၂၀.၃.၂၀၂၄ ရက်နေ့တွင် တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။
၂၀.၃.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
ပဒက်စာပင်များသည် အပွင့်ဖြူ၍ ဝတ်ဆံဝါပြီး မြေတွင်ကပ်ပေါက်သည့် ဟင်းလျာပင်တစ်မျိုးဖြစ်ပါသည်။ ၎င်းမှာ တောတောင်များ၌ သဘာဝအလျောက်ပေါက်ရောက်၍ ဧပြီလတွင် တောင်ယာများမီးရှို့ပြီး မိုးများအနည်းငယ်ရွာသွန်းမှသာ လှိုင်လှိုင်ထွက်ရှိကြောင်း၊ ပဒက်စာပွင့်များကို လူအများနှစ်ချိုက်စွာစားသုံးသောကြောင့် ယခုကဲ့သို့သောအချိန်ရောက်လျှင် ဒေသနေ ပြည်သူအများစုသည် မိမိတို့ကျေးရွာအနီးရှိ တောတောင်များတွင် လိုက်လံခူးဆွတ်ရောင်းချလျက်ရှိပြီး ရာသီစာပဒက်စာများသည် ပေါ်ဦးပေါ်ဖျားပေါ်ချိန်ဖြစ်၍ ဈေးကောင်းလည်းရရှိသဖြင့် မိသားစုအပိုဝင်ငွေတိုးကာ စားဝတ်နေရေးအဆင်ပြေလျက်ရှိကြောင်းသိရသည်။
ပုသိမ်မြို့ပေါ်တွင်လည်း ပေါ်ဦးပေါ်ဖျားပဒက်စာပင်များကို ဒေသနေပြည်သူအများ နှစ်ချိုက်စွာစားသုံးကြကြောင်း၊ ချဉ်ပေါင်ရွက်၊ မန်ကျည်းရွက်၊ ကင်ပွန်းချဉ်ရွက်နှင့် ဘူးသီး စသည့် သီးနှံများတွဲဖက်၍ အရည်သောက်ဟင်းရည်နှင့် အခြားအသားဟင်း၊ ငါးဟင်း၊ ပုစွန်ဟင်း စသည့်ဆီပြန်ဟင်းလေးတစ်ခွက်နှင့်ဆိုလျှင် ခေါင်းမဖော်နိုင်အောင် အလွန်ထမင်းမြိန်စေသည့်အပြင် ဆေးဖက်လည်းဝင်ပြီး လူကြိုက်များသည့် မီးဖိုချောင်သုံးသီးနှံဖြစ်ကာ ပဒက်စာပွင့် (၂) ပွင့်ပါ (၁) စည်းလျှင် ကျပ် (၂၀၀) နှုန်းဖြင့်ရောင်းချလျက်ရှိပြီး ဈေးကောင်းရရှိသဖြင့် ခူးဆွတ်ရောင်းချသူများမှာ ယခင်နှစ်ထက် ပိုမိုများပြားလာကြောင်းသိရှိရပါသည်။
DOCA(ဧရာဝတီ)
စစ်ကိုင်းတိုင်းဒေသကြီး၊ မုံရွာမြို့နယ်၊ ချင်းတွင်းမြစ်ရိုး၏ အရှေ့ဘက်တွင်တည်ရှိသော ညောင်ဖြူပင်၊ သစ်ဆိမ့်၊ ထနောင်းတော၊ နဂါးတွင်းကျေးရွာတို့တွင် ဂေါ်ဖီအနည်းငယ်စိုက်ပျိုးပြီး ဈေးကွက်အတွင်း လိုအပ်သောဂေါ်ဖီထုပ်များကို ရှမ်းပြည်နယ်မှ မှာယူရောင်းချလျက်ရှိကြောင်းသိရှိရပါသည်။
