ပြည်တွင်းကုန်သွယ်မှုသတင်း

             ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်၊ မိုင်းလပ်အုပ်စု၊ မိုင်းဇင်းအုပ်စုများတွင် ရာသီအလိုက်သီးနှံများကိုစိုက်ပျိုးလျက်ရှိရာ မေလ၊ ဇွန်လတို့တွင် ကန်ဇွန်းဥကို တစ်နိုင်တစ်ပိုင်စိုက်ပျိုးကြကြောင်း သိရှိရပါသည်။

               ကန်ဇွန်းဥစိုက်ပျိုးရာတွင် မျိုးများအနေဖြင့် ဒေသမျိုးများဖြစ်သော ရွှေဝါမျိုးနှင့် ငချိပ်မျိုးဟူ၍ နှစ်မျိုးရှိရာတွင် ငချိပ်မျိုးကိုသာ အများဆုံးစိုက်ပျိုးကြပါသည်။ ကန်ဇွန်းဥပျိုးပင်များ ကိုမိမိခြံ၌ရှိသော ကန်ဇွန်းပင်၏အညွှန့်ကို ၂ ပေ ၃ ပေခန့် ဖြတ်၍ ပျိုးပင်ရရှိပြီး တစ်ဧကလျှင် ကန်ဇွန်းဥပျိုးပင်ပေါင်း (၈)သောင်း(၉)သောင်းခန့်စိုက်ပျိုးရပါသည်။ 

          မေလ၊ ဇွန်လ ကန်ဇွန်းဥစိုက်ပျိုးရာတွင် မြေကိုထွန်ယက်၍ ဘောင်စနစ်ဖြင့်စိုက်ပျိုးကာ အောက်တိုဘာလတွင်ထွက်ရှိကြောင်း သိရပါသည်။ စိုက်ပျိုးမှုအတွက် ပျိုးပင်ထွန်ယက်ခ၊ မြေဆွေး၊ နွားချေး၊ ဝက်ချေး၊ ပိုးသတ်ဆေး၊ လုပ်အားခအပါအဝင် တစ်ဧကလျှင် စုစုပေါင်း(၁၁)သိန်းခန့်ကုန်ကျကြောင်း ကန်ဇွန်းဥစိုက် တောင်သူကြီးများထံမှ သိရှိရပါသည်။

            မိုးကန်ဇွန်းဥကို အောက်တိုဘာလတွင် စတင်ခူးဆွတ်နိုင်ပြီး မိုးကန်ဇွန်းဥ တစ်ဧကလျှင် ပိဿာ ချိန်(၈၀၀)ခန့် ထွက်ရှိကြောင်း သိရှိရသည်။ ထွက်ရှိသည့် မိုးကန်ဇွန်းဥကို ကျိုင်းတုံမြို့မဈေး၊ ကျိုင်းတုံယန်းခန်းဈေး၊ ကျိုင်းတုံနောင်ကွမ်ဈေး၌ လက်ကားဈေးနှုန်းဖြင့်သွင်း၍ အလုံးအသေး/ အကြီးပေါ်မူတည်၍ (၁၀)လုံး (၁၂)လုံးပါ တစ်ပိဿာလျှင် (၂၅၀၀)ကျပ် ရရှိပြီးအကျိုးအမြတ်နေ ဖြင့်တစ်ဧကကို (၉)သိန်းခန့်ရရှိကြောင်းသိရှိရပါသည်။

DOCA(ရှမ်း)

            ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်သည် ရာသီဥတုကောင်းမွန်သည့်အတွက် စိုက်ပျိုး‌ရေးလုပ်ငန်းမျာကို အဓိကလုပ်ကိုင်လျက်ရှိရာ၊ကျိုင်းတုံမြို့နယ်၊ ကျိုင်းဖောင်းကျေးရွာတွင် မြေပဲစိုက်ဧက ၁၃၀၀ ‌ကျော် စိုက်ပျိုးထားရှိကြောင်း၊ မြေပဲကို မေလတွင်စိုက်ပျိုးပြီး ဩဂုတ်လတွင် တူးဖော်ကြကြောင်း၊ စိုက်ပျိုးထုတ်လုတ်မှုအတွက် မျိုး၊ သွင်းအားစု၊ လုပ်သားခ အပါအဝင်မြေပဲ တစ်ဧကလျှင် စုစုပေါင်း ငွေကျပ် ၆၅၀၀၀၀ ခန့် ကုန်ကျပြီး တစ်ဧက ပျမ်းမျှ ၆၁ တင်းခန့် ထွက်ရှိကြောင်း သိရှိရပါသည်။

