ပြည်တွင်းကုန်သွယ်မှုသတင်း

     တနင်္သာရီတိုင်းဒေသကြီး၊ထားဝယ်ခရိုင်အတွင်းရှိ စည်ပင်သာယာဈေးကြီးတွင် ကြက်သွန်နီ ကုန်စည် များနေ့စဉ် စီးဝင်စီးထွက်ရောင်းဝယ်လျက်ရှိရာ ကြက်သွန်နီဈေးနှုန်းမှာ ယခုပတ်ကြာသပတေး နေ့တွင် တစ်ပိဿာလျှင်(၂၃၀၀)ကျပ်ရှိကြောင်းသိရသည်။ ထားဝယ်မြို့အတွင်းသို့ ကုန်စည်ဝင်ရောက်မှု များပြားလာခြင်းကြောင့် ကြက်သွန်နီဈေးနှုန်းမှာ ယခင်အပတ်ကထက်  တစ်ပိဿာလျှင်(၁၀၀)ကျပ် အနည်းငယ်မြင့်တက်လာကြောင်း ကုန်စုံဆိုင်ရောင်းချသူတစ်ဦးထံမှ သိရှိရပါသည်။

DOCA(တနင်္သာရီ)

     စားဖိုဆောင်သီးနှံ တစ်မျိုးဖြစ်သည့် ကြက်သွန်ဖြူကို ဟင်းလျာများတွင် အသုံးပြုပြီး ပြည်နယ်အတွင်းတွင် တစ်နိုင်တစ်ပိုင် စိုက်ပျိုးလျက်ရှိကြပြီး အောင်ပန်း၊ ကလောတို့မှ သယ်ယူ ရောင်းချလျက်ရှိပါသည်။ လက်ရှိစျေးကွက်အတွင်းဖြစ်ပေါ်နေသော ကြက်သွန်ဖြူ‌ စျေးနှုန်းမှာ ယခုနိုဝင်ဘာလ ပထမပတ်အတွင်း ကြက်သွန်ဖြူ (ရှမ်းစ) တစ်ပိဿာလျှင် (၉၅၀၀)မှ (၁၀၀၀၀) ကျပ်သို့ လည်းကောင်း၊ (ကြူဂုတ်) တစ်ပိဿလျှင် (၁၄၀၀၀)ကျပ်မှ (၁၅၀၀၀) ကျပ်သို့ ကျဆင်းလာကြောင်း သိရှိရပါသည်။

       အောက်တိုဘာနှင့်ယခုနိုဝင်ဘာလအတွင်း စျေးနှုန်းများကို နှိုင်းယှဉ်ကြည့်လျှင် ကြက်သွန်ဖြူတစ် ပိဿာလျှင် (၁၀၀၀) ကျပ်မျှအနည်းငယ် မြင့်တက်လာကြောင်း ထားဝယ်မြို့ စည်ပင်သာယာစျေး အတွင်းရှိ စားဖိုဆောင်သုံးပစ္စည်းများရောင်းချနေသူတစ်ဦးထံမှ သိရှိရပါသည်။

DOCA(တနင်္သာရီ)

    တနင်္သာရီတိုင်းဒေသကြီးသည် ပင်လယ်ရေလုပ်ငန်းများဖြင့် အသက်မွေးဝမ်းကျောင်း ပြုလုပ်သည့်တိုင်းဒေသကြီးဖြစ်သည့်အတွက် စီးပွားရေးကောင်းမွန်သဖြင့် အလှူမင်္ဂလာပွဲ များ ကိုခြိမ့်ခြိမ့်သဲကျင်းပပြုလုပ်လေ့ရှိပြီး အလှူအတန်းများတွင် ကျွေးမွေးရန် အတွက် ဒေသ မှထွက်ရှိ သော ငါးခြောက်များသည် အရေးပါသောအစားအစာတစ်ခုအဖြစ် ပါဝင်လျက်ရှိ ပါသည်။ ထို့အပြင် အခြားဒေသများသို့တင်ပို့ရောင်းချနေသဖြင့် ထားဝယ်မြို့ပေါ် ရှိငါးခြောက် စျေးကွက်အခြေအနေမှာ ရောင်းအားကောင်းမွန်လျက်ရှိပြီး ဈေးနှုန်းများသည် ငါးခြောက် အသုံးပြုသည့်ပွင့်လင်းရာသီဖြစ်  သော ကြောင့် ဈေးနှုန်းအနည်းငယ်မြင့်တက်လျက်ရှိပါသည်။