ဂေါ်ဖီထုပ်ဈေးနှုန်းမှာ ဖေဖော်ဝါရီလအတွင်း ဂေါ်ဖီထုပ်တစ်ထုပ်လျှင် အကြီး (၉၀၀) ကျပ်၊ အသေး (၅၀၀) ကျပ်ဖြင့်ရောင်းချရပြီး ဂေါ်ဖီထုပ်တစ်ထုပ်ကို လေးခြမ်းစိပ်ကာ ရောင်းချပါက တစ်ခြမ်းလျှင် ၃၀၀ကျပ်ဖြင့် ကျပ် (၁၂၀၀) ဈေးနှုန်း စသည်ဖြင့် အရောင်းအဝယ်ဖြစ်လျက်ရှိပြီး မတ်လတွင် ဂေါ်ဖီတစ်ထုပ်လျှင် အကြီး (၁၀၀၀) ကျပ်၊ အသေး (၆၀၀) ကျပ်ဈေးနှုန်းရှိခဲ့ပြီး ဖေဖော်ဝါရီလနှင့် မတ်လဈေးနှုန်းတို့ကိုနှိုင်းယှဉ်လျှင် ဂေါ်ဖီထုပ်တစ်ထုပ်လျှင် အကြီး(၁၀၀) ကျပ်၊ အသေး(၁၀၀)ကျပ်ခန့်ဈေးနှုန်းမြင့်တက်လာကြောင်း မုံရွာမြို့၊ ကန်သာယာဈေးရှိ ရောင်းချသူများထံမှသိရှိရပါသည်။
DOCA(စစ်ကိုင်း)
စစ်ကိုင်းတိုင်းဒေသကြီး၊ မုံရွာမြို့နယ်၌ ကွမ်းကို မိမိတို့အိမ်ခြံဝင်းအတွင်း တစ်နိုင်တစ်ပိုင်အနေဖြင့်လည်းကောင်း၊ အပိုဝင်ငွေရရှိရန်အတွက်လည်းကောင်း စိုက်ပျိုးကြကြောင်း၊ ကွမ်းကို ဆောင်းစိုက်နှင့် မိုးစိုက်ဟူ၍ နှစ်မျိုးခွဲ၍ စိုက်ပျိုးကြရာ မိုးစိုက်သည် ပိုးကျလွယ်သည့်အတွက် အနည်းငယ်သာစိုက်ပျိုးကြပြီး ဆောင်းစိုက်ကိုသာ ပိုမိုစိုက်ပျိုးကြကြောင်းသိရှိရပါသည်။
မုံရွာမြို့နယ်၌ဖြစ်ပေါ်နေသော ကွမ်းဈေးနှုန်းများအနေဖြင့် အရည်အသွေးအပေါ်မူတည်၍ ဖေဖော်ဝါရီလ(စတုတ္ထပတ်)တွင် ကွမ်းတစ်ပိဿာလျှင် ငွေကျပ်(၅၀၀၀-၇၀၀၀)ဖြင့် လည်းကောင်း၊ မတ်လ(ပထမပတ်)တွင် ငွေကျပ်(၃၀၀၀-၄၀၀၀) ဖြင့်လည်းကောင်း၊ မတ်လ (ဒုတိယပတ်) တွင် ငွေကျပ် (၂၀၀၀-၂၅၀၀)ဖြင့်လည်းကောင်း ရောင်းချလျက်ရှိကြောင်း၊ ဆောင်းအကုန် နွေရာသီတွင် ကွမ်းအထွက်နှုန်းတိုးပြီး ဈေးကွက်အတွင်း ကုန်ဝင်ရောက်မှုများကာ ဈေးနှုန်းကျဆင်းလျက်ရှိကြောင်း ကွမ်းစိုက်တောင်သူများထံမှသိရှိရပါသည်။
DOCA(စစ်ကိုင်း)
မုံရွာမြို့၊ ချင်းတွင်းရတနာစျေး၌ ရောင်းချနေသော ပုစွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်ကြောင်းသိရပါသည်။ ပုစွန်၊ ငါးခြောက်စျေးနှုန်းများမှာ ဝင်ရောက်သည့်ဒေသအပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိပါသည်။