           ယခုနှစ်တွင် စိုက်ပျိုးချိန်မှ တူးဖော်ချိန်အထိ ရာသီဥတုကောင်းမွန်မှုကြောင့် မြေပဲအထွက်နှုန်းကောင်းမွန်ကြောင်း၊ ဈေးနှုန်းအနေဖြင့် ဒေသတွင်းပေါက်ဈေးမှာ မြေပဲသီးနှံ အရည်အသွေးပေါ် မူတည်၍ မြေပဲတောင့် တစ်တင်းလျှင် ငွေကျပ် ၂၇၀၀၀ မှ ၃၀၀၀၀ ထိ  အရောင်းအဝယ်ဖြစ်လျက်ရှိပြီး တစ်ဧကလျှင် ငွေကျပ် ၁၀ သိန်းခန့် အမြတ်ရရှိကြောင်း၊ ဈေးကွက်အနေဖြင့် ဒေသတွင်းရောင်းချမှုအပြင် ကျိုင်းတုံမြို့နယ်အတွင်းမှထွက်ရှိသော မြေပဲသီးနှံများကို ဒေသခံကုန်သည်များကဝယ်ယူ၍ ရန်ကုန်သို့ တိုက်ရိုက်တင်ပို့ရောင်းချကြကြောင်း သိရှိရပါသည်။

DOCA(ရှမ်း)

   ရွှေဘိုခရိုင်အနေဖြင့် စပါးကိုအဓိကစိုက်ပျိုးကြသော်လည်း မိုးကောင်းတောဒေသများတွင် ပဲ၊ ပြောင်းသီးနှံများကိုစိုက်ပျိုးကြရာ ၂၀၂၃-၂၀၂၄ခုနှစ်မိုးသီးနှံတွင် အစေ့ထုတ်ပြောင်း(၃၈၂၅)ဧက စိုက်ပျိုးကြောင်း၊ အစေ့ထုတ်ပြောင်းကို ပဲစဉ်းငုံနှင့် သီးညှပ်သော်လည်းကောင်း၊ သီးသန့်သော်လည်းကောင်းစိုက်ပျိုးကြပြီး ဇွန်လတွင်စတင်စိုက်ပျိုး၍ စက်တင်ဘာလတွင် ရိတ်သိမ်းကြကြောင်း၊ တစ်ဧကအထွက်နှုန်းမှာ(၅၄)တင်းခန့် ထွက်ရှိကြောင်း သက်ဆိုင်ရာဌာန၏ စာရင်းများအရ သိရှိရပါသည်။ ရွှေဘိုမြု့ရှိ ပဲ၊ နှမ်းကုန်စည်ဒိုင်သို့ ရွှေဘိုခရိုင်သာမက နယ်မြေခြင်းသထိစပ်လျက်ရှိသည့် ရေဦးခရိုင်နှင့် ကန့်ဘလူခရိုင်မှ အစေ့ထုတ်ပြောင်းများလည်း ဝင်ရောက်လျက်ရှိကြောင်း၊ အစေ့ထုတ်ပြောင်းမှာ စက်တင်ဘာလ၊ ဒုတိယအပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး အောက်တိုဘာလ၊ လကုန်အပတ်တွင်အရောင်းအဝယ်ဖြစ်သည့်ဈေးနှုန်းမှာ အစေ့ထုတ်ပြောင်းတစ်တင်းလျှင်(၂၅၀၀ဝိ/-)ကျပ် ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ (၁၈၀၀၀)တင်း/ (၄၄၉)တန်ဖြစ်ကြောင်း၊ ယခင်အပတ်နှင့်ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင် (၂၄၀၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် အစေ့ထုတ်ပြောင်း တစ်တင်းလျှင်(၁၀၀ဝိ/-)ကျပ် ပိုမိုရရှိခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်နှစ်ကာလတူ၌ အစေ့ထုတ်ပြောင်း တစ်တင်းလျှင် (၁၇၀၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် အစေ့ထုတ်ပြောင်း တစ်တင်းလျှင် (၈၀၀ဝိ/-) ကျပ်ဈေးပိုမိုရရှိခဲ့ကြောင်း၊ ရွှေဘိုဈေးကွက်သို့ အစေ့ထုတ်ပြောင်းများ အဝင်များသော်လည်း ဝင်ရောက်သမျှ အရောင်းအဝယ်ဖြစ်လျက်ရှိကြောင်း ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးအနေဖြင့် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေး လုပ်ငန်းများ ဆောင်ရွက်လျက်ရှိပြီး ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေး လုပ်ငန်းများဖြင့် နိုင်ငံစီးပွားဖွံ့ဖြိုးတိုးတက်စေရန်ဟူသော မျှော်မှန်းချက်နှင့်အညီ အသင်းအဖွဲ့များ အစုအဖွဲ့များ ဖွဲ့စည်းပေးပြီး ပိုမိုအားကောင်းလာစေရေး ပူးပေါင်းဆောင်ရွက်လျက်ရှိပါသည်။ ပွဲရုံများ၏ သီးနှံဈေးနှုန်းများနှင့် အရောင်းအဝယ်ဖြစ်မှုများကိုလည်း  တင်း/ တန် စာရင်းတို့ဖြင့် အပတ်စဉ်၊ လစဉ် တင်ပြလျက်ရှိပါသည်။

