ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်သည်ရေမြေသဘာဝအရ တောင်ကျချောင်းကြီး(၃)ခု စီးဆင်းလျက်ရှိပြီး စိုက်ပျိုးရေးကို အဓိကထားပြီး အသက်မွေးဝမ်းကြောင်း လုပ်ကိုင်၍ အဆင်ပြေလျက်ရှိပါသည်။ စပါး၊ မတ်ပဲတို့ကိုအဓိက စိုက်ပျိုးထားရှိသည့်အပြင် ဂေါ်ဖီ၊ ငရုတ်၊ သခွားကဲ့သို့ ရာသီပေါ်သီးနှံများလည်း စိုက်ပျိုးထွက်ရှိပါသည်။

      အုတ်ဖိုမြို့နယ်မှထွက်သော ငရုတ်သီးစိမ်းသည် ဈေးကောင်းရရှိသဖြင့် တောင်ယာသမားများ အများအပြားစိုက်ပျိုးလျက်ရှိရာ ကျေးရွာအုပ်စုအနေဖြင့် (၁၁)အုပ်စု ကျေးရွာခွဲ (၁၅)ရွာခန့် စီးပွားဖြစ်စိုက်ပျိုးလျက်ရှိပါသည်။ မျိုးများအနေဖြင့် (၁)‌ညောင်ရန်း၊ (၂) မိုးမျှော်၊ (၃)ပင်နမ် စသောမျိုးများ အဓိကစိုက်ပျိုးကြပါသည်။ ၎င်းမျိုးများမှာ ကြာရှည်အထားခံပြီး ဈေးကောင်းရသောကြောင့်ဟု သိရသည်။ ငရုတ်စိုက်(၁)ဧကလျှင် ပိဿာ ၇၀၀ခန့်အထိရရှိပြီး ရန်ကုန်ဈေးကွက်သို့ အဓိကထားတင်ပို့ရကြောင်း သိရှိရသည်။ ငရုတ်သီးစိုက်ပျိုးခြင်းသည် အချိန်တိုအတွင်းဝင်ငွေကောင်းသဖြင့် တောင်သူများ တွက်ခြေကိုက်ကြောင်း သိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့မဈေးကြီးအတွင်းရောင်းချနေသော ကြက်ဥ၊ ဘဲဥလက်လီဈေးနှုန်းများမှာ အောက်တိုဘာလတတိယပတ်တွင်  ကြက်ဥကြီးတစ်လုံးလျှင် ၄၀၀ကျပ်၊ ကြက်ကလတ်တစ်လုံးလျှင် ၃၇၀ကျပ်၊ ကြက်ဥသေးတစ်လုံးလျင် ၃၂၀ ကျပ်ဈေးနှုန်းတို့ဖြင့် အရောင်းအဝယ်ဖြစ်နေကြပါသည်။

             ဘဲဥဈေးနှုန်းများမှာ ဘဲဥကြီးတစ်လုံးလျှင် ၅၀၀ကျပ်၊ ဘဲဥလတ်တစ်လုံးလျှင် ၄၅၀ကျပ်၊ ဘဲဥသေးတစ်လုံးလျှင် ၄၀၀ကျပ် ဈေးနှုန်းတို့ဖြင့် ရောင်းချလျက်ရှိပါသည်။ မိုးရာသီတွင်  ပေါများလာသောငါးလေးများကြောင့် ကြက်ဥ၊ ဘဲဥရောင်းချမှုနည်းလာကာ တစ်နေ့ရောင်းချမှုမှာ   အလုံးရေပေါင်း (၈၀၀ မှ ၁၂၀၀)လုံးခန့် ရောင်းချရကြောင်း ကြက်ဥ၊ ဘဲဥရောင်းချသူတစ်ဦးထံမှ  သိရှိရပါသည်။

DOCA(ပဲခူး)