ယခုမတ်လ ဒုတိယပတ်တွင် ရောင်းချနေသောဈေးနှုန်းများမှာ ပုစွန်ခြောက် (၁)ပိဿာလျှင် ကျပ်(၆၅၀၀၀)မှ ကျပ်(၈၅၀၀၀)၊ ငါးရံ့ခြောက် (၁)ပိဿာလျှင် ကျပ်(၆၀၀၀၀မှ ၈၀၀၀၀)၊ ငါးပုတ်လုံးခြောက်(၁)ပိဿာလျှင် ကျပ်(၁၆၀၀၀မှ ၁၈၅၀၀)၊ ငါးပုတ်သင်(၁)ပိဿာလျှင် ကျပ်(၁၅၀၀၀မှ ၁၈၀၀၀)၊ အာဗြဲခြောက်(၁)ပိဿာလျှင် ကျပ်(၁၅၀၀၀မှ ၂၂၀၀၀)၊ ငါးကျည်း ခြောက်(၁)ပိဿာလျှင် ကျပ်(၃၅၀၀၀မှ ၄၅၀၀၀)၊ ငါးနီတူခြောက် (၁)ပိဿာလျှင် ကျပ်(၁၂၀၀၀မှ ၁၄၀၀၀)၊ ငါးဖန့်ဝိုင်း(ငါးပိကောင်) (၁)ပိဿာလျှင် ကျပ်(၁၅၀၀၀မှ ၁၇၅၀၀)ရှိကြောင်း ချင်းတွင်းရတနာဈေးတွင်ရောင်းချနေသော ငါးခြောက်ကုန်သည်များထံမှသိရှိရပါသည်။
DOCA(စစ်ကိုင်း)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်သည် ပဲမျိုးစုံဖြစ်သော ကုလားပဲဖြူလုံးကြီး၊ ကုလားပဲဝါ၊ ကုလားပဲဝါလုံးကြီးနှင့် စွန်တာနီ၊ ပဲလွန်းပြာ၊ ထောပတ်ပဲ၊ CPနှင့် ပဲနီပြားအမျိုးမျိုးစိုက်ပျိုးထွက်ရှိလျက်ရှိပါသည်။ ကျွန်းဦး၊ ကျွန်းညို၊ မြင်းကျွန်း၊ ဘောလုံးခုံနှင့် ပခုက္ကူကျွန်းများတွင် ကုလားပဲမျိုးစုံနှင့် ပဲနီပြားများကို အဓိကစိုက်ပျိုးထုတ်လုပ်လျက်ရှိပါသည်။ ပခုက္ကူကုန်စည်ဒိုင်သို့ ပခုက္ကူမြို့နယ်သာမက မြိုင်၊ ရေစကြိုကျွန်များနှင့် အခြားနယ်များမှလည်း ဝင်ရောက်အရောင်းအဝယ်ဖြစ်လျက်ရှိကြောင်း ကုန်စည်ဒိုင်မှသိရှိရပါသည်။
၂၀၂၄ခုနှစ်၊ မတ်လ(ပထမပတ်)တွင် အရောင်းအဝယ်ဖြစ်ခဲ့သော ကုလားပဲ(၃)မျိုး၏ ဈေးနှုန်းများမှာ ကုလားပဲဖြူလုံးကြီး(V2)တစ်တင်းလျှင် ကျပ်(၈၆၅၀၀)၊ ကုလားပဲဖြူလုံးကြီး(V6) တစ်တင်းလျှင် ကျပ်(၈၆၈၀၀)၊ ကုလားပဲဝါ(HL) တစ်တင်းလျှင် ကျပ်(၇၉၅၀၀)၊ ကုလားပဲဝါလုံးကြီး(929) တစ်တင်းလျှင် ကျပ်(၈၅၆၀၀)၊ စွန်တာနီ(ကျွန်း) တစ်တင်းလျှင် ကျပ်(၅၁၂၀၀)၊ ပဲလွန်းပြာတစ်တင်းလျှင် ကျပ်(၆၂၈၀၀)၊ ထောပတ်ပဲတစ်တင်းလျှင် ကျပ်(၁၁၇၅၀၀)၊ CP တစ်တင်းလျှင် ကျပ်(၁၅၈၀၀)ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ကုန်စည်ဒိုင်မှ သိရှိရပါသည်။