    ကန့်ဘလူပွဲရုံများအနေဖြင့် ၂၀၂၄ ခုနှစ်၊ အောက်တိုဘာလအတွင်း ပွဲရုံသို့ဝင်ရောက် အရောင်းအဝယ်ဖြစ်နေသော သီးနှံအမျိုးအစား၏ ဒေသပေါက်ဈေးနှုန်းများ အဝင် /အထွက် တင်းများ၏ အရောင်းအဝယ်ဖြစ်မှုအခြေအနေများမှာ ကုလားပဲ v2(၁၃၅)တင်း ဈေးနှုန်းမှာ(၉၆၀၀၀)ကျပ်၊ ကုလားပဲ 929(၆၈၅.၅) တင်း ဈေးနှုန်းမှာ (၉၂၀၀၀)ကျပ်၊ ကုလားပဲ ထိုင်ဝမ်(၉၄.၅)တင်း ဈေးနှုန်းမှာ(၈၇၀၀၀)ကျပ်၊ မတ်ပဲ အမျိုးအစား(၇၂၀)တင်း ဈေးနှုန်းမှာ(၁၀၀၀၀၀)ကျပ်၊ နှမ်း(နက်)(၃၄.၅)တင်း ဈေးနှုန်းမှာ (၂၁၀၀၀၀)ကျပ်၊ နှမ်း(ဖြူ)(၆၇.၅)တင်း ဈေးနှုန်းမှာ (၁၅၂၀၀၀)ကျပ်၊ နေကြာ(၄၉၀.၅)တင်း ဈေးနှုန်းမှာ (၇၀၀၀၀)ကျပ်၊ ပဲတီစိမ်း(၅၄၇.၅)တင်း ဈေးနှုန်းမှာ (၇၈၀၀၀)ကျပ်နှင့် cpပြောင်းဆံ(၁၅၀၀)တင်း ဈေးနှုန်းမှာ (၁၉၀၀၀) ကျပ်  အသီးသီးပေါက်ဈေးရှိကြောင်း သိရသည်။

