ပြည်တွင်းကုန်သွယ်မှုသတင်း

      ဝါးပလုတ်(ခ)ဝါးဂျယ်လီ ကို တနင်္သာရီတိုင်းဒေသကြီး၊ မြိတ်ခရိုင်တွင် အဓိကထွက်ရှိသော သဘာဝအစားအစာ ဂျယ်လီအမျိုးအစားတစ်ခုဖြစ်ပါသည်။ နှစ်တစ်နှစ်၏မိုးဦးကာလများတွင်သာ ရရှိပြီး သဘာဝဝါးပင်မှရရှိသော အဆီအနှစ်ဖြစ်သောကြောင့် ဘေးဥပါဒ်အန္တရာယ်ကင်းရှင်း၍ ဆေးဖက်ဝင်သောအစားအစာတစ်မျိုးလည်းဖြစ်ပါသည်။

      ဝါးပလုတ်(ခ)ဝါးဂျယ်လီပြုလုပ်ရာတွင် တပင်တိုင်ဝါးကိုအပင်အရင်းမှနေ၍ ပထမအဆစ်၏ အောက်နားမှာဓါးဖြင့်အပေါက်များကိုဖောက်ပြီး မိုးရွာသည့်အချိန်တွင် ထိုအပေါက်များမှ မိုးရေများ သည် ဝါးအတွင်းထဲသို့စိမ့်ဝင်ပြီး (၁ဝ) ရက်မှ (၁၅)ရက်ခန့် ကြာသည့်အချိန်တွင် သဘာဝဝါးပလုတ် ကိုရရှိမည်ဖြစ်ပါသည်။ သဘာဝ ဝါးပလုတ်(ခ)ဝါးဂျယ်လီ ကိုစားသုံးခြင်းအားဖြင့် နှလုံးအေးပြီး အမောသက်သာစေပါသည်။ အစာချေဖျက်မှုအားကောင်းပြီး အပှုငြိမ်းစေခြင်းကြောင့် ဖျော်ရည်များ တွင် ထည့်သွင်းသုံးစွဲကြသည်။

     ယခုနှစ်ရဲ့ ပေါ်ဦး ပေါ်ဖျား ဝါးပလုတ်ဈေးနှုန်းများမှာ (၁)လီတာဗူး တစ်ဗူး လျှင် ကျပ် (၃ဝဝဝ-၅ဝဝဝ)ကျပ်ထိ ဈေးဖြင့် အသီးသီးရောင်းချနေကြောင်း သိရှိရပါသည်။

DOCA(တနင်္သာရီ)

        တနင်္သာရီတိုင်းဒေသကြီး၊ ထားဝယ်မြို့နယ်တွင် သံပုရာသီးနှင့် ရှောက်သီး များစိုက်ပျိုးထားပြီး ယခုအချိန်တွင် လှိုင်လှိုင်ထွက်ပေါ်နေသော်လည်းစျေးကောင်းရရှိနေကြောင်း သိရပါသည်။ ၂၀၂၅ခုနှစ်၊အောက်တိုဘာလ တတိယပတ်အတွင်းဖြစ်ပေါ်လျက်ရှိသော သံပုရာသီး ဈေးနှုန်း များမှာ သံပုရာသီး(အကြီး)(၁)လုံးလျှင် (၈၀၀)ကျပ်၊ သံပုရာသီး(အသေး)(၁)လုံးလျှင် (၅၀၀)ကျပ် ဖြင့်လည်းကောင်း၊ ရှောက်သီး(အကြီး)(၁)လုံးလျှင် (၁၀၀၀)ကျပ်နှင့် ရှောက်သီး (အသေး) (၁)လုံးလျှင် (၇၀၀)ကျပ်ဖြင့်အရောင်းအဝယ်ဖြစ်လျက်ရှိပြီး ယခုအခါ ထားဝယ်မြို့မ ဈေးတွင် အသီးအရွယ်အစားအလိုက် ဈေးအနည်းငယ်ကွာခြားမှုရှိကြောင်း ကုန်စိမ်းရောင်းချသူထံမှ သိရပါသည်။

DOCA(တနင်္သာရီ)