အရောင်းအဝယ်ဖြစ်သည့်အိတ်ရေမှာ ကုလားပဲဖြူလုံးကြီး(V2)အိတ် (၃၀၀)၊ ကုလားပဲဖြူလုံးကြီး(V6) အိတ်(၄၀၀)၊ ကုလားပဲဝါ(HL) အိတ်(၁၀၀)၊ ကုလားပဲဝါလုံးကြီး(929) အိတ် (၃၀၀)၊ စွန်တာနီ(ကျွန်း) အိတ်(၂၀၀)၊ ပဲလွန်းပြာအိတ်(၃၀၀)၊ ထောပတ်ပဲအိတ်(၂၀၀)၊ CP အိတ်(၅၀၀) နေ့စဉ်အရောင်းအဝယ်ဖြစ်နေပြီး တင်ပို့မှုအနေဖြင့် ရန်ကုန်ဘုရင့်နောင်ကုန်စည်ဒိုင်၊ အိန္ဒိယနှင့် တရုတ်တို့မှ ဝယ်ယူနေကြောင်းသိရှိရပါသည်။
DOCA(မကွေး)
နေလှည်းစေ့မှာ ပူပြင်းခြောက်သွေ့သော အညာဒေသ၊ ယောဒေသနှင့် စစ်ကိုင်းတိုင်းဒေသကြီးအတွင်းရှိ ပုလဲ၊ မင်းတိုင်ပင်တို့မှ သဘာဝအလျောက် အလေ့ကျပေါက်ရောက်လျက်ရှိသော အရိုင်းပင်တစ်မျိုးဖြစ်သည်။ နေလှည်းပင်ကို အခြားနာမည်အခေါ်အဝေါ်မှာ ဂျိုးစက်ကောက်ပင်ဖြစ်သည်။ နေလှည်းပင်မှာ ဒီဇင်ဘာလမှစ၍ ပွင့်ကြပြီး ယာတောများတွင် အများအပြားပေါက်ရောက်လျက်ရှိကာ လူ့တစ်ရပ်ကျော်သော အပင်ကြီးမျိုးလည်းဖြစ်ပါသည်။
နေလှည်းစေ့အပင်ပုံသဏ္ဌာန်မှာ ဖြူစိမ်းစိမ်းအရွက်များကြားတွင် ခရမ်းဖျော့ဖျော့ပန်းခိုင်လေးများနှင့် ပဏာတင့်လှပနေသော အပင်လည်းဖြစ်ပါသည်။ နေလှည်းပင်သည် အညာဒေသ၏ တန်ဖိုးရှိလှသော တိုင်းရင်းဆေးပင်တစ်ပင်လည်းဖြစ်ပါသည်။ နေလှည်းပင်သည် အပင်ပျော့အမျိုးအစားဖြစ်၍ ရှုပ်ထွေးစွာကိုင်းဖြာနေပြီး အောက်ခြေပိုင်းတွင် မာကျော၍ အပေါ်ပိုင်းတွင် ပျော့ပျောင်းသောအပင်မျိုးလည်းဖြစ်ပါသည်။ အကိုင်းအခက်များပေါ်တွင် ဒေါင်လိုက်အစင်းကြောင်းလေးများပါရှိပြီး အဖြူရောင်အမွေးနုလေးများဖြင့် ဖုံးအုပ်နေပါ သည်။ နေလှည်းပင်သည် ပဲမျိုးရင်းဝင်အပင်များဖြစ်ပြီး တစ်ရက်တည်း Simple leaves ရွက်တည်း (သို့) Unifoliate compound ဖြစ်နေပါသည်။ ရွက်စွယ်များပါရှိကာ တည်မြဲကြပြီး အရွက်များသည် ကျယ်ပြန့်သောဘဲဥပုံရှိသည်။ အရွက်များ၏ မျက်နှာပြင်နှစ်ဖက်၌ အမွေးများရှိသော်လည်း အောက်ဘက်တွင် gland – dottet များရှိကြသည်။ ပန်းကိုင်များသည် ရှည်လျားသောပွင့်ကိုင်းများဖြစ်ပြီး အရွက်ကြားများမှထွက်ရှိပါသည်။ ပွင့်ကိုင်းများ၏ထိပ်ဘက်တွင် ကျစ်လျစ်သော ပန်းခိုင်အစုများကိုတွေ့ရသည်။ pale violet အရောင်ရှိပြီး ပန်းပွင့်များမှာ ပန်းခိုင်များသဖွယ် ထိုးထွက်နေပါသည်။ ပွင့်ဖတ်အုံမှာ campanulate ပုံစံရှိပါသည်။ ပဲပန်းတို့၏လက္ခဏာဖြစ်သော standard, wings, keels တို့ဖြင့်ဖွဲ့စည်းထားသော ပွင့်ချပ်အုံလည်းရှိပါသည်။ ဝတ်ဆံဖို (၁၀)ခုပါပြီး နှစ်စုစည်း (၁+၉)ဖြစ်သည်။ အသီးမှာ ဖောင်းနေသော pod အသီးအမျိုးအစားဖြစ်ပြီး အတွင်း၌ အနက်ရောင်အစေ့များလည်းပါရှိပါသည်။
နေလှည်းစေ့အပင်၏အသုံးဝင်ပုံ၊ ဂုဏ်ရည်နှင့်စွမ်းရည်တို့ကို အရှင်နာဂသိမ်ဆေးကျမ်းစာအုပ်တွင် ဖော်ပြထားပါသည်။ နေလှည်းပင်၏ အသီး၊ အပင်ပဉ္စငါးပါးလုံးအသုံးဝင်ပါသည်။ အသီးသည် ပူခြင်း၊ စပ်ခါးခြင်း၊ ပဉ္စငါးပါးမှာ ခါးခြင်း၊ အေးခြင်း၊ ပဉ္စငါးပါးသည် နှုတ်ကိုမြိန်စေခြင်း၊ ဝမ်းမီးကိုတောက်စေခြင်း၊ ခန္ဓာကိုယ်ကိုခွန်အားဖြစ်စေခြင်း၊ နှလုံးကိုအားကောင်းစေခြင်း၊ သလိပ်ကိုနိုင်စေခြင်း၊ သွေးအန်သွေးကျ၊ နှလုံးရောဂါ၊ ပန်းနာ၊ နူနာ၊ အဖျားရောဂါများကိုပျောက်ကင်းစေပြီး သည်းခြေကိုအားကောင်းစေပါသည်။ နူနာ၊ ဆံပင်အရေပြားရောများအပြင် အန်ခြင်း၊ ပန်းနာချောင်းဆိုး၊ ဖောရောင်၊ အစာမကြေရောဂါများကိုလည်းကုသနိုင်ကြောင်း ဖော်ပြထားပါသည်။
နေလှည်းပင်များကို အိန္ဒိယနိုင်ငံ၌ အာယုဗေဒနှင့် (lamila Siddha) ဆေးဝါးအဖြစ်လည်းအသုံးပြုကြကြောင်း၊ တရုတ်ရိုးရာဆေးအဖြစ်လည်းအသုံးပြုကြကြောင်း လေ့လာသိရှိရပါသည်။