    ယခင် စက်တင်ဘာလ ပေါက်ဈေးနှုန်းနှင့်နှိုင်းယှဉ်ကြည့်မည်ဆိုပါက ကုလားပဲ(ထိုင်ဝမ်) တစ်တင်းလျှင်(၂၀၀၀)ကျပ်၊ ကုလားပဲ 929တစ်တင်းလျှင်(၂၀၀၀)ကျပ် နှင့် ပြောင်းဆံ တစ်တင်းလျှင် (၆၀၀၀)ကျပ်ဈေးနှုန်း ကျဆင်းလျက်ရှိပြီး ကုလားပဲv2 တစ်တင်းလျှင်(၁၀၀၀)ကျပ်၊ ပဲတီစိမ်း တစ်တင်းလျှင်(၁၀၀၀)ကျပ်နှင့် နေကြာ တစ်တင်းလျှင်(၁၂၀၀၀)ကျပ်  ယခင်လဈေးနှုန်းထက် မြင့်တက်လျက် ရှိကြောင်း၊ ယခုရာသီတွင် ပြောင်းဆံများ အဝင်အများဆုံးကာလဖြစ်ပြီး ကန့်ဘလူမြို့ မြေထူး၊ မှော်တော်၊ စန္ဒယား၊ ကျောက်အိုင်ကျေးရွာများအားလုံးမှ ဝင်ရောက်လာကြောင်း ၊ ပဲတီစိမ်း၊ မတ်ပဲတို့ကိုတော့ ကန့်ဘလူမြို့နယ်အတွင်းရှိ ဆကုန်း၊ ဆကိုင်း၊ ခရောင်ရင်း၊ ရင်းသာကျေးရွာများမှ အများဆုံး ဝင်ရောက်ကြောင်းနှင့် မိမိတို့ပွဲရုံမှသီးနှံများကို မန်းလေးမြို့ ဇောတိကပွဲရုံ တစ်ခုတည်းကိုသာ တင်ပို့ရောင်းချလျက်ရှိကြောင်း ကန့်ဘလူမြို့ပေါ်ရှိ  ပွဲရုံပိုင်ရှင်တစ်ဦးထံမှ သတင်းရရှိသည်။

DOCA(စစ်ကိုင်း)

        ပြည်ခရိုင်အတွင်းရှိ စားဖိုချောင်သီးနှံအုပ်စုတွင်ပါဝင်သော ကြက်သွန်ဖြူနှင့်အာလူးမှာ ရှမ်းပြည်နယ် တောင်ကြီးဘက်မှ အဝင်ရှိပြီး တစ်ခါဝင်လျှင် သီးနှံ(၂)မျိုးပေါင်း အိတ်၃၀၀ခန့်အဝင်ရှိပြီး တစ်အိတ်လျှင် ပိဿာ၃၀ဝင်ဆံ့ကြောင်းသိရှိရပါသည်။ ဈေးနှုန်းအနေဖြင့် ကြက်သွန်ဖြူ(ရှမ်း) တစ်ပိဿာလျှင် အရွယ်အစားပေါ်မူတည်၍ ၁၈၀၀၀ကျပ်မှ ၂၀၀၀၀ကျပ်ထိဈေးရှိပြီး အာလူးသီးနှံအနေဖြင့် အရွယ်အစားနှင့် အရည်အသွေးကိုလိုက်၍ တစ်ပိဿာလျှင် (၆၅၀၀-၆၈၀၀-၇၀၀၀)ကျပ်ဈေးအထိရှိပါသည်။ ကြက်သွန်ဖြူ၊ အာလူးသီးနှံများအနေဖြင့် မိမိတို့ခရိုင်အတွင်း စိုက်ပျိုးထွက်ရှိမှုမရှိသည့်အတွက် အခြားတိုင်းဒေသကြီး/ ပြည်နယ်များမှထွက်ရှိသောသီးနှံများ ဒေသတွင်းဝင်ရောက်မှုကို ရောင်းချရခြင်းဖြစ်ပါသည်။ ဒေသတွင်းမှ လက်လီဝယ်ယူသူများ၊ လုပ်ငန်းရှင်များနှင့် အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ပဲခူး)