       ထားဝယ်မြို့အတွင်းရှိ ကျေးရွာများတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ စားဖိုဆောင်သီးနှံဖြစ်သည့် ပဲတောင့်ရှည်သီး၊ ချဉ်ပေါင်ရွက်၊ ဆူးပုတ်ရွက်၊ ရုံးပတီသီး၊ ခရမ်းသီးနှင့်  ကန်ဇွန်းရွက်များကို စိုက်ပျိုးလျက်ရှိသည့်အနက် ကန်ဇွန်းရွက်ကိုလည်း တစ်ပိုင်တစ်နိုင် စိုက်ပျိုးလျက်ရှိပြီး  ထားဝယ်မြို့ကမ်းနားဈေးသို့ လာရောက် ပို့ဆောင်ကာ အရောင်းအဝယ် ဖြစ်လျက်ရှိကြောင်း သိရသည်။  ၂၀၂၅ ခုနှစ်၊ ယခုအောက်တိုဘာလ တတိယပတ် အတွင်း ထားဝယ်မြို့၊ ကမ်းနားဈေးတွင် ဖြစ်ပေါ် နေသော ကန်ဇွန်းရွက် ဈေးနှုန်းများမှာ ကန်ဇွန်းရွက် လက်လီဈေး တစ်စီးလျှင်(၅၀၀)ကျပ်၊  ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(တနင်္သာရီ)

       တနင်္သာရီတိုင်းဒေသကြီး၊ ထားဝယ်မြို့တွင် ရာသီပေါ်သီးနှံများကို စိုက်ပျိုးရောင်းချ လျက်ရှိရာ ယခုအခါ ပဲစောင်းလျားသီးများကို မိမိတို့နေအိမ် ခြံဝင်းများတွင်လည်းကောင်း၊ မိမိပိုင် လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ ထားဝယ်မြို့ ပေါ်ရှိ စည်ပင်သာယာဈေးနှင့် ရပ်ကွက်ဈေးများတွင် လာရောက်ရောင်းချကြကြောင်း သိရှိရပါ သည်။  အိမ်ရှင်မများမှ ပဲစောင်းလျားသီးကို ပြုတ်၍ မြေပဲဆံ၊ ပဲမှုန့်တို့ဖြင့် သုပ်စားကြသလို ငပိရည်နှင့်တွဲဖက်၍ အတို့အမြုပ်၊ငရုပ်သီးစိမ်းဖြင့်ကြော်၍ စားသုံးကြပါသည်။

          ၂၀၂၅ ခုနှစ်၊ အောက်တိုဘာလ တတိယပတ်တွင် ထားဝယ်မြို့၊ စည်ပင်သာယာဈေးတွင် ပဲစောင်း လျားသီးတစ်တောင့်လျှင် (၁၀၀/-)ကျပ်၊ ၁၃တောင့်လျှင် (၁၀၀၀/-)ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ ထားဝယ်တွင် အုန်းပင်စိုက်ပျိုးသူများပြားပြီး အုန်းသီးစိမ်း အနု ရောင်းချသူများရှိကြောင်း သိရသည်။ ထားဝယ်မြို့နယ်တွင် အုန်းသီးနုရည်ကို ဈေးကြီးများနှင့် လမ်းဘေးဈေးသည်များ၊ သုံးဘီများဖြင့် လှည့်လည်ရောင်းချလျက်ရှိကြသည်။ အုန်းစိမ်းရည် ရောင်းချရန်အတွက် အုန်းစိမ်းရည်ကို ဒေသတွင်းစားသူံးသူများသောကြောင့် ဈေးကွက်ချဲ့ထွင် သူများ များ ရှိလာသည်။ အုန်းစိမ်းရည်များကို အုန်းချိုမွှေးနှင့် အုန်းဂျယ်လီများလည်း ပြုလုပ်ရောင်းချ ကြကြောင်းလည်း သိရှိရပါသည်။

    ၂၀၂၅ခုနှစ်အောက်တိုဘာလ ၂၀ရက် တွင် ထားဝယ်မြို့ပေါ်တွင်  အုန်းစိမ်းရည် တစ်လုံးလျှင် (၄၀၀၀)ကျပ်နှင့် (၄၅၀၀)ကျပ်၊ အုန်းသီးအရင့် တစ်လုံး ၃၅၀၀၊ ကြွက်မြီးဆွဲ ၆၀၀၀ကျပ်ဖြင့် ရောင်းချနေကြောင်း အုန်းစိမ်းရည်ရောင်းသူထံမှ သိရှိရပါသည်။

DOCA(တနင်္သာရီ)