နေလှည်းပင်၏ extract တွင် များပြားသောဓာတုဒြပ်ပေါင်းများလည်းပါဝင်သည့်အပြင် flavonoids နှင့် coumarins and meroterpenes (3 hydroxybakuchiol) တို့လည်းပါဝင်ပါသည်။ ထို့ပြင် အရွက်ထဲတွင် များပြားလှသော genistein ပါဝင်သောကြောင့် တရုတ်ဆေးဝါးဖြစ်သော Bu Gu Zhi in traditional chinese medicine TCM ၌ ကျောက်ကပ်ရောဂါ၊ အရိုးကျိုးခြင်း၊ အရိုးအက်ခြင်း (bone fracture)၊ ဒူးနာ၊ ကျောနာ၊ ပန်းသေရောဂါ၊ အိပ်ပျော်နေစဉ် ဆီးသွားခြင်းရောဂါ၊ ဆံပင်ကျွတ်ခြင်းနှင့် ခရုသင်းရောဂါများကိုကုသရာတွင် အသုံးပြုနိုင်သော နွယ်မြစ်သစ်ပင်ဆေးဖက်ဝင်သည့် အပင်တစ်မျိုးလည်းဖြစ်ပါသည်။
ဈေးနှုန်းဈေးကွက်အနေဖြင့် နေလှည်းစေ့တစ်ပိဿာလျှင် ကျပ် (၆၇၅၀မှ ၇၂၀၀) ထိဖြင့် ပခုက္ကူကုန်စည်ဒိုင်တွင် နေ့စဉ် ကုန်ချိန်ပိဿာ (၃၀၀၀)ကျော်မှ ပိဿာ (၅၀၀၀)ကျော်ထိဝင်ရောက်အရောင်းအဝယ်ဖြစ်လျက်ရှိပြီး ပြည်ပနိုင်ငံဖြစ်သော တရုတ်နိုင်ငံမှ ဆေးအတွက် အသုံးပြုရန်ဝယ်ယူနေကြောင်းသိရှိရပါသည်။
DOCA(မကွေး)
၂၀၂၄ ခုနှစ်၊ မတ်လ ဒုတိယအပတ်တွင် ရှမ်းပြည်နယ်(အရှေ့ပိုင်း)၊ ကျိုင်းတုံမြို့ ဈေးကွက်ရှိ ဘိလပ်မြေဈေးနှုန်းများမှာ ကျားတံဆိပ် (40)kg တစ်အိတ်လျှင် (၁၈၀၀၀) ကျပ်၊ ဆင်တံဆိပ် (50)kg တစ်အိတ်လျှင် (၁၉၀၀၀)ကျပ်၊ စိန်တံဆိပ် (50)kg တစ်အိတ်လျှင် (၁၉၃၀၀)ကျပ် ဖြစ်ပါသည်။ တာချီလိတ်မြို့ရှိ ဘိလပ်မြေဈေးနှုန်းများမှာ ကျားတံဆိပ် (40)kg တစ်အိတ်လျှင် (၁၆၀၀၀) ကျပ်၊ ဆင်တံဆိပ်(50)kg တစ်အိတ်လျှင် (၁၇၀၀၀)ကျပ်၊ စိန်တံဆိပ်(50)kg တစ်အိတ်လျှင် (၁၇၀၀၀)ကျပ် ဖြစ်ပါသည်။
ကျိုင်းတုံမြို့ရှိ မတ်လ ဒုတိယအပတ် ဓာတ်မြေဩဇာဈေးနှုန်းများမှာ ပုလဲ (MEP) (50)kg တစ်အိတ်လျှင် (၈၇၀၀၀)ကျပ်၊ တီဆူပါ (လေဆာ) (50)kg တစ်အိတ်လျှင် (၂၅၀၀၀) ကျပ်၊ တီဆူပါ (may) (၁)လီတာလျှင် (၅၀၀၀၀)ကျပ်၊ ယူရီးယား(မြင်းပျံ) (50)kg တစ်အိတ်လျှင် (၁၀၀၀၀၀)ကျပ် ဖြစ်ပါသည်။
ရှမ်းပြည်နယ်(အရှေ့ပိုင်း)၊ ကျိုင်းတုံမြို့ရှိ ဘိလပ်မြေဈေးနှုန်းမှာ တည်ငြိမ်လျက်ရှိပြီး တာချီလိတ် မြို့ရှိ ဘိလပ်မြေဈေးနှုန်းမှာ ယခင် မတ်လ ဒုတိယအပတ်ထက် ဈေးနှုန်းအနည်းငယ် မြှင့်တက်လျက် ရှိကြောင်း သိရှိပါသည်။ ကျိုင်းတုံမြို့ရှိ ဓာတ်မြေဩဇာဈေးနှုန်းများအနေဖြင့် တီဆူပါ(May)နှင့် ယူရီးယား (မြင်းပျံ)တို့မှာ ယခင် မတ်လ ပထမအပတ်ထက် ဈေးနှုန်းအနည်းငယ်မြှင့် တက်လာကြောင်း သိရှိရပါသည်။
