍ တစ်အိတ်လျှင်  ၁၁၅၀၀ကျပ်မှ ၁၅၅၀၀ကျပ်အထိရှိကြောင်း စုံစမ်းသိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ မှော်ဘီခရိုင်၊ မှော်ဘီမြို့နယ်၊ သန္ဓေပင်ကျေးရွာအုပ်စု၊ အေးမေတ္တာရပ်ကွက်တွင် ပိုင်ရှင်ဖြစ်သူ ဒေါ်တင်ဇာအောင်သည် Me အမှတ်တံဆိပ် စင်္ကြာမုန့်လုပ်ငန်းအား အိမ်တွင်းလက်မှုလုပ်ငန်းအဖြစ် ၁၉၉၈ခုနှစ်မှစတင်၍ တစ်နိုင်တစ်ပိုင်စီးပွားရေးလုပ်ငန်းအနေဖြင့် လုပ်ကိုင်ဆောင်ရွက်ခဲ့ရာ ယခုအခါ အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ၏ ခွင့်ပြုချက်လက်မှတ်ရရှိကာ စနစ်တကျထုတ်လုပ်ဖြန့်ဖြူးရောင်းချလျက်ရှိကြောင်းသိရှိရပါသည်။

       မုန့်ပြုလုပ်ရာတွင် ပါဝင်ပစ္စည်းများမှာ ကုလားပဲမှုန့်(၈၀)ပိဿာ၊ ပီလောပီနန်ကော်မှုန့် (၂၀) ပိဿာ၊ သကြား၊ ဆားသမအောင်ရောနှော၍ မုန့်နှစ်ရည်ပြုလုပ်ပြီး စင်္ကြာပုံစံခွက်ဖြင့်နှစ်၍ ဆီတွင်ကြော်ရကြောင်း၊ ၎င်းအချိုးအတိုင်းကြော်ပါက အထုပ်ရေ (၁၀၅၀)ထုပ်ထွက်ရှိပါသည်။ မိသားစုတစ်နိုင်တစ်ပိုင်လုပ်ငန်းဖြစ်ပြီး နံနက်(၄း၀၀)နာရီမှ ည(၁၉း၀၀)နာရီအချိန်အထိ လုပ်ကိုင်ကြရပြီး အရောင်းသွက်ချိန်တွင် အလုပ်သမားခေါ်ယူအသုံးပြုကြရပါသည်။ မုန့်ထုပ်များအား ပလတ်စတစ်အိတ်၊ ကော်ဘူး(၂)မျိုးထုတ်လုပ်ပြီး ပလတ်စတစ်အိတ်ဖြင့်ထုပ်ပိုးထားသော မုန့်တစ်ထုပ်လျှင် ၁၁၀၀ကျပ်၊ ကော်ဘူးတစ်ဘူးလျှင် (၁၈၅၀)ကျပ်ဖြင့် ဖောက်သည်ပေးရပြီး တစ်ရက်လျှင် ဆီပိဿာချိန် (၅၀)အသုံးပြုနေကြောင်းနှင့် အကျိုးအမြတ်မှာ ၂၅%ရှိကြောင်းသိရှိရပါသည်။

DOCA(ရန်ကုန်)

      မင်္ဂလာဒုံမြို့နယ် ရတနာသီရိဈေးတွင် (၁၉.၃.၂၀၂၄)ရက်နေ့ ဝက်သား တစ်ပိဿာလျှင် ကျပ် ၁၂၀၀၀ မှ ၁၄၀၀၀ အတွင်း၊ ကြက်သား တစ်ပိဿာလျှင် ကျပ် ၉၀၀၀ မှ ၁၃၀၀၀ အတွင်း၊ အမဲသား တစ်ပိဿာလျှင် ကျပ် ၁၃၀၀၀ မှ ၁၆၀၀၀ အတွင်း၊ ဆိတ်သား တစ်ပိဿာလျှင် ကျပ် ၂၂၀၀၀ မှ ၂၆၅၀၀ အတွင်း၊ ငါးကြင်းဖြူ တစ်ပိဿာလျှင် ကျပ် ၉၅၀၀ မှ ၁၂၀၀၀ အတွင်း၊ ငါးမြစ်ချင်း တစ်ပိဿာလျှင် ကျပ် ၇၀၀၀ မှ ၇၅၀၀ အတွင်း၊ ပုစွန်(ဘောချိတ်) တစ်ပိဿာလျှင် ကျပ် ၂၂၀၀၀ မှ ၂၅၀၀၀ အတွင်း၊ ငါးတန် တစ်ပိဿာလျှင် ကျပ် ၅၀၀၀ မှ ၆၅၀၀ အတွင်း အသီးသီးရောင်းချလျက်ရှိ ပြီး ယခင်အပတ်ထက် ယခုအပတ်ဈေးမှာ ဝက်သားတစ်ပိဿာလျှင် ကျပ် ၅၀၀၊ ဆိတ်သား တစ်ပိဿာလျှင် ကျပ် ၅၀၀၊ ငါးကြင်းဖြူ တစ်ပိဿာလျှင် ကျပ် ၁၀၀၀၊ ငါးမြစ်ချင်း တစ်ပိဿာလျှင် ကျပ် ၁၅၀၀၊ ငါးတန်တစ်ပိဿာလျှင် ကျပ် ၂၀၀ ဈေးကျပြီး ကြက်သားတစ်ပိဿာလျှင် ကျပ် ၅၀၀ ဈေးတက်သွားကြောင်း သိရှိရပါသည်။

DOCA(ရန်ကုန်)