              ငါးဖောင်ရိုးငါးသည် နှုတ်သီးချွန်ချွန်၊ အရောင်ကြည်ကြည်နဲ့ ပိန်သွယ်သွယ်ငါးမျိုးဖြစ်သော်လည်း အသားမှာတော့ မာမာလေးဖြစ်ပါသည်။ ငါးဖောင်ရိုးဟုခေါ်သော်လည်း ထိုငါးမှာ အလယ်ရိုးတစ်ရိုးသာပါသောကြောင့် အရိုးများတဲ့ငါးကိုကြောက်တတ်ကြတဲ့ စားသုံးသူတွေေအတွက် စားသုံးဖို့သင့်တော်သောငါးမျိုးလည်း ဖြစ်ပါသည်။ ငါးဖောင်ရိုးငါးမှာ နှုတ်သီးချွန်ချွန်၊ အရောင်ကြည်ကြည်လေးနှင့် ပိန်သွယ်သွယ်ငါးတစ်မျိုးဖြစ်သော်လည်း ငါးအသားမှာတော့ မာဆတ်ဆတ်လေးဖြစ်နေပါသည်။ သူ့ခန္ဓာကိုယ်သည် ငွေမှင်ရောင်နှင့် အစိမ်းရောင်လဲ့လဲ့စပ်ထား သည့် အရောင်မျိုးရှိကြပါသည်။ ငါးဖောင်ရိုးငါးမှာ တစ်ခြားငါးများကဲ့သို့ အကြေးခွံများကို မမြင်ရသော်ငြား ငါးကိုယ်ထည်လေးကိုလက်သည်းနှင့် အသာခြစ်ယူလိုက်ပါကအရောင်ကြည်ကြည် အကြေးခွံသေးသေးလေးတွေကို ဖယ်ရှားပြီးသားဖြစ်သွားပါလိမ့်မည်။ ထိုငါးသည် ရေချိုနှင့် ရေငန်စပ်တို့တွင် နေထိုင်ကျက်စားတတ်သည်ကို တွေ့ရှိရပါသည်။  စားသုံးသူများမှာ ငါးဖောင်ရိုးငါးအစိုကို အကြွပ်ကြော်၊ ငါးဖောင်ရိုးအိုးကပ်၊ ငါးဖောင်ရိုးခရမ်းချဉ်သီးအစပ်ချက်၊ ငါးဖောင်ရိုးချဉ်စပ်ဟင်းဟူ၍ ချက်စားတတ်ကြပြီး ငါးဖောင်ရိုးခြောက်ကိုမူ ကင်စား၊ ကြော်စား ခြင်းများပြုလုပ်ကြပါသည်။ ထိုငါးဖောင်ရိုးခြောက်ငါးများကို ရာသီပေါ်ချိန်တွင်သာ ဈေးကောင်းကောင်းပေး၍ စားသုံးသူများမှ ဝယ်ယူစားသုံးကြပြီး ဈေးကွက်ထဲတွင် ပစ္စည်းပြတ်လပ်သည်အထိ အရောင်းအဝယ်သွက်သော နာမည်ကြီးငါးခြောက် တစ်မျိုးဖြစ်ပါသည်။ ငါးဖောင်ရိုးခြောက်ကို စက်တင်ဘာလ စတုတ္ထပတ်မှစတင်၍ ဈေးများတွင်တွေ့ရှိရပြီး ပေါ်ဦးပေါ်ဖျားတွင်အကောင်ကြီး တစ်ပိဿာလျှင် ကျပ် (၅၇ဝဝဝိ)၊ အကောင်လတ်တစ်ပိဿာလျှင် (၅ဝဝဝဝိ) ကျပ်ရှိပြီး၊ ယခုအောက်တိုဘာလ တတိယပတ်တွင် တစ်ပိဿာလျှင် အကောင်ကြီးတစ်ပိဿာလျှင် ကျပ် (၅ဝဝဝဝိ)ကျပ်၊ အကောင်လတ်တစ်ပိဿာလျှင် (၄ဝဝဝဝိ) ကျပ်ရှိပြီး ဈေးကြီးသော်လည်း စားသုံးသူများပြားသည့်အတွက် ဈေးကွက်တွင်ပစ္စည်းများ ပြတ်လပ်သည်အထိ အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

                 ပြည်ကုန်စည်ဒိုင်သည် သွားလာရေးအချက်အခြာကျသော ပြည်မြို့တွင်ရှိသောကြောင့် ပဲမျိုးစုံအရောင်းအဝယ် သွက်လျက်ရှိပါသည်။