DOCA(ရှမ်း)
၂၀၂၄ ခုနှစ် မတ်လ ဒုတိယပတ်အတွင်း ရှမ်းပြည်နယ်(အရှေ့ပိုင်း) ကျိုင်းတုံမြို့ရှိ အခြေခံစားသောက်ကုန်များဖြစ်သော ရွှေဘိုပေါ်ဆန်မွှေး(သိင်္ဂီ) တစ်ပြည် ၇၅၀၀ ကျပ်၊ ဧည့်မထ (ဒေသ)ဆန် တစ်ပြည် ၄၀၅၀ ကျပ်ဖြင့် ရောင်းဝယ်လျက်ရှိပါသည်။ စားဖိုဆောင်စားသောက်ကုန်များအနေဖြင့် ကြက်သွန်နီ တစ်ပိဿာ ၄၂၀၀ ကျပ်၊ ကြက်သွန်ဖြူ(ကြူကုတ်) တစ်ပိဿာ ၁၀၀၀၀ ကျပ်၊ (ရှမ်းစ) တစ်ပိဿာ ၁၅၅၀၀ ကျပ်၊ ငရုတ်သီးခြောက်(ရှည်) တစ်ပိဿာ ၁၇၅၀၀ ကျပ်၊ ခရမ်းချဉ်သီး တစ်ပိဿာ ၂၀၀၀ ကျပ်၊ အာလူး တစ်ပိဿာ ၃၅၀၀ ကျပ်၊ မန်ကျည်းသီးမှည့် တစ်ပိဿာ ၄၀၀၀ ကျပ်နှင့် ချင်း တစ်ပိဿာ ၅၀၀၀ ကျပ် စသဖြင့် ရောင်းဝယ်လျက်ရှိပါသည်။
ကျိုင်းတုံမြို့တွင် မတ်လ ဒုတိယပတ်၌ စားသုံးဆီဈေးနှုန်းများအနေဖြင့် စားအုန်းဆီ တစ်ပိဿာ ၆၅၀၀ ကျပ်နှင့် ပဲဆီ(ရိုးရိုး) တစ်ပိဿာ ၁၆၀၀၀ ကျပ်၊ ကြက်ဥဈေးမှာ တစ်လုံး ၂၅၀ ကျပ် နှင့် ဘဲဥ တစ်လုံး ၄၀၀ကျပ်ဖြင့် ရောင်းဝယ်လျက်ရှိပါသည်။ အသား/ငါးဈေးနှုန်းများမှာ ကြက်သား (CP) တစ်ပိဿာ ၁၃၀၀၀ ကျပ်၊ ဝက်သား တစ်ပိဿာ ၂၀၀၀၀ ကျပ်၊ အမဲသား တစ်ပိဿာ ၂၄၀၀၀ ကျပ်၊ ငါးကြင်း တစ်ပိဿာ ၁၇၅၀၀ ကျပ်၊ ငါးမြစ်ချင်း တစ်ပိဿာ ၁၆၀၀၀ ကျပ် ဈေးနှုန်းများဖြင့် ရောင်းဝယ်လျက်ရှိကြောင်း သိရှိရပါသည်။
ကျိုင်းတုံမြို့ အခြေခံစားသောက်ကုန်ဈေးနှုန်းများသည် ယခင်မတ်လပထမပတ်နှင့် နှိုင်းယှဉ်ပါက ရွှေဘိုပေါ်ဆန်မွှေး(သိင်္ဂီ)၊ ဧည့်မထ(ဒေသ)ဆန်၊ ကြက်သွန်နီဈေးနှုန်းတို့မှာ အနည်းငယ်မြင့်တက်လျက်ရှိကြောင်းနှင့် ကြက်သွန်ဖြူ(ရှမ်းစ)ဈေးနှုန်းမှာ အနည်းငယ်ကျဆင်းလျက်ရှိပြီး ကျန်အခြေခံစားသောက်ကုန်များမှာ ဈေးနှုန်းတည်ငြိမ်လျက်ရှိကြောင်း သိရှိရပါသည်။
DOCA(ရှမ်း)