           ယခု ထားဝယ်ဈေးကွက်တွင် ငါးခြောက်အမျိုးအစား များစွာရှိသော်လည်း ဒေသတွင်း စားသုံးမှုများပြားသည့် ငါးရောင်ခြောက် (ခေါ်) ဒလုံးခြောက် တစ်ပိဿာလျှင် (၃၅၀၀၀) ကျပ်၊ ငါးလက်ဝါးခြောက် (ခေါ်) စာဗျန့်ခြောက် တစ်ပိဿာလျှင် (၂၃၀၀၀)ကျပ်နှင့် ငါးအူမျှင်း ခြောက် တစ်ပိဿာလျှင် (၇၅၀၀၀)ကျပ် အသီးသီးဈေးနှုန်းများရှိကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ ထားဝယ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် ဟင်းသီးဟင်းရွက်စိုက်ပျိုးရေးလုပ်ငန်းများကို အများအပြားလုပ်ကိုင်လျက်ရှိကြောင်း သိရသည်။ ဒေသခံများသည် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ရုံးပတီသီး၊ ဘူးသီး၊ ငရုတ်သီး စသည့် သီးနှံများကို စိုက်ပျိုးကြသည့်အပြင် သင်္ဘောသီးအမှည့်များကိုလည်း တစ်နိုင်တစ်ပိုင် စိုက်ပျိုး ကြပြီး စည်ပင်သာယာဈေးနှင့် ကျေးရွာဈေးများသို့ လာရောက်ရောင်းချကြကြောင်း သိရှိရသည်။

      ၂၀၂၅ခုနှစ်၊ နိုဝင်ဘာလပထမပတ်အတွင်း ထားဝယ်မြို့နယ်ရှိ ဈေးများ၌ ရောင်းချလျက် ရှိသော သင်္ဘောသီးအမှည့်ဈေးနှုန်းမှာ သင်္ဘောသီးအမှည့်(၁)လုံးလျှင် (၁၀၀၀)မှ (၁,၅၀၀) ကျပ်ဖြင့် အရောင်းအဝယ် ဖြစ်ပွားလျက်ရှိကြောင်း ဒေသခံ ကုန်စိမ်းရောင်းချသူများထံမှ သိရှိရသည်။

DOCA(တနင်္သာရီ)

          မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်ပြီး စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကန့်ဘလူမြို့နယ်တွင်လည်း သီးနှံမျိုးစုံစိုက်ပျိုးလျက်ရှိရာ ရေ၊ မြေ၊ ရာသီဥတုနှင့်ကိုက်ညီသည့် ပဲစဉ်းငုံသီးနှံကို အဓိကစိုက်ပျိုးလျက်ရှိကြောင်း စိုက်ပျိုးရေး ဦးစီးဌာန၏ စာရင်းများအရ သိရသည်။

        ၂၀၂၅ ခုနှစ်၊ နိုဝင်ဘာလ ပထမပတ်အတွင်း ပဲစဉ်းငုံနီတစ်တင်းလျှင် (၇၀၀၀၀)ကျပ်၊ ပဲစဉ်းငုံဖြူတစ်တင်းလျှင် (၆၇၀၀၀)ကျပ်နှင့် အောက်စတစ်တင်းလျှင်(၆၆၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်အောက်တိုဘာလ၏ ဈေးနှုန်းများနှင့်နှိုင်းယှဉ်ပါက ယခုပတ်အတွင်း ပဲစဉ်းငုံနီတစ်တင်းလျှင်(၃၀၀၀)ကျပ်နှင့် ပဲစဉ်းငုံဖြူ(၁)တင်းလျှင် (၃၀၀၀)ကျပ်ဈေးနှုန်း ကျဆင်းသွားကြောင်း၊ ဒေသထွက်ပဲစဉ်းငုံများကို မန္တလေးမြို့ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချကြောင်း သီးနှံရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)