           အောက်တိုဘာလတတိယပတ်တွင် မတ်ပဲတစ်တင်းကို (၁၂၃၅၀၀)ကျပ်ဖြင့် ရန်ကုန်အဝယ် တစ်ရက်ကိုအိတ် (၁၅၀)ခန့်ရှိပါသည်။ ပဲစင်းငုံဈေးမှာအေးလျက်ရှိပြီး တစ်တင်းကို (၁၅၂၀၀၀)ကျပ် ဖြင့် အရောင်းအဝယ်ရှိပြီး ရန်ကုန်သို့တစ်ရက်ကိုအိတ် (၁၅၀)ခန့်တင်ပို့မှုရှိပါသည်။ ပြည်ကုန်စည်ဒိုင်၏ အောက်တိုဘာလတတိယပတ်တွင် ကုလားပဲ(HL)တစ်တင်းကို (၁၀၂၅၀၀-၁၀၃၀၀၀)ကျပ်၊ မြကြေးမှုံတစ်တင်းကို (၁၂၂၀၀၀)ကျပ်ဖြင့် မြို့တွင်းခွဲစက်သမားများ တစ်ရက်ကို အိတ်(၂၅၀)ခန့် အဝယ်ရှိပါသည်။ ပဲကြီး(ရွှေကျွန်း)တစ်တင်းကို (၉၂၀၀၀)ကျပ်၊ ပဲကြီး(ကုန်းပဲ) တစ်တင်းကို (၈၇၀၀၀)ကျပ်ဖြင့် မြို့တွင်းပဲကြော်သမားနှင့် ရန်ကုန်အဝယ်တစ်ရက်ကိုအိတ် (၂၅၀-၃၀၀)ခန့် အဝယ်ရှိပါသည်။

         အောက်တိုဘာလတတိယပတ်တွင် ဘိုကိတ်ပဲတစ်တင်းကို (၁၀၀၀၀၀)ကျပ်ဖြင့် မြို့တွင်းနှင့် ရန်ကုန်အဝယ်တစ်ရက်ကိုအိတ် ၁၀၀-၁၅၀ခန့် အဝယ်ရှိပါသည်။ အောက်တိုဘာလတတိယပတ် ပြည်ကုန်စည်ဒိုင်တွင် စားတော်ပဲတစ်တင်းကို (၁၃၀၀၀၀)ကျပ်ဖြင့် မြို့တွင်းအဝယ်တစ်ရက်ကို အိတ် (၅၅)အိတ်ခန့်အဝယ်ရှိပါသည်။ ထို့ကြောင့် ပြည်ကုန်စည်ဒိုင်တွင် အရောင်းအဝယ်သွက်လျက်ရှိသောပဲများမှာ ကုလားပဲ၊ မတ်ပဲ သီးနှံများဖြစ်ပါသည်။

DOCA(ပဲခူး)

           ပြည်ခရိုင်အနေဖြင့် မိုးစပါးစိုက်ဧကမှာ ပြည်မြို့နယ်တွင် ၇၃၆၄၂ဧက၊ ပေါက်ခေါင်းမြို့နယ်တွင် ၄၆၇၅၇ဧက၊ ပန်းတောင်းမြို့နယ်တွင် ၄၆၉၅၃ဧက၊ ရွှေတောင်မြို့နယ်တွင် ၅၈၁၆၃ဧက ဖြင့် စုစုပေါင်း ၂၂၆၄၉၇ဧက စိုက်ပျိုးထားရှိပါသည်။ ယခင်နှစ်မိုးစပါးပေါ်စအချိန်တွင် (၄၆)ပေါင်တင်း (၁၀၀)လျှင် (၁၆၅၀၀၀၀)ကျပ်ရှိခဲ့ပြီး ယခုနှစ်၌ ပြည်ခရိုင်တွင် မိုးစပါးများထွက်ပေါ်မှုမရှိသေးသော်လည်း နတ်တလင်းခရိုင်၊ သဲကုန်းမြို့နယ်တွင် စပါးအသစ်များအရောင်းအဝယ်ဖြစ်လျက်ရှိရာ (၄၆)ပေါင်တင်း(၁၀၀)လျှင် ၁၅၀၀၀၀၀ကျပ်၊ ဆန်တစ်အိတ်လျှင် (၆၈၀၀၀) ကျပ်ဈေးဖြင့် ရောင်းဝယ်လျက်ရှိပါသည်။ ပြည်ခရိုင်အနေဖြင့် စိုက်ပျိုးသောစပါးမျိုးများမှာ ဧည့်မထစပါး၊ GW-11 နှင့် ထိုင်းနှံကောက်၊ အင်းမနှင့် မှော်ဘီစပါးများကို အများဆုံးစိုက်ပျိုးကြကြောင်းသိရှိရပါသည်။

DOCA(ပဲခူး)